Fakatupulekina ʻa e Talangofuá ʻi he Fakaofi Mai ʻa e Ngataʻangá

“Pea ʻe fai [kia Sailo] ʻe he ngaahi kakai ʻenau talangofuá.”—SENESI 49:10, NW.

1. (a) ʻI he kuohilí, ko e hā kuo faʻa kau ʻi he talangofua kia Sihová? (e) Ko e hā ʻa e kikite fekauʻaki mo e talangofuá naʻe fai ʻe Sēkopé?

 KO E talangofua kia Sihová kuo faʻa kau ai ʻa e talangofua ki hono kau fakafofongá. Kuo kau heni ʻa e kau ʻāngelo, kau pēteliake, kau fakamaau, kau taulaʻeiki, kau palōfita, mo e ngaahi tuʻi. Ko e taloni ʻo e ngaahi tuʻi ʻo ʻIsilelí naʻe aʻu ʻo ui ia ko e taloni ʻo Sihová. (1 Kalonikali 29:23) Ka, ko e meʻa fakamamahí, ko e tokolahi ʻo e kau pule ʻo ʻIsilelí naʻa nau talangataʻa ki he ʻOtuá, ʻo ʻomi ai ʻa e mala kia kinautolu tonu mo e kakai naʻa nau puleʻí. Ka naʻe ʻikai tuku ʻe Sihova ʻene kau mateakí ʻo taʻeʻiai ha ʻamanaki; naʻá ne fakafiemālieʻi kinautolu ʻaki ha talaʻofa ke fokotuʻu ha Tuʻi taʻefaʻaʻauha, ʻa ia ʻe fiefia ʻa e kau māʻoniʻoní ke talangofua ki ai. (Aisea 9:​6, 7 [5, 6, PM]) Ko e pēteliake naʻe fakaʻaʻau ke pekia ko Sēkopé naʻá ne kikite fekauʻaki mo e tokotaha-pule ko ʻeni ki he kahaʻú, ʻi heʻene pehē: “Ko e sēpitá ʻe ʻikai mavahe ia meia Siuta, pea pehē ki he vaʻakau fakaepulé ʻe ʻikai mavahe ia mei he vahaʻa ʻo hono vaʻé, kaeʻoua ke haʻu ʻa Sailo, pea ʻe fai kiate ia ʻe he ngaahi kakai ʻenau talangofuá.”—Senesi 49:10, NW.

2. Ko e hā ʻa e ʻuhinga ʻo e “Sailo,” pea ko e hā ʻe kau ʻi heʻene pule fakatuʻí?

² Ko e “Sailo” ko e foʻi lea faka-Hepelū ia ʻoku ʻuhingá “Ko Ia ʻOku ʻAʻaná,” pe “Ko Ia ʻOku ʻOʻoná.” ʻIo, ʻe maʻu ʻe Sailo ʻa e totonu kakato ʻo e tuʻunga-pulé, ʻo hangē ko ia ʻoku fakatātaaʻi ʻe he sēpitá, pea mo e mafai ke pulé, hangē ko ia ʻoku fakafofongaʻi ʻe he tokotoko ʻo e pulé. ʻIkai ko ia pē, ko ʻene pule fakatuʻí ʻe kau ai, ʻo ʻikai ngata pē ʻi he hako ʻo Sēkopé, kae pehē ki he “kakai” kotoa pē. ʻOku fehoanaki eni mo e talaʻofa ʻa Sihova kia  ʻĒpalahamé: “ʻE maʻu ʻe ho hako ʻa e ngaahi matanikolo ʻo honau ngaahi fili; pea ko ho hako ʻe monuʻia ai ʻa e ngaahi puleʻanga ʻo mamani.” (Senesi 22:​17, 18) Naʻe fakapapauʻi mai ʻe Sihova ʻa e ʻiloʻanga ʻo e “hako” ko ení ʻi he 29 T.S. ʻi he taimi naʻá ne pani ai ʻa Sīsū ʻo Nasaletí ʻaki ʻa e laumālie māʻoniʻoní.​—Luke 3:​21-23, 34; Kaletia 3:16.

ʻUluaki Puleʻanga ʻo Sīsuú

3. Ko e hā ʻa e tuʻunga-pule naʻe maʻu ʻe Sīsū ʻi he taimi naʻá ne hāʻele hake ai ki hēvaní?

³ ʻI he taimi naʻe hāʻele hake ai ʻa Sīsū ki hēvaní, naʻe ʻikai ke ne maʻu leva ʻa e sēpita ʻo e tuʻunga-pule ki he ngaahi kakai ʻo e māmaní. (Sāme 110:1) Kae kehe, naʻá ne maʻu ha “puleʻanga” mo e kakai naʻe talangofua kiate ia. Naʻe fakamahino pau ʻe he ʻapositolo ko Paulá ʻa e puleʻanga ko iá ʻi heʻene tohi: “[ʻA e ʻOtuá] naʻa ne hamusi [“fakahaofi,” NW] kitautolu [kau Kalisitiane pani ʻe he laumālié] mei he pule ʻa Poʻuli, mo ne hiki kitautolu ki he puleʻanga ʻo hono ʻAlo ʻOfaʻanga.” (Kolose 1:​13, fakaʻītali ʻamautolu.) Ko e fakahaofi ko ení naʻe kamata ia ʻi he Penitekosi 33 T.S. ʻi he taimi naʻe huaʻi hifo ai ʻa e laumālie māʻoniʻoní ki he kau muimui faitōnunga ʻa Sīsuú.​—Ngāue 2:​1-4; 1 Pita 2:9.

4. ʻI he ngaahi founga fē naʻe fakahāhā ai ʻe he muʻaki kau ākonga ʻa Sīsuú ʻenau talangofuá, pea naʻe anga-fēfē hono fakahaaʻi mahino kinautolu ʻe Sīsū ʻi he tuʻunga ko ha kulupú?

⁴ ʻI he tuʻunga ko e “kau fakafofonga ʻo Kalaisi,” ko e kau ākonga pani ʻe he laumālié naʻa nau kamata ʻi he talangofua ke fakatahatahaʻi mai ʻa e niʻihi kehe ko ia te nau hoko ko e kaungā “kolo taha” ʻi he puleʻanga fakalaumālie ko iá. (2 Kolinito 5:20; Efeso 2:19; Ngāue 1:8) Tānaki atu ki aí, ko e faʻahingá ni naʻe pau ke nau nofo maʻu ʻo “maʻopoʻopo, ʻo loto taha mo fakakaukau taha” koeʻuhi ke maʻu ʻa e hōifua ʻa honau Tuʻí ʻa Sīsū Kalaisi. (1 Kolinito 1:10) ʻI he tuʻunga ko ha foʻi kulupu, ʻoku faʻuʻaki kinautolu ha “tamaioeiki agatonu mo boto” pe ko ha kalasi setuata anga-tonu.​—Mātiu 24:​45, PM; Luke 12:​42, NW.

Tāpuekina ʻi he Talangofua ki he “Setuata” ʻa e ʻOtuá

5. Mei he ngaahi taimi muʻá, kuo anga-fēfē hono akoʻi ʻe Sihova ʻene kakaí?

⁵ Kuo tokonaki maʻu pē ʻe Sihova ʻa e kau faiako ki heʻene kakaí. Ko e fakatātaá, hili ʻa e foki ʻa e kau Siú mei Pāpiloné, ko ʻĒsela mo e niʻihi ʻo e kau tangata taau kehé naʻe ʻikai ke nau lau ʻataʻatā pē ʻa e Lao ʻa e ʻOtuá ki he kakaí, naʻa nau “fakamatala” ʻa e lao ko iá, ‘bea akonakiʻi ke ilo hono uhiga’ ʻo e Folofola ʻa e ʻOtuá.​—Nehemaia 8:​8, PM.

6, 7. Kuo anga-fēfē hono tokonaki ʻe he kalasi tamaioʻeikí ha meʻakai fakalaumālie taimi totonu fakafou ʻi hono Kulupu Pulé, pea ko e hā ʻoku feʻungamālie ai ʻa e anganofo ki he kalasi tamaioʻeikí?

⁶ ʻI he ʻuluaki senitulí, ʻi he taimi naʻe malanga hake ai ʻa e ʻīsiu fekauʻaki mo e kamú ʻi he 49 T.S., ko e kulupu pule ʻo e muʻaki kalasi tamaioʻeiki ko iá naʻa nau lāulea fakafou he lotu fekauʻaki mo e meʻa ko iá pea nau aʻusia ai ha fakamulituku Fakatohitapu. ʻI he taimi naʻa nau fanongonongo ai ʻenau filí fakafou he  faitohi, naʻe talangofua ʻa e ngaahi fakatahaʻangá ki he tataki kuo faí pea nau maʻu ai ʻa e tāpuaki lahi ʻa e ʻOtuá. (Ngāue 15:​6-15, 22-29; 16:​4, 5) ʻOku pehē pē ʻi he ngaahi taimi ʻi onopōní, kuo fakamahinoʻi ʻe he tamaioʻeiki anga-tonú fakafou ʻi hono Kulupu Pulé ʻa e ngaahi ʻīsiu mahuʻinga pehē hangē ko e tuʻu-ʻatā faka-Kalisitiané, ko e tuʻunga toputapu ʻo e totó, pea mo hono ngāueʻaki ʻo e faitoʻo kona tapú mo e tapaká. (Aisea 2:4; Ngāue 21:25; 2 Kolinito 6:19 [2Ko 7:​1, PM]) Naʻe tāpuekina ʻe Sihova hono kakaí ko ʻenau talangofua ki heʻene Folofolá mo e tamaioʻeiki anga-tonú.

⁷ ʻI he anganofo ki he kalasi tamaioʻeikí, ʻoku toe fakahā ai ʻe he kakai ʻa e ʻOtuá ʻenau moʻulaloa ki honau Pulé, ʻa Sīsū Kalaisi. Ko e moʻulaloa peheé kuo toe ʻi ai hono mahuʻinga lahi ange ʻi he ngaahi taimi ʻi onopōní koeʻuhi ko e mafai kuo fakalahi ʻo Sīsuú, ʻo hangē ko ia naʻe tomuʻa tala ʻi he kikite lea tuku ʻa Sēkopé.

Hoko ʻa Sailo ko e Pule Totonu ʻo e Māmaní

8. Naʻe anga-fēfē pea ʻanefē naʻe fakalahi ai ʻa e mafai ʻo Kalaisí?

⁸ Naʻe tomuʻa tala ʻe he kikite ʻa Sēkopé ʻe hanga ʻe Sailo ʻo kounaʻi ʻa e ‘talangofua ʻa e kakaí.’ ʻOku hā mahino, ko e tuʻunga-pule ʻa Kalaisí ʻe fakalahi ia ʻo fakalaka atu ʻi he ʻIsileli fakalaumālié. Ko e hā ʻe kau ki aí? ʻOku tali mai ʻe he Fakahā 11:15: “Ko e puleʻanga ʻo mamani kuo hoko ko e puleʻanga ʻo hotau ʻEiki, mo ʻEne Kalaisi: pea te ne pule ʻo lauikuonga ʻo taʻengata.” (Fakaʻītali ʻamautolu.) ʻOku fakaeʻa ʻe he Tohitapú ʻe maʻu ʻe Sīsū ʻa e mafai ko iá ʻi he ngataʻanga ʻo e “fituʻi kuonga” fakaekikité​—“ʻa e ngaahi kuonga ʻo e Senitaile”​—ʻi he 1914. a (Taniela 4:​16, 17; Luke 21:24) ʻI he taʻu ko iá, naʻe kamata ai ʻa e “ʻi ai” taʻehāmai ʻa Kalaisi ko e Tuʻi Faka-Mīsaiá, pea pehē ki hono taimi ke “bule i he lotolotoga o [hono] gaahi fili.”​—Mātiu 24:​3, NW; Sāme 110:​2, PM.

9. Ko e hā naʻe fai ʻe Sīsū ʻi he taimi naʻá ne maʻu ai hono Puleʻangá, pea ko e hā ʻa e ola taʻefakahangatonu naʻe fai ʻe he meʻá ni ki he faʻahinga ʻo e tangatá, tautefito ki heʻene kau ākongá?

⁹ Ko e fuofua ngāue ʻa Sīsū hili ʻene maʻu ʻa e mafai fakatuʻí ko hono lī hifo ʻa e fakasino tonu ʻo e talangataʻá​—ʻa Sētane​—fakataha mo ʻene kau tēmenioó “ki mamani.” Talu mei ai, ko e ngaahi laumālie fulikivanu ko ení kuo nau fakatupunga ʻa e ngaahi faingataʻa taʻehanotatau ki he faʻahinga ʻo e tangatá, tuku kehe hono pouaki ʻo ha ʻātakai ʻokú ne ʻai ke mātuʻaki faingataʻa ai ʻa e talangofua kia Sihová. (Fakahā 12:​7-​12; 2 Timote 3:​1-5) Ko hono moʻoní, ko e tāketi tefito ʻo e faitau fakalaumālie ʻa Sētané ʻoku kau ai ʻa kinautolu ʻa e kau pani ʻa Sihová, “ʻa kinautolu ʻoku tauhi ʻa e ngaahi tuʻutuʻuni ʻa e ʻOtua, mo nau puke maʻu ʻenau fakamoʻoni kia Sisu,” mo honau kaungāmeʻa ko e ‘fanga sipi kehé.’​—Fakahā 12:17; Sione 10:16.

10. Ko hono fakahoko ʻo e ngaahi kikite fē ʻi he Tohitapú ʻokú ne fakapapauʻi ʻa e taʻelavameʻa ʻa e faitau ʻa Sētane ki he kau Kalisitiane moʻoní?

¹⁰ Kae kehe, kuo pau ke taʻelavameʻa ʻa Sētane, koeʻuhi ko e ‘ʻaho ʻo e ʻEikí’ eni, pea ʻe ʻikai ha meʻa ʻe lava ke ne taʻofi ʻa Sīsū mei heʻene ‘fakakakato ʻene ikuná.’ (Fakahā 1:10; 6:​2, NW) Ko e fakatātaá, te ne hanga ʻo fakapapauʻi hono silaʻi fakaʻosi ʻo e kau ʻIsileli fakalaumālie ko ia ʻe toko 144,000. Te ne toe maluʻi foki mo ha “fuʻu kakai lahi, ʻa ia ʻe ʻikai lava ʻe ha taha hono lau, ko ha kakai mei he puleʻanga kotoa pē, mo e ngaahi  matakali, mo e ngaahi faʻahinga, mo e ngaahi lea.” (Fakahā 7:​1-4, 9, 14-16) Kae kehe, ʻi he ʻikai hangē ko honau kaungāmeʻa paní, ko e faʻahinga ko ení te nau hoko ko e kakai talangofua fakaemāmani ʻa Sīsū. (Taniela 7:​13, 14) Ko ʻenau hā tonu ko ia ʻi he māmaní kuó ne ʻosi tokonaki ʻe ia ʻa e fakamoʻoni hā mahino ko Sailó ko e Pule moʻoni ia ki he ‘puleʻanga ʻo mamaní.’​—Fakahā 11:15.

Ko e Taimi Eni ke ‘Talagofua ki he Ogoogoleleí’

11, 12. (a) Ko hai pē ʻe hao ʻi he ngataʻanga ʻo e fokotuʻutuʻu ʻo e ngaahi meʻa lolotongá? (e) Ko e hā ʻa e tōʻonga angaʻitangata ʻoku tupulaki ʻi he faʻahinga ko ia ʻoku nau maʻu ʻa e ‘laumalie ʻo mamaní’?

¹¹ Ko kinautolu kotoa ʻoku nau fiemaʻu ʻa e moʻui taʻengatá kuo pau ke nau ako ʻa e talangofuá, he ʻoku fakahā māʻalaʻala ʻe he Tohitapú ko “kinautolu oku ikai te nau ilo ae Otua, bea oku ikai talagofua ki he ogoogolelei o ho tau Eiki ko Jisu Kalaisi” ʻe ʻikai te nau hao ʻi he ʻaho faisāuni ʻa e ʻOtuá. (2 Tesalonaika 1:​8, PM) Kae kehe, ko e ʻātakai fulikivanu lolotongá mo hono laumālie angatuʻu ki he ngaahi lao mo e tefitoʻi moʻoni ʻa e Tohitapú ʻoku ne ʻai ʻa e talangofua ki he ongoongo leleí ke faingataʻa.

¹² ʻOku fakamatalaʻi ʻe he Tohitapú ʻa e laumālie angatuʻu ko eni ki he ʻOtuá ko e “laumalie ʻo mamani.” (1 Kolinito 2:12) ʻI hono fakamatalaʻi hono ola ki he kakaí, naʻe tohi ʻa e ʻapositolo ko Paulá ki he kau Kalisitiane ʻo e ʻuluaki senitulí ʻi ʻEfesoó, ʻo pehē: “Naʻa mou fou ai ʻi muʻa ʻi he ʻalunga ʻo e nofo fakaemaama-ko eni, ʻi he ʻalunga ʻo e ʻeiki ʻo e puleʻanga ʻo e ʻatā, ko e ʻeiki ʻo e faʻahinga laumalie ʻoku lolotonga ngaue ni ʻi he hako ʻo talangataʻa: ʻa ia naʻa ta kau ai ʻa kitaua foki ʻi muʻa, pea naʻa ta moʻui ʻaki kotoa pe ʻa e fai ki he ngaahi holi ʻo hotau kakano, heʻeta feia ʻa e ngaahi tuʻutuʻuni ʻa hota kakano mo ʻeta ngaahi fakakaukau, pea naʻa ta nofo ai pe ko e fanau ʻo e houhau ʻi he ʻulungaanga, ʻo hange foki ko e kakai kotoa pe.”—Efeso 2:​2, 3.

13. ʻE lava fēfē ʻe he kau Kalisitiané ke talitekeʻi ola lelei ʻa e laumālie ʻo e māmaní, pea ko e hā hono ngaahi ola ʻaongá?

¹³ Ko e meʻa fakafiefiá, ko e kau Kalisitiane ʻEfesoó naʻe ʻikai ke nau nofo pōpula maʻu ai pē ki he laumālie ko ia ʻo e talangataʻá. Ka, naʻa nau hoko ko e fānau talangofua ʻa e ʻOtuá ʻo moʻulaloa ki hono laumālié mo utu hono fua lahi mo leleí. (Kaletia 5:​22, 23) ʻOku pehē pē ʻi he ʻahó ni, ko e laumālie ʻo e ʻOtuá​—ʻa e ivi mālohi taha ʻi he ʻunivēsí​—ʻokú ne tokoniʻi ʻa e laui miliona ke nau hoko ʻo talangofua kia Sihova, fakataha mo ha ola ko e lava ke nau maʻu ʻa e “ilo bau oe amanaki lelei o aʻu ki he gataaga.”​—Hepelu 6:​11, PM; Sakalaia 4:6.

14. Naʻe anga-fēfē ʻa e fakatokanga ʻa Sīsū ki he kau Kalisitiane kotoa pē ʻoku moʻui ʻi he ngaahi ʻaho fakaʻosí fekauʻaki mo e ngaahi meʻa pau te ne ʻahiʻahiʻi ʻenau talangofuá?

¹⁴ Manatuʻi foki, ʻoku tau maʻu ʻa e poupou mālohi ʻa Sailó, ʻa ia fakataha mo ʻene Tamaí ʻe ʻikai te na fakaʻatā ha fili​—fakatēmeniō pe fakaetangata—ke ne ʻahiʻahiʻi ʻetau talangofuá ʻo mahulu hake ʻi he meʻa te tau malava ke makātakiʻí. (1 Kolinito 10:13) Ko hono moʻoní, ke tokoniʻi kitautolu ʻi heʻetau faitau fakalaumālié, naʻe fakamatalaʻi ʻe Sīsū ha ngaahi ʻotu palopalema tefito te tau ngali fehangahangai mo ia lolotonga ʻa e ngaahi ʻaho fakaʻosi ko ení. Naʻá ne fai eni fakafou ʻi he ngaahi tohi ʻe fitu, ʻa ia naʻá ne ʻoange ʻi ha vīsone ki he ʻapositolo ko Sioné. (Fakahā 1:​10, 11) Ke fakapapauʻi, naʻe ʻi ai ʻa e akonaki mātuʻaki mahuʻinga ki he kau Kalisitiane ʻi he taimi ko iá, ka ko hono ngāueʻaki tefitó ke ʻi he ‘ʻaho ʻo e ʻEiki,” talu mei he 1914. Ko ia ai, he meʻa feʻungamālie moʻoni ke tau tokanga ki he ngaahi pōpoaki ko ení! b

Fakaʻehiʻehi mei he Loto-Noá, ʻUlungaanga Taʻetāú, ʻOfa ki he Meʻa Fakamatelié

15. Ko e hā kuo pau ai ke tau tokanga fekauʻaki mo e palopalema naʻá ne uesia ʻa e fakatahaʻanga ʻi ʻEfesoó, pea ʻe lava fēfē ke tau fai pehē? (2 Pita 1:​5-8)

¹⁵ Ko e ʻuluaki tohi ʻa Sīsuú naʻe fai ia ki he fakatahaʻanga ʻi ʻEfesoó. Hili hono fakaongoongoleleiʻi ʻa e fakatahaʻangá ki heʻene kātakí, naʻe pehē ʻe Sīsū: “Ka neongo ia, ka ʻoku ai ha meʻa ʻoku ou koviʻia ai kiate koe; ko hoʻo hiki mei hoʻo ʻuluaki ʻofa.” (Fakahā 2:​1-4) ʻI he ʻahó ni, ko e kau Kalisitiane ʻe niʻihi naʻa nau faivelenga ki muʻá kuo pehē ʻa e mole ʻa e ʻofa māfana naʻa nau maʻu ki muʻa ki he ʻOtuá. Ko e mole peheé ʻe lava ke ne fakavaivaiʻi ha vahaʻangatae ʻo ha taha mo e ʻOtuá  pea kuo pau ke fakahaaʻi fakavavevave ia. ʻE lava fēfē ke toe fakaake ha ʻofa pehē? ʻAki ʻa e tuʻumaʻu ʻi he ako Tohitapu, maʻu fakataha, lotu, mo e fakalaulauloto. (1 Sione 5:3) Ko e moʻoni, ʻoku fiemaʻu heni ʻa e “tukuingata,” ka ʻe pau ʻaupito hono ʻaongá. (2 Pita 1:​5-8) Kapau ʻoku fakaeʻa ʻe hano sivisiviʻi-kita totonu kuo momoko hoʻo ʻofá, fakatonutonu vave leva ʻa e tuʻunga ko iá, ʻi he talangofua ki he ekinaki ʻa Sīsū: “Ke ke fakamanatu ki he meʻa kuo ke hinga mei ai, pea fakatomala leva, ʻo fai ʻa e ngaahi ʻuluaki ngaue.”​—Fakahā 2:5.

16. Ko e hā ʻa e ngaahi tākiekina fakatuʻutāmaki naʻe ʻi he ngaahi fakatahaʻanga ʻi Peakamosi mo Taiatailá, pea ko e hā ʻoku feʻungamālie ai ʻa e ngaahi lea ʻa Sīsū kia kinautolú ʻi he ʻaho ní?

¹⁶ Ko e kau Kalisitiane ʻi Peakamosi mo Taiatailá naʻe fakaongoongoleleiʻi ki heʻenau anga-tonú, kātakí, mo ʻenau faivelengá. (Fakahā 2:​12, 13, 18, 19) Neongo ia, naʻe tākiekina kinautolu ʻe he faʻahinga ʻe niʻihi naʻa nau fakahāhā ʻa e laumālie fulikivanu ʻo Pēlami mo Sisipelí, ʻa ia ʻi he fakafou he fehokotaki fakasino taʻetāú mo e lotu Pēalí naʻá na ngāue ko e tākiekina fakatupu mele ʻi ʻIsileli ʻo e kuonga muʻá. (Nomipa 31:16; 1 Tuʻi 16:​30, 31; Fakahā 2:​14, 16, 20-​23) Kae fēfē hotau taimí​—‘ʻa e ʻaho ʻo e ʻEikí’? ʻOku kei hā mahino ʻa e ngaahi tākiekina kovi tatau? ʻIo, he ko e ʻulungaanga taʻetāú ko e tupuʻanga lahi taha moʻoni ia ki he tuʻusi mei he haʻohaʻonga ʻo e kakai ʻa e ʻOtuá. Ko ia ai, he meʻa mahuʻinga moʻoni ke tau fakaʻehiʻehi mei he feohi mo e faʻahinga tāutaha kotoa pē​—ʻi loto pe ʻi tuʻa ʻi he fakatahaʻangá​—ʻa ia ko ha tākiekina fakatupu mele fakaeʻulungaanga! (1 Kolinito 5:​9-11; 15:33) Ko e faʻahinga ko ia ʻoku nau loto ke hoko ko e kakai talangofua ke pule mai ki ai ʻa Sailó te nau toe fakaʻehiʻehi mei he ngaahi fakafiefia ʻoku fehuʻiá pea pehē ki he ngaahi meʻa fakalielia ʻi he ngaahi pepá mo e ʻInitanetí.​—Emosi 5:15; Mātiu 5:​28, 29.

17. Naʻe anga-fēfē hono fakahoa ʻa e vakai mo e fakakaukau ʻa kinautolu ko ia ʻi Sātisi mo Leotisiá mo e vakai ʻa Sīsū ki honau tuʻunga fakalaumālié?

¹⁷ Tuku kehe ha niʻihi tāutaha tokosiʻi, ko e fakatahaʻanga ʻi Sātisí naʻe ʻikai ke nau maʻu ha fakaongoongolelei ʻe taha. Naʻá ne maʻu ʻa e “hingoa,” pe fōtunga, ʻokú ne moʻui, ka koeʻuhi ne pukenimā ia ʻe he taʻemahuʻingaʻia fakalaumālié naʻe lau ai ʻe Sīsū naʻá ne “mate.” Ko e talangofua ki he ongoongo leleí naʻe fai fakafatongia pē. He fuʻu tukuakiʻi ē kuo faí! (Fakahā 3:​1-3) Ko e fakatahaʻanga ʻi Leotisiá naʻe ʻi ha tuʻunga meimei tatau. Naʻá ne pōlepole ʻi heʻene koloa fakamatelié, ʻo ne pehē, “Ko e koloaʻia au,” ka kia Kalaisi naʻá ne “malaʻia taha, mo e tuʻutamaki taha, pea masiva mo kui mo telefua.”​—Fakahā 3:​14-17.

18. ʻE malava fēfē ha taha ke fakaʻehiʻehi mei he hoko ʻo māmāfana fakalaumālie ʻi he ʻao ʻo e ʻOtuá?

¹⁸ ʻI he ʻahó ni, ko e niʻihi ko e kau Kalisitiane faitōnunga ki muʻa kuo nau toe tō ki he sīpinga  tatau ʻo talangataʻa. Mahalo kuo nau fakaʻatā ʻa e laumālie ʻo e māmaní ke ne fakavaivaiʻi ʻa e ongoʻi fakavavevavé mei heʻenau moʻuí, ʻo fakatupulekina ai ha fakakaukau māmāfana fakalaumālie fekauʻaki mo e ako Tohitapú, lotú, ngaahi fakataha faka-Kalisitiané, pea mo e ngāue fakafaifekaú. (2 Pita 3:​3, 4, 11, 12) He mahuʻinga ē ke talangofua ʻa e faʻahinga peheé kia Kalaisi ʻaki hono tuku tauhi ha ngaahi koloa fakalaumālie​—ʻio, “fakatau [meia Kalaisi] ha koula kuo toki haka ʻi he afi”! (Fakahā 3:18) Ko e tuʻumālie peheé ʻoku kau ki ai ʻa e hoko ʻo ‘koloaʻia ʻi he ngāue lelei, nimahomo ʻo ʻangafietokoni.’ ʻI hono tuku tauhi ʻa e ngaahi koloa mahuʻinga moʻoni ko ení, te tau ‘faʻoaki ai maʻa kitautolu ha tuʻunga lelei ki he ʻamuí, koeʻuhi ke tau puke ki he moʻui moʻoní.’​—1 Timote 6:​17-19.

Fakaongoongoleleiʻi ki Heʻenau Talangofuá

19. Ko e hā ʻa e ngaahi fakaongoongolelei mo e ngaahi ekinaki naʻe ʻoange ʻe Sīsū ki he kau Kalisitiane ʻi Sīmana mo Filatelifiá?

¹⁹ Ko e fakatahaʻanga ʻi Sīmana mo Filatelifiá ʻokú na tuʻu-ki-muʻa ʻi he faʻifaʻitakiʻanga ʻo e talangofuá, he ko e ongo tohi ʻa Sīsū kia kinauá naʻe ʻikai ha valoki ia ai. Ki he faʻahinga ʻi Sīmaná, naʻá ne pehē: “ʻOku ou ʻilo pe hoʻo mamahiʻia, mo hoʻo masiva, (ka ʻoku ke koloaʻia pe).” (Fakahā 2:9) He faikehekehe moʻoni ē mo e faʻahinga ʻi Leotisiá, ʻa ia naʻa nau pōlepole ʻi he tuʻumālie fakamāmaní ka naʻa nau masiva moʻoni! Ko e moʻoni, naʻe ʻikai fiefia ʻa e Tēvoló ke sio ki ha taha ʻokú ne fakahāhā ʻa e faitōnunga mo e talangofua kia Kalaisí. Ko ia ai, naʻe fakatokanga ʻa Sīsū: “ʻOua te ke manavahē ki he ngaahi mamahi ʻoku ene ke hoko kiate ko e: ko eni ʻoku teu li homou niʻihi ʻe he Tevolo ki he pilisone, ko homou ʻahiʻahiʻi; pea te mou moʻua ʻi he mamahi ʻo ʻaho hongofulu: ka ke pikitai kiate au, ʻo aʻu ki he mate, pea te u ʻatu kiate koe ʻa e kalauni ʻo e moʻui.” (Fakahā 2:10) ʻI he tuʻunga meimei tatau, naʻe fakaongoongoleleiʻi ʻe Sīsū ʻa e faʻahinga ʻi Filatelifiá ʻo pehē: “Kuo ke tauhi ʻeku lea [pe, talangofua kiate au], pea naʻe ʻikai te ke fakafisinga ʻi hoku hingoa. ʻOku vave ʻeku ʻalu atu: kuku ke maʻu ʻa e meʻa ʻoku ke maʻu, ke ʻoua naʻa toʻo ho kalauni ʻe ha taha kehe.”​—Fakahā 3:​8, 11.

20. Kuo anga-fēfē hono tauhi ʻe he laui miliona he ʻahó ni ʻa e lea ʻa Sīsuú, pea neongo ʻa e ngaahi tuʻunga fē?

²⁰ ʻI he ‘ʻaho ʻo e ʻEikí,’ ʻo kamata mei he 1914, ko ha toenga ʻo e kau anga-tonú mo honau kaungāmeʻa ko e fanga sipi kehé, ʻa ia ʻoku nau toko laui miliona he taimí ni, kuo nau toe tauhi mo e lea ʻa Sīsuú ʻi heʻenau kau faivelenga ʻi he ngāue fakafaifekaú mo ʻenau piki maʻu ki heʻenau anga-tonú. Hangē pē ko honau fanga tokoua ʻi he ʻuluaki senitulí, kuo faingataʻaʻia ʻa e niʻihi ko ʻenau talangofua kia Kalaisí, ʻo aʻu ki hono lī ki pilīsone mo e ngaahi kemi fakamamahí. Ko e niʻihi kuo nau tauhi ʻa e lea ʻa Sīsuú ʻaki hono tauhi maʻu ha ‘mata huʻufataha,’ neongo hono ʻātakaiʻi ʻe he tuʻumālié mo e mānumanú. (Mātiu 6:​22, 23) ʻIo, ʻi he ʻātakai pea mo e tuʻunga kotoa pē, ko e kau Kalisitiane moʻoní, fakafou ʻi heʻenau talangofuá, ʻoku nau hokohoko atu ke ʻai ʻa e loto ʻo Sihová ke fiefia.​—Palovepi 27:11.

21. (a) Ko e hā ʻa e fatongia fakalaumālie ʻe hokohoko atu ʻa e kalasi tamaioʻeikí ke fakahokó? (e) ʻE lava fēfē ke tau fakahāhā ʻoku tau fie talangofua moʻoni kia Sailo?

²¹ ʻI heʻetau fakaofi atu ki he mamahi lahí, ko e “tamaioeiki agatonu mo boto” ʻokú ne fakapapau ai pē ke ʻoua ʻe fakangaloku ʻene talangofua ki he Pulé, ʻa Kalaisi. ʻOku kau heni hono teuteu ʻa e meʻakai fakalaumālie taimi totonu ki he kau nofo ʻi he fale ʻo e ʻOtuá. Ko ia tau hokohoko atu ke fakahoungaʻi ʻa e kautaha fakateokalati fakaofo ʻa Sihová mo e meʻa ʻokú ne tokonakí. ʻI he founga ko ení, ʻoku tau fakahāhā ai ʻetau moʻulaloa kia Sailó, ʻa ia te ne fakapaleʻi ʻa ʻene kakai talangofua kotoa pē ʻaki ʻa e moʻui taʻengatá.​—Mātiu 24:​45-47, PM; Mātiu 25:40; Sione 5:​22-24.

[Fakamatala ʻi lalo]

ʻOkú Ke Manatuʻi?

• Ko e hā ʻa e ngafa ʻe fakahoko ʻe Sīsū ʻo hangē ko ia naʻe tomuʻa tala ʻe he kikite lea tuku ʻa Sēkopé?

• ʻOku anga-fēfē ʻetau ʻiloʻi ʻa Sīsū ko Sailó, pea ko e hā ʻa e laumālie kuo pau ke tau fakaʻehiʻehi mei aí?

• Ko e hā ʻa e akonaki ʻaonga ki hotau ʻahó ni ʻoku ʻi he ngaahi tohi ki he ngaahi fakatahaʻanga ʻe fitu ʻo e Fakahaá?

• ʻI he ngaahi founga fē ʻe lava ke tau faʻifaʻitaki ai ki he faʻahinga ʻi he fakatahaʻanga ʻi Sīmana mo Filatelifiá?

[Fehuʻi ki he Ako]

[Fakatātā ʻi he peesi 18]

ʻOku tāpuekina ʻe Sihova ʻene kakaí ko ʻenau talangofua ki he “setuata” anga-tonú

[Fakatātā ʻi he peesi 19]

Ko e tākiekina ʻa Sētané ʻokú ne ʻai ke faingataʻa ʻa e talangofua ki he ʻOtuá

[Fakatātā ʻi he peesi 21]

ʻOku tokoniʻi kitautolu ʻe ha vahaʻangatae mālohi mo Sihova ke tau talangofua kiate ia