Ngaahi Fehuʻi mei he Kau Lautohí

ʻOku fakahaaʻi ʻi hono kai ʻe Tēvita mo ʻene kau tangatá ʻa e mā fonó ʻe lava ke maumauʻi ʻa e lao ʻa e ʻOtuá ʻo taʻetautea ʻi he malumalu ʻo e ngaahi tuʻunga faingataʻá?—1 Samiuela 21:​1-6.

Fakatatau ki he Livitiko 24:​5-9, ko e mā fono ʻa ia naʻe fetongi ʻi he Sāpate taki tahá naʻe tauhi ia ke kai ʻe he kau taulaʻeikí. Ko e tefitoʻi moʻoni naʻe tuʻu mei mui ʻi he ngāueʻaki ko ení ko e pehē ko ia ko e ngaahi foʻi maá naʻe māʻoniʻoni pea naʻe pau ke hoko ia ko e meʻakai ki he kau tangata naʻe kau ki he ngāue ʻa e ʻOtuá—ʻa e kau taulaʻeikí. Ko hono ʻoange ia ki ha tangata ngāue anga-maheni pe ko hono kai pē ki heʻete fiemālié naʻe mātuʻaki hala ia. Kae kehe, naʻe ʻikai ke fai ʻe he taulaʻeiki ko ʻAhimelekí ha angahala ʻi heʻene vahevahe ʻa e mā fonó pea mo Tēvita mo ʻene kau tangatá.

ʻOku hā naʻe fakahoko ʻe Tēvita ha ngāue makehe meia Tuʻi Saula. Naʻe fiekaia ʻa Tēvita mo ʻene kau tangatá. Naʻe fakapapauʻi ʻe ʻAhimeleki naʻa nau maʻa fakaeouau. Lolotonga naʻe fakaʻuhingaʻi naʻe taʻefakalao ʻenau kai ʻa e mā fonó, naʻe fehoanaki ia mo e ngāueʻaki tefito naʻe vaheʻi ki ai ʻa e mā fonó. Ko e fakakaukau ko ení naʻe fakaʻatā ai ʻa ʻAhimeleki ke ne fai ha meʻa kehe mei he tuʻutuʻuní. Naʻe ngāueʻaki ʻe Sīsū Kalaisi tonu ʻa e meʻa ko eni naʻe hokó ke fakatātaaʻiʻaki ʻa e taʻetotonu ʻo hono ngāueʻaki fefeka tōtuʻa ʻo e lao Sāpaté ʻa ia naʻe kounaʻi ʻe hono fakaʻuhinga faka-Fālesi ʻo iá.—Mātiu 12:​1-8.

Kae kehe, ko e meʻa naʻe hoko ki muʻá, ʻoku ʻikai ʻuhinga ai ia ʻe lava ke maumauʻi ʻa e lao ʻa e ʻOtuá ʻi he taimi ʻoku hoko ai ʻo faingataʻa ʻa e ngaahi tuʻungá. Ko e fakatātaá, naʻe hoko ha tuʻunga naʻe hā ngali faingataʻa ʻi he taimi naʻe faitau ai ʻa e kau pāteʻi tau ʻIsilelí mo e kau Filisitiá. Naʻe pehē ai ʻe Tuʻi Saula: “Ke malaʻia ʻa e tangata te ne kai meʻakai kaeʻoua ke poʻuli, pea ke ʻoua ke u sauni hoku ngaahi fili!” ʻOku pehē ʻe he Tohi Tapú: “Pea nau ta holo ʻa e kau Filisitia ʻi he ʻaho ko é.” Naʻe ongosia mo fiekaia ʻa e kau sōtiá ʻi he taú, ‘pea naʻe ʻoho ʻa e kakaí ʻo teʻia ʻa e fanga manú ʻi he kelekelé: pea naʻe kai ʻe he kakaí kuo pani toto.’ (1 Samiuela 14:​24, 31-33) Naʻa nau angahala kia Sihova ʻaki hono maumauʻi ʻa ʻene lao ki he totó. Naʻe ʻikai fehoanaki ʻenau ngaahi ngāué mo e ngāueʻaki pē taha ʻo e totó naʻe fakahaaʻi ʻe he ʻOtuá, ʻa ia ko e “fakalelei” ki he ngaahi angahalá. (Livitiko 17:​10-12; Senesi 9:​3, 4) ʻI he mohu mēsí, naʻe tali ai ʻe Sihova ʻa e ngaahi feilaulau makehe maʻá e faʻahinga ko ia naʻe faiangahalá.​—1 Samiuela 14:​34, 35.

ʻIo, ʻoku ʻamanekina mai ʻe Sihova ke tau talangofua ki heʻene ngaahi laó ʻi he malumalu ʻo e ngaahi tuʻunga kotoa pē. “Ko eni ia ʻa e ʻofa ki he ʻOtua,” ko e lau ia ʻa e ʻapositolo ko Sioné, “ʻa ʻetau tauhi ki heʻene ngaahi tuʻutuʻuni.”—1 Sione 5:3.

[Fakatātā ʻi he peesi 30]

Naʻe tuku ʻa e mā fono foʻou ʻi he loto tāpanekalé ʻi he Sāpate taki taha