Ngaahi Fehuʻi mei he Kau Lautohí

ʻI he fanongo naʻe ʻi he matapaá ʻa Pita ʻa ia naʻe tuku pilīsoné, ko e hā naʻe pehē ai ʻe he kau ākongá: “Ko hono angelo ia”?—Ngāue 12:15.

Naʻe fakamahalo hala nai ʻa e kau ākongá ko ha talafekau fakaeʻāngelo ʻokú ne fakafofongaʻi ʻa Pita ʻa ia naʻe tuʻu ʻi he matapaá. Vakai angé ki he potutohi ʻo e kupu ko ení.

Naʻe puke ʻa Pita ʻe Hēlota, ʻa ia naʻá ne fakapoongi ʻa Sēmisí. Ko ia, naʻe ʻi ai ʻa e ʻuhinga lelei ke tui ai ʻa e kau ākongá ʻe fetaulaki ʻa Pita mo ha ikuʻanga tatau. ʻI hono haʻi sēiniʻí, ko Pita ʻi hono tuku pilīsoné naʻe leʻohi ia ʻe ha sifi ʻe fā ʻo e kau sōtia ʻe toko fā ʻi he sifi taki taha. ʻI he pō leva ʻe taha naʻe fakatauʻatāinaʻi fakaemana ai ia ʻo taki atu ki tuʻa mei he pilīsoné ʻe ha ʻāngelo. ʻI he iku ʻo ʻiloʻi ʻe Pita ʻa e meʻa naʻe hokó, naʻá ne pehē: “Ta ʻoku toki eʻa ni kiate au, kuo fekau moʻoni ʻe he ʻEiki ʻene angelo, pea kuo ne hamusi au mei he nima ʻo Helota.”—Ngāue 12:​1-11.

Naʻe ʻalu leva ʻa Pita ki he fale ʻo Mele ko e faʻē ʻa Sione Maʻaké, ʻa ia naʻe fakatahataha ai ʻa e tokolahi ʻo e kau ākongá. ʻI heʻene tukituki he matapā ʻo e ʻaá, naʻe haʻu ki ai ha kaunanga naʻe hingoa ko Lota ke tali. ʻI heʻene ʻiloʻi ʻa e leʻo ʻo Pitá, naʻá ne lele ke tala ki he niʻihi kehé ʻo ʻikai ke ne toʻo ʻa e matapaá! ʻUluakí, naʻe ʻikai lava ke tui ʻa e kau ākongá naʻe ʻi he matapaá ʻa Pita. ʻI hono kehé, naʻa nau fakamahalo hala: “Ko hono angelo ia.”—Ngāue 12:​12-15.

Naʻe tui ʻa e kau ākongá ne ʻosi fakapoongi ʻa Pita pea ko hono laumālié ʻo ʻikai ko hono sinó naʻe ʻi he matapaá? ʻE ʻikai ʻaupito lava ke pehē ko e tuʻungá eni, he naʻe ʻiloʻi ʻe he kau muimui ʻo Sīsuú ʻa e moʻoni Fakatohitapu fekauʻaki mo e kau maté—ʻoku “ʻikai te nau ʻilo ha momoʻi meʻa.” (Koheleti 9:​5, 10) Ko e hā leva naʻe lava ke ʻuhinga ki ai ʻa e kau ākongá ʻi heʻenau pehē: “Ko hono angelo ia”?

Naʻe ʻiloʻi ʻe he kau ākonga ʻa Sīsuú ʻi he kotoa ʻo e hisitōliá, naʻe fai ʻe he kau ʻāngeló ʻa e tokoni fakafoʻituitui ki he kakai ʻa e ʻOtuá. Ko e fakatātaá, naʻe lea ʻa Sēkope fekauʻaki mo e “Angelo kuo ne huhuʻi au mei he kovi kotoa pe.” (Senesi 48:16) Pea ʻi he fekauʻaki mo ha kiʻi tama ʻi honau haʻohaʻongá, naʻe tala ange ʻe Sīsū ki hono kau muimuí: “Vakai ke oua naa mou manukiʻi ha toko taha iate kinautolu ni oku jii; he oku ou tala atu kiate kimoutolu, Oku mamata mau ai be i he lagi ha nau agelo ki he fofoga o eku Tamai aia oku i he lagi.”—Mātiu 18:​10, PM.

ʻOku fakatupu tokangá, he ʻoku liliu ʻe he Young’s Literal Translation of the Holy Bible ʻa e foʻi lea agʹge·los (“ʻāngelo”) ko e “talafekau.” ʻOku hā naʻe ʻi ai ha tui ʻi he lotolotonga ʻo e kau Siú ko e sevāniti taki taha ʻa e ʻOtuá naʻe ʻi ai haʻane ʻāngelo tonu—ko hono moʻoní, ko ha “ʻāngelo leʻo.” Ko e moʻoni, ʻoku ʻikai ke akoʻi fakahangatonu ʻa e fakakaukau ko ení ʻi he Folofola ʻa e ʻOtuá. Neongo ia, ʻoku malava ke pehē ʻi he taimi naʻe lea ai ʻa e kau ākongá, “Ko hono angelo ia,” naʻa nau mahalo ko ha talafekau fakaeʻāngelo ʻokú ne fakafofongaʻi ʻa Pita ʻa ia naʻe tuʻu ʻi he matapaá.