ʻOku ʻAlu Atu ʻa e Tokoni Honge!

‘KO E faʻahinga honge fēfē?’ ko haʻo fehuʻi nai ia. Ko ha honge fekauʻaki mo e meʻakai fakalaumālie! Naʻe tomuʻa tala ʻa e hongé ni ʻe ha palōfita Hepelū ʻo e kuonga muʻá: “Talaatu ʻoku ʻunu mai ha taimi—ko Atonai Sihova ia mei he Taʻehamai—ʻa ia te u fekau atu ai ha honge ki he fonua; ʻo ʻikai ko ha honge meʻakai, pe ko e honge meʻainu, ka ko e honge ʻi he fanongo ki he folofola ʻa Sihova.” (Emosi 8:11) Ke tokoni ke feau ʻa e honge fakalaumālié, ko e kau mēmipa ʻe toko 48 ʻo e kalasi hono 112 ʻo e Akoʻanga Tohitapu Taua Leʻo ko Kiliatí, ʻoku tuʻu ʻi Patterson, Niu ʻIoké, ʻoku nau ʻalu atu ki he ngaahi fonua kehekehe ʻe 19 ʻi he ngaahi konitinēniti ʻe 5 mo e ngaahi ʻotu motu ʻo e tahí.

ʻOku nau ʻalu atu ʻosi mateuteu, ʻo ʻikai ʻi he kakanoʻi manu mo e uite moʻoni, ka ko e ʻilo, taukei, mo e ako. ʻI he māhina ʻe nima naʻa nau kau ai ʻi he ako Tohitapu fakalahi naʻe faʻufaʻu ke ne fakaivia ʻenau tuí ki he ngāue fakamisinale ʻi he ngaahi malaʻe mulí. ʻI Maʻasi 9, 2002, naʻe fanongo fiefia ai ʻa e toko 5,554 naʻa nau maʻu ʻa e polokalama foaki tohi fakamoʻoni akó.

Ko Stephen Lett, ʻa ia ʻoku ngāue ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne fakaava loto-māfana ʻa e polokalamá. Naʻá ne fai ha talitali lelei makehe ki he kau ʻaʻahi tokolahi mei he ngaahi tafaʻaki kehekehe ʻo e māmaní. Naʻá ne hoko atu leva ʻo ngāueʻaki ʻa e ngaahi lea ʻa Sīsū, “Ko kimoutolu ko e māma ʻo mamani” ki he ngāue ʻa e kau misinale ʻi he kahaʻú. (Mātiu 5:14) Naʻá ne fakamatala: ‘ʻI homou ngaahi ngafa ngāué te mou “fakamaama” ai ʻa e ngaahi tafaʻaki kehekehe ʻo e ngaahi ngāue fakaofo ʻa Sihová, ʻo fakaivia ai ʻa e faʻahinga loto-totonú ke nau sio ki he lelei ʻo Sihová mo ʻene ngaahi taumuʻá.’ Naʻe fakalototoʻaʻi ʻe Tokoua Lett ʻa e kau misinalé ke nau ngāueʻaki ʻa e maama ʻo e Folofola ʻa e ʻOtuá ke fakaeʻa ai ʻa e fakapoʻuli ʻo e ngaahi tokāteline loí pea ʻoatu ʻa e tataki ki he kau kumi ki he moʻoní.

Mahuʻinga ʻa e Fakakaukau Totonú ki he Lavameʻá

ʻI he hili ʻa e lea talitali ʻa e tokotaha-seá, ko Baltasar Perla, ko ha mēmipa ʻo e Kōmiti Vaʻa ʻo e ʻIunaite Seteté, naʻá ne fai ʻa e ʻuluaki malanga ʻo ha ngaahi malanga hokohoko naʻe faʻufaʻu ke ne tokoniʻi ʻa e kau maʻu tohi fakamoʻoni akó ke nau hoko ko e kau misinale lavameʻa. Naʻá ne fakahoko ʻa e kaveinga “Ke Ke Malohi Koe mo Ke Toʻa Lahi, mo Gaue.” (1 Kalonikali 28:​20, PM) Ko Tuʻi Solomone ʻo ʻIsileli ʻo e kuonga muʻá naʻá ne maʻu ha ngafa ngāue faingataʻa ʻa ia ko hono fai ʻa e meʻa naʻe ʻikai ʻaupito te ne fai ki muʻa—ko e langa ʻo ha temipale ʻi Selusalema. Naʻe ngāue ki ai ʻa Solomone, pea ʻi he tokoni ʻa Sihová naʻe kakato ai ʻa e temipalé. ʻI hono ngāueʻaki ʻa e lēsoní ki he kalasí, naʻe pehē ʻe Tokoua Perla: ‘Kuo mou maʻu ha ngafa ngāue foʻou, ʻa ia ko e hoko ko ha misinale, pea ʻoku fiemaʻu ke mou loto-toʻa mo mālohi.’ Ko hono moʻoní, naʻe maʻu ʻe he kau akó ʻa e fiemālie ʻi hono fakapapauʻi atu ʻe ʻikai tukuange pe liʻaki kinautolu ʻe Sihova lolotonga ʻenau nofo ofi kiate iá. Naʻe ueʻi ʻe tokoua Perla ʻa e kau fanongó ʻaki ʻene fakaʻosiʻaki ʻa e fakamatala fakafoʻituitui: ‘Te mou malava ke fakahoko ʻa e meʻa lelei lahi ʻi he tuʻunga ko e kau misinalé. Ko e kau misinale naʻa nau ʻomai ʻa e moʻoní ki hoku fāmilí pea mo aú!’

 “Hanga kia Sihova ki ha Lavameʻa” ʻa e kaveinga ʻo e malanga naʻe fai ʻe Samuel Herd, ko e toe mēmipa ia ʻo e Kulupu Pulé. ʻOku teuteu ʻa e kau akó ke kamata ʻi ha ngāue tuʻumaʻu ʻi he ngāue fakamisinalé, pea ko ʻenau lavameʻá ʻoku fakatuʻunga lahi ia ʻi honau vahaʻangatae mo Sihová. Naʻe enginaki ʻa Tokoua Herd kiate kinautolu: ‘Kuo mou tānaki ʻa e ʻilo lahi fekauʻaki mo e Tohitapú fakafou ʻi hoʻomou ngaahi ako ʻi Kiliatí. Kuo mou tali fiefia ia. Ka ʻi he taimi ní, ke lavameʻa moʻoní, te mou hoko atu ke kamata hono foaki atu ʻa e meʻa naʻa mou akó.’ (Ngāue 20:35) ʻE maʻu ʻe he kau misinalé ʻa e ngaahi faingamālie lahi ke fai ai ʻa e meʻá ni ʻi heʻenau ‘lilingi atu kinautolu’ maʻá e niʻihi kehé.—Filipai 2:17.

Ko e hā ʻa e akonaki fakamāvae ʻa e kau faiakó ki he kau akó? Naʻe fakatuʻunga ʻe Mark Noumair ʻene kaveingá ʻi he Lute 3:​18, “Nofo Pē, Kae ʻOua Kuó Ke ʻIlo Pe ʻe Iku ki he Hā ʻa e Ngaahi Meʻá.” ʻI hono ngāueʻaki ʻa e faʻifaʻitakiʻanga ʻa Nāomi mo Luté, naʻe fakalototoʻaʻi ʻe he tokotaha malangá ʻa e kau maʻu tohi fakamoʻoni akó ke nau falala kakato ki he ngaahi fokotuʻutuʻu kuo fokotuʻu ʻe he kautaha fakaemāmani ʻa e ʻOtuá pea ke tokaʻi ʻa e mafai fakateokalatí. ʻI he laveʻi ʻa e loto ʻo e kau akó, naʻe pehē ʻe Tokoua Noumair: ‘ʻE ʻi ai nai ha ngaahi taimi heʻikai te mou mahinoʻi ai ʻa e ʻuhinga ʻoku uesia ai kimoutolu ʻe ha fili naʻe fai, pe te mou maʻu nai ha ngaahi ongoʻi mālohi fekauʻaki mo ha meʻa ʻoku totonu  ke fai ia ʻi ha founga kehe. Ko e hā te mou faí? Te mou tuʻu hake ʻo fai ʻa e meʻá ʻiate kimoutolu pē pe te mou “nofo pē,” ʻo falala ki he tataki ʻa e ʻOtuá, ʻo tuipau, ʻi he faai mai ʻa e taimí, ko e meʻa pē ʻoku leleí te ne ʻai ke hoko maí.’ (Loma 8:28) Ko e faleʻi ke ‘tokangataha ʻi hono ʻai ke laka ki muʻa ʻa e ngaahi meʻa ʻo e Puleʻangá, ko e tokanga ki he meʻa ʻoku fai ʻe he kautaha ʻa Sihová kae ʻikai ko e ngaahi angaʻitangatá,’ ʻe fakamoʻoniʻi taʻetoeveiveiua ʻa ʻene mahuʻinga ki he kau misinale ʻi he kahaʻú ʻi honau ngaahi ngafa ngāue mulí.

Ko Wallace Liverance, ʻa ia ko iá tonu naʻe hoko ko ha misinale pea ʻokú ne hoko he taimí ni ko ha faiako ʻi Kiliati, naʻá ne fai ʻa e malanga fakaʻosi ʻi he ʻuluaki ngaahi malanga hokohokó. Ko e kaveinga ʻo ʻene malangá ko e “Nofo Tokangataha, Nofo ʻi he Ngāue ʻa e ʻOtuá.” Naʻá ne fakahāhaaʻi naʻe ʻiloʻi ʻe he palōfita ko Tanielá mei he sio ki he tō ʻa Pāpiloné pea mei he meʻa naʻe tomuʻa tala ʻe Selemaiá naʻe ofi ʻa e fakatauʻatāinaʻi ʻo e kau ʻIsilelí mei he nofo pōpulá. (Selemaia 25:11; Taniela 9:2) Naʻe ʻi ai ha ʻilo ʻa Taniela ki he taimi-tēpile ʻa Sihová, pea naʻe tokoni ia kiate ia ke ne nofo tokangataha ai ki hono fakahaaʻi mai ʻa e taumuʻa ʻa e ʻOtuá. ʻI hono kehé, naʻe pehē ʻe he kau ʻIsilelí ia ʻi he taimi ʻo e palōfita ko Hākeaí: “Kuo teʻeki taimi.” (Hakeai 1:2) Naʻe ʻikai te nau tokangataha ki he taimi naʻa nau moʻui aí, ka naʻa nau hoko ʻo tokangataha ki heʻenau ngaahi fiemālie mo e lavameʻa pē ʻa kinautolú, pea liʻaki ai ʻa e ngāue ʻa ia naʻe fakatauʻatāinaʻi ai kinautolu mei Pāpiloné, ko hono toe langa ʻa e temipalé. Naʻe fakaʻosiʻaki ʻe Tokoua Liverance: “Ko ia, nofo tokangataha ʻaki hono tauhi ʻa e taumuʻa ʻa Sihová ʻi he ʻatamaí ʻi he taimi kotoa pē.”

Ko e faiako Kiliati ko Lawrence Bowen naʻá ne tokangaʻi ha konga ko hono kaveingá “ʻOku Tāpuakiʻi ʻe Sihova ʻa e Faʻahinga ʻOku Nau Ngāueʻaki ʻa e Folofola Moʻuí.” (Hepelu 4:12) Naʻe fekauʻaki ʻa e konga ko ʻení mo e ngaahi meʻa naʻe hokosia ʻe he kalasí ʻi he malaʻe ngāué, ʻo fakaeʻa ai ʻa e founga hono tāpuakiʻi ʻe Sihova ʻa e faʻahinga ʻoku nau ngāueʻaki ʻa e Tohitapú ʻi heʻenau malangá mo e faiakó. Naʻe fakahaaʻi ʻe he tokotaha fakamāʻopoʻopó ʻo pehē kuo fokotuʻu ʻe Sīsū Kalaisi ha faʻifaʻitakiʻanga lelei ki he kau faifekau kotoa ʻa e ʻOtuá: ‘Naʻe malava ʻe Sīsū ke ne lea moʻoni ʻaki ko e meʻa naʻá ne akoʻí naʻe ʻikai tupu meiate ia, ka naʻá ne lea mei he Folofola ʻa e ʻOtuá.’ Naʻe fakatokangaʻi ʻe he faʻahinga loto-totonú ʻa e moʻoní pea nau fai ha tali lelei ki ai. (Sione 7:​16, 17) ʻOku hoko ʻa e meʻa tatau pē ʻi he ʻahó ni.

ʻOku Teuʻi Kita ʻe he Ako Kiliatí ki he Ngāue Lelei Kotoa Pē

Ko hono hokó, ko e ongo mēmipa ngāue fuoloa ʻo e fāmili Pētelí ko Richard Abrahamson mo Patrick LaFranca naʻá na fakaʻekeʻeke ha kau maʻu tohi fakamoʻoni ako Kiliati ʻe toko ono ʻa ia ʻoku nau lolotonga ngāue ʻi he ngaahi tuʻunga kehekehe ʻo e ngāue taimi-kakato makehé. Ko e kau maʻu tohi fakamoʻoni ako ʻo e kalasi hono 112 naʻe fakalototoʻaʻi ʻi he fanongo ki he toko ono ko iá, ʻi he ʻosi ʻa e ngaahi hongofuluʻi taʻu, neongo honau ngafa ngāue lolotongá, ʻoku nau hokohoko atu ke ngāueʻaki ʻa e ako naʻa nau maʻu ʻi Kiliatí ʻi he fekauʻaki mo e ako Tohitapú, ngaahi fekumí pea ʻi he fetaulaki lelei mo e kakaí.

Ko Theodore Jaracz, ko ha mēmipa ʻo e Kulupu Pulé, naʻá ne fai ʻa e malanga tefito ʻo e polokalamá. Naʻe fakakaveinga ia ko e “Meʻa ʻOku Lavaʻi ʻe he Kātakiʻi ʻo e Tāufehiʻa Fakasētané.” ʻI he lolotonga ʻa e māhina ʻe nima kuo maliu atú, naʻe nofo ai ʻa e kau akó ʻi ha ʻātakai ʻofa mo fakateokalati. Kae kehe, hangē ko ia naʻe fakahaaʻi ʻe heʻenau ngaahi ako ʻi loki akó, ʻoku tau moʻui ʻi ha māmani fakafili. ʻOku ʻohofi ʻa e kakai ʻa Sihová ʻi māmani kātoa. (Mātiu 24:9) ʻI hono ngāueʻaki ha ngaahi fakamatala mei he Tohitapú, naʻe fakahaaʻi ai ʻe Tokoua Jaracz ʻo pehē ‘ko kitautolú ko ha tāketi makehe ʻa e Tēvoló. Kuo pau ke tau fakaivimālohiʻi hotau vahaʻangatae mo Sihová pea hoko ʻo mālohi ke fetaulaki mo e ngaahi ʻahiʻahí.’ (Siope 1:8; Taniela 6:4; Sione 15:20; Fakahā 12:​12, 17) Naʻe fakaʻosiʻaki ʻe Tokoua Jaracz ʻo pehē neongo ʻa e tāufehiʻa hokohoko ki he kakai ʻa e ʻOtuá, ‘ʻoku ʻikai ha mahafu ʻoku faʻu ke fai ʻaki ha kovi kiate kitautolu, hangē ko ia ʻoku leaʻaki ʻe he Aisea 54:​17, ʻe siaʻa. ʻE fakapapauʻi ʻe Sihova ke fakahaofi kitautolu ʻi heʻene taimi mo ʻene founga ʻaʻaná.’

ʻI he “ʻosi teuʻi kakato,” ʻe ʻikai ha toe veiveiua ko e kau maʻu tohi fakamoʻoni ako ʻo e kalasi hono 112 te nau fai ʻa e meʻa lahi ki hono tokoniʻi ʻa e honge meʻakai fakalaumālie ʻi he ngaahi fonua te nau ngāue aí. (2 Timote 3:​16, 17, NW) ʻOku tau fakatuʻamelie loto-vēkeveke atu ki he ngaahi līpooti fekauʻaki mo e founga ʻo ʻenau ʻoatu ʻa e pōpoaki fakatupu ivi mālohi ki he kakai ʻi he ngaahi fonua ko ʻení.

[Puha ʻi he peesi 23]

TOKOLAHI ʻO E KALASÍ

Fika ʻo e ngaahi fonua naʻe fakafofongaʻí: 6

Fika ʻo e ngaahi fonua naʻe vaheʻi ki aí: 19

Tokolahi ʻo e kau akó: 48

ʻAvalisi ʻo e taʻumotuʻá: 33.2

ʻAvalisi ʻo e ngaahi taʻu ʻi he moʻoní: 15.7

ʻAvalisi ʻo e ngaahi taʻu ʻi he ngāue fakafaifekau taimi-kakató: 12.2

[Fakatātā ʻi he peesi 24]

Kalasi Maʻu Tohi Fakamoʻoni Ako Hono 112 ʻa e Akoʻanga Tohitapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, pea ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.