Ko e ʻAmanaki Toetuʻú—Ko e Hā ʻEne ʻUhinga Kiate Koé?
Ko e ʻAmanaki Toetuʻú—Ko e Hā ʻEne ʻUhinga Kiate Koé?
“ʻOku ke folahi ho nima, pea ke fakamakona ʻa e holi ʻa e meʻa moʻui kotoa.”—SĀME 145:16.
1-3. Ko e hā ʻa e ʻamanaki ʻoku maʻu ʻe he niʻihi ki he kahaʻú? Fakatātaaʻi.
KO Christopher taʻu hiva mo hono tehiná naʻá na fakamoleki ʻa e houa pongipongí fakataha mo ʻena faʻētangatá, tokoua ʻena faʻeé, mo e ongo tamaiki ʻokú na tokouaʻakí ʻi he ʻaʻahi mei he fale ki he fale ʻi heʻenau ngāue fakafaifekau faka-Kalisitiane ofi ki Manchester, ʻIngilani. Ko ʻetau makasini ʻoku ʻalu fakataha mo ʻení, ʻa e ʻĀ Hake!, ʻoku fakamatala ia ki he meʻa naʻe hokó. “ʻI he houa efiafí, naʻa nau fononga ai ʻo ʻeveʻeva ki Blackpool, ko ha feituʻu tali folau ʻeveʻeva ʻi ha matātahi ofi mai. Naʻe kau ʻa e toko 6 kotoa ko ʻení ʻi he kakai ʻe toko 12 naʻe mate kotoa ʻi ha holo ʻa e fuʻu hala lahí, naʻe fakamatalaʻi ʻe he kau polisí ʻo pehē ‘ko ha mate tokolahi moʻoni.’”
2 Ko e pō ki muʻa ʻi he meʻa fakamamahí ni, naʻe maʻu ai ʻe he fāmilí ʻa e Ako Tohi ʻa e Fakatahaʻangá, ʻa ia naʻe lāulea ai ki he kaveinga fekauʻaki mo e maté. “Ko Christopher ko ha tamasiʻi mātuʻaki mohu fakakaukau,” ko e fakamatala ia ʻa ʻene tamaí. “ʻI he pō ko iá, naʻá ne lea mātuʻaki mahino ai fekauʻaki mo ha māmani foʻou pea mo ʻene ʻamanaki ki he kahaʻú. Pea, ʻi he hoko atu ʻemau lāuleá, naʻe pehē fakafokifā hake ʻe Christopher: ‘Ko e ʻaonga ia ʻo e hoko ko e taha ʻo e Kau Fakamoʻoni ʻa Sihová he neongo ʻa e fakalotomamahi ʻa e maté, ʻoku tau ʻiloʻi te tau toe fesiofaki ʻi ha ʻaho ʻi he māmaní.’ Naʻe ʻikai ʻiloʻi ʻe ha taha ʻo kimautolu naʻe ʻi aí ʻe hoko ʻo mātuʻaki manatua ʻa e ngaahi lea ko iá.” a
3 ʻI he ngaahi taʻu ki muʻá, ʻi he 1940, naʻe fehangahangai ai ha Fakamoʻoni ʻAositulia ko Franz mo e ʻamanaki ki hono tāmateʻi ia ʻaki hono tuʻusi hono ʻulú koeʻuhi ko ʻene fakafisi ke taʻemateaki kia Sihová. Naʻe faitohi ʻa Franz ki heʻene faʻeé mei ha senitā fakapōpula ʻi Pēlini: “Mei he meʻa naʻá ku ʻiló, kapau naʻá ku fai ʻa e fuakava [fakakautaú], ne u mei fai ai ha angahala ʻoku tuha mo e maté. ʻE hoko ia ko ha kovi kiate au. Heʻikai te u toetuʻu ai. . . . Pea ko ʻeni, siʻeku Fineʻeiki pea mo e kotoa ʻo hoku fanga tokouá mo e fanga tuofāfiné, naʻe tala mai he ʻahó ni hoku tauteá, ko e mate, pea ʻoua te mou manavahē, pea ʻe tāmateʻi au ʻi he pongipongi ʻapongipongí. ʻOku ou maʻu ʻa hoku mālohí mei he ʻOtuá, ʻo tatau tofu pē mo ia naʻe hoko maʻu pē ki he kotoa ʻo e kau Kalisitiane moʻoní ʻi he kuohilí. . . . Kapau te mou tuʻu maʻu ʻo aʻu ki he maté, te tau toe fetaulaki ʻi he toetuʻú. . . . Kae ʻoua leva ke tau toki fetaulaki.” b
4. ʻOku maongo fēfē kiate koe ʻa e ongo meʻa naʻe hokosia ʻoku lave ki ai hení, pea ko e hā te tau lāulea ki ai hono hokó?
4 Naʻe ʻuhinga lahi fakatouʻosi kia Christopher mo Franz ʻa e ʻamanaki ki he toetuʻú. Naʻe moʻoni ia kiate kinaua. ʻOku aʻu moʻoni ʻa e ongo fakamatalá ni ki hotau lotó! Ke fakalolotoʻi ʻetau houngaʻia kia Sihová pea ke fakaivimālohiʻi ʻetau ʻamanaki ki he toetuʻú, tau lāulea angé ki he ʻuhinga ʻe hoko ai ʻa e toetuʻú pea mo e founga ʻo e kaunga fakafoʻituitui kiate kitautolu ʻa e meʻá ni.
Vīsone ʻo e Toetuʻu Fakaemāmaní
5, 6. Ko e hā ʻoku fakahaaʻi ʻe he vīsone naʻe lēkooti ʻe he ʻapositolo ko Sioné ʻi he Fakahā 20:12, 13?
5 ʻI he vīsone ki he ngaahi meʻa ʻe hoko he lolotonga ʻa e Pule Taʻu ʻe Taha Afe ʻa Kalaisi Sīsuú, naʻe sio ai ʻa e ʻapositolo ko Sioné ki he hoko ʻa e toetuʻu fakaemāmaní. “Pea u vakai ʻa e pekia, ʻa e lalahi mo e iki,” ko ʻene fakamatalá ia. “Pea naʻe tukuange ʻe he tahi ʻa e pekia naʻe ʻi ai; pea mo Mate foki mo e Hetesi naʻa na tukuange ʻa e pekia naʻe ʻiate kinaua.” (Fakahā 20:12, 13) Pe ko e hā pē ʻa e tuʻungá—pe ko e “lalahi” pe “iki”—ko e faʻahinga kotoa ʻoku maʻunimā ʻi Hētesí (Seoli), ʻa e faʻitoka anga-maheni ʻo e faʻahinga ʻo e tangatá, ʻe tukuange mai kinautolu. Ko e faʻahinga kuo mole ʻenau moʻuí ʻi tahí te nau toe foki mai ki he moʻuí ʻi he taimi ko iá. Ko e meʻa fakaofo ko ʻení ko e konga ia ʻo e taumuʻa ʻa Sihová.
6 Ko e pule ʻa Kalaisi ʻi he taʻu ʻe taha afé ʻe kamataʻaki ia ʻa hono haʻi ʻo Sētané pea mo hono lī ki he luo taʻehanotakelé. Heʻikai ha taha ʻo e faʻahinga ʻe toetuʻú pe ko ha taha ʻo e kau hao moʻui atu ʻi he mamahi lahí ʻe takihalaʻi ʻe Sētane ʻi he lolotonga ʻa e pule ko iá, koeʻuhi heʻikai te ne toe ngāue ai. (Fakahā 20:1-3) Ko ha taʻu ʻe taha afe ʻe hā ngali ko ha taimi lōloa ia kiate koe, ka ko hono moʻoní, ʻoku vakai ki ai ʻa Sihova ia ko e “ʻaho ʻe taha.”—2 Pita 3:8.
7. Ko e hā ʻe hoko ko e makatuʻunga ki he fakamaau ʻi he lolotonga ʻa e Pule Taʻu ʻe Taha Afe ʻa Kalaisí?
7 Fakatatau ki he vīsoné, ko e Pule Taʻu ʻe Taha Afe ʻa Kalaisí ʻe hoko ia ko ha taimi ki he fakamaau. Naʻe tohi ʻe he ʻapositolo ko Sioné: “Pea u vakai ʻa e pekia, ʻa e lalahi mo e iki, ʻoku nau tutuʻu ʻi he ʻao ʻo e Taloni; pea naʻe folahi ʻa e ngaahi tohi, pea naʻe folahi mo e tohi ʻe taha ʻa ia ko e tohi ʻo e moʻui: pea naʻe fakamāu ʻa e pekia ʻi he ngaahi meʻa ʻoku tuʻu ʻi he ngaahi tohi, ʻo fakatatau ki heʻenau ngaue. . . . pea naʻe fakamāu kinautolu taki taha, ʻo fakatatau ki heʻenau ngaue.” (Fakahā 20:12, 13) Fakatokangaʻi ko e makatuʻunga ki he fakamaau ko ʻení ʻoku ʻikai ʻi he meʻa naʻe fai pe ʻikai fai ʻe he tokotahá ki muʻa peá ne maté. (Loma 6:7) ʻI hono kehé, ʻoku fekauʻaki ia mo e “ngaahi tohi” ʻe toki fakaava. Ko e ngaahi ngāue ʻa ha taha ʻe fakahoko ʻi he hili ʻene ako ʻa e ngaahi meʻa ʻi he ngaahi tohí ʻa e makatuʻunga ki hono fakapapauʻi pe ʻoku tohi hono hingoá ʻi he “tohi ʻo e moʻui.”
“Toetuʻu ke Moʻui” pe “Toetuʻu ki he Fakamāu”
8. Ko e hā ʻa e ongo ikuʻanga ʻoku malava ke hoko ki he faʻahinga ʻe toetuʻú?
8 ʻI he konga ki muʻa ʻo e vīsone ʻa Sioné, ʻoku fakamatalaʻi ai ʻa Sīsū ʻokú ne maʻu “ʻa e ngaahi kī ʻo Mate mo Hetesi.” (Fakahā 1:18) ʻOkú ne ngāue ko e “Fakafofonga Tefito ʻo e moʻuí” ʻa Sihova, kuo fakamafaiʻi ia ke ne fakamāuʻi “ʻa e moʻui mo e pekia.” (Ngāue 3:15, NW; 2 Timote 4:1) ʻE anga-fēfē ʻene fai ʻení? ʻAki hono fakafoki mai ki he moʻuí ʻa e faʻahinga ʻoku mohe ʻi he maté. “ʻOua te mou ofo ʻi he meʻa ko ia,” ko e lea ia ʻa Sīsū ki he fuʻu kakai naʻá ne malanga ki aí, “he ʻoku ʻunu mai ha taimi, ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.” Naʻá ne tānaki atu leva: “Ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.” (Sione 5:28-30) Ko ia, ko e hā ʻa e kahaʻu ʻoku fakatatali ki he kau tangata mo e kau fefine faitōnunga ʻo e kuohilí?
9. (a) ʻI he toe foki mai ʻi he toetuʻú, ko e hā ʻoku ʻikai ha veiveiua ʻe ʻilo ʻe he tokolahi? (e) Ko e hā ʻa e fuʻu ngāue fakaeako ʻe fakahokó?
9 ʻI he taimi ʻe toe foki mai ai ʻa e faʻahinga faitōnunga ʻo e kuonga muʻá ʻi he toetuʻú, te nau ʻiloʻi vave ko e ngaahi talaʻofa ko ia naʻa nau falala ki aí ko ha meʻa moʻoni ia ʻi he taimi ko ʻení. He mahuʻingaʻia lahi ē ko kinautolu ke ʻiloʻi papau ʻa e Hako ʻo e fefine ʻa e ʻOtuá, naʻe lave ki ai ʻi he ʻuluaki kikite ʻi he Tohi Tapú, ʻi he Senesi 3:15! He fiefia lahi ē ko kinautolu ʻi he fanongo ko e Mīsaia ko ʻeni naʻe talaʻofaʻaki maí, ʻa Sīsū, naʻá ne fakamoʻoniʻi ʻene faitōnungá ʻo aʻu ki he maté, ʻo ne foaki ai ʻene moʻuí ko ha feilaulau huhuʻi! (Mātiu 20:28) Ko e faʻahinga te nau talitali lelei mai kinautolu ki he moʻuí te nau maʻu ʻa e fiefia lahi ʻi hono tokoniʻi kinautolu ke nau ʻiloʻi ko e tokonaki huhuʻi ko ʻení ko ha fakahāhā ia ʻo e ʻofa maʻataʻatā mo e meesi ʻa Sihová. ʻI he taimi ʻe ʻiloʻi ai ʻe he kau toetuʻú ʻa e meʻa ʻoku lavaʻi ʻe he Puleʻanga ʻo e ʻOtuá ʻi hono fakahoko ʻa e taumuʻa ʻa Sihová ki he māmaní, ʻoku ʻikai ha veiveiua ʻe fonu mahuohua honau lotó ʻi he ngaahi kupuʻi lea ʻo e fakafetaʻi kia Sihová. Te nau maʻu ʻa e faingamālie feʻunga ke fakahāhā ai ʻenau pīkitai ki heʻenau Tamai fakahēvani ʻofá pea mo hono ʻAló. Ko e tokotaha kotoa pē ʻe moʻui ʻi he taimi ko iá ʻe fiefia ʻi he kau ki he fuʻu ngāue fakaeako ʻoku fiemaʻu ki hono akoʻi ʻa e laui piliona te nau toe foki mai mei he faʻitoká, ʻa ia ʻe toe fiemaʻu ke nau tali ʻa e tokonaki huhuʻi ʻa e ʻOtuá.
10, 11. (a) Ko e hā ʻa e ngaahi faingamālie ʻe ʻomai ʻe he Taʻu ʻe Taha Afé ki he faʻahinga kotoa ʻi he māmaní? (e) ʻOku totonu ke fēfē hono ueʻi kitautolu ʻe he meʻá ni?
10 Ko ʻĒpalahame heʻene toetuʻú te ne maʻu ʻa e fiemālie lahi ʻi hono hokosia ʻa e moʻoni ʻo e moʻui ʻi he malumalu ʻo e “kolo” ko ia naʻá ne fakatuʻamelie ki aí. (Hepelu 11:10) Ko ha fiefia lahi ē ʻe maʻu ʻe Siope faitōnunga ʻo e kuohilí ʻi heʻene ʻilo ko ʻene ʻalunga moʻuí naʻe fakaivimālohiʻi ai ʻa e kau sevāniti kehe ʻa Sihova naʻa nau fehangahangai mo e ngaahi ʻahiʻahiʻi ʻo ʻenau anga-tonú! Pea ko ha vēkeveke lahi ē ka ko Taniela ke ne ʻilo fekauʻaki mo e fakahoko ʻo e ngaahi kikite naʻe fakamānavaʻi ia ke ne tohí!
11 Ko e moʻoni, ko e faʻahinga kotoa te nau maʻu ʻa e moʻuí ʻi he māmani foʻou māʻoniʻoní, ʻi he toetuʻú pe ko e hao moʻui atu ʻi he fuʻu mamahi lahí, te nau ako lahi ai fekauʻaki mo e taumuʻa ʻa Sihova ki he māmaní mo e kau nofo aí. Ko e ʻamanaki ʻo e moʻui taʻengata mo fakahīkihikiʻi ʻa Sihova ki he kotoa ʻo ʻitānití te ne ʻai moʻoni ʻa e polokalama ako Taʻu ʻe Taha Afé ko ha meʻa fakafiefia moʻoni. Kae kehe, ko e meʻa ʻe mahuʻinga lahi tahá ko e meʻa ko ia te tau fai fakafoʻituitui ʻi heʻetau ako ʻa e ngaahi meʻa ʻi he ngaahi tohí. Te tau ngāueʻaki ʻa e meʻa ʻoku tau akó? Te tau fakalaulauloto pea ngāueʻaki ʻa e fakamatala mātuʻaki mahuʻinga te ne fakaivimālohiʻi kitautolu ke tau talitekeʻi ʻa e feinga fakaʻosi ʻa Sētane ke fakatafokiʻi kitautolu mei he moʻoní?
12. Ko e hā te ne tokoniʻi ʻa e tokotaha taki taha ke kau kakato fakatouʻosi ʻi he ngāue fakaeakó mo e fulihi ʻo e māmaní ko ha palataisí?
12 Ke ʻoua naʻa ngalo ʻa e ngaahi tāpuaki fakaofo ʻe hoko mai mei hono ngāueʻaki ʻa e ngaahi ʻaonga ʻo e feilaulau huhuʻi ʻa Kalaisí. Ko e faʻahinga ʻe toe fakafoki mai ki he moʻuí ʻi he toetuʻú ʻe ʻikai te nau maʻu ʻa e faʻahinga vaivai pe faingataʻaʻia fakaesino ʻoku nau lolotonga hokosiá. (Aisea 33:24) Ko ha sino moʻui lelei pea mo e ʻamanaki ʻo e moʻui lelei haohaoá te ne fakaʻatā ʻa e kau nofo kotoa ʻi he māmani foʻoú ke nau kau kakato ʻi he ngāue fakaeako ʻo hono fakahinohinoʻi ʻa e laui piliona ʻe toetuʻú ki he founga ʻo e moʻuí. ʻE toe kau ʻa e faʻahinga ko iá ʻi he ngāue lahi taha kuo faifai pea fakahoko ʻi he māmaní—ʻa ia ko hono fulihi ʻa e foʻi palanité fakakātoa ko ha palataisi ki he fakahīkihikiʻi ʻo Sihová.
13, 14. Ko e hā ʻa e taumuʻa ʻo hono tukuange mai ʻo Sētane ʻi he ʻahiʻahi fakaʻosí, pea ko e hā ʻa e ikuʻanga ʻe malava ke hoko kiate kitautolu tāutahá?
13 ʻI hono tukuange mai ʻo Sētane mei he luo taʻehanotakelé ki he ʻahiʻahi fakamuimuí, te ne toe feinga ai ke toe takihalaʻi ʻa e faʻahinga ʻo e tangatá. Fakatatau ki he Fakahā 20:7-9, ko e kotoa ʻo e ‘ngaahi kakai ʻe kākāʻí,’ pe ngaahi falukunga kakai, ʻa ia te nau tō ʻi he malumalu ʻo e tākiekina fulikivanu ʻa Sētané te nau aʻusia honau fakamaau ʻo e fakaʻauhá: ‘ʻE ʻalu atu ha afi mei he langi, ʻo keina kinautolu.’ Ki he faʻahinga ʻi honau lotolotongá ʻa ia te nau hokosia ha toetuʻu he lolotonga ʻa e Taʻu ʻe Taha Afé, ʻe ʻai ʻe he fakaʻauha ko ʻení ʻenau toetuʻú ko ha toetuʻu ʻo e fakamaau fakahalaia. ʻI hono kehé, ko e kau tauhi anga-tonu ʻe toetuʻú te nau maʻu ʻa e meʻaʻofa ko e moʻui taʻengatá. Ko e moʻoni, ko ʻenau toetuʻú ʻe hoko ia ko ha “toetuʻu ke moʻui.”—Sione 5:29.
14 ʻOku malava fēfē ke fakafiemālieʻi kitautolu ʻe he ʻamanaki ʻo e toetuʻú naʻa mo e taimí ni? Ko hono moʻoní, ko e hā kuo pau ke tau fai ke fakapapauʻi ai te tau maʻu ʻa hono ngaahi ʻaongá ʻi he kahaʻú?
Ngaahi Lēsoni ke Ako he Taimí Ni
15. ʻOku malava fēfē ke hoko ʻa e tui ki he toetuʻú ko ha tokoni ʻi he taimi ní?
15 Mahalo pē kuo toki molé ni atu ha taha naʻá ke ʻofa ai ʻi he maté pea ʻokú ke fekuki nai mo e feʻunuʻaki lahi ʻoku ʻomai ʻe he mole lahi peheé. ʻOku tokoniʻi koe ʻe he ʻamanaki ʻo e toetuʻú ke ke maʻu ha nonga ʻi loto mo e mālohi ʻa ia ʻoku ʻikai malava ke maʻu ʻe he faʻahinga ʻoku ʻikai te nau ʻilo ʻa e moʻoní. “Oku ʻikai te mau loto foki ke mou mūnoa, kainga, ʻi he meʻa ki he kakai kuo mohe,” ko e lea fakafiemālie ia ʻa Paula ki he kau Tesalonaiká, “ke ʻoua te mou mamahi ʻo hange ko e kakai kehe, ʻa ia ʻoku ʻikai haʻanau ʻamanaki.” (1 Tesalonaika 4:13) ʻOkú ke sioloto atu kiate koe ʻi he māmani foʻoú, ʻo siotonu ʻi he toetuʻú? Maʻu ʻa e fiemālie he taimí ni ʻaki ʻa e fakalaulauloto ki he ʻamanaki ke toe fetaulaki mo e faʻahinga naʻá ke ʻofa aí.
16. Ko e hā nai ʻa hoʻo ngaahi ongoʻí ʻi he hoko ʻa e toetuʻú?
16 ʻOkú ke faingataʻaʻia nai he lolotongá ni ʻi ha ngaahi nunuʻa fakaesino ʻo e angatuʻu ʻa ʻĀtamá, ʻi he tuʻunga nai ko ha puke. ʻOua ʻe fakaʻatā ʻa e mamahi ʻoku ʻomai ʻe he meʻá ni ke ne ʻai koe ke ngalo ʻa e ʻamanaki fakafiefia ʻo hono hokosia fakafoʻituitui ʻa e toetuʻú pea mo e toe foki ki he moʻuí fakataha mo e moʻui lelei mo e longomoʻui kuo fakafoʻou ʻi he māmani foʻoú. Pea ʻi he taimi ʻe ʻā hake ai ho matá ʻo ke sio ki he ngaahi fofonga fiefia ʻoku vēkeveke atu ke kaungāʻinasi mo koe ʻi heʻenau fiefia ʻi hoʻo toetuʻú, kuo pau pē te ke fakamālō ki he ʻOtuá ʻi heʻene ʻaloʻofá.
17, 18. Ko e hā ʻa e ongo lēsoni mahuʻinga ʻe ua ʻoku totonu ke tau tukulotoá?
17 ʻI he taimi tatau, fakakaukau angé ki he ongo lēsoni ʻe ua ʻoku totonu ke tau tukulotoá. Ko e taha ko e mahuʻinga ʻo e ngāue ʻaufuatō kia Sihova he taimi ní. ʻI he faʻifaʻitaki ki hotau ʻEikí, ʻa Kalaisi Sīsū, ʻe fakahāhā ʻe heʻetau moʻui feilaulauʻi-kitá ʻa e ʻofa kia Sihova pea mo hotau ngaahi kaungāʻapí. Kapau ʻe hanga ʻe he fakafepakí pe fakatangá ʻo toʻo atu ʻetau maʻuʻanga moʻuí pe ko ʻetau tauʻatāiná, ʻoku tau fakapapauʻi ke tuʻu maʻu ʻi he tuí ʻo tatau ai pē pe ko e hā ha ngaahi ʻahiʻahi te tau fehangahangai nai mo ia. Kapau ʻoku fakamanamanaʻi kitautolu ʻe he kau fakafepakí ʻaki ʻa e maté, ʻe fakafiemālieʻi mo fakaivimālohiʻi leva kitautolu ʻe he ʻamanaki ki he toetuʻú ke tau kei mateaki ai pē kia Sihova mo hono Puleʻangá. ʻIo, ko ʻetau faivelenga ki he ngāue fakamalanga ʻo e Puleʻangá mo e ngaohi-ākongá ʻokú ne ʻomai kiate kitautolu ʻa e ʻamanaki ki he ngaahi tāpuaki taʻengata kuo tuku tauhi mai ʻe Sihova maʻá e māʻoniʻoní.
18 Ko ha lēsoni hono ua ʻoku fekauʻaki ia mo e founga ʻo ʻetau fehangahangai mo e ngaahi ʻahiʻahi ʻoku fakatupunga ʻe he kakano kuo hingá. Ko ʻetau ʻilo ʻa e ʻamanaki ki he toetuʻú mo ʻetau houngaʻia ki he ʻofa maʻataʻatā ʻa Sihová ʻoku fakaivimālohiʻi ai ʻetau fakapapau ke tuʻu maʻu ʻi he tuí. “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani,” ko e fakatokanga ia ʻa e ʻapositolo ko Sioné. “Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani. Pea ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:15-17) Ko e fakatauele ʻa e māmaní ʻi he tuʻunga ko e tuli ki he meʻa fakamatelié ʻe mahuʻinga siʻisiʻi pē kiate kitautolu ʻi heʻetau fakahoa atu ia ki he “moʻui moʻoni.” (1 Timote 6:17-19) Kapau ʻoku fakataueleʻi kitautolu ke fai ʻa e ʻulungāanga taʻetāú, te tau talitekeʻi mālohi ia. ʻOku tau ʻiloʻi kapau te tau mate ki muʻa ʻi ʻĀmaketone, ko ha ʻalunga hokohoko ʻo e ʻulungāanga ʻoku taʻefakahōifua kia Sihová ʻe lava ke ne ʻai kitautolu ki he tuʻunga tatau mo e faʻahinga ko ia ʻoku ʻikai haʻanau ʻamanaki ki ha toetuʻú.
19. Ko e hā ʻa e monū taʻealafakatataua ʻoku ʻikai totonu ke ngalo ʻiate kitautolú?
19 Sinoemeʻa, ʻoku ʻikai ʻaupito totonu ke ngalo ʻiate kitautolu ʻa e monū taʻealafakatataua ʻo hono ʻai ʻa e loto ʻo Sihová ke fiefia he taimí ni pea taʻengatá. (Palovepi 27:11) Ko ʻetau faitōnunga ʻo aʻu ki he maté pe ko ʻetau tauhi anga-tonu hokohoko ʻo aʻu ki he ngataʻanga ʻo e fokotuʻutuʻu fulikivanu ko ʻení ʻoku fakahaaʻi ai kia Sihova pe ko e tafaʻaki ʻa hai ʻi he ʻīsiu fekauʻaki mo e tuʻunga-hau fakalevelevá ʻoku tau tuʻu aí. Pea ko ha fiefia lahi ē ke moʻui ʻi he Palataisi ʻi he māmaní fakafou ʻi he hao moʻui atu ʻi he fuʻu mamahi lahí pe ko e hokosia ʻo ha toetuʻu fakaemana!
Fakalato ʻEtau Ngaahi Holí
20, 21. Ko e hā te ne tokoniʻi kitautolu ke tau kei faitōnunga ai pē neongo kapau ʻoku tau maʻu ha ngaahi fehuʻi ʻoku teʻeki ke tali fekauʻaki mo e toetuʻú? Fakamatalaʻi.
20 ʻOku kei ʻi ai pē ʻa e ngaahi fehuʻi ʻoku teʻeki ke tali ʻi heʻetau lāulea ki he toetuʻú. ʻE anga-fēfē hono fokotuʻutuʻu ʻe Sihova ʻa e ngaahi meʻá ki he faʻahinga ko ia naʻe nofo mali ʻi he taimi naʻa nau mate aí? (Luke 20:34, 35) ʻE hoko ʻa e ngaahi toetuʻú ʻi he feituʻu ko ia naʻe mate ai ʻa e kakaí? ʻE foki mai ʻa e kau toetuʻú ki he moʻuí ʻo ofi ki he nofoʻanga ʻo honau ngaahi fāmilí? ʻOku kei toe ha ngaahi fehuʻi lahi fekauʻaki mo e ngaahi fokotuʻutuʻu ki he toetuʻú. Ka neongo ia, kuo pau ke tau manatuʻi ʻa e ngaahi lea ʻa Selemaiá: “ʻOku lelei ʻa Sihova kiate kinautolu ʻoku tatali kiate ia, ki he laumalie ʻoku kumi ki Heʻene ʻAfio. ʻOku lelei ke te ʻamanaki mo tali fakalongope ki he fakamoʻui ʻa Sihova ka fai.” (Tangilaulau 3:25, 26) ʻI he taimi kotofa ʻa Sihová, ʻe fakahaaʻi mai ai ʻa e meʻa kotoa ki heʻetau fiemālie kakató. Ko e hā ʻoku malava ai ke tau fakapapauʻi ʻení?
21 Fakalaulauloto atu ki he ngaahi lea fakamānavaʻi ʻa e tokotaha-tohi-sāmé ʻi heʻene hiva kia Sihová: “ʻOku ke folahi ho nima, pea ke fakamakona ʻa e holi ʻa e meʻa moʻui kotoa.” (Sāme 145:16) ʻI heʻetau hoko ʻo motuʻá, ʻoku liliu ʻetau ngaahi holí. Ko e meʻa naʻa tau ʻamanaki ki ai ʻi heʻetau kei īkí ʻoku ʻikai ko ʻetau holi ia he ʻaho ní. Ko e anga ʻo ʻetau vakai ki he moʻuí ʻoku kaunga ki ai ʻa e meʻa ʻoku tau hokosiá pea pehē ki heʻetau ngaahi ʻamanakí. Neongo ia, ko e hā pē ʻetau ngaahi holi totonú ʻi he māmani foʻoú, kuo pau ke fakalato ia ʻe Sihova.
22. Ko e hā ʻoku tau maʻu ai ʻa e ʻuhinga lelei ki hono fakahīkihikiʻi ʻa Sihová?
22 Ko e meʻa mahuʻinga tefito kiate kitautolu taki taha he taimi ní ko e faitōnungá. “ʻOku fai ʻi heni foki ʻa e sivi ʻo e kau setuata; koeʻuhi ke ha ʻa e fai totonu [pe faitōnunga] ʻa ha taha.” (1 Kolinito 4:2) Ko e kau setuata kitautolu ʻo e ongoongo lelei lāngilangiʻia ʻo e Puleʻanga ʻo e ʻOtuá. Ko ʻetau tōtōivi ʻi hono fanongonongo ʻa e ongoongo lelei ko ʻení ki he faʻahinga kotoa ʻoku tau fetaulakí ʻoku tokoni ia ki hono tauhi maʻu kitautolu ʻi he hala ki he moʻuí. ʻOua ʻaupito naʻa ngalo ʻa e moʻoniʻi meʻa ko ia “ʻoku hokonoa . . . ʻa e faingamalie mo e tuʻutamaki” kiate kitautolu kātoa. (Koheleti 9:11) Ke fakafepakiʻi ha faʻahinga loto-moʻua taʻetotonu pē ʻoku fakatupu ʻe he ngaahi meʻa taʻepau ʻo e moʻuí, piki maʻu ki he ʻamanaki lāngilangiʻia ʻo e toetuʻú. Ke ke ʻilo kapau ʻoku hā ngali te ke mate ki muʻa ʻi he kamataʻanga ʻo e Pule Taʻu ʻe Taha Afe ʻa Kalaisí, ʻe lava ke ke maʻu ha fiemālie ʻi he pau ʻa e hoko mai ʻa e fakaleleiʻanga ko iá. ʻI he taimi ʻa Sihová ʻe lava ke ke toe fakaongo atu ai ʻa e ngaahi lea ʻa Siope ki he Tokotaha-Fakatupú: “Te ke toki ui, pea te u tali atu ʻe au.” Ke mālōʻia ai pē ʻa Sihova, ʻa ia ʻokú ne fakaʻamu ke fakafoki mai ki he moʻuí ʻa e faʻahinga kotoa ʻoku nau ʻi heʻene manatú!—Siope 14:15.
[Fakamatala ʻi lalo]
a Sio ki he Awake! ʻo Siulai 8, 1988, peesi 10, pulusi ʻe he Kau Fakamoʻoni ʻa Sihová.
b Jehovah’s Witnesses—Proclaimers of God’s Kingdom, peesi 662, pulusi ʻe he Kau Fakamoʻoni ʻa Sihová.
ʻOkú Ke Manatuʻi?
• Ko e hā ʻa e makatuʻunga ʻe fakamāuʻi ai ʻa e kakaí he lolotonga ʻa e Taʻu ʻe Taha Afé?
• Ko e hā ʻe maʻu ai ʻe he niʻihi ʻa e “toetuʻu ke moʻui” pea maʻu ʻe he niʻihi kehe ʻa e “toetuʻu ke fakamāu”?
• ʻOku anga-fēfē ʻa e malava ke fakafiemālieʻi kitautolu ʻe he ʻamanaki ki he toetuʻú?
• ʻOku anga-fēfē hono tokoniʻi kitautolu ʻe he ngaahi lea ʻo e Sāme 145:16 ke tau fekuki mo e ngaahi fehuʻi ʻoku teʻeki ai ke tali fekauʻaki mo e toetuʻú?
[Fehuʻi ki he Ako]
[Fakatātā ʻi he peesi 21]
ʻOku anga-fēfē ʻa e malava ke tokoniʻi kitautolu he taimí ni ʻe he tui ki he toetuʻú?