Ko ha Taimi Fakafiefia ʻi he ʻOtu Palakaná

Ko e 1922 ia. Ko ha fakataha ʻa e Kau Ako Tohitapu Faivelengá, hangē ko ia naʻe uiʻaki ʻi he taimi ko iá ʻa e Kau Fakamoʻoni ʻa Sihová, naʻe fai ia ʻi Innsbruck, ʻAositulia. ʻI he kau fanongó naʻe ʻi ai ʻa Franz Brand, ko ha talavou mei Apatin ʻi Vojvodina, Sēpia. Ko e mōmeniti ko ē naʻe lave ai ʻa e tokotaha malangá ki he huafa ʻo e ʻOtuá, ʻa e Sihová, naʻe kamata kaikaila taukaeʻi ia ʻe ha fuʻu kakai, ʻo ʻai ke faingataʻa ai ke ne hoko atu, pea naʻe tuku ai ʻa e fakatahá. Neongo ia, ko e meʻa ne fanongoa ʻe Franz naʻe maongo lahi kiate ia, pea naʻá ne malangaʻi ai ʻa e ongoongo lelei ʻo e Puleʻangá. Ko e fanga kiʻi kamakamata eni ʻo e tupulaki fakalaumālie fakafiefia ʻi he taha ʻo e ngaahi fonua Palakaná.

KI HE tokolahi taha ʻo e kakai he ʻaho ní, ko e hingoa ʻIukosilāviá ʻokú ne ʻomai ʻa e ʻīmisi ʻo e tau mo e lingitoto. ʻOku haʻu ai ki he fakakaukaú ʻa e ngaahi ʻīmisi fakatupunga mamahi ʻo e tāmate tavale fakamanavaheé, kau kumi hūfanga faingataʻaʻia, ngaahi ʻapi kuo fakaʻauha mo e fānau paea loto-mamahi. ʻOku ʻikai ha lea ʻe lava ke ne fakamatalaʻi ʻa e langa mo e mamahi lahi naʻe fakatupunga ʻe he tau naʻá ne maumauʻi ʻa e Muitolotolo Palakaná mei he 1991 ki he 1995, ʻo fakaʻauha ai ʻa e ʻamanaki kotoa ki ha kahaʻu tuʻumālie mo ʻikai ha hohaʻa ʻi he ngaahi feinga fakaetangatá. Tupu mei he taú, ʻoku fekuki ai ʻa e kakai ʻo ʻIukosilāvia ki muʻá mo e faingataʻaʻia fakaʻekonōmika pea mo e masiva ʻangoʻango. a

ʻI he hoko ʻa e faingataʻa ko iá, ʻe faingataʻa ke ʻamanekina ʻe ha taha ke maʻu ha kakai fiefia ʻi he tapa ko eni ʻo e māmaní. Neongo ʻe hā ngalikehe nai, ʻoku ʻi ai ʻa e kakai pehē. Ko hono moʻoní, naʻa nau hokosia ha ʻaho ʻo e fiefia makehe ʻi he ofi ke ngata ʻa e senituli hono 20. Ko e hā ʻa e kaunga ʻo Franz Brand, ʻa e talavou naʻe lave ki ai he kamatá, ki he kotoa ʻo e meʻá ni?

Tupu Fakalaumālie ʻi he ʻOtu Palakaná

Naʻe fiefia ʻa Franz Brand fekauʻaki mo e ngaahi moʻoni foʻou naʻá ne fanongoá peá ne fakapapauʻi ai kuo pau ke ne fakamafola ʻa e ongoongo leleí. Naʻá ne maʻu ha ngāue kosi ʻulu mo tele kava ʻi Maribor, ko ha kolo lahi ʻi Solovēnia ofi ki he kauʻāfonua ʻo ʻAosituliá, pea kamata ke ne malanga ki heʻene kau kasitomaá, ʻa ia naʻa nau faʻa tangutu fakalongolongo ʻo fanongo ʻi hono tele honau kavá. Ko ha ola ʻo ʻene ngaahi feingá, naʻe hoko ʻo tupu mei ai ha kiʻi kulupu ʻo e kau fanongonongo ʻo e Puleʻangá ʻi Maribor ʻi he konga ki mui ʻo e 1920 tupú. Naʻe fai ha ngaahi malanga faka-Tohitapu ʻi ha falekai, ʻa ia naʻe feʻungamālie hono ui ki mui ko e Novi svet (Māmani Foʻoú) Falekai Meʻakai Tahi.

 ʻI he faai mai ʻa e taimí naʻe mafola ʻa e ongoongo leleí ʻi he fonuá kotoa. Ko e ngāueʻaki ʻo e “Tulama-ʻAta ʻo e Fakatupú” (ko ha fakaʻaliʻali houa ʻe valu ʻo kau ki ai ʻa e ngaahi filimi, silaiti, mo e ngaahi hiki) naʻe hoko ia ko e ngaahi meʻangāue ʻi he mafola ko ení. ʻI he 1930 leva ʻi he hoko ʻa e Kau Fakamoʻoni ʻa Sihová ʻo ʻi he malumalu ʻo e fakatanga kakaha ʻi Siamané, ko e Kau Fakamoʻoni ʻi he Puleʻanga ʻo ʻIukosilāviá naʻe fakaivimālohiʻi kinautolu ʻe he kau tāimuʻa Siamane naʻa nau hola atu mei honau fonuá. ʻI hono tuku ki he tafaʻakí ʻa e fiemālie pe faingamālie fakafoʻituituí, naʻa nau feinga ke aʻu ʻo malanga ki he ngaahi feituʻu mamaʻo taha ʻo e fonua moʻungaʻia ko ení. ʻI he ʻuluaki taimí, ne hā ngali siʻisiʻi hono tali ʻenau pōpoakí. ʻI he konga ki muʻa ʻo e 1940 tupú, ko e kau malanga pē ʻe toko 150 naʻe līpooti he malaʻe ngāué.

ʻI he 1941, naʻe hoko ai ha fakatanga kakaha, ʻa ia ne toki ʻosi he 1952. Ko ha fiefia ē ne hokó ʻi he faifai pea lēsisita fakalao ʻa e Kau Fakamoʻoni ʻa Sihová ʻi Sepitema 9, 1953, ʻi he malumalu ʻo e founga-pule faka-Kominiusi ʻa Seniale Titó! ʻI he taʻu ko iá, naʻe ʻi ai ʻa e kau malanga ʻo e ongoongo leleí ʻe toko 914, pea naʻe tupulaki mālohi ʻa e tokolahí. ʻI he aʻu mai ki he 1991, naʻe tupu ai ʻa e tokolahi ʻo e kau malangá ki he toko 7,420, pea ko e toko 16,072 naʻa nau maʻu ʻa e Fakamanatu ʻo e taʻu ko iá.

Mei ʻAokosi 16 ki he 18, 1991, naʻe fai ai ʻa e ʻuluaki fakataha-lahi fakavahaʻapuleʻanga ʻa e Kau Fakamoʻoni ʻa Sihova ʻi he fonua ko ení ʻi Zagreb, Kolōtia. Mei he lotoʻi fonuá pea mo muli, naʻe kau ki ai ʻa e toko 14,684. Ko e fakataha-lahi fakangalongataʻá ni naʻe teuʻi ai ʻa e kakai ʻa Sihová ki he ngaahi ʻahiʻahi naʻe tuʻu mei muʻá. Naʻe ʻi he lotolotonga ʻo e ngaahi meʻalele fakamuimui taha ke paasi ʻi he faiʻanga-hua he vahaʻa ʻo Kolōtia mo Sēpiá ʻa e ngaahi pasi naʻa nau ʻave ki ʻapi ʻa e kau fakafofonga Sēpiá. Hili ʻa e mavahe atu ʻa e pasi fakamuimui tahá, naʻe tāpuni ʻa e kauʻāfonuá pea kamata leva ʻa e taú.

ʻOku Maʻu ʻe he Kakai ʻa Sihová ʻa e Ngaahi ʻUhinga ke Fiefia Ai

Ko e ngaahi taʻu ʻo e taú naʻe fakamoʻoniʻi ko ha taimi ia ʻo e ʻahiʻahi kakaha ki he Kau Fakamoʻoni ʻa Sihova ʻi he ʻOtu Palakaná. Ka neongo ia, ʻoku nau maʻu ʻa e ʻuhinga ke fiefia ai koeʻuhi kuo tāpuakiʻi ʻe Sihova ʻa hono kakai ʻi aí ʻaki ʻa e tupulekina lelei ʻaupito. Talu mei he 1991, ko e tokolahi ʻo e kau malanga ʻo e Puleʻangá ʻi he feituʻu ʻIukosilāvia ki muʻá kuo tupulaki ia ʻo laka hake he peseti ʻe 80. Naʻe hoko ʻi he taʻu fakangāue 2001 ha tumutumu ko e toko 13,472.

Ko e ongo ʻōfisi ʻi Zagreb mo Belgrade (Sēpia) naʻá na faʻa fakahoko hono tokangaʻi ʻa e ngāue ʻa e Kau Fakamoʻoni ʻa Sihová ʻi he kotoa ʻo e ʻIukosilāvia ki muʻá. ʻI he tupulekiná mo e ngaahi liliu fakapolitikalé, naʻe fiemaʻu ai ke fokotuʻu ha ongo ʻōfisi foʻou ʻi Ljubljana (Solovēnia), mo Skopje (Masitōnia), ʻi he tānaki atu ki hono maʻu ʻa e ngaahi ʻōfisi foʻou ʻi Belgrade mo Zagreb. ʻOku fakafuofua ko e kau mēmipa ʻe toko 140 ʻoku ngāue ʻi he ngaahi ʻōfisí ni. Ko e tokolahi taha ʻo kinautolú ʻoku nau kei siʻi pea fonu ʻi he faivelenga mo e ʻofa kia Sihova. Ko ha fuʻu tokolahi ʻo kinautolu ʻoku nau kau ʻi he liliu ʻo e ngaahi tohi tokoni ako Tohitapú ki he faka-Kolōtiá, faka-Masitōniá, faka-Sēpiá mo e faka-Solovēniá. Ko ha tāpuaki ē ko ia he ko e lahi taha ʻo e ʻū makasini mo e tohi ʻa e Kau Fakamoʻoni ʻa Sihová ʻi he ngaahi lea ko ení ʻoku pulusi taimi taha ia mo e fuofua pulusinga faka-Pilitāniá! Ko e ngaahi tohí ni ʻoku nau tokoniʻi ʻa e kakai tokolahi ke nau maʻu ʻa e fiemālie mo e ʻamanaki.

Ko ha toe ʻuhinga ki he fiefiá ko e tokoni taʻesiokita ʻoku fai ʻe he kau sevāniti taimi-kakato tokolahi  fau mei he ngaahi fonua kehé. Kuo langa ha ngaahi Fale Fakatahaʻanga fakaʻofoʻofa ʻi he ngaahi taʻu ki mui ní, ʻo tānaki atu ia ki he fiefia ʻa e ngaahi fakatahaʻangá. Neongo ia, naʻe ʻi ai naʻa mo e fiefia lahi ange naʻe tatali mai. Ne lava fēfē ke hoko ia?

Ko ha Ngāue Laulōtaha

Naʻe faʻa fifili ʻa e kau malanga tokolahi, ‘ʻE faifai ange pea tau maʻu ʻa e New World Translation ʻi heʻetau leá?’ ʻI he taʻu ki he taʻu, naʻa nau tukulotoa ai ʻa e ʻamanaki ke fanongo ki ha fanongonongo ʻo e meʻa ko iá ʻi ha fakataha-lahi fakavahe. Ka, ʻe lava fēfē ke fakahoko ha ngāue lahi fakaʻulia pehē, ʻi he fakakaukau atu ko e ngaahi timi liliu ki he ngaahi leá ni naʻe toki fokotuʻu pē ʻi he ngaahi taʻu siʻi kuo maliu atú pea naʻe ʻi he tuʻunga tokosiʻi pē ʻa e kau liliú?

Hili hono fakatotoloʻi ʻo e ngaahi meʻá, naʻe tali ai ʻe he Kulupu Pulé ha ngāue fakataha ʻa ia ʻe fengāueʻaki vāofi ai ʻa e timi liliu Kolōtiá, Masitōniá mo e Sēpiá ʻo maʻu ʻaonga ai mei heʻenau fengāueʻakí mo ʻenau ngaahi fokotuʻú. Ko e timi Kolōtiá naʻe fiemaʻu ke ne takí.

Ko ha ʻAho ʻo e Fiefia

ʻE ʻikai ʻaupito ngalo he Kau Fakamoʻoni ʻa Sihova ʻi he ʻOtu Palakaná ʻa Siulai 23, 1999. Ko e holongā ʻo e ngaahi Fakataha-Lahi Fakavahe “Folofola Fakaekikite ʻa e ʻOtuá” naʻe pau ke fai taimi taha ia ʻi Belgrade, Salievo (Posinia-Hesekovina), Skopje mo Zagreb. Naʻe taʻepau ʻi ha taimi pe ʻe lava ke fai ʻa e fakataha-lahí ʻi Belgrade koeʻuhi he lolotonga ʻa e ngaahi laku pomu ʻa e NATO, naʻe ʻikai fakaʻatā ai ha ngaahi fakataha maʻá e kakaí. He fiefia ē ko e fanga tokouá ʻi he ʻamanaki atu ke lava ʻo feohi ʻia kinautolu hili ha ngaahi māhina ʻo e tuʻunga taʻepaú! Kae kehe, naʻe lakasi ʻe he tuʻunga moʻoní ʻa ʻenau ʻamanakí.

ʻI he efiafi Falaité, naʻe fai ai ha fanongonongo makehe ʻi he ngaahi kolo fakataha-lahi kotoa ʻe faá. Ko e kau fakafofonga ʻe toko 13,497 naʻa nau fakatuʻotuʻa fakalongolongo atu ki he meʻa naʻe teu ke hokó. ʻI he tukuange mai ʻe he tokotaha malangá ʻa e New World Translation of the Christian Greek Scriptures ʻi he lea faka-Kolōtiá mo e faka-Sēpiá pea fakahā ki he kau fanongó ʻoku lele lelei ʻa e liliu faka-Masitōniá, naʻe ʻikai kei lava ke mapuleʻi ʻe he kau fakafofongá ʻenau ngaahi ongó. Ko e pasipasi fiefia leʻo-lahí naʻe ʻikai fakaʻatā ai ʻa e tokotaha malangá ke ne fakaʻosi ʻene fanongonongó. ʻI he fakataha-lahi ʻi Salievó, naʻe fakalongolongo fakafokifā ai ʻa e kau fanongó, ʻa ia naʻa nau mātuʻaki ʻohovale ʻaupito. Naʻe hoko atu ai ha pasipasi lōloa. Naʻe tafe ʻa e ngaahi loʻimata fiefiá ʻi he kouʻahe ʻo e tokolahi ʻi Belgrade, pea naʻe fakahohaʻasi ʻa e tokotaha malangá ʻe he toutou pasipasí ki muʻa ke lava ʻo fakaʻosi ʻene fai ʻa e fanongonongó. He fiefia lahi moʻoni ē ko e tokotaha kotoa!

Naʻe ʻai ʻo toe mahuʻinga lahi ange ʻa e meʻaʻofá ni ʻi he moʻoniʻi meʻa ko ia ʻo hono maluʻi ʻe he Kau Fakamoʻoni ʻa Sihová ʻa e ngaahi totonu fakaepulusi ki ha liliu Tohitapu faka-Kolōtia pea pehē ki he faka-Sēpiá. Ko ia ai, ko e New World Translation of the Christian Greek Scriptures ʻi he ongo leá ni naʻe fakatahaʻi ia ki ha voliume ʻe taha fakataha mo ha liliu ʻo e Ngaahi Konga Tohitapu Faka-Hepeluú ʻi he lea tatau. ʻIkai ko ia pē, naʻe pulusi ʻa e Tohitapu faka-Sēpiá fakatouʻosi ʻi he mataʻitohi faka-Lomá mo e faka-Sililikí.

ʻI he fakamālōʻia ʻa e tāpuaki mo e tataki kotoa naʻe maʻú, ko e kakai ʻa Sihova ʻi he ʻOtu Palakaná ʻoku nau loto-tatau moʻoni mo e ngaahi lea ʻa Tēvitá: “Neongo ʻete ʻalu pe ʻi he teleʻa ʻoku maluʻaki ai ʻa Mate, ʻe ʻikai te u manavahe ki ha kovi; he ko koe [Sihova] ʻoku ma feohi.” Neongo ʻa e faingataʻa kotoa ʻoku nau hokohoko fehangahangai mo iá, ʻoku nau fakapapauʻi ke ʻai ʻa e ‘fiefia a Jihová ko honau malohi.’​—Sāme 23:4; Nehemaia 8:​10, PM.

[Fakamatala ʻi lalo]

[Fakatātā ʻi he peesi 20]

Ko e ʻuluaki kulupu ʻo e kau malanga mei Maribor, Solovēniá, ʻi heʻenau malanga ʻi he feituʻu mamaʻó