ʻE Lava Ke Ke Puleʻi Ho Ikuʻangá?

ʻOKU ʻosi tomuʻa fakapapauʻi ʻa hotau ikuʻanga fakaʻosí? ʻOku ʻi ai ha kaunga ʻo e ngaahi fili ʻoku tau fai ʻi he moʻuí ki hotau kahaʻú?

Tau pehē pē ko e tangatá ko e pule ia ki hono tufakangá tonu. ʻI he tuʻunga ko ení, ʻe lava ke tomuʻa fokotuʻu ha faʻahinga tokotaha pē ke ne fakahoko ha ngāue pau pe maʻu ha lakanga pau? Pea ʻe lava fēfē ke fakahoko ʻe he ʻOtuá ʻa hono finangalo ki he māmaní kapau ʻoku tauʻatāina ʻa e faʻahinga ʻo e tangatá ke nau puleʻi ʻa honau ikuʻangá tonu? ʻOku ʻomai ʻe he Tohi Tapú ʻa e ngaahi tali fakafiemālie ki he ongo fehuʻi ko ení.

Tomuʻa Fakapapauʻi ʻa e Tufakangá mo e Fili Tauʻatāiná​—Fakatou Tonu?

Fakakaukau angé ki he founga naʻe ngaohi ai kitautolu ʻe Sihova ko e ʻOtuá. “I he imisi ʻo e ʻOtua naʻa ne fakatupu [ʻa e tangatá]; naʻa ne fakatupu ʻakinaua ko e tangata mo e fefine.” (Senesi 1:27) ʻI hono ngaohi ʻi he tatau ʻo e ʻOtuá, ʻoku tau maʻu ai ʻa e malava ke tapua atu ʻa hono ngaahi ʻulungāangá, hangē ko e ʻofá, fakamaau totonú, potó mo e mālohí. Kuo toe ʻomai ʻe he ʻOtuá kia kitautolu ʻa e meʻaʻofa ko e fili tauʻatāiná, pe tauʻatāina ke filí. ʻOku ʻai kitautolu ʻe he meʻá ni ke tau kehe ʻi he haʻohaʻonga ʻo ʻene fakatupu fakaemāmaní. ʻE lava ke tau fili pe te tau muimui ki he tataki fakaeʻulungāanga ʻa e ʻOtuá pe ʻikai. Ko e ʻuhinga ia naʻe lava ai ʻe he palōfita ko Mōsesé ke ne pehē: “ʻOku ou ui ni ki langi mo mamani ke hopo he ʻaho ni mo kimoutolu, ke fakamoʻoni kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako, ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia.”—Teutalonome 30:​19, 20.

Ko ia ai, ko e meʻaʻofa ʻo e tauʻatāina ke filí, ʻoku  ʻikai ʻuhinga iá ko e tauʻatāina fakaʻaufuli. ʻOku ʻikai te ne fakaʻatā kitautolu mei he ngaahi lao fakamatelie mo fakaeʻulungāanga naʻe faʻu ʻe he ʻOtuá ki he tuʻumaʻu mo e nonga ʻa e ʻunivēsí. Naʻe fokotuʻu ʻa e ngaahi laó ni ki heʻetau lelei, pea ko hano maumauʻi pē ʻe lava ke iku ia ki he ngaahi nunuʻa mafatukituki. Fakakaukau atu pē ki he meʻa ʻe hokó kapau naʻa tau fili ke tukunoaʻi ʻa e lao ʻo e kalāvité pea puna mei ha ʻato ʻo ha fale māʻolunga!​—Kaletia 6:7.

Ko e tauʻatāina ke filí ʻokú ne toe haʻi kitautolu ʻaki ha fakangatangata ʻa ia ʻoku ʻikai ke maʻu ʻe he ngaahi meʻa fakatupu ʻoku ʻikai te nau maʻu ʻa e tauʻatāina ko iá. Ko e faʻu-tohi ko Corliss Lamont ʻokú ne ʻeke: “ʻE lava fēfē ke tau taku ʻa e fatongia fakaʻēfiká ki he tangatá, pea tauteaʻi kinautolu ki he faihalá, kapau ʻoku tau tali . . . ko ʻenau ngaahi filí mo e ngaahi ngāué ʻoku ʻosi tomuʻa fakapapauʻi?” Ko e moʻoni, ʻe ʻikai te tau lava. Ko e fanga monumanú ʻoku tataki ʻe he ongoʻi fakanatulá ʻoku ʻikai hanau fatongia fakaeʻulungāanga ki he meʻa ʻoku nau faí, ʻo hangē ia ko e ʻikai vakai ʻoku moʻua ʻa e ngaahi komipiutá ki he ngaahi ngāue ʻoku fakapolokalamaʻi ke nau fakahokó. Ko e tauʻatāina leva ke filí, ʻokú ne hilifaki mai kia kitautolu ha fatongia mamafa pea ʻai kitautolu ke tau fai ha fakamatala ki heʻetau ngaahi ngāué.

He taʻeʻofa mo taʻefaitotonu ē ko Sihova ko e ʻOtuá kapau naʻá ne ʻosi tomuʻa fakapapauʻi ʻi he ki muʻa ke fanauʻi kitautolú ʻa e ʻalunga te tau fou aí pea toki tuku leva ke tau fai ha fakamatala ki heʻetau ngaahi ngāué! ʻOku ʻikai te ne fai eni, he “ko e ʻOtua ko e ʻOfa,” pea “ko ʻene ngaahi founga kotoa ʻoku fakakonisitutone.” (1 Sione 4:8; Teutalonome 32:4) ʻI hono ʻomai kia kitautolu ʻa e tauʻatāina ke filí, naʻe ʻikai te ne ‘fakapapauʻi ai mei ʻitāniti ʻa ia te ne fakahaofí mo ia te ne fakamalaʻiaʻí’ ʻi he taimi tatau, ʻo hangē ko ia ʻoku fakapapauʻi ʻe he kau tui ki he tomuʻa fakapapauʻi ʻa e tufakangá. Ko e tauʻatāina ke filí ʻoku ʻikai kau ai ʻa e tomuʻa fakapapauʻi ʻa e tufakangá.

ʻOku fakahaaʻi mahino ʻe he Tohi Tapú ko e ngaahi fili ʻoku tau faí te ne liliu ʻa hotau ikuʻangá. Ko e fakatātaá, ʻoku kōlenga ʻa e ʻOtuá ki he kau faihalá, ʻo pehē: “Mou tafoki muʻa taki taha mei hono ʻalunga kovi, pea mei he kovi ʻo hoʻomou ngaahi faianga, . . . ʻo ʻoua naʻa ku fai ha kovi kiate kimoutolu.” (Selemaia 25:​5, 6) Ko e kōlenga ko ení ʻe taʻeʻuhinga ia kapau kuo ʻosi fakapapauʻi ʻe he ʻOtuá ʻa e ikuʻanga ʻo e tokotaha taki taha. ʻIkai ngata aí, ʻoku fakahaaʻi ʻe he Folofola ʻa e ʻOtuá: “Ko ia mou fei mo fakatomala, pea tafoki, koeʻuhi ke tamateʻi hoʻomou ngaahi angahala; kae toki hoko mei he fofonga ʻo e ʻEiki ʻa e ngaahi kuonga fakamānava hake.” (Ngāue 3:19) Ko e hā ʻe kole ai ʻa Sihova ki he kakaí ke nau fakatomala pea tafoki kapau naʻá ne tomuʻa ʻafioʻi ʻe ʻikai lava ke nau fai ha meʻa ʻe taha ke liliu ʻa honau ikuʻangá?

ʻOku lau ʻa e Tohi Tapú fekauʻaki mo e niʻihi ʻoku fakaafeʻi ʻe he ʻOtuá ke nau pule ko e ngaahi  tuʻi ʻi hēvani fakataha mo Sīsū Kalaisi. (Mātiu 22:14; Luke 12:32) Kae kehe, ʻoku pehē ʻe he Tohi Tapú ʻe mole ʻa e monū ko iá kapau ʻe ʻikai te nau kātaki ʻo aʻu ki he ngataʻangá. (Fakahā 2:​10) Ko e hā ʻe fakaafeʻi ai kinautolu ʻe he ʻOtuá kapau kuó ne ʻosi fakapapauʻi ʻe ʻikai ke fili kinautolu? Toe fakakaukau foki ki he ngaahi lea ʻa e ʻapositolo ko Paulá ki hono ngaahi kaungātuí. Naʻá ne tohi: “Kapau ʻoku tau angahala fie angahala hili ʻetau ʻilo kanokano ki he moʻoni, ʻoku ʻikai kei toe ha feilaulau koeʻuhi ko e angahala.” (Hepelu 10:26) ʻE taʻeʻaonga ha fakatokanga pehē kapau naʻe ʻosi tomuʻa fokotuʻu ʻe he ʻOtuá honau ikuʻangá. Kae ʻikai kuo ʻosi tomuʻa fokotuʻu ʻe he ʻOtuá ha faʻahinga tāutaha ke nau hoko ko e kau pule fakataha mo Sīsū Kalaisi?

Tomuʻa Fokotuʻu—Faʻahinga Tāutaha pe ko ha Kulupu?

“[Ko e ʻOtuá] naʻa ne fai hotau tapuekina ʻia Kalaisi, ke tau anuanu ʻi he ngaahi tapuaki kehekehe mei he Laumalie ʻi he ngaahi feituʻu ʻo langi,” ko e tohi ia ʻa e ʻapositolo ko Paulá, “ʻo fakatatau ki heʻene fili naʻe fai maʻana ʻi he teʻeki ke tanupou ʻa mamani, . . . ʻo ne toka tuʻutuʻuni [pe tomuʻa fokotuʻu] kitautolu ke ohi ʻia Sisu Kalaisi ki he ʻEne ʻAfio.” (Efeso 1:​3-5) Ko e hā kuo tomuʻa fokotuʻu ʻe he ʻOtuá, pea ko e hā ʻa e ʻuhinga ʻo e hoko ʻo fili “ʻi he teʻeki ke tanupou ʻa mamani”?

ʻOku fakahaaʻi ʻi he kupu ko ení kuo fili ʻe he ʻOtuá ʻa e ngaahi hako ʻo e ʻuluaki tangata, ko ʻĀtamá, ke nau pule fakataha mo Kalaisi ʻi hēvani. (Loma 8:​14-​17, 28-​30; Fakahā 5:​9, 10) Kae kehe, ko e fakamahalo ko ia naʻe tomuʻa fokotuʻu ʻe Sihova ko e ʻOtuá ʻi he laui afeʻi taʻu ki muʻa ke fanauʻi kinautolú ʻa e faʻahinga pau ke nau tali ʻa e monū ko ení ʻoku fepaki ia mo e moʻoniʻi meʻa ko ia ʻo hono foaki ki he tangatá ʻa e tauʻatāina ke filí. Ko e meʻa naʻe tomuʻa fokotuʻu ʻe he ʻOtuá ko ha kulupu, pe kalasi ʻo e kakaí, ʻo ʻikai ko e faʻahinga tāutaha.

Ke fakatātaaʻi: Tau pehē ʻoku fili ha puleʻanga ke fokotuʻu ha kautaha tefito. ʻOkú ne tomuʻa fakapapauʻi ʻa e ngaahi ngāue ʻa e kautahá, ko hono mafaí pea mo hono lahí. ʻOku iku ʻo kamata ngāue ʻa e kautahá ʻi ha taimi hili hono fokotuʻú, pea ʻoku ʻoatu ʻe hono kau mēmipá ha fakamatala ʻo pehē: “Naʻe fakapapauʻi ʻe he puleʻangá ʻi ha ngaahi taʻu ʻi he kuohilí ʻa ʻemau ngāue ʻe faí. ʻOku mau kamata he taimí ni ʻa e ngāue naʻe vaheʻi mai kia kimautolú.” Te ke fakaʻosiʻaki kuo pau naʻe tomuʻa fakapapauʻi ʻe he puleʻangá ʻi he ngaahi taʻu ki muʻa angé ʻa e kau mēmipa tāutaha ʻo e kautaha ko iá? ʻIkai ʻaupito. ʻI he tuʻunga meimei tatau, naʻe tomuʻa fakapapauʻi ʻe Sihova te ne fokotuʻu ha kautaha makehe ke ne fakaleleiʻi ʻa e ngaahi nunuʻa ʻo e angahala ʻa ʻĀtamá. Naʻá ne tomuʻa fokotuʻu ʻa e kalasi ʻo e kakai te nau ngāue ʻi he kautaha ko iá—kae ʻikai ko e faʻahinga tāutahá. ʻE fili kinautolu ʻamui, pea ko e ngaahi fili te nau fai ʻi he moʻuí ʻe ʻi ai hono kaunga pe ʻe iku ʻo tali kinautolu pe ʻikai.

Ko e hā ʻa e māmani naʻe ʻi he fakakaukau ʻa e ʻapositolo ko Paulá ʻi heʻene pehē: “[Ko e ʻOtuá] heʻene fili naʻe fai maʻana ʻi he teʻeki ke tanupou ʻa mamani, ʻa e fili kitautolu”? Ko e māmani naʻe ʻuhinga ki ai heni ʻa Paulá ʻoku ʻikai ko e māmani ia naʻe kamataʻi ʻe he ʻOtuá ʻi heʻene fakatupu ʻa ʻĀtama mo ʻIví. Ko e māmani ia ko iá naʻe “lelei ʻaupito”—ʻo ʻatā fakaʻaufuli mei he angahalá mo e fakameleʻí. (Senesi 1:31) Naʻe ʻikai ke fiemaʻu ai ha “fakamolemole [pe fakatauʻatāina]” mei he angahalá.—Efeso 1:7.

Ko e māmani tefito naʻe ʻuhinga ki ai ʻa Paulá ʻa e māmani ko ia naʻe ʻi ai hili ʻa e angatuʻu ʻa ʻĀtama mo ʻIvi ʻi ʻĪtení—ko ha māmani ʻoku mātuʻaki kehe mei he māmani naʻe muʻaki fakataumuʻa ki ai ʻa e ʻOtuá. Ko e māmani ia naʻe kamata ʻi he fānau ʻa ʻĀtama mo ʻIví. Naʻe faʻuʻaki ʻa e māmani ko iá ʻa e kakai naʻe mavahe mei he ʻOtuá pea pōpula ki he angahalá mo e fakameleʻí. Ko ha māmani ia ʻo e kakai, ʻa ia ʻi he ʻikai hangē ko e ongo faiangahala loto-lelei ko ʻĀtama mo ʻIví, naʻe ala huhuʻi.—Loma 5:​12; 8:​18-​21.

Naʻe malava vave ke fakaleleiʻi ʻe Sihova ko e ʻOtuá ʻa e tuʻunga naʻe tupu mei he angatuʻu ʻi ʻĪtení. ʻI heʻene malanga hake pē ʻa e fiemaʻú, naʻá ne tomuʻa fokotuʻu ai ha fakafofonga makehe—ko e Puleʻanga Faka-Mīsaia ʻi he nima ʻo Sīsū Kalaisí—ʻa ia te ne ngāueʻaki ʻi he fekauʻaki mo hono huhuʻi ʻa e faʻahinga ʻo e tangatá mei he angahala ʻa ʻĀtamá. (Mātiu 6:​10) Naʻe fai eni ʻe he ʻOtuá “ʻi he teʻeki ke tanupou ʻa [e] mamani” ʻo e faʻahinga ala huhuʻi ʻo e tangatá, ʻa ē ʻi he ki muʻa ke maʻu fānau ʻa e ongo angatuʻu ko ʻĀtama mo ʻIví.

ʻOku faʻa fiemaʻu ʻe he tangatá ha palani ʻo e ngāué koeʻuhi ke lavaʻi ʻa e meʻa ʻoku nau loto ke faí. Ko e tomuʻa fakapapauʻi ʻa e tufakangá ʻoku fehokotaki  ia mo e foʻi fakakaukau kuo pau pē ʻoku maʻu ʻe he ʻOtuá ha palani fakaikiiki ki he ʻunivēsí ʻa ia ʻoku tomuʻa fakapapauʻi ai ʻa e meʻa kotoa pē. “Kuo hā ngali ki he kau filōsefa tokolahi,” ko e tohi ia ʻa Roy Weatherford “ko ha meʻa pē ʻo ʻikai ko hano fakapapauʻi kakato ʻo e meʻa kotoa ʻoku hokó ʻe ʻikai hoamālie ia mo e Ngeia ʻo e ʻOtuá.” ʻOku fiemaʻu moʻoni ke fakahaaʻi pau ʻe he ʻOtuá ki muʻa ʻa e meʻa kotoa ʻe hokó?

ʻI he taʻefakangatangata ʻi he mālohí pea taʻealafakatataua ʻi he potó, ʻe lava ke fekuki ai ʻa Sihova mo ha meʻa fakavavevave pē pe taʻeʻiloa ʻa ia ʻe hoko nai ʻi hono ngāueʻaki ʻe heʻene ngaahi meʻa fakatupú ʻenau tauʻatāina ke filí. (Aisea 40:​25, 26; Loma 11:33) ʻE lava ke ne fai vave eni ʻo ʻikai ha tomuʻa fakakaukauʻi. ʻI he ʻikai hangē ko e tangata taʻehaohaoá mo ʻenau ngaahi malava fakangatangatá, ʻoku ʻikai fiemaʻu ʻe he ʻOtua Māfimafi-Aoniú ha palani fakaikiiki fakaefounga ʻa ia ʻoku fakamatalaʻi mai ai ki muʻa ʻa e ikuʻanga ʻo e tokotaha kotoa pē ʻi he māmaní. (Palovepi 19:21) ʻI ha ngaahi liliu Tohi Tapu lahi, ʻoku lau ai ʻa e Efeso 3:​11 ʻo kau ki hono maʻu ʻe he ʻOtuá ha “taumuʻa taʻengata” kae ʻikai ko ha palani kuo ʻosi fakapapauʻi.

Founga ʻe Lava Ke Ke Kaunga Ai ki Ho Kahaʻú

ʻOku ʻi ai ha taumuʻa ʻa e ʻOtuá ki he māmaní, pea ko e taumuʻa ko iá ʻoku ʻosi tomuʻa fokotuʻu. ʻOku fakahaaʻi ʻi he Fakahā 21:​3, 4: “Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” ʻIo, ʻe hoko ʻa e māmani ko ení ko ha palataisi, ʻo hangē tofu pē ko e meʻa naʻe muʻaki fakataumuʻa ki ai ʻa Sihová. (Senesi 1:​27, 28) Ko e fehuʻí, Te ke ʻi ai? ʻOku fakatuʻunga ia ʻi he ngaahi fili ʻokú ke fai he taimi ní. Kuo ʻikai ke fakapapauʻi ʻe Sihova ʻa ho ikuʻangá.

Ko e feilaulau huhuʻi ʻa e ʻAlo ʻo e ʻOtuá, ʻa Sīsū Kalaisí, ʻoku ʻai ai ke malava ki ha taha pē ʻokú ne ngāueʻi ʻa e tui kiate iá ke ne maʻu ʻa e moʻui taʻengatá. (Sione 3:​16, 17; Ngāue 10:​34, 35) “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata,” ko e lau ia ʻa e Tohi Tapú. “Ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui.” (Sione 3:36) ʻE lava ke ke fili ʻa e moʻuí ʻi he ako fekauʻaki mo e ʻOtuá, ko hono ʻAló, pea mo Hono finangaló mei he ngaahi peesi ʻo e Tohi Tapú pea ʻi hono ngāueʻaki ʻa e meʻa ʻokú ke akó. Ko e tokotaha ʻoku ngāue ʻo fakatatau ki he poto moʻoni ʻoku lēkooti ʻi he Folofola ʻa e ʻOtuá ʻoku fakapapauʻi ki ai “te ne nofo nonga, pea te ne ʻatā mei he manavahe ki he kovi.”—Palovepi 1:​20, 33.

[Fakatātā ʻi he peesi 5]

ʻI he ʻikai ke hangē ko e fanga monumanú, ʻoku fakafatongia fakaeʻulungāanga ʻaki ʻa e tangatá ki heʻenau ngaahi ngāué

[Maʻuʻanga]

ʻĪkale: Foto: Cortesía de GREFA