Ko e Moʻuí ʻi Hono Puleʻi ʻe he Tui Taʻeʻuhingá

ʻOKÚ KE fetaulaki tuʻu mo ha taha ʻi hoʻo mavahe mei ho ʻapí. ʻOku tau ho louhiʻi-vaʻé ʻi ha foʻi maka. ʻOku tangi ha faʻahinga manupuna pau ʻi he poʻulí. ʻOkú ke toutou misi ʻaki ha misi tatau. Ko e ngaahi meʻa iiki taʻeʻiai hano maumau eni ki he tokolahi. Ka ki he kakai ʻe niʻihi ʻi ʻAfilika Hihifo, ʻe lava ke vakai ki he ngaahi meʻá ni ko ha ngaahi fakaʻilonga, ngaahi vavalo, pe ngaahi pōpoaki mei he māmani laumālié. Pe ko e monū pe mala ʻoku tuʻunuku ke hokó, ʻoku fakatuʻunga ia ʻi he fakaʻilongá mo hono fakaʻuhingaʻí.

Ko e moʻoni, ko e ngaahi tui taʻeʻuhingá ʻoku fai foki ʻa e tui ki ai ʻi tuʻa mei ʻAfilika. Neongo ʻa e moʻui ʻi he malumalu ʻo e ngaahi taʻu ʻo e fakaʻikaiʻi-ʻOtua fakaʻofisialé, ko ha fuʻu tokolahi fakaʻohovale ʻo e kakaí ʻi Siaina pea ʻi he ngaahi lepupilika ʻo e Sovieti ʻIunioni ki muʻá ʻoku nau kei pipiki pē ki he ngaahi tui taʻeʻuhingá. ʻI he māmani ʻo e Uēsité, ʻoku kumi ʻa e tokolahi ki heʻenau fakamatala fakaʻasitalolosiá, ilifia ki he Falaite hono 13, pea fakaʻehiʻehi mei he fanga pusi ʻulí. Ko e kakai ʻe niʻihi ʻi he Tokelau Mamaʻó ʻoku nau vakai ki he ngaahi maama fakatokelaú ko ha vavalo ia fekauʻaki mo e tau pea mo e mahaki fakaʻauha. ʻI ʻInitia, ʻoku fakamafola holo ai ʻa e ʻeitisí ʻe he kau fakaʻuli loli ʻa ia ʻoku nau tui ʻoku fiemaʻu ke nau fai ha ngaahi fehokotaki fakasino koeʻuhi ke tauhi maʻu ʻenau mokomokó ʻi he ngaahi ʻaho velá. ʻI Siapani, ʻoku tui ʻa e kau ngāue tānoló ʻe hoko mai ha kovi kapau ʻe hū ha fefine ki ha tānolo ki muʻa ke ʻosi hono ngaohí. ʻOku toe tupu ʻāfaʻafa ʻa e ngaahi tui taʻeʻuhingá ʻi he sipoti fakapalōfesinalé. Ko ha tokotaha volipolo ʻe taha naʻá ne fakahaaʻi ko e tupu ʻa ʻenau mālohi hokohokó mei heʻene tui ʻa e ngaahi sitōkeni ʻuliʻulí kae ʻikai ko e sitōkeni hinehiná. ʻOku ʻikai hano ngataʻanga ʻo e fakahokohokó.

Fēfē koe? ʻOku ʻi ai nai haʻo manavahē fakapulipuli, taʻealafakamatalaʻi? ʻOku uesia koe ʻe ha “tui, tui fakakonga, pe tōʻonga ʻa ia ʻoku hā ʻoku ʻikai hano fakamatalaʻi totonu”? ʻE lava ke fakahaaʻi ia mei hoʻo talí, he ko e anga ia ʻo e fakamatalaʻi ʻe ha tohi maʻuʻanga fakamatala ʻe taha ʻa e foʻi lea “tui taʻeʻuhingá.”

Ko ha tokotaha ʻokú ne tuku ʻa e tui taʻeʻuhingá ke ne uesia ʻa ʻene ngaahi filí mo e founga-tuʻumaʻu fakaʻahó ʻokú ne fakaʻatā ai ia ke puleʻi ʻe he meʻa ʻoku ʻikai moʻoni te ne mahinoʻi. ʻOku fakapotopoto ʻa e meʻá ni? ʻOku totonu ke tau fakamoʻulaloa ki ha tākiekina taʻemahino mo lava ke kovi pehē? Ko e tui taʻeʻuhingá ko ha tuʻunga taʻemahuʻinga ia pe ko ha fakamanamana fakatuʻutāmaki?