ʻOku Totonu ki he Kau Kalisitiané ke Fuaʻa?

FUAʻÁ​—ko ha ʻulungaanga ia ʻoku totonu ke fakatupulekina ʻe he kau Kalisitiané? ʻI he tuʻunga ko e kau Kalisitiané, ʻoku fakalotolahiʻi kitautolu ke “tuli ki he ʻofa,” pea ʻoku tala mai kia kitautolu ko e “ʻofa ʻoku ʻikai, te ne meheka [fuaʻa].” (1 Kolinito 13:4; 14:1) ʻI he tafaʻaki ʻe tahá, ʻoku toe tala mai kia kitautolu ko “Jihova, . . . koe Otua fuaa ia” pea ʻoku fekauʻi mai ke tau “hoko muʻa ko e kau faʻifaʻitaki ki he ʻOtua.” (Ekisoto 34:​14, PM; Efeso 4:​32 [Efeso 5:​1, PM]) Ko e hā ʻoku ʻasi ngali fepaki aí?

Koeʻuhí ko e ongo foʻi lea faka-Hepelū mo e faka-Kalisi ʻoku liliu ko e “fuaʻa” ʻi he Tohitapú ʻokú ne ʻomai ha ngaahi ʻuhinga lahi. ʻOku lava ke na fakahuʻunga ki ha ʻuhinga lelei pe kovi, ʻo fakatuʻunga ʻi he founga ʻo hono ngāueʻaki ʻa e ongo foʻi leá. Hangē ko ení, ko e foʻi lea faka-Hepelū ʻoku liliu ko e “fuaʻa” ʻe lava ke ʻuhinga ia ko e “kīvoi ʻi he anga-līʻoa maʻataʻatā; ʻikai makātakiʻi ha fakafeʻauhi; faivelenga; loto-māfana; fuaʻa [māʻoniʻoni pe angahalaʻia]; meheka.” Ko e foʻi lea faka-Kalisi fehoanaki mo iá ʻoku ʻi ai hono ʻuhinga meimei tatau. Ko e ongo foʻi leá ni ʻe lava ke ʻuhinga ia ki ha ongoʻi hala mo mioʻi ki ha taha ʻoku pehē ʻoku fakafeʻauhi pe ko ha taha ʻoku tui ʻokú ne maʻu ha tuʻunga lelei ange. (Palovepi 14:​30, NW) ʻOku toe lava ke na ʻuhinga ki ha fakahaaʻi lelei ʻo ha ʻulungaanga foaki mei he ʻOtuá—ʻo loto ke maluʻi ha tokotaha ʻofeina mei he faingataʻá.​—2 Kolinito 11:2.

Ko e Faʻifaʻitakiʻanga Taupotu

ʻOku fokotuʻu ʻe Sihova ʻa e faʻifaʻitakiʻanga taupotu ʻo hono ngāueʻaki ʻa e fuaʻa totonú. Ko ʻene taumuʻá ʻoku haohaoa mo maʻa, ʻa ia ko e ueʻi ʻe he holi ke tokangaʻi hono kakaí mei he fakameleʻi fakalaumālié mo fakaeʻulungāngá. Fekauʻaki mo hono kakai ʻi he kuonga muʻá, ʻa ia naʻe lave fakaefakatātā ki ai ko Saioné, naʻá ne pehē: “ʻOku ou fuaʻa ʻi Saione ko e fuaʻa lahi, ʻio ʻoku ou fuaʻa ai ʻo mafana lahi.” (Sakalaia 8:2) Hangē pē ko e tokanga maʻu pē ʻa ha tamai ʻofa ke maluʻi ʻa ʻene fānaú mei he faingataʻá, ʻoku tokanga ʻa Sihova ke maluʻi ʻa ʻene kau sevānití mei he fakatuʻutāmaki fakaesinó mo fakalaumālié.

Ke maluʻi ʻa hono kakaí, naʻe tokonaki mai ʻe Sihova ʻa ʻene Folofolá, ʻa e Tohitapú. ʻOku maʻu ai ʻa e fakalototoʻa lahi kia kinautolu ke nau ʻaʻeva fakapotopoto, pea ʻoku fonu ia ʻi he ngaahi faʻifaʻitakiʻanga ʻo e faʻahinga naʻa nau fai pehē. ʻI he Aisea 48:​17, ʻoku tau lau ai: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.” He fakafiemālie moʻoni ke ʻiloʻi ko ʻene fuaʻá ʻoku ueʻi ai ia ke ne tokangaʻi mo leʻohi kitautolu! Kapau naʻe ʻikai te ne fuaʻa ʻi he founga lelei ko ení, te tau fuesia ai ʻa e faʻahinga faingataʻa kotoa pē koeʻuhi ko ʻetau taʻetaukeí. Ko e ngaahi fakahāhā ʻe Sihova ʻo e fuaʻá ʻoku ʻikai ʻaupito ke siokita.

Ko ia ai, ko e hā ʻokú ne ʻai ʻa e faikehekehe ʻi he vahaʻa ʻo e fuaʻa fakaʻotuá mo e fuaʻa taʻetotonú? Ke ʻiloʻi iá, tau fakakaukau angé ki he fakatātā fekauʻaki mo Meliame pea mo Fineasí. Fakatokangaʻi ange ʻa e meʻa naʻá ne ueʻi kinauá.

Meliame mo Fineasi

Ko Meliamé ko e tuofefine lahi ia ʻo Mōsese mo ʻĒloné, ʻa e ongo taki ʻo e kau ʻIsilelí lolotonga ʻa e ʻEkisotó. Lolotonga ʻa e ʻi he toafá ʻa e kau ʻIsilelí, naʻe hoko ai ʻa Meliame ʻo fuaʻa taʻetotonu fekauʻaki mo hono tuongaʻane ko Mōsesé. ʻOku pehē ʻe he lēkooti faka-Tohitapú: “Pea naʻe lauʻi ʻa Mosese ʻe Miliame mo Elone koeʻuhi ko e fefine Kusa kuo ne mali: . . . Pea na pehe, He ko Mosese  pe kuo folofola ki ai ʻa Sihova? ʻikai kuo ne folofola foki ʻiate kitaua?” ʻOku hā mahino, naʻe takimuʻa ʻa Meliame ʻi he meʻa ko eni naʻe fai kia Mōsesé, he naʻe tautea ʻe Sihova ʻa Meliame, ʻikai ko ʻĒlone, ʻaki ha tuʻunga ʻo e kilia ʻi he uike ʻe taha ʻi heʻene ʻulungaanga taʻetokaʻí.​—Nomipa 12:​1-​15.

Ko e hā naʻá ne fakaʻaiʻai ʻa Meliame ke fai pehē kia Mōsesé? Ko ha tokanga fekauʻaki mo e lotu moʻoní mo ha holi ke maluʻi ʻa e kaungā ʻIsilelí mei he faingataʻá? ʻOku hā mahino naʻe ʻikai. ʻOku hā naʻe fakaʻatā ʻe Meliame ha holi taʻetotonu ki ha tuʻunga mo ha mafai lahi ange ke tupulaki ʻi hono lotó. ʻI he tuʻunga ko ha palōfita fefine ʻi ʻIsilelí, naʻá ne maʻu ʻa e tokaʻi lahi mei he kakaí, tautefito ki he kakai fefiné. Naʻá ne tataki kinautolu ʻi he fasi mo e hiva hili ʻa e fakahaofi fakaemana ʻo ʻIsileli ʻi he Tahi Kulokulá. Ko ia ai, ʻi he taimi ko ení, ʻoku pau naʻe hoko ʻa Meliame ʻo fuʻu hohaʻa tōtuʻa fekauʻaki mo ha mole ʻa hono tuʻunga tuʻu-ki-muʻá ki ha taha ʻoku ngalingali ko ha taha ʻe fakafeʻauhi, ʻa e uaifi ʻo Mōsesé. ʻI hono ueʻi ʻe he fuaʻa siokitá, naʻá ne langaʻi ʻa e fakakikihi kia Mōsese, ʻa e tokotaha naʻe fakanofo ʻe Sihová.​—Ekisoto 15:​1, 20, 21.

Ko Fineasi, ʻi he tafaʻaki ʻe tahá, naʻe kehe ʻene taumuʻa ʻana ki heʻene ngaahi ngāué. Ki muʻa siʻi pē ʻi heʻenau hū ki he Fonua ʻo e Talaʻofá, ʻi he taimi naʻe ʻapitanga ai ʻa ʻIsileli ʻi he Tokalelei ʻo Mōapé, naʻe fakataueleʻi ai ʻe he kakai fefine Mōapé mo Mitianí ʻa e kau tangata ʻIsileli tokolahi ki he ʻulungaanga taʻetāú mo e tauhi ʻaitolí. Ke fakamaʻa ʻa e ʻapitangá pea fakafoki ʻa e houhau kakaha ʻa Sihová, naʻe fakahinohino ai ki he kau fakamaau ʻo ʻIsilelí ke tāmateʻi ʻa e kakai tangata kotoa pē kuo hoko ʻo tafokí. Ki he ngaahi taumuʻa taʻetaau, naʻe ʻomai taʻemīngao ai ʻe he ʻeiki ʻo haʻa Simione ko Similaí ʻa e fefine Mitiani ko Kōsipi ki he ʻapitangá “ʻi he vakai ki ai ʻa e fakatahataha kotoa ʻo e ngaahi foha ʻo ʻIsilelí.” Naʻe fai ʻe Fineasi ʻa e ngāue taʻetoeafe. ʻI he ueʻi ia ʻe he ongoʻi fuaʻa, pe faivelenga ki he lotu ʻa Sihová, mo ha holi ke tauhi maʻu ʻa e tuʻunga maʻa fakaeʻulungaanga ʻa e ʻapitangá, naʻá ne tāmateʻi ai ʻa e ongo feʻauakí ʻi hona tēnití. Naʻe fakaongoongoleleiʻi ia ʻi heʻene “ʻita fuaʻá,” “ʻi he ʻikai makātakiʻi ha fakafeʻauhi ʻe taha” kia Sihová. Ko e ngāue fakavavevave ʻa Fineasí naʻe taʻofi ai ʻa e mala tautea ʻa ia naʻá ne ʻosi toʻo ʻa e moʻui ʻa e toko 24,000, pea naʻe fakapaleʻi ia ʻe Sihova ʻaki ha fuakava ke nofo maʻu ʻa e tuʻunga taulaʻeikí ʻi hono lainé ʻo taʻengata.​—Nomipa 25:​4-​13; The New English Bible.

Ko e hā ʻa e faikehekehe ʻi he vahaʻa ʻo e ongo fakahāhā ko eni ʻo e fuaʻá? Naʻe fakafepaki ʻa Meliame ki hono tuongaʻané ʻi he fuaʻa siokita, lolotonga ia naʻe fakahoko ʻe Fineasi ia ʻa e fakamaau totonu makatuʻunga ʻi he fuaʻa fakaʻotuá. ʻOku ʻi ai ʻa e ngaahi taimi ʻoku totonu mo kitautolu foki, hangē ko Fineasí, ke tau ongoʻi ʻoku ueʻi kitautolu ke tau lea hake pe fai ha ngāue ko hono taukapoʻi ʻa e huafa ʻo Sihová, ko ʻene lotú, mo hono kakaí.

Fuaʻa Takihalaʻi

Ka, ʻoku malava nai ke tauhi ha ngaahi ongoʻi fuaʻa ʻoku fehālaaki pe takihalaʻi? ʻIo, ʻoku pehē. Ko e tuʻunga fakalūkufua eni ʻo e kau Siu ʻi he ʻuluaki senitulí. Naʻa nau leʻohi ʻi he fuaʻa ʻa e Lao naʻe foaki ʻe he ʻOtuá pea mo ʻenau ngaahi talatukufakaholó. ʻI heʻenau ngaahi feinga ke maluʻi ʻa e Laó, naʻa nau faʻu ai ha ngaahi tuʻutuʻuni fakaikiiki mo e ngaahi fakangatangata taʻefaʻalaua ʻa ia ne hoko ko ha kavenga mamafa ki he kakaí. (Mātiu 23:4) ʻI he taʻemalava pe taʻeloto ke tali kuo fetongi he taimi ko ení ʻe he ʻOtuá ʻa e Lao ʻa Mōsesé ʻaki ʻa e meʻa moʻoni naʻá ne tomuʻa  fakatātāʻí, naʻe ueʻi hala ai kinautolu ʻe heʻenau fuaʻá ke nau fakahāhā ha ʻita tōlili ki he kau muimui ʻo Sīsū Kalaisí. Ko e ʻapositolo ko Paulá, ʻa ia ko ia tonu naʻá ne mateaki ʻi he fuaʻa ki he Laó ʻi ha ʻuhinga takihalaʻi, naʻá ne fakahaaʻi ko e kakai naʻa nau taukapoʻi ʻa e Laó naʻa nau “mamahiʻi [fuaʻa maʻá e] ʻOtua, ka ʻoku ʻikai fou ʻi he ʻilo totonu.”—Loma 10:2; Kaletia 1:14.

Naʻa mo e tokolahi ʻo e kau Siu naʻa nau hoko ko e kau Kalisitiané naʻa nau faingataʻaʻia ʻi he feinga ke fakaʻatā kinautolu mei he faivelenga tōtuʻa ko eni ki he Laó. Hili ʻene fononga fakamisinale hono tolú, naʻe fai ʻe Paula ha līpooti fekauʻaki mo e ului ʻa e ngaahi puleʻangá. ʻI he taimi ko iá, naʻe laui afe ʻa e kau Siu Kalisitiane naʻa nau “mamahiʻi kotoa pē tokua ʻa e Lao.” (Ngāue 21:20) Naʻe hoko eni ʻi he ngaahi taʻu hili ʻa e tuʻutuʻuni ʻa e kulupu pulé ʻo pehē naʻe ʻikai pau ki he kau Kalisitiane Senitailé ke nau kamu. Ko e ngaahi ʻīsiu felāveʻi mo hono tauhi ʻo e Laó naʻá ne fakatupunga ʻa e fekīhiaki ʻi he fakatahaʻangá. (Ngāue 15:​1, 2, 28, 29; Kaletia 4:​9, 10; 5:​7-​12) ʻI he ʻikai maʻu ha mahino kakato fekauʻaki mo e anga ʻo e feangainga he taimi ko ení ʻa Sihova mo ʻene kakaí, naʻe vilitaki ʻa e kau Kalisitiane Siu ʻe niʻihi ʻi he ngaahi fakakaukau pē ʻanautolu, ʻo fakaangaʻi ʻa e niʻihi kehé.​—Kolose 2:​17; Hepelu 10:1.

Ko kitautolu leva, kuo pau ke tau fakaʻehiʻehi mei he tauhele ʻo e feinga tuʻunga ʻi he fuaʻá ke maluʻi ʻetau ngaahi fakakaukau pe founga mahuʻinga pē ʻatautolu ʻa ia ʻoku ʻikai makatuʻunga fefeka ʻi he Folofola ʻa e ʻOtuá. ʻOku lelei ke tau tali ʻa e maama foʻou ʻoku huluhulu ʻi he Folofola ʻa e ʻOtuá fakafou ʻi he fetuʻutakiʻanga ʻoku ngāueʻaki ʻe Sihova ʻi he ʻaho ní.

Fuaʻa Maʻa Sihova

Kae kehe, ko e fuaʻa fakaʻotuá ʻoku ʻi ai hono tuʻunga ʻi he lotu moʻoní. ʻI he taimi ʻoku tau hohaʻa tōtuʻa ai fekauʻaki mo hotau ongoongó pe ngaahi totonú, ʻoku fakahanga leva ʻe he fuaʻa fakaʻotuá ʻetau tokangá kia Sihova. ʻOkú ne ueʻi kitautolu ke kumi ʻa e ngaahi founga kehekehe ke talaki ai ʻa e moʻoni fekauʻaki mo iá, ʻo taukapoʻi ʻa ʻene ngaahi foungá mo ʻene kakaí.

Ko Akiko, ko ha faifekau taimi-kakato ʻa e Kau Fakamoʻoni ʻa Sihová, naʻe fakaangaʻi fefeka ia ʻe ha tokotaha-ʻapi naʻá ne maʻu hala fekauʻaki mo e lao ʻa e ʻOtuá ki he totó. Naʻe taukapoʻi fakapotopoto ʻe Akiko ʻa e Folofola ʻa e ʻOtuá, ʻo aʻu ʻo ne lave ki he ngaahi tuʻunga faingataʻa fakafaitoʻo pea mo e ngaahi palopalema ʻoku felāveʻi mo e huhu totó. ʻI hono ueʻi ʻe ha holi mālohi ke talanoa fekauʻaki mo Sihová, naʻá ne afeʻi ʻa e fetalanoaʻakí ki he meʻa naʻá ne ʻiloʻi ko e makatuʻunga moʻoni ia ki he fakafepaki ʻa e fefiné—ko e ʻikai te ne tui ki he ʻi ai ha Tokotaha-fakatupú. Naʻe fakaʻuhinga ʻa Akiko mo e tokotaha-ʻapí ʻi he founga ʻo hono poupouʻi ʻe he fakatupú ʻa e tui ki ha Tokotaha-fakatupú. Ko ʻene taukapoʻi loto-toʻá naʻe taki atu ai ʻo ʻikai ngata pē ʻi hono toʻo ʻa e ngaahi tomuʻa fehiʻa taʻemakatuʻungá kae pehē foki ki ha ako Tohitapu ʻi ʻapi mo e fefiné. ʻI he ʻahó ni ko e tokotaha-ʻapi ko ia ne ʻita ki muʻá ko ha tokotaha fakahīkihikiʻi ia ʻo Sihova.

Ko e fuaʻa totonú, pe faivelenga ki he lotu moʻoní, ʻokú ne ueʻi kitautolu ke tau tokanga pea ke puke ʻa e ngaahi faingamālié ke talanoa ai mo taukapoʻi ʻetau tuí ʻi he ngāué, ʻi he ʻapiakó, ʻi he falekoloá, pea ʻi he lolotonga ʻa e fefonongaʻakí. Ko e fakatātaá, ko Midori, ʻokú ne fakapapauʻi ke lea fekauʻaki mo ʻene tuí ki hono kaungāngāué. Ko ha kaungāngāue ʻe taha naʻá ne ʻi hono taʻu 40 tupú naʻá ne pehē ʻoku ʻikai ʻaupito haʻane mahuʻingaʻia  ʻi he Kau Fakamoʻoni ʻa Sihová. Ki mui ai, lolotonga ha fetalanoaʻaki ʻe taha, naʻe lāunga ange ai ʻa e fefiné fekauʻaki mo hono fakatupulekina ʻe hono ʻofefiné ha ʻulungaanga faingataʻa. Naʻe fakahaaʻi ange kiate ia ʻe Midori ʻa e tohi Questions Young People Ask​—Answers That Work, a pea naʻá ne tuʻuaki ange ke fokotuʻutuʻu ha ako ʻi he tohí mo hono ʻofefiné. Naʻe kamata ha ako, ka naʻe ʻikai ke kau ʻa e faʻeé ʻi he lāuleá. Naʻe fakapapauʻi ʻe Midori ke fakaʻaliʻali ki he fefiné ʻa e foʻi vitiō Jehovah’s Witnesses​—The Organization Behind the Name.* Naʻe fakaleleiʻi ʻe he meʻá ni ʻa e tuʻunga lahi ʻo ʻene ngaahi maʻu halá. ʻI hono ueʻi ʻe he meʻa naʻá ne sio aí, naʻá ne pehē: “ʻOku ou loto ke hangē ko e Kau Fakamoʻoni ʻa Sihová.” Naʻá ne kau fakataha mo ʻene tamá ʻi he ako Tohitapú.

Ko e fuaʻa totonú ʻoku toe ʻi ai hono tuʻunga ʻi he fakatahaʻanga Kalisitiané. ʻOkú ne pouaki ha laumālie māfana ʻo e ʻofa mo e tokanga pea ueʻi kitautolu ke talitekeʻi ʻa e ngaahi tākiekina fakamovetevete ʻa ia ʻe fakatupu maumau ki hotau fanga tokoua fakalaumālié, hangē ko e lau fakatupu maumaú mo e fakakaukau tafoki mei he moʻoní. Ko e fuaʻa fakaʻotuá ʻokú ne ueʻi kitautolu ke poupouʻi ʻa e ngaahi fili ʻa e kau mātuʻá, ʻa ia ʻoku nau ʻilo ʻi he taimi ʻe niʻihi ʻoku fiemaʻu ke valokiʻi ʻa e kau faihalá. (1 Kolinito 5:​11-​13; 1 Timote 5:​20) ʻI he tohi fekauʻaki mo ʻene ngaahi ongoʻi fuaʻa ki he kaungātui ʻi he fakatahaʻanga Kolinitoó, naʻe pehē ʻe Paula: “Oku ou fuaa kiate kimoutolu i he fuaa faka-Otua: he kuou fakanofo akimoutolu ki he unoho be taha, koeuhi keu atu ai akimoutolu koe tāuboou maonioni kia Kalaisi.” (2 Kolinito 11:​2, PM) Ko ia ai, ʻoku ueʻi foki kitautolu ʻe heʻetau fuaʻá ke fai ʻa e meʻa kotoa te tau lavá ke maluʻi ʻa e tuʻunga maʻa fakatokāteline, fakalaumālie mo fakaeʻulungaanga ʻa e faʻahinga kotoa ʻi he fakatahaʻangá.

ʻIo, ko e fuaʻa ʻoku fakataumuʻa totonú​—ʻa e fuaʻa fakaʻotuá​—ʻoku ʻi ai ʻene tākiekina lelei ki he niʻihi kehé. ʻOkú ne ʻomai ʻa e hōifua ʻa Sihová pea ʻoku totonu ke hoko ia ko e taha ʻo e ngaahi ʻulungaanga ʻoku tauhi ʻe he kau Kalisitiane he ʻaho ní.​—Sione 2:​17.

[Fakamatala ʻi lalo]

[Fakatātā ʻi he peesi 29]

Ko e ngaahi ngāue ʻa Fineasí naʻe makatuʻunga ia ʻi he fuaʻa fakaʻotuá

[Fakatātā ʻi he peesi 30]

Fakaʻehiʻehi mei he tauhele ʻo e fuaʻa fehālaakí

[Fakatātā ʻi he peesi 31]

Ko e fuaʻa fakaʻotuá ʻokú ne ueʻi kitautolu ke vahevahe atu ʻetau tuí pea koloaʻaki ʻetau fetokouaʻakí