ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Ua Samiuelá

ʻOKU fiemaʻu nai ʻa ʻetau talangofua haohaoá ka tau ʻiloʻi ʻa e tuʻunga-hau ʻo Sihová? ʻOku fai maʻu pē ʻe ha tangata anga-tonu ʻa e meʻa ʻoku totonú ʻi he vakai ʻa e ʻOtuá? Ko e faʻahinga tāutaha fēfē ʻoku ʻiloʻi ʻe he ʻOtuá “ʻoku tatau mo hono finangalo”? (1 Samiuela 13:14) ʻOku ʻomi ʻe he tohi Tohi Tapu hono ua ʻa Samiuelá ʻa e ngaahi tali fakafiemālie ki he ngaahi fehuʻí ni.

Ko e tohi 2 Samiuelá naʻe tohi ia ʻe Kata mo Nētane, ko e ongo palōfita naʻá na vāofi pea mo Tuʻi Tēvita ʻo ʻIsileli ʻo e kuonga muʻá. a ʻI heʻene kakato hono hikí ʻi he 1040 K.M. nai, ʻo ofi ki he fakaʻosiʻosi ko ia ʻa e pule fakatuʻi taʻu ʻe 40 ʻa Tēvitá, ʻoku fakatefito ʻa e tohí ʻia Tēvita mo hono vahaʻangatae pea mo Sihová. ʻOku fakamatala ʻa e tohi fakaueʻilotó ni ki he anga ko ia ʻa e hoko ha puleʻanga moveuveu ko ha puleʻanga fāʻūtaha lakalakaimonū ʻi he malumalu ʻo ha tuʻi loto-toʻa. ʻOku fonu ʻa e fakamatala fakatoʻoalotó ʻi he ngaahi ongo fakaetangata kuo fakahaaʻi ʻi he tuʻunga lahi moʻoni.

KUO “FAKAUTUUTU AI PE ʻA E MALOHI” ʻO TĒVITÁ

(2 Samiuela 1:1–​10:19)

Ko e fakafeangai ʻa Tēvita ki he ongoongo ko ia ʻo e mate ʻa Saula mo Sionatané ʻokú ne fakahaaʻi ʻa ʻene ngaahi ongoʻi kiate kinauá pea kia Sihová. ʻI Hepeloni, ʻoku fakanofo tuʻi ai ʻa Tēvita ki he matakali ʻo Siutá. Ko e foha ʻo Saula ko ʻIsipōsetí ʻoku fakanofo tuʻi ia ki he toenga ko ia ʻo ʻIsilelí. ʻOku hokohoko atu ʻa e “fakautuutu ai pe ʻa e malohi” ʻo Tēvitá, pea ʻi he meimei taʻu ʻe fitu mo e konga ki mui ai, ʻoku fakanofo tuʻi ia ki he kotoa ʻo ʻIsilelí.​—2 Samiuela 5:10.

ʻOku ikunaʻi ʻe Tēvita ʻa Selusalema mei he kau Siepusí ʻo ne fokotuʻu ia ko e kolomuʻa ʻo hono puleʻangá. Ko ʻene ʻuluaki feinga ko ia ke ʻave ʻa e ʻaʻake ʻo e kovinānité ki Selusalemá ʻoku iku ia ki ha fakatamaki. Kae kehe, ʻoku lavameʻa ʻa e feinga hono uá, pea ʻoku meʻe fiefia ai ʻa Tēvita. ʻOku fakahoko ʻe Sihova ha fuakava pea mo Tēvita ki ha puleʻanga. ʻOku fakavaivaiʻi ʻe Tēvita ʻa hono ngaahi filí ʻi he hokohoko atu ʻa e ʻiate ia ʻa e ʻOtuá.

Tali ki he Ngaahi Fehuʻi Fakatohitapú:

2:​18​—Ko e hā naʻe ui ai ʻa Sioape mo hono ongo tokouá ko e ngaahi foha ʻe toko tolu ʻo Seluvaia, ko ʻenau faʻeé? ʻI he Ngaahi Konga Tohi Tapu Faka-Hepeluú, naʻe anga-maheniʻaki ʻa e ʻalu ʻa e laine hohokó ʻi he tamaí. ʻOku ngalingali ne mate mutukia ʻa e husepāniti ia ʻo Seluvaiá, pe ne fai ʻa e vakai ki ai ʻokú ne taʻefeʻunga ke fakakau ʻi he Lēkooti Toputapú. Ne malava pē ke fakakau ʻa Seluvaia he tohi hohokó koeʻuhí he ko e tuofefine moʻoni pe tuofefine tamai-taha ia ʻo Tēvita. (1 Kalonikali 2:​15, 16) Ko e fakamatala pē ʻo fekauʻaki pea mo e tamai ʻa e kau tautehina ʻe toko tolú ʻoku fekauʻaki ia mo e feituʻu naʻe tanu ai ʻi Pētelihemá.​—2 Samiuela 2:32.

3:​29 (NW)​—ʻOku ʻuhinga ki he hā “ha tangata ʻoku ne puke ha meʻa takaiʻanga filo”? Naʻe angaʻaki hono fai ʻe he kakai fefiné ʻa hono  lālanga ʻo e tupenú. Ko ia ai, ngalingali ʻoku ʻuhinga ʻa e kupuʻi leá ni ki he kau tangata ko ia naʻa nau taʻefeʻunga ki he faʻahinga ngāue hangē ko e taú, pea naʻe fakamoʻuaʻaki leva kinautolu ke nau fai ʻa e ngāue naʻe anga-maheni ʻaki hono fai ʻe ha fefine.

5:​1, 2​—Ko e hā e fuoloa hili hono fakapoongi ʻo ʻIsipōsetí naʻe fakanofo tuʻi ai ʻa Tēvita ki he kotoa ʻo ʻIsilelí? ʻOku hā ngali ʻuhinga lelei ke fakamulituku ʻaki ʻo pehē naʻe kamata ʻa e pule fakatuʻi taʻu ʻe ua ʻa ʻIsipōsetí taimi nounou pē hili ʻa e mate ko ia ʻa Saulá, ʻo meimei ʻi he taimi tatau pē naʻe kamata pule ai ʻa Tēvita ʻi Hepeloní. Naʻe puleʻi ʻe Tēvita ʻa Siuta mei Hepeloni ʻo feʻunga mo e taʻu ʻe fitu mo e konga. ʻI he hili pē ko ia hono fakanofo tuʻi ia ki he kotoa ʻo ʻIsilelí, naʻá ne hiki leva hono kolomuʻá ki Selusalema. Ko ia ai, naʻe hoko ʻa Tēvita ʻo tuʻi ki he kotoa ʻo ʻIsilelí ʻi he meimei taʻu nai ʻe nima hili ʻa e mole atu ko ia ʻa ʻIsipōseti ʻi he maté.​—2 Samiuela 2:​3, 4, 8-11; 5:​4, 5.

8:2​—Ko e kau Mōape ʻe toko fiha naʻe fakapoongi ʻi he hili ʻa e fepaki ʻa ʻIsileli mo kinautolú? Ngalingali ne fakapapauʻi ʻa e fiká ʻi hono fuá kae ʻikai ko hono laú. ʻOku hā ngalingali ne fakatākoto fakataha fakaʻotuʻotu ʻe Tēvita ʻa e kau Mōapé ʻi he kelekelé. Ko hono hokó, naʻá ne fua ʻa e ʻotú ʻaki ʻa e lōloa ʻo ha afo pe maea. Hangehangē, ko e laine fua ʻe ua, pe vahe tolu ʻe ua ʻo e kau Mōapé, ne tāmateʻí, pea ko e laine fua leva ʻe taha, pe vahe tolu ʻe taha ʻo kinautolú, naʻe fakahaofi ia.

Ngaahi Lēsoni kia Kitautolu:

2:1; 5:​19, 23. Naʻe fakaʻekeʻeke ʻe Tēvita kia Sihova ki muʻa ke ne nofo ʻi Hepeloní pea pehē ki muʻa ke ne fepaki mo hono ngaahi filí. ʻOku totonu foki mo kitautolu ke tau kumi ki he tataki ʻa Sihová ki muʻa ke tau fai ha ngaahi fili ʻa ia te ne uesia ʻa hotau tuʻunga fakalaumālié.

3:​26-​30. ʻOku utu ʻi he sāuní ʻa e ngaahi nunuʻa fakamamahi.​—Loma 12:​17-19.

3:​31-​34; 4:​9-​12. Ko e ʻikai maʻu ko ia ʻe Tēvita ha loto-sāuni mo ha loto-tāufehiʻá ʻoku alafaʻifaʻitakiʻanga ia.

5:​12. ʻOku totonu ke ʻoua ʻaupito ʻe ngalo ʻiate kitautolu ko Sihová kuó ne akoʻi kitautolu ʻi heʻene ngaahi foungá pea kuó ne ʻai kitautolu ke tau malava ʻo maʻu ha vahaʻangatae lelei mo ia.

6:​1-7. Neongo naʻe taumuʻa lelei pē ʻa Tēvita, naʻá ne maumauʻi ʻa e tuʻutuʻuni ʻa Sihová ʻi heʻene feinga ko ia ke ʻave ʻa e ʻAʻaké ʻi ha salioté pea naʻe taʻelavameʻa ia. (Ekisoto 25:​13, 14; Nomipa 4:​15, 19; 7:​7-9) Ko hono puke ko ia ʻe ʻUsa ʻa e ʻAʻaké ʻokú ne fakahaaʻi mai ko e ngaahi taumuʻa leleí ʻoku ʻikai ke ne fulihi ʻe ia ʻa e meʻa ʻoku fiemaʻu ʻe he ʻOtuá.

6:​8, 9. ʻI ha tuʻunga fonu ʻahiʻahi, naʻe ʻuluaki ʻita ai ʻa Tēvita, peá ne toki ilifia—mahalo naʻe aʻu ʻo ne tukuakiʻi ʻa Sihova ki he meʻa fakamamahi ne hokó. ʻOku fiemaʻu ke tau maluʻi kitautolu mei hono tukuakiʻi ʻa Sihova ki he ngaahi palopalema ʻoku hoko ʻi hono tukunoaʻi ʻene ngaahi fekaú.

7:​18, 22, 23, 26. Ko e anga-fakatōkilalo ʻa Tēvitá, anga-līʻoa maʻataʻatā kia Sihová, pea mo e mahuʻingaʻia ʻi hono hakeakiʻi ʻa e huafa ʻo e ʻOtuá ʻa e ngaahi ʻulungāanga ke tau faʻifaʻitaki ki aí.

8:2. ʻOku fakahoko ha kikite naʻe fakahaaʻi ʻi he taʻu nai ʻe 400 ki muʻa atu. (Nomipa 24:17) ʻOku moʻoni maʻu pē ʻa e folofola ʻa Sihová.

9:​1, 6, 7. Naʻe tauhi ʻe Tēvita ʻene palōmesí. ʻOku fiemaʻu foki mo kitautolu ke tau feinga ke fai ki heʻetau leá.

ʻOKU FAKATUPU ʻE SIHOVA ʻA E MALA KI HEʻENE PANÍ

(2 Samiuela 11:1–​20:26)

“Vakai, te u fakatupu ha mala kiate koe mei ho fale oʻou,” ko e folofola ia ʻa Sihova kia Tēvitá, “pea te u toʻo ho ngaahi uaifi mei ho funga, ʻo tuku ki ho kaungaʻapi, pea te ne mohe mo ho ngaahi ʻunoho ʻi he mata ʻo e laʻa ni.” ( 2 Samiuela 12:11) Ko e hā hono ʻuhinga naʻe fai ai ʻa e fanongonongó ni? Ko e angahala ʻa Tēvita mo Patisepá. Neongo ʻoku fakamolemoleʻi ʻa Tēvita fakatomala, ʻoku ʻikai ke fakahaofi ai ia mei he ngaahi nunuʻa ʻo ʻene angahalá.

ʻUluakí ʻoku mate ʻa e tama ʻoku fanauʻi ʻe Patisepá. Hili iá ʻoku tohotohoʻi ʻa e ʻofefine tāupoʻou ʻo Tēvita ko Temá ʻe hono tuongaʻane tamai-taha ko ʻAmanoní. ʻOku sāuniʻi leva ia ʻe hono tuongaʻane tamai-taha faʻē-taha ko ʻApisalomé ʻo tāmateʻi ʻa ʻAmanoni. ʻOku faʻufaʻufono ʻa ʻApisalome ki heʻene tamaí tonu peá ne fanongonongo ai ia ko e tuʻi ʻi Hepeloní. ʻOku ʻai ai ʻe he meʻá ni ʻa Tēvita ke ne hola mei Selusalema. ʻOku fehokotaki fakasino ʻa ʻApisalome pea mo e toko hongofulu ʻi he kau sinifu ʻa ʻene tamaí naʻe tuku ke nau tokangaʻi ʻa e falé. Naʻe toki foki pē ʻa Tēvita  ki hono tuʻunga-tuʻí ʻi he hili hono tāmateʻi ʻa ʻApisalomé. Ko ha angatuʻu ʻa e Penisimani ko Sipá ʻoku ngata ia ʻi heʻene maté.

Tali ki he Ngaahi Fehuʻi Fakatohitapú:

14:7 (PM)​—Ko e hā ʻoku fakatātaaʻi ʻe he “malalaʻi afi”? ʻOku ngāueʻaki ʻa e ulo māmālie ʻa ha malalaʻi afi ke ne fakahaaʻi ʻa e fānau ʻoku moʻuí.

19:29​—Ko e hā naʻe tali pehē ai ʻa Tēvita ki he fakamatala ʻa Mefipōsetí? ʻI he tuʻunga ʻene fanongo kia Mefipōsetí, ʻoku pau pē ne ʻiloʻi ʻe Tēvita naʻá ne faihala ʻi heʻene tui ko ia ki he ngaahi lea ʻa Sipá ʻi he anga ʻo ʻene hāmaí. (2 Samiuela 16:​1-4; 19:​24-28) ʻOku mātuʻaki ngalingali, naʻe hanga ʻe he meʻá ni ʻo fakaʻitaʻi ʻa Tēvita, pea naʻe ʻikai ke ne fie fanongo ki ha toe meʻa ʻo fekauʻaki pea mo e tuʻungá.

Ngaahi Lēsoni kia Kitautolu:

11:​2-​15. Ko e fakamatala totonu ʻo e ngaahi tōnounou ʻa Tēvitá ʻokú ne fakamoʻoniʻi ai ʻa e moʻoni ko ia ko e Tohi Tapú ko e Folofola fakamānavaʻi ia ʻa e ʻOtuá.

11:​16-​27. ʻI heʻetau fakahoko ha angahala mamafa, ʻoku ʻikai totonu ke tau feinga ke ʻufiʻufi ia ʻo hangē ko ia naʻe fai ʻe Tēvitá. ʻI hono kehé, ʻoku totonu ke tau vete ʻetau angahalá kia Sihova pea kumi tokoni mei he kau mātuʻa he fakatahaʻangá.—Palovepi 28:13; Semisi 5:​13-16.

12:​1-​14. ʻOku fokotuʻu ʻe Nētane ha faʻifaʻitakiʻanga lelei maʻá e kau mātuʻa he fakatahaʻangá. Ko ʻenau ʻi aí ke tokoniʻi ʻa e faʻahinga ʻoku tō ki he angahalá ke fakatonutonu honau ʻalungá. Kuo pau ki he kau mātuʻá ke nau fakahoko pōtoʻi ʻa e fatongiá ni.

12:​15-​23. ʻI hono maʻu ʻa e fakakaukau totonu ki he meʻa naʻe hoko kiate iá naʻá ne tokoniʻi ai ʻa Tēvita ke ne fakafeangai totonu ki he faingataʻá.

15:12; 16:​15, 21, 23. ʻI he mahino ko ia ʻe ʻalu hake ʻa ʻApisalome ki he taloní, naʻe taki ai ʻe he pōlepolé mo e fiemāʻolungá ʻa e tokotaha-faleʻi poto ko ʻEhitofelí ke ne hoko ko ha tokotaha lavaki. Ko hono maʻu ko ia ʻa e potó taʻekau ai ʻa e anga-fakatōkilaló mo e mateakí ʻe lava ke hoko ia ko ha tauhele.

19:​24, 30. Naʻe fakahoungaʻi moʻoni ʻe Mefipōseti ʻa e ʻaloʻofa ʻa Tēvitá. Naʻá ne fakamoʻulaloa loto-lelei ki he fili ko ia ʻa e tuʻí ʻo fekauʻaki mo Sipá. ʻOku totonu ke ueʻi kitautolu ʻe he houngaʻia ʻia Sihova pea mo ʻene kautahá ke tau hoko ai ʻo anganofo.

20:​21, 22. Ko e poto ʻa ha tokotaha ʻe lava ke ne taʻofi ai ha fakatamaki ki ha tokolahi.​—Koheleti 9:14, 15.

TUKU KE TAU TŌ KI HE “NIMA ʻO SIHOVÁ”

(2 Samiuela 21:1–​24:25)

ʻOku ʻi ai ʻa e honge he taʻu ʻe tolu koeʻuhí ko e halaia ʻi he toto ko ia naʻe fakatupunga ʻe Saula ʻi heʻene tāmateʻi ʻa e kau Kipioné. (Siosiua 9:15) Koeʻuhi ke sāuni ʻa e halaia ʻi he toto ko iá, naʻe fiemaʻu ai ʻe he kau Kipioné ke tāmateʻi ʻa e ngaahi foha ʻe toko fitu ʻo Saulá. ʻOku ʻoange kinautolu ʻe Tēvita ki he nima ʻo e kau Kipioné, pea ʻoku  ngata ai ʻa e pakukaá ʻi he tō hifo ha fuʻu ʻuha. ʻOku hoko ha kau saiāniti Filisitia ʻe toko fā ʻo “to ʻi he nima ʻo Tevita mo e nima o ʻene kau tamaioʻeiki.”​—2 Samiuela 21:22.

ʻOku fakahoko ʻe Tēvita ha angahala mamafa ʻi hono fekauʻi ʻo ha tohi-kakai taʻefakalao. ʻOkú ne fakatomala peá ne fili ke ne tō “ki he nima o Jihova.” (2 Samiuela 24:​14, PM) Ko hono olá, ʻoku mate ai ha toko 70,000 mei ha mahaki fakaʻauha. ʻOku muimui ʻa Tēvita ki he fekau ʻa Sihová, pea ʻoku fakangata ai ʻa e malá.

Tali ki he Ngaahi Fehuʻi Fakatohitapú:

21:8​—ʻOku lava fēfē ke pehē naʻe ʻi ai ʻa e ngaahi foha ʻe toko nima ʻo Maikale ko e ʻofefine ʻo Saulá, kae pehē ʻe he 2 Samiuela 6:23 naʻe mate taʻefanau ia? Ko e fakamatala talilahia tahá ʻoku pehē ai ko e ngaahi foha eni ia ʻa e tokoua ʻo Maikalé ʻa Mēlape, ʻa ia naʻe mali mo ʻAtalielí. Ngalingali, naʻe mate vave pē ʻa Mēlape pea naʻe tauhi leva ʻe Maikale taʻefanau ʻa e fānaú.

21:​9, 10​—Ko e hā e fuoloa hono leʻohi ʻe Lisipa ʻa hono ongo foha ʻe toko uá pea mo e makapuna ʻe toko nima ʻo Saula ne tāmateʻi ʻe he kau Kipioné? Naʻe tautau ʻa e toko fitú ni “ʻi he ngaahi ʻuluaki ʻaho ʻi he kamata.”​—Maʻasi pe ʻEpeleli. Ko honau ngaahi ʻangaʻangá naʻe tuku fakaeʻa ia ʻi ha moʻunga. Naʻe leʻohi ʻe Lisipa ʻa e ʻangaʻanga ʻe fitú ʻi he ʻaho mo e pō ʻo aʻu ki hono toki fakahā ʻe Sihova ʻaki hono fakangata ʻa e pakukaá kuo lolou ʻa ʻene houhaú. ʻOku mātuʻaki ngalingali ʻe ʻikai ke tō ha ʻuha lahi ia ki muʻa ke ʻosi ʻa e faʻahitaʻu utu-taʻu ʻi ʻOkatopá. Ko ia ai, ʻoku pau pē naʻe fakahoko ʻe Lisipa ʻa e leʻó ʻi he meimei māhina ʻe nima pe ono. ʻI he hili iá, naʻe tanu ʻe Tēvita ʻa e ngaahi hui ʻo e kau tangatá.

24:1​—Ko e hā naʻe hoko ai ʻa e tohi-kakaí ko ha angahala mamafa kia Tēvitá? Ko hono fakahoko ko ia ʻo ha tohi-kakaí ʻiate ia pē naʻe ʻikai tapui ia ʻe he laó. (Nomipa 1:​1-3; 26:​1-4) ʻOku ʻikai ke tala ia ʻe he Tohi Tapú pe ko e hā e taumuʻa naʻá ne ueʻi ʻa Tēvita ke ne lau ai ʻa e kakaí. Kae kehe, ʻoku fakahā mai ʻe he 1 Kalonikali 21:1 ko Sētane naʻá ne ueʻi ia ke ne fai peheé. ʻI ha faʻahinga tuʻunga pē, ko ʻene ʻeiki-taú, ʻa Sioape, naʻá ne ʻiloʻi naʻe hala ʻa e fili ʻa Tēvita ke lēsisita ʻa e kakaí, pea naʻá ne feinga ke fakalotoʻi ʻa Tēvita ke tuku ʻa hono fai iá.

Ngaahi Lēsoni kia Kitautolu:

22:​2-​51. He fakaʻofoʻofa moʻoni ē ko hono fakahā mai ʻe he hiva ʻa Tēvitá ʻa Sihova ko e ʻOtua moʻoní, ʻoku taau mo ʻetau falala kakató!

23:​15-​17. Naʻe maʻu ʻe Tēvita ha ʻapasia loloto lahi ki he lao ʻa e ʻOtuá ki he moʻuí mo e totó he ʻi he tuʻungá ni naʻá ne fakaʻehiʻehi ai mei hano fai ha meʻa pē naʻe aʻu ʻo tatau mo hano maumauʻi ʻo e lao ko iá. ʻOku fiemaʻu ke tau fakatupulekina ha fakakaukau pehē ki he ngaahi tuʻutuʻuni kotoa pē ʻa e ʻOtuá.

24:10. Naʻe ueʻi ʻe he konisēnisi ʻo Tēvitá ʻa ia tonu ki he fakatomalá. ʻOku ongongofua feʻunga ke tali pehē nai hotau konisēnisí?

24:14. Naʻe tuipau ʻa Tēvita ʻoku mohu meesi lahi ange ʻa Sihova ia ʻi he faʻahinga ʻo e tangatá. ʻOku tau maʻu ha faʻahinga tuipau pehē?

24:17. Naʻe ongoʻi fakatomala ʻa Tēvita ʻi hono ʻomai ko ia ʻe heʻene angahalá ʻa e faingataʻaʻia ki he puleʻangá hono kotoa. Ko ha tokotaha faihala fakatomala ʻoku totonu ke ne ongoʻi halaia ʻi he fakamā kuo ʻomai nai ʻe heʻene ngāué ki he fakatahaʻangá.

Ko e Hoko ʻo ‘Tatau mo e Finangalo ʻo e ʻOtuá’ Te Tau Malava Ia

Naʻe hoko ʻa e tuʻi hono ua ʻo ʻIsilelí ko ha ‘tangata ʻoku tatau hono lotó mo e finangalo ʻo Sihová.’ (1 Samiuela 13:14) Naʻe ʻikai teitei fehuʻia ʻe Tēvita ʻa e ngaahi tuʻunga māʻoniʻoni ʻa Sihová, pea naʻe ʻikai ke ne kumi ke tulitāupau ha ʻalunga ʻo e tauʻatāina mei he ʻOtuá. ʻI he taimi kotoa pē ne faihala ai ʻa Tēvita, naʻá ne fakahā ʻene angahalá, tali ʻa e akonakí, pea fakatonutonu hono ngaahi ʻalungá. Naʻe hoko ʻa Tēvita ko ha tangata ia ʻo e anga-tonú. ʻIkai ʻoku fakapotopoto ke tau hoko ʻo hangē ko iá, tautautefito ʻi he taimi ʻoku tau faihala aí?

ʻOku fakatātaaʻi mahino mai ʻe he talanoa ki he moʻui ʻa Tēvitá ko hono ʻiloʻi ko ia ʻa e tuʻunga-hau ʻo Sihová ko hono tali ia ʻa ʻEne ngaahi tuʻunga ki he leleí mo e koví pea mo e feinga ke muimui ki ai ʻi he hoko ko e kau tauhi anga-tonu. Te tau malava ia. He houngaʻia moʻoni ē ko kitautolu he ngaahi lēsoni ʻoku tau ako mei he tohi Ua Samiuelá! Ko e pōpoaki fakamānavaʻi ʻoku ʻi hono ngaahi pēsí, ko hono moʻoní, ʻoku moʻui pea ko e koto mālohi.—Hepelu 4:12.

[Fakamatala ʻi lalo]

[Fakatātā ʻi he peesi 16]

Ko hono manatuʻi ko ia ʻa e tokotaha naʻá ne fokotuʻu maʻu ia ke tuʻí naʻá ne tokoniʻi ai ʻa Tēvita ke ne nofoʻaki anga-fakatōkilalo

[Fakatātā ʻi he peesi 18]

“Vakai, te u fakatupu ha mala kiate koe mei ho fale oʻou”

Patisepa

Tema

ʻAmanoni