Ngaahi Fehuʻi mei he Kau Lautohí

Naʻe ʻilo ʻe ʻĒpeli ko ha feilaulau monumanu naʻe fiemaʻu ke maʻu ai ʻa e hōifua ʻa e ʻOtuá?

ʻOku nounou ʻaupito ʻa e fakamatala faka-Tohitapu fekauʻaki mo hono fai ko ia ʻe Keini mo ʻĒpeli ʻena ongo feilaulaú. ʻI he Senesi 4:​3-5, ʻoku tau lau ai: “ʻI he hili ha ngaahi ʻaho, pea ʻomi ʻe Keini ha fua oʻene ngoue ko e feilaulau kia Sihova. Pea ko Epeli foki naʻe ʻomi ʻe ia ʻa e veloaki oʻene fanga sipi, ʻio, ʻa ia pe naʻe ngako. Pea naʻe hangaifofonga ʻa Sihova kia Epeli mo ʻene feilaulau: ka ko Keini mo e feilaulau aʻana naʻe ʻikai te ne fofonga ki ai.”

ʻOku ʻikai ha lave ʻi he Tohitapú ʻo pehē ʻi he ki muʻa ʻi he meʻa ko ʻení naʻe ʻoange ʻe Sihova ha fakamatala pau fekauʻaki mo e ngaahi feilaulaú pe fekauʻaki mo e faʻahinga feilaulau ʻe fakahōifua kiate iá. Ko ia ai, ʻoku ngalingali naʻe fai ʻe Keini mo ʻĒpeli ʻena ongo feilaulaú ʻaki ʻena fili pē ʻa kinaua. Naʻe taʻofi kinaua mei he hū ki he muʻaki ʻapi Palataisi ʻo ʻena ongo mātuʻá; naʻe kamata ke na ongoʻi ʻa e ngaahi nunuʻa ʻo e angahalá; pea naʻá na mavahe mei he ʻOtuá. ʻI he tuʻunga angahalaʻia mo fakamamahi naʻá na ʻi aí, kuo pau pē naʻá na ongoʻi mālohi ʻa e fiemaʻu ke hanga ki he ʻOtuá ki ha tokoni. Ko hono ʻoatu ki he ʻOtuá ha meʻaʻofá naʻe hangē ia ha ngāue pole ʻi heʻena tafaʻakí ke maʻu ai ʻa e hōifua ʻa e ʻOtuá.

Ko hono olá, naʻe tali ʻa e feilaulau ʻa ʻĒpelí ʻe he ʻOtuá kae ʻikai tali ʻa e feilaulau ʻa Keiní. Ko e hā hono ʻuhingá? Koeʻuhí naʻe ʻoatu ʻe ʻĒpeli ia ʻa e ngaahi meʻa totonu kae ʻikai fai pehē ʻa Keini? ʻOku ʻikai malava ke tau fakapapauʻi naʻe ʻikai ke ʻi ai hano kaunga ʻo e faʻahinga ʻo e feilaulaú, koeʻuhi naʻe ʻikai ha taha ʻo kinaua naʻe tala ki ai ʻa e meʻa naʻe ala talí mo e meʻa naʻe ʻikai ala talí. Kae kehe, ʻoku hangehangē naʻe ala tali ē pe ko ē. ʻI he Lao ko ia naʻe faai mai pea ʻoange ʻe Sihova ki he puleʻanga ʻo ʻIsilelí, ko e ngaahi feilaulau naʻe ala talí naʻe kau ai ʻo ʻikai ngata pē ʻi he fanga monumanú pe ngaahi konga ʻo e fanga manú ka naʻe toe pehē foki ki he uite tunu, ngaahi haʻinga paʻale, mahoaʻa lelei, ngaahi meʻa taʻo, mo e uaine. (Livitiko 6:​19-23; 7:​11-13; 23:​10-13) Ngalingali, naʻe ʻikai ko e ngaahi meʻa tonu pē ko ia ʻo e ongo feilaulau ʻa Keini mo ʻĒpelí naʻe fakatupunga mei ai ke tali ʻe he ʻOtuá ʻa e taha pea fakataleʻi ʻa e taha ko ē.—Fakafehoanaki mo Aisea 1:11; Emosi 5:22.

ʻI he laui senituli mei ai, naʻe fakahā ʻe he ʻapositolo ko Paulá: “Ko tui naʻe ʻatu ki he ʻOtua ʻe Epeli ha feilaulau, ʻo lelei hake ʻi haʻa Keini; ʻio, ko ia ia naʻe fakamoʻoni ai maʻana ʻoku ne maʻoniʻoni he naʻe fakamoʻoni ʻe he ʻOtua ʻi he funga ʻo e ngaahi meʻa naʻa ne ʻomi.” (Hepelu 11:4) Ko ia, koeʻuhi ko e tuí naʻe lau ai ʻe he ʻOtuá ʻoku māʻoniʻoni ʻa ʻĒpelí. Ka ko e tui ki he hā? Tui ki he talaʻofa ʻa Sihova te ne tokonaki mai ʻa e Hako, ʻa ia te ne ‘laiki ʻa e ʻulu ʻo e ngatá’ pea toe fakafoki mai ʻa e melino mo e haohaoa naʻe maʻu ʻi ha taimi ʻe he faʻahinga ʻo e tangatá. Mei he foʻi sētesi ko ia ko e Hakó ʻe ‘laiki ʻa hono muivaʻé,’ naʻe fakaʻuhinga nai ai ʻa ʻĒpeli ʻo pehē ko ha feilaulau ʻoku kau ai ʻa hono lilingi ʻo e totó naʻe fiemaʻú. (Senesi 3:15) Ka neongo ia, ko e moʻoniʻi meʻa ʻoku mahino maí ko e fakahaaʻi ko ia ʻe ʻĒpeli ʻa e tuí naʻe ʻai ai ʻene feilaulaú ko ha ‘feilaulau, naʻe lelei hake ʻia Keini.’

Pehē foki, naʻe fakataleʻi ʻa Keini, ʻo ʻikai koeʻuhi naʻá ne foaki ʻa e faʻahinga feilaulau hala, ka koeʻuhi naʻe ʻikai ke ne tui, ʻo hangē ko ia naʻe fakahaaʻi ʻe heʻene ngaahi tōʻongá. Naʻe fakahaaʻi mahino ʻe Sihova kia Keini: “ʻIkai ʻe ai ha hanga hake, ʻo kapau ʻoku ke feinga ke lelei?” (Senesi 4:7) Naʻe ʻikai ke fakataleʻi ʻe he ʻOtuá ʻa Keini koeʻuhi ko e ʻikai ha leleiʻia ʻi heʻene feilaulaú. Ka, “koeʻuhi pe naʻe kovi ʻene ngaahi ngaue aʻana”—ʻo fakahaaʻi ia ʻe he meheka, tāufehiʻa, pea fakaʻosí ko e fakapō—ʻo fakataleʻi ai ʻa Keini ʻe he ʻOtuá.—1 Sione 3:12.