‘Ke Pouaki ʻa e Huafa ʻo Sihová’

ʻI MĀMANI LAHI, ʻoku fakamahuʻingaʻi ai ʻa e Taua Leʻo mo hono hoa makasini ko e ʻĀ Hake!, ʻi he meʻa fakalaumālie ʻoku ʻi loto aí mo hona mahuʻinga fakatupu-ʻiló. ʻI hono tapua atu ʻa e fakakaukau ko iá, ko ha tokotaha lautohi ʻi Falanisē naʻá ne fai ki muí ni ʻa e tohi ko ení:

“Ko ha finemui au, ko e tupuʻi ʻAfilika pea siʻi ʻaupito ʻa e tuʻunga fakaakó. ʻIkai fuoloa atu, naʻá ku kamata lau hoʻomou ngaahi makasiní. ʻI hono tohoakiʻi ʻe he ngaahi kaveingá, ʻoku ou ʻiloʻi ai ʻa e mahuʻinga ʻo e lautohí. Koeʻuhi ko hoʻomou ngaahi makasiní, kuo fakalahiʻi ai ʻa ʻeku ngaahi foʻi leá pea ʻoku lava ke u fai ha tohi fakataha mo ha ngaahi hala siʻisiʻi ʻi ai.

“ʻOku ou ofo ʻi hoʻomou pulusi ʻa e meʻa kotoa pē ʻoku kaunga ki he tangatá, ko e palanité pea mo e Tokotaha-Fakatupú. Ko e ngaahi kupú ni ʻoku mātuʻaki mahinongofua ʻo nau ʻai ha tokotaha ke ne loto ai ke hoko ko ha tokotaha manako lautohi. ʻOku ʻikai ha toe taha ʻokú ne maʻu ʻa e malava ke akoʻi ʻa e faʻahinga kotoa ʻo e kakaí ʻi he taimi tatau.

“ʻOku ou toe ofo ʻi heʻeku sio ko e meʻá ni kotoa ʻoku ʻikai ke fai ia ki ha ngaahi tupu fakakomēsiale ka ke pouaki pē ʻa e huafa ʻo Sihová. ʻOku ou ʻiloʻi ʻoku mou maʻu ʻa ʻene hōifuá, pea ʻoku ou fakamālō atu. Kātaki ʻo hokohoko atu ʻi hono maʻu ʻa e mālohi mei he Tokotaha-Fakatupú koeʻuhi ke mou faiakoʻaki.”

ʻOku lolotonga fakahoko ʻe he Kau Fakamoʻoni ʻa Sihová ʻenau ngāue fakaeako Tohi Tapú ʻi he fonua ʻe 235. Ko e Taua Leʻo ʻoku pulusi ia ʻi he lea ʻe 148 mo e ʻĀ Hake! ʻi he lea ʻe 87. Ko e ongo pepá ni ʻoku ʻikai ke pulusi ia ke ʻomai ai ha lāngilangi ki ha tangata. Ko e akonaki makatuʻunga ʻi he Tohi Tapú mo e fakamatala ʻalu mo e taimí ʻoku maʻu aí ʻoku faʻufaʻu ia ke fakalāngilangiʻi ʻa e Tokotaha-Fakatupú, ʻa ia ʻokú ne folofola: “Ko au Sihova . . . ʻoku ou ako koe ke fai meʻa ʻaonga.” (Aisea 48:17) ʻOfa ke ke maʻu ʻaonga tonu ʻi hono lau maʻu pē ʻa e Tohi Tapu Māʻoniʻoní fakataha mo e ongo tohi tokoni ako Fakatohitapu ko ení.