ʻE Lava Ke Tau Fekuki mo ha ʻAhiʻahi Pē!

ʻOKÚ KE lolotonga fehangahangai nai mo ha ʻahiʻahi ʻi hoʻo moʻuí? ʻOkú ke ongoʻi kuo tuēnoa hoʻo ʻamanakí ʻo ʻikai lava ke ke fekuki mo ia? ʻOkú ke ilifia nai ʻi ha ngaahi taimi ʻo pehē ko hoʻo palopalemá ʻoku makehe pea ʻoku ʻikai ha fakaleleiʻanga ia ki ai? Kapau ʻokú ke pehē, loto-toʻa! Neongo pe ko e hā ʻa e ngaahi ʻahiʻahi te tau fetaulaki nai mo iá, ʻoku fakapapauʻi mai ʻe he Tohi Tapú kiate kitautolu ʻe ʻai kitautolu ʻe he ʻOtuá ke tau malava ʻo fekuki mo kinautolu.

ʻOku fakahaaʻi ʻe he Tohi Tapú ko e kau sevāniti ʻa e ʻOtuá te nau “to ki he ngaahi ʻahiʻahi kehekehe.” (Semisi 1:2) Fakatokangaʻi angé ʻa e foʻi lea ko e “kehekehe” (faka-Kalisi poi·kiʹlos). Fakatatau ki hono ngāueʻaki motuʻá, ko e muʻaki foʻi leá ʻoku ʻuhinga ia ki he “lōlahi” pe ko e “fakalanulanu-lahi” pea ʻokú ne fakamamafaʻi ʻa e “ngaahi ʻahiʻahi lahi kehekehe.” Ko hono moʻoní, ʻi he lea fakaʻahó, ʻoku ʻuhinga tefito ia ki he “mohu lanu.” Ko ia ai, ko e “ngaahi ʻahiʻahi kehekehe” ko e ngaahi ʻahiʻahi ia, hangē ko e laú, ʻoku haʻu ʻi he ngaahi lanu lahi. Ka neongo ia, ʻoku tokoniʻi kitautolu ʻe Sihova koeʻuhi ke tau lava ʻo fekuki mo kinautolu taki taha. Ko e hā ʻoku lava ke tau fakapapauʻi ai iá?

“ʻOfa Maʻataʻatā ʻa e ʻOtuá Kuo Fakahaaʻi ʻi he Ngaahi Founga Kehekehe”

ʻOku fakahaaʻi ʻe he ʻapositolo ko Pitá ko e kau Kalisitiané ʻoku nau “moʻua ʻi he ngaahi ʻahiʻahi kehekehe.” (1 Pita 1:6) ʻI mui ange ʻi heʻene tohi fakamānavaʻí, ʻokú ne pehē ai ko e “ʻofa maʻataʻatā ʻa e ʻOtuá” ʻoku “fakahaaʻi ʻi he ngaahi founga kehekehe.” (1 Pita 4:​10, NW) Ko e kupuʻi lea “ʻi he ngaahi founga kehekehe” ʻokú ne maʻu ʻa e tuʻunga ʻo e muʻaki foʻi lea faka-Kalisi tatau. ʻI he fakamatala ki he kupuʻi leá ni, naʻe pehē ʻe ha mataotao Tohi Tapu ʻe taha: “Ko ha fakakaukau fakaofo eni. . . . Ko e leaʻaki ʻa e kelesi [pe, ʻofa maʻataʻatā] ʻa e ʻOtuá ʻaki ʻa e poikilos ʻoku ʻuhinga iá ʻoku ʻikai ha lanu ia ʻi he tuʻunga fakaetangatá ʻe taʻeikunaʻi ʻe he kelesi ʻa e ʻOtuá.” ʻOkú ne toe fakamatala lahi ange: “ʻOku ʻikai ha ngaahi tuʻunga ʻe ala fakakaukau ki ai, ngaahi faingataʻa ʻoku malava ke hoko, tuʻunga fakavavevave pe fiemaʻu fakavavevave ʻe taʻemalava ʻe he kelesi ʻa e ʻOtuá ke fakaleleiʻi, pe ko ha meʻa ʻe taʻemalava ʻe he kelesi ʻa e ʻOtuá ke feangainga mo ia ʻi he tuʻunga ikuna pea ke ikuʻi ia. ʻOku ʻikai ha meʻa ia ʻi he moʻuí ʻe taʻemalava ke fekuki mo ia ʻa e kelesi ʻa e ʻOtuá. ʻOku taki hangatonu ʻe he foʻi lea mohu ʻuhinga ko ʻeni ko e poikilos ʻa ʻetau ngaahi fakakaukaú ki he kelesi mohu-lanu ʻa e ʻOtuá ʻa ia ʻoku feʻungamālie moʻoni ke fakaleleiʻiʻaki ʻa e ngaahi meʻa kotoa pē.”

Ngaahi ʻAhiʻahí Ikunaʻi ʻe he ʻOfa Maʻataʻataá

Fakatatau kia Pita, ko e founga ʻe taha ʻoku fakahaaʻi ai ʻa e ʻofa maʻataʻatā ʻa e ʻOtuá ʻoku fakafou ia ʻi he faʻahinga kehekehe ʻoku faʻuʻaki ʻa e fakatahaʻanga Kalisitiané. (1 Pita 4:​11) ʻOku maʻu ʻe he sevāniti taki taha ʻa e ʻOtuá ha ngaahi meʻaʻofa fakalaumālie, pe ngaahi malava, ʻe lava nai ʻo hoko ko ha matavai ia ʻo e fakalototoʻa ki he faʻahinga ko ia ʻoku nau fehangahangai mo e ngaahi ʻahiʻahí. (Loma 12:​6-8) Hangē ko ʻení, ko e ngaahi mēmipa ʻe niʻihi ʻi he fakatahaʻangá ko e kau faiako tuʻu-ki-muʻa ia ʻo e Tohi Tapú. Ko ʻenau ngaahi lea pōtoʻí ʻokú ne fakaivia mo ueʻi ʻa e niʻihi kehé ke nau kītaki. (Nehemaia 8:​1-4, 8, 12) Ko e niʻihi kehé ʻoku nau fai tuʻumaʻu ha ʻaʻahi fakatauhi-sipi ki he ngaahi ʻapi ʻo e faʻahinga ʻoku nau fiemaʻu ʻa e tokoní. Ko e ngaahi ʻaʻahi peheé ko ha ngaahi taimi ia ki he fakalototoʻá ke ‘fiemālie ʻa e ngaahi lotó.’ (Kolose 2:2) ʻI he taimi ʻoku fai ai ʻe he kau ʻovasiá ʻa e ngaahi ʻaʻahi fakatuimālohi peheé, ʻoku nau foaki  atu ai ha meʻaʻofa fakalaumālie. (Sione 21:16) ʻI he taimi tatau ʻoku toe ʻiloa pē mo e niʻihi kehe ʻi he fakatahaʻangá ʻi heʻenau māfana, manavaʻofa, mo e fakaalaala ʻi he feangainga mo e kaungātui ko ia ʻoku fakalotomamahiʻi ʻe he ngaahi ʻahiʻahí. (Ngāue 4:​36; Loma 12:10; Kolose 3:​10) Ko e kaungāongoʻi mo e tokoni longomoʻui ʻoku fakahāhaaʻi ʻe he fanga tokoua mo e fanga tuofāfine ʻofa peheé ko ha fakahaaʻi mahuʻinga ia, pe “lanu,” ʻo e ʻofa maʻataʻatā ʻa e ʻOtuá.​—Palovepi 12:25; 17:17.

Ko e “Otua oe Fiemalie Kotoabe”

Fungani he meʻa kotoa pē, ʻoku ʻomai ʻe Sihova ʻa e fiemālie. Ko iá ko e “Otua oe fiemalie kotoabe; aia ʻoku ne fakafiemalieʻi akimautolu i he e mau mamahi kotoabe.” (2 Kolinito 1:​3, 4, PM) Ko e poto ʻoku maʻu ʻi he Folofola fakamānavaʻi ʻa e ʻOtuá pea mo e mālohi ʻoku tokonaki mai ʻe hono laumālie māʻoniʻoní ko e ongo founga tefito ia ʻoku tali ai ʻe Sihova ʻetau ngaahi lotu ki ha tokoní. (Aisea 30:​18, 21; Luke 11:13; Sione 14:16) ʻE lava ke fakalotolahiʻi kitautolu ʻe he talaʻofa fakamānavaʻi naʻe tohi ʻe he ʻapositolo ko Paulá. Naʻá ne pehē: “Ko e ʻOtua ko e toko taha ʻoku fai ki heʻene lea, pea ʻe ʻikai te ne fakangofua ke ʻahiʻahiʻi kimoutolu ʻo makehe atu ʻi hoʻomou mafai; kae kehe, te ne ngaohi fakataha mo e ʻahiʻahi hono haoʻanga foki mei ai, koeʻuhi ke lava hono katakiʻi.”​—1 Kolinito 10:13.

ʻIo, tatau ai pē pe ko e hā ʻa e “lanu,” pe natula, ʻo hotau ʻahiʻahí, ʻe ʻi ai maʻu ai pē ʻa e “lanu,” pe fakahāhā, ʻo e ʻofa maʻataʻatā ʻa e ʻOtuá ke tokoniʻi kitautolu ke tau ikunaʻi ia. (Semisi 1:​17) Ko e tokoni taimi totonu mo feʻungamālie ʻa Sihova ki heʻene kau sevānití​—ʻo tatau ai pē pe ko e hā nai ʻa e kehekehe ʻo honau ngaahi ʻahiʻahí pe palopalemá—ko e taha pē ia ʻo e fakamoʻoni ʻo e “poto faifio [pe kehekehe] ʻa e ʻOtua.” (Efeso 3:​10) ʻOkú ke loto-tatau ki ai?

[Fakatātā ʻi he peesi 31]

ʻOku tokoniʻi kitautolu ʻe Sihova ke tau fekuki mo hotau ngaahi ʻahiʻahí