Ko e ʻOtuá ke Tukuakiʻi ki Heʻetau Ngaahi Palopalemá?

ʻI HE taimi naʻe faingataʻaʻia ai ʻa e taʻahine lahi ʻa Meleané ʻi ha lavea lahi ʻi hono ʻutó, naʻe fai ʻe Meleane ʻa e meʻa naʻe mei fai ʻe he tokolahi ʻo kitautolú. * Naʻá ne lotu ki he ʻOtuá ki ha tokoni. “ʻOku ʻikai lava ke u manatuʻi ha toe taimi naʻá ku ongoʻi mātuʻaki taʻeʻaonga ai mo tuēnoa,” ko e lau ia ʻa Meleané. Ki mui ai, naʻe toe kovi ange ʻa e tuʻunga ʻo ʻene taʻahiné, pea naʻe kamata ke fehuʻia ʻe Meleane ʻa e ʻOtuá. “Ko e hā naʻe hoko ai ení?” ko ʻene ʻeké ia. Naʻe ʻikai lava ke ne mahinoʻi pe ʻoku anga-fēfē ʻa e lava ke liʻaki ia ʻe ha ʻOtua ʻofa mo tokanga.

Ko e meʻa naʻe hokosia ʻe Meleané ʻoku ʻikai ʻaupito ke ngali-kehe. Ko e kakai tokolahi ʻi he māmaní kotoa kuo nau ongoʻi naʻe liʻaki kinautolu ʻe he ʻOtuá ʻi he lolotonga ʻa e ngaahi taimi faingataʻá. “ʻOku ou kei fāinga pē mo e ‘ngaahi fehuʻi ki he ʻuhinga ʻo hono fakaʻatā ʻe he ʻOTUÁ ʻa e ngaahi meʻa koví,’” ko e lau ia ʻa Lisa ʻi he hili hono fakapoongi ʻa hono mokopuná. “Kuo ʻikai ke mole fakaʻaufuli ʻa ʻeku tui ki he ʻOtuá, ka kuo liliu moʻoni ia.” ʻI he tuʻunga meimei tatau, hili hono hokosia ha meʻa fakamamahi taʻeʻuhinga fekauʻaki mo hono foha valevalé, naʻe pehē ʻe ha fefine ʻe taha: “Naʻe ʻikai ke ʻomai ʻe he ʻOtuá kia au ha fakafiemālie ʻi he meʻa naʻe hokó. Kuo ʻikai te ne fakahaaʻi mai kia au ha fakaʻilonga pe fakahaaʻi mai ha manavaʻofa.” Naʻá ne tānaki mai: “ʻE ʻikai ʻaupito te u fakamolemoleʻi ʻa e ʻOtuá.”

ʻOku maʻu ʻe he niʻihi ʻa e ngaahi ongoʻi ʻita ki he ʻOtuá ʻi heʻenau sio ki he māmani takatakai ʻia kinautolú. ʻOku nau sio ai ki he ngaahi sōsaieti kuo lōmekina ʻe he masivá mo e fiekaiá, kau kumi hūfanga taʻeʻiai ha ʻamanaki ʻi he taú, fānau tokolahi fakaʻulia kuo fakapaeaʻi ʻe he ʻeitisí mo e kakai ʻe laui miliona kuo fakamamahiʻi ʻe he ngaahi mahaki kehe. ʻI he fehangahangai mo e ngaahi meʻa fakamamahi ko ení pea mo e ngaahi meʻa meimei tatau, ʻoku tukuakiʻi ai ʻe he tokolahi ʻa e ʻOtuá ʻi he hā ngali ʻikai te ne fai mai ha meʻá.

Kae kehe, ko hono moʻoní ʻoku ʻikai totonu ke tukuakiʻi ʻa e ʻOtuá ki he ngaahi palopalema ʻokú ne fakahohaʻasi ʻa e faʻahinga ʻo e tangatá. ʻI hono moʻoní, ʻoku ʻi ai ʻa e ngaahi ʻuhinga totonu ke tui ai ʻe vavé ni ke fakaleleiʻi ʻe he ʻOtuá ʻa e maumau naʻe hoko mai ki he fāmili fakaetangatá. ʻOku mau fakaafeʻi atu koe ke ke huke ki he kupu hoko maí pea sio ai ʻoku tokanga moʻoni mai ʻa e ʻOtuá kiate kitautolu.

[Fakamatala ʻi lalo]