Talanoa ki he Moʻuí

“Moʻui ko Eni”—Fiefia Ai ki he Kakato Tahá!

FAKAMATALA FAI ʻE TED BUCKINGHAM

Naʻá ku hoko ko ha faifekau taimi-kakato ʻo feʻunga mo e taʻu ʻe ono pea nofo mali ʻi he māhina ʻe ono ʻi he taimi naʻá ku moʻua fakafokifā ai ʻi he mahaki polioó. Ko e 1950 ia, pea naʻá ku kei taʻu 24 pē. Ko e māhina ʻe hiva naʻá ku ʻi he falemahakí aí naʻá ku maʻu ai ʻa e taimi lahi ke u fakakaukauloto ki heʻeku moʻuí. ʻI he ngaahi faingataʻaʻia fakasino foʻou kuó u maʻú, ko e hā ʻa e meʻa ʻoku tuku tauhi mai ʻe he kahaʻú kiate au mo hoku uaifí, ʻa Joyce?

ʻI HE 1938 ko ʻeku tamaí, naʻe ʻikai ʻaupito ko ha tangata lotu, naʻá ne maʻu ha tatau ʻo e tohi Government. a ʻOku ngalingali ko e moveuveu fakapolitikalé mo e ʻamanaki hoko ʻa e taú naʻá ne fakaʻaiʻai ia ke ne maʻu ʻa e tohí. ʻI heʻeku ʻiloʻí, naʻe ʻikai ʻaupito te ne lau ia, ka naʻe lau ia ʻe heʻeku faʻē naʻe līʻoa fefeka ki he lotú. Naʻe vave ʻene fai ʻa e tali ki he pōpoaki ʻi aí. Naʻá ne mavahe mei he Siasi ʻIngilaní, pea neongo ʻa e fakafepaki mei heʻeku tamaí, naʻá ne hoko ko ha Fakamoʻoni faitōnunga ʻa Sihova peá ne hokohoko atu ai ʻo aʻu ki heʻene maté ʻi he 1990.

Naʻe ʻave au ʻe heʻeku faʻeé ki heʻeku fuofua fakataha faka-Kalisitiané ʻi ha Fale Fakatahaʻanga ʻi Epsom, ʻi he fakatonga ʻo Lonitoní. Naʻe fakataha ʻa e fakatahaʻangá ʻi ha fale ko ha falekoloa ia ki muʻa, pea ne mau fanongo ai ki ha peleti kalamafoni ʻo ha malanga naʻe fai ʻe J. F. Rutherford, ʻa ia naʻá ne tokangaʻi ʻa e ngāue ʻa e Kau Fakamoʻoni ʻa Sihová ʻi he taimi ko iá. Naʻe hoko eni ʻo maongo loloto kiate au.

Ko e laku pomu lahi ko ia lolotonga hono ʻohofi vakapuna ʻo Lonitoní naʻe hoko ai ʻa e ngaahi fakatuʻutāmaki lahi. Ko ia ʻi he 1940 naʻe fakapapauʻi ai ʻe heʻeku tamaí ke ne fetukutuku ʻa e fāmilí ki ha feituʻu malu ange—ko Maidenhead, ko ha kiʻi kolo ʻi he kilomita ʻe 45 ki he fakahihifo ʻo Lonitoní. Naʻe  ʻaonga ʻeni, he ko e kau mēmipa ʻe toko 30 ʻo e fakatahaʻanga ʻi aí naʻe fakamoʻoniʻi ko ha matavai lelei kinautolu ʻo e fakalototoʻá. Ko Fred Smith, ko ha tokotaha mālohi fakalaumālie ʻa ia naʻe papitaiso ʻi he 1917, naʻá ne mahuʻingaʻia fakafoʻituitui ʻiate au peá ne akoʻi au ke u hoko ko ha tokotaha malanga ola lelei ange. ʻOku ou kei moʻua lahi kiate ia ki heʻene faʻifaʻitakiʻangá mo ʻene tokoni anga-ʻofá.

Hū ki he Ngāue Taimi-Kakató

ʻI he 1941, ʻi hoku taʻu 15, naʻá ku papitaiso ai ʻi he vaitafe Thames ʻi ha ʻaho momoko ʻi Maʻasi. ʻI he taimi ko iá, ko hoku taʻoketé, ʻa Jim, naʻá ne hū ai ʻo hoko ko ha ʻevangeliō taimi-kakato. ʻI he ʻahó ni, ko ia mo hono uaifí, ʻa Madge, ʻokú na nofo ʻi Birmingham, ʻi he hili ia hono ngāueʻaki ʻa e lahi taha ʻo ʻena moʻuí ʻi he ngāue ʻa Sihová ʻi he ngaahi vāhenga-ngāue fakasēketí mo e fakavahé ʻi he kotoa ʻo Pilitāniá. Ko hoku tuofefine siʻisiʻí, ko Robina, mo hono husepānití ko Frank, ʻokú na kei hoko pē ko e ongo sevāniti faitōnunga ʻa Sihova.

Naʻá ku ngāue ko ha tokotaha ʻakauniteni ʻi ha kautaha ngaohi vala. ʻI he ʻaho ʻe taha naʻe ui au ʻe he talēkita pulé ki hono ʻōfisí ke tuʻuaki mai kiate au ha ngāue lelei ʻe lava ke u maʻu ʻi he hoko ko ha tokotaha fakatau maʻá e kautahá. Neongo ia, naʻá ku fakakaukau ʻi ha taimi, ke muimui ki he faʻifaʻitakiʻanga ʻa hoku taʻoketé, ko ia ai, naʻá ku fakafoki ʻi he anga-fakaʻapaʻapa ʻa e tuʻuaki ʻeku pule ngāué, ʻo fakamatalaʻi ʻa e ʻuhingá. ʻI heʻeku ʻohovalé, naʻá ne fakaongoongoleleiʻi māfana au ʻi heʻeku fiemaʻu ko ia ke tuli ki ha ngāue ʻaonga faka-Kalisitiane peheé. Ko ia hili ha fakataha-lahi fakavahe ʻi Northampton ʻi he 1944, naʻá ku hoko ai ko ha ʻevangeliō taimi-kakato.

Ko ʻeku fuofua vāhenga-ngāué ko Exeter, ʻi he vahefonua ʻo Devon. ʻI he taimi ko iá ko e kolo ko ení naʻe fakaakeake māmālie mei hono pomuʻi ʻi he taimi taú. Naʻá ku nofo ʻi ha ʻapātimeni naʻe ʻosi nofoʻi ʻe ha ongo tāimuʻa ʻe toko ua, ko Frank mo Ruth Middleton, ʻa ia naʻá na anga-ʻofa ʻaupito kiate au. Naʻá ku kei taʻu 18 pē fakataha mo e taukei siʻisiʻi ʻi he foó mo e feimeʻakaí, ka naʻe fakalakalaka ʻa e ngaahi tuʻungá ʻi heʻeku fakatupulekina ʻa ʻeku ngaahi pōtoʻí.

Ko hoku hoa ngāue fakamalangá ko e taʻu 50 ko Victor Gurd, ko ha tangata ʻAilani ʻa ia naʻá ne faifakamoʻoni talu mei he 1920 tupú. Naʻá ne akoʻi au ke u fakataimitēpileʻi ke ʻaonga hoku taimí, ke fakatupulekina ha mahuʻingaʻia loloto ange ki hono lau ʻa e Tohi Tapú, pea ke lāuʻilo ki he mahuʻinga ʻo e ngaahi liliu Tohi Tapu kehekehé. Lolotonga ʻa e ngaahi taʻu mahuʻinga ko iá, ko e faʻifaʻitakiʻanga ʻo e tuʻu maʻu ʻa Victor ʻa e meʻa tofu pē naʻá ku fiemaʻú.

Ko e Pole ʻo e Tuʻunga Tuʻu-ʻAtaá

Naʻe ofi ʻaupito ke ngata ʻa e taú, ka naʻe kei feinga pē ʻa e kau maʻu mafaí ke ui ʻa e kau talavoú ki he ngāue fakakautaú. Naʻá ku hā ʻi he ʻao ʻo ha fakamaauʻanga ʻi he 1943 ʻi Maidenhead, ʻa ia naʻá ku fakahaaʻi māʻalaʻala ai ʻa ʻeku ʻuhinga ke fakaʻatā ai au ʻi he tuʻunga ko ha faifekau ʻo e Kōsipelí. Neongo naʻe ʻikai tali ʻeku hopo tangí, naʻá ku fakapapauʻi ke u hiki ki Exeter ke fakahoko ai ʻeku ngāué. Ko ia ko Exeter naʻe faai atu pē ʻo tuʻutuʻuni ai ke u hā ʻi he fakamaauʻanga fakalotofonuá. ʻI he taimi naʻe tautea ai au ke u ngāue pōpula ʻi he māhina ʻe ono ʻi he pilīsoné, naʻe tala mai ai ʻe he fakamāú kiate au naʻá ne fakameʻapangoʻia ʻi he ʻikai ke ne maʻu e ngofua ke fakangāueʻi lōloa ange aú. Hili ʻa e ngāueʻi ʻo e māhina ʻe ono ko iá, naʻe fakafoki au ki pilīsone ki ha toe māhina ʻe fā.

Koeʻuhi ko au pē ʻa e tokotaha Fakamoʻoni ʻi he pilīsoné, naʻe ui au ʻe he kau selá ko Sihova. Naʻe ʻi he tuʻunga faikehe ʻeku tali ki he hingoa ko iá ʻi he taimi tali uí, he naʻe pau ke u fai ia, ka ko ha monū moʻoni ia ke fanongo ki he huafa ʻo e ʻOtuá ʻoku fanongonongo ʻi he ʻaho ki he ʻaho! Naʻe ʻai ai ʻa e kau pōpula kehé ke nau ʻiloʻi ko ʻeku tuʻu fakakonisēnisi ko e taha ʻo e Kau Fakamoʻoni ʻa Sihová naʻá ne ʻai au ke u ʻi ai mo kinautolú. Ki mui ai, naʻe ʻomai ai ʻa Norman Castro ki he pilīsone tatau, pea naʻe liliu ai ʻa e hingoá. Naʻe ui ai kimaua ko Mōsese mo ʻĒlone.

Naʻe hiki au mei Exeter ki Bristol pea fakaʻosi ki he pilīsone Winchester. Naʻe ʻikai lelei maʻu pē ʻa e ngaahi tuʻungá, ka naʻe tokoni ia ke u maʻu ai ha ongoʻi fakaoliʻia. Ko au mo Norman naʻá ma fiefia ke kātoangaʻi fakataha ʻa e Fakamanatú lolotonga ʻa ʻema ʻi Winchester. Ko Francis Cooke, ʻa ia naʻe  ʻaʻahi mai kia kimaua ʻi pilīsoné, naʻá ne fai ha malanga lelei maʻa kimaua.

Ngaahi Liliu ʻi he Ngaahi Taʻu Hili ʻa e Taú

ʻI he fakataha-lahi ʻi Bristol ʻi he 1946, ʻa ia naʻe tukuange ai ʻa e tohi tokoni Fakatohitapu ko e “Let God Be True,” naʻá ku fetaulaki ai mo ha kiʻi fefine fakaʻofoʻofa, ko Joyce Moore, ʻa ia naʻe toe tāimuʻa foki ʻi Devon. Naʻe tupulaki ʻema kaumeʻá, pea naʻá ma mali ʻi he hili mei ai ʻa e taʻu ʻe fā ʻi Tiverton, ʻa ia naʻá ku ʻi ai talu mei he 1947. Naʻá ma nofo totongi ʻi ha loki ʻa ia naʻá ma totongi ai ha silini ʻe 15 ($1.10, U.S.) ʻi he uike. He moʻui fiefia moʻoni ia!

Lolotonga ʻa homa ʻuluaki taʻu ʻo e nofo malí, naʻá ma toe hiki ai ki he fakatonga ʻo Brixham, ko ha kolo taulanga fakalata ʻa ia naʻe fuofua fakahoko ai ʻa e founga ʻo hono toutaiʻi ʻa e iká ʻaki ʻa e kupenga tohó. Ka neongo ia, naʻe ʻikai te ma ʻi ai ʻo fuʻu fuoloa, ʻi he taimi naʻá ku moʻua ai ʻi he polioó lolotonga ʻema fononga ki ha fakataha-lahi ʻi Lonitoni. Naʻá ku longo ai ʻo ʻikai te u toe ʻiloʻi ha meʻa. Naʻe faifai atu pē ʻo fakaʻatā au mei he falemahakí—hili ha māhina ʻe hiva, hangē ko ia ne u lave ki ai ki muʻá. Naʻe uesia lahi hoku nima toʻomataʻú mo e ongo vaʻé fakatouʻosi, hangē ko ia ʻoku kei ʻi aí, pea naʻe pau ai ke u ngāueʻaki ha tokotoko. Ko siʻoku uaifí hoku kaungāmeʻa fiefia tuʻumaʻú mo e matavai ʻo e fakalototoʻá, tautautefito ʻi heʻene feinga ke hokohoko atu ʻi he ngāue fakafaifekau taimi-kakató. Ka ko e hā te ma fai he taimi ko ení? Naʻe vave ʻeku ʻiloʻi naʻe ʻikai ke nounou ʻa e nima ʻo Sihová.

ʻI he taʻu hoko maí naʻá ma maʻu ai ha ʻasemipilī ʻi Wimbledon, Lonitoni. ʻI he taimi ko ení naʻá ku luelue ai ʻo ʻikai ha tokotoko. Naʻá ma fetaulaki ʻi ai mo Pryce Hughes, ʻa ia naʻá ne tokangaʻi ʻa e ngāué ʻi Pilitāniá. Naʻá ne fakafeʻiloaki mai leva kiate au: “Ei! ʻOku mau fiemaʻu koe ʻi he ngāue fakasēketí!” Naʻe ʻikai lava ke u maʻu ha fakalototoʻa ʻe toe lahi ange! Naʻá ku moʻui lelei nai ki he ngāué? Naʻá ma fakatou fakakaukau mo Joyce ʻo fekauʻaki mo ia, ka ʻi hano akoʻi ʻi ha uike ʻe taha mo e falala kakato kia Sihová, naʻá ma toe foki ai ki he tonga-hihifo ʻo ʻIngilaní, ʻa ia naʻe vaheʻi ai au ke u ngāue ko ha ʻovasia sēketí. Naʻá ku kei taʻu 25 pē ʻi he taimi ko iá, ka ʻoku ou kei manatu pē fakataha mo e houngaʻia lahi ki he anga-ʻofa mo e kātaki ʻa e Kau Fakamoʻoni ko iá ʻa ia naʻa nau tokoni lahi mai kiate aú.

ʻI he kotoa ʻo homa ngaahi malaʻe kehekehe ʻo e ngāue fakateokalatí, naʻá ku ʻiloʻi ai mo Joyce ko e ʻaʻahi ki he ngaahi fakatahaʻangá naʻe ʻomi ai kimaua ke ma vāofi taha mo homa fanga tokoua mo e fanga tuofāfine Kalisitiané. Naʻe ʻikai ʻi ai haʻama kā, ko ia naʻá ma fononga ai ʻi he lēlué pe ʻi he pasí. Neongo naʻá ku kei fai ʻa e feʻunuʻaki ki he ngaahi  fakangatangata naʻe ʻomi ʻe hoku mahakí, naʻá ma fiefia ʻi homa ngaahi monuú ʻo aʻu mai ki he 1957. Ko ha moʻui fakafiemālie ia, ka ʻi he taʻu ko iá naʻe toe hoko mai ai ha pole lahi ange.

Ki he Ngāue Fakamisinalé

Ko hono maʻu ko ia ha fakaafe ke kau ʻi he kalasi hono 30 ʻo Kiliatí naʻe fakafiefia ia kia kimaua. Naʻá ku fekuki lelei mo hoku ngaahi fakangatangata fakaesinó, ko ia naʻá ku tali fiefia mo Joyce ʻa e fakaafé. Mei he meʻa naʻe hokosiá, naʻá ma ʻiloʻi ʻoku tokonaki mai maʻu pē ʻe Sihova ʻa e mālohi kapau te ma kumi ke fai hono finangaló. Naʻe vave ʻa e ʻosi atu ʻa e māhina ʻe nima ʻo e ako lahi ʻi he Akoʻanga Tohi Tapu Taua Leʻo ko Kiliatí, ʻa ia naʻe tuʻu ʻi South Lansing fakaʻofoʻofa, ʻi Niu ʻIoke, U.S.A. Ko e kau akó naʻe meimei ko e ngaahi hoa mali ʻi he ngāue fefonongaʻakí. ʻI hono ʻeke ki he kalasí pe ʻe saiʻia ha taha ke pole ki ha malaʻe ngāue fakamisinale mulí, naʻá ma kau ʻi he faʻahinga naʻe mateuteu ke polé. Ko fē te ma ʻalu ki aí? Ki ʻIukanitā, ʻi ʻAfilika Hahake!

Koeʻuhi naʻe tapui ʻa e ngāue ʻa e Kau Fakamoʻoni ʻa Sihová ʻi ʻIukanitā ʻi he taimi ko iá, naʻe faleʻi au ke u nofo ʻi he fonuá pea kumi ha ngāue fakamāmani. Hili ha fononga lōloa ʻi he lēlué mo e vaká, naʻá ma tūʻuta ʻi Kampala, ʻIukanitā. Naʻe ʻikai fiefia ʻa e kau ʻōfisa ʻi he vaʻa ʻimikuleisoní ʻi he sio kia kimauá pea ne nau fakaʻatā kimaua ke ma nofo ʻi ha ngaahi māhina siʻi pē. Naʻe toki tuʻutuʻuniʻi mai pē kimaua ke ma mavahe. ʻI he ngaahi fakahinohino mei he ʻuluʻi ʻapitangá, naʻá ma folau ki Lotēsia Tokelau (ko Semipia ia he taimi ní). Ko ha fiefia lahi ia ke femātaaki ai mo e toko fā ʻo homa kaungāako Kiliatí—ko Frank mo Carrie Lewis pea mo Hayes mo Harriet Hoskins. Naʻe toe vaheʻi kimaua mei ai, hili pē ha taimi nounou, ki Lotēsia Tonga (ko Simipāpuē ia he taimi ní).

Naʻá ma fononga ʻi he lēlué pea naʻá ma fuofua sio nounou ai ʻi he fuʻu Vaitafe fisifisimuʻa ko Victoria Falls ki muʻa ke ma tūʻuta ʻi Bulawayo. Naʻá ma nofo ʻi ha taimi nounou mo e fāmili McLuckie, ʻa ia ne nau ʻi he haʻohaʻonga ʻo e fuofua Kau Fakamoʻoni ke nofo hení. Ko homa monū ia ke feinga ke ʻiloʻi lelei kinautolu lolotonga ʻa e taʻu ʻe 16 hoko maí.

Feʻunuʻaki ki he Ngaahi Liliú

Hili ʻa e uike ʻe ua ʻo e akoʻi ke hoko ʻo maheni mo e malaʻe ngāue ʻAfiliká, naʻe fili ai au ke u ngāue ko ha ʻovasia fakavahe. Ko e faifakamoʻoni ʻi he feituʻu ʻuta ʻi ʻAfiliká naʻe ʻuhingá ia ko hono ʻave ʻa e vai, meʻakai, mohenga, vala fakafoʻituitui, ko ha mīsini faiva mo ha mīsini ʻuhila, ko ha fuʻu lauʻi lā mo e ngaahi meʻa kehe naʻe fiemaʻú. Ko e kotoa ʻo e meʻá ni naʻe fakaheka ia ki ha loli naʻe mālohi feʻunga ke ne ʻave kimaua ʻi he konga fonua toka koví.

Naʻá ku ngāue mo e kau ʻovasia sēketi ʻAfiliká lolotonga ʻa e tokoni fiefia ʻa Joyce ki honau ngaahi uaifí mo e fānaú ʻa ia naʻá nau ʻalu fakataha mo kimautolú. Ko e lue lalo he pota vao ʻAfiliká naʻe lava ke fakaongosia, tautautefito ʻi he lolotonga vela ʻo e ʻahó, ka naʻe vave ʻeku ʻiloʻi ko e faʻahinga ʻea ko ení, naʻe faingofua ange ai ʻa ʻeku fekuki mo hoku  ngaahi fakangatangata fakaesinó pea naʻá ku houngaʻia ʻi he meʻá ni.

Naʻe masiva ʻa e kakaí ʻi he tuʻunga fakalūkufuá. Naʻe tākiekina lahi ʻa e tokolahi ʻe he tukufakaholó mo e tui taʻeʻuhingá pea mo hono fai ʻo e mali tokolahí; ka naʻa nau kei fakahāhā pē ha ʻapasia loloto ki he Tohi Tapú. ʻI he ngaahi ʻēlia ʻe niʻihi, naʻe fakahoko ai ʻa e ngaahi fakataha ʻa e fakatahaʻangá ʻi he ngaahi lalo ʻakau lalahi mo malumalu, pea lolotonga ʻa e ngaahi efiafí, naʻe ulo mai e maama mei he ngaahi maama lolo tautaú. Naʻa mau hokosia maʻu pē ha ongoʻi ʻo e māluʻia ʻi heʻemau ako fakahangatonu ko ia ʻa e Folofola ʻa e ʻOtuá ʻi lalo ʻi he ngaahi langi fetuʻuá, ʻa ia ko ha konga fakaofo ia ʻo ʻene fakatupú.

ʻI hono huluʻi ko ia ʻa e ngaahi filimi ʻa e Sōsaieti Taua Leʻó ʻi he ngaahi nofoʻanga kuo vaheʻi fakapuleʻanga ʻi ʻAfiliká ko ha toe hokosia fakangalongataʻa ia ʻe taha. ʻOku fakafuofua nai ki he Kau Fakamoʻoni ʻe toko 30 ʻi ha fakatahaʻanga, ka ʻi he ngaahi taimi peheé, naʻa mau ʻiloʻi ʻe lava ke mau faʻa ʻamanekina ha kau maʻu fakataha ʻe toko 1,000 pe kakai tokolahi ange ai!

ʻI he ngaahi feituʻu fakatalopikí, ko e moʻoni, ʻe lava ke hoko ko ha palopalema ai ʻa e mahamahakí, ka ʻoku fiemaʻu ke tauhi maʻu ha fakakaukau pau ʻi he taimi kotoa pē. Naʻá ku ako mo Joyce ke ma hokohoko atu ʻi ha tuʻunga lavameʻa—naʻá ku fāinga ʻi he taimi ki he taimi mo e puke ʻi he malēliá, pea naʻe fekuki ʻa Joyce mo e mahamahaki ʻa ia naʻe fakatupunga ʻe he fanga kiʻi meʻa moʻui valevale tahá (amoeba).

Ki mui aí, naʻe vaheʻi kimaua ki he ʻōfisi vaʻá ʻi Salisbury (ko Halale ia he taimi ní), ʻa ia ko ha monū ia ke ngāue fakataha ai mo e kau sevāniti faitōnunga kehe ʻa Sihová, pea naʻe ʻi honau haʻohaʻongá ʻa Lester Davey mo George pea mo Ruby Bradley. Naʻe fakanofo au ʻe he puleʻangá ke u hoko ko ha ʻōfisa fai mali, ʻa ia naʻá ku malava ai ʻo fai ʻa e ngaahi mali ʻa e fanga tokoua ʻAfiliká, ʻo fakaivimālohiʻi ai ʻa e haʻi ʻo e nofo mali faka-Kalisitiané ʻi loto ʻi he ngaahi fakatahaʻangá. ʻI ha ngaahi taʻu siʻi ki mui ai, naʻá ku toe maʻu ai ha monū. Naʻe pau ke u ʻaʻahi ai ki he kotoa ʻo e ngaahi fakatahaʻanga ʻikai lea faka-ʻAfilika ʻi he fonuá. Laka hake ʻi ha hongofuluʻi taʻu, naʻá ku fiefia ai mo Joyce ʻi he hoko ʻo ʻiloʻi ʻa e fanga tokouá ʻi heʻema ngāue fefonongaʻakí, pea naʻá ma fiefia ʻi heʻenau fakalakalaka fakalaumālié. Lolotonga ʻa e taimi ko iá naʻá ma toe ʻaʻahi ai ki homa fanga tokoua ʻi Potisuana mo Mosemipīkí.

Toe Hoko Atu ki he Feituʻu ʻe Taha

Hili ha ngaahi taʻu lahi ʻo e fiefia ʻi he fakatonga ʻo ʻAfiliká, naʻe toe vaheʻi kimaua ʻi he 1975 ki Siela Leone, ʻi ʻAfilika Hihifo. Naʻe vave ʻema nofo ki he ʻōfisi vaʻá ke maʻu ʻa homa malaʻe ngāue foʻoú, ka naʻe ʻikai ke fuoloa eni. Naʻá ku hoko ʻo puke mo vaivaia koeʻuhi ko hano maʻu lahi au ʻe he malēliá, pea naʻe faifai atu pē ʻo pau ai ke faitoʻo au ʻi Lonitoni, ʻa ia naʻe faleʻi mai ai ke ʻoua te u toe foki ki ʻAfilika. Naʻá ma loto-mamahi ʻi he meʻá ni, ka naʻe talitali loto-māfana au mo Joyce ki he fāmili Pēteli ʻi Lonitoní. Ko e tokolahi fau ʻo e fanga tokoua ʻAfilika ʻi he ngaahi fakatahaʻanga lahi ʻi Lonitoní naʻe ʻai ai foki kimaua ke ma ongoʻi lata. ʻI he fakalakalaka ʻa hoku tuʻunga moʻui leleí, naʻá ma feʻunuʻaki ki ha toe founga-tuʻumaʻu ʻe taha, pea naʻe kole mai ai ke u tokangaʻi ʻa e Potungāue Faifakataú. ʻI he ngaahi tupulaki kotoa kuó ma mātā ʻi he faai mai ʻa e ngaahi taʻu hokohokó, naʻe hoko eni ko ha ngāue mahuʻinga.

ʻI he konga ki muʻa ʻo e 1990 tupú, naʻe hoko ai siʻoku ʻofaʻanga ko Joyce ʻo puke ʻi he mahaki naʻá ne maumauʻi hono sisitemi neavé, peá ne mate ai ʻi he 1994. Naʻá ne fakamoʻoniʻi ʻene hoko ko ha uaifi ʻofa, mateaki mo faitōnunga, ʻo loto-lelei maʻu pē ke fengaʻunuʻaki ki he ngaahi tuʻunga kehekehe naʻá ma fehangahangai mo iá. Ke fehangahangai mo ha mole hangē ko ení, naʻá ku ʻiloʻi ai ʻoku mahuʻinga ke tauhi maʻu ha fakakaukau māʻalaʻala fakalaumālie pea hanganaki sio ki he kahaʻú. ʻI he tauhi maʻu ʻi he faʻa lotu ki ha taimi-tēpile fakateokalati leleí, kau ai ʻa e malangá, naʻe toe tokoni ia kiate au ke hanganaki fakafemoʻuekinaʻi kakato ʻa hoku ʻatamaí.—Palovepi 3:​5, 6.

Ko e ngāue ʻi he Pētelí ko ha monū ia mo ha founga lelei ʻo e moʻuí. ʻOku tokolahi ʻaupito ʻa e kakai kei talavou ke ngāue fakataha mo ia pea ke kaungāʻinasi ʻi he ngaahi fiefia lahi. Ko ha tāpuaki ʻe taha ko e tokolahi ʻo e kau ʻaʻahi ʻoku mau maʻu heni ʻi Lonitoní. ʻI he taimi ʻe niʻihi ʻoku ou sio ai ki ha siʻi ngaahi kaungāmeʻa mei hoku ngaahi vāhenga-ngāue ʻi ʻAfiliká, pea ʻoku toe fakafoki mai ai kiate au ʻa e ngaahi manatu fakafiefiá. ʻOku tokoni kotoa ʻa e ngaahi meʻá ni ke u hokohoko atu ai ke fiefia ki he kakato tahá ʻi he “moʻui ko eni” pea ke fakakaukau fakataha mo e falala pea mo e ʻamanaki ki he moʻui “ka hoko mai.”—1 Timote 4:8.

[Fakamatala ʻi lalo]

[Fakatātā ʻi he peesi 25]

Mo ʻeku faʻeé ʻi he 1946

[Fakatātā ʻi he peesi 26]

Mo Joyce ʻi homa ʻaho malí ʻi he 1950

[Fakatātā ʻi he peesi 26]

ʻI ha fakataha-lahi ʻi Bristol ʻi he 1953

[Fakatātā ʻi he peesi 27]

Ngāue ʻi ha kulupu mavahe (ʻi ʻolungá) mo ha fakatahaʻanga (toʻohema) ʻi Lotēsia Tonga, ko Simipāpuē ia he taimi ní