Talanoa ki he Moʻuí

Motuʻa pea Fiemālie ʻi he Ngaahi Taʻú

FAKAMATALA FAI ʻE MURIEL SMITH

Naʻe luluʻi ʻe ha tuki longoaʻa ʻa hoku matapā ki halá. Ko ʻeku toki foki atu pē ia ki ʻapi ke kai hoʻatā hili ha pongipongi femoʻuekina ʻi he ngāue fakamalangá. Hangē ko ia naʻá ku tōʻongaʻakí, naʻá ku fakalili vai ki ha ipu tī pea ko e teu ia ke hili hake hoku vaʻé ki ʻolunga ki heʻeku mālōlō haafe houá. Naʻe ongo vivili ʻaupito mai ʻa e tukí, pea ʻi heʻeku lue atu ki he matapaá, naʻá ku fifili pe ko hai nai ia ʻoku ʻaʻahi mai he taimi ko ení. Naʻe ʻikai fuoloa kuó u ʻiloʻi. Naʻe fakafeʻiloaki mai ʻa e ongo tangata ʻe toko ua ʻi hoku sitepú ko e ongo ʻōfisa polisi kinaua. Naʻá na pehē ko ʻena ʻi aí ke hua hoku falé ki ha ngaahi tohi naʻe faʻu ʻe he Kau Fakamoʻoni ʻa Sihová​—ko ha kautaha ia kuo tapui.

Ko e hā naʻe tapui ai ʻa e Kau Fakamoʻoni ʻa Sihová ʻi ʻAositelēliá, pea naʻe anga-fēfē ʻa ʻeku hoko ko ha taha ʻo kinautolú? Naʻe kamata kotoa ia mei ha meʻaʻofa mei heʻeku faʻeé ʻi he taʻu 1910, ʻi heʻeku taʻu hongofulú.

NAʻE nofo ʻa hoku fāmilí ʻi ha kiʻi fale papa ʻi he tuʻa kolo ʻo Senē Tokelau ko Crows Nest. Naʻá ku foki atu ki ʻapi mei he akó ʻi he ʻaho ʻe taha ʻoku talanoa ʻa ʻeku faʻeé ki ha tangata ʻi he matapā ki halá. Naʻá ku fieʻilo pe ko hai ʻa e tangata ngalikehe ko eni ʻa ia naʻá ne tui ha suti pea toʻo ha kato naʻe fonu he ʻū tohí. Naʻá ku fakatulou ange ʻi ha ongoʻi mā peá u hū ki fale. Kae kehe, ʻi ha ngaahi miniti siʻi pē mei ai, naʻe ui mai au ʻe he Fineʻeikí. Naʻá ne pehē: “ʻOku maʻu ʻe he tangata ko ení ha ngaahi tohi mahuʻinga, pea ʻoku fekauʻaki kotoa ia mo e ngaahi Konga Tohitapú. Ko ia, koeʻuhi ko e toe mei hoko ho ʻaho fāʻeleʻí, ʻe hala pē ʻi haʻo maʻu ha kofu foʻou ko e ngaahi tohi ko ení. Ko fē te ke saiʻia aí?”

 “ʻE mami, te u saiʻia ange au he ʻū tohí mālō,” ko ʻeku talí ange ia.

Ko ia ʻi hoku taʻu hongofulú, naʻá ku maʻu ai ʻa e ʻuluaki voliume ʻe tolu ʻo e Studies in the Scriptures, naʻe faʻu ʻe Charles Taze Russell. Naʻe fakamatalaʻi ange ʻe he tangata ʻi he matapaá ki heʻeku faʻeé ʻe fiemaʻu ke ne tokoniʻi au ke u mahinoʻi ʻa e ʻū tohí, he ʻoku ngalingali ʻe fuʻu faingataʻa ia kiate au. Naʻe tala ange ʻe he fineʻeikí te ne fiefia ke fai ia. Ko e meʻa fakamamahí, naʻe ʻikai fuoloa mei he meʻa ko eni ne hokó, kuo mate ʻa e fineʻeikí. Naʻe tokangaʻi tōtōivi ʻe he tangataʻeikí ʻa hoku kiʻi tuongaʻane, ko hoku tehiná, pea mo au, ka naʻe ʻi ai ha ngaahi fatongia lahi ange he taimi ko ení kiate au ke fakahoko, pea ne hā ngali taulōfuʻu kiate au ʻa e ngaahi meʻá ni. Neongo ia, ne vave ʻa e toe hoko mai ʻa e meʻa fakamamahi ʻe taha.

Naʻe mapuna hake ʻa e tau ʻuluaki ʻa māmaní ʻi he 1914, pea ʻi ha taʻu pē ʻe taha mei ai, naʻe fakapoongi ai ʻa siʻemau tamaí. ʻI he hoko ko e kau paea he taimi ko ení, naʻe ʻave ʻa hoku kiʻi tuongaʻané mo hoku tehiná ke na nofo mo e ngaahi kāingá, pea naʻe ʻave au ki ha kolisi ako nofo-maʻu ʻa e Katoliká. ʻI he taimi ʻe niʻihi, naʻe fakalotomafasiaʻi au ʻe he taʻelatá. Neongo ia, ʻoku ou houngaʻia ʻi he faingamālie naʻe ʻomai ke u fekumi ai ʻi heʻeku manako ʻi he mūsiká, tautefito ki he pianó. Naʻe faai mai ʻa e ngaahi taʻú, pea naʻá ku maʻu tohi fakamoʻoni ako ai mei he kolisi ako nofo-maʻú. ʻI he 1919, naʻá ku mali ai mo Roy Smith, ko ha tangata tuʻuaki fakatau meʻalea. ʻI he 1920, naʻe maʻu ai ʻema kiʻi leka, pea naʻe toe hoko atu ai ʻeku nōfoʻi ʻi he tokangaʻi ʻa e ngaahi meʻa fakaʻaho ʻi he moʻuí. Kae fēfē ʻa e ngaahi tohi ko eé?

Vahevahe Mai ʻe ha Kaungāʻapi ʻa e Moʻoni Fakalaumālié

ʻI he ngaahi taʻu kotoa ko iá, naʻá ku fononga holo ai pē mo e “ngaahi tohi faka-Tohitapú.” Neongo naʻe ʻikai moʻoni te u lau kinautolu, naʻá ku ʻiloʻi loto ʻoku mahuʻinga ʻa e pōpoaki naʻe ʻi aí. ʻI he ʻaho leva ʻe taha ʻi he konga ki mui ʻo e 1920 tupú, naʻe ʻaʻahi mai ai ʻa Lil Bimson, ko e taha ʻo homa ngaahi kaungāʻapí. Naʻá ma ō ki he loki talanoá ʻo tangutu hifo ai pea ʻai homa tī.

“ʻOi, ʻokú ke maʻu ʻa e ngaahi tohi ko eé!” ko ʻene lea leʻo-lahi fakafokifaá mai ia.

“ʻA e ngaahi tohi hā?” ko ʻeku ʻeke angé ia, ʻi he puputuʻu.

Naʻá ne tuhu ki he Studies in the Scriptures ʻoku tuku mai ʻi he tukuʻanga tohí. Naʻe kole ia ʻe Lil ʻo ne ʻalu mo ia ki hono ʻapí he ʻaho ko iá ʻo lau loto-vēkeveke kinautolu. Ko ʻene fiefia ʻi he meʻa naʻá ne laú naʻe vave ke hoko ia ʻo hā mahino. Naʻe ʻomai ʻe Lil mo e ngaahi tohi lahi ange mei he Kau Ako Tohitapú, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá. ʻIkai ngata aí, naʻe ʻikai lava ke ne mataʻofi ʻa ʻene talanoa mai kia kimautolu ʻa e ngaahi meʻa kotoa naʻá ne akó. Ko e taha ʻo e ngaahi tohi naʻá ne maʻú ko e The Harp of God, pea naʻe iku ʻo ʻomai ia ki homau ʻapí. Ko ʻeku moʻui ʻi he ngāue ʻa Sihová naʻe faifai ʻo kamata ia ʻi heʻeku vaheʻi ʻa e taimi ke lau ai ʻa e tohi makatuʻunga ko eni ʻi he Tohitapú. Naʻe faifai peá u maʻu ʻa e tali ki he ngaahi fehuʻi tefito naʻe ʻikai malava ʻe hoku siasí ke ʻomai kiate aú.

Ko e meʻa fakafiefia kiate aú, naʻe tokanga makehe ʻa Roy ki he pōpoaki ʻa e Tohitapú, pea naʻá ma fakatou hoko ai ko e ongo ako Tohitapu vēkeveke. Ki muʻá, naʻe hoko ʻa Roy ko ha mēmipa ʻo e kau Filīmeisoní. ʻI he taimi ko ení naʻe fāʻūtaha ai homau fāmilí ʻi he lotu moʻoní, pea naʻe fai ʻe he taha ʻo e fanga tokouá ʻo tuʻo ua he uike ha ako Tohitapu mo e fāmilí kotoa. Naʻe hoko mai mo e fakalototoʻa lahi ange ʻi heʻemau kamata maʻu ʻa e ngaahi fakataha naʻe fai ʻe he Kau Ako Tohitapú. Ko e feituʻu faiʻanga fakataha ʻi Seneé ko ha kiʻi holo naʻe haea ʻi he tuʻa kolo ʻo Newtown. ʻI he taimi ko iá, naʻe siʻi hifo ʻi he Kau Fakamoʻoni ʻe  toko 400 ʻi he fonuá kotoa, ko ia ai, ki he tokolahi taha ʻo e fanga tokouá, ko e maʻu ʻa e ngaahi fakatahá naʻe fiemaʻu ai ha fononga ʻi ha tuʻunga mamaʻo fau.

Ki homau fāmilí, ko hono maʻu ʻa e ngaahi fakatahá naʻe ʻuhinga ia ko e kolosi maʻu pē ʻi he Taulanga Seneé. Ki muʻa ʻi hono langa ʻa e Hala Fakakavakava Taulanga Seneé ʻi he 1932, ko e kolosi kotoa pē naʻe pau ke fai ia ʻi ha vaka uta meʻalele mo e pāsese. Neongo ʻa e taimi mo e fakamole ʻo e fononga ko ení, naʻa mau feinga ke ʻoua ʻe tō mei ha taha ʻo e ngaahi houa kai fakalaumālie naʻe tokonaki mai ʻe Sihová. Ko e feinga ke fokotuʻu maʻu kimautolu ʻi he moʻoní naʻe ʻaonga ia, koeʻuhi naʻe kamata ke maluʻaki mai ʻa e tau hono ua ʻa māmaní, pea ko e ʻīsiu fekauʻaki mo e tuʻu-ʻataá naʻe teu ke ne uesia hangatonu ʻa homau fāmilí.

Ko ha Taimi ʻo e Ngaahi ʻAhiʻahi mo e Ngaahi Pale

Ko e taʻu 1930 tupu siʻí ko ha ngaahi taimi fakafiefia ia kiate au mo hoku fāmilí. Naʻá ku papitaiso ʻi he 1930, pea ʻi he 1931, naʻá ku maʻu ai ʻa e fakataha-lahi ʻoku taau ke manatua ʻi heʻemau tuʻu kotoa hake ki ʻolunga pea loto-lelei ke ohi ʻa e hingoa fakaʻofoʻofa ko e Kau Fakamoʻoni ʻa Sihová. Naʻá ku feinga mo Roy ke moʻui ʻo fakatatau ki he hingoa ko iá ʻaki ʻa e kau ʻi he kotoa ʻo e ngaahi founga malanga mo e ngaahi feingangāue naʻe fakaʻaiʻai ʻe he kautahá. Ko e fakatātaá, ʻi he 1932 naʻá ma kau ai ʻi ha feingangāue ki ha kiʻi tohi makehe naʻe faʻufaʻu ke aʻu ki he fuʻu kakai tokolahi naʻa nau haʻu ke mamata ʻi hono huufi ʻa e Hala Fakakavakava Taulanga Seneé. Ko ha meʻa mahuʻinga makehe kia kimautolu ko hono ngāueʻaki ʻa e ngaahi kā fakaongo leʻo-lahí, pea naʻa mau maʻu ʻa e monū ke fakahū ki he kā ʻa homau fāmilí ha meʻa fakaongo leʻo-lahi. ʻI he tekinolosia ko ení, naʻa mau fakaongo atu ai ʻi he ngaahi hala ʻo Seneé ʻa e ngaahi malanga faka-Tohitapu kuo hiki, naʻe fai ʻe Tokoua Rutherford.

Kae kehe, naʻe toe liliu ʻa e ngaahi tuʻungá pea hoko ʻo fakautuutu ʻene faingataʻá. ʻI he aʻu ki he 1932 naʻe ongo lahi ʻaupito ki ʻAositelēlia ʻa e Fuʻu Tōlalo Fakaʻekonōmiká, ko ia ai naʻá ku fakapapauʻi mo Roy ke fakafaingofuaʻi ʻa ʻema moʻuí. Ko e founga ʻe taha naʻá ma fai ai ení ko e hiki ke ofi ange ki he fakatahaʻangá, pea ko ia naʻá ma fakasiʻisiʻi lahi ai ʻa ʻema ngaahi fakamole ʻi he fefonongaʻakí. Neongo ia, ko e ngaahi faingataʻa fakaʻekonōmiká naʻe ʻikai hano mahuʻinga ʻi hono kāpui ʻe he fakamanavahē ʻo e Tau II ʻa Māmaní ʻa e foʻi kolopé.

ʻI he talangofua ki he fekau ʻa Sīsū ke ʻoua ʻe hoko ko ha konga ʻo e māmaní, naʻe hoko ai ʻa e Kau Fakamoʻoni ʻa Sihova ʻi māmani lahí ko ha tāketi ia ʻo e fakatangá, pea naʻe ʻikai ke hao mei ai ʻa ʻAositelēlia. ʻI hono fakaʻaiʻai ʻe he ongoʻi ʻita taʻemapuleʻi ʻi he taimi taú, naʻe fakahingoa ai ʻe he niʻihi kimautolu ko e kau Kominiusi. Ko e kau fakafepaki ko ení naʻa nau taukaveʻi loi naʻe ngāueʻaki ʻe he Kau Fakamoʻoni ʻa Sihová ʻa e ngaahi fale fakamafola lea fakaletiō ʻe fā naʻa nau maʻu ʻi ʻAositelēliá ke ʻave ai ʻa e ngaahi fekau ki he kau tau Siapaní.

Ko e fanga tokoua kei talavou naʻe ui ki he ngāue fakakautaú naʻa nau fehangahangai mo e tenge lahi ke fakangaloku. ʻOku ou fiefia ke leaʻaki ko homa ngaahi foha kotoa ʻe toko tolú naʻa nau tuʻu maʻa ʻenau tuí pea tauhi maʻu ʻa ʻenau tuʻu-ʻataá. Ko homa foha lahi tahá, ko Richard, naʻe tautea ngāue pōpula ia ʻi he māhina ʻe 18. Ko homa foha hono uá, ko Kevin, naʻe lava ʻo ne lēsisita ko ha tokotaha fakafisi fakakonisēnisi ke kau ʻi he taú. Neongo ia, ko e meʻa fakamamahí, ko homa foha siʻisiʻi tahá ko Stuart, naʻá ne mate ʻi ha fakatuʻutāmaki ʻi ha motopaiki ʻi heʻene ʻalu ke fakaʻosi ʻa ʻene taukapo ʻi he fakamaauʻangá fekauʻaki mo e ʻīsiu ʻo e tuʻu-ʻataá. Naʻe fakalotomafasia moʻoni ʻa e meʻa fakamamahi ko ení. Ka, ʻi hono tauhi maʻu ʻema tokangá ʻi he Puleʻangá mo e talaʻofa ʻa Sihova fekauʻaki mo ha toetuʻú naʻe tokoniʻi ai kimaua ke ma kītaki.

Naʻe ʻIkai Te Na Maʻu ʻa e Pale Moʻoní

ʻI Sanuali 1941, naʻe tapui ai ʻa e Kau Fakamoʻoni ʻa Sihova ʻi ʻAositelēliá. Kae hangē ko ia naʻe fai ʻe he kau ʻapositolo ʻa Sīsuú, naʻá ku talangofua mo Roy ki he ʻOtuá ʻi hono tuʻunga ko e pulé kae ʻikai ki he tangatá, pea naʻe feʻunga mo e taʻu ʻe ua mo e konga ʻa ʻema hokohoko atu ʻa e ngāue fakapulipulí. Ko e lolotonga ʻa e taimi ko ení naʻe tukituki mai ai ʻi hoku matapaá ʻa e ongo polisi taʻeteunga naʻá ku lave ki ai ki muʻá. Ko e hā naʻe hokó?

Sai, naʻá ku fakaafeʻi kinaua ki loto. ʻI heʻena hū ki falé, naʻá ku ʻeke ange, “ʻE sai pē kapau ʻe fakaʻosi ai leva ʻa hoku ipu tií peá mo toki hua ʻa e falé?” Ko e meʻa fakaʻohovalé, naʻá na loto ki ai, pea naʻá ku ʻalu ai ki he peitó ke lotu kia Sihova mo fakakaukau fakalelei. ʻI heʻeku foki atú, naʻe hū ʻa e polisi ʻe taha ki homau feituʻu akó ʻo ne toʻo ʻa e meʻa kotoa pē naʻe lava ke ne sio ʻoku ʻi ai ʻa e fakaʻilonga Taua Leʻó, ʻo kau ai ʻa e ʻū tohi ʻi heʻeku kato fakamoʻoní pea mo ʻeku Tohitapú.

 “ʻOkú ke fakapapauʻi ʻoku ʻikai haʻo toe ʻū tohi kehe ʻoku fufū ʻi ha ngaahi puha?” ko ʻene ʻeké mai leva ia. “ʻOku mau maʻu ha fakamatala ʻokú ke kau ki ha fakataha ʻi he uike kotoa pē ʻi ha holo ʻi he ngataʻanga ʻo e hala ko ení pea ʻokú ke ʻave ki ai ha ʻū tohi lahi.”

“Ko e moʻoni ia,” ko ʻeku talí ia, “ka ʻoku ʻikai ke ʻi ai ia he taimí ni.”

“ʻIo, ʻokú ma ʻiloʻi ia, Mrs. Smith,” ko ʻene leá mai ia. “ʻOkú ma toe ʻiloʻi ko e ʻū tohí ʻoku tauhi ia ʻi he ngaahi ʻapi ʻo e kakai takatakai ʻi he vahé ni.”

ʻI he loki mohe ʻo homa fohá, naʻá na maʻu ai ʻa e puha ʻe nima ʻoku ʻi ai ʻa e ngaahi tatau ʻo e kiʻi tohi Freedom or Romanism.

“ʻOkú ke fakapapauʻi ʻoku ʻikai ha toe meʻa ʻi he fale kaá?” ko ʻene ʻeké ia.

“ʻIkai, ʻoku ʻikai ha meʻa ai,” ko ʻeku leá ia.

Naʻá ne fakaava leva ha kōpate ʻi he loki kaí. Naʻá ne maʻu ai ha ngaahi foomu teʻeki fakafonu, ʻa ia naʻe ngāueʻaki ke fakafonu ai ʻa e līpooti ʻa e fakatahaʻangá. Naʻá ne ʻave mo e ngaahi meʻá ni peá ne vilitaki foki ke sio ki he fale kaá.

“Mo omi leva heni,” ko ʻeku leá ia.

Naʻá na muimui ʻiate au ki he fale kaá pea ʻi he hili hono vakaiʻi iá, naʻá na mavahe leva.

Sai, naʻe fakakaukau ʻa e ongo polisi ko iá naʻá na maʻu ha pale fakaʻofoʻofa ʻi he ngaahi puha ko ia ʻe nimá! Kae kehe, naʻe ʻikai te na ʻave ʻa e pale moʻoní. Vakai ange, ʻi he ngaahi ʻaho ko iá, naʻá ku ngāue ai ko e sekelitali ʻa e fakatahaʻangá, pea naʻá ku maʻu ʻa e lisi ʻo e kau malanga ʻi he fakatahaʻangá mo e ngaahi fakamatala mahuʻinga kehe ʻi he falé. Ko e meʻa mālié, he naʻe fakatokanga mai ʻa e fanga tuongaʻané kia kimautolu ke mau mateuteu ki he ngaahi hua peheé, pea naʻá ku fufū fakalelei ʻa e ngaahi fakamatala ko ení. Naʻá ku faʻo ia ʻi ha ngaahi sila pea tuku ʻi lalo ʻi heʻeku ngaahi kapa faʻoʻanga tií, suká mo e mahoaʻá. Naʻá ku toe tuku ʻa e ʻū meʻa ʻe niʻihi ʻi he tauhiʻanga manupuná, ʻa ia naʻe ofi ki he fale kaá. Ko ia naʻe lue atu ʻa e ongo polisí ʻo fakalaka moʻoni ʻi he fakamatala tofu pē ko ia naʻá na fiemaʻú.

Hū ki he Ngāue Taimi-Kakató

ʻI he aʻu mai ki he 1947, naʻe kamata faʻu ai ʻe heʻema fānau taʻumotuʻa angé ʻa honau ngaahi fāmili. ʻI he taimi ko ení, naʻá ku fakapapauʻi ai mo Roy ʻe malava ke ma kamata ʻa e ngāue fakafaifekau taimi-kakató. Naʻe ʻi ai ha fiemaʻu ʻi he malaʻe faka-Tonga ʻo ʻAositelēliá, ko ia ai, naʻá ma fakatau atu ʻa homa ʻapí pea fakatau mai ha kalavana, pe taulani, ʻa ia naʻá ma fakahingoa ko Mīsipa, ko hono ʻuhingá ko e “Taua Leʻo.” Ko e faʻahinga moʻui ko ení naʻe fakaʻatā ai kimaua ke ma malanga ʻi he ngaahi feituʻu mamaʻó. Naʻá ma faʻa ngāue ʻi he feituʻu ʻuta naʻe ʻikai vaheʻi ha ngāue ki aí. ʻOku ou manatu ʻofa lahi ki he taimi ko iá. Ko e taha ʻo e ngaahi ako naʻá ku faí naʻe fai ia mo ha finemui ko hono hingoá ko Beverly. Ki muʻa ke fakalakalaka ki he papitaisó, naʻá ne mavahe mei he feituʻú. Fakaʻuta atu ki heʻeku fiefiá ʻi ha ngaahi taʻu ki mui ai ʻi he fakaofiofi mai ha tokoua kiate au ʻi ha fakataha-lahi ʻo fakahaaʻi mai ko Beverly ia! He fiefia ē ne hoko kiate aú ke sio ʻi he hili ʻa e ngaahi taʻu kotoa ko iá ʻokú ne tauhi ʻa Sihova fakataha mo hono husepānití mo e fānaú.

ʻI he 1979, naʻá ku maʻu ai ʻa e monū ke u kau ki he Ako Ngāue Tāimuʻá. Ko e taha ʻo e ngaahi meʻa naʻe fakamamafaʻi ʻi he ako ko iá, ke kītaki ʻi he ngāue fakafaifekau tāimuʻá, kuo pau ke te maʻu ha founga ako fakafoʻituitui lelei tuʻumaʻu. Naʻá ku fakamoʻoniʻi moʻoni ʻa e meʻa ko iá. Kuo hoko ʻa e akó, ngaahi fakatahá, pea mo e ngāue fakafaifekaú ko ʻeku moʻuí kotoa ia. ʻOku ou lau ko ha monū ia ke ngāue ko ha tāimuʻa tuʻumaʻu ʻo laka hake ʻi he taʻu ʻe 50.

Fekuki mo e Ngaahi Palopalema Fakaemoʻuileleí

Kae kehe, ko e ngaahi hongofuluʻi taʻu fakamuimuí, kuo ʻomai ai kiate au ha ngaahi pole makehe.  ʻI he 1962, naʻá ku maʻu ai ʻa e fakaʻilonga ʻo e mahaki ʻi he matá. ʻI he taimi ko iá, naʻe ʻi ha tuʻunga fakangatangata ai ʻa e faitoʻo naʻe ala maʻú, pea naʻe hōloa vave ʻaupito ʻa ʻeku sió. Naʻe toe hōloa foki mo e tuʻunga moʻui lelei ʻa Roy, pea ʻi he 1983 naʻá ne hokosia ai ha pā kālava mafatukituki ʻaupito ʻo ne hoko ai ʻo mamatea fakakonga pea ʻikai lava ke lea. Naʻá ne mālōlō ʻi he 1986. Kuó ne fai ʻa e poupou ʻaonga lahi kiate au lolotonga ʻa ʻeku ngāue taimi-kakató, pea ʻoku ou ongoʻi moʻoni ʻene pulí.

Neongo ʻa e ngaahi meʻa fakaholomui ko iá, naʻá ku feinga ke tauhi maʻu ha founga-tuʻumaʻu fakalaumālie lelei. Naʻá ku fakatau mai ha kā fefeka, ʻa e kā ʻoku feʻungamālie ki he malaʻe ngāue ʻi homau feituʻu tukuʻutá, pea hokohoko atu ʻa ʻeku ngāue tāimuʻá fakataha mo e tokoni ʻa ʻeku taʻahine ko Joyce. Naʻe fakaʻau ke kovi ange ʻa ʻeku sió ʻo aʻu ki he mole ʻosi ʻa ʻeku sió ʻi he mata ʻe taha. Naʻe fetongi ia ʻe he kau toketaá ʻaki ha foʻi mata loi. Neongo ia, ʻi hono ngāueʻaki ha lauʻi sioʻata fakaʻatalahi pea mo e ʻū tohi pulusi matalalahí, naʻá ku malava ai ke fakamoleki ʻa e houa ʻe tolu ki he nima he ʻaho ʻi he akó ʻaki hono ngāueʻaki ʻa e kiʻi ataata naʻe toe ʻi hoku mata ʻe tahá.

Kuo hoko ʻa e taimi akó ʻo mātuʻaki mahuʻinga maʻu pē ia kiate au. Ko ia ʻoku lava ke ke sioloto atu ki he fakaʻohovale lahi naʻe hoko he lolotonga ʻo e ako he hoʻatā efiafi ʻe taha, ʻi he fakafokifā pē, naʻe ʻikai lava ke u toe sio ki ha meʻa. Ne hangē ia kuo tāmateʻi ʻe ha taha ʻa e māmá. Naʻe mole kotoa he taimi ko ení ʻa ʻeku sió. Kuo anga-fēfē ʻa ʻeku hokohoko atu ke akó? Sai, neongo ʻoku ou meimei tuli he taimí ni, ʻoku ou fakafalala pē ki he ngaahi foʻi tepi kāseté pea mo e poupou anga-ʻofa ʻa hoku fāmilí ke hokohoko atu ʻa ʻeku mālohi fakalaumālié.

Kītaki ki he Ngataʻangá

ʻI he taimí ni, ʻi he tuʻunga ko ha tokotaha taʻu teaú, kuo fehālaaki ha toe ngaahi meʻa siʻi kehe ʻi hoku tuʻunga moʻui leleí, pea kuo pau ai ke u māmālie lahi hifo. ʻI he taimi ʻe niʻihi, ʻoku ou ongoʻi kiʻi puputuʻu ai. Ko hono moʻoní, ʻi he ʻikai ʻaupito lava ke u sio he taimi ní, ʻi he taimi ʻe niʻihi ʻoku ou hē moʻoni ai! ʻOku ou saiʻia ke toe ʻi ai haʻaku ngaahi ako Tohitapu, ka ʻi hoku tuʻunga moʻui lelei he taimi ní, ʻoku ʻikai kei lava ke u ʻalu ʻo kumi kinautolu. ʻI he ʻuluaki taimí, naʻe fakalotosiʻi au ʻe he meʻá ni. Naʻe pau ke u ako ke tali ʻa hoku ngaahi ngātangá pea ngāue pē ʻo fakatatau ki ai. Kuo ʻikai ke faingofua ʻa e meʻá ni. Kae kehe, ko e meʻa fakafiefia ē ko ia ʻi he māhina kotoa pē, ʻoku malava ai ke u līpooti ha taimi kuo fakamoleki ʻi he talanoa fekauʻaki mo hotau ʻOtua lahi, ko Sihová. ʻI he ʻi ai hoku ngaahi faingamālie ke talanoa ai fekauʻaki mo e Tohitapú, hangē ko ia ʻi he taimi ʻoku haʻu ai ki hoku ʻapí ha kau neesi, kau tangata ngāue, mo e niʻihi kehé, ʻoku ou puke ʻa e faingamālie ko iá ke talanoa ai kia kinautolu​—ko hono moʻoní, ʻi ha tuʻunga fakapotopoto.

Ko e taha ʻo hoku ngaahi tāpuaki fakafiefia tahá ko e sio ki he toʻutangata ʻe fā ʻo hoku fāmilí ʻoku nau lotu faitōnunga kia Sihova. Ko e niʻihi ʻo e faʻahingá ni kuo nau kakapa atu ke ngāue ko ha kau faifekau tāimuʻa ʻi he ngaahi feituʻu ʻa ia ʻoku lahi ai ʻa e fiemaʻú, ʻo ngāue ko e kau mātuʻa pe kau sevāniti fakafaifekau, pea ʻi Pēteli. Ko e moʻoni, ʻi he hangē ko e tokolahi ʻo hoku toʻutangatá, naʻá ku tomuʻa sio ai ko e ngataʻanga ʻo e fokotuʻutuʻu ko ení ʻe aʻu vave ʻaupito mai. Ka ko ha tupulaki ē kuó u mamata ki ai lolotonga ʻa e hongofuluʻi taʻu ʻe fitu ʻo ʻeku ngāué! ʻOkú ne ʻomai kiate au ʻa e fiemālie lahi ke kau ʻi ha meʻa mātuʻaki maʻongoʻonga.

Ko e kau neesi ʻoku nau ʻaʻahi mai kiate aú ʻoku nau pehē kuo pau pē ko ʻeku tuí ʻokú ne ʻai au ke u kei moʻuí. ʻOku ou loto-tatau mo kinautolu. Ko e longomoʻui ʻi he ngāue ʻa Sihová ʻoku iku ia ki he moʻui lelei taha ʻe ala lavá. ʻI he hangē ko Tuʻi Tēvitá, ʻoku lava moʻoni ke u pehē ʻoku ou motuʻa peá u fiemālie ʻi he ngaahi taʻú.​—1 Kalonikali 29:28.

(Naʻe mate ʻa tuofefine Muriel Smith ʻi ʻEpeleli 1, 2002, ʻi hono fakaʻosiʻosi ʻa e kupu ko ení. Ko e nounou ʻaki pē ia ʻa e māhina ʻe taha mei hono taʻu 102, naʻá ne alafaʻifaʻitakiʻanga moʻoni ʻi he loto-tōnunga mo e kātaki.)

[Fakatātā ʻi he peesi 24]

ʻI hoku taʻu nimá nai pea ʻi hoku taʻu 19, ʻi heʻeku fetaulaki mo hoku husepānití, ʻa Roy

[Fakatātā ʻi he peesi 26]

Ko ʻema kaá pea mo e kalavana naʻá ma fakahingoa ko Mīsipá

[Fakatātā ʻi he peesi 27]

Mo hoku husepāniti, ko Roy, ʻi he 1971