ʻOku ʻAi ke Fakaʻofoʻofa ʻe Sihova ʻEne Kakaí ʻAki ʻa e Maama
ʻOku ʻAi ke Fakaʻofoʻofa ʻe Sihova ʻEne Kakaí ʻAki ʻa e Maama
“Tuʻu hake, [ʻe fefine,] ulo; he kuo hoko mai hoʻo maama, pea kuo hopo kiate koe ʻa e kololia ʻo Sihova.”—AISEA 60:1.
1, 2. (a) Ko e hā ʻa e tuʻunga ʻo e faʻahinga ʻo e tangatá? (e) Ko hai ʻokú ne fakatupunga ʻa e fakapoʻuli ʻa e faʻahinga ʻo e tangatá?
“OI, ki ha ʻAisea pe ki ha Sangato Paula!” Ko e kalanga mamahi ia ʻa Palesiteni Harry Truman ʻo ʻAmeliká ʻi he taʻu 1940 tupú. Ko e hā naʻá ne leaʻaki ai ʻa e ngaahi lea ko iá? Koeʻuhí he naʻá ne ongoʻi ʻa e fiemaʻu ki ha kau taki mātuʻaki anga-taau ʻi he māmani ʻo hono taimí. Kuo toki fakalaka eni ʻa e faʻahinga ʻo e tangatá ʻi he vahaʻa taimi fakapoʻuli taha ʻo e senituli 20, ʻa e tau hono ua ʻa e māmaní. Kae kehe, neongo naʻe ʻosi ʻa e taú, naʻe ʻikai melino ʻa e māmaní ia. Naʻe kei fakapoʻuli pē. Ko e moʻoni, hili ʻa e taʻu ʻe 57 mei he ngata ʻa e tau ko iá, ʻoku kei fakapoʻuli pē ʻa e māmaní ia. Kapau naʻe kei moʻui ʻa Palesiteni Truman ʻi he ʻahó ni, te ne kei sio pē ki he fiemaʻu ko ia ha kau taki mātuʻaki anga-taau hangē ko ʻAisea pe ko e ʻapositolo ko Paulá.
2 Pe naʻe ʻilo ʻe Palesiteni Truman pe ʻikai, naʻe lea ʻa e ʻapositolo ko Paulá fekauʻaki mo e fakapoʻuli ʻoku tofanga ai ʻa e faʻahinga ʻo e tangatá, pea naʻá ne fakatokanga fekauʻaki mo ia ʻi heʻene ngaahi tohí. Ko e fakatātaá, naʻá ne fakatokanga ki hono kaungātuí: “Oku ikai koe tau fagatua moe kakano moe toto, ka ki he gaahi bule, moe gaahi malohi, moe kau bule oe fakabouli oe mamani, moe kau laumalie kovi i he gaahi botu i oluga.” (Efeso 6:12, PM, fakaʻītali ʻamautolu.) ʻI he ngaahi lea ko ení naʻe fakahaaʻi ai ʻe Paula naʻe ʻikai ngata pē ʻi heʻene lāuʻilo ki he fakapoʻuli fakalaumālie ʻokú ne kāpui ʻa e māmaní ka naʻá ne toe ʻiloʻi foki ʻa e matavai moʻoní—ko e ngaahi kongakau fakatēmeniō mālohi ʻoku fakamatalaʻi ko e ‘kau bule oe māmaní.’ Koeʻuhí ko e ngaahi laumālie mālohi ʻoku nau fakatupunga ʻa e fakapoʻuli ʻa e māmaní, ko e hā ʻe malava ke fai ʻe he meʻa launoa ko e tangata ke toʻo atu iá?
3. Neongo ʻa e tuʻunga fakapoʻuli ʻo e faʻahinga ʻo e tangatá, ko e hā naʻe tomuʻa tala ʻe ʻAisea fekauʻaki mo e kau faitōnungá?
3 Naʻe pehē pē mo e lea ʻa ʻAisea fekauʻaki mo e fakapoʻuli ʻoku tofanga ai ʻa e faʻahinga ʻo e tangatá. (Aisea 8:22; 59:9) Kae kehe, ʻi heʻene sio mai ki hotau ʻahó ni, naʻá ne tomuʻa tala ai ʻi hano fakamānavaʻi, naʻa mo e ʻi he ngaahi taimi fakapoʻuli ko ení, ʻe fakamaama ʻe Sihova ʻa e vakai ʻa e faʻahinga ʻoku nau ʻofa ki he māmá. ʻIo, neongo ʻoku ʻikai ke tau ʻi heni tonu mo Paula mo ʻAisea, ʻoku tau maʻu ʻena ngaahi fakamatala fakamānavaʻí ke tataki kitautolu. Ke sio ko ha tāpuaki ia ki he faʻahinga ʻoku nau ʻofa kia Sihová, tau fakakaukau angé ki he ngaahi lea fakaekikite ʻa ʻAisea ʻoku ʻi he Aisea 60 vahe hono 60 ʻo ʻene tohí.
Ko ha Fefine Fakaekikite ʻOkú Ne Hulu Mai ʻa e Maama
4, 5. (a) Ko e hā ʻoku fekauʻi ʻe Sihova ki ha fefine ke ne faí, pea ko e hā ʻa e talaʻofa ʻokú ne faí? (e) Ko e hā ʻa e fakamatala fakafiefia ʻoku ʻi he Aisea vahe 60?
4 Ko e ʻuluaki ngaahi lea ʻo e Aisea 60 ʻoku fakahanga ia ki ha fefine ʻoku ʻi ha tuʻunga fakamamahi ʻaupito—ʻi he fakapoʻulí, ʻoku tokoto foʻohifo ʻi he kelekelé. Fakafokifā pē, ʻoku hūhū mai ha maama ʻi he fakapoʻulí, pea ʻoku folofola mai ʻa Sihova: “Tuʻu hake, [ʻe fefine,] ulo; he kuo hoko mai hoʻo maama, pea kuo hopo kiate koe ʻa e kololia ʻo Sihova.” (Aisea 60:1) Kuo hoko ʻa e taimi ki he fefiné ke tuʻu hake pea tapua atu ʻa e maama ʻo e ʻOtuá, ʻa hono kolōliá. Ko e hā hono ʻuhingá? ʻOku tau sio ki he talí ʻi he veesi hono hokó: “Vakai ʻoku ʻufiʻufi ʻa mamani ʻe he poʻuli, mo e poʻuli matolu ʻa e ngaahi faʻahinga: kae hopo ʻa Sihova kiate koe, pea ʻe ha hono kololia ʻi ho funga.” (Aisea 60:2) ʻI he talangofua ʻa e fefiné ki he fekau ʻa Sihová, ʻoku fakapapauʻi ange kiate ia ha ola fakaofo. ʻOku folofola ʻa Sihova: “ʻE fononga mai ʻani [“ngaahi,” NW] puleʻanga ki hoʻo maama, moni tuʻi ki he malama ʻa hoʻo hopo hake.”—Aisea 60:3.
5 Ko e ngaahi lea fakafiefia ʻi he ngaahi veesi ʻe tolu ko ení ʻoku fakatou hoko ko e talateu mo ha fakanounou ʻo e meʻa ʻoku ʻi he toenga ʻo e Aisea vahe 60. ʻOku tomuʻa tala ai ʻa e ngaahi meʻa ʻoku hokosia ʻe he fefine fakaekikité pea ʻokú ne fakamatalaʻi ʻa e founga ʻe malava ke tau nofo ai ʻi he maama ʻa Sihová neongo ʻa e fakapoʻuli ʻoku nofo ʻi he faʻahinga ʻo e tangatá. Ko e hā leva, ʻoku ʻuhinga ki ai ʻa e ngaahi fakatātā ʻi he ngaahi veesi talateu ʻe tolu ko ení?
6. Ko hai ʻa e fefine ʻi he Aisea vahe 60, pea ko hai ʻokú ne fakafofongaʻi ia ʻi māmaní?
6 Ko e fefine ʻi he Aisea 60:1-3 ko Saione, ʻa e kautaha fakahēvani ʻa Sihova ʻo e ngaahi meʻamoʻui laumālié. ʻI he ʻahó ni, ʻoku fakafofongaʻi ʻa Saione ʻi māmani ʻe he toenga ʻo e faʻahinga ʻo e “Isileli oe Otua,” ʻa e fakatahaʻanga fakavahaʻapuleʻanga ʻo e kau Kalisitiane pani ʻe he laumālié, ʻa ia ʻoku nau maʻu ʻa e ʻamanaki ʻo e pule fakataha mo Kalaisi ʻi hēvani. (Kaletia 6:16, PM) Ko e puleʻanga fakalaumālie ko ení ʻe aʻu honau tokolahí ki he kau mēmipa ʻe toko 144,000, pea ko e fakahoko ʻi onopooni ʻo e Aisea vahe 60 ʻoku fakatefito ia ʻi he faʻahinga ko ia ʻoku nau kei moʻui ʻi māmani ʻi he “kuonga fakamui.” (2 Timote 3:1; Fakahā 14:1) ʻOku toe lahi foki mo e meʻa ʻoku leaʻaki ʻe he kikité fekauʻaki mo e ngaahi kaungāmeʻa ʻo e kau Kalisitiane pani ko ení, ʻa e “fuʻu kakai lahi” ʻo e “fanga sipi kehe.”—Fakahā 7:9; Sione 10:16.
7. Ko e hā ʻa e tuʻunga ʻo Saione ʻi he 1918, pea naʻe anga-fēfē hono ʻosi kikiteʻi ení?
7 Naʻe ʻi ai nai ha taimi naʻe tokoto ai ʻi he fakapoʻulí ʻa e “Isileli oe Otua,” ʻo hangē ko ia ʻoku fakatātaaʻi ʻe he fefine fakaekikité? ʻIo, naʻe hoko eni laka hake ʻi he taʻu ʻe 80 kuohilí. Lolotonga ʻa e ʻuluaki tau ʻa māmaní, naʻe fāinga mālohi ai ʻa e kau Kalisitiane paní ke kei lele ʻa e ngāue fakaefakamoʻoní. Ka ʻi he 1918, ʻa e taʻu fakaʻosi ʻo e taú, naʻe meimei tuʻu ai ʻa e ngāue fakamalanga naʻe fokotuʻutuʻú. Ko Joseph F. Rutherford, ʻa ia naʻá ne tokangaʻi ʻa e ngāue fakamalanga ʻi māmani lahí, pea mo e kau Kalisitiane tuʻu-ki-muʻa kehe, naʻe tautea nofo pōpula taimi lōloa kinautolu ʻi ha ngaahi tukuakiʻi loi. ʻI he tohi ʻa Fakahaá, ko e kau Kalisitiane pani ʻi māmani ʻi he taimi ko iá naʻe fakamatalaʻi fakaekikite ko e ongo ʻangaʻanga ʻokú na tokoto “ʻi he malaʻe ʻo e kolo lahi, ʻa ia ʻoku ui fakalaumalie ko Sotoma mo Isipite.” (Fakahā 11:8) Ko ha taimi fakapoʻuli moʻoni ia ki Saione, ʻa ia naʻe fakafofongaʻi ʻe heʻene fānau pani ʻi he māmaní!
8. Ko e hā ʻa e liliu fakaofo naʻe hoko ʻi he 1919, pea ko e hā hono olá?
8 Kae kehe, naʻe sio ʻa e taʻu 1919 ki ha liliu fakaofo. Naʻe hulu mai ʻe Sihova ha maama ki Saione! Ko e faʻahinga naʻe hao ʻi he ʻIsileli ʻo e ʻOtuá naʻa nau tuʻu hake koeʻuhi ke tapua atu ʻa e maama ʻa e ʻOtuá, ʻo toe fai taʻemanavahē ʻa hono fanongonongo ʻo e ongoongo leleí. (Mātiu 5:14-16) Fakamālō ki he faivelenga naʻe toe fakaake ʻi he kau Kalisitiane ko ení, naʻe tohoaki mai ai ha niʻihi kehe ki he maama ʻa Sihová. Ke kamataʻakí, ko e kau haʻu foʻoú naʻe pani kinautolu ko e kau mēmipa fakalahi mai ʻo e ʻIsileli ʻo e ʻOtuá. ʻOku ui kinautolu ko e ngaahi tuʻi ʻi he Aisea 60:3, koeʻuhi he te nau hoko ko e kaungāʻea mo Kalaisi ʻi he Puleʻanga fakahēvani ʻo e ʻOtuá. (Fakahā 20:6) Ki mui ai, ko ha fuʻu kakai lahi ʻo e fanga sipi kehé naʻe kamata ke tohoaki mai ki he maama ʻa Sihová. Ko e “ngaahi puleʻanga” eni ʻoku lave ki ai ʻi he kikité.
Haʻu ki ʻApi ʻa e Fānau ʻa e Fefiné!
9, 10. (a) Ko e hā ʻa e ʻata fakaholomamata naʻe fakafetaulaki mai ki he fefiné, pea ko e hā naʻe tomuʻa fakatātaaʻi ʻe he meʻá ni? (e) Ko e hā ʻa e ʻuhinga naʻe maʻu ʻe Saione ke fiefia aí?
9 ʻI he taimí ni, ʻoku kamata ke fakaikiiki mai ʻe Sihova, hangē ko ia kuo hokó, ʻa e fakamatala ʻoku ʻomai ʻi he Aisea 60:1-3. ʻOkú ne ʻoange ki he fefiné ha toe fekau ʻe taha. Fanongo ki he meʻa ʻokú ne folofolaʻakí: “Tangaki ho mata, ʻo sio takai.” ʻOku talangofua ʻa e fefiné, pea tā he foʻi ʻata fakalotomāfana moʻoni ʻoku fakafetaulaki mai kiate iá! Ko ʻene fānaú eni ʻoku nau haʻu ki ʻapi. ʻOku hoko atu ʻa e konga Tohitapú ke pehē: “ʻOku nau tanaki fakataha, ʻoku nau haʻu kiate koe: ʻoku haʻu ho ngaahi foha mei he mamaʻo, pea ko ho ngaahi ʻofefine ʻe fafa fakavakavaka.” (Aisea 60:4) Ko e fanongonongo ʻo e Puleʻangá ʻi māmani lahí ʻa ia naʻe kamata ʻi he 1919 kuó ne tohoaki mai ʻa e laui afe ʻo e faʻahinga foʻou ki he ngāue ʻa Sihová. ʻOku toe hoko mo e faʻahingá ni ko e “ngaahi foha” mo e “ngaahi ʻofefine” ʻo Saione, ko e kau mēmipa pani ʻo e ʻIsileli ʻo e ʻOtuá. Ko ia ai, kuo ʻai ke fakaʻofoʻofa ʻe Sihova ʻa Saione ʻaki hono ʻomai ʻa e faʻahinga fakaʻosi ʻo e toko 144,000 ki he māmá.
10 ʻE lava ke ke sioloto atu ki he fiefia ʻa Saione ʻi heʻene maʻu kiate ia ʻene fānaú? Neongo ia, ʻoku ʻomai ʻe Sihova ha toe ngaahi ʻuhinga ki he fiefia ʻa Saioné. ʻOku tau lau ai: “Ko e taimi ko ia te ke sio ki ai, pea maama ho fofonga, pea ʻe toutou ho loto ʻo fano, koeʻuhi ʻe leʻeia mai kiate koe ʻa e mahu ʻo e tahi, ʻe haʻu kiate koe ʻa e koloa ʻo e ngaahi puleʻanga.” (Aisea 60:5) ʻI he fehoanaki mo e ngaahi lea fakaekikite ko iá, talu mei he 1930 tupú, kuo ʻaukolo ki Saione ʻa e fuʻu tokolahi ʻo e kau Kalisitiane ʻa ia ko ʻenau ʻamanakí ke moʻui taʻengata ʻi he māmaní. Kuo nau haʻu mei he “tahi” ʻo e faʻahinga ko ia ʻo e tangatá kuo mavahe mei he ʻOtuá pea fakafofongaʻi ʻa e koloa ʻa e ngaahi puleʻangá. Ko kinautolu ia ʻa e “ngaahi meʻa manakoa mei he puleʻanga kotoa pē.” (Hakeai 2:7, NW; Aisea 57:20) Fakatokangaʻi foki, ko e “ngaahi meʻa manakoa” ko ení ʻoku ʻikai ke nau ʻalu atu ke tauhi kia Sihova ʻo taki taha fai ʻi heʻene founga. ʻIkai, ʻoku nau fakalahi atu ki he fakaʻofoʻofa ʻo Saioné ʻaki ʻenau haʻu ʻo lotu ʻi he feohi mo honau fanga tokoua paní, ʻo nau hoko ko e “takanga pe taha” mo kinautolu ʻi he malumalu ʻo e “taha pe ʻa e tauhi.” —Sione 10:16.
Kau Mēsianiti, Kau Tauhi-Sipi, mo e Kau Fefakatauʻaki ʻOku Nau Haʻu ki Saione
11, 12. Fakamatalaʻi ʻa e fuʻu kakai ʻoku hā ʻoku nau ngaʻunu atu ki Saioné.
11 Ko e ola ʻo e fakatahatahaʻi ko eni naʻe tomuʻa talá ko ha tupu anga-kehe ʻi he tokolahi ʻo e kau fakahīkihiki kia Sihová. Naʻe tomuʻa tala eni ʻi he ngaahi lea hoko mai ʻo e kikité. Sioloto atu ʻokú ke tuʻu fakataha mo e fefine fakaekikité ʻi Moʻunga Saione. ʻOkú ke vakai atu ki he hahaké, pea ko e hā ʻokú ke sio ki aí? “ʻE ʻufiʻufi koe ʻe ha fuʻufuʻunga kameli, ko e fanga kameli mui ʻa Mitiani mo Efa; te nau omi kotoa mei Sipa, ʻoku nau fetuku ʻa e koula mo e laipeno, pea te nau ongoongoa mai ʻa e ngaahi fakamalo ʻo Sihova.” (Aisea 60:6) Ko e fuʻu kakai tokolahi ʻo e kau mēsianiti ʻoku nau taki mai ʻenau ngaahi fononga kāmelí ʻi he ngaahi hala ʻoku huʻu ki Selusalemá. ʻIo, ko e fanga kāmelí ʻoku nau hangē ha tāfea ʻokú ne ʻufiʻufi ʻa e fonuá! ʻOku uta mai ʻe he kau fefakatauʻakí ʻa e ngaahi meʻaʻofa mahuʻinga, “ʻa e koula mo e laipeno.” Pea ʻoku haʻu ʻa e kau mēsianiti ko ení ki he maama ʻa e ʻOtuá koeʻuhi ke fakahīkihikiʻi fakahāhā ia, ke “ongoongoa mai ʻa e ngaahi fakamalo ʻo Sihova.”
12 Ko e kau mēsianití ʻoku ʻikai ko kinautolu pē ʻoku haʻú. ʻOku toe ʻaukolo mai mo e kau tauhi-sipí ki Saione. ʻOku hoko atu ʻa e kikité ʻo pehē: “Ko e takanga kotoa ʻo Keta ʻe tanaki mai kiate koe; ko e fanga sipi tangata ʻo Nepaote te nau nofo mai ke ʻaonga kiate koe.” (Aisea 60:7a) Ko e ngaahi matakali tauhi-sipí ʻoku nau haʻu ki he kolo tapú ke foaki ʻa e lelei taha mei heʻenau ngaahi tākangá kia Sihova. ʻOku aʻu ʻo foaki mo kinautolu ke ngāue ki Saione! ʻOku anga-fēfē hono talitali ʻe Sihova ʻa e kau muli ko ení? ʻOku tali mai ʻe he ʻOtuá tonu: “Ko e anga o ʻenau ʻalu hake ki hoku olita ʻoku longolongo hoifua, pea te u fakalangilangiʻi [“ʻai ke fakaʻofoʻofa,” NW] ʻa e fale ʻoku toka ai hoku langilangi.” (Aisea 60:7e) ʻOku tali lelei ʻe Sihova ʻa e ngaahi foaki mo e ngāue ʻa e kau muli ko ení. Ko ʻenau ʻi aí ʻoku fakaʻofoʻofa ai hono temipalé.
13, 14. Ko e hā ʻa e meʻa ʻoku mātā ʻoku haʻu mei he hihifó?
13 Tafoki angé he taimí ni ho ʻulú pea vakai ki he tafaʻaki langi fakahihifó. Ko e hā ʻokú ke sio ki aí? ʻI he mamaʻó, ʻoku hā mei ai ha meʻa hangē ha ʻao hinehina ʻoku mafola he fukahi tahí. ʻOku ʻeke ʻe Sihova ʻa e fehuʻi ʻoku ʻi ho ʻatamaí: “Ko hai ʻa kinautolu na ʻoku puna hange ko e ʻao, pe hange ko e fanga lupe ki honau ngaahi tupa?” (Aisea 60:8) ʻOku tali mai pē ʻe Sihova ʻene fehuʻí: “ʻOku tanaki mai kiate au ʻa e ngaahi motu, pea muʻomuʻa ʻa e ngaahi vaka Tasisi, ke ʻomi hoʻo fanau mei he mamaʻo, ʻo ʻomi ai ʻenau siliva mo e koula ki he huafa ʻo Sihova ko ho ʻOtua pea ki he Tapuha ʻo Isileli hono kuo ne fakalangilangiʻi [“ʻai ke fakaʻofoʻofa,” NW] koe.”—Aisea 60:9.
14 ʻE lava ke ke sioloto atu ki he meʻa ʻoku hokó? Ko e ʻao hinehina ko iá ʻoku ngaʻunu ofi ange mai pea ʻoku hā ia he taimí ni hangē ha pupunga piliote ki he tafaʻaki fakahihifó. ʻOku hā ia hangē ha laumanu ʻoku tatele ʻi he ngaahi peaú. Ka ʻi heʻenau kei ngaʻunu ofi maí, ʻokú ke sio atu koe ko e ngaahi vaka ia ʻoku fai-lā ki he matangí. ʻOku lahi fau ʻa e ngaahi vaka ʻoku folau ki Selusalemá ʻo hangē ia ha fuifui lupé. Mei he ngaahi taulanga mamaʻó, ʻoku folau mai ʻa e laulā vaká ʻi he oma tahá, ʻo ʻomi ʻa e kau tuí ki Selusalema ke lotu kia Sihova.
Tupu ʻa e Kautaha ʻa Sihová
15. (a) Ko e hā ʻa e tupu ʻoku tomuʻa tala ʻe he ngaahi lea ʻa Aisea 60:4-9? (e) Ko e hā ʻa e laumālie ʻoku fakahāhā ʻe he kau Kalisitiane moʻoní?
15 He fakatātā fakaekikite mahino moʻoni ia ʻoku fakatātaaʻi mai ʻe he Ai 60 veesi 4 ki he 9 fekauʻaki mo e tupu ʻi māmani lahi kuo hoko talu mei he 1919! Ko e hā naʻe tāpuekina ai ʻe Sihova ʻa Saione ʻaki ha tupu pehē? Koeʻuhí talu mei he 1919, ko e ʻIsileli ʻo e ʻOtuá kuo nau huhulu atu ʻi he talangofua mo e fai tuʻumaʻu ʻa e maama ʻa Sihová. Kae kehe, naʻá ke fakatokangaʻi ʻo fakatatau ki he Ai 60 veesi 7, ko e kau aʻu foʻou maí ʻoku nau ‘ʻalu hake ki he ʻolita [ʻo e ʻOtuá]’? Ko e ʻōlitá ko e feituʻu ia ʻoku fai ai ʻa e feilaulaú, pea ko e konga ko eni ʻo e kikité ʻokú ne fakamanatu mai kia kitautolu ko e ngāue ʻa Sihová ʻoku kau ai ʻa e feilaulau. Naʻe tohi ʻe he ʻapositolo ko Paulá: “Oku ou kole ai kiate kimoutolu . . . ke mou atu ho mou jino koe feilaulau moui, mo maonioni, mo lelei ki he Otua, aia koe gaue oku tāu mo kimoutolu ke fai.” (Loma 12:1, PM) ʻI he fehoanaki mo e ngaahi lea ʻa Paulá, ʻoku ʻikai ke fiemālie pē ʻa e kau Kalisitiane moʻoní ke ʻalu ki he ngaahi fakataha fakalotú tuʻo taha pē he uike. ʻOku nau foaki atu honau taimí, iví, mo ʻenau koloá ke poupouʻiʻaki ʻa e lotu maʻá. ʻIkai ʻoku hanga ʻe he ʻi ai ʻa e kau lotu anga-līʻoa peheé ʻo ʻai ke fakaʻofoʻofa ʻa e fale ʻo Sihová? ʻOku pehē ʻe he kikite ʻa ʻAiseá ʻe hoko ʻo pehē. Pea ʻe lava ke tau tuipau ko e kau lotu faivelenga peheé te nau toe hoko, ʻo fakaʻofoʻofa ʻi he vakai mai ʻa Sihová.
16. Ko hai naʻe tokoni ki he ngāue langa foʻou ʻi he ngaahi taimi muʻá, pea ko hai ia kuo fai pehē ʻi he ngaahi taimi ʻi onopōní?
16 ʻOku loto ʻa e kau haʻu foʻoú ke nau ngāue. ʻOku hoko atu ʻa e kikité ʻo pehē: “ʻE langa ho ngaahi ʻa ʻe he hakoʻi muli, pea ko honau ngaahi tuʻi ʻe nofo ke ʻaonga kiate koe.” (Aisea 60:10) ʻI hono fuofua fakahoko ʻa e ngaahi lea ko ení ʻi he ngaahi ʻaho ʻo e foki mei Pāpilone hili ʻa e fakahēʻí, ko e ngaahi tuʻi mo e niʻihi kehe mei he ngaahi puleʻangá naʻa nau tokoni moʻoni ki hono langa foʻou ʻo e temipalé pea mo e kolo ko Selusalemá. (Esela 3:7; Nehemaia 3:26) ʻI hono fakahoko ʻi onopōní, ko e fuʻu kakai lahí kuo nau poupouʻi ʻa e toenga ʻo e kau paní ʻi hono langa hake ʻo e lotu moʻoní. Kuo nau tokoni ke langa hake ʻa e ngaahi fakatahaʻanga Kalisitiané ʻo fakamālohiʻi ai ʻa e ngaahi “ʻa” hangē ha koló ʻo e kautaha ʻa Sihová. ʻOku nau toe kau foki ʻi he ngāue langa moʻoni—ko hono langa ʻo e ngaahi Fale Fakatahaʻanga, ngaahi Holo ʻAsemipilī, mo e ngaahi fale Pēteli. ʻI he ngaahi founga kotoa ko ení, ʻoku nau poupou ai ki honau fanga tokoua paní ʻi hono tokangaʻi ʻa e ngaahi fiemaʻu ʻo e kautaha ʻoku tupu ʻa Sihová!
17. Ko e hā ʻa e founga ʻe taha ʻoku ʻai ke fakaʻofoʻofa ai ʻe Sihova ʻene kakaí?
17 He meʻa fakalototoʻa moʻoni ko e ngaahi lea fakaʻosi ʻo e Aisea 60:10! ʻOku pehē ʻe Sihova: “Naʻa ku taaʻi koe ʻi heʻeku ʻita, ka ʻi heʻeku ʻofa kuo u fakaʻatuʻi koe.” ʻIo, ʻi he 1918/19, naʻe hanga ai ʻe Sihova ʻo akonakiʻi hono kakaí. Ka ko e meʻa ia ʻi he kuohilí. Ko e taimi eni kia Sihova ke fakahāhā ʻene mēsí ki heʻene kau sevāniti paní pea mo honau kaungāmeʻa ko e fanga sipi kehé. Ko e fakamoʻoni ʻoku pehē ení ko e tupu anga-kehe ʻa ia kuó ne tāpuekina ai kinautoluú, ʻo ‘ʻai ke nau fakaʻofoʻofa,’ ʻo hangē ko ia kuo hokó.
18, 19. (a) Ko e hā ʻa e talaʻofa ʻoku fai ʻe Sihova ki he kau haʻu foʻou ki heʻene kautahá? (e) Ko e hā ʻoku tala mai ʻe he ngaahi toenga veesi ʻo e Aisea vahe 60 kia kitautolú?
18 ʻI he taʻu taki taha, ʻoku laui kilu ʻa e toe “kau muli” ʻoku feohi mo e kautaha ʻa Sihová, pea ko e halá ʻe kei fakaava pē ki ha toe tokolahi ange ke nau muimui mai ʻia kinautolu. ʻOku pehē ʻe Sihova ki Saione: “E ava mau ai be ho gaahi mataba; e ikai tabuni ia i he aho be i he bo; koeuhi ke omi kiate koe ae koloa oe gaahi buleaga, bea ke omi mo ho nau gaahi tuʻi.” (Aisea 60:11, PM) ʻOku feinga ʻa e kau fakafepaki ʻe niʻihi ke tāpuni ʻa e “gaahi mataba” ko iá ka ʻoku tau ʻilo ʻe kitautolu ʻe ʻikai te nau lavameʻa. Ko Sihova tonu kuó ne folofola tatau ai pē pe ko e hā, ʻe kei fakaava pē ʻa e ngaahi matapaá. ʻE kei hokohoko atu pē ʻa e tupú ia.
19 ʻOku kei ʻi ai ʻa e ngaahi founga kehe kuo tāpuekina ai ʻe Sihova ʻene kakaí, ʻo ʻai kinautolu ke nau fakaʻofoʻofa, ʻi he ngaahi ʻaho fakaʻosí ni. Ko e ngaahi toenga veesi ʻo e Aisea 60 ʻokú ne fakaeʻa fakaekikite ʻa e ngaahi founga ko iá.
Te Ke Lava ʻo Fakamatalaʻi?
• Ko hai ʻa e “fefine” ʻa e ʻOtuá, pea ko hai ʻokú ne fakafofongaʻi ia ʻi māmaní?
• Ko fē taimi naʻe tokoto foʻohifo ai ʻa e fānau ʻa Saioné, pea ʻi he taimi fē mo anga-fēfē ʻenau “tuʻu hake”?
• ʻI hono ngāueʻaki ha ngaahi fakatātā kehekehe, naʻe anga-fēfē hono tomuʻa tala ʻe Sihova ʻa e tupu ʻi he kau malanga ʻo e Puleʻangá?
• ʻI he ngaahi founga fē kuo fakatupunga ai ʻe Sihova ʻene māmá ke ulo atu ki heʻene kakaí?
[Fehuʻi ki he Ako]
[Fakatātā ʻi he peesi 10]
Ko e “fefine” ʻa Sihová ʻoku fekauʻi ke tuʻu hake
[Fakatātā ʻi he peesi 12]
ʻOku hangē mai ʻa e ngaahi laulā vaká ha fanga lupe ʻi he tafaʻaki langí