“Haʻu Kiate Au, . . . pea Te U Fakaivifoʻou Kimoutolu”

“Ke Tau Ngāue ki he Meʻa ʻOku Lelei ki he Kakai Kotoa Pē”

KE MALANGA mo akoʻi ʻa e ongoongo lelei ʻo e Puleʻanga ʻo e ʻOtuá naʻe hoko ia ko e ngāue tefito ʻa Sīsuú. (Maake 1:14; Luke 8:1) Koeʻuhi ʻoku holi ʻa e kau muimui ʻo Kalaisí ke faʻifaʻitaki kiate ia, ʻoku nau vakai ki he ngāue ko hono akoʻi ʻa e pōpoaki ʻa e Tohitapú ʻo kau ki he Puleʻanga ʻo e ʻOtuá ko ʻenau ngāue tuʻu-ki-muʻa taha ia ʻi he moʻuí. (Luke 6:40) ʻOku fakalotomāfana moʻoni ki he Kau Fakamoʻoni ʻa Sihová ke sio ki he anga ʻo hono ʻomai ʻe he pōpoaki ʻo e Puleʻangá ʻa e fakaivifoʻou tuʻuloa ki he faʻahinga ʻoku nau tali iá​—hangē pē ko ʻene pehē ʻi he taimi naʻe ʻi māmani ai ʻa Sīsuú.​—Mātiu 11:​28-30, NW.

Tuku kehe ʻa hono akoʻi ʻo e Folofola ʻa e ʻOtuá, naʻe fai ʻe Sīsū ʻa e ngaahi ngāue lelei kehe, ʻo hangē ko hono fakamoʻui ʻo e mahakí mo e fafangaʻi ʻo e fiekaiá. (Mātiu 14:​14-21) ʻI he tuʻunga tatau, ʻoku fakalahi ʻe he Kau Fakamoʻoni ʻa Sihová ʻa ʻenau ngāue fakaeako Tohitapú ʻaki ʻa e ngaahi ngāue ʻoku tokoniʻi ai ʻa e masivá. He ko ē, ʻoku teuʻi ʻe he ngaahi Konga Tohitapú ʻa e kau Kalisitiané “ki he gaahi gaue lelei kotoabe” pea fakaʻaiʻai kinautolu ke fai ʻa e “meʻa ʻoku lelei ki he kakai kotoa pē.”​—2 Timote 3:​16, 17, PM, fakaʻītali ʻamautolu; Kaletia 6:​10, NW.

“Naʻe ʻi Ai Hotau Fanga Tokouá”

ʻI Sepitema ʻo e 1999, naʻe luluʻi ai ʻa Taiuani ʻe ha mofuike fakaefakaʻauha. ʻI ha ngaahi māhina siʻi ki mui ai, naʻe fakatupunga ʻe he ʻuha lōvaí mo e holo hifo ʻa e kelekelé mei he moʻungá ʻa e taha ʻo e ngaahi fakatamaki fakanatula kovi taha ʻi he hisitōlia ʻo Venisuelá. Ki muí ni ʻaupito mai, naʻe haveki ai ʻe he ngaahi tāfea lahí ʻa e fonua ko Mosemipīkí. ʻI he ngaahi meʻá ni kotoa ʻe tolu, naʻe aʻu vave ai ki he feituʻú ni ʻa e Kau Fakamoʻoni ʻa Sihová mo ha ngaahi tokonaki meʻakai, vai, faitoʻo, vala, ʻū tēniti mo e naunau ngaohi kai maʻá e kau maʻukoviá. Ko e kau ngāue pole taukei fakafaitoʻó naʻa nau fokotuʻu ʻa e ngaahi feituʻu tauhiʻanga mahaki fakataimi ke tokangaʻi ai ʻa e laveá, pea ko e kau ngāue pole fakaelangá naʻa nau langa ʻa e ʻū fale foʻou maʻá e faʻahinga naʻe mole honau nofoʻangá.

Naʻe maongo ki he kau maʻukoviá ʻa e tokoni taimi totonu naʻa nau maʻú. “ʻI he taimi ne mole ʻaupito ai ʻemau ʻamanakí, naʻe ʻi ai hotau fanga tokouá,” ko e lau ia ʻa Malyori, ʻa ia ko hono ʻapí naʻe holoki ʻosi ʻi ha holo hifo ʻa e kelekelé mei he moʻungá ʻi Venisuela. ʻI he hili hono langa ʻe he kau ngāue polé ha ʻapi foʻou maʻa  hono fāmilí, naʻe fakahaaʻi mālohi ʻe Malyori: “ʻE ʻikai ʻaupito lava ke mau fakamālōʻia feʻunga ʻa Sihova ki he meʻa kotoa kuó ne fai maʻamautolú!” Pea ʻi he taimi naʻe maʻu ai ʻe he kau maʻukovia ʻo e tāfea ʻi Mosemipīkí ʻa e kī ki honau ngaahi ʻapi langa foʻoú, naʻe huaʻaki ʻe he kulupú fakakātoa hano hivaʻi ʻa e hiva ʻo e Puleʻangá “Ko Sihová ko Hotau Hūfanga.” a

Ko hono tokoniʻi ʻa e faʻahinga naʻe ʻi ai ʻenau fiemaʻú naʻe toe fakaivifoʻou ia ki he kau ngāue polé. “Naʻá ku ongoʻi fiefia ke u ʻaonga ki he fanga tokoua ko eni ne nau faingataʻaʻia lahí,” ko e fakamatala ia ʻa Marcelo, ʻa ia naʻe ngāue ko ha neesi ʻi ha kemi hūfanga ʻi Mosemipīki. Ko Huang, ko ha tokotaha ngāue pole ʻi Taiuani naʻá ne pehē: “Naʻe hoko ko ha meʻa fakafiefia lahi ke kau ʻi hono fetuku ʻa e meʻakai mo e ʻū tēniti ki he fanga tokoua naʻe faingataʻaʻiá. Naʻe fakatupu tui mālohi ia.”

Ko ha Polokalama Ngāue Pole ʻOku Ngāue

Kuo ʻomai foki ʻe he ngāue polé ʻa e fakaivifoʻou fakalaumālie ki he laui mano ʻo e kau pōpula ʻi māmani lahí. Anga-fēfē? ʻI he ngaahi taʻu ki mui ní, kuo tokonaki ai ʻe he Kau Fakamoʻoni ʻa Sihová ʻa e tohi faka-Tohitapu ki he faʻahinga tāutaha laka hake he toko 30,000 naʻe tauhi ʻi he ngaahi pilīsone nai ʻe 4,000 ʻi he ʻIunaite Seteté ʻataʻatā pē. Tānaki atu ki ai, ʻi heʻene malavá, ʻoku ʻaʻahi fakafoʻituitui ʻa e Kau Fakamoʻoní ki he ngaahi pilīsoné ke ako ai ʻa e Tohitapú mo e kau pōpulá pea ke fakahoko mo e ngaahi fakataha faka-Kalisitiane. ʻOku maʻu ʻaonga ai ʻa e kau pōpulá?

Ko e kau pōpula ʻe niʻihi ʻoku nau ako ʻa e Tohitapú ʻoku kamata ke nau vahevahe ʻa e ngaahi akonaki fakaivifoʻou ʻo e Folofola ʻa e ʻOtuá ki honau kaungā pōpulá. Ko hono olá, ʻi ha ngaahi pilīsone ʻi he māmaní kotoa ʻoku ʻi ai he taimí ni ʻa e ngaahi kulupu ko e kau pōpula ʻoku nau lotu fakataha kia Sihova. “ʻOku tupu ʻemau kulupú,” ko e līpooti ia ʻa ha pōpula ʻi Oregon, U.S.A., ʻi he 2001. “ʻOku toko 7 ʻemau kau malanga ʻo e Puleʻangá pea fakahoko mo e ngaahi ako Tohitapu ʻe 38. Laka hake ʻi he toko 25 ʻoku nau maʻu ʻa e malanga maʻá e kakaí mo e Ako Taua Leʻo, pea naʻe toko 39 ʻa ʻemau kau maʻu Fakamanatu [ʻo e pekia ʻa Kalaisí]. Ko ha toe toko tolu kehe kuo vavé ni ke nau papitaiso!”

Ngaahi ʻAongá mo e Fiefiá

Kuo fakatokangaʻi ʻe he kau ʻōfisa pilīsoné ʻoku ngāue ʻa e polokalama ngāue pole ko ení. Ko e meʻa ʻoku maongo lahi taha ki he kau ʻōfisá ko e ʻaonga fuoloa ʻo e polokalama ngāue pole ko ení. ʻOku pehē ʻe ha līpooti ʻe taha: “ʻI he taʻu ʻe hongofulu ko ia kuo lele ai ʻa e polokalama ko ení, kuo ʻikai ha pōpula ʻe taha kuo tukuange ʻa ia naʻe papitaiso ʻi pilīsone ko e taha ʻo e Kau Fakamoʻoni ʻa Sihová kuó ne toe foki mai ki pilīsone​—ʻo kehe ia mei he peseti ʻe 50-60 ʻo e toe foki ange ʻa e ngaahi kulupu kehé.” ʻI hono ueʻi ʻe he ngaahi ola naʻe aʻusia ʻe he Kau Fakamoʻoni ngāue polé, naʻe pehē ai ʻe ha faifekau pilīsone ʻi Idaho ʻi ha tohi ki he ʻuluʻi ʻapitanga ki he māmaní ʻa e Kau Fakamoʻoni ʻa Sihová: “Lolotonga ʻoku ʻikai tonu te u loto-tatau mo hoʻomou ngaahi tefitoʻi tuí, ʻoku maongo lahi kiate au ʻa hoʻomou kautahá.”

Ko hono tokoniʻi ʻa e faʻahinga ʻi pilīsoné ʻoku toe fakamoʻoniʻi ʻa ʻene hoko ʻo fakafiemālie ki he kau ngāue polé. ʻI he hili hano fai ha fakataha mo e kulupu ʻo ha kau pōpula ʻa ia ko ʻenau toki hivaʻi ē ha hiva ʻo e Puleʻangá, naʻe tohi ʻe ha tokotaha ngāue pole: “Naʻe fakalototoʻa ke mamata ki ha kau tangata ʻe toko 28 ʻoku nau kau mai ʻi he hiva fakahīkihiki kia Sihová. Pea naʻa nau hiva leʻo-lahi! Ko ha monū ē ke ʻi ai ʻi ha fakataha pehē!” Ko ha tokotaha ngāue pole ʻoku ʻaʻahi ki he ʻū pilīsone ʻi ʻAlisoná naʻá ne pehē: “He hoko moʻoni ē ko ha tāpuaki ke kau ʻi he ngāue makehé ni!”

Ko e Kau Fakamoʻoni ngāue pole takatakai ʻi he māmaní ʻoku nau loto-tatau mo Sīsū, ʻa ia naʻá ne pehē: “ʻOku te monuʻia lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) ʻOku nau toe fakapapauʻi foki ko e muimui ʻi he naʻinaʻi ʻa e Tohitapú ke fai lelei ki he kakai kotoa peé ʻoku fakaivifoʻou moʻoni.​—Palovepi 11:25.

[Fakamatala ʻi lalo]

[Fakatātā ʻi he peesi 8]

Venisuela

[Fakatātā ʻi he peesi 8]

Taiuani

[Fakatātā ʻi he peesi 8]

Mosemipīki