Ngaahi Fehuʻi mei he Kau Lautohí

ʻE hoko ko ha founga ia ʻo e lotu tuifió ke fakatau mai ha fale mei ha kulupu lotu ʻe taha ʻo liliu ia ki ha Fale Fakatahaʻanga?

ʻI he tuʻunga fakalūkufuá, ʻoku fakaʻehiʻehi ʻa e Kau Fakamoʻoni ʻa Sihová mei he ngaahi feangainga pehē mo e ngaahi lotu kehé. Neongo ia, ko ha feangainga fakapisinisi pehē ʻoku ʻikai nai fokotuʻu ai ha tōʻonga ia ʻo e lotu tuifió. ʻE vakai pē nai ki ai ko ha feangainga fakapisinisi tā tuʻo taha. Ko e fakatahaʻanga fakalotofonua ʻa e Kau Fakamoʻoni ʻa Sihová ʻoku ʻikai ke ngāue fakataha ia mo ha toe kulupu lotu ʻe taha ke langa ha feituʻu faiʻanga lotu ke ngāueʻaki ʻe he ongo faʻahí fakatouʻosi.

Ko e hā ʻokú ne fokotuʻu ha tōʻonga ʻo e lotu tuifió ʻi he vakai mai ʻa Sihová? Fakakaukau angé ki he fakahinohino ʻa e ʻapositolo ko Paulá: “ʻOua te mou hanga ʻo hoa-ʻa-kehe, he nonofo mo e kau taʻelotu: he meʻataha fefe ʻa e faitotonu mo e malakilao? pe feohi fefe ʻa e maama mo e poʻuli? ʻio, ʻo loto taha fefe ʻa Kalaisi mo Piliali? pe ʻinasi fakataha fefe ʻa e lotu mo e taʻelotu? ʻio, pea faʻahi fēfē ʻa e temipale ʻo e ʻOtua mo e ngaahi aitoli? . . . Ko ia, Mou hiki mei honau lotolotonga, pea mavahe kimoutolu, pea ʻoua te mou ala ki he meʻa taʻemaʻa—ko e folofola é ʻa e ʻEiki” (2 Kolinito 6:​14-17) Ko e hā naʻe ʻuhinga ki ai ʻa Paula ʻi he ongo foʻi lea “meʻataha” mo e “feohi?”

Ko e meʻataha ʻoku lave ki ai ʻa Paulá ʻoku kau mahino ki ai ʻa e lotú mo e ngaahi feangainga fakalaumālie mo e kau tauhi ʻaitolí pea mo e kau taʻetuí. Naʻá ne fakatokanga ki he kau Kolinitoó fekauʻaki mo e “ʻinasi ʻi he Tepile ʻa e ʻEiki mo e tepile foki ʻa Faʻahikehe.” (1 Kolinito 10:​20, 21) Ko ia ai, ko ha tōʻonga ʻo e lotu tuifió ko e meʻataha ko ia ʻi he lotú pe feohi fakalaumālie mo e ngaahi kautaha lotu kehé. (Ekisoto 20:5; 23:13; 34:12) ʻI he taimi ʻoku fakatau mai ai ha fale naʻe ngāueʻaki ʻe ha kautaha lotu, ʻoku fai pē eni ia ke maʻu ai ha fale ʻoku fiemaʻu ki ha Fale Fakatahaʻanga. Ki muʻa ke ngāueʻaki ko ha Fale Fakatahaʻangá, ʻoku fakamaʻa ia mei ha faʻahinga fakatātā fakalotu pē ʻa e lotu loí. Ko ia ʻi hono fulihi ko ení, ʻoku fakatapui ia kia Sihova ki he taumuʻa ʻataʻatā pē ki he lotu kiate iá. ʻOku ʻikai ha meʻa-taha pe feohi ʻi he vahaʻa ʻo e lotu moʻoní mo e lotu loí.

ʻI he lāulea ki he ngaahi fakaikiiki fekauʻaki mo ha fakatau pehē, ko e fetuʻutaki mo e faʻahi ʻe tahá ʻoku totonu ke tauhi ki he siʻisiʻi tahá pea ʻoku totonu ke fakangatangata pē ki he pisinisi ʻataʻatā. Ko e kau mēmipa ʻo e fakatahaʻanga Kalisitiané ʻoku totonu ke nau manatuʻi ʻa e fakatokanga ʻa Paula ke ʻoua ʻe hoko “ʻo hoa-ʻa-kehe, he nonofo mo e kau taʻelotu.” Neongo ʻoku ʻikai te tau ongoʻi māʻolunga ange ʻi he faʻahinga ʻoku nau kau ʻi he ngaahi tui kehé, ʻoku tau fakaʻehiʻehi mei he feohi fakasōsiale mo kinautolú pe tohoaki ki heʻenau lotú. a

Fēfē ʻa hono haea ʻe ha fakatahaʻanga ha fale ʻo ha kautaha lotu? Ko hono haeá ʻoku faʻa hoko ai ha fetuʻutaki tuʻumaʻu, ʻa ia kuo pau ke fai ha fakaʻehiʻehi mei ai. Naʻa mo hono haea ha fale pehē ki ha foʻi tuʻo taha, ko e kulupu ʻo e kau mātuʻá ʻoku totonu ke nau fakakaukau ki heni: ʻE ʻi ai ha ngaahi ʻaitoli pe ngaahi fakatātā fakalotu ʻi loto pe ʻi tuʻa ʻi he falé? ʻE anga-fēfē ʻa e vakai mai ʻa e kakai ʻi he koló ki heʻetau ngāueʻaki ʻa e falé? ʻE ʻi ai nai ha taha ʻi he fakatahaʻangá ʻe tūkia ʻi heʻetau ngāueʻaki ʻa e fale ko ení? (Mātiu 18:6; 1 Kolinito 8:​7-​13) ʻE sivisiviʻi ʻe he kau mātuʻá ʻa e ngaahi meʻa tefito ko ení pea toki fai leva ha fili ʻo fakatatau ki ai. Ko honau konisēnisí tonu pea mo e fakatahaʻangá fakalūkufua kuo pau ke fai ha fakakaukau ki ai ʻi hono fakapapauʻi pe ʻe fakatau mai ʻo liliu ha fale pehē ki ha Fale Fakatahaʻanga.

[Fakamatala ʻi lalo]

[Fakatātā ʻi he peesi 27]

Ko e fale ko ení, ʻa ia ko ha sinakoke ki muʻa, naʻe fakatau mai ia ʻo fakaleleiʻi ki ha Fale Fakatahaʻanga