Līpooti ʻa e Kau Fanongonongo ʻo e Puleʻangá

ʻOku ʻOange ʻe ha Kakai Faitotonu ʻa e Lāngilangí kia Sihova

ʻI HE māmaní kotoa, ko e Kau Fakamoʻoni ʻa Sihová​—ʻa e kei siʻi mo e taʻumotuʻa​—ʻoku ʻiloa kinautolu ʻi heʻenau faitotonú. Fakakaukau angé ki he ngaahi fakatātā mei ha konitinēniti ʻe tolu.

Ko Olusola taʻu 17, ʻoku nofo ʻi Naisīlia, naʻá ne maʻu ha peesi ʻi he kelekelé ʻi heʻene foki ki ʻapi mei he akó ʻi he ʻaho ʻe taha. Naʻá ne ʻave ia ki he pule-akó, ʻa ia naʻá ne lau ʻa e paʻangá, pea naʻe aʻu ia ki he ₦6,200 ($45 U.S. nai). Naʻe fakafoki ʻe he pule-akó ʻa e pēsí ki he faiako naʻe haʻaná. ʻI he houngaʻiá, naʻe ʻoange ʻe he faiakó kia Olusola ʻa e ₦1,000 ($7 U.S. nai) peá ne tala ange kiate ia ke ʻai ʻo totongi ʻaki ia ʻene totongi akó. ʻI he fanongo ʻa e fānau ako kehé ki he meʻa naʻe hokó, naʻa nau manumanukiʻi ʻa Olusola. ʻI ha ngaahi uike ki mui ai, naʻe līpooti ʻe ha tokotaha ako naʻe kaihaʻasi ʻene paʻangá, ko ia naʻe kole ai ki he kau faiakó ke nau hakule ʻa e kau akó hono kotoa. “Tuʻu koe heni,” ko e tala ange ia ʻe he faiakó kia Olusola. “ʻOku ou ʻiloʻi ko hoʻo hoko ko ia ko e taha ʻo e Kau Fakamoʻoni ʻa Sihová, ʻe ʻikai lava ke ke kaihaʻa koe.” Naʻe maʻu ʻa e paʻangá ʻi ha toko ua ʻi he tamaiki tangata naʻa nau manumanukiʻi ʻa Olusola, pea naʻe tauteaʻi lahi kinaua. Naʻe tohi ʻe Olusola: “ʻOku ou fiefia ʻaupito ʻi hono ʻiloʻi ko e taha au ʻo e Kau Fakamoʻoni ʻa Sihová, ʻa ia ʻe ʻikai ʻaupito ke kaihaʻa, ʻo ʻave ai ʻa e lāngilangí kia Sihova.”

ʻI he ʻaho ʻe taha ʻi he mavahe atu mei ʻapi ʻa Marcelo, ko ha tangataʻifonua ʻo ʻĀsenitina, naʻá ne maʻu ha kato ʻi he kelekelé ʻi ha ngaahi mita siʻi pē mei hono matapā ʻi muí. ʻI hono ʻave ki fale ʻa e kató, naʻá ne fakaava fakalelei hake ia mo hono uaifí. ʻI heʻena fuʻu ʻohovalé, naʻá na maʻu ha fuʻu paʻanga lahi, ngaahi kaati fakamoʻua pea mo ha ngaahi sieke kuo ʻosi fakamoʻoni ai, ʻa ia naʻe feʻunga ʻa e sieke ʻe taha ai mo e peso ʻe taha miliona. ʻI ha ʻinivoisi, naʻá na maʻu ai ha fika telefoni. Naʻá na tā ki he tokotaha naʻe ʻaʻaná ʻo fokotuʻutuʻu ke fakafoki ange ʻa e kató pea mo e ngaahi meʻa naʻe ʻi lotó ʻi he feituʻu ʻoku ngāue ai ʻa Marcelo. ʻI he aʻu ki ai ʻa e tokotaha naʻe haʻaná, naʻá ne hā ngali hohaʻa. Naʻe tala ange kiate ia ʻe he pule-ngāué ke ne fiemālie pē, he ko Marcelo ko e taha ia ʻo e Kau Fakamoʻoni ʻa Sihová. ʻI he hoko ko ha pale ki hono maʻu ʻa e kató, naʻe ʻoange ʻe he tokotaha naʻe haʻaná kia Marcelo ʻa e peso pē ʻe 20 ($6 U.S. nai). Naʻe ʻita ʻaupito ʻa e pule-ngāué ʻi he meʻá ni he naʻe fuʻu maongo kiate ia ʻa e faitotonu ko ia ʻa Marcelo. Naʻe ʻoange ʻe he meʻá ni ʻa e faingamālie kia Marcelo ke ne fakamatalaʻi ko ʻene hoko ko ia ko e taha ʻo e Kau Fakamoʻoni ʻa Sihová, ʻokú ne loto ai ke faitotonu ʻi he taimi kotoa pē.

Ko e hokosia ko eni hono hokó ʻoku haʻu ia mei Kekisitani. Ko Rinat, ko ha kiʻi tamasiʻi taʻu ono ia, naʻá ne maʻu ha peesi ʻa ha fefine naʻe nofo ofi ai. Naʻe ʻi he pēsí ʻa e som ʻe 1,100 ($25 U.S. nai). ʻI hono fakafoki ʻe Rinat ʻa e peesi molé ki he fefiné, naʻá ne lau ʻa e paʻangá peá ne tala ange leva ki he faʻē ʻa Rinat ʻoku mole mei ai ʻa e som ʻe 200. Naʻe tala ange ʻe Rinat naʻe ʻikai ke ne toʻo ʻe ia ʻa e paʻangá. Naʻa nau ʻalu kotoa atu leva ke kumi ki he paʻanga molé pea naʻe maʻu ia ʻo ofi ki he feituʻu naʻe ʻilo ai ʻa e pēsí. Naʻe ʻohovale ʻa e fefiné. Naʻá ne fakahaaʻi ʻene houngaʻiá kia Rinat mo ʻene faʻeé, ʻuluakí ʻi hono fakafoki ange ʻa e paʻanga naʻe molé pea ko hono uá, ki hono tauhi hake ia ʻi he founga faka-Kalisitiané.