Ko e Hā ʻOkú Ne Puleʻi Ho Kahaʻú?

“ʻOKU ʻikai toe malava ke hoko ʻa e tangatá ko e kau pule ki honau ikuʻangá ʻo laka ia ʻi ha toe monumanu,” ko e tohi ia ʻa e tui ʻevalūsiō ko John Gray. Ko e faʻu-tohi ko Shmuley Boteach ʻokú ne fakahaaʻi ʻa e fakakaukau mātuʻaki fehangahangai ʻi heʻene tohi An Intelligent Person’s Guide to Judaism. ʻOkú ne pehē: “Ko e tangatá ʻoku ʻikai ko ha monumanu, pea ko ia ai ʻokú ne puleʻi maʻu pē ʻa hono ikuʻangá tonu.”

ʻOku loto-tatau ʻa e kakai tokolahi mo Gray pea nau tui ko e ngaahi mālohi taʻealamapuleʻi ʻo natulá ʻokú ne puleʻi ʻa e ikuʻanga ʻo e fāmili fakaetangatá. ʻOku fakakaukau ʻa e niʻihi ko e tangatá ko ha fakatupu ia ʻa e ʻOtuá naʻe tuku ki ai ʻa e malava ke ne puleʻi ʻa hono kahaʻú tonu.

ʻOku ongoʻi ʻe he niʻihi ʻoku puleʻi honau kahaʻú ʻe ha ngaahi ivi mālohi fakaetangata. Fakatatau ki he faʻu-tohi ko Roy Weatherford, “ko e tokolahi taha ʻo e kakai ʻi he māmaní—pea tautefito ki he tokolahi taha ʻo e kakai fefine ʻi he hisitōliá—ʻoku . . . ʻikai hanau mālohi pe mapuleʻi ʻenau moʻuí tonu ʻi he ngaahi ʻuhinga hangatonu ʻo e fakafeʻātungia mo e ngāuekoviʻaki fakaetangatá.” (The Implications of Determinism) Kuo mamata ʻa e tokolahi ki hono maumauʻi ʻenau ngaahi fakaʻānaua fekauʻaki mo ha kahaʻu fiefiá ʻe he ngaahi feʻauʻauhi fakapolitikalé pe ngaahi mālohi fakakautaú.

Ko e niʻihi kehe ʻi he kotoa ʻo e hisitōliá kuo nau ongoʻi taʻeʻaonga koeʻuhi naʻa nau fakakaukau naʻe puleʻi honau ikuʻangá ʻe ha ngaahi mālohi mahulu hake ʻi natula. “Ko e kau Kalisi ʻi onoʻahó,” ko e lau ia ʻa Boteach, “naʻe maʻunimā kinautolu ʻe he fakakaukau naʻe launoa ʻa e ʻamanaki kotoa talu mei he ʻikai lava ʻe he tangatá ke ikuʻi hono ikuʻanga kuo ʻosi tomuʻa fakatufakangaʻí.” Naʻa nau ongoʻi ko e ikuʻanga ʻo e tokotaha kotoa pē naʻe fakapapauʻi ia ʻe he ngaahi ʻotua fefine anga-feliliuaki. ʻOku nau tui ko e ngaahi ʻotua fefine ko ení, ʻoku nau  fakapapauʻi ʻa e taimi ʻe mate ai ha tahá pea pehē foki ki he lahi ko ia ʻo e mamahi mo e langa ʻe pau ke ne kātekina ʻi he kotoa ʻo ʻene moʻuí.

Ko e tui ko ia ʻoku puleʻi ʻa e ikuʻanga ʻo ha taha ʻe ha mālohi mahulu hake ʻi natulá ʻoku lahi ia ʻi he ʻahó ni. Ko e fakatātaá, ʻoku tui ʻa e kakai tokolahi ki he Kismet, pe tufakangá. ʻOku nau pehē kuo ʻosi tomuʻa fakapapauʻi ʻe he ʻOtuá ʻa e ikuʻanga ʻo e ngaahi tōʻonga ʻa e faʻahinga kotoa ʻo e tangatá pea mo e taimi ʻo ʻete maté. ʻOku toe ʻi ai foki ʻa e tokāteline ʻo e tomuʻa fakapapauʻi ʻa e tufakangá, ʻa ia ʻoku pouaki ai ʻa e fakakaukau “ko e fakamoʻui taupotú pe fakamalaʻiaʻi ʻo e tangata tāutaha taki taha kuo ʻosi fokotuʻu ia ki muʻa” ʻe he ʻOtua Māfimafi-Aoniú. ʻOku pipiki ʻa e faʻahinga tokolahi ʻoku taukaveʻi ko e kau Kalisitiané ki he akonaki ko ení.

Ko e hā hoʻo fakakaukaú? Kuo ʻosi fakapapauʻi ho ikuʻangá ʻe ha ngaahi mālohi ʻoku mahulu fakaʻaufuli atu ia mei hoʻo mapuleʻí? Pe ʻoku ʻi ai ha moʻoni ʻi he ngaahi foʻi lea ʻa e tokotaha hiki-tulama Pilitānia ko William Shakespeare, ʻa ia naʻá ne tohi: “Ko e faʻahinga ʻo e tangatá ko e kau pule kinautolu ʻi ha taimi ki honau ngaahi tufakangá”? Fakakaukau angé ki he meʻa ʻoku leaʻaki ʻe he Tohi Tapú ʻi he meʻá ni.