Līpooti ʻa e Kau Fanongonongo ʻo e Puleʻangá

Ko e Ngaahi Fale Fakatahaʻangá ʻOku ʻAtā Ia ki he Tokotaha Kotoa Pē

ʻI HONO akoʻi ʻa ʻene kau ākongá ki he ngāue fakafaifekau maʻá e kakaí, naʻe fakalototoʻaʻi ʻe Sīsū Kalaisi kinautolu ke nau ‘malaga i he tua falé.’ (Mātiu 10:​27, PM) ʻIo, naʻe pau ke nau fakahoko fakahāhā ʻenau ngāue fakafaifekau faka-Kalisitiané, ʻi he tuʻunga fakahāhā kakato. ʻI hono ngāueʻaki ʻa e akonaki ko ení, ko e ngāue ʻa e Kau Fakamoʻoni ʻa Sihová ʻoku fai fakahāhā mo ia foki. Ko e tuʻunga fakahāhā ko ení kuó ne ʻai ai ʻa e Kau Fakamoʻoní ke nau ikuʻi ʻa e fakafepakí pea maʻu ai hano talitali lelei.

Neongo ko e ngaahi fakataha fakaefakatahaʻanga ʻa e Kau Fakamoʻoni ʻa Sihová ʻoku ʻatā ia ki he kakaí, ko e tomuʻa tāufehiʻá ʻokú ne ʻai ʻa e kakai ʻe niʻihi ke nau ongoʻi toumoua ke hū ki ha Fale Fakatahaʻanga. ʻOku hoko eni ʻi Finilani. ʻOku loto-siʻi ʻaupito pē ʻa e niʻihi ia ʻi he ʻalu ki he ngaahi feituʻu foʻoú. ʻI he taimi ʻoku langa ai ha Fale Fakatahaʻanga foʻou pe fakaleleiʻi ha holo kuo ʻosi tuʻu, ʻoku faʻa fokotuʻutuʻu ai ke ʻaʻahi mai ʻa e kakaí ki he falé. ʻE fai nai ha feinga makehe ke fakaafeʻi ʻa e ngaahi kaungāʻapí ke nau ʻahia ʻa e Fale Fakatahaʻangá pea hoko ai ʻo maheni mo e ngāue ʻa e Kau Fakamoʻoni ʻa Sihová.

ʻI he feituʻu ʻe taha, naʻe fokotuʻutuʻu ai ʻe he Kau Fakamoʻoní ke fai ha feingangāue fakamakasini ʻi he ʻaho tatau pē ko ia naʻe ʻaʻahi atu ai ʻa e kakaí ki honau Fale Fakatahaʻanga foʻoú. Naʻe fetaulaki ai ha ongo Fakamoʻoni mo ha tangataʻeiki ʻa ia naʻá ne pehē, ʻokú ne saiʻia ʻi hono lau ʻa e ongo makasini Taua Leʻo mo e ʻĀ Hake! Naʻe fakahā ange ʻe he ongo tokouá ʻa e ʻaʻahi ʻoku fai ange ki honau falé peá na tala ange ai te na ʻave ia ki he Fale Fakatahaʻangá. Naʻe pehē ʻe he tangatá ʻokú ne fiefia ke kau fakataha mo kinaua. Ko hono uaifí, ʻi heʻene fanongo atu ki he fepōtalanoaʻaki ko ení, naʻá ne kaila atu, “ʻOua naʻa mou ʻalu kae liʻaki au!”

ʻI he hū ʻa e tangatá ki he Fale Fakatahaʻangá, naʻá ne sio takai holo peá ne pehē: “Ta ʻoku ʻikai ʻaupito ke fakapōpōʻuli eni ia. Tamani, ʻoku fakaʻofoʻofa eni ia mo maama. Naʻe tala mai kia au ko e Fale Fakatahaʻangá ʻoku fakapōpōʻuli!” Naʻe nofo hifo ʻa e ongo meʻá peá na kole ai ha niʻihi ʻo e ngaahi tohi naʻe fakaʻaliʻalí.

Naʻe fiemaʻu ʻe he fakatahaʻanga ʻe taha ke fanongonongo ʻi he nusipepa fakalotofonuá ha ʻaʻahi ʻa e kakaí ki he falé ʻi he taimi ʻe fakatapui ai ʻa honau Fale Fakatahaʻangá. ʻI hono maʻu ʻa e fanongonongo ki he meʻa ko ení, naʻe fokotuʻu atu ai ʻe he ʻētita pulé ke hiki ha fakamatala fekauʻaki mo e kaveingá. Naʻe loto ki ai ʻa e fanga tokouá, pea ʻi ha taimi nounou mei ai, naʻe hā ai ʻi he nusipepá ha fakamatala lelei naʻe feʻunga mo e vaeua peesi, ʻo fakahaaʻi ai ʻa e meʻa ʻe fakahokó mo fakamatalaʻi ai ʻa e ngaahi ngāue ʻa e fakatahaʻanga fakalotofonua ʻa e Kau Fakamoʻoni ʻa Sihová.

Hili hono pulusi ʻa e fakamatalá, naʻe fetaulaki ha Fakamoʻoni taʻumotuʻa mo hano kaungāʻapi ʻa ia naʻá ne pehē ange: “Naʻe ʻi ai ha fakamatala lelei ʻaupito fekauʻaki mo e Kau Fakamoʻoni ʻa Sihová ʻi he pepá he ʻahó ni!” Naʻe malava ʻe he tuofefiné ke fai ha fakamoʻoni peá ne ʻoange ai ki mui kiate ia ʻa e polosiua Jehovah’s Witnesses in the Twentieth Century.

Tānaki atu ki hono fakamaʻalaʻala ʻa e ngaahi maʻuhala fekauʻaki mo e Kau Fakamoʻoni ʻa Sihová, ko e ngaahi fokotuʻutuʻu hangē ko ia fekauʻaki mo e ʻaʻahi mai ʻa e kakaí ki he ngaahi falé pea mo e polokalama fakatapui ʻi he ngaahi Fale Fakatahaʻanga foʻoú kuó ne ueʻi ai ʻa e kau malangá ʻi hono fakalototoʻaʻi kinautolu ke fakaafeʻi ha kakai tokolahi ange ke nau kau mai ki he ngaahi fakatahá. ʻIo, ʻi he ngaahi fonua lahi, kau ai ʻa Finilani, kuo ʻilo ʻe he kakaí ko e ngaahi Fale Fakatahaʻanga ʻa e Kau Fakamoʻoni ʻa Sihová ʻoku ʻatā ia ki he tokotaha kotoa pē.