ʻE Lava ke Liliu ʻe Hoʻo Ngaahi Lotú ha Ola ʻo ha Tuʻunga?

KO HAI ia ʻia kitautolu kuo teʻeki ai ke ne fehangahangai mo ha tuʻunga mafatukituki ʻoku ʻikai lava ke tau mapuleʻi? ʻOku fakahaaʻi ʻe he Tohi Tapú naʻe ʻiloʻi ʻe he ʻapositolo ko Paulá ʻoku lava ke kaunga ʻa e lotú ki he ola ʻo e ngaahi tuʻunga mafatukituki peheé.

ʻI he taimi naʻe tuku pōpula taʻetotonu ai ʻa Paula ʻi Lomá, naʻá ne kole ki hono ngaahi kaungātuí ke nau lotu maʻana, ʻo tānaki atu: “ʻOku ʻasili ʻeku kole ke mou fai pehe, koeʻuhi ke vave hoku fakafoki atu kiate kimoutolu.” (Hepelu 13:​18, 19) ʻI ha toe taimi ʻe taha, naʻe fakahaaʻi ai ʻe Paula ʻa e tuipau ʻe tali ʻe he ʻOtuá ʻa e ngaahi lotu ke tukuange vave iá. (Filimone 22) Naʻe vave ʻa hono fakatauʻatāinaʻi ʻo Paulá pea naʻá ne toe foki ki heʻene ngāue fakamisinalé.

Ka ʻe lava moʻoni ʻe he lotú ke liliu ʻa e ola ʻo hoʻo ngaahi palopalemá? Mahalo pē. Ko ia ai, manatuʻi ko e lotú ʻoku ʻikai ko ha tōʻonga fakalotu fakaeouau pē ia. Ko e fetuʻutaki moʻoni ia mo ʻetau Tamai ʻofa mo mālohi ʻi hēvaní. ʻOku totonu ke tau ongoʻi tauʻatāina ke hoko ʻo mātuʻaki hangatonu ʻi heʻetau ngaahi lotú kae tatali kātaki leva ke sio ki he anga ʻo e tali ʻa Sihová.

ʻE ʻikai nai ke tali hangatonu mai ʻe he ʻOtuá ʻetau lotu kotoa pē, pea ʻe ʻikai nai te ne tali maʻu pē ʻi he founga, pe ʻi he taimi ʻoku tau ʻamanekiná. Ko e fakatātaá, naʻe toutou lotu ʻa Paula fekauʻaki mo hono “tolounua i he kakano.” Naʻe ʻikai ke toʻo ʻe he ʻOtuá ʻa e palopalema ʻa Paulá, pe ko e hā nai ia, ka naʻá ne fakafiemālieʻi ʻa Paula ʻaki ʻa e ngaahi lea fakaivimālohi: “Ko eku tokoni e lahi maau: he kuo fakakakato eku malohi i hoo vaivai.”—2 Kolinito 12:​7-9, PM.

Ko kitautolu foki ʻe lava ke tau tuipau neongo kapau ʻoku ʻikai ke toʻo ʻe he ʻOtuá ha palopalema tefito, ʻe lava ke ne “tofa foki eia ae hala ke hao ai, koeuhi ke [tau] faa kataki ia.” (1 Kolinito 10:​13, PM) ʻI ha ʻaho vavé ni mai, ʻe toʻo ʻosi ai ʻe he ʻOtuá ʻa e faingataʻaʻia ʻa e faʻahinga kotoa ʻo e tangatá. Lolotonga iá, ko e hanga ki he “tali lotu” ʻe lava ke liliu ai ʻa e ola ʻo e tuʻungá.—Sāme 65:2.