ʻOku Malava ke Lavameʻa ʻa e Nofo Malí he Māmani ʻo e ʻAho Ní
ʻOku Malava ke Lavameʻa ʻa e Nofo Malí he Māmani ʻo e ʻAho Ní
“Mou kofutuʻaʻaki . . . ʻa e ʻofa, ʻa ia ko e fakamaʻu ʻo e haohaoa.”—Kolose 3:14.
1, 2. (a) Ko e hā ʻa e moʻoniʻi meʻa ʻoku fakalototoʻa ʻi he fekauʻaki mo e fakatahaʻanga Kalisitiané? (e) Ko e hā ha nofo mali lavameʻa?
ʻI HEʻETAU vakai atu ki he fakatahaʻanga Kalisitiané, ʻikai ʻoku fakalotomāfana ke sio ki he ngaahi hoa mali tokolahi ʻaupito kuo nau mateaki ki honau ngaahi hoá ʻi he taʻu ʻe 10, 20, 30, pe naʻa mo ha ngaahi taʻu lahi ange? Kuo nau pīkitai ki honau ngaahi hoá ʻi he ngaahi faingataʻa mo e fakafaingataʻaʻiaʻanga kotoa pē.—Senesi 2:24.
2 Ko e tokolahi tahá te nau fakahaaʻi moʻoni kuo ʻikai ke taʻeʻiai ha ngaahi faingataʻa ʻi heʻenau nofo malí. Naʻe tohi ʻe ha failīpooti ʻe taha: “ʻOku ʻikai ke taʻeʻiai ha ngaahi faingataʻa ʻi he ngaahi nofo mali fiefiá. ʻOku ʻi ai ʻa e ngaahi taimi lelei mo e ngaahi taimi kovi . . . Ka ʻi ha faʻahinga tuʻunga . . . kuo kei nofo mali pē ʻa e kakaí ni neongo ʻa e [haʻahaʻa] ʻo e moʻui ʻi onopōní.” Ko e ngaahi hoa mali lavameʻá kuo nau ako ke fekuki mo e ngaahi haʻahaʻa mo e ngaahi taimi faingataʻa taʻealakalofi ʻoku hoko mei he ngaahi tenge ʻo e moʻuí, tautefito kapau kuo nau tauhi hake ha fānau. Kuo hanga ʻe he meʻa ʻoku hokosiá ʻo akoʻi ki he ngaahi hoa mali peheé ko e ʻofa moʻoní “ʻoku ʻikai ke kaʻanga ia ʻi ha taimi.”—1 Kolinito 13:8.
3. Ko e hā ʻoku fakahaaʻi ʻe he ngaahi fiká ʻo fekauʻaki mo e nofo malí mo e vete malí, ʻo iku ai ki he ongo fehuʻi ko e hā?
3 ʻI hono kehé, kuo movete ʻa e ngaahi nofo mali ʻe laui miliona. ʻOku pehē ʻe ha līpooti: “Ko e vaeua ʻo e ngaahi nofo mali kotoa pē ʻi he U.S. he ʻaho ní ʻoku ʻamanekina ke fakangata ia ʻi he vete malí. Pea ko e vaeua ʻo e [ngaahi vete mali] ko iá ʻe hoko ia ʻi loto ʻi he ʻuluaki taʻu ʻe 7.8 ʻo e nofo malí . . . ʻI he lotolotonga ʻo e peseti ʻe 75 ʻo e kakai ko ia ʻoku toe malí, ko e peseti ʻe 60 ai ʻe toe vete pē ia.” Naʻa mo e ngaahi fonua ko ia naʻe kiʻi māʻulalo ai ʻa e tuʻunga ʻo e vete malí kuo mātā ai ha liliu. Ko e fakatātaá, kuo meimei liunga ua ʻa e tuʻunga ʻo e vete malí ʻi Siapani ʻi he ngaahi taʻu ki muí ni maí. Ko e hā ʻa e niʻihi ʻo e ngaahi tenge ne iku ai ki he tuʻunga ko ʻení, ʻa e ngaahi tenge ko ia ʻoku aʻu ʻo faʻa hā he taimi ʻe niʻihi ʻi he loto fakatahaʻanga Kalisitiané? Ko e hā ʻoku fiemaʻú ki hono ʻai ha nofo mali lavameʻa neongo ʻa e ngaahi feinga ʻa Sētane ke fakavaivaiʻi ʻa e fokotuʻutuʻu ko iá?
Ngaahi Tōʻanga ke Fakaʻehiʻehi mei Ai
4. Ko e hā ʻa e ngaahi moʻoniʻi meʻa ʻe niʻihi ʻoku malava ke ne fakavaivaiʻi ha nofo mali?
4 ʻOku tokoniʻi kitautolu ʻe he Folofola ʻa e ʻOtuá ke tau mahinoʻi ʻa e ngaahi moʻoniʻi meʻa ʻoku malava ke nau fakavaivaiʻi ha nofo malí. Ko e fakatātaá, fakakaukau angé ki he ngaahi lea ʻa e ʻapositolo ko Paulá ʻo fekauʻaki mo e ngaahi tuʻunga ʻe hoko ʻi he lolotonga ʻa e ngaahi ʻaho fakaʻosí ni: “E hoko i he gaahi aho fakamui ae kuoga fakatuutamaki. Koeuhi e ofa ae kau tagata kiate kinautolu be, o manumanu, mo bolebole, mo laukau, mo lea kovi, mo talagataa ki he matua, mo taefakafetai, mo taemaonioni, o taemaʻu ae ofa oku gali moe kaiga, o liaki ae lea fakababau, koe kau lohiaki, koe kau holi kovi, koe kau aga malohi, koe kau manuki kiate kinautolu oku lelei, koe kau lavaki, o aga ohonoa, mo loto fielahi, koe kau ofa lahi hake ki he gaahi malie fakamama i he e nau ofa ki he Otua; oku nau maʻu hono geeji oe lotu, ka oku nau liaki a hono malohi: ke ke afe mei he kakai behe.”—2 Timote 3:1-5, PM.
5. Ko e hā ʻoku fakatuʻutāmaki ai ki he nofo mali ʻa ha taha ʻa ʻene ‘ofa kiate ia be,’ pea ko e hā ʻa e akonaki ʻa e Tohi Tapú ʻi he meʻá ni?
5 ʻI heʻetau ʻanalaiso ʻa e ngaahi lea ʻa Paulá, ʻoku tau sio ai ko e konga lahi ʻo e ngaahi meʻa naʻá ne fakahokohoko maí ʻoku malava ke fakatupu ai ʻa e movete ʻa e ngaahi vā fakaemalí. Ko e fakatātaá, ko e faʻahinga ko ia ʻoku nau “ofa . . . kiate kinautolu be” ʻoku nau siokita mo ʻikai fakakaukau ki he niʻihi kehé. Ko e ngaahi husepāniti pe ngaahi uaifi ko ia ʻoku nau ʻofa kiate kinautolu peé ʻoku nau fakapapauʻi ke maʻu ʻa e meʻa pē ʻoku nau fiemaʻú. ʻOku ʻikai te nau ngaofengofua, ʻikai ke ʻulutukua. ʻE tokoni ha faʻahinga fakakaukau pehē ki ha nofo mali fiefia? ʻIkai ʻaupito. Naʻe akonaki fakapotopoto ʻa e ʻapositolo ko Paulá ki he kau Kalisitiané, ʻo kau ai ʻa e ngaahi hoa malí: “[Ko kimoutolú ʻoku totonu ke] ʻoua ʻe feinga ki ha meʻa ko e fakafekākeʻi, pe ko e fieongoongoa; ka ʻi hoʻomou loto taʻehiki mou taki taha lau ʻoku lelei hake ʻa hono kainga ʻiate ia: pea ʻoua naʻa taki taha tokanga ki heʻene meʻa aʻana pe, ka ki he meʻa ʻa e kakai kehe foki.”—Filipai 2:3, 4.
6. ʻOku anga-fēfē ʻa e malava ʻe he ʻofa ki he paʻangá ʻo fakavaivaiʻi ha vahaʻangatae fakaemali?
6 ʻOku malava ʻe he ʻofa ki he paʻangá ke ne fakatupunga ha mavahevahe ʻi he vahaʻa ʻo ha husepāniti mo ha uaifi. Naʻe fakatokanga ʻa Paula: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia. He ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe, pea ko e niʻihi ʻi heʻenau ala ki he meʻa ko ia kuo nau hē mei he lotu, pea kuo nau hokohokaʻi ʻaki ʻa kinautolu ʻa e ngaahi mamahi lahi.” (1 Timote 6:9, 10) Ko hono pangó, kuo hoko moʻoni ʻa e fakatokanga ia ʻa Paulá ʻi he ngaahi nofo mali lahi he ʻahó ni. ʻI heʻenau kumi ki he tuʻumālié, kuo siʻaki ai ʻe he ngaahi hoa mali lahi ʻa e ngaahi fiemaʻu ʻa honau ngaahi hoá, ʻo kau ai ʻa e fiemaʻu tefito ki ha poupou fakaeongo mo e feohi māfana tuʻumaʻú.
7. ʻI he ngaahi tuʻunga ʻe niʻihi, ko e hā ʻa e ʻulungāanga kuo taki atu ki he taʻemateaki fakaemalí?
7 Naʻe toe pehē ʻe Paula ko e niʻihi ʻi he ngaahi ʻaho fakaʻosí ni te nau “taemaonioni [pe taʻemateaki], o taemaʻu ae ofa oku gali moe kaiga, o liaki ae lea fakababau.” Ko e fuakava malí ko ha palōmesi molumalu ia ʻoku totonu ke taki atu ki ha haʻi tuʻuloa, ʻikai ki he lavaki. (Malakai 2:14-16) Neongo ia, kuo fakahanga ʻe he niʻihi ia ʻenau tokanga fakaemanakó ki he faʻahinga tāutaha kehe ia mei honau ngaahi hoá. Ko ha uaifi ʻe taha ʻi hono taʻu 30 tupú ʻa ia naʻe liʻaki ia ʻe hono husepānití naʻá ne fakamatala ʻo pehē naʻa mo e ki muʻa ke ne mavahé, naʻá ne tōʻonga fuʻu fakamaheni, fuʻu fakakaumeʻa ʻaupito ki he kakai fefine kehé. Naʻe ʻikai te ne ʻiloʻi ʻa e ʻulungāanga ʻoku taʻefeʻunga ki ha tangata malí. Naʻe ongoʻi loto-mamahi ʻaupito ʻa e fefiné ʻi heʻene sio ki he hoko ʻa e meʻá ni pea naʻá ne feinga fakapotopoto ke fakatokanga kiate ia fekauʻaki mo e hala fakatuʻutāmaki naʻá ne fou aí. Neongo ia, naʻá ne tō ki he tonó. Neongo ʻa e ngaahi fakatokanga ʻofa naʻe faí, naʻe ʻikai pē ke fie tokanga mai ʻa e hoa fakatupu loto-mamahí ia. Naʻá ne tō ʻi he taʻetokanga ki he tauhelé.—Palovepi 6:27-29.
8. Ko e hā ʻoku malava ke taki atu ki he tonó?
8 He mahino lahi ē ko e fakatokanga ʻa e Tohi Tapú ki he tonó! “Koia oku tonofefine, oku majiva boto: koia oku ne fai ia oku fakaauha eia hono laumalie oona.” (Palovepi 6:32, PM) Ko e meʻa ʻoku faʻa hokó, ko e tonó ʻoku ʻikai ko ha foʻi ngāue ʻoku ākenoa hake pē ʻi he loto-ʻoho. Hangē ko ia naʻe fakahaaʻi ʻe he tokotaha-tohi Tohi Tapu ko Sēmisí, ko ha angahala hangē ko e tonó ʻoku faʻa toki hoko pē ia ʻi he hili hono maʻu ʻi he fakakaukaú pea hokohoko fakakaukau ki ai. (Semisi 1:14, 15) Ko e hoa fakalotomamahí ʻoku faai atu pē ʻo tuku ʻene mateaki ki he hoa ko ia naʻá ne fuakava ke anga-tonu ki ai ʻi he kotoa ʻo e moʻuí. Naʻe pehē ʻe Sīsū: “Kuo mou fanongo naʻe folofolaʻaki, ʻOua naʻa ke tono fefine: ka ʻoku ou tala kiate kimoutolu ʻe au, ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.”—Mātiu 5:27, 28.
9. Ko e hā ʻa e akonaki fakapotopoto ʻoku maʻu ʻi he Palovepi 5:18-20?
9 Ko ia ai, ko e ʻalunga fakapotopoto mo mateakí ko e ʻalunga ko ia ʻoku fakalototoʻaʻi mai ʻi he tohi ʻa Palovepí: “Ke monuia ho matavai: bea ke fiefia koe i ho unoho aia naa ke maʻu i hoo kei talavou. Ke tatau be ia moe hainite ofa moe kaseli fakaofoofa; bea ke fiemalie mau ai be koe i hono fatafata; bea ke fakafiefiaʻi koe i he aho kotoabe i he ene ofa. E hoku foha, koeha ka ke ka he ai i he fefine muli, bea faufua ki he fatafata oe muli?”—Palovepi 5:18-20, PM.
ʻOua ʻe Fakavave ke Mali
10. Ko e hā ʻoku fakapotopoto ai ke vaheʻi ha taimi ke ʻilo ai ki hato hoa ʻoku ʻamanekina?
10 ʻOku malanga hake nai ʻa e ngaahi palopalema ʻi he nofo malí ʻi he taimi ʻoku fakavave ai ha ongo meʻa ke na malí. ʻOkú na fuʻu kei siʻi nai mo taʻetaukei. Pe mahalo pē ʻoku ʻikai te na vaheʻi ha taimi ke na feʻilongaki ai—ʻena ngaahi saiʻiá mo e ngaahi fehiʻá, ʻena ngaahi taumuʻa ʻi he moʻuí, hona ʻātakai fakafāmilí. ʻOku fakapotopoto ke ngāueʻaki ʻa e kātakí, vaheʻi ha taimi ke ʻilo ai ki he hoa ʻoku ʻamanekiná. Fakakaukau atu kia Sēkope, ko e foha ʻo ʻAisaké. Naʻe pau ke ne ngāue ki heʻene tamai-ʻi-he-fono ʻi he kahaʻú ʻi he taʻu ʻe fitu ki muʻa ke fakaʻatā ia ke mali mo Lesielí. Naʻá ne loto-lelei ke fai ia koeʻuhi ko ʻene ngaahi ongoʻí naʻe makatuʻunga ʻi he ʻofa moʻoni, ʻikai ʻi ha manako fakaesino pē.—Senesi 29:20-30.
11. (a) Ko e hā ʻoku fakatahaʻi ʻe he haʻi fakaemalí? (e) Ko e hā ʻoku mātuʻaki mahuʻinga ai ʻi he nofo malí ʻa hono ngāuefakapotopotoʻaki ʻa e leá?
11 Ko e nofo malí ʻoku ʻikai ko ha vahaʻangatae fakaemanako pē. Ko e haʻi fakaemalí ʻoku fakatahaʻi ai ʻa e ongo meʻa ʻe toko ua mei he ongo ʻātakai fakafāmili kehekehe pea mo e ongo angaʻitangata kehekehe, faʻunga fakaeongo, pea faʻa hoko mei he ongo ʻātakai fakaeako kehekehe. ʻI he taimi ʻe niʻihi ko hano fakatahaʻi ʻo ha ongo anga fakafonua, naʻa mo ha ongo lea ʻe ua. Neongo pe ko e hā, ʻokú ne ʻomai fakataha ʻa e ongo leʻo ʻe ua fakataha mo e malava ke fakahaaʻi ʻa e ngaahi fakakaukau kehekehe ʻi he faʻahinga meʻa kotoa pē. Ko e ongo leʻo ʻe ua ko iá ko ha konga mātuʻaki moʻoni ia ʻo ha haʻi fakaenofo mali. ʻOku malava ke na fakaanga mo lāunga maʻu pē, pe ʻoku malava ke na fakalototoʻa māfana mo fakatupu langa hake. ʻIo, ʻaki ʻetau ngaahi leá ʻoku malava ai ke tau fakalotomamahiʻi pe fakamoʻui hotau hoá. ʻOku malava ʻe he lea taʻemapuleʻí ʻo ʻai ke mafasia moʻoni ha nofo mali.—Palovepi 12:18; 15:1, 2; 16:24; 21:9; 31:26.
12, 13. Ko e hā ʻa e vakai fakamoʻomoʻoni fekauʻaki mo e nofo malí ʻoku fakalototoʻaʻi maí?
12 Ko ia ai, ʻoku fakapotopoto ke vaheʻi ha taimi ke ʻiloʻi moʻoni ai ha hoa ʻoku ʻamanekina. Naʻe pehē ʻe ha tuofefine Kalisitiane taukei: “ʻI hoʻo vakai atu ki ha hoa mali ʻoku ʻamanekina, fakakaukau ki ha ngaahi fiemaʻu tefito nai ʻe hongofulu te ke saiʻia ke sio ʻoku ʻi he tokotaha ko iá. Kapau ko e fitu pē ʻe malava ke ke maʻú, ʻeke hifo kiate koe, ‘ʻOku ou loto-lelei ke tukunoaʻi ʻa e tolu ko ē ʻoku ʻikai maʻú? ʻE lava ke u kātakiʻi ʻi ha tuʻunga fakaʻaho ʻa e ngaahi tōnounou ko iá?’ Kapau ʻokú ke veiveiua, kiʻi tuʻu ʻo toe fakakaukau.” Ko hono moʻoní, ʻoku fiemaʻu ke ke fakamoʻomoʻoni. Kapau ʻokú ke loto ke ke mali, ʻai ke ke ʻiloʻi heʻikai ʻaupito te ke maʻu ha hoa haohaoa. Ka, ʻi he taimi tatau pē, ko e tokotaha ʻe faai atu ʻo ke mali mo iá ʻe ʻikai foki ko ha hoa haohaoa ia te ne maʻú!—Luke 6:41.
13 ʻOku kau ki he nofo malí ha ngaahi feilaulau. Naʻe fakamamafaʻi ʻeni ʻe Paula ʻi heʻene pehē: “Ko siʻeku feinga ke ʻoua te mou lotomoʻua. ʻOku moʻua ʻa e loto ʻo e tangata taʻe maʻu uaifi ʻi he ngaahi meʻa ʻa e ʻEiki, heʻene feinga ke hohóʻia ʻa e finangalo ʻo e ʻEiki: ka ko e tangata fakauaifi ʻoku moʻua hono loto ʻi he meʻa ʻo mamani, heʻene feinga ke hohóʻia hono uaifi; pea fetohoaki ai hono loto. Pea ko e fefine taʻemali, pe ko e finemui, ʻoku moʻua hono loto ʻi he ngaahi meʻa ʻa e ʻEiki, koeʻuhi ke maʻoniʻoni hono sino mo hono laumalie fakatouʻosi: ka ko e fefine kuo mali ʻoku moʻua hono loto ʻi he meʻa ʻo mamani, heʻene feinga ke hohóʻia hono husepaniti.”—1 Kolinito 7:32-34.
ʻUhinga ʻOku Taʻelavameʻa Ai ʻa e Ngaahi Nofo Mali ʻe Niʻihi
14, 15. Ko e hā ʻoku malava ke tokoni ki hono fakavaivaiʻi ʻa e haʻi ʻo e nofo malí?
14 Naʻe hokosia ki muí ni ʻe ha fefine Kalisitiane ʻa e mamahi ʻo e vete malí ʻi hono liʻaki ia ʻe hono husepānití hili ʻa e taʻu ʻe 12 ʻo e nofo malí ʻo kamata ha vahaʻangatae mo ha toe fefine ʻe taha. Naʻá ne fakatokangaʻi ha faʻahinga fakaʻilonga fakatokanga ki muʻa ʻi he taki taha maʻaná? ʻOkú ne fakamatala: “Naʻe aʻu ʻa e husepānití ki ha tuʻunga naʻe ʻikai te ne kei fai ai ha lotu. Naʻá ne ngāueʻaki ʻa e ngaahi kalofanga vaivai ki hono liʻaki ʻa e ngaahi fakataha faka-Kalisitiané pea mo e ngāue fakamalangá. Naʻá ne taukaveʻi ʻokú ne fuʻu femoʻuekina pe fuʻu helaʻia ke fakamoleki ha taimi mo au. Naʻe ʻikai te ne talanoa mai kiate au. Naʻe ʻi ai ha mavahe fakalaumālie. Ko ha tuʻunga fakaʻofa pehē naʻe hokó. Naʻe ʻikai te ne kei hoko ko e tangata naʻá ku mali mo iá.”
15 ʻOku līpooti mai ʻe he niʻihi kehe ʻoku nau fakatokangaʻi ʻa e ngaahi fakaʻilonga meimei tatau,ʻo kau ai ʻa hono siʻaki ʻo e ako Tohi Tapu fakafoʻituituí, lotú pe maʻu ʻo e ngaahi fakataha faka-Kalisitiané. ʻI hono fakalea ʻe tahá, ko e faʻahinga tāutaha tokolahi kuo faai atu pē ʻo nau liʻaki honau ngaahi hoá naʻa nau fakaʻatā honau vahaʻangatae mo Sihová ke hoko ʻo vaivai. Ko hono olá, naʻe nenefu ʻenau sio fakalaumālié. Naʻe ʻikai ke kei hoko ʻa Sihova ko ha ʻOtua moʻui kiate kinautolu. Naʻe ʻikai ke kei hoko ko ha meʻa moʻoni ʻa e talaʻofa fekauʻaki mo e māmani foʻou māʻoniʻoní. ʻI he ngaahi tuʻunga ʻe niʻihi, naʻe hoko ʻa e vaivai fakalaumālie ko ʻení naʻa mo e ki muʻa ke fokotuʻu ʻe he hoa taʻefaitōnungá ha fepikitaki ʻi tuʻa ia mei he nofo malí.—Hepelu 10:38, 39; 11:6; 2 Pita 3:13, 14.
16. Ko e hā ʻokú ne fakaivimālohiʻi ha nofo mali?
16 ʻI hono kehé, ʻoku taku ʻe he hoa mali fiefia ʻaupito ʻe taha ʻa e lavameʻa ʻo ʻena nofo malí ki hona ngaahi haʻi fakalaumālie mālohí. ʻOkú na lotu fakataha mo ako fakataha. ʻOku pehē ʻe he husepānití: “ʻOkú ma lau fakataha ʻa e Tohi Tapú. ʻOkú ma ʻalu fakataha ʻi he ngāue fakafaifekaú. ʻOkú ma fiefia ʻi hono fai fakataha ha ngaahi meʻa.” ʻOku mahino ʻa e lēsoní: Ko hono tauhi maʻu ha vahaʻangatae lelei mo Sihová ʻe tokoni lahi ia ki he tuʻunga fefeka ʻa ha nofo mali.
Hoko ʻo Fakamoʻomoʻoni mo Fetuʻutaki
17. (a) Ko e hā ʻa e ongo meʻa ʻe ua ʻoku tokoni ki ha nofo mali lavameʻá? (e) ʻOku anga-fēfē hono fakamatalaʻi ʻe Paula ʻa e ʻofa faka-Kalisitiané?
17 Ko e ongo meʻa ʻe ua kehe ʻoku tokoni ki ha nofo mali lavameʻá: ko e ʻofa faka-Kalisitiané mo e fetuʻutakí. ʻI he taimi ʻoku feʻofaʻaki ai ha ongo meʻa, ʻoku ʻi ai ha hehema ke na tauʻaki tukunoaʻi ʻena ngaahi fehālaakí. ʻOku kamata nai ʻe he ongo meʻá ʻa e nofo malí fakataha mo e ngaahi ʻamanaki ne fakalahiʻi, ʻo makatuʻunga nai ʻi ha meʻa naʻá na lau ʻi ha ngaahi tohi talanoa ʻeva pe sio ai ʻi ha ngaahi foʻi faiva. Kae kehe, ʻe faai atu pē, ʻo pau ke fehangahangai ʻa e ongo meʻá mo e meʻa ʻoku moʻoní. ʻOku hoko nai leva ai ʻa e fanga kiʻi fehālaaki īkí pe fanga kiʻi tōʻonga ʻikai loko fakatupu loto-mamahí ko ha ngaahi palopalema lalahi. Kapau ʻe hoko ia, ʻoku fiemaʻu ki he kau Kalisitiané ke nau fakahāhā ʻa e fua ʻo e laumālié, ko hano tafaʻaki ʻa e ʻofá. (Kaletia 5:22, 23) Ko e moʻoni, ʻoku mālohi ʻaupito ʻa e ʻofá—ʻikai ko e ʻofa fakaemanakó ka ko e ʻofa faka-Kalisitiané. Naʻe fakamatalaʻi ʻe Paula ʻa e ʻofa faka-Kalisitiane peheé, ʻo pehē: “Ko ʻOfa ʻoku ne angamokomoko, mo angalelei. . . . ʻoku ʻikai te ne kumi ʻene lelei aʻana, ʻoku ʻikai te ne fakaʻita, ʻoku ʻikai te ne lau ʻa e kovi, . . . ʻOku ne ʻukuma ʻi he meʻa kotoa pe, ʻoku ne tui ʻi he meʻa kotoa pe, ʻoku ne ʻamanaki ʻi he meʻa kotoa pe, ʻoku ne kataki ʻi he meʻa kotoa pe.” (1 Kolinito 13:4-7) ʻOku hā mahino, ko e ʻofa moʻoní ʻokú ne kātakiʻi ʻa e ngaahi vaivai fakaetangatá. Ko hono moʻoní, ʻoku ʻikai te ne ʻamanekina ʻa e haohaoá.—Palovepi 10:12.
18. ʻOku malava fēfē ke fakaivimālohiʻi ʻe he fetuʻutakí ha vahaʻangatae?
18 ʻOku toe mātuʻaki mahuʻinga ʻa e fetuʻutakí. Tatau ai pē pe ko e hā hono fuoloá, ʻoku totonu ki he ongo meʻa malí ke na fetalanoaʻaki mo fefanongoʻaki moʻoni. ʻOku pehē ʻe ha husepāniti ʻe taha: “ʻOkú ma fakahā tauʻatāina ʻema ngaahi ongoʻí ka ʻi ha founga fakakaumeʻa.” ʻI he meʻa ʻoku hokosiá, ʻoku ako ai ha husepāniti pe ko ha uaifi ke fanongo ʻo ʻikai ngata pē ki he meʻa ʻoku leaʻakí kae toe pehē foki ki he meʻa ʻoku ʻikai ke leaʻakí. ʻI hono fakalea ʻe tahá, ʻi he faai atu ʻa e ngaahi taʻú, ʻoku ako ai ha ongo meʻa mali fiefia ʻo lāuʻilo ki he ngaahi fakakaukau ʻoku ʻikai ke leaʻakí pe ngaahi ongoʻi ʻoku ʻikai ke fakahāʻí. Kuo pehē ʻe he ngaahi uaifi ʻe niʻihi ʻoku ʻikai ʻaupito ke fanongo ange ʻa honau ngaahi husepānití kiate kinautolu. Kuo lāunga ʻa e ngaahi husepāniti ʻe niʻihi ʻo pehē ʻoku hā ngali loto ange honau ngaahi uaifí ke nau fetuʻutaki ʻi he ngaahi taimi ʻoku ʻikai faingamālie lahi tahá. ʻOku kau ki he fetuʻutakí ʻa e manavaʻofa mo e mahino. Ko e fetuʻutaki leleí ʻoku ʻaonga fakatouʻosi ia ki he husepānití mo e uaifí.—Sēmisi 1:19.
19. (a) Ko e hā ʻoku faingataʻa ai ʻa e kole fakamolemolé? (e) Ko e hā te ne ueʻi kitautolu ke kole fakamolemolé?
19 ʻOku kau ki he fetuʻutakí ʻi he taimi ʻe niʻihi ʻa e kole fakamolemolé. ʻOku ʻikai ke faingofua maʻu pē ia. ʻOku fiemaʻu ʻa e anga-fakatōkilaló ki hono fakahā ʻete ngaahi halá. Neongo ia, ko ha kehekehe lahi ē ʻoku lava ke ne fakahoko ʻi ha nofo mali! Ko ha kole fakamolemole loto-moʻoní ʻoku malava ke ne toʻo atu ha tupuʻanga ʻe lava ke hoko ai ha fepaki ʻi he kahaʻú pea tofa ai ʻa e hala ki he fakamolemoleʻi moʻoní mo ha fakaleleiʻanga ki he palopalemá. Naʻe fakahā ʻe Paula: “Ka ai ha taha ʻoku ne koviʻia ʻi ha taha ʻi ha meʻa, ke mou fekatakiʻaki pe mo fefakamolemoleʻaki; ʻio, ʻo hange foki ne fakamolemole kimoutolu ʻe he ʻEiki [pe Sihova], ke pehe pe mo kimoutolu. Pea mou kofutuʻaʻaki ʻa e ngaahi meʻa ko ia katoa ʻa e ʻofa, ʻa ia ko e fakamaʻu ʻo e haohaoa.”—Kolose 3:13, 14.
20. ʻOku totonu ke anga-fēfē ʻa e fakafeangai ʻa ha Kalisitiane ki hono hoa malí fakaekinaua pea ʻi he ʻao ʻo e niʻihi kehé?
20 ʻOku toe mātuʻaki mahuʻinga foki ʻi ha nofo mali ʻa e fepoupouakí. Ko ha husepāniti mo ha uaifi Kalisitiane ʻoku totonu ke na malava ʻo fefalalaʻaki. ʻOku ʻikai totonu ke fakavaivaiʻi ʻe he tokotaha ko ē ʻa ē pe ko hono ʻai ʻi ha ngaahi founga kehe ʻene falala kiate iá ke hōloa. ʻOku tau fakaongoongoleleiʻi anga-ʻofa hotau hoa malí; ʻoku ʻikai ke tau fakaangaʻi fefeka kinautolu. (Palovepi 31:28e) Ko hono moʻoní, heʻikai te tau tuku hifo kinautolu ʻaki hono ʻai kinautolu ko e ngaahi meʻa fakakata ngali vale mo taʻefakakaukauʻi. (Kolose 4:6) Ko e fepoupouaki peheé ʻoku fakaivimālohiʻi ia ʻe he ngaahi fakahāhā tuʻumaʻu ʻo e ʻofá. Ko ha ala pe ko ha foʻi lea ʻofa leʻo-siʻi ʻoku malava ke ne pehē: “ʻOku ou kei ʻofa ʻia koe. ʻOku ou fiefia ʻi heʻeta feohí.” Ko e ngaahi moʻoniʻi meʻa ia ʻe niʻihi ʻoku malava ke ne tākiekina ha vahaʻangatae pea tokoniʻi ha nofo mali ke lavameʻa ʻi he māmani ʻo e ʻaho ní. ʻOku toe ʻi ai mo e ngaahi meʻa kehe, pea ko e kupu hoko maí te ne ʻomai ʻa e toe ngaahi tataki Fakatohitapu ki he founga ke lavameʻa ai ha nofo mali. a
[Fakamatala ʻi lalo]
a Ki ha fakamatala fakaikiiki lahi ange, sio ki he tohi Ko e Fakapulipuli ʻo e Fāmili Fiefiá, ʻoku pulusi ʻe he Kau Fakamoʻoni ʻa Sihová.
ʻE Lava Ke Ke Fakamatalaʻi?
• Ko e hā ʻa e niʻihi ʻo e ngaahi moʻoniʻi meʻa ʻoku malava ke ne fakavaivaiʻi ha nofo mali?
• Ko e hā ʻoku taʻefakapotopoto ai ʻa e fakavave ke malí?
• ʻOku anga-fēfē ʻa e kaunga ʻa e tuʻunga fakalaumālié ki ha nofo mali?
• Ko e hā ʻa e ngaahi moʻoniʻi meʻa ʻoku tokoni ke tuʻumaʻu ai ha nofo mali?
[Fehuʻi ki he Ako]
[Fakatātā ʻi he peesi 12]
Ko e nofo malí ʻoku ʻikai ko ha vahaʻangatae fakaemanako pē
[Fakatātā ʻi he peesi 14]
Ko ha vahaʻangatae mālohi mo Sihova ʻoku tokoni ia ki ha ongo meʻa ke ʻai ke lavameʻa ʻena nofo malí