Kau Kalisitiane—Mou Laukauʻaki Homou Tuʻungá!

“Ko ia ʻoku vikiviki, ke ne vikiviki ʻi he ʻEiki [pe ʻia Sihova].”​—1 KOLINITO 1:31.

 1. Ko e hā ʻa e ngaʻunu ʻoku hā mahino ʻi he fakakaukau ʻa e kakaí ki he lotú?

 “TUI-TAʻEMAHUʻINGAʻIA.” Naʻe ngāueʻaki ki muí ni ʻe ha faiongoongo ʻo e ngaahi meʻa fakalotú ʻa e foʻi lea ko iá ke fakamatalaʻiʻaki ʻa e fakakaukau ʻoku tauhi maʻu ʻe he kakai tokolahi ki heʻenau tuí. Naʻá ne fakamatala: “Ko e ngaʻunu lahi taha ʻi he lotú ʻi onopōní ʻoku ʻikai haʻane kākunga fakalotu ʻe taha—ko ha fakakaukau ia ʻoku fakamatalaʻi lelei ko e ‘tui-taʻemahuʻingaʻia.’” ʻI hono fakamatalaʻi mahinó, naʻá ne fakamatalaʻi ʻa e tui-taʻemahuʻingaʻiá “ko ha taʻefietokanga ki he meʻa kotoa fekauʻaki mo ʻete lotú.” Ko e kakai tokolahi, ʻokú ne pehē, ʻoku nau “tui ki he ʻOtuá . . . ; ʻoku ʻikai pē te nau tokotokanga kinautolu fekauʻaki mo ia.”

 2. (a) Ko e hā ʻoku ʻikai fakaʻohovale ai ʻa e hoko ʻa e kakaí ʻo taʻemahuʻingaʻia fakalaumālié? (e) Ko e hā ʻa e fakatuʻutāmaki ʻoku ʻomai ʻe he taʻemahuʻingaʻiá ki he kau Kalisitiane moʻoní?

² Ko e ngaʻunu ko ʻeni ki he taʻemahuʻingaʻiá ʻoku ʻikai fakaʻohovale ia ki he kau ako ʻo e Tohi Tapú. (Luke 18:8) Pea ʻi heʻene hoko mai ki he lotú ʻi he tuʻunga fakalūkufuá, ʻoku ʻamanekina ai ʻa e taʻemahuʻingaʻia peheé. Kuo fuoloa mai hono hanga ʻe he lotu loí ʻo takihalaʻi mo fakasivaʻi ʻa e ʻamanaki ʻa e faʻahinga ʻo e tangatá. (Fakahā 17:​15, 16) Kae kehe, ki he kau Kalisitiane moʻoní, ko e laumālie hūhū ʻo e fakapāpākuú mo e ʻikai ha faivelengá ʻokú na ʻomai ha fakatuʻutāmaki. ʻOku ʻikai totonu ke tau hoko ʻo taʻemahuʻingaʻia fekauʻaki mo ʻetau tuí pea mole ai ʻetau faivelenga ki hono tauhi ʻa e ʻOtuá pea ki he moʻoni ʻo e Tohi Tapú. Naʻe fakatokanga ʻa Sīsū fekauʻaki mo e tuʻunga māmāfana peheé ʻi heʻene fakatokanga ki he kau Kalisitiane ʻi he ʻuluaki senitulí naʻe nofo ʻi Leotisiá: “ʻA e ʻikai te ke momoko pe mafana. ʻAmusiaange ʻe au ʻoku ke momoko pē ʻoku ke mafana! . . . Ka ʻi hoʻo pehē na, ʻo māmāfana pē.”—Fakahā 3:​15-18.

Ko Hono ʻIloʻi Hotau Tuʻungá

 3. Ko e hā ʻa e ngaahi tafaʻaki ʻo honau tuʻungá ʻoku malava ke laukauʻaki ʻe he kau Kalisitiané?

³ Ke tauʻi ʻa e taʻemahuʻingaʻia fakalaumālié, ʻoku fiemaʻu ki he kau Kalisitiané ke nau maʻu ha vakai māʻalaʻala ki honau tuʻungá, pea kuo pau ke nau laukauʻaki totonu honau tuʻunga makehé. ʻI he tuʻunga ko e kau sevāniti ʻa Sihova pea ko e kau ākonga ʻa Kalaisí, ʻoku malava ke tau ʻiloʻi ʻa hotau tuʻungá ʻi he ngaahi fakamatala ʻa e Tohi Tapú. Ko kitautolú ko e “kau fakamoʻoni” ʻa Sihova, ‘ko e kaungāngaue mo e ʻOtuá,’ ʻi heʻetau vahevahe longomoʻui atu ʻa e “ongoongolelei” ki he niʻihi kehé. (Aisea 43:10; 1 Kolinito 3:9; Mātiu 24:14) Ko e kakai kitautolu ʻoku “feʻofaʻaki.” (Sione 13:34) Ko e kau Kalisitiane moʻoní ko e faʻahinga tāutaha ʻa ia “fakafou ʻi hono ngāueʻakí ko ʻenau ngaahi mafai fakaefakakaukaú kuo akoʻi ai ke nau fakafaikehekeheʻi fakatouʻosi ʻa e tonú mo e halá.” (Hepelu 5:​14, NW) Ko kitautolú ko e “ngaahi maamaʻanga ʻi mamani.” (Filipai 2:15) ʻOku tau feinga ke “ʻai ke tāu [ʻetau] fakafeangai ki he Senitaile.”—1 Pita 2:12; 2 Pita 3:​11, 14.

 4. ʻE malava fēfē ʻe ha tokotaha lotu ʻa Sihova ke fakapapauʻi ʻa e tuʻunga ʻoku ʻikai te ne ʻi aí?

⁴ ʻOku toe ʻiloʻi foki ʻe he kau lotu moʻoni ʻa Sihová ʻa e tuʻunga ʻoku ʻikai te nau ʻi aí. “ʻOku ʻikai te nau ʻo māmāni,” ʻo hangē pē ko honau Takimuʻá,  ʻa Sīsū Kalaisi, naʻe ʻikai te ne ʻo māmani. (Sione 17:16) ʻOku nau mavahe ai pē mei he “Senitaile,” ʻa ia “ʻoku nau fou ʻi he muna ʻa honau loto, kuo fakapoʻuli honau ʻatamai, kuo nau motu mei he moʻui ʻa e ʻOtua.” (Efeso 4:​17, 18) Ko hono olá, ko e kau muimui ʻo Sīsuú ʻoku nau “jiaki ae aga taefaka-Otua moe gaahi holi fakamama, ka [e] moui aga fakabotoboto, mo maonioni, mo aga faka-Otua, i he mamani.”—Taitusi 2:​12, PM.

 5. Ko e hā ʻoku ʻuhinga ki ai ʻa e enginaki ke ‘vikiviki ʻia Sihová’?

⁵ Ko ʻetau vakai māʻalaʻala ki hotau tuʻungá mo hotau vahaʻangatae mo e Pule Fakaleveleva ʻo e ʻunivēsí ʻokú ne ueʻi kitautolu ke tau ‘vikiviki ʻia Sihova.’ (1 Kolinito 1:31) Ko e hā ʻa e faʻahinga vīkiviki ko iá? ʻI he tuʻunga ko e kau Kalisitiane moʻoní, ʻoku tau laukauʻaki ke ʻai ʻa Sihova ko hotau ʻOtuá ia. ʻOku tau muimui ki he enginaki: “Ko eni pe meʻa ʻe polepole ai ʻe ia ʻoku polepole, ʻa ʻene maʻu ʻatamai, mo ʻene ʻilo au, ko Sihova au ʻoku ou fai mēsi, pea fai fakakonisitutone, pea fai totonu ʻi mamani.” (Selemaia 9:24) ʻOku tau “vikiviki” ʻi he monū ko hono ʻiloʻi ʻa e ʻOtuá pea hoko ʻo ne ngāueʻaki ke tokoniʻi ʻa e niʻihi kehé.

Ko e Polé

 6. Ko e hā ʻoku faingataʻa ai ki he niʻihi ke tauhi maʻu ha ʻilo vēkeveke ki honau tuʻunga ko e kau Kalisitiané?

⁶ Ko hono moʻoní, ko hono tauhi maʻu ha ʻilo vēkeveke ki hotau tuʻunga makehe ko e kau Kalisitiané ʻoku ʻikai ke faingofua maʻu pē. Ko ha talavou naʻe tauhi hake ko ha Kalisitiane ʻokú ne manatuʻi naʻá ne hokosia ʻi ha taimi ha tuʻunga ʻo e vaivai fakalaumālie: “ʻI he taimi ʻe niʻihi, naʻá ku ongoʻi ai naʻe ʻikai te u ʻiloʻi pe ko e hā naʻá ku hoko ai ko e taha ʻo e Kau Fakamoʻoni ʻa Sihová. Naʻá ku ʻi he moʻoní talu mei heʻeku valevale. ʻI he taimi ʻe niʻihi naʻá ku ongoʻi ai ko ha lotu pē ʻeni ia ʻe taha naʻe tali ke fokotuʻu.” Kuo fakaʻatā nai ʻe he niʻihi honau tuʻungá ke fakafuo ʻe he māmani fakafiefiá, mītia lahi fakaʻuliá, pea mo e fakakaukau taʻefakaʻotua lolotonga ʻi he moʻuí. (Efeso 2:​2, 3) ʻOku faʻa hokosia nai ʻe he kau Kalisitiane ʻe niʻihi ʻa e ngaahi vahaʻa taimi ʻo e veiveiua-fakaekita mo hano toe fakafuofuaʻi ʻenau ngaahi mahuʻingaʻiá mo e ngaahi taumuʻá.

 7. (a) Ko e hā ʻa e faʻahinga sivisiviʻi-kita ʻoku feʻunga ki he kau sevāniti ʻa e ʻOtuá? (e) ʻOku toitoi ʻi fē ʻa e fakatuʻutāmakí?

⁷ ʻOku hala fakaʻaufuli ke fai ha sivisiviʻi-kita fakalelei? ʻIkai. ʻOkú ke manatuʻi nai naʻe fakalototoʻaʻi ʻe he ʻapositolo ko Paulá ʻa e kau Kalisitiané ke nau hanganaki sivisiviʻi kinautolu: “ʻE, mou sivi muʻa kimoutolu, pe ʻoku mou lotu moʻoni [pe ʻi he tuí]; ʻeke fakamoʻoni meiate kimoutolu.” (2 Kolinito 13:5) Naʻe pouaki heni ʻe he ʻapositoló ha feinga fakapotopoto ke ʻiloʻi ha vaivaiʻanga fakalaumālie pē kuo tupulaki nai, fakataha mo e taumuʻa ke fou ʻi ha ngaahi sitepu pau ke fakatonutonu kinautolu. Ko ha Kalisitiane, ʻi heʻene sivisiviʻi ia pe ʻokú ne ʻi he tuí, kuo pau ke ne fakapapauʻi pe ʻoku fehoanaki ʻene ngaahi leá mo e ngaahi ngāué mo ʻene taukaveʻi ʻo ʻene tuí. Kae kehe, kapau ʻoku takihalaʻi, ko e sivisiviʻi-kita ko ia ʻokú ne fakaʻaiʻai kitautolu ke tau vakai ki hotau “tuʻungá” pe ke kumi ki ha ngaahi tali ʻi tuʻa ia mei hotau vahaʻangatae mo Sihová pe ko e fakatahaʻanga Kalisitiané ʻe fakamoʻoniʻi ʻoku taʻeʻuhinga pea ʻoku malava ke fakatupu mate fakalaumālie. a ʻOua ʻaupito naʻa tau loto ‘ke hokosia ha tūkia ʻi he meʻa ʻoku kau ki heʻetau tuí’!—1 Timote 1:19.

ʻOku ʻIkai Ke Tau ʻAtā mei he Ngaahi Faingataʻá

8, 9. (a) Naʻe anga-fēfē hono fakahaaʻi ʻe Mōsese ʻene ngaahi ongoʻi ʻo e veiveiua-fakaekitá? (e) Naʻe anga-fēfē ʻa e tali ʻa Sihova ki he ngaahi ongoʻi fakangatangata ʻa Mōsesé? (f) ʻOku fēfē hono ueʻi koe ʻe he ngaahi fakapapau meia Sihová?

⁸ ʻOku totonu ki he kau Kalisitiane ʻoku nau toutou hokosia ha veiveiua-fakaekitá ke nau ongoʻi kuo nau taʻelavameʻa? Ko hono moʻoní ʻoku ʻikai! Ko e moʻoni, ʻoku malava ke nau maʻu ha fiemālie ʻi hono ʻiloʻi ko e ngaahi ongoʻi peheé ʻoku ʻikai foʻou. Ko e kau fakamoʻoni faitōnunga ʻa e ʻOtuá ʻi he kuohilí naʻa nau hokosia ʻa e ngaahi ongoʻi ko iá. Ko e fakatātaá, ko Mōsese, ʻa ia naʻá ne fakahāhā ʻa e tui, mateaki mo e līʻoa taʻehanotatau. ʻI hono vaheʻi ki ai ha ngafa hā ngali taulōfuʻú, naʻe ʻeke toumoua ʻe Mōsese: “Ko hai au?” (Ekisoto 3:11) Ngalingali, ko e tali naʻá ne fakakaukau ki aí, ‘ʻOku ʻikai haku mahuʻinga!’ pe ‘ʻOku ʻikai te u lavameʻa!’ Ko e ngaahi tafaʻaki ʻe niʻihi ʻo e puipuituʻa ʻo Mōsesé naʻá ne fakatupunga nai ia ke ne ongoʻi taʻefeʻungá: Naʻá ne  kau ki ha puleʻanga ʻo e kau pōpula. Naʻe ʻosi talitekeʻi ia ʻe he kau ʻIsilelí. Naʻe ʻikai ko ha tokotaha pōtoʻi lea ia. (Ekisoto 1:​13, 14; 2 :​11-14; 4:10) Ko ha tauhi-sipi ia, ko ha ngāue naʻe fakaliliʻa ai ʻa e kau ʻIsipité. (Senesi 46:34) ʻOku ʻikai ha ofo ʻi heʻene ongoʻi taʻefeʻunga ke hoko ko e tokotaha-fakatauʻatāina ʻo e kakai nofo pōpula ʻa e ʻOtuá!

⁹ Naʻe fakapapauʻi ʻe Sihova kia Mōsese ʻaki hono ʻoange kiate ia ʻa e ongo talaʻofa mālohi ʻe ua: “Te u ʻiate koe; pea ko eni haʻo fakamoʻoni ko Au ia kuo fekau atu koe: ʻOka ke ka taki atu ʻa e kakai na mei Isipite, te mou tauhi kia Elohimi ʻi he moʻunga ko eni.” (Ekisoto 3:12) Naʻe tala ange ʻe he ʻOtuá ki heʻene sevāniti toumouá te Ne ʻiate ia maʻu pē. Tānaki atu ki ai, naʻe fakahaaʻi ʻe Sihova te ne fakahaofi papau hono kakaí. ʻI he faai mai ʻa e ngaahi senitulí, kuo fai mai ai ʻe he ʻOtuá ʻa e ngaahi talaʻofa meimei tatau ʻo e tokoni. Hangē ko ʻení, fakafou ʻia Mōsese naʻá ne pehē ai ki he puleʻanga ʻo ʻIsilelí ʻi heʻenau teu hū ki he Fonua ʻo e Talaʻofá: “Ke ke malohi koe bea ke loto toʻa, . . . he ko Jihova ko ho Otua, koia ia oku mo o mo koe; e ikai te ne fakatukutukuʻi koe, be liaki koe.” (Teutalonome 31:​6, PM) Naʻe toe fakapapauʻi ʻe Sihova kia Siosiua: “ʻE ʻikai lava ʻe ha taha ke tuʻu kiate koe lolotonga hoʻo moʻui: . . . ʻe pehe ʻeku ʻiate koe: ʻe ʻikai te u fakatukuhausiaʻi koe, ʻumaʻa haʻaku liʻaki.” (Siosiua 1:5) Pea ʻokú ne talaʻofa mai ki he kau Kalisitiané: “ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.” (Hepelu 13:5) Ko hono maʻu ʻa e poupou mālohi peheé ʻoku totonu ke ne ʻai kitautolu ke tau ongoʻi laukauʻaki ʻa e hoko ko e kau Kalisitiané!

10, 11. Naʻe anga-fēfē hono tokoniʻi ʻa e Līvai ko ʻĒsafé ke ne tauhi maʻu ʻa e fakakaukau totonu ki he mahuʻinga ʻo ʻene ngāue kia Sihová?

¹⁰ ʻI he senituli nai ʻe nima hili ʻa Mōsesé, naʻe tohi moʻoni ai ha Līvai faitōnunga ko hono hingoá ko ʻĒsafe ʻo kau ki heʻene ngaahi veiveiua fekauʻaki mo e mahuʻinga ʻo e tuli ki ha ʻalunga anga-tonú. Lolotonga ʻene fāinga ʻi he tauhi ki he ʻOtuá neongo ʻa e ngaahi ʻahiʻahí mo e ngaahi fakatauelé, naʻe sio ʻa ʻĒsafe ia ki he niʻihi ko ia naʻe luma ki he ʻOtuá ʻoku nau hoko ʻo mālohi ange mo lakalakaimonū ange. Naʻe uesia fēfē ai ʻa ʻĒsafé? “Ka ko au naʻe toe siʻi ke humu hoku vaʻe,” ko ʻene tala totonú ia. “Ko ʻeku laka naʻe meimei ko e koto tatele. He naʻa ku meheka ki he kau fakamalohi, ʻeku sio ki he tuʻumalie ʻa e haʻa fai kovi.” Naʻe kamata ke ne veiveiua ki he mahuʻinga ʻo e hoko ko ha tokotaha lotu ʻa Sihová. “Ta ko e kulanoa ʻeku toutou tafi hoku loto ke maʻa, mo ʻeku fanofano hoku nima ʻi he taʻe angahala,” ko e fakakaukau ia ʻa ʻĒsafé. “He ʻoku fai hoku taaʻi ʻi he ʻaho kotoa.”—Sāme 73:​2, 3, 13, 14.

¹¹ Naʻe anga-fēfē ʻa e fekuki ʻa ʻĒsafe mo e ngaahi ongoʻi fakahohaʻa ko ʻení? Naʻá ne fakaʻikaiʻi kinautolu? ʻIkai. Naʻá ne fakahaaʻi kinautolu ʻi he lotu ki he ʻOtuá, ʻo hangē ko ia ʻoku tau sio ai ʻi he Sāme hono 73. Ko e liliuʻanga kia ʻĒsafé ko ha ʻaʻahi ki he potu toputapu ʻo e temipalé. Lolotonga ʻene ʻi aí, naʻá ne fakatokangaʻi ai ko e līʻoa ki he ʻOtuá ʻoku kei hoko ia ko e ʻalunga lelei tahá. ʻI hono fakafoʻou ʻene mahino fakalaumālié, naʻá ne mahinoʻi ai naʻe fehiʻa ʻa Sihova ki he koví pea ʻi he taimi kuo kotofá ʻe tauteaʻi ai ʻa e fulikivanú. (Sāme 73:​17-19) ʻI he fakakaukau fakatonutonu ko iá, naʻe fakaivimālohiʻi ai ʻe ʻĒsafe ʻene ongoʻi ʻa hono tuʻunga ko ha sevāniti lāngilangiʻia ʻa Sihová. Naʻá ne pehē ki he ʻOtuá: “Ko au ko ia ʻoku ta feʻao maʻu: kuo ke puke hoku toʻomataʻu. Te ke faleʻi au, ʻo taki hala, pea hili ia  te ke tali fakahu au ki he kololia.” (Sāme 73:​23, 24) Naʻe hoko ai ʻa ʻĒsafe ʻo toe laukauʻaki hono ʻOtuá.—Sāme 34:2.

Naʻa Nau Maʻu ha Ongoʻi Mālohi ʻo Honau Tuʻungá

12, 13. ʻOmai ha ngaahi fakatātā ʻo e faʻahinga ʻi he Tohi Tapú naʻa nau laukauʻaki honau vahaʻangatae mo e ʻOtuá.

¹² Ko e founga ʻe taha ke tau fakaivimālohiʻi ai ʻetau ongoʻi hotau tuʻunga ko e Kalisitiané ko hono sivisiviʻi pea faʻifaʻitaki ki he tui ʻa e kau lotu mateakí, ʻa ia neongo ʻa e faingataʻaʻiá naʻa nau laukauʻaki moʻoni honau vahaʻangatae mo e ʻOtuá. Fakakaukau atu kia Siosifa, ko e foha ʻo Sēkopé. ʻI heʻene kei taʻu siʻí, naʻe fakatau anga-lavaki ai ia ko ha pōpula pea ʻave ki ʻIsipite, ko e kilomita ʻe laui teau mei heʻene tamai manavahē-ʻOtuá pea mamaʻo ʻaupito mei he ʻatimosifia māfana mo e tokoni ʻo hono ʻapí. Lolotonga ʻene ʻi ʻIsipité, naʻe ʻikai maʻu ʻe Siosifa ha tangata ke hanga ki ai ki ha faleʻi fakaʻotua, pea naʻe pau ke ne fehangahangai mo e ngaahi tuʻunga faingataʻa naʻe ʻahiʻahiʻi ai hono ʻulungāangá mo ʻene falala ki he ʻOtuá. Kae kehe, naʻá ne fai ha feinga loto-moʻoni ke tauhi maʻu ha ongoʻi mālohi ʻo hono tuʻunga ko ha sevāniti ʻa e ʻOtuá, pea naʻá ne faitōnunga ai pē ki he meʻa naʻá ne ʻilo naʻe tonú. Naʻá ne laukauʻaki ʻene hoko ko ha tokotaha lotu ʻa Sihová naʻa mo e ʻi ha ʻātakai fakafilí, pea naʻe ʻikai te ne toumoua ʻi hono fakahaaʻi ʻa e anga ʻo ʻene ongoʻí.—Senesi 39:​7-10.

¹³ ʻI he senituli ʻe valu mei ai, ko ha kiʻi taʻahine pōpula ʻIsileli ʻa ia naʻe hoko ko ha pōpula ʻa e ʻeiki tau Sīlia ko Neamaní naʻe ʻikai ngalo ʻiate ia hono tuʻunga ko ha tokotaha lotu ʻa Sihová. ʻI he malanga hake ʻa e faingamālié, naʻá ne fai loto-toʻa ha fakamoʻoni lelei maʻa Sihova ʻi heʻene fakahaaʻi ʻa ʻIlaisa ko ha palōfita ʻa e ʻOtua moʻoní. (2 Tuʻi 5:​1-19) Hili ha ngaahi taʻu mei ai, ko Tuʻi Siosaia kei siʻi, neongo ʻene ʻi ha ʻātakai koví, naʻá ne fakahoko ha ngaahi fakalelei fakalotu taimi-lōloa, toe monomono ʻa e temipale ʻo e  ʻOtuá, pea tataki ʻa e puleʻangá ke toe foki kia Sihova. Naʻá ne laukauʻaki ʻene tuí mo ʻene lotú. (2 Kalonikali, vahe 34, 35) Ko Taniela mo hono kaungāmeʻa Hepelū ʻe toko tolu ʻi Pāpiloné naʻe ʻikai ʻaupito ke ngalo ʻiate kinautolu honau tuʻunga ko e kau sevāniti ʻa Sihová, pea naʻa mo e ʻi he malumalu ʻo e tenge mo e ʻahiʻahí, naʻa nau tauhi ʻenau anga-tonú. ʻOku hā mahino, naʻa nau laukauʻaki ʻenau hoko ko e kau sevāniti ʻa Sihová.—Taniela 1:​8-20.

Hoko ʻo Laukauʻaki Ho Tuʻungá

14, 15. Ko e hā ʻoku kau ki he laukauʻaki hotau tuʻunga ko e Kalisitiané?

¹⁴ Naʻe lavameʻa ʻa e kau sevāniti ko ʻeni ʻa e ʻOtuá koeʻuhi naʻa nau ohi ha ongoʻi totonu ʻo e laukau ʻi honau tuʻunga ʻi he ʻao ʻo e ʻOtuá. Fēfē kitautolu he ʻaho ní? Ko e hā ʻoku kau ki he laukauʻaki hotau tuʻunga ko e Kalisitiané?

¹⁵ Ko e meʻa tefitó, ʻoku kau ki heni ha houngaʻia loloto ʻi he hoko ko e taha ʻo e kakai ʻi he huafa ʻo Sihová, ʻo maʻu ʻene tāpuakí mo ʻene hōifuá. ʻOku ʻikai ha veiveiua ʻa e ʻOtuá fekauʻaki mo e faʻahinga ʻoku ʻaʻaná. Ko e ʻapositolo ko Paulá, ʻa ia naʻá ne moʻui ʻi ha kuonga ʻo e puputuʻu fakalotu lahi ʻaupitó, naʻá ne tohi: “ʻOku ʻilo ʻe he ʻEiki [pe Sihova] ʻa kinautolu ʻoku oʻona.” (2 Timote 2:19; Nomipa 16:5) ʻOku laukauʻaki ʻe Sihova ʻa e faʻahinga “oku oʻona.” ʻOkú ne talaki: “Ko ia ʻoku ne ala kiate kimoutolu ʻoku ne ala ki he tamaʻimata ʻo ʻene ʻAfio.” (Sakalaia 2:8) ʻOku hā mahino, ʻoku ʻofa ʻa Sihova ʻia kitautolu. Ko ia ai, ko hotau vahaʻangatae mo iá ʻoku totonu ke fakatuʻunga ia ʻi he ʻofa loloto kiate ia. Naʻe pehē ʻe Paula: “Oka ai ha taha oku ofa ki he Otua, oku ilo ia eia.”—1 Kolinito 8:​3, PM.

16, 17. Ko e hā ʻoku malava ai ki he kau Kalisitiané, iiki mo e lalahi, ke nau laukauʻaki honau tofiʻa fakalaumālié?

¹⁶ Ko e toʻutupu ko ia kuo tauhi hake ko e Kau Fakamoʻoni ʻa Sihová ʻoku lelei ke nau sivisiviʻi pe ko honau tuʻunga ko e Kalisitiané ʻoku hoko ʻo mālohi ange makatuʻunga ʻi ha vahaʻangatae fakafoʻituitui mo e ʻOtuá. Heʻikai malava ke nau fakafalala pē ki he tui ʻa ʻenau ongo mātuʻá. ʻI he fekauʻaki mo e sevāniti taki taha ʻa e ʻOtuá, naʻe tohi ʻe Paula: “ʻOku ʻi he ʻene ʻeiki aʻana haʻane tuʻu pe hinga.” Ko ia, ʻoku hoko atu ʻa Paula: “Te tau taki taha fai ha fakamatala ki he ʻOtua maʻata.” (Loma 14:​4, 12) ʻOku hā mahino, ko ha hokohoko atu fakapāpākū ʻo e lotu tukufakaholo fakafāmilí heʻikai malava ke ne fakatolonga ʻe ia ha vahaʻangatae fekoekoeʻi taimi-lōloa mo Sihova.

¹⁷ Kuo ʻi ai ha hokohoko ʻo e kau fakamoʻoni ʻa Sihová, ʻi he kotoa ʻo e hisitōliá. ʻOku lele ia mei he tangata faitōnunga ko ʻĒpelí—ʻi he senituli nai ʻe 60 kuo maliu atú—ki he “fuʻu kakai lahi” ʻo e Kau Fakamoʻoni ʻi onopōní pea hoko atu ai ki he fuʻu tokolahi ʻo e kau lotu ʻa Sihova ʻa ia te nau maʻu ha kahaʻu taʻengatá. (Fakahā 7:9; Hepelu 11:4) Ko kitautolu ʻa e fakamuimui taha ʻo e fuʻu laine lōloa ko ʻeni ʻo e kau lotu faitōnungá. Ko ha tofiʻa fakalaumālie mahuʻinga ē ʻoku tau maʻú!

18. ʻOku anga-fēfē hono hanga ʻe heʻetau ngaahi meʻa ʻoku fakamahuʻingaʻí mo ʻetau ngaahi tuʻungá ʻo fakamavaheʻi kitautolu mei he māmaní?

¹⁸ ʻOku toe kau ki hotau tuʻunga ko e Kalisitiané ʻa e faʻunga ʻo e ngaahi meʻa ʻoku fakamahuʻingaʻi, ngaahi ʻulungāanga, ngaahi tuʻunga mo e ngaahi tōʻonga ʻokú ne fakahaaʻi kitautolu ko e kau Kalisitiané. Ko e ‘halá’ ia, ʻa e hala lavameʻa pē taha ʻo e moʻuí pea ʻoku fakahōifua ki he ʻOtuá. (Ngāue 9:2; Efeso 4:​22-24) Ko e kau Kalisitiané ʻoku nau “ahiahiʻi ae gaahi mea kotoabe” pea “buke ke mau aia oku lelei”! (1 Tesalonaika 5:​21, PM) ʻOku tau maʻu ha mahino māʻalaʻala ki he fuʻu faikehekehe ʻi he vahaʻa ʻo e lotu faka-Kalisitiané pea mo e māmani ko ia ʻoku mavahe mei he ʻOtuá. ʻOku ʻikai ke fakaʻatā ʻe Sihova ha fetoʻoaki ʻe taha ʻi he vahaʻa ʻo e lotu moʻoní mo e loí. Naʻá ne fanongonongo fakafou ʻi heʻene palōfita ko Malakaí: “Te mou toe sio ki he fai kehe kehe  ʻa e maʻoniʻoni mo e angahala, ʻa e faikehekehe ʻa e taha ʻoku ngaue ki he ʻOtua mo ia ʻoku ʻikai ke ngaue ki ai.”—Malakai 3:18.

19. Ko e hā ʻe ʻikai ʻaupito hoko ki ai ʻa e kau Kalisitiane moʻoní?

¹⁹ Koeʻuhi ʻoku mātuʻaki mahuʻinga ʻa e vīkiviki ʻia Sihova ʻi he māmani puputuʻu mo fakaʻalongaua ko ʻení, ko e hā ʻe lava ke ne tokoniʻi kitautolu ke tau tauhi maʻu ha laukau totonu ʻaki ʻi hotau ʻOtuá pea mo ha ongoʻi mālohi ʻo e tuʻunga ko e Kalisitiané? ʻOku maʻu ʻa e ngaahi fokotuʻu ʻaonga ʻi he kupu hoko maí. ʻI he lolotonga ʻa e lāulea ki he ngaahi meʻá ni, ʻe lava ke ke fakapapauʻi ai ʻa e meʻa ko ʻení: ʻE ʻikai ʻaupito hoko ʻa e kau Kalisitiane moʻoní ko ha kau maʻukovia ʻo e “tui-taʻemahuʻingaʻiá.”

[Fakamatala ʻi lalo]

ʻOkú Ke Manatuʻi?

• ʻE malava fēfē ʻe he kau Kalisitiané ke nau ‘vikiviki ʻia Sihova’?

• Ko e hā kuó ke ako mei he ongo fakatātā fekauʻaki mo Mōsese pea mo ʻĒsafé?

• Ko hai ʻa e faʻahinga ʻi he Tohi Tapú naʻa nau laukauʻaki ʻenau ngāue ki he ʻOtuá?

• Ko e hā ʻoku kau ki he laukauʻaki ʻa hotau tuʻunga ko e Kalisitiané?

[Fehuʻi ki he Ako]

[Fakatātā ʻi he peesi 14]

Naʻe maʻu ʻe Mōsese ʻi ha taimi ha ngaahi ongoʻi ʻo e veiveiua-fakaekita

[Fakatātā ʻi he peesi 15]

Naʻe laukauʻaki ʻe he kau sevāniti tokolahi ʻa Sihova ʻi he kuonga muʻá ʻa honau tuʻunga makehé