Ko Hono Fakamafola ʻi he Fonua ʻa Ia Naʻe Lakalakaimonū Ai ki Muʻa ʻa e Muʻaki Lotu Faka-Kalisitiané

KO ʻĪtali, ʻa e muitolotolo fōtunga hangē ha putí ʻa ia ʻoku aʻu atu ki he Tahi Metiteleniané, kuo hoko ia ko ha feituʻu ʻa ia kuo tākiekina ai ʻe he ngaahi meʻa fakalotú mo fakafonuá ʻa e hisitōlia ʻo e māmaní. Ko ha foʻi makinito ia ki he laui miliona ʻo e kau folau ʻeveʻevá ʻa ia ʻoku tohoakiʻi kinautolu ʻe he fakaʻofoʻofa ʻa hono funga fonua faʻunga kehekehé, ko ʻene ngaahi ngāue fakaeʻaati ʻiloá mo ʻene founga kuki ifó. Ko ha toe fonua foki eni ʻa ia ʻoku lakalakaimonū ai ʻa e ako ʻo e Tohi Tapú.

Naʻe ʻuluaki aʻu nai ʻa e lotu faka-Kalisitiane moʻoní ki Loma​—ko e kolomuʻa ia ʻo e hau ʻi he māmaní ʻi he taimi ko iá—ʻi he taimi naʻe foki ai mei Selusalema ki ʻapi ʻa e kau Siú mo e kau ului-Siu ʻa ia naʻa nau hoko ko e kau Kalisitiane ʻi he Penitekosi 33 T.S. ʻI he 59 T.S. nai, naʻe ʻaʻahi ai ʻi he ʻuluaki taimí ʻa e ʻapositolo ko Paulá ki ʻĪtali. ʻI he matātahi Piuteolaí naʻá ne “ʻilo ai ha niʻihi ʻi he kainga” he tuí.​—Ngāue 2:​5-​11; 28:​11-​16.

Hangē ko ia naʻe tomuʻa tala ʻe Sīsū mo e kau ʻapositoló, ki muʻa ʻi he ngataʻanga ʻo e ʻuluaki senituli T.S., naʻe mavahe māmālie ai ʻa e ngaahi kulupu tafoki mei he moʻoní mei he lotu faka-Kalisitiane moʻoní. Kae kehe, ki muʻa ʻi he ngataʻanga ʻo e fokotuʻutuʻu fulikivanu ko eni ʻo e ngaahi meʻá, naʻe takimuʻa ai ʻa e kau ākonga moʻoni ʻa Sīsuú ʻi hono malangaʻi ʻi māmani lahi ʻa e ongoongo leleí​—ʻo kau ai ʻa ʻĪtali.—Mātiu 13:​36-​43; Ngāue 20:​29, 30; 2 Tesalonaika 2:​3-8; 2 Pita 2:​1-3.

Ko ha Kamataʻanga Fakalotosiʻi

ʻI he 1891, naʻe ʻaʻahi ai ʻi he ʻuluaki taimí ʻa Charles Taze Russell, ʻa ia naʻe takimuʻa ʻi he ngāue fakamalanga ʻi māmani lahi ʻa e Kau Ako Tohi Tapú (hangē ko ia naʻe uiʻaki he taimi ko iá ʻa e Kau Fakamoʻoni ʻa Sihová), ki he ngaahi kolo ʻĪtali ʻe niʻihi. Naʻe pau ke ne fakahaaʻi ko e ola ʻo ʻene ngāue fakafaifekau ʻi aí naʻe ʻikai ʻaupito ke fakalototoʻa: “Naʻe ʻikai te mau sio ʻi ha meʻa ʻe taha ke fakalototoʻaʻi ai kimautolu ke ʻamanaki atu ki ha utu-taʻu ʻe taha ʻi ʻĪtali.” ʻI he faʻahitaʻu failau ʻo e 1910, naʻe toe foki ai ʻa Tokoua Russell ki ʻĪtali ʻo fakahoko ai ha malanga Fakatohitapu ʻi ha fale sipoti ʻi he senitā ʻo Lomá. Ko e hā ʻa e olá? “ʻI he fakalūkufuá,” naʻá ne fakamatala, “ko e fakatahá naʻe mātuʻaki fakalotosiʻi moʻoni.”

Ko hono moʻoní, naʻe māmālie ʻi he ngaahi hongofuluʻi taʻu ʻa e fakalakalaka ʻa hono malangaʻi ʻo e ongoongo leleí ʻi ʻĪtalí, koeʻuhi naʻe fakatangaʻi ai ʻi ha tuʻunga ʻa e Kau Fakamoʻoni ʻa Sihová ʻe he pule fakatikitato Fakafāsisí. Lolotonga ʻa e vahaʻa taimi ko iá, naʻe ʻikai toe laka hake he Kau Fakamoʻoni ʻa Sihova ʻe toko 150 ʻi he fonuá, ʻa ia ko e tokolahi taha aí naʻa nau ako ʻa e ngaahi moʻoni Fakatohitapú mei he ngaahi kāinga pe ngaahi kaumeʻa naʻa nau nofo ʻi mulí.

Fakalakalaka Anga-Kehe

Hili ʻa e Tau II ʻa Māmaní, naʻe fekauʻi atu ai ha kau misinale ki ʻĪtali. Kae hangē ko ia ʻoku maʻu ʻi he ngaahi tohi ʻoku maʻu he ngaahi tauhiʻanga tohi Fakapuleʻangá, naʻe kole ai ʻe he faʻahinga tuʻunga māʻolunga ʻi he haʻa faifekau ʻi he Vatikanó ki he puleʻangá ke kapusi ʻa e kau misinalé. ʻI he ʻikai ha toe fehuʻiá, naʻe fakamālohiʻi ai ʻa e kau misinalé ke nau mavahe mei he fonuá.

Neongo ʻa e ngaahi fakafaingataʻaʻiaʻangá, naʻe kamata ke ʻaukolo mai ʻa e fuʻu tokolahi ʻi ʻĪtali  ki he “moʻunga” ʻo e lotu ʻa Sihová. (Aisea 2:​2-4) Ko e tupulaki ʻi he Kau Fakamoʻoní ʻoku taau ke fakatokangaʻi. ʻI he 2004 naʻe ʻi ai ha tumutumu ʻo e kau malanga ʻo e ongoongo leleí ʻe toko 233,527, ko e toko 1 ki he kakai ʻe toko 248 kotoa pē, pea ko e toko 433,242 naʻa nau maʻu ʻa e Fakamanatu ʻo e pekia ʻa Kalaisí. Naʻe ʻi ai ʻa e fakatahaʻanga ʻe 3,049 ʻo e Kau Fakamoʻoni ʻa Sihová naʻa nau fakataha ʻi he ngaahi Fale Fakatahaʻanga fakafiemālie. ʻI he taimi ki mui ní, kuo fiefia ai ʻa e ngaahi kulupu pau tefito ʻo e kakaí ʻi he tupu lahi ʻaupito.

Malanga ʻi he Ngaahi Lea Lahi

Ko e kau fononga tokolahi mei ʻAfilika, ʻĒsia mo ʻIulope Hahaké naʻa nau hiki ki ʻĪtalí ke maʻu ai ha ngāue pe ko ha moʻui lelei ange, pe ʻi he ngaahi tuʻunga ʻe niʻihi, ke hola ai mei he ngaahi tuʻunga fakamamahí. ʻE lava fēfē ke tokoniʻi fakalaumālie ʻa e laui miliona ko ení?

Kuo tali ʻe he Kau Fakamoʻoni tokolahi ʻi ʻĪtali ʻa e pole ʻo hono ako ʻa e ngaahi lea faingataʻa, hangē ko e faka-Pengalí, Punisapi, Siaina, Sinihala, Takaloko, ʻAlepea, ʻAlipēnia mo e faka-ʻAmihalikí. Kamata ʻi he 2001, naʻe fai ai ʻa e ngaahi koosi ako lea ke akoʻi ʻa e faʻahinga loto-lelei ko ení ke nau fai ha fakamoʻoni ʻi he ngaahi lea mulí. Lolotonga ʻa e taʻu ʻe tolu kuo maliu atú, naʻe kau ai ʻa e Kau Fakamoʻoni ʻe toko 3,711 ki he ngaahi koosi ʻe 79 naʻe fai ʻi he lea kehekehe ʻe 17. Kuo ʻai ʻe he meʻá ni ke malava ai ʻo faʻu mo ʻai ke mālohi ʻa e fakatahaʻanga ʻe 146 mo e ngaahi kulupu ʻe 274 ʻi he lea kehekehe ʻe 25. Kuo fanongo ai ʻa e faʻahinga loto-moʻoni tokolahi ki he ongoongo leleí pea kuo nau kamata ke ako ʻa e Tohi Tapú. ʻOku faʻa hoko ʻa e ngaahi olá ia ʻo anga-kehe.

Naʻe talanoa ha faifekau ʻa e Kau Fakamoʻoni ʻa Sihová fekauʻaki mo e Tohi Tapú kia George, ko ha tangata lea faka-Maleialama mei ʻInitia. Neongo ʻene maʻu ha ngaahi palopalema lahi ʻi he ngāué, naʻe tali fiefia ʻe George ha ako Tohi Tapu. ʻI ha ngaahi ʻaho siʻi mei ai, naʻe ʻalu ai ʻa e kaumeʻa ʻo George ko Gil, ko ha tangata ʻInitia lea faka-Punisapi, ki he Fale Fakatahaʻangá, pea naʻe kamata ai ha ako Tohi Tapu mo ia. Naʻe fakafeʻiloaki ʻe Gil ʻa David, ko ha ʻInitia lea faka-Teluku, ki he Kau Fakamoʻoní. Naʻe vave pē ke ako ʻe David ʻa e Tohi Tapú. Naʻe nofo ʻa e ongo ʻInitia kehe ko Sonny mo Shubash, ʻi he fale tatau naʻe nofo ai ʻa David. Ko kinaua fakatouʻosi naʻá na kau ki he ako Tohi Tapú.

ʻI ha ngaahi uike ki mui ai, naʻe maʻu ai ʻe he Kau Fakamoʻoní ha telefoni meia Dalip, ko ha tangata lea faka-Malati. Naʻá ne pehē: “Ko e kaumeʻa au ʻo George. ʻE lava ke mou akoʻi kiate au ʻa e Tohi Tapú?” Naʻe hoko mai leva ai ʻa Sumit, ko ha tangata lea faka-Tamili. Ki mui ai, naʻe telefoni mai ha toe taha ʻi he ngaahi kaumeʻa ʻo George, ʻo kole ki ha ako Tohi Tapu. Naʻe toe ʻomai ki mui ai ʻe George ha talavou ʻe taha, ko Max, ki he Fale Fakatahaʻangá. Naʻá ne kole mo ia foki ki ha ako. ʻI he ʻahó ni, ʻoku fai ʻa e ako Tohi Tapu ʻe ono, pea kuo fai ʻa e ngaahi fokotuʻutuʻu ki ha toe ako ʻe fā. ʻOku fai ia ʻi he lea faka-Pilitāniá, neongo ʻoku toe ngāueʻaki mo e ngaahi tohi ʻi he faka-Hinitií, Malati, Maleialama, Punisapi, Tamili, Teluku mo e faka-ʻUtú.

ʻOku “Fanongo” ʻa e Tulí ki he Ongoongo Leleí

ʻOku laka hake he kakai tuli ʻe toko 90,000 ʻi ʻĪtali. ʻI he vaeuaʻanga ʻo e 1970 tupú, naʻe kamata ai ke fai ʻe he Kau Fakamoʻoní ʻa e tokanga ki hono akoʻi kia kinautolu ʻa e moʻoni Fakatohitapú. ʻI he kamatá, naʻe akoʻi ai ʻe he Kau Fakamoʻoni tuli ʻe niʻihi ʻa e Lea Fakaʻilonga Faka-ʻĪtalí (Italian Sign Language, ISL) ki he kaungā faifekau ʻa ia naʻa nau loto-lelei ke tokoni ʻi he malaʻe ko iá. Naʻe kamata leva ai ke fakahāhā ʻe he kakai tuli tokolahi ange ʻa e mahuʻingaʻia ʻi he Tohi Tapú. ʻI he ʻahó ni, ko e faʻahinga laka hake he toko 1,400 ʻa ia ʻoku nau ngāueʻaki ʻa e ISL ʻoku nau maʻu ʻa e ngaahi fakataha faka-Kalisitiané. Ko e fakatahaʻanga ʻe 15 mo e ngaahi kulupu ʻe 52 ʻoku nau fai ʻa e ngaahi fakatahá ʻi he ISL.

ʻI he ʻuluaki taimí, naʻe fakatuʻunga tefito pē ʻa e malanga ki he kakai tulí ʻi he tamuʻomuʻa ʻa e Kau Fakamoʻoni tāutahá. Ka ʻi he 1978, naʻe kamata ai  ʻa e ʻōfisi vaʻa ʻĪtali ʻo e Kau Fakamoʻoni ʻa Sihová ke fokotuʻutuʻu ʻa e ngaahi fakataha-lahi maʻá e kau tulí. ʻI Mē ʻo e taʻu ko iá, naʻe fanongonongo ai ʻe fai ʻi he fakataha-lahi fakavahaʻapuleʻanga naʻe teu ke hoko ʻi Mīlaní ʻa e ngaahi konga maʻá e kau tulí. Ko e ʻuluaki ʻasemipilī fakasēketi maʻá e kau tulí naʻe fai ia ʻi he Holo ʻAsemipilī ʻi Mīlaní ʻi Fepueli 1979.

Talu mei ai kuo fai ʻe he ʻōfisi vaʻá ʻa e tokanga lahi ki hono fafangaʻi fakalaumālie ʻa e faʻahinga tulí ʻaki hono fakalototoʻaʻi ha kau ʻevangeliō tokolahi fakautuutu ke nau fakalakalaka ʻi heʻenau pōtoʻi ʻi he fetuʻutaki lea ko ení. Talu mei he 1995, mo hono ʻoatu ʻa e kau tāimuʻa makehé (kau ʻevangeliō taimi-kakató) ki ha ngaahi kulupu ʻe niʻihi ke nau akoʻi ʻa e Kau Fakamoʻoni tulí ʻi he ngāue fakafaifekaú pea ke fokotuʻutuʻu ʻa e ngaahi fakataha faka-Kalisitiané. Kuo teuʻi ʻa e ngaahi Holo ʻAsemipilī ʻe tolu ʻaki ʻa e ngaahi sisitemi vitiō fakalakalaka tahá ke fakaleleiʻi ʻa e mamata ʻi he polokalamá. Pea ʻoku ala maʻu ʻa e ngaahi kāsete vitiō ʻo e ʻū tohi faka-Kalisitiané ke tokonaki mai ai ʻa e meʻakai fakalaumālie ki he kakai tulí.

Kuo fakatokangaʻi ʻe he kau mamatá ʻoku tokangaʻi lelei ʻe he Kau Fakamoʻoní ʻa e ngaahi fiemaʻu fakalaumālie ʻa e kakai tulí. Ko e P@role & Segni, ko ha makasini naʻe pulusi ʻe he Sōsaieti ki he Kau Tuli ʻi ʻĪtalí, naʻe hiki-lea ai ha tohi naʻe fai ʻe ha pīsope Katolika māʻolunga: “Ko e tulí ʻoku faingataʻa ia ʻi he ʻuhinga ko e tokotaha tulí ʻokú ne fiemaʻu ʻa e tokangaʻi hokohoko. Ko e fakatātaá, ʻokú ne aʻu ʻiate ia pē ki he lotú ʻo ʻikai ha faingataʻa ʻe taha, ka ʻokú ne fiemaʻu ʻa e tokoni ʻa ha tokotaha fakatonulea ke ne muimui ai he meʻa kotoa pē ʻoku laú, fakahāʻí, pe hivaʻi lolotonga ʻa e ngaahi ouaú.” Naʻe tānaki mai ʻe he makasiní ʻo pehē ko e pīsope māʻolungá ʻokú ne “fakahaaʻi ko e meʻa pangó, ʻoku teʻeki ai mateuteu ʻa e siasí ke feangainga mo e faingataʻaʻia fakasino ko ení, pea ʻokú ne fakahaaʻi ʻoku tokangaʻi lelei ange ʻa e kakai tuli tokolahi ʻi he ngaahi Fale Fakatahaʻanga ʻo e Kau Fakamoʻoni ʻa Sihová ʻi he vāhenga fakasiasí.”

Malangaʻi ʻa e Ongoongo Leleí ki he Kau Pōpulá

ʻE lava ke tauʻatāina ha taha lolotonga iá ʻokú ne kei ʻi he pilīsoné? ʻIo, koeʻuhi ʻoku maʻu ʻe he  Folofola ʻa e ʻOtuá ʻa e mālohi ke ‘fakatauʻatāinaʻi’ ʻa e faʻahinga ʻoku nau tali ia pea ngāueʻaki ia ʻi heʻenau moʻuí. Ko e pōpoaki naʻe fanongonongo ʻe Sīsū “ki he popula” ko e tauʻatāina mei he angahalá mo e lotu loí. (Sione 8:​32; Luke 4:​16-​19) ʻI ʻĪtali kuo ʻosi maʻu ai ʻa e ngaahi ola lelei ʻaupito ʻi he malanga he ngaahi pilīsoné. Ko e meimei kau faifekau ʻe toko 400 ʻo e Kau Fakamoʻoni ʻa Sihová kuo fakamafaiʻi ʻe he Puleʻangá ke nau ʻaʻahi ki he kau pōpulá koeʻuhi ke ʻoatu ha tokoni fakalaumālie. Ko e Kau Fakamoʻoni ʻa Sihová ʻa e ʻuluaki kautaha ʻikai ko e Katolika naʻa nau kole pea maʻu ʻa e ngofua ko iá.

Ko e pōpoaki ʻo e Tohi Tapú ʻoku lava ke fakamafola ia ʻi he ngaahi founga ʻoku ʻikai ala tomuʻa fakahaaʻi. ʻOku talanoa ʻa e kau pōpulá ki honau kaungā pōpulá fekauʻaki mo e ngāue ako Tohi Tapu ʻa e Kau Fakamoʻoni ʻa Sihová. Ko e niʻihi ʻo e kau pōpula ko iá kuo iku ai ʻo nau kole ki ha ʻaʻahi ʻa ha faifekau Fakamoʻoni. Pe ko e ngaahi mēmipa ʻi he fāmilí ʻa ia kuo nau kamata ha ako Tohi Tapú ʻoku nau fakalototoʻaʻi ʻa e kau pōpulá ke nau kole ki ha ʻaʻahi ʻa e Kau Fakamoʻoní. Ko e kau pōpula ʻe niʻihi ʻoku nau ngāue ki he mate koeʻuhi ko e tāmate pe ngaahi faihia mamafa kehé kuo nau fakatomala pea liliu lahi fakaʻulia ʻenau moʻuí. ʻOku teuʻi ʻe he meʻá ni kinautolu ki he fakatapui kia Sihova ko e ʻOtuá pea ki he papitaisó.

ʻI ha ngaahi pilīsone lahi, kuo fai ai ʻa e ngaahi fokotuʻutuʻu ke fai ha ngaahi malanga maʻá e kakaí ʻi he ngaahi kaveinga Fakatohitapú, ke kātoangaʻi ʻa e Fakamanatu ʻo e pekia ʻa Sīsuú, pea ke huluʻi ʻa e vitiō ʻo e ngaahi polokalama Fakatohitapu ʻoku faʻu ʻe he Kau Fakamoʻoni ʻa Sihová. ʻOku faʻa maʻu ʻe he kau pōpula tokolahi ʻa e ngaahi fakataha ko ení.

Ke tokoniʻi ʻa e faʻahinga ʻi he pilīsoné ki he ngaahi founga ʻaongá, kuo tufaki lahi ai ʻe he Kau Fakamoʻoní ʻa e ngaahi makasini ʻoku fekauʻaki mo e ngaahi kaveinga ʻe ʻiloʻi ʻe he kau pōpulá ʻoku ʻaonga. Ko e taha ʻo e makasini ko iá ko e Awake! ʻo Mē 8, 2001, naʻe lāulea ai ki he kaveinga “ʻE Lava ke Liliu ʻa e Kau Pōpulá?” Ko e ʻĀ Hake! ʻo Siulai-Sepitema 2003 naʻe ʻi he tuʻunga-lea ko e “Ngāuekoviʻaki ʻa e Faitoʻo Kona Tapú ʻi he Fāmilí​—Ko e Hā ʻe Lava Ke Ke Faí?” Kuo tufaki ʻa e tatau ʻe laui afe ki he kau pōpulá. Ko hono olá, ʻoku fai ai ʻa e ngaahi ako Tohi Tapu kehekehe ʻe laui teau. Kuo toe fakahaaʻi ʻe he kau leʻo ʻe niʻihi ʻi he pilīsoné ʻa e mahuʻingaʻia ʻi he pōpoaki ʻa e Tohi Tapú.

Hili hono maʻu ha ngofua makehe mei he kau maʻu mafaí, naʻe papitaiso ai ha pōpula ko Costantino ʻi ha Fale Fakatahaʻanga ʻi San Remo, ʻo ʻi ai ʻa e Kau Fakamoʻoni fakalotofonua ʻe toko 138. “Naʻá ku ongoʻi naʻe taumalingi mai kiate au ʻa e ʻofá,” ko e lau ia ʻa Costantino ʻa ia ʻoku hā naʻe maongo kiate ia ʻa e meʻa naʻe hokó. Naʻe līpooti ʻe ha nusipepa fakalotofonua ʻa e ngaahi lea ʻa e sela ʻi he pilīsoné: “Ko ha meʻa fakafiefia lahi . . . ʻa hono ʻomai kia kimautolu ʻa e ngofua ko ení. Ko e meʻa kotoa pē ʻe lava ke ne pouaki ʻa e fakaakeake fakasōsiale, fakafoʻituitui mo e fakalaumālie ʻa ha pōpulá ʻoku totonu ke fakakaukauʻi ia.” Naʻe maongo ki he uaifi mo e ʻofefine ʻo Costantino ʻa e anga hono ueʻi ʻe he ʻiloʻi totonu ʻo e Tohi Tapú ʻa e moʻui ʻa Costantino: “ʻOkú ma laukauʻaki ia ʻi he ngaahi liliu kuó ne faí. Kuó ne hoko ʻo fakamelino, pea ʻoku hokohoko atu ʻa e tupulekina ʻa ʻene tokanga kia kimauá. Kuó ma fakafoʻou ʻa e falala mo e fakaʻapaʻapa kiate iá.” Ko kinaua foki kuó na kamata ako ʻa e Tohi Tapú pea maʻu ʻa e ngaahi fakataha faka-Kalisitiané.

Ko Sergio, ʻa ia naʻe halaia ʻi he kaihaʻa, kaihaʻa ʻaki ʻa e meʻatau, fetuku taʻefakalao holo ʻa e faitoʻo kona tapú, mo e tāmate, naʻe tautea tuku pōpula ia ke aʻu ki he 2024. Hili ʻene sivisiviʻi ʻa e Tohi Tapú feʻunga mo e taʻu ʻe tolu peá ne fai ha ngaahi liliu ʻi heʻene moʻuí, naʻe fili ai ʻa Sergio ke papitaiso. Ko e pōpula ia hono 15 ʻi he pilīsone Porto Azzurro, ʻi he motu ko Elba, ke hoko ʻo papitaiso ko e taha ʻo e Kau Fakamoʻoni ʻa Sihová. ʻI he ʻi ai ʻa e kaungā pōpula  tokolahi, naʻe fai ʻa hono papitaisó ʻi ha vai naʻe faʻu ʻo fokotuʻu ʻi he faiʻanga vaʻinga ʻo e pilīsoné.

Ko Leonardo, ʻa ia ʻokú ne ngāueʻi ha tautea taʻu 20 ʻi he pilīsoné, naʻá ne maʻu ha ngofua makehe ke papitaiso ʻi ha Fale Fakatahaʻanga ʻi Parma. ʻI hono fakaʻekeʻeke ʻe he nusipepa fakalotofonuá, naʻe fakamatala ʻa Leonardo naʻá ne loto ke “fakamahino kuó ne fili ke hoko ko e taha ʻo e Kau Fakamoʻoni ʻa Sihová, ʻo ʻikai koeʻuhi ke maʻu ai ha founga ke mavahe mei he tuʻunga fakapoʻuli ʻo e pilīsoné, ka ke fakalato ha fiemaʻu fakalaumālie ongoʻi loloto moʻoni.” Naʻe pehē ʻe Leonardo: “Ko ʻeku moʻuí kuo lahi ai e ngaahi fehālaakí, ka kuó u tuku ia ki mui. Kuó u liliu, neongo naʻe ʻikai ke fakafokifā. ʻE fiemaʻu ke u hokohoko atu ʻa e faitotonú.”

Ko Salvatore, ʻa ia naʻe halaia ʻi he tāmaté, ʻokú ne ʻi he pilīsone Spoleto maluʻi lahi tahá. Ko ʻene papitaisó, ʻa ia naʻe fai ʻi he loto pilīsoné, naʻe maongo ia ki he tokolahi. Naʻe pehē ʻe he sela pilīsone ʻi aí: “Ko e mahuʻinga fakasōsiale ʻo ha fili ʻa ia ʻoku taki atu ki he tōʻonga lelei ange ki he tokotaha kotoá ʻoku totonu ke fakalototoʻaʻi, fakatouʻosi maʻá e lelei ʻa e faʻahinga ʻi he pilīsoné pea ki he kotoa ʻo e sōsaietí.” Tupu mei he ngaahi liliu naʻe fai ʻe Salvatore, ʻoku maʻu ai he taimí ni ʻe hono uaifí mo hano ʻofefine ʻa e ngaahi fakataha ʻa e Kau Fakamoʻoni ʻa Sihová. Ko ha pōpula ʻa ia naʻe faifakamoʻoni ki ai ʻa Salvatore naʻe papitaiso ia ko ha sevāniti fakatapui ʻa Sihova.

Ko e niʻihi ʻo e fakalahi mo e tupu ʻa e muʻaki lotu faka-Kalisitiané naʻe hoko ia ʻi ʻĪtali. (Ngāue 2:​10; Loma 1:7) ʻI he taimi utu-taʻu ko ení, ʻoku hokohoko atu ai ʻa e tupu mo e fakalahi fakalaumālié ʻi he ngaahi feituʻu tatau ʻa ia naʻe ngāue mālohi ai ʻa Paula mo hono kaungā Kalisitiané ke malangaʻi ʻa e ongoongo leleí.​—Ngāue 23:11; 28:​14-​16.

[Mape ʻi he peesi 13]

(Ki he konga tohi kuo fokotuʻu kakato, sio ki he tohi)

ʻĪTALI

Loma

[Fakatātā ʻi he peesi 15]

Ko e Holo ʻAsemipilī Bitonto mo ha fakatahaʻanga Lea Fakaʻilonga Faka-ʻĪtali ʻi Loma

[Fakatātā ʻi he peesi 16]

ʻOku ‘fakatauʻatāinaʻi’ ʻa e kau pōpulá ʻe he moʻoni Fakatohitapú

[Fakatātā ʻi he peesi 17]

ʻOku hokohoko atu ʻa e tupu fakalaumālié ʻi he feituʻu naʻe lakalakaimonū ai ki muʻa ʻa e muʻaki lotu faka-Kalisitiané