ʻOku Fai Maʻu Pē ʻe Sihova ʻa e Meʻa ʻOku Totonú

“Ko e fai totonu [pe māʻoniʻoni] ʻa Sihova ʻi hono ʻalunga kotoa.”—SĀME 145:17.

1. ʻOku anga-fēfē hoʻo talí ʻi he taimi ʻoku fai ai ʻe ha taha ha fakamulituku hala fekauʻaki mo koé, pea ko e hā ʻa e lēsoni ʻe lava ke tau ako mei ha hokosia pehē?

 KUO fai nai ʻi ha taimi ʻe ha taha ha fakamulituku hala fekauʻaki mo koe, ʻi hono fehuʻia nai hoʻo ngaahi ngāué pe ngaahi fakaueʻilotó, ʻo ʻikai maʻu kotoa ʻa e ngaahi foʻi moʻoní? Kapau ko ia, ngalingali naʻá ke ongoʻi loto-mamahi—pea ʻoku mahinongofua ia. ʻE lava ke tau ako ha lēsoni mahuʻinga mei he meʻá ni: ʻOku fakapotopoto ke fakaʻehiʻehi mei ha aʻu ki ha ngaahi fakamulituku ʻi he taimi ʻoku ʻikai ke tau maʻu kotoa ai ʻa e moʻoní.

2, 3. ʻOku anga-fēfē ʻa e tali ʻa e niʻihi ki he ngaahi fakamatala Fakatohitapu ʻoku ʻikai ke ʻi ai ha ngaahi fakaikiiki feʻunga ke ne tali ʻa e fehuʻi kotoa pē, neongo ia ko e hā ʻoku tala mai ʻe he Tohi Tapú kia kitautolu fekauʻaki mo Sihová?

² ʻOku lelei ke tau hanganaki fakakaukau ki he lēsoni ko ení ʻi he taimi ʻoku hoko ai ʻo aʻu ki ha ngaahi fakamulituku fekauʻaki mo Sihova ko e ʻOtuá. Ko e hā hono ʻuhingá? Koeʻuhí he ʻoku ʻi ai ʻa e ngaahi fakamatala Fakatohitapu pau ʻe ʻuluaki hā ngali fakatupu puputuʻu nai. Ko e ngaahi fakamatalá ni—fekauʻaki nai mo e ngaahi ngāue ʻa e niʻihi ʻo e kau lotu ʻa e ʻOtuá pe ko e ngaahi fakamaau ʻa e ʻOtuá ʻi he kuohilí—ʻoku ʻikai nai ke ʻi ai ha ngaahi fakaikiiki feʻunga ke ne tali ʻa e kotoa ʻo ʻetau ngaahi fehuʻí. Ko e meʻa fakamamahí, ʻoku fakaangaʻi ʻe he niʻihi ʻa e ngaahi fakamatala peheé, naʻa mo hono fehuʻia pe ʻoku māʻoniʻoni mo faitotonu ʻa e ʻOtuá. Neongo ia, ʻoku tala mai ʻe he Tohi Tapú kia kitautolu “Ko e fai totonu [pe māʻoniʻoni] ʻa Sihova ʻi hono ʻalunga kotoa.” (Sāme 145:17) ʻOku toe fakapapauʻi mai ʻe heʻene Folofolá kia kitautolu ko iá ʻoku ‘ʻikai ke ne faihala.’ (Siope 34:12; Sāme 37:28) Fakaʻuta atu leva, ki he anga ʻoku pau ʻokú ne ongoʻí ʻi he taimi ʻoku fai ai ʻe he niʻihi kehé ha ngaahi fakamulituku hala fekauʻaki mo iá!

³ Tau lāulea ki he ʻuhinga ʻe nima ʻoku totonu ke tau tali ai ʻa e ngaahi fakamaau ʻa Sihová. Pea ʻi he fakakaukau ki he ngaahi ʻuhinga ko iá, te tau sivisiviʻi ʻa e ongo fakamatala Fakatohitapu ʻe ua ʻe ʻiloʻi nai ʻe he niʻihi ʻoku faingataʻa ke mahinoʻi.

Ko e hā ʻa e ʻUhinga ke Tali Ai ʻa e Ngaahi Fakamaau ʻa Sihová?

 4. Ko e hā ʻoku totonu ai ke tau anga-fakanānā ʻi he fakakaukau atu ki he ngaahi ngāue ʻa e ʻOtuá? Fakatātaaʻi.

⁴ ʻUluakí, koeʻuhi ʻoku ʻafioʻi ʻe Sihova ʻa e ngaahi moʻoni kotoa ʻoku fekauʻaki mo ha meʻa ʻoku ʻikai ke tau ʻiloʻi, ʻoku totonu ai ke tau anga-fakanānā ʻi he fakakaukau atu ki he ngaahi ngāue ʻa e ʻOtuá. Ke fakatātaaʻi: Fakaʻuta atu ʻoku fai ʻe ha fakamaau ʻa ia ʻoku ʻiloa hono ongoongó ʻi hono fai ʻa e ngaahi tuʻutuʻuni taʻefilifilimānakó ha tautea ʻi ha keisi fakaefakamaauʻanga. Ko e hā hoʻo fakakaukau fekauʻaki mo ha taha ʻa ia ʻoku ʻikai te ne ʻiloʻi ʻa e ngaahi foʻi moʻoní kotoa, pe mahinoʻi moʻoni ʻa e ngaahi lao ʻoku kau ki ha meʻa ʻokú ne fakaangaʻi ʻa e tuʻutuʻuni ʻa e fakamāú? ʻE fakavalevale ki ha taha ke ne fakamāuʻi ha meʻa ʻoku ʻikai ke ne ʻilo kakato fekauʻaki mo ia. (Palovepi 18:13) Huanoa ai ʻa e fakavalevale ki he tangatá pē ke ne fakaangaʻi ʻa e “Tuʻi Fakamāu ʻo mamani katoa”!—Senesi 18:25.

 5. Ko e hā ʻoku totonu ke ʻoua ʻe ngalo ʻia kitautolu ʻi heʻetau lau ʻa e ngaahi fakamatala Fakatohitapu fekauʻaki mo e ngaahi fakahoko fakamaau ʻa e ʻOtuá ki he faʻahinga tāutaha ʻe niʻihi?

⁵ Ko ha ʻuhinga hono ua ke tali ai ʻa e ngaahi fakamaau ʻa e ʻOtuá he ʻi he ʻikai hangē ko e tangatá, ʻoku lava ke ʻiloʻi ʻe he ʻOtuá ʻa e ngaahi lotó. (1 Samiuela 16:7) ʻOku fakamatala ʻi heʻene Folofolá: “Ko au Sihova ʻoku ou hakule ʻa e loto, ʻoku ou sivi ʻa e kofuua, koeʻuhi ke ʻatu ki he tangata ʻo tāu mo hono ʻalunga, ʻo fakatatau ki he fua ʻo ʻene faianga.” (Selemaia 17:10) Ko ia ai, ʻi heʻetau lau ʻa e ngaahi fakamatala Fakatohitapu fekauʻaki mo e ngaahi fakamaau ʻa e ʻOtuá ki he faʻahinga tāutaha ʻe niʻihi, ʻai ke ʻoua naʻa ngalo ʻia kitautolu ko hono fofonga tokaimaʻanangá ʻokú ne vakaiʻi ʻa e ngaahi fakakaukau, ngaahi  fakaueʻiloto mo e ngaahi taumuʻa fufū ʻoku ʻikai lēkooti ʻi heʻene Folofolá.​—1 Kalonikali 28:9.

6, 7. (a) Kuo anga-fēfē hono fakahāhā ʻe Sihova ʻokú ne pipiki ki heʻene ngaahi tuʻunga faitotonú mo māʻoniʻoní naʻa mo e ʻi ha mole lahi fakafoʻituituí? (e) Ko e hā ʻoku totonu ke tau manatuʻi kapau ʻoku tau lau ha meʻa ʻi he Tohi Tapú ʻokú ne fakatupunga ke tau fifili ai pe naʻe ngāue ʻa e ʻOtuá ʻi he founga faitotonu pe totonu?

⁶ Fakatokangaʻi ha ʻuhinga hono tolu ke tali ai ʻa e ngaahi fakamaau ʻa Sihová: ʻOkú ne mateaki ki heʻene ngaahi tuʻunga māʻoniʻoní naʻa mo e ʻi ha mole fakafoʻituitui lahi kiate ia. Fakakaukau angé ki ha fakatātā. ʻI hono foaki hono ʻAló ko ha huhuʻi ki hono fakatauʻatāinaʻi ʻa e faʻahinga talangofua ʻo e tangatá mei he angahalá mo e maté, naʻe fakahoko ai ʻe Sihova ʻene ngaahi tuʻunga faitotonu mo māʻoniʻoní. (Loma 5:​18, 19) Neongo ia, ʻi he sio ki he faingataʻaʻia mo e pekia ʻa hono ʻAlo ʻofaʻangá ʻi ha ʻakau fakamamahí kuo pau pē naʻá ne fakatupunga ke malava ʻo hoko ʻa e mamahi lahi taha kia Sihova. Ko e hā ʻoku tala mai ʻe he meʻá ni kia kitautolu fekauʻaki mo e ʻOtuá? ʻI he fekauʻaki mo e “totogi huhui aia oku ia Kalaisi Jisu,” ʻoku pehē ʻe he Tohi Tapú: “Koeuhi ke fakaha ene maonioni [ʻa e ʻOtuá].” (Loma 3:​24-26, PM) Ko e toe liliu ʻe taha ʻo e Loma 3:​25 ʻoku pehē ai: “Naʻe fakahaaʻi heni ʻoku fai maʻu pē ʻe he ʻOtuá ʻa e meʻa ʻoku totonú mo tāú.” (New Century Version) ʻIo, ko e tuʻunga naʻe loto-lelei ʻa Sihova ke ne fou ai koeʻuhi ke ʻomai ʻa e huhuʻí ʻoku fakahaaʻi ai ʻokú ne maʻu ʻa e vakai māʻolunga taha ki he “meʻa ʻoku totonú mo tāú.”

⁷ Ko ia ai, kapau ʻoku tau lau ha meʻa ʻi he Tohi Tapú ʻokú ne fakatupunga ha niʻihi ke nau fifili ai pe naʻe ngāue ʻa e ʻOtuá ʻi ha founga faitotonu pe totonu, ʻoku totonu ke tau manatuʻi eni: Koeʻuhi ko ʻene mateaki ki heʻene ngaahi tuʻunga ʻo e māʻoniʻoní mo e fakamaau totonú, naʻe ʻikai ke mamaeʻi ʻe Sihova ʻa hono ʻAló tonu mei heʻene fuesia ʻo ha mate fakamamahí. Te ne fakangaloku ʻa e ngaahi tuʻunga ko iá ʻi he ngaahi meʻa kehé? Ko hono moʻoní, ʻoku ʻikai ʻaupito ke maumauʻi ʻe Sihova ʻa ʻene ngaahi tuʻunga māʻoniʻoni mo faitotonú. ʻOku tau maʻu leva ai ʻa e ʻuhinga feʻunga ke tuipau ʻokú ne fai maʻu pē ʻa e meʻa ʻoku totonú mo tāú.​—Siope 37:23.

 8. Ko e hā ʻe ʻikai huʻufataha ai ki he tangatá ke fakakaukau atu ʻoku ʻikai nai ke ʻia Sihova ʻa e fakamaau totonú mo e māʻoniʻoní?

⁸ Fakakaukau ki ha ʻuhinga hono fā ʻoku totonu ai ke tau tali ʻa e ngaahi fakamaau ʻa Sihová: Naʻe ngaohi ʻe Sihova ʻa e tangatá ʻi Hono ʻīmisí. (Senesi 1:​27) ʻOku ʻoange ai ki he tangatá ʻa e ngaahi ʻulungāanga hangē ko e ʻulungāanga ʻo e ʻOtuá, ʻo kau ai ha ongoʻi ʻo e fakamaau totonú mo e māʻoniʻoní. ʻE ʻikai huʻufataha kapau ko ʻetau ongoʻi ʻo e fakamaau totonú mo e māʻoniʻoní ʻokú ne fakatupunga ke tau fakakaukau atu ʻoku ʻikai nai ke ʻia Sihova ʻa e ongo ʻulungāanga tatau pē ko iá. Kapau ʻoku tau hoko ʻo puputuʻu ʻi ha fakamatala Fakatohitapu tefito, ʻoku fiemaʻu ke tau manatuʻi koeʻuhi ko ʻetau angahala tukufakaholó, ʻoku taʻehaohaoa ai ʻetau ongoʻi ʻa e faitotonú mo e totonú. Ko Sihova ko e ʻOtuá, ʻa ia ko hono ʻīmisí naʻe ngaohi ai kitautolú, ʻokú ne haohaoa ʻi he fakamaau totonú mo e māʻoniʻoní. (Teutalonome 32:4) ʻE ngali vale naʻa mo e fakaʻuta atu ʻe lava ke faitotonu mo māʻoniʻoni ange ʻa e tangatá ʻi he ʻOtuá!​—Loma 3:​4, 5; 9:​14.

9, 10. Ko e hā ʻoku ʻikai fakafatongiaʻaki ai ʻa Sihova ke ne fakamatalaʻi pe fakatonuhiaʻi ʻa ʻene ngaahi ngāué ki he faʻahinga ʻo e tangatá?

⁹ Ko ha ʻuhinga hono nima ki hono tali ʻa e ngaahi fakamaau ʻa Sihová he ko ia ʻa e “Fugani Maoluga i mamani kotoabe.” (Sāme 83:​18, PM) ʻI heʻene peheé, ʻoku ʻikai fakafatongiaʻi ai ia ke ne fakamatalaʻi pe fakatonuhiaʻi ʻa ʻene ngaahi ngāué ki he faʻahinga ʻo e tangatá. Ko ia ʻa e Tufunga ʻUmea Lahí, pea ʻoku tau hangē ha ʻumea ʻa ia kuo fakafuo ki he ngaahi ipu, ke ne ngāueʻaki ʻo fakatatau ki heʻene faʻitelihá. (Loma 9:​19-​21) Ko hai kitautolu—ʻa e naunau ʻumea ʻa hono toʻukupú—ke tau fehuʻia ʻa ʻene ngaahi filí pe ko ʻene ngaahi ngāué? ʻI he taimi naʻe ʻikai mahinoʻi ai ʻe he pēteliake ko Siopé ʻa e ngaahi feangainga ʻa e ʻOtuá mo e faʻahinga ʻo e tangatá, naʻe fakatonutonuʻi ia ʻe Sihova, ʻi heʻene ʻeke: “Te ke laiki koā ʻeku totonu fakalao? Te ke tuku au ko e halaia ka ke tonuhia koe?” ʻI he ʻiloʻi naʻá ne lea ʻi he taʻemahinó, naʻe fakatomala ai ʻa Siope ki mui. (Siope 40:8; 42:6) ʻOfa ke ʻoua ʻaupito naʻa tau fai ha fehālaaki ʻi hano kumi ha hala ʻa e ʻOtuá!

¹⁰ ʻOku hā mahino, ʻoku tau maʻu ʻa e ngaahi ʻuhinga lelei ke tui ai ʻoku fai maʻu pē ʻe Sihova ʻa e meʻa ʻoku totonú. ʻI he makatuʻunga ko eni ki hono mahinoʻi ʻa e ngaahi founga ʻa Sihová, tau sivisiviʻi ʻa e fakamatala Fakatohitapu ʻe ua ʻe ʻiloʻi nai ʻe he niʻihi ʻoku fakatupu puputuʻu. ʻOku kau ki he ʻuluakí ʻa e ngaahi ngāue ʻa e taha ʻo e kau  lotu ʻa Sihová, pea ko e taha, ko hano fakahoko ʻo e fakamāú ʻe he ʻOtuá tonu.

Ko e Hā Naʻe Tuʻuaki Ai ʻe Lote ʻa Hono Ongo ʻOfefiné ki ha Fuʻu Kakai Tōlilí?

11, 12. (a) Fakamatala ki he meʻa naʻe hokó ʻi he taimi naʻe fekauʻi atu ai ʻe he ʻOtuá ʻa e ongo ʻāngelo liliu sino kakano ki Sōtomá. (e) Kuo langaʻi hake ʻi he fakamatalá ni ʻa e ngaahi fehuʻi ko e hā ʻi he ʻatamai ʻo e niʻihi?

¹¹ ʻI he Senesi vahe 19, ʻoku tau maʻu ai ʻa e talanoa ki he meʻa naʻe hoko ʻi he taimi naʻe fekauʻi atu ai ʻe he ʻOtuá ʻa e ongo ʻāngelo liliu sino kakano ki Sōtomá. Naʻe vilitaki ʻa Lote ke nofo ʻa e ongo ʻaʻahí ʻi hono ʻapí. Kae kehe, ʻi he pō ko iá, naʻe takatakaiʻi ai ʻa e falé ʻe ha kau tangata tokolahi mei he koló ʻo fekau atu ke ʻomai ki tuʻa kia kinautolu ʻa e ongo ʻaʻahí ki ha ngaahi taumuʻa fakaeʻulungāanga taʻetaau. Naʻe feinga ʻa Lote ke fakaʻuhinga mo e fuʻu kakaí, ka naʻe ʻikai hano ʻaonga. ʻI he feinga ke maluʻi ʻa ʻene ongo fakaafé, naʻe pehē ange ʻe Lote: “Siʻi kainga, ʻoua te mou fai taʻetāu. Ko eni, ʻoku ai hoku ongo ʻofefine ʻa ia ʻoku teʻeki ke na ʻilo ha tangata, kau ʻomi muʻa kinaua kiate kimoutolu, pea mou faʻiteliha ki ai; kehe pe ke ʻoua te mou fai ha meʻa ki he ongo tangata ni; he kane taʻeʻoua ʻa e malu ʻo hoku fale ʻoku na hu mei ai.” Naʻe ʻikai ke fanongo ʻa e fuʻu kakaí pea naʻa nau meimei maumauʻi ʻa e matapaá. Fakaʻosí, naʻe taaʻi ʻe he ongo ʻāngelo ʻaʻahí ʻaki ʻa e kui ʻa e fuʻu kakai hohaʻatuʻú.—Senesi 19:​1-11.

¹² ʻOku mahinongofua, kuo langaʻi hake ʻe he fakamatalá ni ʻa e ngaahi fehuʻi ʻi he ʻatamai ʻo e niʻihi. ʻOku nau fifili: ‘Naʻe lava fēfē ke feinga ʻa Lote ke maluʻi ʻa ʻene ongo fakaafé ʻaki hono tuʻuaki ʻa hono ongo ʻofefiné ki ha fuʻu kakai holi fakakakano? ʻIkai naʻá ne ngāue taʻetotonu, naʻa mo e loto-foʻi?’ ʻI he vakai atu ki he fakamatala ko ení, ko e hā naʻe fakamānavaʻi ai ʻe he ʻOtuá ʻa Pita ke ne ui ʻa Lote ko ha tangata “maʻoniʻoni”? Naʻe ngāue ʻa Lote fakataha mo e hōifua ʻa e ʻOtuá? (2 Pita 2:​7, 8) Tau fakaʻuhinga ʻi he meʻa ko ení koeʻuhi ke ʻoua naʻa tau maʻu ʻa e fakamulituku hala.

13, 14. (a) Ko e hā ʻoku totonu ke fakatokangaʻi fekauʻaki mo e fakamatala Fakatohitapu ki he ngaahi ngāue ʻa Loté? (e) Ko e hā ʻokú ne fakahaaʻi naʻe ʻikai ke ngāue ʻa Lote ʻi ha founga loto-foʻí?

¹³ Ke kamataʻaki, ʻoku totonu ke fakatokangaʻi ʻi he ʻikai ke fakatonuhiaʻi pe fakahalaiaʻi ʻa e ngaahi ngāue ʻa Loté, ʻoku līpooti pē ʻe he Tohi Tapú ia ʻa e meʻa naʻe hokó. ʻOku ʻikai foki ke tala mai ʻe he Tohi Tapú ia ʻa e meʻa naʻe ʻi he fakakaukau ʻa Loté pe ko e meʻa naʻá ne ueʻi ia ke ne fai ai ʻa e meʻa ko iá. ʻI heʻene toe foki mai ʻi he “toetuʻu ʻa e angatonu,” mahalo pē te ne fakahaaʻi mai ha ngaahi fakaikiiki.—Ngāue 24:15.

¹⁴ Naʻe ʻikai ʻaupito ko ha loto-foʻi ia ʻa Lote. Naʻá ne ʻi ha tuʻunga faingataʻa. ʻI heʻene pehē naʻe hoko mai ʻa e ongo ʻaʻahí ki he “malu” ʻo hono falé, naʻe fakahaaʻi ai ʻe Lote naʻá ne ongoʻi naʻe ueʻi ia ke ne ʻoatu ʻa e maluʻanga mo e hūfangaʻanga kia kinaua. Ka ʻe ʻikai ke faingofua eni. ʻOku līpooti ʻa e faihisitōlia Siu ko Siosifasí ʻo  pehē ko e kau Sōtomá naʻa nau “taʻefaitotonu ki he tangatá, pea taʻeʻapasia ki he ʻOtuá . . . Naʻa nau fehiʻa ʻi he kau solá, pea ngaohikovia kinautolu ʻaki ʻa e ngaahi tōʻonga faka-Sōtoma.” Neongo ia, naʻe ʻikai ke holomui ʻa Lote mei he fuʻu kakai fonu ʻi he loto-tāufehiʻá. ʻI hono kehé, naʻá ne hū ki tuʻa ʻo fakaʻuhinga mo e kau tangata tōlili ko iá. Naʻe aʻu ʻo ne “tapuni ʻa e matapa mei hono tuʻa.”—Senesi 19:6.

15. Ko e hā ʻoku lava ai ke pehē naʻe ngāue lelei nai ʻa Lote ʻi he tuí?

¹⁵ ‘Neongo ia,’ ʻe ʻeke nai ʻe he niʻihi, ‘ko e hā naʻe tuʻuaki ai ʻe Lote ʻa hono ongo ʻofefiné ki he fuʻu kakaí?’ ʻI he ʻikai fakamahamahalo naʻe kovi ʻa ʻene ngaahi taumuʻá, ko e hā ʻoku ʻikai ai fakakaukau ki ha ngaahi meʻa ʻe niʻihi naʻe ala lava? ʻUluakí, naʻe ngāue lelei nai ʻa Lote ʻi he tui. ʻO anga-fēfē? ʻOku ʻikai ha veiveiua naʻe lāuʻilo ʻa Lote ki he anga hono maluʻi ʻe Sihova ʻa Sela, ko e uaifi ʻo ʻĒpalahamé, ʻa ia naʻe tamaiʻaki ʻe Loté. Manatuʻi koeʻuhi naʻe hoihoifua ʻaupito ʻa Sela, naʻe kole ange ʻe ʻĒpalahame kiate ia ke ne fakahaaʻi ia ko hono tuongaʻane, telia naʻa tāmateʻi ia ʻe he niʻihi kehé koeʻuhi ka nau ʻave ia. a Ko ia, naʻe ʻave ai ʻa Sela ki he fale ʻo Feló. Kae kehe, naʻe kau mai ʻa Sihova ʻo ne taʻofi ʻa Felo mei hono ʻuliʻi ʻo Selá. (Senesi 12:​11-​20) ʻOku malava ke pehē naʻe maʻu ʻe Lote ʻa e tui ʻe lava ke maluʻi meimei tatau ʻa hono ongo ʻofefiné. ʻOku mahuʻingá, he naʻe kau mai ʻa Sihova fakafou ʻi heʻene ongo ʻāngeló, pea naʻe tauhi malu ʻa e ongo finemuí.

16, 17. (a) ʻI he founga fē naʻe feinga nai ai ʻa Lote ke fakaʻohovaleʻi pe fakapuputuʻuʻi ʻa e kau tangata Sōtomá? (e) Pe ko e hā pē ʻa e ʻuhinga ʻa Loté, ko e hā ʻe lava ke tau fakapapauʻí?

¹⁶ Fakakaukau atu ki ha toe meʻa naʻe mei ala lava. Naʻe toe feinga nai ʻa Lote ke fakaʻohovaleʻi pe fakapuputuʻuʻi ʻa e kau tangatá. Naʻá ne tui nai ʻe ʻikai ke holi ʻa e fuʻu kakaí ki hono ongo ʻofefiné koeʻuhi ko e holi fakasōtoma ʻa e kau Sōtomá. (Siutasi 7) Tānaki atu ki ai, naʻe fakamaʻu ʻa e ongo finemuí ki he ongo tangata ʻo e koló, ko ia ai, ko e ngaahi kāinga, ngaahi kaumeʻa, pe kaungā pisinisi ʻo hono ongo foha-ʻi-he-fono ki he kahaʻú naʻa nau ʻi he fuʻu kakaí nai. (Senesi 19:14) Naʻe ʻamanaki nai ʻa Lote ʻe lea hake ha kau tangata ʻi he fuʻu kakai ko iá, koeʻuhi ko e felāveʻi peheé, ʻo taukapoʻi ʻa hono ongo ʻofefiné. Ko e māvahevahe ko ia ʻa ha fuʻu kakaí ʻe ʻikai ai ke fuʻu fakatuʻutāmaki. b

¹⁷ Ko e hā pē ʻa e ʻuhinga mo e ngaahi taumuʻa ʻa Loté, ʻe lava ke tau fakapapauʻi ʻa e meʻá ni: Koeʻuhi ʻoku fai maʻu pē ʻe Sihova ʻa e meʻa ʻoku totonú, kuo pau pē naʻe ʻi ai ʻene ʻuhinga lelei ke vakai ai kia Lote ko ha tangata “maʻoniʻoni.” Pea ʻi he fakamāuʻi mei he ngaahi tōʻonga ʻa e fuʻu kakai Sōtoma hohaʻatuʻú, ʻe lava ke ʻi ai ha veiveiua pe naʻe tonuhia kakato ʻa Sihova ʻi hono fakahoko ʻa e fakamaau ki he kau nofo ʻo e kolo fulikivanu ko iá?​—Senesi 19:​23-​25.

Ko e Hā Naʻe Taaʻi Ai ʻe Sihova ʻo Mate ʻa ʻUsá?

18. (a) Ko e hā naʻe hoko ʻi he taimi naʻe feinga ai ʻa Tēvita ke ʻomai ʻa e ʻAʻaké ki Selusalemá? (e) Ko e hā ʻa e fehuʻi ʻoku langaʻi hake ʻi he fakamatalá ni?

¹⁸ Ko e fakamatala ʻe taha ʻa ia ʻe hā ngali fakatupu puputuʻu nai ki he niʻihi ʻoku kau ki ai ʻa e feinga ʻa Tēvita ke ʻomai ʻa e ʻaʻake ʻo e kovinānité ki Selusalemá. Naʻe tuku ʻa e ʻAʻaké ʻi ha saliote, ʻa ia naʻe taki ʻe ʻUsa mo hono tokouá. ʻOku fakamatala ʻa e Tohi Tapú: “Pea ʻi heʻenau aʻu ki he hahaʻanga ʻo Nakoni, naʻe ala ʻe Usa ki he Aake ʻo Elohimi, ʻo ne puke ki ai; he naʻe humu ʻa e ongo pulu. Pea tupu ai ʻa e houhau ʻo Sihova kia Usa; pea naʻe taaʻi ia ʻe Elohimi ʻi he potu ko ia, koeʻuhi ko ʻene fai vale; pea naʻa ne pekia ai pe, ofi ki he Aake ʻo Elohimi.” ʻI ha ngaahi māhina ki mui ai, naʻe lavameʻa ai ha feinga hono ua ʻi hono ʻave ʻa e ʻAʻaké ʻi he founga naʻe fakahinohino ʻe he ʻOtuá, ʻo fata ʻi he uma ʻo e kau Līvai Kōhaté. (2 Samiuela 6:​6, 7; Nomipa 4:15; 7:9; 1 Kalonikali 15:​1-14) ʻE ʻeke nai ʻe he niʻihi: ‘Ko e hā naʻe tali fuʻu fefeka pehē ai ʻa Sihová? Naʻe feinga pē ʻa ʻUsa ke maluʻi ʻa e ʻAʻaké.’ Telia naʻa tau fai ha fakamulituku hala, ʻoku lelei ke tau fakatokangaʻi ha ngaahi fakaikiiki ʻaonga ʻe niʻihi.

19. Ko e hā ʻoku taʻemalava ai kia Sihova ke ne ngāue taʻefaitotonú?

¹⁹ ʻOku fiemaʻu ke tau manatuʻi ʻoku taʻemalava ke ngāue taʻefaitotonu ʻa Sihova. (Siope 34:10) ʻE taʻeʻofa kiate ia ke ne fai pehē, pea ʻoku tau ʻiloʻi  mei heʻetau ako fakalūkufua ʻa e Tohi Tapú ko e “ʻOtua ko e ʻOfa.” (1 Sione 4:8) Tānaki atu ki ai, ʻoku tala mai ʻe he Tohi Tapú ko e “agatonu [pe māʻoniʻoni] moe fakamāu [totonu] koe tuuga ia o ho afioaga [ʻo e ʻOtuá].” (Sāme 89:​14, PM) ʻE lava fēfē leva ke faifai ange pea ngāue taʻefaitotonu ʻa Sihova? Kapau naʻá ne fai pehē, te ne fakavaivaiʻi ʻa e makatuʻunga tonu ʻo hono tuʻunga-haú.

20. ʻI he ngaahi ʻuhinga fē naʻe totonu ke lāuʻilo ai ʻa ʻUsa ʻo kau ki he ngaahi lao fekauʻaki mo e ʻAʻaké?

²⁰ Manatuʻi naʻe totonu ke ʻiloʻi lelei ʻe ʻUsa ʻa e Laó. Naʻe fekauʻaki ʻa e ʻAʻaké mo e ʻi ai ʻa Sihová. Naʻe fakahaaʻi pau ʻe he Laó ʻe ʻikai ke ala ki ai ha faʻahinga tāutaha taʻefakamafaiʻi, ʻo fakatokanga taʻetoeveiveiua ko e faʻahinga te nau maumauʻi iá ʻe tautea mate. (Nomipa 4:​18-​20; 7:​89) Ko ia ai, ko hono fehikitaki ʻa e puha toputapu ko iá naʻe ʻikai ko ha ngāue ia ke fakamaʻamaʻaʻi. ʻOku hā mahino ko ʻUsá ko ha Līvai (ʻo ʻikai ko ha taulaʻeiki), ko ia ai naʻe totonu ke ne ʻosi alāanga mo e Laó. Ko e taha, ʻi he ngaahi taʻu ki muʻa angé naʻe hiki ai ʻa e ʻAʻaké ki he fale ʻo ʻene tamaí ke tauhi ai. (1 Samiuela 6:20–​7:1) Naʻe nofo ia ai ʻi he taʻu nai ʻe 70, ʻo aʻu ki he taimi naʻe toki fili ai ʻa Tēvita ke hiki iá. Ko ia mei he kei siʻí ʻo faai mai ai, ʻoku ngalingali naʻe lāuʻilo ʻa ʻUsa ʻo kau ki he ngaahi lao fekauʻaki mo e ʻAʻaké.

21. ʻI he tuʻunga ʻo ʻUsá, ko e hā ʻoku mahuʻinga ai ke manatuʻi ʻoku ʻafioʻi ʻe Sihova ʻa e ngaahi taumuʻa ʻi he lotó?

²¹ Hangē ko ia naʻe lave ki ai ki muʻá, ʻoku lava ke ʻiloʻi ʻe Sihova ʻa e ngaahi lotó. Koeʻuhi ʻoku ui ʻi heʻene Folofolá ʻa e ngāue ʻa ʻUsá ko ha “fai vale [pe taʻefakaʻapaʻapa],” naʻe vakai nai ʻa Sihova ki ha taumuʻa siokita ʻa ia naʻe ʻikai ke fakahaaʻi pau ʻi he fakamatalá. Ko ha tangata ʻafungi nai ʻa ʻUsa, ʻo hehema ke fakalaka ʻi he ngaahi ngataʻanga totonú? (Palovepi 11:2) Ko hono tataki fakahāhā ʻa e ʻAʻaké ʻa ia naʻe leʻohi mavahe ʻe hono fāmilí naʻe ʻoange ai kiate ia ha ongoʻi ʻulu pupula ʻo e mahuʻinga fakaekita? (Palovepi 8:​13) Naʻe mātuʻaki taʻemateaki ʻa ʻUsa ʻo ne fakakaukau naʻe fuʻu nounou ʻa e toʻukupu ʻo Sihová ke ne ʻai ke tuʻumaʻu ʻa e puha toputapu naʻá ne fakatātaaʻi ʻa ʻEne ʻi aí? Pe ko e hā pē ʻa e tuʻungá, ʻoku lava ke tau fakapapauʻi naʻe fai ʻe Sihova ʻa e meʻa naʻe totonú. ʻOku ngalingali naʻá ne ʻafioʻi ʻa e meʻa ʻi he loto ʻo ʻUsá ʻa ia naʻá ne fakatupunga ai Ia ke ne fakahoko ʻa e fakamaau fakavavevavé.​—Palovepi 21:2.

Ko ha Makatuʻunga Lelei ki he Tuipau

22. ʻOku anga-fēfē ʻa e hā ʻa e poto ʻo Sihová ʻi hono liʻaki ʻi he taimi ʻe niʻihi ʻi heʻene Folofolá ʻa e ngaahi fakaikiiki paú?

²² Ko e poto taʻealafakatataua ʻo Sihová ʻoku hā ia ʻi hono liʻaki ʻi ha ngaahi taimi mei heʻene Folofolá ʻa e ngaahi fakaikiiki pau. ʻOku ʻomai ai ʻe Sihova kia kitautolu ha faingamālie ke fakahaaʻi ʻoku tau falala kiate ia. Mei he meʻa kuo tau vakai ki aí, ʻikai ʻoku hā mahino ʻoku tau maʻu ʻa e ngaahi ʻuhinga lelei ke tali ai ʻa e ngaahi fakamaau ʻa Sihová? ʻIo, ʻi he taimi ʻoku tau ako ai ʻa e Folofola ʻa e ʻOtuá fakataha mo ha loto-moʻoni pea mo ha ʻatamai ʻataá, ʻoku tau ako lahi ange ai fekauʻaki mo Sihova ke tau hoko ai ʻo tuipau ʻokú ne fai maʻu pē ʻa e meʻa ʻoku totonú mo moʻoní. Ko ia ai, kapau ʻoku langaʻi hake ʻi ha fakamatala Fakatohitapu ʻa e ngaahi fehuʻi ʻa ia ʻoku ʻikai lava ke tau maʻu leva ha ngaahi tali papau ki ai, tau tuipau kakato naʻe fai ʻe Sihova ʻa e meʻa naʻe totonú.

23. Ko e hā ʻa e tuipau ʻe lava ke tau maʻu fekauʻaki mo e ngaahi ngāue ʻa Sihova ʻi he kahaʻú?

²³ ʻE lava ke tau maʻu ʻa e tuipau meimei tatau fekauʻaki mo e ngaahi ngāue ʻa Sihova ʻi he kahaʻú. Ko ia ai, te tau fakapapauʻi ʻi he taimi te ne fakahoko ai ʻa e fakamaau ʻi he mamahi lahi ʻoku tuʻunuku maí, ʻe ʻikai te ne “fakaʻauha ʻa e maʻoniʻoni fakataha mo e angahala.” (Senesi 18:23) Ko ʻene ʻofa ki he māʻoniʻoní mo e fakamaau totonú ʻe ʻikai ʻaupito fakaʻatā ai ia ke ne fai ʻa e meʻa ko iá. ʻE toe lava ke tau maʻu ʻa e tuipau kakato ʻi he māmani foʻou ka hoko maí, te ne fakalato ai ʻa ʻetau ngaahi fiemaʻú kotoa ʻi he founga lelei taha ʻe ala lavá.​—Sāme 145:16.

[Fakamatala ʻi lalo]

ʻOkú Ke Manatuʻi?

• Ko e hā ʻa e ngaahi ʻuhinga ʻoku totonu ke tau tali ai ʻa e ngaahi fakamaau ʻa Sihová?

• Ko e hā ʻe lava ke ne tokoniʻi kitautolu ke tau fakaʻehiʻehi ai mei he aʻu ki he fakamulituku hala fekauʻaki mo hono tuʻuaki ʻe Lote ʻa hono ongo ʻofefiné ki he fuʻu kakai tōlilí?

• Ko e hā ʻa e ngaahi meʻa tefito ʻe lava ke ne tokoniʻi kitautolu ke tau mahinoʻi ʻa e ʻuhinga naʻe taaʻi ai ʻe Sihova ʻo mate ʻa ʻUsá?

• Ko e hā ʻa e tuipau ʻe lava ke tau maʻu fekauʻaki mo e ngaahi ngāue ʻa Sihova ʻi he kahaʻú?

[Fehuʻi ki he Ako]