Taimi ʻOku Malanga Hake Ai ha Taʻefelotoi ʻi he Nofo Malí

ʻOKU ʻikai ha husepāniti pe ha uaifi ʻatamai lelei ʻoku fiefia he kē ʻi he nofo malí, ka ko e meʻa ia ʻoku hoko lahí. Ko e meʻa ʻoku faʻa hokó, ʻoku leaʻaki ʻe he hoa ʻe tahá ia ha meʻa ʻoku fakatupu ʻita ki he hoa ko ē. ʻOku fakalalahi ʻa e leʻó pea mapuna hake ʻa e lili, ʻo langaʻi ai ʻa e tauʻaki tukuakiʻi ʻi he loto-ʻita fakataha mo e ngaahi lea kona. ʻOku hoko mai leva ʻa e tauʻaki momoko ʻo fakalolongo, ʻo fakafisi taʻefieʻulutukua ke toe feleaʻaki. ʻOku faai atu pē ʻo holo e ʻitá pea fai e tauʻaki kole fakamolemole. Kuo toe hoko e melino​—he taimí ni, kae ʻoua kuo toki hoko ʻa e taʻefelotoi hono hokó.

Ko e ngaahi taʻefelotoi ʻi he nofo malí ʻa e tuʻunga-lea ʻo e ngaahi fakaoli lahi mo e ngaahi kaveinga talanoa ʻo e ngaahi polokalama televīsoné, ka ko e meʻa ʻoku hoko moʻoní ʻoku ʻikai ke kei fakaoli ia. Ko e moʻoni, ʻoku pehē ʻe ha palōveepi Fakatohitapu: “Ko e ngaahi lea taʻefakakaukauʻi ʻoku fakalavea loloto hangē ko ha heletā.” (Palovepi 12:​18, Today’s English Version) ʻIo, ko e lea fefeká ʻe iku nai ki ha ngaahi lavea fakaeongo nofo fuoloa hili e ʻosi ha fekīhiaki. Ko e fakafekikí ʻe aʻu nai ʻo taki atu ki he fakamālohi.​—Ekisoto 21:18.

Ko e moʻoni, koeʻuhi ko e taʻehaohaoa fakaetangatá, ʻoku taʻealakalofi ai ʻa e ngaahi palopalema ʻi he nofo malí ʻi he taimi ʻe niʻihi. (Senesi 3:16; 1 Kolinito 7:28) Kae kehe, ko e ngaahi fekīhiaki hokohoko mo fefeká ʻoku totonu ke ʻoua ʻe tukunoaʻi ia ko e meʻa anga-maheni pē. Kuo fakatokangaʻi ʻe he kau mataotaó ko ha sīpingaʻaki ʻo e faʻa keé ʻokú ne fakalahi ʻe ia ʻa e hangehangē ko e ongo meʻa ko iá te na iku vete. Ko ia ai, ʻoku mātuʻaki mahuʻinga ke ke ako mo ho malí ke fakaleleiʻi ʻa e ngaahi taʻefelotoí ʻi ha founga melino.

Vakaiʻi ʻa e Tuʻunga ʻOku Hokó

Kapau ko hoʻo nofo malí kuo pūkea ia he fakafekikí, feinga ke fakapapauʻi pe ʻoku ʻi ai ha faʻahinga sīpinga ki hoʻo ngaahi fekīhiakí. ʻI he anga-mahení, ko e hā ʻoku hoko ʻi he taimi ʻokú ke taʻefelotoi ai mo ho hoá ʻi ha meʻa? ʻOku hehema vave ʻa e talanoá ʻo ʻalu kehe ia pea tō atu ki he tau lau mo e tauʻaki tukuakiʻi? Kapau ko ia, ko e hā ʻoku lava ke ke faí?

ʻUluakí, sio totonu hifo kia koe ki he anga nai hoʻo toe fakalahi fakafoʻituitui mai ki he palopalemá. ʻOkú ke ʻitangofua? ʻOkú ke anga fakafekiki? Ko e hā ʻa e lau ho malí fekauʻaki mo koe felāveʻi mo e meʻá ni? Ko e fehuʻi fakamuimui ko ení ʻoku mahuʻinga ke fakakaukau ki ai, he ko koe mo ho hoá ʻokú mo ngali maʻu ha vakai kehekehe fekauʻaki mo e meʻa ko ia ʻoku fakakau ʻi he hoko ʻo anga-fakafekikí.

Ko e fakatātaá, tau pehē ko ho malí ʻoku hehema ia ke kiʻi fufū ʻene ongoʻí, lolotonga ko koe ia ʻokú ke fakaeʻa ki tuʻa mo fuʻu mālohi hoʻo ongoʻí. Te ke pehē nai: “ʻI heʻeku tupu haké, ko e founga fetuʻutaki pē ia ʻa e tokotaha kotoa ʻi hoku fāmilí. ʻOku ʻikai ko e fakafekiki ia!” Pea mahalo ʻoku ʻikai pehē ia kia koe. Ngalingali leva, ko e meʻa ʻokú ke sio ki ai ko e talanoa hangatonu tauʻatāiná ʻoku pehē ʻe ho hoá ʻou ko e fakafekiki fakalotomamahi mo fakatupu kē. Ko hono ʻiloʻi pē ko koe mo ho hoá ʻokú mo maʻu ha founga kehekehe ʻo e fetuʻutakí ʻe lava ke tokoni ia ke taʻofi ʻa e ngaahi taʻefemahinoʻakí.

Manatuʻi foki, ko e fakafekikí ʻoku ʻikai kau maʻu pē ai ha kaikaila. Naʻe tohi ʻe Paula ki he kau Kalisitiané: “Ko e . . . feʻiohoʻaki mo e lauʻikovi, tuku ke hiki ia meiate kimoutolu.” (Efeso 4:31) Ko e “feʻiohoʻaki” ko e lave ia ki he hiki hake ʻo e leʻó, ka koe “lauʻikovi” ko e lave ia ki he ʻuhinga ʻo e lea ʻoku faí. Ko e vakai ki ai ʻi he ʻuhinga ko iá, naʻa mo e ngaahi lea ʻoku fanafaná ʻe lava ke fakatupu  fakafekiki ia kapau ʻoku fakatupu ʻita pe fakamāʻulaloʻi.

ʻI he fakakaukau ki he ngaahi meʻa ko eni ʻi muʻá, toe vakai ange ki he anga haʻo fakaleleiʻi ʻa e ngaahi taʻefelotoi mo ho hoá. ʻOkú ke anga-fakafekiki? Hangē ko ia kuo tau ʻosi sio ki aí, ko e tali moʻoni ki he fehuʻi ko iá ʻoku fakatuʻunga lahi ia ʻi he anga ʻo e fakakaukau ho malí. ʻI he ʻikai tukunoaʻi ʻa e fakakaukau ho hoá ʻokú ne fuʻu ʻitangofuá, feinga ke sio kiate koe ʻi he anga ʻo e sio mai ʻaʻaná, pea fai ha ngaahi fengaʻunuʻaki ʻo ka fiemaʻu. Naʻe tohi ʻe Paula: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha.”—1 Kolinito 10:24.

“Tokanga ki he Anga ʻo Hoʻomou Fanongo”

Ko e toe tafaʻaki ʻe taha ʻo hono fakaleleiʻi ʻa e ngaahi taʻefelotoí ʻoku maʻu ia ʻi he ngaahi lea ʻa Sīsū: “Tokanga ki he anga ʻo hoʻomou fanongo.” (Luke 8:18) Ko e moʻoni, naʻe ʻikai ko e lea eni ia ʻa Sīsū fekauʻaki mo e fetuʻutaki ʻi he nofo malí. Ka neongo ia, ʻoku kaungatonu ʻa e tefitoʻi moʻoni ko iá. ʻOku lelei fēfē hoʻo fanongo ki ho malí? ʻOkú ke fanongo pe ʻikai? Pe ʻokú ke taʻofi atu leva ʻe koe ia ʻaki ha ngaahi fakaleleiʻanga faingofua ki he ngaahi palopalema kuo teʻeki te ke mahinoʻi kakato? “Ko ia ʻoku fai ʻene tali ʻi he teʻeki ke ne fanongo, ʻoku hoko ko e fakaʻilonga o ʻene vale mo e meʻa fakama,” ko e lau ia ʻa e Tohi Tapú. (Palovepi 18:13) ʻI he malanga hake leva ha taʻefelotoi, ko koe mo ho malí ʻoku fiemaʻu ke mo fetalanoaʻaki ki he meʻa ko iá pea tauʻaki fefanongoʻaki moʻoni.

ʻI he ʻikai fakasiʻia ʻa e anga ʻo e vakai ho malí, feinga ke fakahā ʻa e “tauʻaki kaungāmamahi.” (1 Pita 3:8) ʻI he muʻaki lea faka-Kalisí, ko e fakalea ko ení ʻoku ʻuhinga tefito ia ki he kaungā faingataʻaʻia mo ha tokotaha kehe. Kapau ʻoku mamahi ho hoá ʻi ha meʻa, ʻoku totonu ke ke kaungāongoʻi ai. Feinga ke ke sio ki he meʻá mei he anga ʻo ʻene vakai ki aí.

ʻOku hā mahino, ko e tangata fakaʻotua ko ʻAisaké naʻá ne fai ʻa e meʻa ko iá. ʻOku tala mai ʻe he Tohi Tapú kia kitautolu ko hono uaifí, ʻa Lepeka, naʻe mātuʻaki hohaʻa fekauʻaki mo e ʻīsiu fakafāmili felāveʻi mo hono foha ko Sēkopé. “Kuo kina ʻeku moʻui ko e meʻa ʻi he ongo fafine Heti,” ko ʻene lea ia kia ʻAisaké. “Kapau ʻe mali a Sekope foki mo ha fefine Heti, ha taha ʻo e fonua ni, ʻo hange ko e ongo fafine ko eni, pea koeʻumaʻa aipe ʻeku moʻui?”​—Senesi 27:46.

Ko e moʻoni, koeʻuhi ko ʻene loto-hohaʻá, ngalingali naʻe fuʻu fakamamafaʻi tōtuʻa ʻe Lepeka ʻa e meʻá. Ko hono moʻoní, naʻá ne fehiʻa moʻoni ki heʻene moʻuí? Te ne saiʻia moʻoni ange ke mate kapau naʻe mali hono fohá mo e taha ʻo e ngaahi ʻofefine Hetí? Ngalingali pē ʻikai. Neongo ia, naʻe ʻikai ke fakasiʻia ai ʻe ʻAisake ia ʻa e ngaahi ongoʻi ʻa Lepeká. Ko hono kehé, naʻe sio ʻa ʻAisake ia ki he hohaʻa ʻa Lepeká ko e lelei, pea naʻá ne fai leva ha meʻa fekauʻaki mo ia. (Senesi 28:1) Fai ʻa e meʻa tatau ʻi he taimi hono hoko mai ʻe hohaʻa ai ho hoá fekauʻaki mo ha meʻa. ʻI he ʻikai tukunoaʻi ia ko ha meʻa siʻisiʻí, fanongo ki ho hoá, tokaʻi ʻene fakakaukaú pea tali ʻi ha founga anga-ʻofa.

Fanongo mo e Vavanga

ʻOku pehē ʻe ha palōveepi Fakatohitapu: “Ko e fakapotopoto [pe vavanga] ʻa ha tangata ʻa ia ʻoku ne fakatotoka ai ki he ʻita.” (Palovepi 19:11) ʻI ha lotolotonga ʻo ha taʻefelotoi, ʻoku faingofua ʻaupito ke feangainga loto-ʻoho ki he foʻi lea māsila kotoa pē ʻoku leaʻaki ʻe ho malí. Ka ko e meʻa ʻoku faʻa hokó, ʻoku hoko pē eni ia ke ne ʻai ke toe fakalalahi ange ʻa e fakafekikí. Ko ia ai, ʻi hoʻo fanongo ki ho malí, ʻai ko hoʻo fakapapaú ia ke fanongo ʻo ʻikai ngata pē ʻi he ngaahi foʻi lea ʻoku leaʻakí kae pehē foki ki he ngaahi ongoʻi ʻoku mei  mui ʻi he ngaahi foʻi lea ko iá. Ko e vavanga peheé ʻe tokoni ia kia koe ke ke sio fakalaka atu ʻi hoʻo matalili ʻaʻaú pea aʻu ki he tefito ʻo e palopalemá.

Hangē ko ení, tau pehē ʻoku lea atu ho uaifí kia koe, “ʻOku halaʻatā haʻo fakamoleki ha taimi mo au!” Te ke hehema nai ke ʻita pea fakaʻikaiʻi ʻa e tukuakiʻi ʻoku faí ʻaki ha ngaahi moʻoni taʻekaungāongoʻi. “Naʻá ku fakamoleki ʻa e ʻaho kakato mo koe ʻi he māhina kuo ʻosí!” ko hoʻo talí nai ia. Ka ʻo kapau naʻá ke fanongo tokanga, te ke ʻilo nai ko ho uaifí ʻoku ʻikai ko haʻane kole moʻoni ʻe ia ha toe miniti pe houa lahi ange. Ka ko ʻene kole pē nai ʻe ia ha ngaahi fakafiemālie, ke tala atu kia koe ʻokú ne ongoʻi liʻekina mo ʻikai ʻofaʻi.

Tau pehē ko e uaifí koe pea ʻoku fakahā atu ʻe ho husepānití ʻoku hohaʻa fekauʻaki mo ha meʻa naʻe toki fakatau mai. “Ne anga-fēfē hoʻo fakamoleki ʻa e fuʻu paʻanga lahi pehē fau?” ko ʻene ʻeke atu ia ʻi he taʻetui moʻoni. Ko hoʻo ongoʻí leva ke taukapoʻi koe ʻaki ha ngaahi moʻoni fekauʻaki mo e tuʻunga fakapaʻanga ʻo e fāmilí pe ko hono fakahoa hoʻo fakataú mo ha meʻa naʻá ne fakatau. Kae kehe, ko e vavangá te ne tokoniʻi koe ke ke sio ko ho husepānití ʻoku ʻikai nai ko haʻane lea ʻana fekauʻaki mo e paʻangá mo e sēnití. Ka ko ʻene hohaʻa pē nai ʻana koeʻuhi ko e ʻikai ke fakakau ia ʻi he fai ʻo e filí ʻi he taimi ʻoku fai ai ha fuʻu fakatau lahi.

Ko e moʻoni, ko e ongo meʻa mali taki taha ʻoku ʻi ai ʻena founga kehekehe ke fakaleleiʻiʻaki ʻa e lahi ʻo e taimi te na fakamoleki fakatahá mo e anga ʻo e ngaahi fili ki he meʻa ʻoku fakatau maí. Ko e poini ke ʻiloʻí ko e taimi ko ē ʻoku hoko ai ʻa e ngaahi meʻá ko e ngaahi taumuʻa ia ʻo e fakakikihí, ko e vavangá te ne fakatotoka hoʻo ʻitá pea fakamafeia koe ke mahinoʻi ʻa e ngaahi ʻīsiu moʻoni ʻoku hokó. ʻI he ʻikai ke fakafeangai ʻi he loto-ʻohó, muimui ʻi he akonaki ʻa e tokotaha tohi Tohi Tapu ko Sēmisí ke “vave ʻa e tangata fuape he fanongo, kae fakatotoka ki he ʻita.”​—Semisi 1:19.

ʻI he taimi ʻokú ke lea aí, manatuʻi ko e founga hoʻo lea ki ho hoá ʻoku mahuʻinga. ʻOku pehē ʻe he Tohi Tapú “ko e ʻelelo ʻo e poto ko e meʻa faitoʻo.” (Palovepi 12:18) ʻI he taimi ʻokú ke lolotonga ʻi ha taʻefelotoi ai mo ho hoá, ʻoku hoko hoʻo ngaahi leá ko e fakalotomamahi pe ko e faitoʻo? ʻOku nau langa hake ha ʻā vahevahe pe ʻoku nau tofa ha hala ki ha fakalelei? Hangē ko ia kuo tau ʻosi sio ki aí, ko e ʻita pe feangainga loto-ʻohó ʻokú ne langaʻi hake pē ʻa e fakakikihi.​—Palovepi 29:22.

Kapau kuo faai atu ʻa e taʻefelotoí ʻo aʻu ki he tau lau, feinga lahi ange ke pipiki ki he poiní. Tokangataha ki he meʻa ne tupunga aí, kae ʻikai ko e  tokotaha ko iá. Tokanga lahi ange ko e hā ʻoku tonú kae ʻikai ko hai ʻoku tonú. Tokanga ki hoʻo ngaahi leá ke ʻoua te ne toe tafunaki ʻe ia ʻa e fakafekikí. ʻOku pehē ʻe he Tohi Tapú: “Ko e lea masila ʻoku ne langaʻi ʻa e ʻita.” (Palovepi 15:1) ʻIo, ko e meʻa ʻokú ke leaʻakí mo e founga hoʻo leaʻaki iá te ne fakahoko nai ha faikehekehe ʻi haʻo ueʻi ai ho hoá ke loto-tatau mai pe ʻikai.

Taumuʻa ke Fakaleleiʻi, ʻIkai ko e Ikunaʻi

ʻI haʻatau feangainga mo ha ngaahi taʻefelotoi, ko e taumuʻá ki ha fakaleleiʻanga kae ʻikai ko ha ikuna. ʻE lava fēfē ke ke aʻusia ha fakaleleiʻanga? Ko e founga pau tahá ko e fekumi mo ngāueʻaki ʻa e akonaki ʻa e Tohi Tapú, pea ko e ngaahi husepānití ʻoku tautefito ʻa e totonu ke nau takimuʻa ʻi he fai peheé. ʻI he ʻikai ko e fakavave ke fakahāhā ha ngaahi fakakaukau fefeka ʻi he ngaahi ʻīsiu pe palopalema ʻoku hokó, ko e hā ʻoku ʻikai ke sio ai ki he ngaahi meʻá ʻi he anga ʻo e vakai ki ai ʻa Sihová? Lotu kiate ia, pea kumi ki he melino ʻa e ʻOtuá ʻa ia te ne maluʻi homou lotó mo hoʻomou mafai fakaefakakaukaú. (Efeso 6:18; Filipai 4:​6, 7) Fai ha feinga fakamātoato ke sio ʻo ʻikai ki he ngaahi meʻa pē ʻaʻaú kae pehē foki ki ho hoá.​—Filipai 2:4.

Ko e meʻa ʻokú ne faʻa ʻai ha tuʻunga kovi ke toe kovi angé ko hono fakaʻatā ʻa e ngaahi ongoʻi loto-mamahí mo e ngaahi ongoʻi taʻemapuleʻí ke ne puleʻi hoʻo fakakaukaú mo hoʻo angafaí. ʻI he tafaʻaki ʻe tahá, ko e loto-lelei ko ia ke fakatonutonu ʻe he akonaki ʻa e Folofola ʻa e ʻOtuá ʻoku taki atu ia ki he melino, felotoi mo e tāpuaki ʻa Sihová. (2 Kolinito 13:11) Ko ia ai, tuku ke taki koe ʻe he “poto ʻoku mei ʻolunga,” ʻo fakahāhā ʻa e ngaahi anga fakaʻotuá pea utu hono ngaahi ʻaongá ʻi he hoko ko e ‘faʻahinga ʻoku fakatupu melino.’​—Semisi 3:​17, 18.

Ko hono moʻoní, ʻoku totonu ki he tokotaha kotoa ke ako ke fakaleleiʻi ʻa e ngaahi taʻefelotoí ʻi he melino, pea aʻu kapau ʻoku ʻuhinga ení ko hono feilaulauʻi ʻete ngaahi saiʻia fakafoʻituituí. (1 Kolinito 6:7) ʻIo, ngāueʻaki ʻa e akonaki ko ia ʻa Paulá ke tuku ʻa e “ʻita, ʻa e lili, ʻa e lotokovi; taʻofi homou ngutu mei he lauʻikovi mo e kape. . . . mou huʻihuʻi ʻa e motuʻa tangata, mo ʻene ngaahi falengā ngaue . . . mo[u] ʻai ʻa e tangata foʻou.”​—Kolose 3:​8-10.

Ka ʻi he taimi foki ʻe niʻihi, te ke leaʻaki ai ha ngaahi meʻa te ke fakameʻapangoʻia ai ʻamui. (Semisi 3:8) Ka hoko eni, kole fakamolemole ki ho malí. Hokohoko atu ke fai ha feinga. ʻE faai atu pē, ko koe mo ho malí te mo sio nai ai ki ha fakalakalaka lahi ʻi he anga hoʻomo fakaleleiʻi ʻa e ngaahi taʻefelotoí.

[Puha/Fakatātā ʻi he peesi 22]

Sitepu ʻe Tolu ki Hono Fakaleleiʻi ha Fakafekiki

• Fanongo ki ho malí.—Palovepi 10:19

• Tokaʻi ʻene fakakaukaú.—Filipai 2:4

• Tali ʻi ha founga anga-ʻofa.—1 Kolinito 13:​4-7

[Puha/Fakatātā ʻi he peesi 23]

Meʻa ʻe Lava Ke Ke Fai he Taimi Ní

ʻEke ki ho malí ʻa e ngaahi fehuʻi ʻi laló, pea fanongo ki he talí ʻo ʻoua ʻe taʻofi atu. ʻE toe fai pehē atu foki mo ho malí kia koe.

• ʻOku ou hehema ke anga-fakafekiki?

• ʻOku ou fanongo moʻoni ʻi he taimi ʻokú ke fakahaaʻi mai ai hoʻo ongoʻí, pe ʻoku ou tali loto-ʻoho atu ki muʻa ke ʻosi hoʻo leá?

• ʻOku taʻeongoʻi pe ongo ʻita atu ʻeku ngaahi leá kia koe?

• Ko e hā te ta fakatou fai ke fakaleleiʻi ai ʻa e founga ʻo ʻeta fetuʻutakí​—tautefito ʻi he taimi ʻoku ʻikai ke ta felotoi ai ki ha meʻa?

[Fakatātā ʻi he peesi 21]

ʻOkú ke fanongo?

[Fakatātā ʻi he peesi 22]

“ʻOku ou ongoʻi liʻekina mo ʻikai ʻofaʻi”

[Fakatātā ʻi he peesi 22]

“ʻOku halaʻatā haʻo fakamoleki ha taimi mo au!”

[Fakatātā ʻi he peesi 22]

“Naʻá ku fakamoleki ʻa e ʻaho kakato mo koe ʻi he māhina kuo ʻosí!”