Fakafāʻūtahaʻi ʻe he ʻOfa ki he ʻOtuá

ʻI HE taimi naʻe faʻu ai ʻa e fakatahaʻanga Kalisitiané ʻi he ʻuluaki senituli ʻo Hotau Kuongá, ko e taha ʻo hono ngaahi anga tuʻu-ki-muʻá—neongo ʻa e kehekehe ʻa hono kau mēmipá—ko ʻene fāʻūtahá. Ko e kau lotu ki he ʻOtua moʻoní naʻa nau haʻu mei he ngaahi fonua ʻi ʻĒsia, ʻIulope pea mo ʻAfilika. Naʻa nau fakafofongaʻi ha ngaahi ʻātakai kehekehe—ko e kau pātele, kau sōtia, kau pōpula, kau kumi hūfanga, kau fefakatauʻaki, kau palōfesinale mo e kakai pisinisi. Ko e niʻihi ko e kau Siu, pea ko e niʻihi ko e kau Senitaile. Ko e tokolahi ne nau hoko ko e kau tono, kau faka-Sōtoma, kau konā, kau kaihaʻa pe ko e kau fakamālohi. Ka neongo ia, ʻi he taimi naʻa nau hoko ai ko e kau Kalisitiané, naʻa nau liʻaki ʻenau ngaahi tōʻonga koví pea nau hoko ʻo fāʻūtaha vāofi ʻi he tuí.

Ko e hā naʻá ne ʻai ke malava ʻa e lotu faka-Kalisitiane ʻi he ʻuluaki senitulí ʻo ʻomai ke fāʻūtaha fakataha ʻa e kakai kotoa ko ení? Ko e hā naʻa nau femelinoʻaki ai ʻia kinautolu pea mo e kakaí fakalūkufuá? Ko e hā naʻe ʻikai te nau kau ai ʻi he ngaahi angatuʻú mo e fepakí? Ko e hā naʻe mātuʻaki kehe ai ʻa e muʻaki lotu faka-Kalisitiané mei he ngaahi lotu lalahi ʻo e ʻaho ní?

Ko e Hā Naʻá Ne Tohoakiʻi ke Vāofi ʻa e Ngaahi Mēmipa ʻo e Fakatahaʻangá?

Ko e meʻa tefito muʻomuʻa naʻá ne fakafāʻūtahaʻi ʻa e kaungātui ʻi he ʻuluaki senitulí ko e ʻofa ki he ʻOtuá. Naʻe ʻiloʻi ʻe he kau Kalisitiane ko iá ʻa honau fatongia tefito ke ʻofa ki he ʻOtua moʻoní, ʻa  Sihova, ʻaki honau lotó, laumālié mo e ʻatamaí kotoa. Hangē ko ení, ko e ʻapositolo ko Pitá, ko ha Siu, naʻe fakahinohinoʻi ke ne ʻaʻahi ki he fale ʻo ha Senitaile, ko ha tokotaha ʻa ia ne ʻikai te ne mei feohi vāofi mo ia ʻi he tuʻunga anga-mahení. Ko e meʻa naʻá ne ueʻi ia ke ne talangofuá ko e muʻomuʻa ʻa e ʻofa kia Sihová. Ko Pita mo e muʻaki kau Kalisitiane kehé naʻa nau maʻu ha vahaʻangatae vāofi mo e ʻOtuá ʻa ia naʻe makatuʻunga ʻi he ʻilo totonu ki Hono ʻulungāangá, ngaahi saiʻiá mo e ngaahi fehiʻá. ʻI he faai atu ʻa e taimí, naʻe mahinoʻi ʻe he kau lotu kotoa pē ko e finangalo ia ʻo Sihova kia kinautolú ke nau “maʻopoʻopo, ʻo loto taha mo fakakaukau taha.”—1 Kolinito 1:10; Mātiu 22:37; Ngāue 10:​1-35.

Naʻe toe tohoakiʻi fakataha ʻa e kau tuí ʻe heʻenau tui kia Sīsū Kalaisí. Naʻa nau loto ke muimui ofi ʻi hono topuvaʻé. Naʻá ne fekauʻi kinautolu: “Ke mou feʻofaʻaki: hange ā ko ʻeku ʻofaʻi kimoutolu, . . . Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:​34, 35) Naʻe fiemaʻu ke hoko eni ʻo ʻikai ko ha ongoʻi ʻi tuʻa pē, ka ko ha ʻofa feilaulauʻi-kita. Ko e hā ʻa e ola ʻe hokó? Naʻe lotu ʻa Sīsū ʻo fekauʻaki mo e faʻahinga naʻe tui kiate iá: “Ko ʻeku kole ke nau taha pe ʻakinautolu kotoa pē; hangeā ʻoku ke ʻiate au, ʻalā Tamai, mo au ʻiate koe, ke pehē foki ʻenau ʻiate kitaua.”—Sione 17:​20, 21; 1 Pita 2:21.

Naʻe huaʻi mai ʻe Sihova ʻa hono laumālie māʻoniʻoní, pe ivi ngāué, ki heʻene kau sevāniti moʻoní. Naʻe pouaki ʻe he laumālié ni ʻa e fāʻūtaha ʻi honau lotolotongá. Naʻá ne fakaava kia kinautolu ha mahino fekauʻaki mo e ngaahi akonaki Fakatohitapu ʻa ia naʻe tali ʻi he kotoa ʻo e ngaahi fakatahaʻangá. Naʻe malangaʻi ʻe he kau lotu ʻa Sihová ʻa e pōpoaki tatau—ko e fakamāʻoniʻoniʻi ʻa e huafa ʻo Sihová fakafou he Puleʻanga faka-Mīsaia ʻo e ʻOtuá, ko ha founga-pule fakahēvani ʻa ia ʻe pule mai ki he faʻahinga kotoa ʻo e tangatá. Naʻe mahinoʻi ʻe he muʻaki kau Kalisitiané honau fatongia ke “ʻikai ʻo e maama ko eni.” Ko ia ai, ʻi ha taimi pē naʻe hoko ai ʻa e ngaahi angatuʻu pe fepaki fakakautau fakalotofonuá, naʻe tuʻu-ʻatā ai pē ʻa e kau Kalisitiané. Naʻa nau tuli ki he melinó mo e tokotaha kotoa.—Sione 14:26; 18:36; Mātiu 6:​9, 10; Ngāue 2:​1-4; Loma 12:​17-​21.

ʻOku ngāueʻaki ʻe he kau tuí kotoa ʻa honau fatongia ke pouaki ʻa e fāʻūtahá. Anga-fēfē? ʻAki hono fakapapauʻi ʻoku fehoanaki honau ʻulungāangá mo e Tohi Tapú. Ko ia ai, naʻe tohi ʻe he ʻapositolo ko Paulá ki he kau Kalisitiané: “Ke mou liliu hoʻomou toʻonga muʻa, ʻo huʻihuʻi ʻa e motuʻa tangata,” pea “kofuʻaki ʻa e tangata foʻou.”—Efeso 4:​22-32.

Tauhi Maʻu ʻa e Fāʻūtahá

Ko e moʻoni, ko e kau tui ʻi he ʻuluaki senitulí naʻa nau taʻehaohaoa, pea naʻe tupu hake ʻa e ngaahi tuʻunga ʻa ia naʻe poleʻi ai ʻenau fāʻūtahá. Ko e fakatātaá, ʻoku fakamatala ʻa e Ngāue 6:​1-6 naʻe malanga hake ha faikehekehe ʻi he vahaʻa ʻo e kau Kalisitiane Siu ʻa ia naʻe lea faka-Kalisí mo e faʻahinga naʻa nau lea faka-Hepeluú. Ko e faʻahinga naʻe lea faka-Kalisí naʻa nau ongoʻi naʻe fakafaikehekeheʻi kinautolu. Kae kehe, ʻi hono fakaʻilo pē ʻa e meʻa ko iá ki he kau ʻapositoló, naʻe fai leva ʻa e ngāue fakavave mo totonu ki he meʻá ni. Ki mui ai, naʻe iku ha fehuʻi ʻi he tokāteliné ki he fakakikihi fekauʻaki mo e ngaahi fatongia ʻo e faʻahinga ʻikai ko e Siu ʻi he fakatahaʻanga Kalisitiané. Naʻe fai ha fili makatuʻunga ʻi he ngaahi tefitoʻi moʻoni Fakatohitapú, pea naʻe tali ʻe he tokotaha kotoa ʻa e fili ko ení.—Ngāue 15:​1-29.

ʻOku fakahaaʻi ʻi he ngaahi fakatātā ko ení naʻe ʻikai iku ʻa e ngaahi taʻefelotoí ki ha ngaahi māvahevahe fakafaʻahinga pe ki ha taʻefāʻūtaha fakatokāteline ʻikai ngaofengofua ʻi he fakatahaʻanga Kalisitiane ʻi he ʻuluaki senitulí. Ko e hā hono ʻuhingá? Koeʻuhi ko e ngaahi meʻa fakatupunga fāʻūtaha tefitó—ʻa e ʻofa kia Sihová, tui kia Sīsū Kalaisí, feʻofaʻaki feilaulauʻi-kitá, tali ʻa e tataki ʻa e laumālie māʻoniʻoní, ko hano mahinoʻi lahi ʻo e  ngaahi akonaki Fakatohitapú, mo ha mateuteu ke liliu ʻa hoto ʻulungāangá—naʻe mālohi feʻunga ia ke tauhi ke fāʻūtaha mo melino ʻa e muʻaki fakatahaʻangá.

Fāʻūtaha ʻi he Lotú ʻi Onopooni

ʻE lava ke maʻu ʻa e fāʻūtahá ʻi he founga tatau he ʻahó ni? ʻE lava ʻe he ngaahi meʻa tefito tatau ko ení ke ne kei tohoakiʻi fakataha ʻa e ngaahi mēmipá ʻi ha tui pea ʻai ke nau malava ʻo melino mo e ngaahi matakali kotoa ʻi he tapa kotoa ʻo e māmaní? ʻIo, ʻe malava! ʻOku fāʻūtaha ʻa e Kau Fakamoʻoni ʻa Sihová ʻi ha fetokouaʻaki ʻi māmani lahi ʻoku aʻu atu ki he ngaahi fonua, ʻotu motu mo e ngaahi feituʻu laka hake he 230. Pea ʻoku fakafāʻūtahaʻi kinautolu ʻe he ngaahi meʻa tefito tatau ʻa ē naʻá ne fakafāʻūtahaʻi ʻa e kau Kalisitiane ʻi he ʻuluaki senitulí.

Ko e muʻomuʻa taha ʻi he tokoni ki he fāʻūtaha ʻoku hokosia ʻe he Kau Fakamoʻoni ʻa Sihová ko ʻenau līʻoa kia Sihova ko e ʻOtuá. ʻOku ʻuhinga ení ʻoku nau feinga ke hoko ʻo mateaki kiate ia ʻi he malumalu ʻo e tuʻunga kotoa pē. Ko e Kau Fakamoʻoni ʻa Sihová ʻoku nau toe ngāueʻi ʻa e tui kia Sīsū Kalaisi pea ki heʻene ngaahi akonakí. ʻOku fakahaaʻi ʻe he kau Kalisitiané ni ʻa e ʻofa feilaulauʻi-kita ki he ngaahi kaungātuí pea malangaʻi ʻa e ongoongo lelei tatau ʻo e Puleʻanga ʻo e ʻOtuá ʻi he ngaahi fonua kotoa ʻoku nau ngāue longomoʻui aí. ʻOku nau fiefia ke talanoa fekauʻaki mo e Puleʻangá ni mo e kakai ʻo e ngaahi tui, ngaahi matakali, ngaahi puleʻanga mo e ngaahi kulupu fakasōsiale kotoa. ʻOku toe hanganaki tuʻu-ʻatā ʻa e Kau Fakamoʻoni ʻa Sihová ʻi he ngaahi meʻa ʻa e māmaní, ʻa ia ʻoku tokoniʻi ai kinautolu ke nau matuʻuaki ʻa e ngaahi tenge fakapolitikale, fakafonua, fakasōsiale mo fakakomēsiale ʻa ia ʻoku mātuʻaki māvahevahe ʻi he lotolotonga ʻo e faʻahinga ʻo e tangatá. ʻOku tali ʻe he Kau Fakamoʻoni kotoa pē ʻa honau fatongia ke pouaki ʻa e fāʻūtahá ʻaki hono ʻai ʻenau tōʻongá ke fehoanaki mo e ngaahi tuʻunga Fakatohitapú.

Tohoakiʻi ʻe he Fāʻūtahá ʻa e Niʻihi Kehé

ʻOku faʻa langaʻi ʻe he fāʻūtaha ko ení ʻa e mahuʻingaʻia ʻa e faʻahinga tāutaha ʻa ia naʻe ʻikai ko e Kau Fakamoʻoní. Hangē ko ení, ko ʻIlaise, a ko ha tāupoʻou Katolika ia ki muʻa ʻi ha nofoʻanga tāupoʻou ʻi Siamane. Ko e hā naʻá ne tohoakiʻi ia ki he Kau Fakamoʻoni ʻa Sihová? Naʻe pehē ʻe ʻIlaise: “Ko e kakai lelei taha kinautolu kuo faifai ange peá u fetaulaki mo iá. ʻOku ʻikai te nau ʻalu ʻi he taú; ʻoku ʻikai te nau fai ha meʻa ke fakatupu maumau ki ha taha. ʻOku nau loto ke tokoniʻi ʻa e kakaí ke nau moʻui fiefia ʻi ha māmani palataisi ʻi he malumalu ʻo e Puleʻanga ʻo e ʻOtuá.”

Ko e fakatātā leva ʻe taha ko Kunitā, ʻa ia ko ha sōtia Siamane naʻe ʻave ki Falanisē lolotonga ʻa e tau hono ua ʻa māmaní. ʻI he ʻaho ʻe taha naʻe fai ai ʻe ha pātele Palotisani ha ouau fakalotu maʻá e kau sōtia ʻi he nofoʻanga sōtia ʻo Kunitaá. Naʻe lotu ʻa e pātelé ki ha ngaahi tāpuaki, maluʻi mo e ikuna. Hili ʻa e ouaú, naʻe vaheʻi ai ʻa Kunitā ki hono tuʻungá ko ha tokotaha leʻo. ʻI heʻene meʻa fakaʻatá, naʻá ne sio ai ki ha ngaahi kongakau ʻa e filí ʻi he tafaʻaki ʻe taha ʻo e malaʻe taú ʻoku nau toe kau ki ha ouau fakalotu naʻe fai ʻe ha pātele. Naʻe fakamatala ki mui ai ʻa Kunitā: “Ngalingali naʻe toe lotu ʻa e pātele ko iá ki ha ngaahi tāpuaki, maluʻi mo e ikuna. Naʻá ku fifili pe ʻoku malava fēfē ki he ngaahi siasi faka-Kalisitiané ke nau ʻi he ongo tafaʻaki fehangahangai ʻo e tau tatau.” Ko e ngaahi fakakaukau ko ení naʻe nōfoʻi ia ʻi he manatu ʻa Kunitaá. ʻI heʻene hoko ʻo fetuʻutaki ki mui mo e Kau Fakamoʻoni ʻa Sihová, ʻa ia ʻoku ʻikai te nau kau ʻi he taú, naʻe hoko ai ʻa Kunitā ko e konga ʻo ʻenau fetokouaʻaki ʻi māmani lahí.

Ko ʻĀsoka mo Fimá naʻá na kau ki ha lotu he Hahaké. Naʻe ʻi hona ʻapí ha feituʻu toputapu ki ha ʻotua. ʻI hono taaʻi ʻe ha puke lahi ʻa hona fāmilí, naʻá na toe sivisiviʻi ai ʻa ʻena lotú. ʻI he ngaahi fetalanoaʻaki mo e Kau Fakamoʻoni ʻa Sihová, naʻe ueʻi ʻa ʻĀsoka mo Fima ʻe he ngaahi akonaki ʻa e Tohi Tapú pea ʻi he ʻofa naʻe ʻi he lotolotonga ʻo e Kau Fakamoʻoní. ʻOkú na hoko he taimí ni ko e ongo malanga faivelenga ʻo e ongoongo lelei ʻo e Puleʻanga ʻo Sihová.

Ko ʻIlaise, Kunitā, ʻĀsoka mo Fimá ʻoku nau fāʻūtaha mo e laui miliona ʻo e Kau Fakamoʻoni ʻa Sihová ʻi ha fetokouaʻaki ʻi māmani lahi. ʻOku nau tui ki he talaʻofa ʻa e Tohi Tapú ʻo pehē ko e ngaahi meʻa tefito tatau ʻokú ne fakafāʻūtahaʻi kinautolu he ʻahó ni ʻi he lotú ʻe vavé ni ʻa ʻene fakafāʻūtahaʻi ʻa e faʻahinga talangofua kotoa ʻo e tangatá. ʻE ʻikai leva ke toe ʻi ai ha toe ngaahi fakamamahi, taʻefāʻūtaha, mo e māvahevahe ʻi he hingoa ʻo e lotú. ʻE fāʻūtaha ʻa e māmaní kotoa ʻi he lotu ki he ʻOtua moʻoni, ko Sihová.​—Fakahā 21:​4, 5.

[Fakamatala ʻi lalo]

[Fakatātā ʻi he peesi 4, 5]

Neongo ʻa e haʻu mei he ngaahi ʻātakai kehekehé, naʻe fāʻūtaha ʻa e muʻaki kau Kalisitiané