Talanoa ki he Moʻuí

“ʻE ʻIkai Te U Liliu ha Meʻa!”

FAKAMATALA FAI ʻE GLADYS ALLEN

ʻOku ʻeke mai kiate au ʻi he taimi ʻe niʻihi, “Kapau te ke maʻu hoʻo moʻuí ke ke toe moʻuiʻaki, ko e hā te ke liliú?” ʻOku lava ke u tali moʻoni, “ʻE ʻikai te u liliu ha meʻa!” Tuku ke u fakamatala ki he ʻuhinga ʻoku ou ongoʻi peheni aí.

ʻI HE faʻahitaʻu māfana ʻo e 1929, ʻi hoku taʻu uá, naʻe hoko ai ha meʻa lelei ki heʻeku tamaí ko Matthew Allen. Naʻá ne maʻu ai ʻa e kiʻi tohi ko e Millions Now Living Will Never Die!, ko e pulusi ʻe he Kau Ako Tohitapu Fakavahaʻapuleʻangá, hangē ko ia naʻe uiʻaki he taimi ko iá ʻa e Kau Fakamoʻoni ʻa Sihová. Hili e lau vēkeveke ha ngaahi peesi siʻi pē, naʻe kalanga ʻa e tangataʻeikí, “Ko e fakamatala lelei taha eni kuo faifai ange peá u laú!”

ʻI he taimi nounou mei ai, naʻe maʻu ai ʻe he tangataʻeikí ʻa e ngaahi tohi kehe ʻa e Kau Ako Tohitapú. Naʻá ne kamata ai pē ke vahevahe atu ʻa e meʻa naʻá ne ʻiló ki he kotoa ʻo hono ngaahi kaungāʻapí. Kae kehe, naʻe ʻikai ha fakatahaʻanga ʻa e Kau Fakamoʻoni ʻa Sihová ʻi homau feituʻu tukuʻutá. ʻI hono ʻiloʻi ʻa e fiemaʻu ki ha feohi tuʻumaʻu faka-Kalisitiané, naʻe hiki ʻe he tangataʻeikí ʻa e fāmilí ki Orangeville, Ontario, Kānata, ʻi he 1935 koeʻuhi naʻe ʻi ai ha fakatahaʻanga ai.

ʻI he ngaahi ʻaho ko iá, naʻe ʻikai fakalototoʻaʻi maʻu pē ʻa e fānaú ke nau maʻu ʻa e ngaahi fakataha ʻa e fakatahaʻangá; naʻa nau faʻa nofo pē ʻi tuʻa ʻi he feituʻu faiʻanga fakatahá ʻo vaʻinga ai kae ʻoua kuo ʻosi e fakataha ʻa e kakai lalahí. Naʻe ʻikai leleiʻia ʻi he meʻá ni ʻa e tangataʻeikí. Naʻá ne fakaʻuhinga, “Kapau ʻoku lelei kiate au ʻa e ngaahi fakatahá, ʻoku lelei ia ki heʻeku fānaú.” Ko ia neongo ʻene toki kau foʻou atu ki aí, naʻe fakahinohinoʻi ʻe he tangataʻeikí ʻa hoku tuongaʻané ko Bob, ko hoku ongo tokouá ko Ella mo Ruby, pea mo au ke mau kau fakataha mo e kakai lalahí ʻi he ngaahi fakatahá, pea naʻa mau fai ia. Naʻe vave leva ʻa e kau mai ki ai foki mo e fānau ʻa e Kau  Fakamoʻoni kehé. Ko e maʻu fakatahá mo hono fai ʻo e talí naʻe hoko ia ko e konga mātuʻaki mahuʻinga ʻo ʻemau moʻuí.

Naʻe manako ʻa e tangataʻeikí ʻi he Tohitapú, pea naʻá ne maʻu ha founga fakamānako ʻo hono fakatātaaʻi ʻa e ngaahi talanoa faka-Tohitapú. Fakafou ʻi he ngaahi meʻá ni, naʻá ne ʻai ai ke maongo ki homau fanga kiʻi lotó ʻa e ngaahi lēsoni mātuʻaki mahuʻinga ʻa ia ʻoku ou kei manatu ʻofa ʻaupito ki ai. Ko e taha ʻoku ou manatuʻi ko e pehē ko ia ʻoku tāpuakiʻi ʻe Sihova ʻa e faʻahinga ʻoku talangofua kiate iá.

Naʻe toe akoʻi kimautolu ʻe he tangataʻeikí ke ngāueʻaki ʻa e Tohitapú ke taukapoʻi ʻaki ʻemau tuí. Naʻa mau faʻa faʻu ha vaʻinga fekauʻaki mo ia. Naʻe pehē nai ʻe he tangataʻeikí, “ʻOku ou tui ʻi he taimi te u mate aí te u ʻalu ki hēvani. Sai, mou fakamoʻoniʻi mai kiate au ʻe ʻikai.” Naʻá ku kumi mo Ruby ʻi he konikōtiení ke maʻu ʻa e ngaahi konga Tohitapu ʻe lava ke ma ngāueʻaki ke fakahalaʻi ʻaki ʻa e akonaki ko iá. Hili ʻema lau ʻa e ngaahi konga Tohitapu naʻá ma ʻiló, naʻe pehē ʻe he tangataʻeikí, “ʻOku mahuʻinga ia, ka ʻoku teʻeki ai pē ke u tuipau ki ai.” Ko ia naʻá ma toe foki ki he konikōtiení ʻo kumi ai. Naʻe faʻa lele eni ʻi he laui houa kae ʻoua kuo toki fiemālie ʻa e tangataʻeikí ʻi he ngaahi tali naʻá ma ʻoange kiate iá. Ko hono olá, naʻá ku hoko ai mo Ruby ʻo mateuteu lelei ke fakamatalaʻi mo taukapoʻi ʻa ʻema tuí.

Ikuʻi ʻa e Manavahē Tangatá

Neongo ʻa e akoʻi lelei naʻá ku maʻu ʻi ʻapi pea ʻi he ngaahi fakataha ʻa e fakatahaʻangá, kuo pau ke u fakahaaʻi naʻe ʻi ai ʻa e ngaahi tafaʻaki ʻo e hoko ko ha Kalisitiané naʻe faingataʻa kiate au. ʻI he hangē ko e toʻutupu tokolahi, naʻe ʻikai te u fiefia ʻi he hoko ʻo kehe mei he niʻihi kehé, tautefito ki hoku kaungā kalasí. Ko ha muʻaki siviʻi ʻo ʻeku tuí naʻe kau ki ai ʻa e meʻa naʻa mau ui ko e ngaahi laka mo e fakamatalá.

Ko e taumuʻá ki ha kulupu ʻo e fanga tuongaʻané mo e fanga tokouá ke nau luelue māmālie ʻi he ngaahi hala lahi ʻo e koló mo toʻo ʻa e ngaahi papa fakaʻilonga naʻe ʻi ai ʻa e ngaahi tuʻuaki. Naʻe feʻilongaki ʻa e tokotaha kotoa ʻi homau koló ʻa ia naʻe ʻi ai ʻa e toko 3,000 nai pe ofi ki ai. Lolotonga ʻa e laka mo e fakamatala ʻe taha, naʻá ku luelue ai ʻi he ngataʻanga ʻo e lainé ʻo toʻo ha fakaʻilonga naʻe tohiʻi ai ko e “Lotú ko ha Tauhele mo ha Kākā.” Naʻe fakatokangaʻi au ʻe he niʻihi ʻo hoku ngaahi kaungāakó, pea naʻa nau muimui leva ʻiate au, mo hiva “ʻOku Maluʻi ʻe he ʻOtuá ʻa e Tuʻí.” Naʻe anga-fēfē ʻeku fekuki mo iá? Naʻá ku lotu tōtōivi ki ha mālohi ke hokohoko atu. ʻI he faifai pea ʻosi ʻa e laká, naʻá ku fakavave ki he Fale Fakatahaʻangá ke ʻave ʻa ʻeku papa fakaʻilongá kau ʻalu ki ʻapi. Kae kehe, ko e tokotaha naʻá ne tokangaʻí naʻá ne tala mai kiate au ʻoku teu ke kamata mo ha toe laka ʻe taha pea ʻoku nau fiemaʻu mo ha toe tokotaha ke ne toʻo ha fakaʻilonga. Ko ia naʻá ku toe ʻalu ai, pea toe ʻāʻāsili ai pē ʻeku lotú. Kae kehe, ʻi he aʻu mai ki he taimi ko ení, ne helaʻia ʻa hoku kaungā kalasí pea nau ʻalu ki ʻapi. Ko ʻeku ngaahi lotu ki ha mālohí ne hoko ai ko e ngaahi lotu fakamālō!​—Palovepi 3:5.

Naʻe talitali lelei maʻu pē ʻa e kau sevāniti taimi-kakató ʻi homau ʻapí. Ko ha kulupu fiefia kinautolu pea ko ha meʻa fakafiefia ia ke talitali kinautolu. ʻI heʻeku ʻuluaki manatú, naʻe fakahaaʻi mai maʻu pē ʻe heʻemau ongo mātuʻá kia kimautolu fānaú ʻa e ngāue fakafaifekau taimi-kakató ko e ngāue lelei taha ia ʻe ala maʻú.

ʻI hono tali ʻena fakalototoʻá, ʻi he 1945, naʻe kamata ai ʻa ʻeku ngāue ʻi he ngāue fakafaifekau taimi-kakató. Naʻá ku kau fakataha ki mui mo hoku tokoua ko Ella, ʻa ia naʻe tāimuʻa ʻi Lonitoni, Ontario. Naʻe fakafeʻiloaki ai au ki ha tafaʻaki ʻo e ngāué naʻá ku fakakaukau ʻe ʻikai ʻaupito te u lava ke fai. Naʻe faʻa ʻalu ʻa e fanga tuongaʻané mei he tēpile ki he tēpile ʻi he ngaahi pā ʻi he feituʻú ʻo  tuʻuaki ki he kau kasitomaá ʻa e ngaahi tatau ʻo e Taua Leʻo mo e Consolation (ko e ʻĀ Hake! ia he taimí ni). Ko e meʻa mālié, naʻe fai ʻa e ngāué ʻi he ngaahi hoʻatā Tokonakí, ko ia naʻá ku maʻu ai ʻa e uiké kotoa ke lotu ai ki ha loto-toʻa ke ʻalu! Naʻe ʻikai faingofua kiate au ʻa e ngāué, ka naʻe mahuʻinga.

ʻI he tafaʻaki ʻe tahá, naʻá ku toe ako ai ki he founga ke tufaki ai ʻa e ngaahi ʻīsiu makehe ʻo e Consolation naʻe lave ai ki hono fakatangaʻi hotau fanga tuongaʻane ʻi he ngaahi kemi Nasi fakamamahí, tautefito ki he fetuʻutaki mo e kau tangata pisinisi mahuʻinga Kānatá, ʻo kau ai ʻa e kau palesiteni ʻo e ngaahi kautaha lalahí. ʻI he faai mai ʻa e ngaahi taʻú, naʻá ku ʻiloʻi ai ʻoku poupouʻi maʻu pē kimautolu ʻe Sihova kehe pē ke mau falala kiate ia ki ha mālohi. Hangē ko ia ne faʻa leaʻaki ʻe he tangataʻeikí, ʻoku tāpuakiʻi ʻe Sihova ʻa e faʻahinga ʻoku talangofua kiate Iá.

Tali ʻa e Fakaafe ke Ngāue ʻi Quebec

ʻI Siulai 4, 1940, naʻe tapui ai ʻi Kānata ʻa e ngāue ʻa e Kau Fakamoʻoni ʻa Sihová. Ki mui ai, naʻe toʻo ʻa e tapuí, ka naʻe kei fakatangaʻi pē kimautolu ʻi he vahefonua Katolika Loma ʻo Quebec. Ko ha feingangāue makehe ʻo ngāueʻaki ʻa e tuleki fakalea mālohi ko e Quebec’s Burning Hate for God and Christ and Freedom Is the Shame of All Canada naʻe fakahoko ia ke tohoakiʻi ʻaki ʻa e tokangá ki hono ngaohikovia hotau fanga tokoua ʻi aí. Ko Nathan H. Knorr, ko ha mēmipa ʻo e Kulupu Pule ʻa e Kau Fakamoʻoni ʻa Sihová, naʻá ne fakataha mo e kau tāimuʻa ʻe laui teau ʻi he kolo ko Montreal ke fakamatala ki he kaunga ʻo e meʻa naʻe teu ke mau faí. Naʻe tala mai ai ʻe Tokoua Knorr kapau te mau loto ke kau ʻi he feingangāué, ʻe lava ke mau ʻamanekina ʻe puke kimautolu ʻo tuku pilīsone. Ko e meʻa tofu pē ia ne hokó! Naʻe puke tuʻo 15 au ʻi ha vahaʻa taimi. ʻI heʻemau ʻalu atu ʻi he malaʻe ngāué, naʻa mau fakapapauʻi ke ʻave ʻemau polosi fufulu nifó mo e helú telia naʻa mau nofo he pō ko iá ʻi pilīsone.

ʻUluakí naʻa mau fakahoko ʻa e lahi taha ʻo e ngāué ʻi he poʻulí koeʻuhi ke siʻi ai ʻi he lahi taha ʻe malavá hono tohoakiʻi mai kia kimautolu ʻa e tokangá. Naʻá ku faʻa ʻave mo ha toe ngaahi tuleki lahi ʻi ha kato naʻá ku tautau ʻi hoku kiá ʻi hoku loto koté. Ko e kato fonu tulekí naʻe lahilahi, ʻo ʻai ai au ke u hā ngali feitama. Naʻe ʻaonga ia kiate au ʻi heʻeku heka ʻi ha meʻalele pāsese feʻefiʻefihi ke fononga ki he feituʻu ngāué. Naʻe tuʻu ʻi he taimi lahi ha tangata anga fakamatāpule ʻo tuku mai ʻa hono seá ki he fefine “feitamá.”

ʻI he faai mai ʻa e taimí, naʻa mau kamata fai ai ʻa e ngāue tufá ʻi he taimi ʻahó. Naʻa mau tuku ha ngaahi tuleki ʻi ha matapā ʻe tolu pe fā, pea mau hiki leva ki ha feituʻu ʻe taha. Naʻe faʻa lavameʻa ia. Kae kehe, kapau ne ʻiloʻi ʻe he pātele ʻo e vāhenga fakasiasí naʻa mau ʻi he feituʻú, naʻe lava ke mau ʻamanekina ʻa e faingataʻa. ʻI he taimi ʻe taha, naʻe fakaʻaiʻai ai ʻe ha pātele ha fuʻu kakai lalahi ʻe toko 50 pe 60 pea mo e fānau ke nau tolo ʻaki kimautolu ʻa e tematá mo e fuaʻimoá. Naʻa mau toi ʻi he ʻapi ʻo ha tokoua Kalisitiane, ʻa ia naʻe pau ke mau nofo ai ʻi he poó ʻo mohe ʻi he falikí.

Naʻe ʻi ai ha fiemaʻu lahi ki he kau tāimuʻá ke malanga ki he kakai lea faka-Falanisē ʻi Quebec, ko ia ai, ʻi Tīsema 1958, ko au mo hoku tokoua ko Ruby naʻá ma kamata ako ai ʻa e lea faka-Falaniseé. Hili iá ne vaheʻi kimaua ki ha ngaahi feituʻu lea faka-Falanisē ʻi he vahefonuá. Ko e vāhenga-ngāue taki taha naʻe ʻi ai ʻa e meʻa makehe naʻe hokosia ai. ʻI he feituʻu ʻe taha, naʻá ma ʻalu ai mei he matapā ki he matapaá ʻi he houa ʻe valu he ʻaho ʻo feʻunga mo e taʻu ʻe ua mo e ʻikai pē ha taha te ne tali! Naʻe haʻu pē ʻa e kakaí ki he matapaá ʻo fakasio mai pea tuku hifo ʻa e puipuí. Ka naʻe ʻikai te ma foʻi. ʻI he ʻahó ni, ʻoku ʻi ai ʻa e ongo fakatahaʻanga longomoʻui ʻe ua ʻi he kolo ko iá.

Fakaivia ʻe Sihova ʻi he Founga Kotoa Pē

Naʻá ma kamata ngāue tāimuʻa makehe ʻi he 1965. ʻI he vāhenga-ngāue tāimuʻa makehe ʻe taha, naʻá ma hoko ai ʻo mahinoʻi ʻa e ʻuhinga kakato ʻo e ngaahi lea ʻa Paula ʻoku lēkooti ʻi he 1 Timote 6:8: “ʻI heʻetau maʻu ʻetau meʻakai mo e kofu, te tau feʻunga pe ʻi he meʻa ko ia.” Naʻe pau ke ma muimui ʻi ha tuʻunga patiseti fefeka koeʻuhí ke tokangaʻi ʻema ngaahi fakamolé. Ko ia ai naʻá ma vaheʻi ha paʻanga ki he hitá, totongi falé, ʻuhilá mo e meʻakaí. ʻI he tokangaʻi ʻo e meʻa ko iá, naʻe toe leva ai ʻema sēniti ʻe 25 ke ngāueʻaki he toenga ʻo e māhiná ki he meʻa naʻá ma fiemaʻú.

ʻI he siʻi ʻema paʻangá, naʻe lava ke fakamoʻui ʻa e hitá ʻi homa ʻapí ʻi ha ngaahi houa siʻi pē ʻi he poʻulí. Ko ia naʻe ʻikai ʻaupito māʻolunga hake ʻa homa loki mohé ʻi he tikilī Fahrenheit ʻe 60 pea naʻe faʻa momoko lahi ange ai. ʻI he ʻaho leva ʻe taha, naʻe ʻaʻahi mai ai kia kimaua ha foha ʻo e taha ʻo e kau ako Tohitapu ʻa Ruby. Kuo pau pē  naʻá ne foki ki ʻapi ʻo tala ki heʻene faʻeé naʻá ma mokosia lahi ʻaupito, he ʻi he hili iá naʻá ne ʻomai kia kimaua ʻa e tola ʻe hongofulu ʻi he māhina kotoa pē ke fakatau mai ʻaki ha lolo koeʻuhi ke ma lava ai ʻo fakamoʻui ʻa e hitá ʻi he taimi kotoa. Naʻe ʻikai te ma ongoʻi masiva ʻi ha faʻahinga founga. Naʻe ʻikai te ma koloaʻia, ka naʻá ma maʻu maʻu pē ʻa e meʻa naʻá ma fiemaʻú. Naʻá ma ongoʻi ko ha tāpuaki ia ha meʻa pē naʻe toe. He moʻoni ē ko e ngaahi lea ʻi he Sāme 37:25: “Kuo teʻeki te u mamata ki ha maʻoniʻoni kuo liʻaki, pe ko hono hako ʻoku nofo ke kole meʻakai”!

Neongo ʻa e fakafepaki naʻá ma fehangahangai mo iá, naʻá ku maʻu ʻa e fiefia ʻi he sio ki ha kakai ʻa ia naʻá ku fai ʻa e ngaahi ako Tohitapu mo kinautolu kuo nau hoko ʻo ʻiloʻi ʻa e moʻoní. Naʻe fai ʻe he niʻihi ʻa e ngāue fakafaifekau taimi-kakató ko ha ngāue, ʻa ia naʻá ne ʻomai kiate au ʻa e fiefia makehe.

Fehangahangai Lavameʻa mo e Ngaahi Pole Foʻou

Ko Cornwall, Ontario, naʻe hoko ko homa vāhenga-ngāue foʻou ʻi he 1970. ʻI ha taʻu ʻe taha nai hili ʻema tūʻuta ʻi Cornwall, naʻe hoko ʻo puke ʻa e fineʻeikí. Naʻe mālōlō ʻa e tangataʻeikí ʻi he 1957, pea naʻá ku taufetongi mo hoku ongo tokouá ʻi hono tokangaʻi ʻa e fineʻeikí ʻo aʻu ki heʻene maté ʻi he 1972. Ko homa hoa tāimuʻa makehe ko Ella Lisitza mo Ann Kowalenko ko ha tākiekina tuʻumaʻu kinaua mo ha poupou anga-ʻofa lolotonga ʻa e taimi ko ení. Naʻá na tokangaʻi ʻema ngaahi ako Tohitapú mo e ngaahi fatongia kehé lolotonga ʻema mavahé. He moʻoni ē ko e ngaahi lea ʻa e Palovepi 18:24 (NW): “ʻOku ʻi ai ha kaumeʻa ʻoku pipiki ofi ange ia ʻi ha tokoua”!

ʻOku fonu moʻoni ʻa e moʻuí ʻi he ngaahi ʻahiʻahi faingataʻa. ʻI he uma poupou anga-ʻofa ʻo Sihová, kuo malava ai ke u fehangahangai mo ia. ʻOku ou kei tuli fiefia pē ki ha moʻui ʻi he ngāue taimi-kakató. Ko Bob, ʻa ia naʻe mate ʻi he 1993, naʻá ne fakamoleki ʻo laka hake ʻi he taʻu ʻe 20 ʻi he ngāue tāimuʻá, ʻa ia naʻe kau ai ʻa e ngaahi taʻu mahuʻinga ʻe 10 ʻo ʻene tāimuʻa fakataha mo hono uaifí ko Doll. Ko hoku taʻoketé ʻa Ella, ʻa ia naʻá ne mālōlō ʻi ʻOkatopa 1998, naʻá ne tāimuʻa ʻo laka hake ʻi he taʻu ʻe 30 pea tauhi maʻu maʻu pē ʻa e laumālie tāimuʻá. ʻI he 1991 ko hoku tokoua ʻe tahá ʻa Ruby naʻá ne maʻu ai ʻa e fakaʻilonga ʻo e kanisaá. Neongo ia, naʻá ne ngāueʻaki ʻa hono mālohi fakangatangatá ke malangaʻi ʻa e ongoongo leleí. Naʻá ne toe maʻu pē mo ʻene tōʻonga fakakatá ʻo aʻu ki he pongipongi naʻá ne mate aí, ʻi Sepitema 26, 1999. Lolotonga ʻoku ʻikai te u kei maʻu hoku tokouá, ʻoku ou maʻu ha fāmili fakalaumālie ʻo e fanga tuongaʻane mo e fanga tokoua ke tokoniʻi  au ke kei hokohoko atu ʻeku tōʻonga fakakatá.

ʻI heʻeku sio atu ki mui ki heʻeku moʻuí, ko e hā te u liliú? Kuo ʻikai ʻaupito te u mali, ka kuo tāpuakiʻi ʻaki au ʻa e ongo mātuʻa ʻofa, ko ha tuongaʻane, mo e ongo tokoua ʻa ia naʻa nau fakamuʻomuʻa ʻa e moʻoní ʻi heʻenau moʻuí. ʻOku ou fakatuʻotuʻa atu ke sio vavé ni kia kinautolu kotoa ʻi he toetuʻú. ʻOku lava ke u ongoʻi ʻa hono kuku au ʻe heʻeku tangataʻeikí he taimí ni pea sio ki he loʻimata ʻa ʻeku fineʻeikí ʻi heʻema fefāʻofuaʻakí. Ko Ella, Ruby, mo Bob te nau topuna ʻi he fiefia lahi.

ʻI he taimi ní, ʻoku ou maʻu ʻa e taumuʻa ke hokohoko atu hono ngāueʻaki ʻa hoku tuʻunga moʻui leleí mo e ivi ʻoku kei toé ke fakahīkihikiʻi mo fakalāngilangiʻi ʻa Sihova. Ko e ngāue tāimuʻa taimi-kakató ko ha moʻui fakaofo ia mo fakafiemālie. ʻOku hangē ia ko e meʻa naʻe leaʻaki ʻe he tokotaha-tohi-sāmé fekauʻaki mo e faʻahinga ʻoku ʻaʻeva ʻi he ngaahi founga ʻa Sihová: “Te ke monuia, bea e hoko ae lelei kiate koe.”—Sāme 128:1, 2, PM.

[Fakatātā ʻi he peesi 26]

Naʻe manako ʻa e tangataʻeikí ʻi he Tohitapú. Naʻá ne akoʻi kimautolu ke ngāueʻaki ia ke taukapoʻi ʻaki ʻemau tuí

[Fakatātā ʻi he peesi 28]

Toʻohema ki toʻomataʻu: Ko Ruby, ko au, Bob, Ella, Fineʻeikí mo e Tangataʻeikí ʻi he 1947

[Fakatātā ʻi he peesi 28]

ʻOtu muʻá, toʻohema ki toʻomataʻu: Ko au, Ruby, mo Ella ʻi ha Fakataha-Lahi Fakavahe, 1998