ʻOku Totonu ke Fēfē ʻEtau Vakai ki he Ngaahi ʻAhiʻahí?

NGAAHI SIVI! Ngaahi ʻahiʻahi! Ko e tokotaha kotoa pē kuo pau ke fehangahangai mo ia. ʻOku fakatupunga nai ia ʻe he ngaahi faikehekehe ʻi he angaʻitangatá, ngaahi faingataʻa fakaʻekonōmika, mahamahaki, ngaahi fakatauele, tenge mei he toʻumeʻá ke faihalá, fakatanga, ngaahi pole ki heʻetau tuʻu-ʻataá pe tuʻu-ʻatā mei he tauhi ʻaitolí, mo e ngaahi meʻa lahi kehe. Ko e hā pē ha faʻahinga ʻahiʻahi, ʻoku nau faʻa fakatupunga ʻa e loto-moʻua lahi. ʻE lava fēfē ke tau fakaleleiʻi lavameʻa ia? ʻOku ʻi ai ha founga ʻe ʻaonga ai ia kia kitautolu?

Ko e Poupou Lelei Tahá

Ko Tuʻi Tēvita ʻo e kuonga muʻá naʻá ne hokosia ʻa e ngaahi ʻahiʻahi ʻi he kotoa ʻo ʻene moʻuí, neongo ia naʻá ne mate loto-tōnunga. Naʻe anga-fēfē ʻa e malava ke ne kātakí? Naʻá ne fakahaaʻi ʻa e tupuʻanga ʻo hono mālohí ʻi heʻene pehē: “Ko hoku tauhi ʻa Sihova; ʻe ʻikai te u masiva.” Naʻá ne hoko atu leva ʻo pehē: “Neongo ʻete ʻalu pe ʻi he teleʻa ʻoku maluʻaki ai ʻa Mate, ʻe ʻikai te u manavahe ki ha kovi; he ko koe ʻoku ma feohi: ko siʻo tokotoko mo ʻakau, ʻoku na fakafiemalieʻi au.” (Sāme 23:​1, 4) ʻIo, ko Sihová ko ha matavai ia ʻo e poupou taʻefakangatangata. Naʻá ne tataki ʻa Tēvita ʻi ha ngaahi taimi mātuʻaki faingataʻa, pea ʻokú ne mateuteu ke fai ʻa e meʻa tatau kia kitautolu ʻi he taimi ʻe fiemaʻu aí.

ʻE lava fēfē ke tau maʻu ʻa e poupou ʻa Sihová? ʻOku fakahaaʻi ʻe he Tohitapú ʻa e foungá ʻi heʻene pehē: “ʻAhiʻahiʻi ʻo ʻiloʻi ʻoku lelei ʻa Sihova.” (Sāme 34:​8, NW) Ko ha fakaafe māfana ia, ka ko e hā hono ʻuhingá? Ko ha fakalototoʻa ia ke tauhi kia Sihova pea fakatatau kakato ʻetau moʻuí ki hono finangaló. Ko ha ʻalunga pehē ʻoku ʻuhinga iá ko hono tukuange ʻa e niʻihi ʻo ʻetau tauʻatāiná, ʻo fai ha ngaahi feilaulau. ʻI he ngaahi tuʻunga ʻe niʻihi, ʻe lava ke toe iku ia ki he ngaahi ʻahiʻahi​—fakatanga mo e mamahi. Neongo ia, ko kinautolu ʻoku nau tali ʻaufuatō ʻa e fakaafe ʻa Sihová ʻoku ʻikai ʻaupito fiemaʻu ke nau fakaʻiseʻisa ʻi hono fai iá. ʻE mātuʻaki anga-lelei ʻa Sihova kia kinautolu. Te ne tataki kinautolu pea tokangaʻi fakalaumālie kinautolu. Te ne fakaivia kinautolu ʻi he ngaahi ʻahiʻahí fakafou ʻi heʻene Folofolá, ko hono laumālie māʻoniʻoní, mo e fakatahaʻanga Kalisitiané. Pea ʻe faifai atu pē ʻo ne fakapaleʻi kinautolu ʻaki ʻa e moʻui taʻengatá.​—Sāme 23:6; 25:9; Aisea 30:21; Loma 15:5.

Ko kinautolu ʻoku nau fai ʻa e fili makehe ke tauhi kia Sihová pea ʻoku nau pipiki ki he fili ko iá ʻoku nau ʻiloʻi ʻoku fakahoko ʻe Sihova ʻa e kotoa ʻo ʻene ngaahi talaʻofá. Ko e meʻa ia naʻe hokosia ʻe he kau ʻIsileli ʻa ia naʻa nau muimui ʻia Siosiua ki he Fonua ʻo e Talaʻofá. ʻI heʻenau kolosi pē ʻi Sioataní, naʻe ʻi ai ʻa e ngaahi ʻahiʻahi ke nau  kātekina, ngaahi tau ke fai, mo e ngaahi lēsoni fakamamahi ke ako. Ka ko e toʻutangata ko iá naʻe fakamoʻoniʻi naʻa nau loto-tōnunga ange ʻi heʻenau fanga kuí, ʻa ia naʻa nau hū ki tuʻa mei ʻIsipite ʻo mate ʻi he toafá. Ko ia ai, naʻe poupouʻi ʻe Sihova ʻa e faʻahinga loto-tōnungá, pea ʻi he fekauʻaki mo honau tuʻunga ʻi he ngataʻanga ʻo e moʻui ʻa Siosiuá, ʻoku pehē ʻe he lēkooti ʻa e Tohitapú: “Naʻe fakanongaʻi ʻe Sihova kinautolu mei he potu fuape, ʻo hange ko ia kotoa naʻa ne fuakavaʻaki ki honau tupuʻanga: . . . Naʻe ʻikai ke to kelekele ha momoʻi meʻa ʻe taha ʻi he ngaahi lelei naʻa ne talaʻofa ki haʻa Isileli; naʻe hoko hono kotoa.” (Siosiua 21:​44, 45) ʻE toe lava ke hoko ia kia kitautolu kapau ʻoku tau falala kakato kia Sihova ʻi he malumalu ʻo e ʻahiʻahí pea ʻi he taimi kehe kotoa pē.

Ko e hā nai te ne fakavaivaiʻi ʻetau falala kia Sihová? Naʻe fakahaaʻi ʻe Sīsū ʻa e meʻa ʻe taha ʻi heʻene pehē: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: . . . ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” (Mātiu 6:24) Kapau ʻoku tau falala kia Sihova, ʻe ʻikai te tau kumi ki he maluʻangá ʻi he feituʻu ʻoku kumi ki ai ʻa e tokolahi taha ʻi he māmaní, ki he ngaahi meʻa fakamatelié. Naʻe akonaki ʻa Sīsū ki hono kau muimuí: “Ka mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa [fakamatelie ʻoku fiemaʻu] ko ia kotoa.” (Mātiu 6:33) Ko ha Kalisitiane ʻokú ne tauhi ha vakai mafamafatatau fekauʻaki mo e ngaahi meʻa fakamatelié pea fakamuʻomuʻa ʻa e Puleʻanga ʻo e ʻOtuá ʻi heʻene moʻuí ʻokú ne fai ʻa e fili totonú. (Koheleti 7:​12) Ko e moʻoni, ʻe ʻi ai nai ʻene mole. Te ne fai nai ʻa e ngaahi feilaulau ʻi ha founga fakamatelie. Ka te ne utu ʻa e ngaahi pale lahi. Pea ʻe poupouʻi ia ʻe Sihova.​—Aisea 48:​17, 18.

Meʻa ʻOku Tau Ako mei he Ngaahi ʻAhiʻahí

Ko e moʻoni, ko e fili ke “ʻahiʻahiʻi ʻo ʻiloʻi ʻoku lelei ʻa Sihová” ʻoku ʻikai maluʻi ai ha taha mei he ngaahi tuʻunga taʻeʻamanekina ʻi he moʻuí; pea ʻoku ʻikai te ne fakaū kakato kitautolu mei he ngaahi ʻoho ʻa Sētane mo hono kau fakafofonga fakaetangatá. (Koheleti 9:​11) Ko hono olá, ʻe siviʻi nai ai ʻa e loto-moʻoni mo e fakapapau ʻa ha Kalisitiane. Ko e hā ʻoku tuku ai ʻe Sihova ke fakaeʻa ʻene kau lotú ki he ngaahi ʻahiʻahi peheé? Naʻe ʻomai ʻe he ʻapositolo ko Pitá ʻa e ʻuhinga ʻe taha ʻi heʻene tohi: “Neongo kuo fai nai ʻi he taimi ni, ʻo kapau naʻe ʻikai ala taʻofi, homou fakamamahi fuonounou, he moʻua ʻi he ngaahi ʻahiʻahi kehekehe: koeʻuhiā ke ha hoʻomou tui, ʻene lava ke tuʻu ʻi he sivi—ʻa ia ko e meʻa mahuʻinga ange ʻi he koula, ʻa é neongo ko e meʻa ʻauha, ka ʻoku ʻahiʻahiʻi ia ʻaki ʻa e afi—ʻio, ke ha ia kuo ne lava ʻa e fakamālō mo e langilangiʻia mo e fakaʻapaʻapaʻia ʻi he fakapū mai ʻo Sisu Kalaisi.” (1 Pita 1:​6, 7) ʻIo, ʻoku fakaʻatā kitautolu ʻe he ngaahi siví ke fakahāhā ʻa e tuʻunga ʻo ʻetau tuí mo ʻetau ʻofa kia Sihová. Pea ʻoku tokoni ia ke ʻoatu ai ha tali ki he ngaahi manuki mo e ngaahi tukuakiʻi ʻa Sētane ko e Tēvoló.​—Palovepi 27:11; Fakahā 12:10.

ʻOku toe tokoniʻi kitautolu ʻe he ngaahi siví ke fakatupu ʻa e ngaahi ʻulungaanga faka-Kalisitiane kehe. Ko ha fakatātā, fakakaukau angé ki he ngaahi lea ʻa e tokotaha-tohi-sāmé: “ʻOku tokaʻi [ʻe Sihova] ʻa e maʻulalo: ka ko e mahiki ʻoku nau feʻiloaki mamaʻo.” (Sāme 138:6) Ko e tokolahi ʻo kitautolú ʻoku ʻikai te tau natula anga-fakatōkilalo, ka ʻe lava ke tokoniʻi kitautolu ʻe he ngaahi ʻahiʻahí ke fakatupu ʻa e ʻulungaanga tefito ko iá. Manatuʻi ʻa e taimi ʻi he ʻaho ʻo Mōsesé ʻi he fakafiu ki he kau ʻIsileli ʻe niʻihi ʻa e kai mana he uike ki he uike, mo e māhina ki he māhiná. ʻOku hā mahino, ko ha ʻahiʻahi ia kia kinautolu, neongo ko e maná ko ha tokonaki fakaemana ia. Ko e hā ʻa e taumuʻa ʻo e siví? Naʻe tala ange ʻe Mōsese kia kinautolu: “[Naʻe] fafanga koe [ʻe Sihova] ʻi he toafa ʻaki ʻa e mana, . . . koeʻuhi ke ne fakavaivaiʻi koe, pea ke ne sivi koe.”—Teutalonome 8:16.

ʻE lava ke siviʻi tatau ʻetau anga-fakatōkilaló. Anga-fēfē? Sai, ʻoku anga-fēfē ʻetau tali ki he ngaahi feʻunuʻaki fakaekautahá? (Aisea 60:17)  ʻOku tau fai ha poupou ʻaufuatō ki he ngāue fakamalangá mo e faiakó? (Mātiu 24:14; 28:​19, 20) ʻOku tau vēkeveke tali ʻa e ngaahi fakamatala ʻo e moʻoni faka-Tohitapú ʻi hono tokonaki mai ʻe he “tamaioeiki agatonu mo boto”? (Mātiu 24:​45-47, PM; Palovepi 4:18) ʻOku tau talitekeʻi ʻa e tenge ke maʻu ʻa e ngaahi meʻa fakamuimui tahá, ko e sīpinga fakamuimui tahá, pe ko e meʻalele mōtolo foʻou tahá? Ko ha tokotaha anga-fakatōkilalo ʻe malava ke ne lea ʻio ki he ngaahi fehuʻi peheé.​—1 Pita 1:​14-​16; 2 Pita 3:​11.

ʻOku tokoni ʻa e ngaahi ʻahiʻahí ke fakatupu ʻia kitautolu ʻa e toe ʻulungaanga mātuʻaki mahuʻinga ʻe taha​—ko e kātakí. Naʻe pehē ʻe he ākonga ko Sēmisí: “Siʻoku kainga, mou lau ko e koto fakafiefia ʻo ka mou ka to ki he ngaahi ʻahiʻahi kehekehe; ko hoʻomou ʻilo, ko e sivi ʻo hoʻomou tui ʻoku ne fakatupu ʻa e kataki.” (Semisi 1:​2, 3) Ko e kātakiʻi lavameʻa ʻa e ngaahi sivi lahi fakataha mo e falala kakato kia Sihová ʻoku fakatupu ai ʻa e tuʻumaʻu, mateaki, mo e anga-tonu. ʻOkú ne fakaivimālohiʻi kitautolu ke talitekeʻi ʻa e ngaahi ʻoho ʻa Sētane ʻi he kahaʻú, ʻa e ʻotua ʻiteʻita ʻo e māmani ko ení.​—1 Pita 5:​8-​10; 1 Sione 5:​19; Fakahā 12:12.

Tauhi ha Vakai Totonu ki he Ngaahi ʻAhiʻahí

Ko e ʻAlo haohaoa ʻo e ʻOtuá, ʻa Sīsū Kalaisi, naʻá ne fehangahangai mo e ngaahi ʻahiʻahi lahi ʻi he māmaní pea utu ʻa e ngaahi ʻaonga lahi ʻi hono kātakiʻi iá. Naʻe tohi ʻe Paula ʻo pehē ko Sīsuú “naʻa ne lavaʻi ʻene talangofua, ko e ako ʻe heʻene ngaahi mamahi.” (Hepelu 5:8) Ko ʻene mateaki ki he maté naʻe ʻoatu ai ʻa e fakahīkihiki ki he huafa ʻo Sihová pea ʻai ai ke malava ʻa Sīsū ʻo ʻoatu ʻa e mahuʻinga ʻo ʻene moʻui fakaetangata haohaoá ko ha huhuʻi maʻá e faʻahinga ʻo e tangatá. Naʻe fakaʻatā ʻe he meʻa ko iá ʻa e hala ki he faʻahinga ʻoku nau ngāueʻi ʻenau tui kia Sīsuú ke nau maʻu ʻa e ʻamanaki ʻo e moʻui taʻengatá. (Sione 3:​16) Koeʻuhi naʻe hanganaki loto-tōnunga ʻa Sīsū ʻi he malumalu ʻo e ʻahiʻahí, ʻokú ne hoko he taimí ni ko hotau Taulaʻeiki Lahi mo e Tuʻi fakanofo.​—Hepelu 7:​26-​28; 12:2.

Fēfē kitautolu? Ko ʻetau mateaki ʻi he fehangahangai mo e ngaahi ʻahiʻahí ʻokú ne ʻomai tatau ʻa e ngaahi tāpuaki lahi. Fekauʻaki mo e faʻahinga ʻoku nau maʻu ha ʻamanaki fakahēvaní, ʻoku pehē ʻe he Tohitapú: “Monuʻiaā ka ko e tangata ʻoku ne kataki ha ʻahiʻahi: he ʻo ka ʻosi hono sivi, te ne maʻu ai ʻa e kalauni ʻo e moʻui, ʻa ia kuo ne [Sihova] talaʻofa kiate kinautolu ʻoku ʻofa kiate ia.” (Semisi 1:12) Ko e faʻahinga ʻoku nau maʻu ha ʻamanaki fakaemāmaní ʻoku nau maʻu ʻa e fakapapau kapau te nau kātaki loto-tōnunga, te nau maʻu ʻa e moʻui taʻengatá ʻi ha palataisi fakaemāmani. (Fakahā 21:​3-6) Pea ko e meʻa ʻoku toe mahuʻinga angé, ko ʻenau kātaki loto-tōnungá ʻoku ʻoatu ai ʻa e fakahīkihiki ki he huafa ʻo Sihová.

ʻI heʻetau muimui ʻi he topuvaʻe ʻo Sīsuú, ʻe lava ke tau hoko ai ʻo tuipau ko e kotoa ʻo e ngaahi sivi ʻoku tau fetaulaki mo ia ʻi he fokotuʻutuʻu ʻo e ngaahi meʻa ko ení ʻe lava ke fekuki lavameʻa mo ia. (1 Kolinito 10:13; 1 Pita 2:​21) Anga-fēfē? ʻAki ʻetau falala kia Sihova, ʻa ia ʻokú ne ʻomai ʻa e “makehe atu ʻo e mafai” ki he faʻahinga ʻoku nau falala kiate iá. (2 Kolinito 4:7) ʻOfa ke hoko ʻetau tuipaú ʻo hangē ko Siopé, ʻa ia neongo naʻá ne kātakiʻi ʻa e ngaahi ʻahiʻahi kakahá naʻá ne lea mālohi fakataha mo e tuipau: “Ka ʻosi ʻene sivi au, te u ʻalu atu ʻo hange ko e koula.”—Siope 23:10.

[Fakatātā ʻi he peesi 31]

Ko e mateaki ʻa Sīsū ʻi he malumalu ʻo e siví naʻe ʻoatu ai ʻa e fakahīkihiki ki he huafa ʻo Sihová. ʻE lava ke tau pehē pē mo kitautolu