Fiemālie ʻi he Ngaahi Taimi Faingataʻá

KO E ongoongó ʻi he ngaahi ʻahó ni ʻoku ʻikai ʻaupito fakafiemālie. Naʻe tohi ʻe he tokotaha ʻe taha: “Ko e ngaahi meʻa ʻoku lolotonga hokó ʻoku fuʻu fakamamahi ʻaupito ʻo ʻikai ai te tau faʻa fakapapauʻi pe ʻe lava pe ʻikai ke tau fakatoʻotoʻa ke sio ʻi he ongoongó ʻi he hoko ʻa e onó.” ʻOku kāpui ʻa e māmaní ʻe he taú, ngaahi ngāue fakalilifú, faingataʻá, faihiá, mo e mahakí—ʻa ia ko e ngaahi kovi ʻe vavé ni ke ne uesia fakahangatonu kitautolu ʻo kapau kuo teʻeki te nau fakahoko ia.

Naʻe tomuʻa tala totonu ʻe he Tohitapú ʻa e tuʻunga ko eni ʻo e ngaahi meʻá. ʻI hono fakamatalaʻi hotau taimí, naʻe pehē ʻe Sīsū ʻe ʻi ai ʻa e ngaahi tau lahi, ngaahi mahaki fakaʻauha, ngaahi nounou fakameʻatokoni pea mo e ngaahi mofuike. (Luke 21:​10, 11) ʻI he tuʻunga meimei tatau, naʻe tohi ʻa e ʻapositolo ko Paulá ʻo fekauʻaki mo e “ngaahi taimi faingataʻa” ʻa ia ʻe hoko ai ʻa e kakaí ʻo anga-fakamanu, ʻofa ki he paʻangá, ʻo ʻikai ʻofa ki he leleí. Naʻá ne ui ʻa e vahaʻa taimi ko iá ko e “kuonga fakamui.”—2 Timote 3:​1-5.

Ko ia ai, ʻi hono fakamatalaʻi ʻa e ngaahi tuʻunga ʻo e māmaní, ʻoku ʻomai ʻe he ongoongó ʻa e ngaahi tuʻunga meimei tatau mo ia naʻe tomuʻa tala ʻe he Tohitapú. Ka ʻoku ngata pē ia ʻi hono ʻomai ʻa e tuʻunga meimei tataú. ʻOku ʻomai ʻe he Tohitapú ia ʻa e fakakaukau ʻoku ʻikai ke ʻomai ʻe he ongoongó. Fakafou ʻi he Folofola fakamānavaʻi ʻa e ʻOtuá, ʻe lava ke tau hoko ai ʻo mahinoʻi ʻo ʻikai ngata pē ʻi he ʻuhinga ʻoku lahi fau ai ʻa e koví kae toe pehē foki ki he meʻa ʻe hoko ʻi he kahaʻú.

 Founga ʻo e Vakai ʻa e ʻOtuá ki he Fulikivanú

ʻOku fakamatala ʻa e Tohitapú ki he anga ʻo e vakai ʻa e ʻOtuá ki he ngaahi tuʻunga fakamamahi ʻi hotau ʻahó. Neongo naʻá ne tomuʻa ʻafioʻi ʻa e ngaahi faingataʻa lolotongá, ʻoku ʻikai te ne hōifua ai, pe hehema ke fakamolemoleʻi ia ʻo taʻengata. “Ko e ʻOtua ko e ʻOfa,” ko e tohi ia ʻa e ʻapositolo ko Sioné. (1 Sione 4:8) ʻOku tokanga lahi ʻa Sihova ki he kakaí peá ne fehiʻa ʻi he kovi kotoa pē. ʻOku mātuʻaki feʻungamālie nai ke tau hanga ki he ʻOtuá ki ha fakafiemālie, koeʻuhi ʻoku lelei ia mo manavaʻofa pea ʻokú ne maʻu ʻa e mālohi mo e finangalo ke fakangata ʻa e koví mei he māmaní. Naʻe tohi ʻe he tokotaha-tohi-sāmé: “[Ko e Tuʻi fakahēvani fakanofo ʻa e ʻOtuá] ʻoku ne fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni. Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui. ʻOku ne huhuʻi honau laumalie mei he maumau mo e fakamalohi, pea ʻoku mahuʻinga honau toto ʻi heʻene vakai.”—Sāme 72:​12-14.

ʻOkú ke ongoʻi fakaʻofaʻia ʻi he faʻahinga ʻoku faingataʻaʻiá? Ngalingali pē ʻokú ke pehē. Ko e kaungāongoʻí ko ha anga ia naʻe ʻai ʻe Sihova kia kitautolu, he naʻe fakatupu kitautolu ʻi hono ʻīmisí. (Senesi 1:​26, 27) Ko ia ai, ʻoku lava ke tau falala pau, ʻoku ʻikai ke taʻeongongofua ʻa Sihova ki he faingataʻaʻia ʻa e tangatá. Ko Sīsū, ʻa ia naʻá ne ʻiloʻi ofi ange ʻa Sihova ʻi ha toe taha kehé, naʻá ne akoʻi ʻoku mahuʻingaʻia lahi ʻa Sihova ʻia kitautolu pea ʻokú ne fonu ʻi he manavaʻofa fakaalaala.​—Mātiu 10:​29, 31.

ʻOku fakamoʻoniʻi ʻe he fakatupú tonu ʻoku tokanga mai ʻa Sihova ki he tuʻunga ʻo e tangatá. Naʻe pehē ʻe Sīsū ko e ʻOtuá “ʻoku ne fakahopo ʻene laʻā ki he kovi mo e lelei, pea ʻoku ne fakaʻuha ki he faitotonu mo e faihala.” (Mātiu 5:45) Ki he kakai ʻo e kolo ko Līsitá, naʻe pehē ʻe he ʻapositolo ko Paulá: “[Ko e ʻOtuá] talāʻehai naʻa ne nofo taʻe ha fakaʻilonga; he naʻa ne ngaue ʻaonga, ʻo ne ʻatu kiate kimoutolu mei langi ʻa e ngaahi ʻuha, mo e ngaahi taʻu mahu, ʻo ne ʻai ke fonungutungutu homou loto ʻi he meʻa tokoni mo e fakafiefia.”—Ngāue 14:17.

Ko Fē ʻOku Tupu mei Aí?

ʻOku taau ke fakatokangaʻi naʻe toe pehē ʻe Paula ki he kakai Līsitá: “ʻI he ngaahi kuonga muʻa [ko e ʻOtuá] naʻa ne tuku ai pe ʻa e kakai kehekehe ke nau fou ʻi he ngaahi founga ʻonautolu.” Ko ia ai, ko e ngaahi puleʻangá—pe ko e kakaí tonu—ʻoku tupu lahi mei ai ʻa e lahi taha ʻo e ngaahi tuʻunga ʻoku nau ʻi aí. ʻOku ʻikai totonu ke tukuakiʻi ʻa e ʻOtuá.—Ngāue 14:16.

Ko e hā ʻoku fakangofua ai ʻe Sihova ʻa e ngaahi meʻa koví ke hokó? ʻE faifai ange peá ne fai ha meʻa fekauʻaki mo ia? Ko e tali ki he ongo fehuʻi ko ení ʻe lava ke toki maʻu pē ia ʻi he Folofola ʻa e ʻOtuá. Ko hono ʻuhingá he ko e talí ʻoku fekauʻaki vāofi ia mo ha toe tokotaha laumālie ʻe taha pea mo ha ʻīsiu naʻá ne langaʻi hake ʻi he nofoʻanga fakalaumālie taʻehāmaí.

[Fakatātā ʻi he peesi 4]

ʻOku maʻu ʻe he tangatá ʻa e kaungāongoʻi. ʻE siʻi ange ai ʻa e ongongofua ʻa e ʻOtuá ki he faingataʻaʻia ʻa e tangatá?

 [Maʻuʻanga ʻo e Tā ʻi he peesi 2]

TAKAFI: Tangikē: UN PHOTO 158181/J. Isaac; mofuike: San Hong R-C Picture Company

[Maʻuʻanga ʻo e Tā ʻi he peesi 3]

Toʻohema ʻi ʻolungá, Kolōtia: UN PHOTO 159208/S. Whitehouse; kiʻi tama hōngea: UN PHOTO 146150 BY O. MONSEN