Fakahīkihikiʻi ʻa Sihova ʻi he ʻApiakó

TAKATAKAI ʻi he māmaní, ʻoku kumi ʻe he Kau Fakamoʻoni ʻa Sihova kei īkí ha ngaahi founga ke fakahīkihikiʻi ai ʻa e ʻOtuá ʻi he ʻapiakó​—ʻo fakafou fakatouʻosi ia ʻi heʻenau leá pea mo honau ʻulungāangá. Fakatokangaʻi angé ʻa e ngaahi hokosia ʻe niʻihi ʻoku fakahaaʻi ai ʻenau faivelenga ʻi honau tuʻunga talavoú.

Naʻe vaheʻi ki ha kiʻi tuofefine Fakamoʻoni ʻi Kalisi ke ne faʻu ha fakamatala ki hono ʻuliʻi ko ia ʻo e ʻatimosifia ʻo e foʻi māmaní. ʻI he ʻosi ʻene sio ki he Watch Tower Publications Index, naʻá ne maʻu ai ha fakamatala ʻaonga ʻi he makasini ʻĀ Hake!, ʻo fakahaaʻi ko ʻene maʻuʻanga fakamatalá ia ʻi he fakaʻosiʻosi ʻo ʻene ʻēseí. Naʻe tala ange kiate ia ʻe heʻene faiakó ko e taha ia ʻo e ngaahi ʻēsei lelei taha kuó ne laú. Naʻe ngāueʻaki ki mui ʻe he faiakó ʻa e fakamatalá ʻi ha seminā, pea hoko ai ha ngaahi ola lelei. Naʻe fili leva ai ʻa e kiʻi tuofefiné ke ʻoange ki he faiakó ha toe ngaahi ʻīsiu lahi ange ʻo e ʻĀ Hake! ʻo kau ai ʻa e ʻīsiu ʻe taha ʻoku fakaeʻa ai ʻa e konga hokohoko, “Kau Faiakó​—Te Tau Fēfē ka ʻIkai Kinautolu?” Naʻe fakahīkihikiʻi ki mui ʻe he faiakó ʻa e makasini ʻĀ Hake! ʻi he kalasí, pea naʻe kamata ke kole ʻe he kau ako kehé ki ha ngaahi tatau. Naʻe fiemaʻu ki he tuofefiné ke ne ʻomi ha ngaahi tatau ʻo e makasiní ki he akó koeʻuhi ke nau malava ai ʻo lau ʻa e ngaahi ʻīsiu kehé.

ʻI Penini ʻAfilika, naʻe fehangahangai ai ha Kalisitiane taʻu hongofulu tupu mo ha faʻahinga tenge anga-kehe. Fakatatau ki he anga fakafonuá, naʻe fakatahataha ʻa e ngaahi mātuʻa ʻa e kau ako ʻi heʻene ʻapiakó ke haea ha kau tiuta ki he ngaahi lēsoni faingataʻá koeʻuhí ke teuʻi ʻa e fānaú ki he siví. Kae kehe, naʻe fili ʻe he kau tiutá ʻa e ngaahi pongipongi Tokonakí ki he ngaahi kalasí. Naʻe fakahaaʻi ʻe he kiʻi finemui Fakamoʻoní ʻa ʻene taʻeloto ki aí: “Ko e pongipongi Tokonakí ko e taimi ia ʻoku malanga fakataha ai ʻa e kotoa ʻo e fakatahaʻangá. Ko e taimi fakafiefia taha ia ʻo e uiké kiate aú, pea ʻe ʻikai te u fakafetongiʻaki ia ʻe au ha toe meʻa!” Ko ʻene tamaí, ko ha mātuʻa taʻehoa pea ko ia tonu ko ha Fakamoʻoni, naʻá ne loto-tatau mo ia pea naʻá ne feinga ke fakalotoʻi ʻa e kulupu ʻe taha ʻo e ngaahi mātuʻá mo e kau tiutá ke fetongi ʻa e taimi-tēpilé. Kae kehe, naʻa nau taʻeloto kātoa ki ai. Naʻe fakapapauʻi ʻe he kiʻi taʻahiné ke ʻoua te ne maʻu ʻa e ako Tokonakí. ʻI hono kehé naʻá ne kau fakataha mo ʻene fakatahaʻangá ʻi he malangá. Naʻe manumanukiʻi ia ʻe hono kaungā kalasí, mo fakaʻaiʻai ia ke tuku ʻa ʻene faifakamoʻoní pea ke liʻaki mo hono ʻOtuá foki. Naʻa nau fakapapauʻi moʻoni kuo pau ke ne tō ʻi he siví. Ka, ko e meʻa naʻe hokó, ko e kulupu ʻo e kau ako naʻe akoʻi ko iá naʻa nau tō ʻi he siví, neongo ia naʻe lava ʻa hotau kiʻi tuofefiné. Ko e moʻoni, naʻe ngata ʻa e manukí. ʻI he taimí ni ʻoku tala ange kiate ia ʻe he kau akó, “ʻOku totonu ke hokohoko atu ʻa hoʻo tauhi ho ʻOtuá.”

ʻI he Lepupilika Sekí, naʻe fiemaʻu ai ki ha kiʻi taʻahine taʻu 12 ke ne teuteuʻi ha fakamatala ʻo ha tohi. Naʻe fakaʻaiʻai ia ʻe heʻene faʻeé ke ne ngāueʻaki ʻa e tohi Ko e Moʻungaʻi Tangata Lahi Taha Kuo Moʻui Maí. Naʻá ne kamataʻaki ʻene fakamatalá ʻa e ongo fehuʻi: “Ko e hā hoʻo fakakaukaú? Ko hai ʻoku malava nai ke hoko ko e moʻungaʻi tangata lahi taha ia kuo moʻui maí?” Naʻá ne fakamatalaʻi ʻa e moʻui ʻa Sīsuú, ko ʻene moʻui ʻi he māmaní, mo ʻene ngaahi akonakí. Naʻá ne lāulea leva ki he vahe kuo fakakaveinga “Ko ha Lēsoni ʻi he Fakamolemolé.” Naʻe lea leʻo-lahi ange ʻa ʻene faiakó, “Ko e fakamatala lelei taha ena kuo faifai ange peá u fanongoa meiate koé!” pea naʻá ne tali loto-hounga ha tatau ʻo e tohí. Naʻe toe fiemaʻu foki ʻe he kaungāako ʻe niʻihi ha tatau. ʻI he ʻaho hono hokó, naʻe fiefia ʻaupito ʻa e kiʻi taʻahiné ke tufaki ha ngaahi tatau ʻe 18.

Ko e faʻahinga kei iiki peheé ʻoku nau maʻu ʻa e fiefia lahi ʻi hono fakahīkihikiʻi ʻa Sihova ʻi he ʻapiakó. ʻOku totonu kiate kitautolu hono kotoa ke tau faʻifaʻitaki ki heʻenau faivelenga ʻi honau tuʻunga talavoú.