ʻOkú Ke Fetalanoaʻaki mo e Faʻahinga ʻOkú Ke ʻOfa Aí?

KO ʻETAU malava ko ia ke fetalanoaʻaki mo e faʻahinga ʻoku tau ʻofa aí ʻoku hōloa lahi ʻaupito,” ko e līpooti ia ʻa e Polityka fakauike ʻa Pōlaní. ʻI he ʻIunaite Seteté, ʻoku fakafuofua ʻoku fakamoleki ai ʻe he ngaahi hoa malí ʻa e miniti pē ʻe ono ʻi he ʻaho ke fetalanoaʻaki ai ʻi ha founga mohu ʻuhinga. ʻOku fakakaukau ʻa e kau mataotao ʻe niʻihi ko e vaeua ʻo e ngaahi māvaé mo e vete malí kotoa ko e ikuʻanga ia ʻo e hōloa ko ení.

Fēfē ʻa e fetalanoaʻaki ʻi he vahaʻa ʻo e mātuʻá mo e fānaú? ʻI he ngaahi tuʻunga lahi, “ʻoku hoko pē ia ʻo ʻikai ko ha fetalanoaʻaki, ka ko ha fakaʻekeʻeke: Naʻe fēfē ʻa e akó? ʻOku fēfē ho ngaahi kaungāmeʻá?” ko e fakamatala ia ʻa e līpooti ʻi ʻolungá. “ʻE lava fēfē ke ako ʻetau fānaú ke nau fakatupulekina ʻa e ngaahi vahaʻangatae fakaeongo peheé?” ko ʻene fehuʻí ia.

Koeʻuhi ʻoku ʻikai ke hokonoa pē ʻa e ngaahi pōtoʻi fakafetuʻutaki leleí, ʻe lava fēfē ke tau fakaleleiʻi ʻetau malava ke fetalanoaʻakí? Naʻe ʻomai kia kitautolu ʻe he ākonga Kalisitiane ko Sēmisí ha faleʻi mahuʻinga: “Ke vave ʻa e tangata fuape he fanongo, kae fakatotoka ki he lea, pea fakatotoka ki he ʻita.” (Semisi 1:19) ʻIo, ke maʻu ha fetalanoaʻaki fakatupu langa hake, ʻoku fiemaʻu ke tau fanongo tokanga ʻo ʻikai ke taʻofi taʻefaʻakātaki pe vave ki he fakamulitukú. Fakaʻehiʻehi mei he fakaangá koeʻuhí ʻe lavangofua ai ke fakangata ha fetalanoaʻaki. Tānaki atu ki ai, naʻe ngāueʻaki ʻe Sīsū ʻa e ngaahi fehuʻi fakapotopoto, ʻo ʻikai ko e fakaʻekeʻeke, ka ke ʻiloʻi ai ʻa e meʻa naʻe ʻi he loto ʻo ʻene tokotaha fanongó pea ke fakaivimālohiʻi ai ʻa e haʻi ʻi hona vahaʻá.—Palovepi 20:5; Mātiu 16:​13-17; 17:​24-27.

ʻI hono ngāueʻaki ko ia ʻa e ngaahi tefitoʻi moʻoni lelei ʻoku maʻu ʻi he Tohi Tapú, tamuʻomuʻa ke fetalanoaʻaki mo fetuʻutaki mo e faʻahinga ʻokú ke ʻofa aí. ʻE iku nai ai ki ha vahaʻangatae māfana ʻa ia te ke koloaʻaki ʻi ha ngaahi taʻu lahi—naʻa mo e kotoa ʻo hoʻo moʻuí.