Founga ke Maluʻi Ai Hoʻo Fānaú Fakafou ʻi he Poto Fakaʻotuá

ʻOKU faitau hotau sinó he ʻaho kotoa pē. Kuo pau ke ne tauʻi ha ngaahi siemu, meʻamoʻui kainikavea mo e ngaahi vailasi lahi fakaʻulia. Ko e meʻa mālié, he ko e tokolahi taha ʻo kitautolú kuo tau maʻu tukufakaholo ha sisitemi maluʻi ʻokú ne maluʻi kitautolu mei he ngaahi ʻohofi peheé pea fakahaofi kitautolu mei hono maʻukovia ʻe he ngaahi mahaki pipihi lahi fau.

ʻI ha founga meimei tatau, kuo pau ke fakafepakiʻi ʻe he kau Kalisitiané ʻa e fakakaukau mo e ngaahi tuʻunga taʻefakatohitapú pea fakafepakiʻi ʻa e ngaahi tenge ʻe lava ke ne fakaʻauha ʻetau moʻui lelei fakalaumālié. (2 Kolinito 11:3) Koeʻuhi ke talitekeʻi ʻa e ʻohofi fakaʻaho ko ení mei hotau ʻatamaí mo e lotó, ʻoku fiemaʻu ke tau faʻu ʻa e ngaahi meʻa maluʻi fakalaumālié.

Ko e ngaahi meʻa maluʻi peheé ʻoku tautefito ʻa hono fiemaʻu ki heʻetau fānaú, koeʻuhi ʻoku ʻikai fanauʻi kinautolu mo e ngaahi meʻa maluʻi fakalaumālie ʻa ia ʻe lava ke ne fakafepakiʻi ʻa e laumālie ʻo e māmaní. (Efeso 2:2) ʻI he tupu hake ʻa e fānaú, ʻoku mātuʻaki mahuʻinga ke tokoniʻi kinautolu ʻe he ngaahi mātuʻá ke nau faʻu ʻa e ngaahi meʻa maluʻi pē ʻanautolu. ʻOku fakatuʻunga ʻi he hā ʻa e ngaahi meʻa maluʻi ko iá? ʻOku fakamatala ʻa e Tohi Tapú: “ʻOku foaki poto ʻe Sihova; . . . mo tauhi ʻa e hala o ʻene kau lotu.” (Palovepi 2:​6, 8) Ko e poto fakaʻotuá ʻe lava ke ne maluʻi ʻa e hala ʻo e toʻutupú, ʻa ia ka ʻikai ia, ʻe lava ke nau tōngofua ki he feohi fakatupu maumaú, tenge ʻa e toʻumeʻá, pe ko e fakafiefia ʻikai leleí. ʻE lava fēfē ke muimui ʻa e ngaahi mātuʻá ʻi he tataki ʻa Sihová pea fakahūhū ʻa e poto fakaʻotuá?

Kumi ki he Feohi Fakatupu Langa Haké

ʻOku mahinongofua, ʻoku saiʻia ʻa e kau taʻu hongofulu tupú ʻi he feohi mo e kau taʻu hongofulu tupu kehé, ka ko e feohi ʻataʻatā pē mo e faʻahinga taʻetaukei kehé ʻe ʻikai pouaki ai ʻa e poto fakaʻotuá. “ʻOku tāvani ʻa e vale ʻi he loto ʻo ha tamasiʻi,” ko e fakatokanga ia ʻa e palōvēpí. (Palovepi 22:15) Kuo anga-fēfē leva ʻa e tokoniʻi ʻe he ngaahi mātuʻa ʻe niʻihi ʻenau fānaú ke nau ngāueʻaki ʻa e poto fakaʻotuá ʻi he meʻa ko eni fekauʻaki mo e feohí?

Naʻe pehē ʻe ha tamai ko Toni a: “ʻOku fakamoleki ʻe heʻema tamaiki tangatá ʻa e taimi lahi  mo e ngaahi kaumeʻa ʻi honau toʻú, ka ko e lahi taha ʻo e taimi ko iá naʻe fakamoleki ia ʻi homau ʻapí, ʻi heʻema ʻi aí. Naʻá ma fakafaingamālieʻi maʻu pē ʻa ʻapi ʻa ia naʻe fonu maʻu pē ia ʻi he toʻutupú, ʻa ia naʻá ma fafanga pea ʻai ke nau ongoʻi ʻoku talitali lelei kinautolu. Naʻá ma fiefia ke kātakiʻi ʻa e longoaʻa mo e vātau ʻi homa falé koeʻuhi pē ke fakafaingamālieʻi ai ha ʻātakai malu ʻa ia naʻe lava ke fiefia ai ʻa ʻema fānaú.”

Ko Palaieni mo Melé ʻoku toko tolu ʻena fānaú ka ʻokú na fakahaaʻi tauʻatāina ko hono akoʻi kinautolú ʻoku ʻikai maʻu pē ke faingofua. Naʻá na fakamatala: “ʻI heʻemau fakatahaʻangá, naʻe tokosiʻi ai ʻa e toʻutupu ʻi honau taʻu hongofulu tupu lahí ke feohi mo ʻema taʻahine ko Sēiní. Kae kehe, naʻe ʻi ai hono kaumeʻa ʻe taha ko Sūsana, ʻa ia ko ha tokotaha kei siʻi anga-fakakaumeʻa mo fiefia. Neongo ia, ko ʻene ongo mātuʻá naʻe ʻikai te na fuʻu fefeka ʻo hangē ko kimauá. Naʻe fakaʻatā ʻa Sūsana ke ʻeva fuoloa ange he poʻulí ʻia Sēini, tui ʻa e fanga kiʻi piva nounou ange, fanongo ki he fasi ala fehuʻiá, pea sio ʻi he ngaahi faiva taʻefeʻungá. ʻI ha taimi fuoloa, naʻe faingataʻa kia Sēini ke ne mahinoʻi ʻa e anga ʻo ʻema fakakaukaú. Kiate ia, ne hā ngali maʻu lahi ange ʻa e mahinó ʻe he ongo mātuʻa ʻa Sūsaná, lolotonga iá naʻá ne vakai kia kimaua ʻokú ma fuʻu fefeka. Ko e taimi ko ē naʻe hoko ai ʻa e faingataʻa kia Sūsaná naʻe toki ʻiloʻi ai ʻe Sēini naʻe hoko ʻo maluʻi ia ʻe heʻema tuʻumaʻú. ʻOkú ma fiefia ʻaupito ʻi he ʻikai vaivai ʻema tuʻu ki he meʻa naʻá ma tui naʻe totonu ki heʻema taʻahiné.”

ʻI he hangē ko Sēiní, kuo ʻiloʻi ʻe he toʻutupu tokolahi ʻa e fakapotopoto ʻo e kumi ki he tataki ʻa ʻenau ongo mātuʻá ʻi he meʻa ko eni fekauʻaki mo e feohí. “Ko e telinga ʻoku tali ʻa e valoki fakamoʻui te ne ʻapitanga ʻi he lotolotonga ʻo e kau poto,” ko e lau ia ʻa e palōvēpí. (Palovepi 15:31) Ko e poto fakaʻotuá ʻoku tataki ai ʻa e toʻutupú ke nau kumi ke feohi mo e ngaahi kaumeʻa fakatupu langa haké.

Fekuki mo e Tenge ke Fakatataú

ʻOku felāveʻi ofi ʻa e feohí mo e tenge ʻa e toʻumeʻá. ʻI he ʻaho ki he ʻaho, ʻoku ʻohofi ai ʻe he tenge ke fakatataú ʻa e ngaahi meʻa maluʻi ʻa ʻetau fānaú. Koeʻuhi ʻoku faʻa kumi ʻa e kau talavoú ki he leleiʻia ʻa e faʻahinga ʻi honau toʻú, ʻe lava ke fakafuo kinautolu ʻe he tenge ʻa e toʻumeʻá ki he meʻa ʻoku vakai ki ai ʻa e māmaní ʻoku manakoá.​—Palovepi 29:25.

ʻOku fakamanatu mai ʻe he Tohi Tapú “ʻoku fakaʻaʻau ke mole ʻa mamani mo ʻene holi aʻana.” (1 Sione 2:17) Ko ia ai, ʻoku ʻikai totonu ke fakaʻatā ʻe he ngaahi mātuʻá ʻenau fānaú ke tākiekina tōtuʻa ʻe he ngaahi fakakaukau ʻa e māmaní. ʻE lava fēfē ke nau tokoniʻi ʻenau fānaú ke fakakaukau ʻi ha founga faka-Kalisitiane?

“ʻOku loto maʻu pē ʻa hoku ʻofefiné ke tui ʻa e meʻa ʻoku tui ʻe he toʻutupu kehé,” ko e lau ia ʻa Lisiaté. “Ko ia ai, ʻokú ma fakaʻuhinga anga-kātaki mo ia ki he ngaahi ʻaonga mo e taʻeʻaonga ʻo e fiemaʻu taki taha. Naʻa mo e ngaahi sīpinga ko ia naʻá ma fakakaukau naʻe ala talí, naʻá ma muimui ki he akonaki naʻá ma fanongo ai ʻi he ngaahi taʻu kuohilí, ‘Ko e tokotaha potó ia ʻoku ʻikai muʻomuʻa ke ngāueʻaki ha sīpinga foʻou pe ko e muimui tahá ke liʻaki iá.’”

Ko ha faʻē ko Pauline naʻá ne fakafepakiʻi ʻa e tenge ʻa e toʻumeʻá ʻi ha toe founga ʻe taha. ʻOkú ne manatu: “Naʻá ku mahuʻingaʻia ʻi he ngaahi meʻa ʻoku mahuʻingaʻia ai ʻeku fānaú pea ʻalu maʻu pē ki honau lokí ke talanoa kia kinautolu. Ko e ngaahi fetalanoaʻaki  lōloa ko ení naʻá ku malava ai ke fakafuo ʻenau fakakaukaú pea tokoniʻi kinautolu ke nau fakakaukau ki ha toe ngaahi founga kehe ʻo e vakai ki he ngaahi meʻá.”

ʻE ʻikai tuku ʻa e tenge mei he toʻumeʻá, ko ia ʻoku ngalingali ʻe fehangahangai ʻa e ngaahi mātuʻá mo ha fāinga tuʻumaʻu ke ‘holoki ʻa e ngaahi fakakaukau fakamāmaní’ pea tokoniʻi ʻenau fānaú ke ʻomai ʻenau fakakaukaú ʻo ‘taki popula ke Fakavaivai kia Kalaisi.’ (2 Kolinito 10:5) Ka ʻi he “fakakukafi i he lotu,” ʻe fakatou fakaivimālohiʻi ai ʻa e ongo mātuʻá mo e fānaú ke fakakakato ʻa e ngāue mātuʻaki mahuʻinga ko ení.—Loma 12:​12, PM; Sāme 65:2.

Ko e Manakoa Mālohi ʻo e Fakafiefiá

Ko ha tākiekina hono tolu ʻe ʻiloʻi nai ʻe he ngaahi mātuʻá ʻoku faingataʻa ke fekuki mo iá ko e fakafiefiá. ʻOku fakanatula pē ʻa e manako ʻa e fānau īkí ke vaʻingá. Ko e fānau taʻumotuʻa ange tokolahi ʻoku nau toe vēkeveke ʻi he kumi ki he fakafiefiá. (2 Timote 2:​22) Ka ʻo kapau ʻe fakalato ia ʻi ha founga taʻefakapotopoto, ʻe lava ke fakavaivaiʻi ʻe he holí ni ʻenau ngaahi meʻa maluʻi fakalaumālié. ʻOku haʻu tefito ʻa e fakatuʻutāmakí ʻi he founga ʻe ua.

ʻUluakí, ʻoku tapua mai ʻi he fakafiefia lahi ʻa e ngaahi tuʻunga ololalo fakaeʻulungāanga ʻo e māmaní. (Efeso 4:​17-​19) Neongo ia, ʻoku fakahoko anga-maheni ia ʻi ha founga fakalotomāfana mo fakamānako. ʻOku ʻomai ʻe he meʻá ni ha fakatuʻutāmaki moʻoni ki he toʻutupú, ʻa ia ʻoku ʻikai nai te nau ʻiloʻi ʻa e ngaahi tōʻangá.

Ko hono uá, ko e lahi ʻo e taimi ʻoku fakamoleki ʻi he fakafiefiá ʻe toe lava ke ne fakatupunga ʻa e ngaahi palopalema. Ki he niʻihi, ko e maʻu ʻa e fiefiá ʻoku hoko ia ko e meʻa mahuʻinga taha ʻi he moʻuí, ʻo fakamoleki ai ʻa e taimi mo e ivi lahi fau. ʻOku fakatokanga mai ʻa e palōvēpí ko e “kai honi lahi ʻoku ʻikai lelei.” (Palovepi 25:27) ʻI he founga tatau, ko e fakafiefia ʻo fuʻu hulú ʻe fakasiʻisiʻi ai ʻa e holi ki he meʻakai fakalaumālié pea iku atu ai ki he fakapikopiko fakaʻatamai. (Palovepi 21:17; 24:​30-​34) Ko e fiefia ki he kakato taha ʻi he māmani ko ení te ne taʻofi ʻa e toʻutupú mei he “puke ki he moʻui moʻoni”—ko e moʻui taʻengata ʻi he māmani foʻou ʻa e ʻOtuá. (1 Timote 6:​12, 19) Kuo anga-fēfē ʻa e fekuki ʻa e ngaahi mātuʻá mo e polé?

Ko Meli Kāmení, ko ha faʻē ia ʻa e tamaiki fefine ʻe toko tolu, naʻá ne pehē: “Naʻá ma loto ke maʻu ʻe heʻema tamaiki fefiné ʻa e fakafiefia leleí pea ke nau fiefia. Ko ia ai, naʻa mau faʻa ō ʻo ʻeva fakafāmili, pea naʻa nau toe fakamoleki ʻa e taimi mo e ngaahi kaumeʻa ʻi he fakatahaʻangá. Ka naʻa mau tauhi ʻa e fakafiefiá ʻi hono tuʻungá. Naʻa mau fakatatau ia ki he hikingaua ʻi he ʻosi ʻo ha kai—ʻo melie ka ʻoku ʻikai ko e meʻakai tefitó ia. Naʻa nau ako ke hoko ko e kau ngāue ʻi ʻapi, ʻi he ʻapiakó, pea ʻi he fakatahaʻangá.”

Ko Toni mo Luté naʻe ʻikai te na tuku ke toki hokonoa mai pē ʻa e fakafiefiá. “Naʻá ma ʻai ko ha tōʻonga ia ʻa hono vaheʻi ʻa e Tokonakí ko ha ‘ʻaho fakafāmili,’” ko ʻena fakamatalá ia. “Naʻa mau kau fakataha ai ʻi he malaʻe fakafaifekaú ʻi he pongipongí, ʻalu ʻo kaukau tahi ʻi he efiafí, pea maʻu ha kai makehe ʻi he efiafi poʻulí.”

Ko e fakamatala ʻa e ngaahi mātuʻa ko ení ʻoku fakahaaʻi ai ʻa e mahuʻinga ʻo e mafamafatatau ʻi hono tokonaki ha fakafiefia lelei pea mo hono vaheʻi ia ki hono tuʻunga totonu ʻi he moʻui ʻa ha Kalisitiané.​—Koheleti 3:4; Filipai 4:5.

Falala kia Sihova

Ko e moʻoni, ko e ngaahi meʻa maluʻi fakalaumālié, ʻoku fiemaʻu ke fakatupulekina ia ʻi he ngaahi taʻu lahi. ʻOku ʻikai ha faitoʻo fakaemana te ne ʻomai ʻa e poto fakaʻotuá mo ueʻi ʻa e fānaú ke nau falala ki heʻenau Tamai fakahēvaní. ʻI hono kehé, kuo pau ki he ongo mātuʻá ke “hanganaki tauhi hake kinautolu ʻi he akonaki mo e fakatonutonu-fakaʻatamai ʻa Sihová.” (Efeso 6:​4, NW) Ko e “fakatonutonu-fakaʻatamai” hokohoko ko ení ʻoku ʻuhinga iá ko hono tokoniʻi ʻa e fānaú ke nau vakai ki he ngaahi meʻá ʻi he anga ʻo e vakai ʻa e ʻOtuá. ʻE lava fēfē ke fakahoko ia ʻe he ngaahi mātuʻá?

 Ko ha kī ki he lavameʻá ko ha ako Tohi Tapu fakafāmili tuʻumaʻu. Ko e akó ʻoku ‘fakaʻa ai ʻa e mata ʻo e fānaú ke nau sio meʻa fakaofo ʻi he lao ʻa e ʻOtuá.’ (Sāme 119:18) Naʻe tokanga mātuʻaki fakamātoato ʻa Tieko ki he ako fakafāmilí peá ne tokoniʻi ai ʻene fānaú ke nau ʻunuʻunu ofi ange ai kia Sihova. “Naʻá ku teuteu fakaʻāuliliki ki he akó,” ko ʻene laú ia. “ʻI hono fai ʻa e fekumi ʻi he ʻū tohi Fakatohitapú, naʻá ku ako ai ke ʻai ke hoko ʻo moʻoni ʻa e faʻahinga ʻi he Tohi Tapú. Naʻá ku fakalototoʻaʻi ʻa e fānaú ke nau kumi ki ha ngaahi tuʻunga meimei tatau ʻi heʻenau moʻuí pea mo e faʻahinga faitōnungá. Naʻe ʻoange ʻe he meʻá ni ki heʻeku fānaú ha fakamanatu maeʻeeʻa lelei ki he meʻa ʻoku leleiʻia ai ʻa Sihová.”

ʻOku toe ako ʻa e fānaú ʻi he ngaahi founga ʻikai anga-maheni. Naʻe ekinaki ʻa Mōsese ki he ngaahi mātuʻá ke nau lea fekauʻaki mo e ngaahi fakamanatu ʻa Sihová ‘ʻi heʻenau nofo ʻi honau falé, pea ʻi heʻenau ʻalu ʻi he halá, pea ʻi heʻenau tokoto hifó, pea ʻi heʻenau tuʻu haké.’ (Teutalonome 6:7) Naʻe fakamatala ha tamai ʻe taha: “ʻOku fiemaʻu ʻe hoku fohá ha taimi ke fakaava mai ai hono lotó ʻo fakahaaʻi ʻene ngaahi ongoʻí. ʻI heʻema luelue ʻo ʻeva pe fai fakataha ha ngāué, ʻoku faifai pē ʻo ne fakahaaʻi tauʻatāina mai ai ʻene fakakaukaú. ʻI he ngaahi taimi ko ení, ʻokú ma talanoa lelei ai pea ʻoku fakatou ʻaonga ia kia kimaua.”

Ko e ngaahi lotu ʻoku leaʻaki ʻe he ngaahi mātuʻá ʻokú ne toe ʻai ke maongo loloto ki heʻenau fānaú. Ke fanongo ki he fakaofiofi anga-fakatōkilalo ʻenau ongo mātuʻá ki he ʻOtuá ke kole ʻene tokoní mo e fakamolemolé ʻoku ueʻi ai ʻa e fānaú ke nau “tui ʻoku ʻi ai ia.” (Hepelu 11:6) Ko e ngaahi mātuʻa lavameʻa tokolahi ʻoku nau fakamamafaʻi ʻa e mahuʻinga ʻo e ngaahi lotu fakafāmilí, ʻo kau ʻi he lotolotonga ʻo iá ʻa e ngaahi lotu ʻoku fakakau ai ʻa e ngaahi meʻa fakaakó mo e ngaahi meʻa kehe ʻokú ne fakahohaʻasi ʻenau fānaú. Naʻe pehē ʻe ha tamai ʻe taha ʻoku lotu maʻu pē ʻa hono uaifí mo e fānaú ki muʻa ke nau mavahe ki he akó.​—Sāme 62:8; 112:7.

“Ka ʻOua Naʻa Ta Fiu ʻi he Failelei”

ʻOku fai ʻe he ngaahi mātuʻa kotoa pē ʻa e ngaahi fehālaaki pea nau fakaʻiseʻisa nai ʻi he founga ʻo ʻenau fakahoko ʻa e ngaahi tuʻunga ʻe niʻihi. Ka neongo ia, ʻoku ekinaki ʻa e Tohi Tapú kia kitautolu ke tau hanganaki feinga, ke ʻoua ʻe “fiu ʻi he failelei”—Kaletia 6:9.

Kae kehe, ʻe ongoʻi foʻi nai ʻa e ngaahi mātuʻá, ʻi he ngaahi taimi ko ia ʻoku ʻikai pē lava ai ke nau mahinoʻi ʻenau fānaú. ʻE faingofua ange ke fakaʻosiʻaki ko e toʻutangata iiki angé ʻoku nau kehe mo faingataʻa. Ka, ko e moʻoni, ko e fānau ʻi he ʻaho ní ʻoku nau maʻu ʻa e ngaahi vaivaiʻanga tatau mo ia naʻe maʻu ʻe he ngaahi toʻutangata ki muʻá, pea ʻoku nau fehangahangai mo e ngaahi ʻahiʻahi meimei tatau, neongo ko e tenge ke faihalá ʻoku toe fakautuutu nai ia. Ko ia ai, ko e tamai ʻe taha, hili ʻene fakatonutonu ʻa hono fohá, naʻá ne fakamoluuʻi ʻa ʻene ngaahi leá ʻaki ʻene tānaki anga-ʻofa atu ki ai: “ʻOku fiefai pē ʻe ho lotó ʻa e meʻa naʻe fiefai ʻe hoku lotó ʻi he taimi naʻá ku ʻi ho taʻú aí.”  ʻOku ʻikai nai ke ʻilo lahi ʻa e ngaahi mātuʻá fekauʻaki mo e ngaahi komipiutá, ka ʻoku nau ʻiloʻi ʻa e meʻa kotoa fekauʻaki mo e ngaahi hehema ʻa e kakano taʻehaohaoá.​—Mātiu 26:41; 2 Kolinito 2:​11.

Mahalo pē ʻoku siʻi hono fakahāhā ʻe he fānau ʻe niʻihi ʻa e loto-māfana ki he tataki ʻenau ngaahi mātuʻá pea aʻu ʻo angatuʻu ki he akonaki ʻoku nau maʻú. Kae kehe, ʻoku toe fiemaʻu heni ʻa e kātakí. Neongo ʻa e muʻaki toumouá pe ngaahi vahaʻa taimi ʻo e fakafepakí, ʻoku iku pē ʻo tali ʻe he fānau tokolahi. (Palovepi 22:6; 23:​22-​25) Ko Mātiú ko ha Kalisitiane kei siʻi ia ʻoku lolotonga ngāue ʻi ha ʻōfisi vaʻa ʻo e Kau Fakamoʻoni ʻa Sihová naʻá ne fakamatala: “ʻI heʻeku taʻu hongofulu tupú, naʻá ku ongoʻi naʻe taʻetotonu ʻa e ngaahi fakangatangata ʻa ʻeku ongo mātuʻá. He ko ē, naʻá ku fakaʻuhinga, kapau ʻoku fakaʻatā ʻe he ngaahi mātuʻa ʻa hoku ngaahi kaumeʻá ha meʻa, ko e hā ʻoku ʻikai lava ai ʻe haʻakú ongo mātuʻa? Pea naʻá ku hoko ai ʻo ʻita moʻoni ʻi heʻena tauteaʻi au he taimi ʻe niʻihi, ʻi he ʻikai fakaʻatā au ke u ʻalu ʻo ʻaloʻalo pōpaó—ʻa e meʻa naʻá ku manako ai. Kae kehe, ʻi he sio atu ki aí, ʻoku ou ʻiloʻi ko e akonaki naʻe fai mai ʻe heʻeku ongo mātuʻá naʻe fakatou ʻaonga mo fiemaʻu. ʻOku ou houngaʻia ʻi heʻena ʻomai ʻa e tataki naʻá ku fiemaʻú ʻi he taimi naʻá ku fiemaʻu ai iá.”

ʻOku ʻikai ha veiveiua fekauʻaki mo ia—neongo ʻe ʻi ha ʻātakai fakalaumālie ʻikai lelei nai ʻa ʻetau fānaú ʻi he taimi ʻe niʻihi, te nau lava pē ʻo tupu hake ʻo hoko ko ha kau Kalisitiane lelei. Hangē ko ia ʻoku talaʻofa mai ʻe he Tohi Tapú, ko e poto fakaʻotuá ʻe lava ke ne ʻoange kia kinautolu ʻa e ngaahi meʻa maluʻi fakalaumālie. “He hu ʻa e poto ki ho loto, pea felatani ʻa e ʻilo mo ho laumalie; ʻe fai ho fakalekesi ʻe Fakakaukau, ʻe leʻohi koe ʻe Fakahinohino. Kae fakahaofi koe mei he hala kovi.”—Palovepi 2:​10-12.

Ko hono fua ʻo ha kiʻi tama ʻi manava feʻunga mo e māhina ʻe hivá ʻoku ʻikai ko ha ngāue faingofua. Pea ko e taʻu ʻe 20 hoko atu aí ʻe ʻomai nai ai ʻa e mamahi fakataha mo e fiefia. Ka koeʻuhi ʻokú na ʻofa ʻi heʻena fānaú, ʻoku feinga ʻaki ʻe he ongo mātuʻa Kalisitiané ʻa e mālohi tahá ke maluʻi kinautolu ʻaki ʻa e poto fakaʻotuá. ʻOkú na ongoʻi fekauʻaki mo ʻena fānaú ʻo hangē ko e ongoʻi ʻa e ʻapositolo taʻumotuʻa ko Sioné fekauʻaki mo ʻene fānau fakalaumālié: “ʻOku ʻikai haʻaku toe fiefia ʻoku lahi ʻi he meʻa ni, ʻa ʻeku fanongo ki heʻeku fanau, ʻoku nau laka ʻi he moʻoni.”—3 Sione 4.

[Fakamatala ʻi lalo]

[Fakatātā ʻi he peesi 24]

“Naʻá ma fakafaingamālieʻi maʻu pē ʻa ʻapi ʻa ia naʻe fonu maʻu pē ia ʻi he toʻutupú”

[Fakatātā ʻi he peesi 25]

Mahuʻingaʻia ʻi he ngaahi meʻa ʻoku mahuʻingaʻia ai ʻa hoʻo fānaú

[Fakatātā ʻi he peesi 26]

“Naʻá ku teuteu fakaʻāuliliki ki he akó”