Kuo Puli Kotoa ki Fē ʻa e Ngaahi Kaungāʻapí?

“ʻOku ʻikai ʻiloʻi ʻe he sōsaieti fakaeonopōní ha tuʻunga fakakaungāʻapi.”​—Benjamin Disraeli, ko e taki fakapuleʻanga Pilitānia ʻi he senituli hono 19.

KO E kau Kiupa taʻumotuʻá ʻoku ʻi ai ʻenau founga ngalikehe ʻi hono langaʻi ʻo e tuʻunga moʻui leleí: ko e ngaahi netiueka fakakaungāʻapi, pe círculos de abuelos (ngaahi kulupu ʻa e fanga kuí), ʻo hangē ko ia ʻoku nau uiʻakí. Fakatatau ki ha līpooti ʻi he 1997, ko e toko 1 nai ʻi he kau Kiupa taʻumotuʻa ʻe toko 5 ʻoku kau ki he ngaahi kulupu ko iá, ʻa ia ʻoku nau maʻu ai ʻa e feohi, poupou, mo e tokoni ʻaonga ki hono tauhi maʻu ha founga moʻui lelei. “ʻI ha taimi pē ʻoku fiemaʻu tokoni ai ʻa e kau toketā fakafāmili ʻi he feituʻu kaungāʻapí ʻi he feingangāue ki hano fai ha huhu,” ko e fakamatala ia ʻa e makasini World-Health, “ko e círculos de abuelos ʻa e feituʻu ʻoku nau maʻu ai ʻa e ngaahi tokoni loto-lelei mo lavameʻá.”

Neongo ia, ʻoku fakamamahí, ʻi he ngaahi konga lahi ʻo e māmaní, ʻoku ʻikai kei maʻu ai ʻe he ngaahi feituʻu kaungāʻapí ha kakai tokanga pehē. Ko e fakatātaá, fakakaukau angé ki he tuʻunga fakamamahi ʻo Wolfgang Dircks, ʻa ia naʻe nofo ʻi ha fale ʻapātimeni ʻi he fakahihifo ʻo ʻIulopé. ʻI he ngaahi taʻu kuo maliu atú, naʻe līpooti ai ʻi he Canberra Times ʻo pehē, neongo naʻe fakatokangaʻi ʻe he ngaahi fāmili ʻe 17 naʻa nau vahevahe ʻa e fale ʻapātimeni tatau mo Wolfgang ʻa ʻene puliá, “naʻe ʻikai fakakaukau ha taha ia ke tā ʻa e fafangu ʻi hono matapaá.” ʻI he iku ʻo ʻalu ki ai ʻa e tokotaha ʻoku ʻaʻana ʻa e falé, “naʻá ne ʻiloʻi ai ha ʻū hui ʻoku tangutu ʻi muʻa ʻi he televīsoné.” Naʻe folahi ʻi he funga ʻo e ʻū huí ha lisi ʻo ha polokalama televīsone ʻi he ʻaho 5 ʻo Tīsema, 1993. Ne mate ʻa Wolfgang ʻo feʻunga mo e taʻu ʻe nima. Ko ha fakamoʻoni fakalotomamahi moʻoni ia ki he hōloa ʻa e mahuʻingaʻiá mo e tokangá ʻi he lotolotonga ʻo e ngaahi kaungāʻapí! ʻOku ʻikai ha ofo ʻi he pehē ʻe ha tokotaha faʻu-ʻēsei ʻi he New York Times Magazine ko hono feituʻu kaungāʻapí, ʻi he hangē ko e ngaahi feituʻu lahi kehé, kuo hoko ia “ko ha feituʻu ʻo e kau solá.” ʻOku toe pehē ʻa e tuʻunga ʻi ho feituʻu kaungāʻapí?

Ko e moʻoni ʻoku kei maʻu pē ʻi he ngaahi kolo ʻuta ʻe niʻihi ha ongoʻi ʻo e tuʻunga anga-fakakaungāʻapi moʻoní pea ʻoku fāinga ʻa e ngaahi nofo fakakolo ʻe niʻihi ki ha tokanga lahi ange ki he kaungāʻapí. Ka neongo ia, ʻoku ongoʻi tuēnoa mo laveangofua ʻa e kau nofo kolo lalahi tokolahi ʻi honau feituʻu kaungāʻapí tonu. ʻOku nau nofo mavahe ʻi mui ʻi he ngaahi ʻā vahevahe ʻo e taʻeʻiloá. ʻO anga-fēfē?

 ʻI Mui ʻi ha Ngaahi ʻĀ Vahevahe ʻo e Taʻeʻiloá

Ko e moʻoni, ko e tokolahi taha ʻo kitautolú ʻoku ʻi ai hotau ngaahi kaungāʻapi ʻoku nofo ofi mai. Ko ha tateme ʻa ha maama ʻo ha televīsone, ko e ngaahi ʻata ʻoku ngaue holo ʻi he matapā sioʻatá, ko e ngaahi maama ʻa ia ʻoku fakamoʻui mo tāmateʻi, ko e ongo ʻo ha ngaahi kā ʻoku haʻu mo ʻalu, ko e ngaahi taulaka ʻi he ngaahi hala vahaʻa lokí, ko e ngaahi kī ʻoku fakaava ai mo lokaʻi ʻa e ngaahi matapaá ko e ngaahi fakaʻilonga kotoa ia ʻoku “moʻui” ʻa e kaungāʻapí. Kae kehe, ko ha ongoʻi moʻoni pē ʻo e anga-fakakaungāʻapí ʻoku mole atu ia ʻi he pulia ʻa e kakai ʻoku nofo fevāofiʻakí ʻi mui ʻi he ngaahi ʻā vahevahe ʻo e taʻeʻiloá pe ʻoku nau tauʻaki tukunoaʻi kinautolu ʻi he fakavavevave ʻo ha founga moʻui femoʻuekina. ʻE ongoʻi nai ʻe he kakaí ʻoku ʻikai fiemaʻu ke kau ʻi he meʻa ʻa e ngaahi kaungāʻapí pe moʻua kia kinautolu ʻi ha faʻahinga founga. Ko e nusipepa ʻAositelēlia ko e Herald Sun ʻoku fakahaaʻi ai: “ʻOku taʻeʻiloa lahi ange ʻa e faʻahinga tāutaha ʻi loto ʻi honau ngaahi ʻātakaí tonu, pea ʻoku siʻi ai honau fakangatangata ʻe he ngaahi haʻi ʻo e fatongia fakasōsialé. ʻOku faingofua ange he taimí ni ke tukunoaʻi, pe ʻikai fakakau ʻa e kakai ʻoku ʻikai te nau manakoa fakasōsialé.”

Ko e tuʻunga ko eni ʻoku hokó ʻoku ʻikai fakaʻohovale. ʻI ha māmani ʻa ia ko e kakaí ʻoku nau “ʻofa kiate kinautolu pe,” ʻoku utu ai he taimí ni ʻe he ngaahi kaungāʻapí ʻa e ngaahi nunuʻa ʻo e founga moʻui siokita ʻa e faʻahinga tokolahi peheé. (2 Timote 3:2) Ko e olá ko e mafolalahia ʻa e taʻelatá mo e fakamavahevahé. ʻOku fanauʻi ʻe he fakamavahevahé ʻa e taʻefalala, tautefito ʻi hono maʻunimā ʻe he fakamālohí mo e faihiá ʻa e feituʻu kaungāʻapí. ʻOku iku ai ʻo toʻo vave ʻe he taʻefalalá ʻa e manavaʻofa fakaetangatá.

Ko e hā pē nai ʻa e tuʻunga ʻi ho kaungāʻapí, ʻoku ʻikai ha veiveiua te ke loto-tatau ko e ngaahi kaungāʻapi leleí ko e ngaahi koloa ʻaonga ia ki ha feituʻu. ʻOku lavaʻi ʻa e meʻa lahi ʻi he ngāue ʻa e kakaí ki ha taumuʻa ʻiloá. Ko e ngaahi kaungāʻapi leleí ʻe lava ke toe hoko ia ko ha tāpuaki. ʻE fakahaaʻi ʻi he kupu hoko maí ʻa hono ʻuhingá.