“Naʻe Fakatangaʻi Ia Koeʻuhí ko ʻEne Tuí”

KO E kolo ko Cernobbio ʻi ʻĪtali tokelaú naʻe fokotuʻu ai ha tuʻuʻanga fakamanatu ʻi ha paʻake fakalotofonua ke fakamanatua ʻa e faʻahinga maʻukovia ko ia naʻe fakaehaua ʻenau totonu fakaetangatá. Ko e taha ʻo e ngaahi maka naʻe tatala ʻi he fakamanatú naʻe fakatapui ia kia Narciso Riet. Naʻe fāʻeleʻi ia ʻi Siamane ʻe ha ongo mātuʻa ʻĪtali, pea naʻe hoko ʻa Riet ko e taha ʻo e Kau Fakamoʻoni ʻa Sihová ʻi he 1930 tupú. Lolotonga ʻa e pule ʻa Hitilaá, naʻe fakatangaʻi ʻa e Kau Fakamoʻoni ʻa Sihová koeʻuhí naʻa nau fakafisi ke ʻai ʻa Hitilā ke māʻolunga ia ʻi he ʻOtua moʻoní, ʻa Sihova.

ʻI hono ʻiloʻi ʻe he Kesitapó naʻe kau ʻa Riet ʻi hono ʻave ʻa e ngaahi tatau ʻo e Taua Leʻo ki he ngaahi kemi fakamamahí, naʻá ne hola leva ki Cernobbio. ʻI aí naʻe fai ʻa e kole kiate ia ke ne liliu ʻa e Taua Leʻo ki he lea faka-ʻĪtalí pea mo tufaki ia ki hono kaungātui naʻe nofo ofi aí. Ko ʻene ngāue faivelengá naʻe ʻikai ke taʻefakatokangaʻi ia. Naʻe ʻohofi fakafokifā ʻe ha ʻōfisa SS mo ʻene kau tangatá ʻa e ʻapi ʻo Riet, ʻo puke ia, pea maʻu ai ha fakamoʻoni “faihia”​—ko e ongo Tohi Tapu mo ha ʻū tohi! Naʻe tipooti ʻa Riet ki Siamane, ʻo tuku pōpula ʻi ha kemi fakamamahi ʻi Dachau, pea naʻe tāmateʻi ia taimi nounou pē ki muʻa ke ngata ʻa e Tau II ʻa Māmaní. “Naʻe fakatangaʻi ia koeʻuhí ko ʻene tuí,” ko e fakalea ia ʻe he maka fakamanatu Cernobbio.

Ko e tui ʻa Narciso Riet mo e lauingeau kehe ʻo e Kau Fakamoʻoni naʻe maʻukovia ʻe he fakatanga ʻa e kau Nasí ko ha fakalototoʻa ia ki he kau Kalisitiane he ʻaho ní ke nau kei faitōnunga ai pē kia Sihova, ko e Tokotaha pē ia ʻi he ʻunivēsí ʻoku tuha mo ʻenau lotú. (Fakahā 4:​11) Naʻe pehē ʻe Sīsū: “Oku monuia akinautolu kuo fakatagaʻi koeuhi koe maonioni.” ʻE manatuʻi ʻe he ʻOtuá ʻa ʻenau ngaahi ngāué pea fakapaleʻi kinautolu koeʻuhí ko honau ʻalunga loto-toʻá.​—Mātiu 5:​10, PM; Hepelu 6:​10.