ʻOku Tau Fiemaʻu Kotoa ʻa e Fakaongoongoleleí

KO HA ʻaho lelei ia ki he kiʻi taʻahiné. Neongo naʻe fiemaʻu ki ai ha fakatonutonu ʻi he ngaahi taimi kehé, ko e foʻi ʻaho ko ení naʻá ne anga-lelei ʻaupito ai. Kae kehe, ʻi he pō ko iá, hili hono fakamohe ʻa e kiʻi taʻahiné, naʻe fanongo atu ʻa ʻene faʻeé ʻoku tangi. ʻI hono ʻeke pe ko e hā ʻoku loto-mamahi aí, naʻá ne halotu mo e fakatōloʻimatá: “ʻIkai naʻá ku anga-lelei he ʻahó ni?”

Ko e foʻi fehuʻi ko iá naʻe loto-lavea lahi ai ʻa e faʻeé. Naʻá ne faʻa vave maʻu pē ke fakatonutonu ʻa ʻene tamá. Ka ʻi he ʻaho ko ení, neongo ʻa hono fakatokangaʻi ʻa e feinga mālohi ʻa ʻene kiʻi taʻahiné ke anga-leleí, naʻe ʻikai ke leaʻaki ai ʻe he faʻeé ia naʻa mo ha foʻi lea fakahīkihiki ʻe taha.

Ko e fānau fefine īkí ʻoku ʻikai ko kinautolu pē ʻoku nau fiemaʻu ʻa e fakaongoongoleleí mo e lea fakafiemālié. ʻOku tau fiemaʻu kotoa ia—ʻo tatau pē mo ʻetau fiemaʻu ʻa e akonakí mo e fakatonutonú.

ʻOku anga-fēfē ʻetau ongoʻí ʻi he taimi ʻoku fai mai ai ha fakaongoongolelei loto-moʻoni? ʻIkai ʻokú ne fakamāfanaʻi hotau lotó mo fakafiefiaʻi kitautolu? Hangehangē ʻoku tau ongoʻi ai ʻoku fakatokangaʻi mo tokanga mai ha tahá. ʻOku fakapapauʻi mai ai kia kitautolu ko e meʻa naʻa tau faí naʻe ʻaonga, pea ʻokú ne ueʻi kitautolu ke tau toe ngāue mālohi pehē ʻi he kahaʻú. ʻOku ʻikai ha ofo ʻi hono faʻa tohoakiʻi kitautolu ʻe he fakaongoongolelei loto-moʻoní ki he tokotaha ʻokú ne fakamoleki ʻa e taimi ke leaʻaki ai ha meʻa fakalototoʻá.—Palovepi 15:23.

Naʻe mahinoʻi ʻe Sīsū Kalaisi ʻa e fiemaʻu ke fai ha fakaongoongoleleí. ʻI he pealapeli fekauʻaki mo e talēnití, ʻoku fakaongoongoleleiʻi loto-māfana taki taha ai ʻe he ʻeikí (ʻokú ne fakatātaaʻi ʻa Sīsū tonu) ʻa e ongo tamaioʻeiki faitōnungá, ʻo ne pehē: “Malo, siʻi tamaioʻeiki lelei mo lototō.” He fakalotomāfana moʻoni ko ia! Neongo naʻe kehekehe ʻaupito ʻa ʻena malavá mo ʻena lavameʻá, naʻá na maʻu pē ʻa e fakaongoongolelei tatau.—Mātiu 25:​19-23.

Ko ia, tau manatuʻi ʻa e faʻē ʻa e kiʻi taʻahiné. ʻOku ʻikai fiemaʻu ke tau tali ki he niʻihi kehé ke nau fakatōloʻimata pea tau toki fai kia kinautolu ha fakaongoongolelei. ʻI hono kehé, ʻe malava ke tau fakapapauʻi ke kumi ki ha ngaahi faingamālie ke fai ai ha fakaongoongolelei. Ko e moʻoni, ʻoku tau maʻu ʻa e ʻuhinga lelei ke fai ha fakaongoongolelei loto-moʻoni ʻi he faingamālie kotoa pē.