Talanoa ki he Moʻuí

Fakaivimālohiʻi ʻe Heʻetau Fetokouaʻaki ʻi Māmani Lahí

FAKAMATALA FAI ʻE THOMSON KANGALE

ʻI ʻEpeleli 24, 1993, naʻe fakaafeʻi ai au ke u kau ʻi he polokalama fakatapui ʻo ha fale ʻōfisi vaʻa, ʻa ia naʻe kau ai ʻa e ngaahi fale ʻe 13, ʻi Lusaka, Semipia. Koeʻuhi naʻe faingataʻa ʻa ʻeku lué, ko e tuofefine Kalisitiane naʻá ne taki mamataʻi kimautolu ʻi he ʻotu langá naʻá ne ʻeke mai ʻi he anga-lelei, “Te ke loto ke u toʻotoʻo ha sea maʻau koeʻuhí ke ʻai pē mo ke kiʻi mālōlō ai?” Ko e ʻuliʻuli au, pea ko e pālangi ia, ka naʻe ʻikai tokanga ia ki ai. ʻI heʻene maongo lolotó, naʻá ku fakamālō ai ki ai, he naʻe hoko ʻa ʻene anga-leleí ʻo malava ai ke u ʻahia ʻa e ʻū langa kotoa ʻo e vaʻá.

ʻI HE faai mai ʻa e ngaahi taʻú, ko e ngaahi meʻa naʻe hokosia pehení kuó ne fakamāfanaʻi hoku lotó, ʻo toe fakapapauʻi ai ʻa ʻeku tuipau ko e lotoʻi feohiʻanga faka-Kalisitiane ʻo e Kau Fakamoʻoni ʻa Sihová ʻoku maʻu ai ʻa e ʻofa naʻe pehē ʻe Kalaisi te ne fakaʻilongaʻi ʻa hono kau muimui moʻoní. (Sione 13:35; 1 Pita 2:17) Tuku ke u fakahā atu ʻa e founga naʻá ku hoko ai ʻo maheni mo e kau Kalisitiane ko ení ʻi he 1931, ʻa e taʻu naʻa nau talaki fakahāhā ai ʻa ʻenau loto ke ʻiloa kinautolu ʻaki ʻa e hingoa faka-Tohitapu ko e Kau Fakamoʻoni ʻa Sihová.—Aisea 43:12.

Muʻaki Ngāue Fakafaifekau ʻi ʻAfiliká

ʻI Nōvema ʻo e 1931, naʻá ku taʻu 22 ai peá u nofo ʻi Kitwe, ʻa ia naʻe tuʻu ʻi he feituʻu Copperbelt ʻo Lotēsia Tokelaú (ʻa ia ko Semipia ia he taimi ní). Ko ha kaungāmeʻa ʻa ia naʻá ku vaʻinga soka fakataha mo ia naʻá ne fakafeʻiloaki au ki he Kau Fakamoʻoní. Naʻá ku maʻu ʻa e niʻihi ʻo ʻenau  ngaahi fakatahá peá u tohi ki he ʻōfisi vaʻa ʻi he Kolo Cape, ʻi ʻAfilika Tonga, ʻo kole ʻa e tohi tokoni fakaeako Tohitapu ko e The Harp of God. a Ko e tohí naʻe ʻi he lea faka-Pilitāniá, pea naʻe faingataʻa ke u mahinoʻi ia koeʻuhi naʻe ʻikai te u fuʻu maheni lelei mo e lea ko iá.

Ko e feituʻu Copperbelt, ʻa ia naʻe tuʻu ʻi he kilomita nai ʻe 240 ki he tonga-hihifo ʻo e Anovai Bangweulu, ʻo ofi ai ʻa e feituʻu naʻá ku tupu hake aí, naʻe fakangāueʻi ai ʻa e tokolahi mei he ngaahi vahefonua kehé ʻi he ngaahi keliʻanga kopá. Naʻe fakataha maʻu pē ai ha ngaahi kulupu ʻo e Kau Fakamoʻoní ki ha ako Tohitapu. Taimi siʻi mei ai, naʻá ku hiki mei Kitwe ki he kolo ofi mai ko Ndola pea kamata feohi ai mo ha kulupu ʻo e Kau Fakamoʻoní. ʻI he taimi ko ení, naʻá ku kapiteni ai ʻi ha timi soka naʻe ui ko e Pilinisi ʻo Uēlesi. Naʻá ku toe ngāue foki ko ha tangata tauhi ʻapi ki ha pule pālangi ʻo e Kautaha Anovai ʻAfiliká, ko ha kautaha naʻe lahi honau ʻū falekoloá ʻi ʻAfilika lotoloto.

Naʻe fakangatangata pē ʻa ʻeku akó pea tufi ʻa e kiʻi lea faka-Pilitānia siʻisiʻi naʻá ku ʻiló mei he kau ʻIulope naʻá ku ngāue ki aí. Neongo ia, naʻá ku vēkeveke ke fakalahi ʻa ʻeku ako fakamāmaní pea kole ai ke u ako ʻi ha ʻapiako ʻi Plumtree, Lotēsia Tonga (ʻa ia ko Simipāpuē ia he taimi ní). Kae kehe, ʻi he taimi tatau naʻá ku tohi ai ki he ʻōfisi vaʻa ʻo e Kolo Cape ko hono tuʻo uá ia. Naʻá ku fakahā kia kinautolu kuó u ʻosi maʻu ʻa e The Harp of God pea ʻoku ou loto ke ngāue taimi-kakato kia Sihova.

Naʻá ku ʻohovale ʻi hono maʻu ʻa ʻenau talí, ʻa ia naʻe pehē ai: “ʻOku mau fakahoungaʻi ʻa hoʻo holi ke tauhi ʻa Sihová. ʻOku mau loto ke fakalototoʻaʻi koe ke ke lotu ʻo fekauʻaki mo e meʻá, pea ʻe tokoniʻi koe ʻe Sihova ke ke mahinoʻi lelei ange ʻa e moʻoní, pea te ne maʻu maʻau ha feituʻu ke tauhi ai ia.” Hili ʻa hono toutou lau ʻa e tohí, naʻá ku ʻeke ai ki ha Kau Fakamoʻoni ʻo kau ki he meʻa ke u faí. Naʻa nau pehē: “Kapau moʻoni ko hoʻo holí ia ke tauhi ʻa Sihova, fai leva ia ʻo ʻoua ʻe toe tatali.”

ʻI ha uike kakato, naʻá ku lotu ʻo fekauʻaki mo e meʻá pea fakamulitukuʻaki ke tukuange ʻa ʻeku ako fakamāmaní kae hokohoko atu ʻa ʻeku ako Tohitapu mo e Kau Fakamoʻoní. ʻI he taʻu hono hokó, ʻi Sanuali ʻo e 1932, naʻá ku fakahāhā ai ʻa ʻeku fakatapui kia Sihova ko e ʻOtuá ʻaki ʻa e papitaiso ʻi he vaí. ʻI he hili ʻa ʻeku hiki mei Ndola ki he kolo ofi mai ko Luanshya, naʻá ku fetaulaki ai mo Jeanette, ko ha kaungātui pea naʻá ma mali ʻi Sepitema ʻo e 1934. ʻI heʻema malí, naʻe ʻosi maʻu ʻe Jeanette ha tamasiʻi mo ha taʻahine.

ʻI ha tuʻunga māmālie, naʻá ku fai ai ha fakalakalaka fakalaumālie, pea ʻi he 1937 naʻá ku hū ai ki he ngāue fakafaifekau taimi-kakató. Taimi nounou mei ai naʻe fakanofo ai au ke u ngāue ko ha faifekau fefonongaʻaki, ʻa ia ʻoku ui he taimí ni ko e ʻovasia fakasēketí. ʻOku ʻaʻahi ʻa e kau ʻovasia fefonongaʻakí ki he ngaahi fakatahaʻanga ʻa e Kau Fakamoʻoni ʻa Sihová ke fakaivimālohiʻi fakalaumālie kinautolu.

Ko e Malanga ʻi he Muʻaki Ngaahi Taʻú

ʻI Sanuali ʻo e 1938, naʻe fekau ai au ke u ʻaʻahi ki ha ʻeiki ʻAfilika ko Sokontwe, ʻa ia  naʻá ne kole ke ʻaʻahi ange ʻa e Kau Fakamoʻoni ʻa Sihová. Naʻá ku ʻaka pasikala ʻo feʻunga mo e ʻaho ʻe tolu ke aʻu ai ki hono feituʻú. ʻI heʻeku tala ange naʻe fekauʻi mai au ʻi he tali ki heʻene tohi ki hotau ʻōfisi ʻi he Kolo Cape, naʻá ne houngaʻia moʻoni.

Naʻá ku ʻalu mei he kiʻi fale ki he kiʻi fale ʻi hono kakaí ʻo fakaafeʻi kinautolu ki he insaka (palepale maʻá e kakaí). ʻI heʻenau fakatahataha maí, naʻá ku lea ai ki he kakaí. Ko hono olá, naʻe kamata ha ngaahi ako Tohitapu lahi. Ko e pule koló mo ʻene kalaké, ʻa e ʻuluaki ongo meʻa naʻá na hoko ko e ongo ʻovasia ʻo e ngaahi fakatahaʻanga ʻi aí. ʻI he ʻahó ni, ʻoku laka hake ʻi he fakatahaʻanga ʻe 50 ʻi he feituʻu ko iá, ʻa ia ʻoku ʻiloa he taimí ni ko e vahe Samfya.

Mei he 1942 ki he 1947, naʻá ku ngāue ai ʻi he feituʻu takatakai ʻo e Anovai Bangweulu. Naʻá ku fakamoleki ʻa e ʻaho ʻe hongofulu ʻi he fakatahaʻanga taki taha. Koeʻuhi ko e kau ngāue utu-taʻu fakalaumālie ʻi he taimi ko iá naʻe tokosiʻi, naʻa mau ongoʻi ai ʻo hangē ko hotau ʻEiki ko Sīsū Kalaisí, ʻi he taimi naʻá ne pehē ai: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mātiu 9:​36-38) ʻI he muʻaki ngaahi ʻaho ko iá, naʻe faingataʻa ʻa e fefonongaʻakí, ko ia naʻe faʻa nofo pē ʻa Jeanette ʻi Luanshya mo e fānaú kau ʻaʻahi au ki he ngaahi fakatahaʻangá. ʻI he taimi ko ení, naʻe toe ʻi ai ʻeku toko ua mo Jeanette, ka ko e tokotaha ʻo kinaua naʻe mate pē ʻi hono māhina hongofulú.

Ko e meʻalelé naʻe siʻisiʻi ʻi he ngaahi ʻaho ko iá pea pehē foki ki he halá. ʻI he ʻaho ʻe taha, naʻá ku fononga atu ai ʻi he pasikala ʻa Jeanette ʻi ha fononga naʻe laka he kilomita ʻe 200. ʻI he ngaahi taimi naʻe pau ai ke u kolosi ʻi ha kiʻi vaitafe, naʻá ku hili ʻa e pasikalá ʻi hoku ongo umá, ʻo puke nima-taha, peá u kakau ʻaki leva hoku nima ʻe tahá. Kae kehe, naʻe tupu fakamanavahē ʻa e tokolahi ʻo e Kau Fakamoʻoní ʻi Luanshya, pea ʻi he 1946, naʻe maʻu ai ʻe he toko 1,850 ʻa e Fakamanatu ʻo e pekia ʻa Kalaisí.

Fehangahangai mo e Fakafepaki ki Heʻetau Ngāué

ʻI ha taimi ʻe taha lolotonga ʻa e Tau II ʻa Māmaní, naʻe ui ai au ʻe he ʻōfisa fakavahe ʻi Kawambwa ʻo ne pehē: “ʻOku ou fiemaʻu ke taʻofi ʻa hoʻo ngāueʻaki ʻa e ngaahi tohi ʻa e Sōsaieti Taua Leʻó he ʻoku tapui ia he taimí ni. Ka ʻe malava ke u ʻoatu kiate koe ha ʻū naunau ʻe lava ke ke ngāueʻaki ki hono hiki ha ngaahi tohi kehe ke ngāueʻaki ʻi hoʻo ngāué.”

“ʻOku ou fiemālie pē au ʻi he tohi ʻoku mau maʻú,” ko ʻeku talí ia. “ʻOku ʻikai te u toe fiemaʻu ha meʻa.”

“ʻOku ʻikai te ke ʻiloʻi ʻa e kau ʻAmeliká,” ko ʻene leá ia (naʻe paaki he taimi ko iá ʻa ʻetau ngaahi tohí ʻi he ʻIunaite Seteté). “Te nau takihalaʻi koe.”

“ʻIkai, ko e faʻahinga ʻoku ou fengāueʻaki mo iá ʻe ʻikai te nau fai pehē,” ko ʻeku talí atu ia.

Naʻá ne kole mai leva: “ʻE lava ke ke uki ʻa hoʻo ngaahi fakatahaʻangá ke nau fai ha tokoni fakapaʻanga ke tokoni ki he taú ʻo hangē ko ia ʻoku fai ʻe he ngaahi lotu kehé?”

“Ko e ngāue ia ko iá ʻa e kau talafekau fakapuleʻangá,” ko ʻeku talí ia.

“Ko e hā ʻoku ʻikai te ke foki ai ki ʻapi ʻo fakakaukau ki aí?” ko ʻene leá mai ia.

“ʻI he Ekisoto 20:13 mo e 2 Timote 2:​24, ʻoku fekau mai ai ʻa e Tohitapú kia kitautolu ke ʻoua ʻe fakapō pea ʻoua ʻe fakakikihi,” ko ʻeku talí ia.

Neongo naʻe fakaʻatā au ke u mavahe, naʻe ui au ki mui ʻe he ʻōfisa fakavahe ʻi Fort Rosebery, ko ha kolo ʻoku ui he taimí ni ko Mansa. “ʻOku ou ui mai koe ki hení ke fakahā atu kuo tapui ʻe he puleʻangá ʻa hoʻomou ngaahi tohí,” ko ʻene leá ia.

“ʻIo. Kuó u fanongo ai,” ko ʻeku leá ia.

“Ko ia ʻoku totonu ke ke ʻalu ki he kotoa ʻo hoʻomou ngaahi fakatahaʻangá pea tala ki he kakai ʻoku mou lotu fakatahá ke ʻomai kotoa ʻa e ngaahi tohí ki heni. ʻOku mahino ia?”

“ʻOku ʻikai ko ha ngāue ia ʻaʻaku,” ko ʻeku talí ia. “Ko e fatongia ia ʻa e kau talafekau fakapuleʻangá.”

Ko ha Fetaulaki Fakatupu Fua

ʻI he hili ʻa e taú, naʻe hokohoko atu pē ʻemau malangá. ʻI he 1947, ko e toki ʻosi pē ia ʻa ʻeku ngāue ʻi ha fakatahaʻanga ʻi he kolo ko Mwanza ʻi he taimi naʻá ku fakaʻekeʻeke ai ha feituʻu ʻe malava ke u fakatau ai ha ipu tī. Naʻe fakahinohino au ki he ʻapi ʻo Mr. Nkonde, ʻa ia naʻe ʻi ai ha loki tī. Naʻe talitali lelei au ʻe Mr. Nkonde mo hono uaifí. Naʻá ku kole ange kia Mr. Nkonde, pe ʻe lava ke ne lau lolotonga ʻa e inu hoku ipu tií, ʻa e vahe ko e “Helí, ko ha Potu ʻo e Mālōlō ʻi he ʻAmanaki” ʻi he tohi ko e “Let God Be True.”

 “Ko ia ko e hā ʻa e anga ʻo hoʻo mahinoʻi ʻa e helí?” ko ʻeku ʻeke ange ia ki aí ʻi he hili hono maʻu ʻeku tií. ʻI he ofo ʻi he meʻa naʻá ne laú, naʻe kamata ke ne ako ʻa e Tohitapú mo e Kau Fakamoʻoní pea papitaiso ai ki mui fakataha mo hono uaifí. Neongo naʻe ʻikai te ne hoko ai pē ko ha Fakamoʻoni, naʻe kei hoko atu pē ʻa hono uaifí pea mo e niʻihi ʻo ʻene fānaú. Ko hono moʻoní, ko e taha ʻi heʻene fānaú, ʻa Pilney, ʻokú ne kei ngāue ʻi he ʻōfisi vaʻa ʻo e Kau Fakamoʻoni ʻa Sihova ʻi Semipiá. Pea neongo ko e faʻē ʻa Pilney ʻoku motuʻa ʻaupito he taimí ni, ʻokú ne kei hoko pē ko ha Fakamoʻoni loto-tōnunga.

Ko ha Nofo Nounou ʻi ʻAfilika Hahake

Ko hotau ʻōfisi vaʻa ʻi Lotēsia Tokelaú, ʻa ia naʻe fokotuʻu ʻi he konga ki muʻa ʻo e 1948 ʻi Lusaka, naʻá ne vaheʻi au ki Tanganiika (ʻa ia ko Tenisania ia he taimi ní). Ko ha Fakamoʻoni ʻe taha naʻe kau mai ki hoku uaifí mo au ʻi heʻema fononga lalo ʻi ha feituʻu moʻungaʻia. Naʻe feʻunga mo e ʻaho ʻe tolu ʻemau fonongá pea naʻe fakaongosia lahi. Lolotonga naʻá ku toʻo ʻe au ʻa e fatunga tohí, naʻe toʻo ʻe hoku uaifí ʻa homau valá, pea toʻo leva ʻe he Fakamoʻoni ʻe tahá ʻa homau mohengá.

ʻI heʻemau aʻu atu ki Mbeya ʻi Maʻasi ʻo e 1948, naʻe lahi ʻaupito ʻa e meʻa ke fai ke tokoniʻi ai ʻa e fanga tokouá ke nau fai ha ngaahi fakatonutonu ke fehoanaki kakato ange mo e ngaahi akonaki faka-Tohitapú. Ko e meʻa ʻe taha, naʻe ʻiloa kimautolu ʻi he feituʻu ko iá ko e kau Taua Leʻo. Neongo ko e hingoa Kau Fakamoʻoni ʻa Sihová naʻe ʻosi ngāueʻaki ʻe he fanga tokouá, naʻe teʻeki ke fakahaaʻi ia ki he kakaí. Tānaki atu ki ai, naʻe fiemaʻu ki he Kau Fakamoʻoni ʻe niʻihi ke liʻaki atu ʻa e ngaahi tōʻonga pau felāveʻi mo hono fakaʻapaʻapaʻi ʻo e maté. Ka mahalo ko e fakatonutonu naʻe faingataʻa taha ki he tokolahí ko hono lēsisita fakalao ʻenau malí, ʻo ʻai ia ke taau ʻi he ʻao ʻo e tokotaha kotoa pē.—Hepelu 13:4.

Ki mui ai, naʻá ku maʻu ʻa e monū ʻo e ngāue ʻi he ngaahi feituʻu kehe ʻi ʻAfilika Hahake, ʻo kau ai ʻa ʻIukanitā. Naʻá ku fakamoleki ʻa e uike nai ʻe ono ʻi Entebbe mo Kampala, ʻa ia naʻe tokoniʻi ai ʻa e tokolahi ki hano ʻiloʻi ʻo e moʻoni faka-Tohitapú.

Fakaafe ki Kolo Niu ʻIoke

ʻI he hili ʻa ʻeku ngāue ʻi ha taimi ʻi ʻIukanitaá, naʻá ku tūʻuta ai ʻi he konga ki muʻa ʻo e 1956 ʻi Dar es Salaam, ko e kolomuʻa ʻo Tanganiika. Naʻe tatali mai ai ha tohi kiate au mei he ʻuluʻi ʻapitanga ki he māmaní ʻa e Kau Fakamoʻoni ʻa Sihová. Naʻe ʻi ai ʻa e ngaahi fakahinohino ke u kamata teuteu leva ke ʻalu ki Niu ʻIoke ke maʻu ha fakataha-lahi fakavahaʻapuleʻanga ʻa ia ʻe fai mei Siulai 27 ki ʻAokosi 3 ʻo e 1958. Ko e moʻoni, naʻá ku fiefia ʻi he ʻamanaki ko iá.

ʻI he hoko mai ʻa e taimi ko iá, naʻá ku puna ai mo ha ʻovasia fefonongaʻaki ʻe taha, ko Luka Mwango, mei Ndola ki Salisbury (ʻa ia ko Harare he taimi ní), Lotēsia Tonga, pea hoko atu ai ki Nairobi, Keniā. Mei aí naʻá ma puna ai ki Lonitoni, ʻIngilani, ʻa ia naʻe talitali māfana ai kimaua. ʻI he taimi naʻá ma mohe ai he pō ne ma tau ai ki ʻIngilaní, naʻá ma fiefia mo toutou talanoa ʻo kau ki he anga hono talitali mātuʻaki loto-māfana kimaua ʻAfiliká ʻe he kau pālangí. Naʻe fakalototoʻaʻi lahi ʻaupito kimaua ʻe he meʻa naʻá ma hokosiá.

Faai atu pē ne ma aʻu ki Niu ʻIoke, ʻa ia naʻe fai ai ʻa e fakataha-lahí. ʻI ha ʻaho he lolotonga ʻa e fakataha-lahí, naʻá ku fai ai ha fakamatala fekauʻaki mo e ngāue ʻa e Kau Fakamoʻoni ʻa Sihova ʻi Lotēsia Tokelaú. ʻI he ʻaho ko iá, ko e meimei toko 200,000 ne ʻi he kau fanongó, naʻa nau fakatahataha ʻi he Polo Grounds mo e Yankee Stadium ʻo Niu ʻIoké. Naʻe ʻikai lava ke u mohe ʻi he pō ko iá ʻi heʻeku fakakaukau ki he fuʻu monū fakaofo naʻá ku maʻú.

 ʻI ha kemo pē, naʻe ʻosi ai ʻa e fakataha-lahí pea naʻá ma foki ki homa fonuá. ʻI heʻema foki ki ʻapí, naʻá ma toe hokosia ai ʻa e talitali kakai lelei ʻa hotau fanga tokoua mo e fanga tuofāfine ʻi ʻIngilaní. Ko e fāʻūtaha ʻa e kakai ʻa Sihová, ʻo tatau ai pē pe ko e hā ʻa e matakali pe fonua, naʻe fakahaaʻi taʻealamangalo ia kia kimaua lolotonga ʻa e folau ko iá!

Hokohoko Atu ʻa e Ngāué mo e Ngaahi ʻAhiʻahí

ʻI he 1967, naʻe fakanofo ai au ko ha sevāniti fakavahe—ko ha faifekau ʻoku fononga mei he sēketi ki he sēketi. ʻI he taimi ko ení ko e tokolahi ʻo e Kau Fakamoʻoni ʻi Semipiá naʻe tupu ʻo laka hake he toko 35,000. Ki mui ai, koeʻuhi ko e hōloa fakaemoʻuileleí, naʻe toe vaheʻi ai au ko ha ʻovasia fakasēketi ki he Copperbelt. Faai atu pē, naʻe maʻu ʻe Jeanette ha ngaahi palopalema fakaemoʻuilelei pea ʻi Tīsema ʻo e 1984 naʻá ne mate ai ʻi ha tuʻunga loto-tōnunga kia Sihova.

Hili ʻene maté, naʻá ku loto-mamahi lahi ʻi hono tukuakiʻi au ʻe hoku kāinga-ʻi-he-fono taʻetuí ki hono fakatupunga ʻo ʻene maté ʻi he ngāueʻaki ʻo e fakahaʻele faʻahikehé. Ka ko e niʻihi naʻa nau ʻilo ki he mahaki ʻo Jeanette pea naʻa nau talanoa mo ʻene toketaá naʻa nau fakamatalaʻi ki he ngaahi kāinga ko ení ʻa hono moʻoni ʻo e meʻá. Naʻe hoko mai leva ha ʻahiʻahi lahi ange. Naʻe fiemaʻu ʻe he ngaahi kāinga ʻe niʻihi ke u fai ki he tōʻonga tukufakaholo ʻoku ui ko e ukupyanika. ʻI he feituʻu ʻoku ou haʻu mei aí, ko e tōʻonga ko ení ʻoku fiemaʻu ai, ʻi he taimi ʻoku mate ai ha hoa ʻoku fai leva ʻe he hoa kei moʻuí ʻa e fehokotaki fakasino mo ha kāinga ofi ʻo e pekiá. Ko e moʻoni, naʻá ku fakafisingaʻi ia.

Faai atu pē, naʻe ngata ʻa e tenge mei he ngaahi kāingá. Naʻá ku fakamālō ʻi hono tokoniʻi au ʻe Sihova ke u tuʻu mālohí. ʻI he hili ha māhina ʻo hono tanu ʻa hoku uaifí, naʻe haʻu ai ha tokoua kiate au ʻo ne pehē mai: “Tokoua Kangale, naʻá ke hoko moʻoni ko ha fakalototoʻa kia kimautolu ʻi he mate ho uaifí koeʻuhi he naʻe ʻikai te ke fakavaivai ki ha foʻi talatukufakaholo taʻefakaʻotua ʻe taha. ʻOku mau loto ke fakamālō lahi atu.”

Ko ha Utu-Taʻu Fakaofo

Ko e taʻu ʻaki eni ʻe 65 talu mei he kamata ʻa ʻeku ngāue fakafaifekau taimi-kakato ʻi he tuʻunga ko e taha ʻo e Kau Fakamoʻoni ʻa Sihová. Ko ha meʻa fakafiefia ē he lolotonga ʻo e ngaahi taʻu ko ení ke sio ki hono fokotuʻu ʻa e ngaahi fakatahaʻanga ʻe laui teau pea langa mo e ngaahi Fale Fakatahaʻanga lahi ʻi he ngaahi feituʻu naʻá ku ngāue ai ko ha ʻovasia fefonongaʻakí! Mei he Kau Fakamoʻoni ʻe toko 2,800 ʻi he 1943, kuo mau tupu he taimí ni ʻo lahi hake ʻi he kau fanongonongo ʻe toko 122,000 ʻo e Puleʻangá ʻi Semipia. Ko e moʻoni, ʻi he taʻu kuo ʻosí naʻe laka hake ʻi he toko 514,000 naʻa nau maʻu ʻa e Fakamanatú ʻi he fonuá ni, ʻa ia ko hono tokolahí ʻoku siʻi hifo ʻi he 11 milioná.

ʻI he taimi tatau, ʻoku tokangaʻi lelei au ʻe Sihova. ʻI heʻeku fiemaʻu ʻa e tokanga fakafaitoʻó, ʻoku ʻave au ʻe ha tokoua Kalisitiane ki he falemahakí. ʻOku kei fakaafeʻi au ʻe he ngaahi fakatahaʻangá ke u fai ʻa e ngaahi malanga maʻá e kakaí, pea ʻoku ʻomai ʻe he meʻá ni kiate au ʻa e ngaahi mōmeniti fakatupu langa hake lahi. Ko e fakatahaʻanga ʻoku ou feohi mo iá ʻoku fokotuʻutuʻu ai ki ha fanga tuofāfine Kalisitiane ke nau taufetongi ʻi hono fakamaʻa ʻa hoku ʻapí, pea ʻoku loto-lelei ʻa e fanga tokouá ke fakafeʻao au ki he ngaahi fakatahá ʻi he uike kotoa pē. ʻOku ou ʻilo naʻe ʻikai ʻaupito mei lava ke u maʻu ha tokanga anga-ʻofa pehē kapau naʻe ʻikai te u tauhi ʻa Sihova. ʻOku ou fakamālō kiate ia ʻi heʻene hokohoko ngāueʻaki au ʻi he ngāue fakafaifekau taimi-kakató pea ki he ngaahi fatongia lahi kuo malava ke u fua ʻo aʻu mai ki he taimi ní.

Ko ʻeku sió kuo fakaʻau ke nenefu, pea ʻi he taimi ʻoku ou lue ai ki he Fale Fakatahaʻangá, kuo pau ke u toutou mālōlō. Ko ʻeku kato tohí ʻoku hā mamafa ange ʻi he ngaahi ʻahó ni, ko ia ʻoku ou fakamaʻamaʻa ia ʻaki hono toʻo ha ʻū tohi pē ʻe ʻikai nai te u fiemaʻu ʻi he fakatahá. Ko ʻeku malaʻe fakafaifekaú ʻoku lahi fakamoleki ia ʻi hono fakahoko ʻo e ngaahi ako Tohitapu mo e faʻahinga ʻoku nau haʻu ki hoku ʻapí. Neongo ia, ko ha meʻa fakafiefia ē ke vakai atu ki he ngaahi taʻú pea malava ke u vakai ai ki he fuʻu tupu fakaofo kuo hokó! Kuó u ngāue ʻi ha malaʻe ʻa ia kuo maʻu ai ʻe he folofola ʻa Sihova ʻoku hiki ʻi he Aisea 60:22 hano fakahoko fisifisimuʻa. ʻOku pehē ai: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi: ko au Sihova te u fakavave ia ʻi hono taimi.” Ko e moʻoni, kuó u moʻui ʻo sio ki hono fakahoko tonu ʻo e meʻa ko iá ʻo ʻikai ʻi Semipia pē ka ʻi he māmaní kotoa. b

[Fakamatala ʻi lalo]

[Fakatātā ʻi he peesi 24]

Ko Thomson mo e vaʻa ʻi Semipiá mei mui

[Fakatātā ʻi he peesi 26]

Ko e vaʻa ʻi Semipia he ʻaho ní