Ko e Moʻoni Hā Fepakipaki ʻo e Ngāué

“Ngāue—ngāue! Ko ha fiefia taʻehanongataʻanga ē ke ʻiloʻi ʻoku tau kei maʻu pē ʻa e ngaahi meʻa lelei taha ke faí.”—Katherine Mansfield, faʻu-tohi (1888-1923).

ʻOKÚ KE tui tatau mo e foʻi fakakaukau fakaevīsone ko ia ki he ngāué ʻoku fakamatalaʻi ʻi he lea ʻi ʻolungá? Ko e hā hoʻo vakai fakafoʻituitui ki he ngāué? ʻOkú ke ongoʻi nai ko e ngāué ko ha vāʻihala fakapoʻuli lōloa ia ʻi he vahaʻa ʻo e ngaahi fakaʻosinga mālōlō ʻo e uiké? Pe kuo hoko ʻa hoʻo ngāué ko hao manako ʻo tuʻu teputepu ia ʻi he maʻunimaá?

Ki he tokolahi taha ʻo e kakaí, ko e konga lahi taha ʻo e ngaahi houa ʻoku nau ʻā aí ʻoku līʻoa ia ki he ngāué. ʻE puleʻi nai ʻe he ngāué ʻa e feituʻu te tau nofo aí mo e faʻahinga sīpinga moʻui te tau maʻú. Mei he kei talavoú ʻo aʻu ki he mālōlō mei he ngāué, ʻoku hoko ʻa e ngāué ki he tokolahi ko e meʻa ia ʻe taha ʻokú ne puleʻi lahi taha ʻa ʻenau moʻuí. Ko e niʻihi ʻo kitautolu ʻoku tau maʻu ʻa e fiemālie lahi fakafoʻituitui mei heʻetau ngāué. Ko e niʻihi ʻoku nau fua ʻa e mahuʻinga ʻo e ngāué mei he vāhengá pe ngeiá, lolotonga ia ʻoku vakai ʻa e niʻihi ki he ngāué ko ha meʻa tātāpuni taimi pē pea naʻa mo ha meʻa fakamole taimi.

ʻOku ʻi ai ʻa e faʻahinga ʻoku ngāue ke moʻui mo e faʻahinga ko e moʻuí pē ke ngāue; ʻoku mate ʻa e niʻihi ʻi he ngāué pe koeʻuhi ko ia. Hangē ko ení, fakatatau ki ha līpooti ki muí ni ʻa e Puleʻanga Fakatahatahá, ʻoku lahi ange ʻa e mamahi mo e mate ʻoku fakatupunga ʻe he ngāué “ʻi he taú, pe ʻi hono fakatahaʻi ʻa e ngāuekoviʻaki ʻo e faitoʻo kona tapú mo e ʻolokaholó.” ʻI ha fakamatala fekauʻaki mo e meʻá ni, naʻe pehē ai ʻe he nusipepa ko e Guardian ʻa Lonitoní: “Laka hake he kakai ʻe toko ua miliona ʻoku nau mate mei he ngaahi fakatuʻutāmaki pe mahaki felāveʻi mo e ngāué ʻi he taʻu kotoa pē . . . Ko e eʻa ki he efú, ngaahi kemikalé, longoaʻá mo e hueló [ʻokú ne] fakatupunga ʻa e kanisā, mahaki mafu mo e pā kālava.” Ko e ngāue ʻa e fānaú mo e ngāue pōpulá ko e toe ongo tuʻunga kovi kehe ia ʻoku hoko moʻoni ʻi he ngaahi tuʻunga fakaengāue lolotongá.

Tānaki atu ki ai, ʻoku ʻi ai ʻa e meʻa ʻoku ui ʻe he toketā fakaʻatamai ko Steven Berglas ko e “ongosia ʻosiʻosingamālie.” ʻOkú ne fakamatalaʻi ʻa e tokotaha ngāue tōtōivi kuó ne aʻu ki he tumutumu ʻo ʻene ngāué, ko ʻene ongoʻí pē ko e “tailiili lahi, faingataʻaʻia, loto-siʻi pe loto-taʻotaʻomia ʻo taku nai ki he tui ʻokú ne fihia ʻi ha ngāue, pe ʻi ha ʻalunga ngāue ʻa ia heʻikai lava ke ne hola pe maʻu mei ai ha fiemālie fakaʻatamai.”

Ngāue Mālohí mo e ʻĀvanga-Ngāué

ʻI ha māmani ʻa ia ʻoku kikivi ai ʻa e tokolahi ʻi ha ngaahi houa lahí, ʻoku ʻaonga ke fakafaikehekeheʻi ʻa e kau ngāue mālohí mo e kau ʻāvanga-ngāué. Ko e kau ʻāvanga-ngāue tokolahi ʻoku nau sio ki he feituʻu ngāué ko ha taulangaū ia ʻi ha māmani fakatuʻutāmaki taʻealavavaloʻi; ʻoku hoko ʻa e ngāué  ki he kau faʻa ngāué ko ha fatongia totonu mo fakafiemālie ʻi he taimi ʻe niʻihi. Ko e kau ʻāvanga-ngāué ʻoku nau fakaʻatā ʻa e ngāué ke ne kāpui ʻa e ngaahi tafaʻaki kehe kotoa pē ʻo e moʻuí; ko e kau ngāue mālohí ʻoku nau ʻiloʻi ʻa e taimi ke tāmateʻi ai ʻa e komipiutá, fetongi ai ʻa e tuʻunga ʻo ʻenau tokangá, pea hangē ko ení, ke ʻi ai ʻi hono fakafiefiaʻi ʻa e fakamanatu honau ʻaho malí. Ko e kau ʻāvanga-ngāué ʻoku nau maʻu ha ongoʻi fiemālie ʻi he ngāue tōtuʻá pea ʻoku fakaʻaiʻai ai kinautolu; ʻoku ʻikai ke pehē ʻa e kau ngāue mālohí ia.

ʻOku fakanenefuʻi ʻe he sōsaieti ʻi onopōní ʻa e fakangatangata ʻi he vahaʻa ʻo e ongo meʻa ko ení ʻi heʻene ʻai ke hā manakoa ʻa e ngāue tōtuʻá. Ko e mōtemí (modem), telefoni toʻotoʻó mo e pipá te ne fakanenefuʻi nai ʻa e fakangatangata ʻi he vahaʻa ʻo e ngāueʻangá mo ʻapí. ʻI he taimi ʻoku malava ai ke hoko ha feituʻu pē ko e feituʻu ngāué pea malava ke hoko ha taimi pē ko e taimi ngāué, ʻe ngāue ai ʻa e niʻihi ki he mate.

Ko e hā ʻa e anga ʻo e tali ʻa e kakai ʻe niʻihi ki he faʻahinga tōʻonga ʻikai lelei ko iá? Kuo vakai ʻa e kau faisaienisí ki ha hehema ʻa e kakai ʻoku tōtuʻa ʻenau ngāué mo tōtuʻa ʻenau loto-mafasiá ke ʻomai ʻa e meʻa fakalaumālié ki he feituʻu ngāué pea fakatahaʻi ʻa e moʻui fakalotú mo e moʻui fakangāué. Naʻe līpooti ʻe he San Francisco Examiner ko hono “fio ʻo e meʻa fakalaumālié mo e ngāué kuo hoko ia ko ha meʻa fakapuleʻanga.”

Naʻe pehē ʻe ha līpooti ki muí ni fekauʻaki mo Silicon Valley, ko ha senitā ʻo e fakalakalaka fakatekinolosiá ʻi he ʻIunaite Seteté: “ʻI hono lau ʻe he kau pulé ʻa e ngaahi vahaʻa tauʻanga ʻoku ava ʻi he ngāueʻangá ʻi he hokohoko atu hono fakamālōlooʻi ʻo e kau ngāué, ʻoku siʻi ai ʻa e ngaahi tauʻangá ia ʻi he ngaahi feituʻu faiʻanga ako Tohi Tapu efiafí.” Ko e hā pē ʻa e ʻuhinga ʻo e meʻa ko iá, kuo ʻiloʻi ʻe he tokolahi takatakai ʻi he kolopé ko e Tohi Tapú ʻoku ʻi ai ʻene tākiekina lelei ki he anga ʻo ʻenau vakai ki he ngāué, ʻo iku ai ki ha fakafeangai mafamafatatau ange ki he moʻuí.

ʻE lava fēfē ke tokoniʻi kitautolu ʻe he Tohi Tapú ke tau maʻu ha vakai mafamafatatau ki he ngāué? ʻOku ʻi ai ha ngaahi tefitoʻi moʻoni Fakatohitapu ʻe lava ke ne tokoniʻi kitautolu ke tau fehangahangai mo e ngaahi pole ʻo e ngāueʻanga ʻi onopōní ʻi ha tuʻunga lavameʻa? Ko e kupu hoko maí ʻe fai ai ha lāulea ki he ongo fehuʻí ni.