ʻOku Ngāue ʻa e Ngaahi Kongakau Koví?

“ʻOku ninimo tuʻu ʻa e māmaní, ʻo hangē ia ne feinga fakamākukanga ʻa e ngaahi mālohi fakamēsikí ke taʻofi ʻa e ngaahi hūʻanga kotoa pē ki tuʻa mei he fakatamakí.”​—Fainusipepa Falanisē ko Jean-Claude Souléry.

‘Ko e ngaahi ongoʻi tāutaha ʻo e ʻikai malava ha meʻá ʻoku hehema ia ke ne fakatupunga ha ongoʻi ʻoku ngāue ha kovi fakatupu lōmekina.’​—Faihisitōlia ko Josef Barton.

KO E fakalilifu fakaʻaufuli ʻo e ongo ʻohofi fakaetautoitoi ʻi Sepitema 11, 2001, naʻá ne fakatupunga ʻa e tokolahi ke nau fakakaukau. ʻI he tohi ʻi he Financial Times ʻa ʻIngilaní, naʻe pehē ai ʻe Michael Prowse: “ʻOku ʻikai ha monumanu ʻe ngāue pe lava ke ngāue ʻi ha founga mātuʻaki fakapāpeliane pehē.” Ko ha fakamatala ʻa e ʻētita ʻo e New York Times naʻe pehē ai tuku kehe ʻa e palani ʻoku fiemaʻu ʻi he ʻohofi fakamālohí, “ʻoku toe mahuʻinga tatau ke fakakaukau ki he lahi ʻo e tāufehiʻa ʻoku ʻi ai koeʻuhi ke fakahoko ai iá. Ko ha tāufehiʻa ia ʻoku fakalaka ʻi he faitau anga-mahení, ʻoku ʻikai hano ngaahi fakangatangata, ʻo ʻikai fai ki ha ngaahi felotoi.”

ʻOku fakakaukau fakamātoato ai ʻa e kakai ʻo e ngaahi tui kehekehe ki he malava ko ia ke pehē ʻoku ngāue ha mālohi kovi ʻaupito. Ko ha tangata pisinisi mei Salievo ʻa ia naʻe sio tonu ʻi he ngaahi fakalilifu ʻo e tāufehiʻa fakafaʻahinga ʻi Posiniá naʻá ne pehē: “Hili ha taʻu ʻo e tau ʻa Posiniá ʻoku ou tui ko Sētane ʻokú ne puleʻí. Ko ha tuʻunga fakasesele fakaʻaufuli eni.”

ʻI hono ʻeke pe naʻá ne tui ki he Tēvoló, naʻe tali ʻe he faihisitōlia ko Jean Delumeau: “ʻE lava fēfē ke u fakaʻikaiʻi ʻa e mālohi ʻo e koví ʻi heʻeku sio ki he meʻa ʻoku hokó mo ia kuo hoko talu hoku fanauʻí: Ko e tau hono ua ʻa māmaní, mo hono faʻahinga maʻukovia laka hake he toko 40 milioná; ko Auschwitz mo e ngaahi kemi tāmaté; ko e fakaʻauha fakafaʻahinga ʻi Kemipōtiá; ko e lingitoto anga-fakamamahi ʻa e founga-pule Ceauşescu; hoko ʻa e fakamamahí ko ha founga tuʻumaʻu ʻa e puleʻangá ʻi he ngaahi feituʻu lahi ʻi he māmaní kotoa. Ko e lisi ʻo e ngaahi meʻa fakalilifú ʻoku taʻehanongataʻanga. . . . Ko ia ai, ʻoku ou tui ʻoku tau tonuhia ʻi hono ui ʻoku ‘fakatēvolo’ ʻa e ngaahi ngāue peheé, ʻo ʻikai pehē ʻoku fakatupunga kinautolu ʻe ha Tēvolo mo hano ongo meʻatui mo ha ongo vaʻe mavaeua ka ko ha Tēvolo ʻa ia ko e fakaʻilonga ia ʻo e laumālie mo e mālohi ʻo e koví ʻoku ngāue ʻi he māmaní.”

ʻI he hangē ko Jean Delumeau, ʻoku fakamatalaʻi ʻe he kakai tokolahi ʻoku “fakatēvolo” ʻa e ngaahi meʻa fakalilifu ʻoku hoko he ʻahó ni ʻi he sōsaieti fakaetangatá, mei he tuʻunga fakafāmilí ʻo aʻu tonu ki he tuʻunga fakavahaʻapuleʻangá. Ka ko e hā ʻa e ʻuhinga ʻo e meʻá ni? ʻOku totonu ke tuku ʻa e ngaahi meʻa fakalilifu peheé ki he ngaahi mālohi taʻehāmai ʻo e koví, pe ʻoku ʻi ai ha ngaahi kongakau fakafoʻituitui loto-kovi ʻoku ngāue ʻo tākiekina ʻa e tangatá ke nau fai ʻa e ngaahi hia fakalilifu ʻoku fakalaka ia ʻi he kovi anga-maheni fakaetangatá? ʻOku puleʻi ʻa e ngaahi mālohi peheé ʻe ha pilinisi ʻo e koví—ko Sētane ko e Tēvoló?

[Maʻuʻanga ʻo e Tā ʻi he peesi 3]

Fānau: U.S. Coast Guard photo