Ngaahi Fehuʻi mei he Kau Lautohí

Ko e fuakava ʻoku fai ki he ʻOtuá ʻoku totonu ke fakahoko maʻu pē?

ʻI he tuʻunga Fakatohitapú, ko e fuakavá ko ha palōmesi mafatukituki ia kuo fai ki he ʻOtuá ke fakahoko ha ngāue, fai ha feilaulau, kamata ha ngāue pe tuʻunga, pe fakaʻehiʻehi mei he ngaahi meʻa pau ʻoku ʻikai ke taʻefakalaó. ʻOku ʻi he Tohitapú ʻa e ngaahi fakamatala ki he ngaahi fuakava ʻa ia naʻe fai fakatuʻunga, he naʻe kau ki ai ha tukupā ke muimui ki ha ʻalunga kuo fokotuʻu kapau naʻe ʻuluaki fai ʻe he ʻOtuá ha meʻa. Ko e fakatātaá, ko ʻAna, ʻa e faʻē ʻa e palōfita ko Sāmiuelá, naʻá ne “fai eia ae fuakava, o ne behe, E Jihova oe toko lahi, kabau koe mooni te ke . . . manatuʻi au, o ikai fakagaloʻi a hoo kaunaga, ka ke foaki ki hoo kaunaga ae tama, behe teu foaki ia kia Jihova i he aho kotoabe o ene moui, bea e ikai ai ha tele ki hono ulu.” (1 Samiuela 1:​11, PM) ʻOku toe fakamatalaʻi ʻe he Tohitapú ʻa e ngaahi fuakava ko e fai ia ʻi he fili tauʻatāina. ʻOku fēfē ʻa e pau ke fai ki he ngaahi fuakava Fakatohitapú?

“Oka ke ka fuakava ki he Otua,” ko e lau ia ʻa Tuʻi Solomone ʻo ʻIsileli ʻo e kuonga muʻá, “oua naa ke fakatuai hoo fai ki ai.” ʻOkú ne tānaki mai: “Fai koe ki he mea kuo ke fuakava ki ai. Oku lelei hake ke oua aubito naa ke fuakava, i hoo fuakava kae ikai fai ki ai.” (Koheleti 5:​4, 5, PM) Ko e Lao naʻe foaki ki ʻIsileli fakafou ʻia Mōsesé ʻoku pehē ai: “Oka ke ka fuakava aki ae fuakava kia Jihova ko ho Otua, oua naa ke fakatuai a hono fai: he koe mooni ko Jihova ko ho Otua te ne eke ia kiate koe; bea e hoko ia koe agahala kiate koe.” (Teutalonome 23:​21, PM) ʻOku hā mahino, ko hono fai ha tukumoʻui ki he ʻOtuá ko ha meʻa mafatukituki ia. ʻOku totonu ke fai ia ʻi ha ʻuhinga lelei, pea ko e tokotaha ʻokú ne fai iá ʻoku ʻikai totonu ke ne veiveiua ki heʻene malava ke fai ki ha meʻa pē ʻokú ne palōmesi ki ai ʻi he fuakavá. Kapau ʻe ʻikai, ʻoku lelei ange ke ʻoua te ne fai ha fuakava. Ko ia ai, ko hono faí pē, kuo pau leva ke fai ki he fuakava kotoa pē?

Fēfē kapau ʻoku fiemaʻu ʻi ha fuakava ke fai ʻe ha taha ha meʻa te ne toki ʻiloʻi ki mui ʻoku ʻikai feongoongoi ia mo e finangalo ʻo e ʻOtuá? Tau pehē ko ha fuakava ia ʻokú ne fakafehokotaki ʻi ha founga ʻa e ʻulungaanga taʻetāú pea mo e lotu moʻoní? (Teutalonome 23:​18, PM) ʻOku hā mahino, ko ha fuakava pehē ʻoku ʻikai pau ke fai ia. ʻIkai ngata aí, ʻi he malumalu ʻo e Lao ʻa Mōsesé, ko ha fuakava naʻe fai ʻe ha fefiné naʻe lava ke fakataʻeʻaongaʻi ia ʻe heʻene tamaí pe ko hono husepānití.​—Nomipa 30:​3-​15, PM.

Toe fakakaukau ki he tuʻunga ʻo ha tokotaha kuó ne fai ha fuakava ki he ʻOtuá ke nofo taʻemali ka ʻi he taimi ní ʻokú ne ʻi ha tuʻunga ai ke fai ha fili. Kuo ʻai ia ʻe heʻene fuakavá ke ne ʻi ha tuʻunga ʻa ia ʻokú ne ongoʻi ai ko hono fakahoko iá ʻoku ʻave ai ia tonu ke ofi ki he tuʻunga ʻo hono maumauʻi ʻa e ngaahi tuʻunga fakaʻotua fekauʻaki mo e ʻulungaanga tāú. ʻOku totonu ke ne kei feinga pē ke fai ki heʻene fuakavá? ʻIkai ʻe lelei ange kiate ia ke ne maluʻi ia mei haʻane hoko ʻo halaia ʻi he ʻulungaanga taʻetāú ʻaki ʻa e ʻikai fai ki heʻene fuakavá ʻo ne tuku atu ai ia ki he meesi ʻa e ʻOtuá mo kōlenga ki heʻene fakamolemolé? Ko ia tokotaha pē ʻe lava ke ne fai ʻa e filí ʻi he meʻá ni. ʻE ʻikai lava ʻe ha toe tangata kehe ke fai ʻa e filí maʻana.

Fēfē kapau ʻoku fai ʻe ha taha ha fuakava ʻokú ne toki ʻiloʻi ki mui naʻe fai fakavave? ʻE kei totonu ke ne feinga ke fakahoko ʻa e fuakavá? Naʻe ʻikai faingofua kia Sēfita ke ne fakahoko ʻa e fuakava naʻá ne fai ki he ʻOtuá, ka naʻá ne fai totonu ki ai. (Fakamaau 11:​30-​40, PM) Ko e taʻemalava ha taha ke fai ki ha fuakavá ʻe lava ke iku ia ki he hoko ʻo “houhau” ʻa e ʻOtuá peá ne hae hifo ai ʻa e meʻa kuo fakahoko ʻe he tokotaha ko iá. (Koheleti 5:6) Ko hono fakamaʻamaʻaʻi ʻa e meʻa fekauʻaki mo hono fakahoko ʻo ha fuakavá ʻe lava ke iku ia ki hano toʻo ʻa e hōifua ʻa e ʻOtuá.

 Naʻe pehē ʻe Sīsū Kalaisi: “Ke pehe ni hoʻomou lea, ʻIo, ʻIo, ʻIkai, ʻIkai: he ka ai hano fakalahi ʻoku mei he Fili ia.” (Mātiu 5:​37, fakaʻītali ʻamautolu.) Kuo pau ke tokanga ha Kalisitiane ʻo ʻikai fekauʻaki pē mo e fai ki he ngaahi fuakava ki he ʻOtuá kae pehē foki fekauʻaki mo hono fakamoʻoniʻi ʻokú ne alafalalaʻanga ʻi he kotoa ʻo ʻene ngaahi leá—ki he ʻOtuá pea ki he tangatá. Fēfē kapau ʻokú ne ʻiloʻi ʻokú ne ʻi he tuʻunga faingataʻa ʻo hono ʻosi fai ha felotoi mo ha tokotaha ʻe taha ʻa ia ne hā lelei ʻi he kamatá ka ʻi hono vakaiʻi fakaleleí ʻoku hā fakavalevale ia? ʻOku ʻikai totonu ke ne vakai ʻoku maʻamaʻa ʻa e ngaahi meʻa ko iá. Ka koeʻuhi ko ha fetalanoaʻaki fakamātoato, ʻe fili nai ai ʻa e tokotaha ʻe tahá ke fakaʻatā ia mei he fatongia ko iá.​—Sāme 15:4; Palovepi 6:​2, 3.

ʻI he fekauʻaki mo e ngaahi fuakavá pea mo e kotoa ʻo e ngaahi meʻa kehé, ko e hā ʻoku totonu ke hoko ko ʻetau tokanga tefitó? Tau kumi maʻu pē ke tauhi maʻu ha vahaʻangatae lelei mo Sihova ko e ʻOtuá.

[Fakatātā ʻi he peesi 30, 31]

Naʻe ʻikai toumoua ʻa ʻAna ke fai ki heʻene fuakavá

[Fakatātā ʻi he peesi 30, 31]

Neongo naʻe faingataʻa hono fai iá, naʻe fai ʻa Sēfita ki heʻene fuakavá