ʻOku Ola Lelei Hoʻo Faiakó?

KO E ngaahi mātuʻá, kau mātuʻá, mo e kau fanongonongo ʻo e ongoongo leleí—ʻoku fiemaʻu kotoa ke nau hoko ko e kau faiako. ʻOku akoʻi ʻe he ngaahi mātuʻá ʻenau fānaú, akoʻi ʻe he kau mātuʻá ʻa e ngaahi mēmipa ʻo e fakatahaʻanga Kalisitiané, pea ʻoku akoʻi ʻe he kau malangaʻi ʻo e ongoongo leleí ʻa e kau mahuʻingaʻia foʻoú. (Teutalonome 6:​6, 7; Mātiu 28:​19, 20; 1 Timote 4:​13, 16) Ko e hā ʻe malava ke ke fai ke ʻai ai hoʻo faiakó ke ola lelei ange? Ko e founga ʻe tahá, ʻe lava ke ke faʻifaʻitaki ki he faʻifaʻitakiʻanga mo e founga ʻa e kau faiako lavameʻa ʻoku lave ki ai ʻi he Folofola ʻa e ʻOtuá. Ko ha faiako pehē ʻa ʻĒsela.

Ko e Ako mei he Faʻifaʻitakiʻanga ʻa ʻĒselá

Ko ʻĒselá ko ha taulaʻeiki ia mei he fāmili ʻo ʻĒloné naʻe moʻui ʻi he taʻu ʻe 2,500 kuo maliu atú ʻi Pāpilone. ʻI he taʻu 468 K.M., naʻá ne ʻalu ai ki Selusalema ke ʻai ke fakalakalaka ʻa e lotu moʻoní ʻi he lotolotonga ʻo e kau Siu naʻe nofo aí. (Esela 7:​1, 6, 12, 13) Naʻe fiemaʻu ia ʻi he ngāue ko ʻení ke ne akoʻi ki he kakaí ʻa e Lao ʻa e ʻOtuá. Ko e hā naʻe fai ʻe ʻĒsela ke fakapapauʻi ai naʻe ola lelei ʻene faiakó? Naʻá ne fou ʻi he ngaahi sitepu naʻe mātuʻaki fiemaʻu. Fakatokangaʻi ange ʻa e ngaahi sitepu ko ʻení hangē ko ia ʻoku lēkooti ʻi he Esela 7:​10 (NW):

“Naʻe [1] teuteuʻi ʻe ʻĒsela hono lotó [2] ke kumi faleʻi ki he lao ʻa Sihová pea [3] ke fai ki ai pea [4] ke akoʻi ʻi ʻIsileli ʻa e tuʻutuʻuní mo e fakamaau totonú.” Tau vakai nounou ange ki he ngaahi sitepú ni taki taha pea sio pe ko e hā ʻe lava ke tau ako meiate kinautolú.

“Naʻe Teuteuʻi ʻe ʻĒsela Hono Lotó”

Hangē tofu pē ko hono ʻuluaki teuteuʻi ʻe ha tokotaha ngoue ʻa e kelekelé ʻaki hono palau ia ki muʻa ke tūtuuʻi ʻa e tengá, naʻe teuteuʻi ʻi he faʻa lotu ʻe ʻĒsela ʻa hono lotó ke ne tali ʻa e folofola ʻa e ʻOtuá. (Esela 10:1) ʻI hono fakalea ʻe tahá, naʻá ne ‘ofeʻi hono lotó’ ki he faiako ʻa Sihová.—Palovepi 2:2.

ʻI he tuʻunga meimei tatau, ʻoku fakahā mai ʻe he Tohitapú ko Tuʻi Sihosafate naʻá ne “teuteu [hono] loto ke kumi kia Jihova.” (2 Kalonikali 19:​3, PM) ʻI hono kehé, ko ha toʻutangata ʻo ʻIsileli “nae ikai te nau teuteu ho nau loto” ʻoku fakamatalaʻi ia ko e “baogataa mo agatuu.” (Sāme 78:​8, PM) ʻOku ʻafioʻi ʻe Sihova “ʻa e tangata fufū ʻo e loto.” (1 Pita 3:4) ʻIo, “ko e angavaivai te ne ako ki ai hono hala oʻona.” (Sāme 25:9) Ko ia ai, he mahuʻinga lahi ē ke muimui ʻa e kau faiako ʻi he ʻaho ní ki he faʻifaʻitakiʻanga ʻa ʻĒselá ʻaki hono ʻuluaki ʻomai ʻi he faʻa lotu honau lotó ki he tuʻunga totonú!

 “Ke Kumi Faleʻi ki he Lao ʻa Sihová”

Ke hoko ko ha faiako lavameʻa, naʻe kumi faleʻi ʻa ʻĒsela ki he Folofola ʻa e ʻOtuá. Kapau te ke kumi faleʻi ki ha toketā, ʻikai te ke fanongo tokanga mo fakapapauʻi ʻoku mahino kiate koe ʻa e meʻa kotoa naʻá ne leaʻakí pe tuʻutuʻuni mai ke faí? ʻOku ʻikai ha veiveiua te ke fai pehē, he ʻoku ʻi he tuʻunga fakatuʻutāmaki ʻa hoʻo moʻuí. Ko ia ai, huanoa hake ai ʻa e totonu ke tau fai ha tokanga loloto ki he ngaahi meʻa ʻoku tala mai ʻe Sihova kiate kitautolú, pe tuʻutuʻuni mai ke faí, fakafou ʻi heʻene Folofolá, ko e Tohitapú, pea fakafou mai ʻi he “tamaioeiki agatonu mo boto.” Ko hono ʻuhingá, ko ʻene akonakí ʻoku fekauʻaki ia mo ʻetau moʻuí tonu! (Mātiu 4:4; 24:​45-47, PM) Ko e moʻoni, ʻoku malava ke hala ha toketā, ka “ko e lao ʻa Sihova ʻoku haohaoa.” (Sāme 19:7) ʻE ʻikai ʻaupito ke tau toe fiemaʻu ke ʻi ai ha fakakaukau hono ua.

Ko e ongo tohi Tohitapu ʻa Kalonikalí (ʻa ia naʻe ʻuluaki tohi ʻe ʻĒsela ko e voliume pē ʻe tahá) ʻoku hā mei ai ko ʻĒselá ko ha tokotaha ako fakaʻāuliliki moʻoni. Ke tohi ʻa e ongo tohi ko iá, naʻá ne lave ki ha ngaahi maʻuʻanga fakamatala lahi. a Ko e kau Siú, ʻa ia naʻa nau toki aʻu mai mei Pāpiloné, naʻe fiemaʻu ki ai ha fakamatala fakanounou ʻo e hisitōlia ʻo honau fonuá. Naʻe ʻikai te nau maʻu ha ʻilo feʻunga ʻo e ngaahi kātoanga ʻo ʻenau lotú, ko e ngāue ʻi he temipalé, pea mo e ngaahi ngāue ʻo e kau Līvaí. Naʻe mātuʻaki mahuʻinga kiate kinautolu ʻa e ngaahi lēkooti laine hohokó. Naʻe fai ʻe ʻĒsela ha tokanga makehe ki he ngaahi meʻa ko iá. Naʻe fiemaʻu ki he kau Siú ke nau nofo maʻu ʻi he tuʻunga ko ha puleʻanga mo hono fonuá tonu, ko ha temipale, ko ha tuʻunga taulaʻeiki, pea mo ha kōvana, kae ʻoua kuo haʻu ʻa e Mīsaiá. Ko hono ola ʻo e fakamatala naʻe fakatahatahaʻi ʻe ʻĒselá, naʻe malava ai ke tauhi maʻu ʻa e fāʻūtahá pea mo e lotu moʻoní.

ʻOku fēfē hoʻo ngaahi tōʻonga akó ʻi hono fakahoa atu ki he tōʻonga ako ʻa ʻĒselá? Ko hono ako tōtōivi ʻo e Tohitapú te ne tokoniʻi koe ʻi he faiako ola lelei ʻaki ʻa e Tohitapú.

“Kumi Faleʻi ki he Lao ʻa Sihová” ʻi he Tuʻunga ko ha Fāmili

Ko e kumi faleʻi ki he lao ʻa Sihová ʻoku ʻikai ke fakangatangata pē ia ki he ako fakafoʻituituí. Ko e ako fakafāmilí ko ha faingamālie lelei ʻaupito ia ke toe fai ai ʻa e meʻá ni.

Ko Jan mo Julia, ko ha ongo meʻa ʻi Netaleni, naʻá na lau tohi leʻo-lahi ki hona ongo fohá mei he ʻaho tonu pē ko ia naʻe fāʻeleʻi ai ʻena ongo tamaikí. ʻI he ʻahó ni, ko Ivo ʻoku taʻu 15, pea ko Edo ʻoku taʻu 14. ʻOku nau kei fai ʻenau ako fakafāmilí ʻo tuʻo taha he uike. ʻOku pehē ʻe Jan: “Ko ʻemau taumuʻa tefitó ʻoku ʻikai ko hono ʻosiki ha fakamatala lahi he lolotonga ʻa e akó ka ke makupusi ʻe he ongo tamaikí ʻa e meʻa ʻoku fai ki ai ʻa e lāuleá.” ʻOkú ne tānaki atu: “ʻOku fai ʻe he ongo tamaikí ʻa e fekumi lahi. ʻOkú na vakaiʻi ʻa e ngaahi foʻi lea ʻikai anga-mahení pea mo e faʻahinga ʻi he Tohitapú—ʻa e taimi naʻa nau moʻui aí, ko hai kinautolu, ko e hā ʻenau ngāue naʻe faí, mo e alā meʻa peheé. Talu mei heʻena ako ke lautohí, kuó na kumi faleʻi ki he ngaahi tohi hangē ko e Insight on the Scriptures, ngaahi tikisinalé, mo e ngaahi ʻenisaikolopētiá. ʻOku ʻai ʻe he meʻá ni ʻa e ako fakafāmilí ʻo toe fakafiefia ange. ʻOku tatali loto-vēkeveke maʻu pē ʻa e ongo tamaikí mo mateuteu ki ai.” Ko ha toe ʻaonga ʻoku tānaki mai ki aí, ko e ongo tamaikí fakatouʻosi he taimí ni ʻokú na toe ʻi he tuʻunga tuʻu-ki-muʻa ʻi heʻena ongo kalasí ʻi he pōtoʻi ʻi he leá.

Ko John mo Tini, ko ha toe ongo meʻa ʻi Netaleni, naʻá na ako mo hona fohá, ʻa Esli (ʻoku taʻu 24 he taimí ni pea tāimuʻa ʻi he fakatahaʻanga ʻe taha), pea mo hona ʻofefine ko Linda (ʻoku taʻu 20 he taimí ni pea ʻoku mali mo ha tokoua lelei kei siʻi). Kae kehe, ʻi he ʻikai ke ako ha tohi pau ʻo fai ʻi he founga anga-maheni ko e fehuʻi mo e talí, naʻá na fulihi ʻa e ako fakafāmilí ki he taʻumotuʻá mo e ngaahi fiemaʻu ʻa e ongo tamaikí. Ko e hā ʻa e founga naʻá na ngāueʻakí?

ʻOku pehē ʻe John naʻe fili ʻe hono fohá mo e ʻofefiné ha kupu fakamānako mei he “Ngaahi Fehuʻi mei he Kau Lautohí” (mei he Taua Leʻo) mo e “Ko e Vakai ʻa e Tohitapú” (mei he ʻĀ Hake!). Ki mui ai, naʻá na ʻomai ʻa e meʻa naʻá na teuteú, ʻa ia naʻe iku maʻu pē ki he ngaahi fetalanoaʻaki fakafāmili fakamānako. ʻI he foungá ni naʻe maʻu ai ʻe he ongo tamaikí ʻa e taukei ʻi hono fai ha fekumí pea ʻi he lāulea ki he ngaahi ola ʻo ʻena akó. ʻOkú ke “kumi faleʻi ki he lao ʻa Sihová” fakataha mo hoʻo fānaú? ʻE ʻikai ngata pē ʻi hono fakalahi atu ʻe he meʻá ni hoʻo malava fakafaiako fakafoʻituituí ka te ne toe tokoniʻi foki hoʻo fānaú ke nau hoko ko e kau faiako ola lelei ange.

 “Ke Fai ki Ai”

Naʻe ngāueʻaki ʻe ʻĒsela ʻa e meʻa naʻá ne akó. Hangē ko ʻení, ʻi he lolotonga ʻo e kei ʻi Pāpiloné, naʻá ne moʻui nai ʻi ha moʻui nonga. Ka neongo ia, ʻi heʻene fakatokangaʻi ʻoku malava ke ne tokoni ki hono kakaí ʻi he feituʻu mamaʻó, naʻá ne fakafetongi ʻa e ngaahi fiemālie ʻo Pāpiloné ʻaki ʻa e kolo mamaʻo ko Selusalemá, mo e kotoa ʻo hono ngaahi faingatāmakí, ngaahi palopalemá, mo e ngaahi fakatuʻutāmakí. ʻOku hā mahino, naʻe ʻikai ngata pē ʻi hono fakatahatahaʻi ʻe ʻĒsela ʻa e ʻilo faka-Tohitapú ka naʻá ne mateuteu ke ngāueʻaki ʻa e meʻa kuó ne akó.—1 Timote 3:13.

Ki mui mai ai, lolotonga ʻene nofo ʻi Selusalemá, naʻe toe fakahāhaaʻi ʻe ʻĒsela naʻá ne ngāueʻaki ʻa e meʻa naʻá ne akó pea mo akoʻí. Naʻe hoko ʻo hā mahino ʻeni ʻi he taimi naʻá ne fanongo ai fekauʻaki mo e ngaahi mali ʻa e kau tangata ʻIsilelí ki he kau fefine hītení. ʻOku tala mai ʻe he lēkooti ʻa e Tohitapú kiate kitautolu naʻá ne ‘hae hono kofú mo hono bulubulú, beá ne fuji hono gaahi fulufuluʻi ulú, bea mo hono kavá, beá ne nofo ki lalo tafuua [ʻo aʻu ki he efiafí].’ Naʻe aʻu ʻo ne ongoʻi ‘ma mo laea ke hanga hake’ kia Sihova.—Esela 9:​1-6, PM.

He ueʻi lahi ē ko ia heʻene ako ʻa e Lao ʻa e ʻOtuá! Naʻe maʻu ʻe ʻĒsela ha vakai māʻalaʻala ki he ngaahi nunuʻa fakalilifu ʻo e talangataʻa ʻa e kakaí. Naʻe tokosiʻi ʻa e kau Siu naʻe toe fakafoki maí. Kapau naʻa nau kau ki he ngaahi femaliʻakí, naʻe mei faai mai pē nai ʻo nau tuifio mo e ngaahi puleʻanga pangani takatakaí, pea ʻe malava faingofua ke pulia atu ai ʻa e lotu maʻá mei he funga māmaní!

ʻOku fakafiefiá, naʻe hanga ʻe he faʻifaʻitakiʻanga ʻo e manavahē anga-līʻoa mo e faivelenga ʻa ʻĒselá ʻo ueʻi ʻa e kau ʻIsilelí ke fakatonutonu ʻenau ngaahi foungá. Naʻa nau tukuange honau ngaahi uaifi mulí. ʻI loto ʻi he māhina ʻe tolu ne fakatonutonu kotoa ai ʻa e ngaahi meʻá. Ko e mateaki fakafoʻituitui ʻa ʻĒsela ki he Lao ʻa e ʻOtuá naʻe kaunga lahi ia ki hono ʻai ʻene faiakó ke ola leleí.

ʻOku hoko pehē pē ʻi he ʻahó ni. Naʻe pehē ʻe ha tamai Kalisitiane ʻe taha: “ʻOku ʻikai ke fai ʻe he fānaú ia ʻa e meʻa ʻokú ke leaʻakí; ʻoku nau fai ʻa e meʻa ʻokú ke faí!” ʻOku ngāueʻaki ʻa e tefitoʻi moʻoni tatau pē ʻi he loto fakatahaʻanga Kalisitiané. Ko e kau mātuʻa ʻoku nau fokotuʻu ha faʻifaʻitakiʻanga leleí ʻoku nau ʻamanekina nai ʻe tali ʻe he fakatahaʻangá ʻenau ngaahi akonakí.

“Ke Akoʻi ʻi ʻIsileli ʻa e Tuʻutuʻuní mo e Fakamaau Totonú”

ʻOku toe ʻi ai ʻa e ʻuhinga ʻe taha ki he ʻuhinga naʻe ola lelei ai ʻa e faiako ʻa ʻĒselá. Naʻe ʻikai te ne akoʻi haʻane ngaahi fakakaukau pē ʻaʻana, ka naʻá ne akoʻi ʻa e “tuʻutuʻuní mo e fakamaau totonú.” ʻA ia, ko e ngaahi tuʻutuʻuni, pe ngaahi lao ʻa Sihová. Ko hono fatongia fakataulaʻeikí ia. (Malakai 2:7) Naʻá ne toe akoʻi ʻa e fakamaau totonú, pea naʻá ne fokotuʻu ha faʻifaʻitakiʻanga ʻo e meʻa naʻá ne akoʻí ʻaki ʻa e pikimaʻu ki he meʻa ʻoku totonú ʻi ha founga faitotonu mo taʻefilifilimānako, ʻo fakatatau ki ha tuʻunga. ʻI hono fakahaaʻi ʻe he faʻahinga maʻu mafaí ʻa e fakamaau totonú, ʻe fakatupunga ai ʻa e tuʻumaʻu mo e ngaahi ola tuʻuloa. (Palovepi 29:4) ʻI he founga meimei tatau, ko e kau mātuʻa Kalisitiané, ngaahi mātuʻá, mo e kau fanongonongo ʻo e Puleʻangá ʻa ia ʻoku nau maheni lelei mo e Folofola ʻa e ʻOtuá te nau langa hake ʻa e tuʻumaʻu fakalaumālié ʻi heʻenau akoʻi ʻa e ngaahi tuʻutuʻuni mo e fakamaau totonu ʻa Sihová ʻi he fakatahaʻangá, ʻi honau ngaahi fāmilí, pea ki he faʻahinga mahuʻingaʻiá.

ʻIkai ʻokú ke loto-tatau ko hoʻo faiakó ʻe hoko nai ʻo ola lelei ange ʻi hoʻo faʻifaʻitaki kakato ki he faʻifaʻitakiʻanga ʻa ʻĒsela loto-tōnungá? Ko ia ai, ‘teuteuʻi ho lotó, kumi faleʻi ki he lao ʻa Sihová, fai ki ai, pea akoʻi ʻa e tuʻutuʻuni mo e fakamaau totonu ʻa Sihová.’—Esela 7:10, NW.

[Fakamatala ʻi lalo]

[Puha/Fakatātā ʻi he peesi 22]

KO E HĀ NAʻÁ NE ʻAI ʻA E FAIAKO ʻA ʻĒSELÁ KE OLA LELEÍ?

1. Naʻá ne ʻomai hono lotó ki ha tuʻunga totonu

2. Naʻá ne kumi faleʻi ki he Lao ʻa Sihová

3. Naʻá ne fokotuʻu ha faʻifaʻitakiʻanga lelei ʻi hono ngāueʻaki ʻa e meʻa naʻá ne akó

4. Naʻá ne ako tōtōivi koeʻuhí ke ne faiakoʻaki ʻa e vakai Fakatohitapú