Ueʻi ʻe he ‘Ngaahi Meʻa Lalahi ʻa e ʻOtuá’

“ʻOku tau ongoʻi ʻenau fai ʻa e ngaahi lea ʻatautolu, heʻenau leaʻaki ʻa e ngaahi meʻa lalahi ʻa e ʻOtua.”—Ngāue 2:11.

1, 2. Ko e hā ʻa e meʻa fakaofo naʻe hoko ʻi Selusalema ʻi he Penitekosi 33 T.S.?

 ʻI HA pongipongi ʻe taha ʻo e konga ki mui ʻo e faʻahitaʻu failau ʻi he taʻu 33 T.S., naʻe hoko ai ha meʻa fakaofo ki ha kulupu ʻo e kau tangata mo e kau fefine, ko e kau ākonga ʻa Sīsū Kalaisi naʻa nau fakatahataha ʻi he loki ʻo ha ʻapi tāutaha ʻi Selusalema. “Fakafokifā naʻe hoko mei he langi ha meʻa, ʻo hangē ko e mumuhu ʻo ha fuʻu tuʻoni matangi ʻoku to mai, pea naʻe fāʻofale ʻi he loki naʻa nau nofo ai. Pea naʻe hā kiate kinautolu ha ngaahi ʻelelo hange ha afi . . . Pea fāʻofale ʻiate kinautolu katokātoa ʻa e Laumālie Maʻoniʻoni; pea nau hanga ʻo lea ʻi he ngaahi lea kehe.”—Ngāue 2:​2-4, 15.

² Naʻe fakatahataha ha fuʻu kakai tokolahi ʻi muʻa ʻi he falé. Naʻe ʻi he haʻohaʻonga ko iá ʻa e kau Siu naʻe fanauʻi ʻi muli, “ko e mātuʻa lotu moʻoni” kuo nau haʻu ki Selusalema ke fakamanatu ʻa e kātoanga ʻo e Penitekosí. Naʻa nau ofo koeʻuhí naʻa nau taki taha fanongo ʻoku leaʻaki ʻe he kau ākongá ʻene lea hono fonua ʻoʻoná fekauʻaki mo e ‘ngaahi meʻa lalahi ʻa e ʻOtuá.’ Naʻe anga-fēfē ʻene hoko ia lolotonga ko e faʻahinga naʻe malangá ko e kau Kāleli kotoa?​—Ngāue 2:​5-8, 11.

3. Ko e hā ʻa e pōpoaki naʻe ʻoatu ʻe he ʻapositolo ko Pitá ki he fuʻu kakai ʻi he Penitekosí?

³ Ko e taha ʻo e kau Kāleli ko iá ko e ʻapositolo ko Pitá. Naʻá ne fakamatalaʻi ko e ngaahi uike siʻi kuo maliu atú naʻe fakapoongi ai ʻe he kau tangata fulikivanu  ʻa Sīsū Kalaisi. Neongo ia, naʻe fokotuʻu hake ʻe he ʻOtuá hono ʻAló mei he pekiá. Hili iá, naʻe hā ʻa Sīsū ki he tokolahi ʻo ʻene kau ākongá, kau ai ʻa Pita mo e niʻihi kehe naʻa nau ʻi ai he taimi ko ení. Ko e toki ʻaho pē ʻe hongofulu ki muʻá, ne hāʻele hake ai ʻa Sīsū ki hēvani. Ko ia ia naʻá ne lilingi hifo ʻa e laumālie māʻoniʻoní ki heʻene kau ākongá. Naʻe ʻi ai hano ʻuhinga ʻo e meʻá ni ki he kau fakamanatu ko ia ʻo e Penitekosí? ʻIo, naʻe pehē. Naʻe fakatoka ʻe he pekia ʻa Sīsuú ʻa e makatuʻunga ke nau maʻu ai ʻa e fakamolemole ʻo ʻenau ngaahi angahalá mo maʻu ai ʻa e “meʻaʻofa ko e Laumālie Maʻoniʻoni” kapau te nau ngāueʻi ʻenau tui kiate iá. (Ngāue 2:​22-24, 32, 33, 38) Ko ia ko e hā ʻa e tali ʻa kinautolu naʻe mamatá ki he ‘ngaahi meʻa lalahi ʻa e ʻOtuá’ naʻa nau fanongo ki aí? Pea ʻe lava fēfē ke tokoniʻi kitautolu ʻe he fakamatala ko ení ke fakamahuʻingaʻi ʻetau ngāue tonu kia Sihová?

Ueʻi ke Fai ha Meʻa!

4. Ko e hā ʻa e kikite ʻa Sioeli naʻe fakahoko ʻi he ʻaho ʻo e Penitekosi 33 T.S.?

⁴ ʻI heʻenau maʻu ʻa e laumālie māʻoniʻoní, naʻe ʻikai toe fakatuotuai ʻa e kau ākonga ʻi Selusalemá ʻi hono vahevahe atu ʻa e ongoongo lelei ʻo e fakamoʻuí ki he niʻihi kehé, ʻo kamata ʻi he fuʻu kakai naʻa nau fakatahataha mai ʻi he pongipongi ko iá. Ko ʻenau malangá naʻe fakahoko ai ha kikite tuʻu-ki-muʻa, ʻa ia naʻe lēkooti ʻi he senituli ʻe valu ki muʻa atú ʻe Sioeli, ko e foha ʻo Petuelí: “Te u lilingi hoku Laumalie ki he kakano kotoa; pea ʻe fai palofisai ʻe homou ngaahi foha mo homou ngaahi ʻofefine, ko e matuʻa ʻomoutolu te nau faʻa misi, ko e kau talavou ʻomoutolu te nau mata visone: ʻio, naʻa mo e kau tamaioʻeiki mo e kau kaunanga te u lilingi hoku Laumalie . . . ʻi he tei hoko ʻa e ʻAho ʻo Sihova, ʻa e ʻaho lahi mo fakalilifu.”​—Sioeli 1:1; 2:​28, 29, 31; Ngāue 2:​17, 18, 20.

5. ʻI he ʻuhinga fē naʻe kikite ai ʻa e kau Kalisitiane ʻi he ʻuluaki senitulí? (Sio ki he fakamatala ʻi laló.)

⁵ ʻOku ʻuhinga ení naʻe teu ʻa Sihova ke fokotuʻu hake ha toʻutangata kakato ʻo e kau palōfita, fakatouʻosi ʻa e tangata mo e fefine, ʻi he tuʻunga ʻo Tēvita, Sioeli, mo Tēpolá, pea ngāueʻaki kinautolu ke tomuʻa tala ʻa e ngaahi meʻa ʻe hoko ʻi he kahaʻú? ʻIkai. ‘Ko e kau talavou, kau tamaioʻeiki, mo e kau kaunanga’ Kalisitiané te nau kikite ʻi he ʻuhinga ʻe ueʻi kinautolu ʻe he laumālie ʻo Sihová ke talaki ʻa e “ngaahi meʻa lalahi” kuo fai ʻe Sihová mo ia te ne kei faí. Ko ia te nau ngāue ko e kau tangata-lea maʻá e Fungani Māʻolungá. a Naʻe anga-fēfē leva, ʻa e tali ʻa e fuʻu kakaí?​—Hepelu 1:​1, 2. 

6. ʻI heʻenau fanongo ki he malanga ʻa Pitá, ko e hā naʻe ueʻi ki ai ʻa e tokolahi ʻo e fuʻu kakaí ke nau faí?

⁶ Hili ʻa e fanongo ʻa e fuʻu kakaí ki he fakamatala ʻa Pitá, naʻe ueʻi ai honau tokolahi ke fai ha meʻa. “Naʻa nau tali ʻene lea, ʻo nau papitaiso, pea naʻe fakaului mai ʻi he ʻaho pe ko ia ha ngaahi laumālie, feʻunga nai mo e toko tolu afe.” (Ngāue 2:41) Koeʻuhi ko e kau Siu totonu mo e kau ului Siu kinautolu, naʻa nau ʻosi maʻu ʻe kinautolu ha ʻilo tefito ki he ngaahi Konga Tohitapú. Ko e meʻa ko iá, fakataha mo e tui ki he meʻa naʻa nau ako meia Pitá, naʻe tokonaki ai ha makatuʻunga kia kinautolu ke nau papitaiso “ki he Huafa ʻo e Tamai mo e ʻAlo mo e Laumalie Maʻoniʻoni.” (Mātiu 28:19) Hili ʻenau papitaisó “naʻa nau nofo fakaʻutumauku ki he faiako ʻa e kau Aposetolo.” ʻI he taimi tatau, naʻa nau kamata ke fevahevaheʻaki ʻenau tui foʻoú mo e niʻihi kehé. Ko e moʻoni, “ko e ʻaho kotoa pē naʻa nau fakaʻutumauku ʻo loto taha he ʻalu ki he Temipale . . . ʻo nau tuku  kolōlia ki he ʻOtua, pea tokangaekina kinautolu ʻe he kakai kotoa.” Ko e ola ʻo e ngāue fakamoʻoni ko ení, “naʻe fakaului ʻe he ʻEiki ki heʻenau fakataha ʻi he ʻaho kotoa pē ʻa kinautolu kuo kamata moʻui.” (Ngāue 2:​42, 46, 47) Naʻe mapuna hake ʻa e ngaahi fakatahaʻanga Kalisitiane ʻi he ngaahi feituʻu naʻe nofo ai ʻa e kau tui foʻou ko ení. ʻOku ʻikai ha veiveiua ko e tupu ko ení naʻe tuʻunga ia, ʻa hono konga pē, ʻi heʻenau ngaahi feinga faivelenga ko ia ke malangaʻi ʻa e “ongoongo lelei” ʻi he taimi naʻa nau foki ai ki ʻapí.​—Kolose 1:23.

Ko e Folofola ʻa e ʻOtuá ʻOkú Ne ʻOmi ʻa e Mālohi

7. (a) Ko e hā ʻokú ne tohoaki ʻa e ngaahi puleʻanga kotoa pē ki he kautaha ʻa Sihová ʻi he ʻaho ní? (e) Ko e hā ʻa e malava ki ha toe tupu lahi ange ʻokú ke sio ki ai ʻi he malaʻe ʻi māmani lahí pea mo e fakalotofonuá? (Sio ki he fakamatala ʻi laló.)

⁷ Fēfē ʻa e faʻahinga ʻoku nau holi ke hoko ko e kau sevāniti ʻa e ʻOtuá ʻi he ʻaho ní? ʻOku fiemaʻu foki mo kinautolu ke nau ako fakalelei ʻa e Folofola ʻa e ʻOtuá. ʻI heʻenau fai peheé, te nau hoko ai ʻo ʻilo ʻa Sihova ko ha ʻOtua ʻa ia ʻoku “ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni.” (Ekisoto 34:6; Ngāue 13:48) ʻOku nau ako ai ki he tokonaki anga-ʻofa ʻa Sihova ʻo e huhuʻí fakafou ʻia Sīsū Kalaisí, ʻa ia ko hono taʻataʻa ne lilingí ʻe lava ke ne fakamaʻa kinautolu mei he angahala kotoa pē. (1 Sione 1:7) ʻOku nau toe hoko ai ʻo houngaʻia ʻi he taumuʻa ko ia ʻa e ʻOtuá ke ʻi ai ha “toetuʻu ʻa e angatonu mo e angahala fakatouʻosi.” (Ngāue 24:15) Ko e ʻofa ki he Matavai ʻo e “ngaahi meʻa lalahi” ko ení ʻokú ne nofoʻia kinautolu, pea ʻoku ueʻi ai kinautolu ke nau malangaʻi ʻa e ngaahi moʻoni mahuʻinga ko ení. ʻOku nau hoko leva ai ko e kau sevāniti fakatapui mo papitaiso ʻa e ʻOtuá pea nau hokohoko atu ke “tubulekina i he iloʻi ae Otua.” b​—Kolose 1:​10e, PM; 2 Kolinito 5:​14.

8-10. (a) ʻOku anga-fēfē hono fakamoʻoniʻi ʻe ha fefine Kalisitiane ʻe taha ko e Folofola ʻa e ʻOtuá “ʻokú ne ʻomi ʻa e mālohi”? (e) Ko e hā kuó ke ako mei he meʻa ko eni naʻe hokosia fekauʻaki mo Sihova pea mo ʻene feangainga mo ʻene kau sevānití? (Ekisoto 4:12)

⁸ Ko e ʻilo ʻoku maʻu ʻe he kau sevāniti ʻa e ʻOtuá mei heʻenau ako ʻa e Tohitapú ʻoku ʻikai ke momole-ʻolunga. Ko e ʻilo peheé ʻokú ne ueʻi honau lotó, liliu ʻa e founga ʻo ʻenau fakakaukaú, pea hoko ia ko honau konga. (Hepelu 4:​12, NW) Ko e fakatātaá, ko ha fefine naʻe hingoa ko Camille naʻe ngāue ko ha tokotaha tauhi ʻo e kau taʻumotuʻá. Ko e taha ʻo e faʻahinga naʻá ne tauhí ko Martha, ko e taha ʻo e Kau Fakamoʻoni ʻa Sihová. Koeʻuhi naʻe puke lahi ʻa Martha ʻi he hoholo tamakí, naʻe fiemaʻu ai ke siofi maʻu pē. Naʻe pau ke fakamanatu kiate ia ke kai​—pea ke folo ʻa ʻene meʻakaí. Kae kehe, naʻe ʻi ai ʻa e meʻa ʻe taha naʻe piki maʻu ʻi he ʻatamai ʻo Martha, hangē ko ia te tau sio ki aí.

⁹ ʻI he ʻaho ʻe taha, naʻe sio ʻa Martha ʻoku tangi ʻa Camille koeʻuhi ko ha mamahi ʻi ha ngaahi palopalema fakafoʻituitui. Naʻe hili atu ʻe Martha hono nimá ʻia Camille mo ne fakaafeʻi ia ke na ako Tohitapu. Ka ʻe malava ha taha ʻi he tuʻunga ʻo Martha ke fai ha ako Tohitapu? ʻIo, naʻá ne malava! Neongo naʻe mole ʻa e konga lahi ʻo ʻene manatú, naʻe teʻeki ngalo meia Martha ia ʻa hono ʻOtua funganí; pea hala ke ngalo ʻiate ia ʻa e ngaahi moʻoni mahuʻinga kuó ne ako mei he Tohitapú. Lolotonga ʻa e akó, naʻe fakahinohino ʻe Martha ʻa Camille ke ne lau ʻa e palakalafi taki taha, sio ki he ngaahi konga Tohitapu ʻoku ʻasí, lau ʻa e fehuʻi ʻi lalo ʻi he pēsí, pea tali leva ia. Naʻe hokohoko mai eni ʻi ha taimi, pea neongo ʻa e ngaahi fakangatangata ʻa Martha, naʻe fakalakalaka ʻa Camille ʻi heʻene ʻilo faka-Tohitapú. Naʻe fakatokangaʻi ʻe Martha ʻoku fiemaʻu ke feohi ʻa Camille mo e faʻahinga ʻoku nau mahuʻingaʻia ʻi he tauhi ki he ʻOtuá. ʻI heʻene fakakaukau ki he meʻa ko iá, naʻá ne ʻoange ai ki heʻene tokotaha akó ha kofu mo ha sū, koeʻuhi ke maʻu ʻe Camille ha meʻa ʻoku taau ke ne tui ki heʻene fuofua maʻu ʻa e fakataha ʻi he Fale Fakatahaʻangá.

¹⁰ Naʻe maongo kia Camille ʻa e mahuʻingaʻia, faʻifaʻitakiʻanga, mo e tuipau anga-ʻofa ʻa Martha. Naʻá ne fakaʻosiʻaki ko e meʻa naʻe feinga ʻa Martha ke akoʻi kiate ia mei he Tohitapú naʻe mātuʻaki mahuʻinga ʻaupito, he naʻe mei ngalo ʻia Martha ʻa e meʻa kotoa pē tuku kehe ʻa e meʻa kuó ne ako mei he ngaahi konga Tohitapú. Ki mui ai, ʻi he taimi naʻe ʻave ai ʻa Martha ki ha nofoʻanga ʻe taha, naʻá ne ʻilo kuo taimi kiate ia ke ne fai ha meʻa. ʻI he ʻuluaki faingamālié pē, naʻá ne lue lalo ai ki he Fale Fakatahaʻangá, ʻokú ne tui ʻa e vala  mo e sū naʻe ʻoange ʻe Martha, peá ne kole ke fai ha ako Tohitapu. Naʻe fai ʻe Camille ha fakalakalaka lelei peá ne papitaiso.

Ueʻi ke Tapua Atu ʻa e Ngaahi Tuʻunga ʻa Sihová

11. Tānaki atu ki he hoko ʻo faivelenga ʻi he ngāue fakamalangá, ʻe lava fēfē ke tau fakahāhaaʻi kuo ueʻi kitautolu ʻe he pōpoaki ʻo e Puleʻangá?

¹¹ ʻI he taimí ni, ʻoku laka hake ʻi he toko ono miliona ʻo e Kau Fakamoʻoni ʻa Sihova hangē ko Martha pea mo Camille he taimí ni, ʻoku nau malangaʻi ʻa e ‘ongoongolelei . . . ʻo e puleʻangá’ ʻi māmani lahi. (Mātiu 24:14; 28:​19, 20) Hangē ko e kau Kalisitiane ʻi he ʻuluaki senitulí, ʻoku ueʻi loloto kinautolu ʻe he ‘ngaahi meʻa lalahi ʻa e ʻOtuá.’ ʻOku nau houngaʻia ʻi honau monū ko ia ko hono fataki ʻa e huafa ʻo Sihová pea kuó ne lilingi hifo hono laumālié kia kinautolu. ʻI heʻene peheé, ʻoku nau fai ʻa e feinga kotoa pē ke “aeva o tāu moe Eiki o fakafiemalie i he mea kotoabe,” ʻo ngāueʻaki ʻa ʻene ngaahi tuʻungá ʻi he tafaʻaki kotoa pē ʻo ʻenau moʻuí. ʻI he ngaahi meʻa kehé, ʻoku kau heni ʻa hono tokaʻi ʻa e ngaahi tuʻunga ʻa e ʻOtuá fekauʻaki mo e valá pea mo e teuteú.—Kolose 1:10a, PM; Taitusi 2:10.

12. Ko e hā ʻa e akonaki fakahangatonu fekauʻaki mo e valá mo e teuteú ʻoku tau maʻu ʻi he 1 Timote 2:​9, 10?

¹² ʻIo, kuo fokotuʻu ʻe Sihova ʻa e ngaahi tuʻunga fekauʻaki mo hotau fōtunga hāmai fakafoʻituituí. Naʻe fakahaaʻi mai ʻe he ʻapositolo ko Paulá ʻa e niʻihi ʻo e ngaahi fiemaʻu ʻa e ʻOtuá fekauʻaki mo e meʻá ni. “Ko hoku loto ki he kau fefine, ke nau teuʻaki kinautolu ʻa e kofu ʻoku ngali ke ʻai, pea ō mo e angamā mo e angafakamaʻumaʻu [“anga-fakanānā mo e fakakaukau lelei,” NW]: ʻo ʻoua ʻe fai ʻaki ʻa e fafatu ʻo e louʻulu, pe ko e koula mo e mataʻitofe mo e kofu mahuʻinga; ka nau fai ke teungaʻia ʻi he ngaahi ngaue lelei, ʻa ia ko e meʻa ʻoku tāu mo e kau fefine ʻoku nau lavutu ke tauhi [“taukave ke ʻapasia,” NW] ki he ʻOtua.” c Ko e hā ʻoku tau ako mei he ngaahi lea ko ení?—1 Timote 2:​9, 10.

13. (a) Ko e hā ʻa e ʻuhinga ʻo e “kofu ʻoku ngali ke ʻai”? (e) Ko e hā ʻoku lava ai ke tau pehē ʻoku feʻunga ʻa e ngaahi tuʻunga ʻa Sihová?

 ¹³ Ko e ngaahi lea ʻa Paulá ʻoku fakahā ai ko e kau Kalisitiané ʻoku totonu ke “teuʻaki kinautolu ʻa e kofu ʻoku ngali ke ʻai.” ʻOku ʻikai totonu ke nau hā taʻetaau, taʻemaau, pe moveuveu. Meimei ko ha taha pē, naʻa mo e faʻahinga ʻoku masivá, ʻe lava ke nau aʻusia ha ngaahi tuʻunga feʻunga pehē ʻaki hono fakapapauʻi ko honau valá ʻoku maau, maʻa, pea taau. Ko e fakatātaá, ʻi he taʻu kotoa pē ko e Kau Fakamoʻoni ʻi he taha ʻo e ngaahi fonua ʻo ʻAmelika Tongá ʻoku nau lue lalo ʻi he laui kilomita ʻo fou ʻi he vaó pea toki folau ai ʻi he laui houa ʻi ha pōpao koeʻuhi ke maʻu ʻenau fakataha-lahi fakavahé. ʻOku ʻikai ko ha meʻa foʻou ia ki ha taha ke tō ki he vaitafé pe mahae hono teungá ʻi he vaó koeʻuhi ko e fononga ʻoku faí. Ko ia ko e taimi ʻoku aʻu ai ʻa e kau maʻu fakataha-lahí ki he feituʻu ʻoku fai ai ʻa e fakataha-lahí, ko honau fōtungá ʻoku mei faʻa hā taʻemaau maʻu pē. Ko ia ai ʻoku nau tuku leva ha taimi ke tuituiʻi ai ʻa e ngaahi foʻi fakamaʻú, fakaleleiʻi e sipá, pea fō mo haiane ʻa e ngaahi vala te nau tui ki he fakataha-lahí. ʻOku nau koloaʻaki honau fakaafeʻi ko ia ke kai ʻi he tēpile ʻa Sihová, pea ʻoku nau loto ke nau tui ha teunga taau.

14. (a) Ko e hā ʻa e ʻuhinga ʻo e teungaʻaki ʻa e “anga-fakanānā mo e fakakaukau lelei”? (e) Ko e hā ʻene kaunga kia kitautolu ke ʻai teunga ‘ko e kakai ʻoku taukave ke ʻapasia ki he ʻOtuá’?

¹⁴ Naʻe toe fakahaaʻi ʻe Paula ʻoku totonu ke tau teungaʻaki ʻa e “anga-fakanānā mo e fakakaukau lelei.” ʻOku ʻuhinga ení ko hotau fōtunga hāmaí ʻoku totonu ke ʻoua ʻe fie hā, matamatakehe, fakaʻaiʻai ki he fehokotaki fakasinó, fakatēlefua, pe tokanga tōtuʻa ki he sitailá. Tānaki atu ki aí, ʻoku totonu ke tau teuteu ʻi ha founga ʻe tapua atu ai ʻa e ‘ʻapasia ki he ʻOtuá.’ ʻOku ʻomi ai ha meʻa ke tau fakakaukau ki ai, ʻikai ko ia? ʻOku ʻikai ko ha meʻa pē eni ia ʻo e vala taau ʻi he taimi ʻoku tau ʻalu ai ki he ngaahi fakataha ʻa e fakatahaʻangá pea ʻaiʻai noaʻia leva ʻi he ngaahi taimi kehé. Ko hotau fōtunga hāmai fakafoʻituituí ʻoku totonu ke tapua maʻu pē ai ʻa e fakakaukau ʻapasia mo fakalāngilangi koeʻuhi ko e kau Kalisitiane mo e kau faifekau houa ʻe 24 kitautolu ʻi he ʻaho. ʻOku mahino ko hotau ngaahi vala ngāué mo hotau ngaahi vala akó ʻe ʻai ke feʻungamālie ia mo e natula ʻo e faʻahinga ngāue te tau fakahokó. Neongo ia, ʻoku totonu ke tau teunga anga-fakanānā pea faiʻaki ʻa e māluʻia. Kapau ʻe tapua atu maʻu pē ʻi hotau teungá ʻetau tui ki he ʻOtuá, heʻikai faifai ange pea tau ongoʻi toupīkoi mei he faifakamoʻoni fakatuʻupakē koeʻuhi ko haʻatau mā ʻi hotau fōtunga hāmaí.​—1 Pita 3:15.

“ʻOua Te Mou ʻOfa ki Māmani”

15, 16. (a) Ko e hā ʻoku mahuʻinga ai ke tau fakaʻehiʻehi mei he faʻifaʻitaki ki he māmaní ʻi he ngaahi meʻa fekauʻaki mo e valá mo e teuteú? (1 Sione 5:19) (e) Ko e hā ʻa e ʻuhinga ʻaonga ʻoku totonu ai ke tau fakaʻehiʻehi mei he ngaahi sitaila ʻo e valá mo e teuteú?

¹⁵ Ko e akonaki ʻoku lēkooti ʻi he 1 Sione 2:​15, 16 ʻokú ne toe tokonaki mai ha tataki ʻi heʻetau fili ko ia ki he valá mo e teuteú. ʻOku tau lau: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani.”

¹⁶ He taimi tonu moʻoni ko e akonaki ko iá! ʻI ha  kuonga ʻoku mātuʻaki mālohi ai ʻa e tenge mei he toʻumeʻá, ʻoua ʻaupito naʻa tau tuku ke puleʻi ʻe he māmaní ʻetau teuteú. Ko e ngaahi sitaila ʻo e valá mo e teuteú kuo hōloa ʻo kovi ange ʻi he ngaahi taʻu ki mui ní. Naʻa mo e tuʻunga ki he vala ʻo e kakai pisinisí mo e kau palōfesinalé ʻoku ʻikai ke ne faʻa tokonaki ʻe ia ha tuʻunga falalaʻanga ki he meʻa ʻoku feʻungamālie ki he kau Kalisitiané. Ko e toe ʻuhinga eni ʻoku totonu ai ke tau tokanga maʻu pē ki he fiemaʻu ke ‘ʻoua naʻa tau tuku ke fakaangatatau kitautolu ki he maama ko ení’ kapau ʻoku tau fie moʻui ʻo fakatatau ki he ngaahi tuʻunga ʻa e ʻOtuá pea hoko ai ʻo ‘teungaʻia . . . ʻi he meʻa kotoa pe ʻa e tokateline ʻa hotau ʻOtua Fakamoʻuí.’​—Loma 12:2; Taitusi 2:​10.

17. (a) Ko e hā ʻa e ngaahi fehuʻi ʻoku malava ke tau lāulea ki ai ʻi he taimi ʻoku fai ai ha fakatau vala pe fili ʻo ha sitaila? (e) Ko e hā ʻoku totonu ai ki he ngaahi ʻulu ʻo e fāmilí ke nau mahuʻingaʻia ʻi he fōtunga hā mai fakafoʻituitui ʻo e ngaahi mēmipa ʻo e fāmilí?

¹⁷ Ki muʻa ke ke fili pe ʻe fakatau mai ha faʻahinga vala, ʻoku fakapotopoto ke ʻeke hifo kiate koe: ‘Ko e hā ʻoku fakamānako ai ʻa e sīpinga ko ení kia aú? ʻOku fakafelāveʻi nai ia mo ha tokotaha faiva ʻiloa​—ha taha ʻoku ou manako ai? Kuo ohi nai ia ʻe he ngaahi mēmipa ʻo ha kau kengi he halá pe ha kulupu ʻoku nau poupouʻi ha laumālie faʻifaʻiteliha mo angatuʻu?’ ʻOku totonu ke tau toe sio fakalelei ki he valá. Ko ha kofu ia pe ko ha piva, fēfē hono lōloá? Ko e sīpingá? ʻOku fakanānā ʻa e valá, taau, pea molumalu, pe ʻoku manoʻonoʻo, fakaʻaiʻai ki he fehokotaki fakasinó, pe taʻetaau? ʻEke hifo kia koe, ‘Ko ʻeku tui ʻa e vala ko ení ʻe fakatupunga nai ai ha tūkia?’ (2 Kolinito 6:​3, 4) Ko e hā ʻoku totonu ke tau hohaʻa ai ki aí? Koeʻuhí he ʻoku pehē ʻe he Tohitapú: “Nae ikai fakafiemalie a Kalaisi eia.” (Loma 15:​3, PM) Ko e ngaahi ʻuluʻi fāmili Kalisitiané ʻoku totonu ke nau tokanga ki he fōtunga hāmai ʻo e ngaahi mēmipa hono fāmilí. ʻI he fai ko e ʻapasia ki he ʻOtua lāngilangiʻia ʻoku nau lotu ki aí, ko e ngaahi ʻuluʻi fāmilí ʻoku totonu ke ʻoua te nau fakatuotuai ʻi hono ʻoatu ha faleʻi mālohi mo anga-ʻofa ʻi he taimi ʻoku fiemaʻu ai ení.​—Semisi 3:13.

18. Ko e hā ʻokú ne ueʻi koe ke fai ha tokanga lelei ki ho valá mo e teuteú?

¹⁸ Ko e pōpoaki ʻoku tau fatakí ko e haʻu meia Sihova, ʻa ia ko e fakatātā tonu ʻo e molumalu mo e māʻoniʻoni. (Aisea 6:3) ʻOku ekinaki mai ʻa e Tohitapú ke tau faʻifaʻitaki kiate ia “ʻo tāu mo e fanau kuo ʻofeina.” (Efeso 4:32e [Efeso 5:​1, PM]) Ko hotau valá mo e teuteú ʻe lava ke tapua lelei atu ai pe kovi ʻa ʻetau Tamai fakahēvaní. ʻOku pau moʻoni ʻoku tau loto ke ʻai hono lotó ke fiefia!​—Palovepi 27:11.

19. Ko e hā ʻa e ngaahi ʻaonga ʻoku maʻu mei hono fakaʻilo atu ʻa e ‘ngaahi meʻa lalahi ʻa e ʻOtuá’ ki he niʻihi kehé?

¹⁹ ʻOku anga-fēfē hoʻo ongoʻi fekauʻaki mo e ‘ngaahi meʻa lalahi ʻa e ʻOtuá’ kuó ke akó? Ko e moʻoni, he monūʻia ē ka ko kitautolu he kuo tau ako ʻa e moʻoní! Koeʻuhi ʻoku tau ngāueʻi ʻa e tui ki he taʻataʻa kuo lilingi ʻo Sīsū Kalaisí, ʻoku fakamolemoleʻi ai ʻetau ngaahi angahalá. (Ngāue 2:38) Ko hono olá, ʻoku tau lea tauʻatāina ai ki he ʻOtuá. ʻOku ʻikai ke tau manavahē ki he maté ʻo hangē ko e faʻahinga ʻoku ʻikai haʻanau ʻamanakí. Ko hono kehé, ʻoku tau maʻu ʻa e lea fakapapau ʻa Sīsū ʻe ʻi ai e ʻaho “ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.” (Sione 5:​28, 29) Kuo anga-lelei ʻa Sihova ʻi hono fakaʻilo mai kia kitautolu ʻa e kotoa ʻo e ngaahi meʻá ni. Tānaki mai ki aí, kuó ne lilingi hifo kia kitautolu hono laumālié. Ko ia ai, ko e houngaʻia ki he ngaahi meʻaʻofa kotoa ko ení ʻoku totonu ke ne ueʻi kitautolu ke tau ʻapasia ki heʻene ngaahi tuʻunga māʻolungá pea fakahīkihikiʻi ia ʻaki ʻa e faivelenga, ʻi hono talaki ʻa e “ngaahi meʻa lalahi” ko ení ki he niʻihi kehé.

[Fakamatala ʻi lalo]

ʻE Fēfē Haʻo Tali?

• Ko e hā ʻa e “ngaahi meʻa lalahi” naʻe fanongo ki ai ʻa e kakaí ʻi he ʻaho ʻo e Penitekosi 33 T.S., pea naʻe anga-fēfē ʻenau talí?

• ʻE anga-fēfē hoko ha taha ko ha ākonga ʻa Kalaisi, pea ko e hā ʻoku kau ʻi he tuʻunga ākongá?

• Ko e hā ʻoku mahuʻinga ai kia kitautolu ke tau tokanga ki hotau valá mo e teuteú?

• Ko e hā ʻa e ngaahi moʻoniʻi meʻa ʻoku totonu ke fai ha fakakaukau ki ai ʻi he taimi ʻoku fai ai ha fili pe ʻoku taau ha vala pe sīpinga?

[Fehuʻi ki he Ako]

[Fakatātā ʻi he peesi 15]

Naʻe fanongonongo ʻe Pita kuo toe fokotuʻu hake ʻa Sīsū mei he maté

[Fakatātā ʻi he peesi 17]

ʻOku tapua lelei atu ʻi ho fōtunga hāmai fakafoʻituituí ʻa e ʻOtua ʻokú ke lotu ki aí?

[Fakatātā ʻi he peesi 18]

Kuo pau ki he ngaahi mātuʻa Kalisitiané ke nau mahuʻingaʻia ʻi he fōtunga hāmai ʻo e ngaahi mēmipa ʻo e fāmilí