Ngaahi Mātuʻa, Tokonaki Maʻá e Ngaahi Fiemaʻu Ho Fāmilí

“He kabau oku ikai ke tokonaki e ha toko taha ki hono kaiga, . . . kuo jiaki eia ae lotu.”—1 TIMOTE 5:8, PM.

1, 2. (a) Ko e hā ʻoku fakalototoʻa ai ke sio ki he ngaahi fāmilí ʻoku nau maʻu fakataha ʻa e ngaahi fakataha faka-Kalisitiané? (e) Ko e hā ʻa e ngaahi pole ʻoku fehangahangai mo e ngaahi fāmilí koeʻuhi kae aʻu ai ʻi he taimí ki he ngaahi fakatahá?

 ʻI hoʻo sio takai ʻi he fakatahaʻanga Kalisitiané ki muʻa ke kamata ha fakatahá, te ke sio nai ai ki he fānau maʻa mo teunga lelei ʻoku nau tangutu hifo ki honau ngaahi nofoʻangá fakataha mo ʻenau ngaahi mātuʻá. ʻIkai ko e meʻa lelei ia ke sio ki he ʻofa ʻoku hā mahino ʻi he ngaahi fāmili peheé​—ʻa e ʻofa kia Sihova mo e niʻihi kehé. Kae kehe, ʻoku faingofua ke ngalo ʻa e feinga lahi ko ia kuo fai ki ha fāmili ka nau aʻu mai he taimí ki he ngaahi fakatahá.

² ʻI he tuʻunga lahi tahá, ko e ngaahi mātuʻá ʻoku nau fuʻu femoʻuekina ʻaupito ʻi he ʻahó kotoa, pea ʻi he ngaahi efiafi fakatahá, ʻoku aʻu ai ʻa e moʻui fakafāmilí ʻo toe femoʻuekina ange. ʻOku ʻi ai e meʻakai ke teuteu, ngaahi ngāue ke fai, homueka ke fakakakato. Ko e ngaahi mātuʻá ʻoku nau fua ʻa e ngaahi kavenga mamafa tahá, ʻo hono fakapapauʻi ko e tokotaha kotoa ʻoku maʻa, fafangaʻi, pea mateuteu ki he taimí. Ko e moʻoni, ʻi he fānaú ʻe hoko fakatuʻupakē nai ha meʻa ʻo mātuʻaki taimi hala ʻaupito. Ko e tama lahí kuo mahae e talausesé ia he vaʻingá. Ko e tama siʻisiʻí kuo mahua ʻene meʻakaí ʻana. Ko e fānaú kuo kamata ke nau kē. (Palovepi 22:15) Ko e hā ʻa e ikuʻangá? Naʻa mo e palani lelei fakaemātuʻá ʻe lava pē ke iku mole noa. Neongo ia, ko e fāmilí ʻoku nau faʻa meimei ʻi he Fale Fakatahaʻangá kinautolu ki muʻa ʻaupito ke kamata ʻa e fakatahá. He meʻa fakalototoʻa moʻoni ia ke sio kia kinautolu ʻi ai ʻi he uike ki he uike, taʻu ki he taʻu, ʻi he tupu hake ʻa e fānaú ke tauhi kia Sihová!

 3. ʻOku tau ʻilo fēfē ʻoku fakamahuʻingaʻi lahi ʻe Sihova ʻa e ngaahi fāmilí?

³ Neongo ko hoʻo ngāue ko e mātuʻá ʻoku faingataʻa he taimi ʻe niʻihi pea aʻu ʻo fakaongosia, ʻoua te ke tokanga ki ha meʻa he ko Sihová ʻokú ne fakamahuʻingaʻi lahi hoʻo ngaahi feingá. Ko Sihová ko e Tupuʻanga ia ʻo e fokotuʻutuʻu fakafāmilí. He ʻoku pehē ʻe heʻene Folofolá ko e fāmili kotoa pē “ʻoku tauhingoa”​—ʻa ʻene ʻi aí tonu​—kia Sihova. (Efeso 3:​14, 15) Ko ia ʻi he taimi ʻoku mou kumi ai, ʻa kimoutolu ngaahi mātuʻa, ke fakahoko homou ngaahi ngafa fakafāmilí ʻi he founga totonú, ʻoku mou fakalāngilangiʻi ai ʻa e ʻEiki Hau ʻo e ʻunivēsí. (1 Kolinito 10:31) ʻIkai ko ha monū lahi ia? ʻOku feʻungamālie leva, ke tau lāulea ki he ngāue kuo vaheʻi ange ʻe Sihova ki he ngaahi mātuʻá. ʻI he kupu ko ení, te tau fakakaukau ki ai ʻi he tafaʻaki ko e tokonaki maʻá e fāmilí. Tau vakaiʻi angé ʻa e founga ʻe tolu ʻoku ʻamanekina ai ʻe Sihova ʻa e ngaahi mātuʻá ke nau fai ai ʻa e tokonakí.

Tokonaki Fakamatelie

 4. ʻI he fāmilí, ko e hā ʻa e ngaahi fokotuʻutuʻu kuo fai ʻe Sihova ke tokonaki ai maʻá e ngaahi fiemaʻu ʻa e fānaú?

⁴ Naʻe tohi ʻe he ʻapositolo ko Paulá: “He kabau oku ikai ke tokonaki e ha toko taha ki hono kaiga, bea kiate kinautolu tonu i hono fale, kuo jiaki eia ae lotu, bea lahi hake ene kovi aana iate ia oku taelotu.”  (1 Timote 5:8, PM) ʻI he lea ʻa Paula heni fekauʻaki mo “ha toko taha,” ko hai naʻe ʻi heʻene fakakaukaú? Ko e ʻulu ʻo e fāmilí, ʻa ia ʻoku meimei ko e tamaí. ʻOku toe ʻoange foki ʻe he ʻOtuá ha ngafa fakangeingeia ki he fefiné ko e tokoni ki hono husepānití. (Senesi 2:18) Ko e kakai fefine ʻi he taimi ʻo e Tohi Tapú naʻa nau faʻa tokoni ki honau ngaahi husepānití ke tokonaki maʻá e fāmilí. (Palovepi 31:​13, 14, 16) ʻI he ʻahó ni, ko e ngaahi fāmili mātuʻa taʻehoá ʻoku ʻalu ke toe lahi ange. a ʻOku tokolahi ʻa e ngaahi mātuʻa Kalisitiane taʻehoa ʻoku nau fai ha ngāue lelei ko e tokonaki maʻa honau fāmilí. Ko e moʻoni, ko e meʻa lelei lahi ia ki ha fāmili ke maʻu lōua ʻa e ongo mātuʻá, pea takimuʻa ai ʻa e tamaí.

5, 6. (a) Ko e hā ʻa e ngaahi pole ʻoku fehangahangai mo e faʻahinga ko ia ʻoku nau feinga ke tokonaki fakamatelie maʻa honau fāmilí? (e) Ko e tauhi maʻu ha vakai fēfē ki he ngāue fakamāmaní te ne tokoniʻi ʻa e kau fai tokonaki Kalisitiané ke kītakí?

⁵ ʻI he 1 Timote 5:​8, ko e hā ʻa e faʻahinga tokonaki naʻe ʻi he fakakaukau ʻa Paulá? ʻOku pehē ʻi he potutohí ko ʻene lea fakahangatonu fekauʻaki mo e ngaahi fiemaʻu fakamatelie ʻa e fāmilí. ʻI he māmani ʻo e ʻaho ní, ʻoku ʻi ai ʻa e ngaahi fakafaingataʻaʻiaʻanga lahi ʻe fehangahangai nai mo ha uluʻi fāmili koeʻuhi ke tokonaki ai ʻi he founga ko iá. Ko e ngaahi faingataʻa fakaʻekonōmiká ʻoku hokolahia ia ʻi māmani lahi, hangē ko e tuli mei he ngāué, māʻolunga e tuʻunga ʻo e taʻemaʻungāué, mo e hikihiki ʻa e totongi ʻo e koloá. Ko e hā ʻe lava ke ne tokoniʻi ha tokotaha tokonaki ke kītaki ʻi he fehangahangai mo e ngaahi pole peheé?

⁶ ʻOku lelei ki ha tokotaha tokonakí ke ne manatuʻi ko ʻene fua pē ʻe ia ʻa e ngāue kuo vaheʻi ange meia Sihova. ʻOku fakahā ʻe he ngaahi lea fakamānavaʻi ʻa Paulá ko ha tangata ʻa ia ʻoku malava ke talangofua ki he fekau ko ení ka ʻoku fakafisi ke fai pehē ʻoku fakahoa ia ki ha taha kuó ne ‘jiaki ae lotu.’ ʻE fai nai ʻe ha Kalisitiane ʻene lelei tahá ke kalofi ha tuʻunga pehē ʻi he ʻao ʻo Sihová. Ka ko e meʻa fakamamahí, ko e kakai tokolahi ʻi he māmani ʻo e ʻaho ní ko e “kau taeʻofa-ki-hoʻota.” (2 Timote 3:​1, 3) Ko e moʻoni, ʻoku taʻefaʻalaua ʻa e ngaahi tamai ʻoku nau kalofi honau fatongiá, ʻo tuku ai honau fāmilí ke liʻekina. Ko e ngaahi husepāniti Kalisitiané ʻoku ʻikai ke nau ʻinasi ʻi he vakai loto-fefeka, taʻetokanga pehē ki he tokonaki maʻa honau fāmilí. ʻI he ʻikai hangē ko honau kaungā ngāue tokolahi, ko e kau tokonaki Kalisitiané te nau sio ʻo aʻu ki he ngaahi ngāue māʻulaló ʻoku fakangeingeia mo mahuʻinga, ko ha founga ia ʻo hono fakahōifuaʻi ʻa e ʻOtua ko Sihová, koeʻuhi ʻoku fakamafeia ai kinautolu ke tokonaki maʻá e faʻahinga ʻoku nau ʻofa aí.

 7. Ko e hā ʻoku feʻungamālie ai ki he ngaahi mātuʻá ke nau fakakaukau ki he faʻifaʻitakiʻanga ʻa Sīsuú?

⁷ Ko e ngaahi ʻuluʻi fāmilí te nau toe ʻilo nai ʻoku ʻaonga ke fakakaukau ki he faʻifaʻitakiʻanga haohaoa ʻa Sīsuú. Manatuʻi, ʻoku lave fakaekikite ʻa e Tohi Tapú kia Sīsū ko ʻetau “Tamai Taʻengata.” (Aisea 9:​6, 7) ʻI he tuʻunga ko e “ʻAtama ki mui,” ʻoku fetongi lelei ai ʻe Sīsū ʻa e “ʻuluaki tangata, ʻa Atama” ko e tamai ʻa e faʻahinga ʻo e tangatá ʻoku ngāueʻi ʻenau tuí. (1 Kolinito 15:45) ʻI he ʻikai hangē ko ʻĀtamá, ʻa ia naʻá ne iku ko ha tamai siokita mo fakatōliʻa-kitá, ko Sīsuú ko e tamai lelei moʻoni. ʻOku pehē ʻe he Tohi Tapú fekauʻaki mo ia: “Ko e meʻa ko eni ʻoku tau ʻilo moʻoni ai ki he ʻofa, ʻa e liʻaki ʻene moʻui ʻe he ʻEne ʻAfio koeʻuhi ko kitautolu.” (1 Sione 3:16) ʻIo, naʻe foaki loto-lelei ʻe Sīsū ʻene moʻuí tonu maʻá e niʻihi kehé. Neongo ia, naʻá ne toe fakamuʻomuʻa fakaʻaho ʻa e ngaahi fiemaʻu ʻa e niʻihi kehé ʻi haʻaná ʻi he ngaahi meʻa iiki angé. ʻOku lelei kia kimoutolu ngaahi mātuʻá ke mou faʻifaʻitaki ki he laumālie feilaulauʻi-kita ko iá.

8, 9. (a) Ko e hā ʻe lava ke ako ʻe he ngaahi mātuʻá mei he fanga manupuná fekauʻaki mo e tokonaki taʻesiokita maʻa honau ʻuhikí? (e) ʻOku anga-fēfē hono fakahāhā ʻe he ngaahi mātuʻa Kalisitiane tokolahi ha laumālie feilaulauʻi-kita?

⁸ ʻOku lava ke ako ʻe he ngaahi mātuʻá ʻa e meʻa lahi fekauʻaki mo e ʻofa taʻesiokitá mei he ngaahi lea ko ia ʻa Sīsū ki he kakai talangataʻa ʻa e ʻOtuá: “Kuo liuga fiha eku fie tanaki fakataha hoo fānau, o hage koe tanaki fakataha e he motua moa ene fānau i hono lalo kabakau.” (Matiu 23:​37, PM) ʻOku fakamatalaʻi mai heni ʻe Sīsū ha fakatātā mahino ʻo ha motuʻa-moa ʻokú ne fakamalumalu hono ʻuhikí ʻaki hono ongo kapakaú. Ko e moʻoni, ʻe lava ke ako ʻe he ngaahi mātuʻá ha meʻa lahi mei he ongoʻi faifakahaofi fakanatula ko ia ʻo ha faʻē-manupuna, ʻa ia ʻokú ne mateuteu ke ʻi ha tuʻunga fakatuʻutāmaki ʻa ʻene moʻuí ke maluʻi ai hono ʻuhikí mei he faingataʻá. Kae kehe, ko e meʻa ʻoku fai fakaʻaho ʻe ha faʻē-manupuna ʻoku toe fakaofo ke sio ki ai. ʻOku nau fepunaʻaki taʻetuku holo he kumi  meʻakaí. Naʻa mo ʻenau aʻu ki he ongosiá, ʻoku nau kei fakatooki hifo pē ʻa e meʻakaí ki he ngutu fakamanga hake honau ʻuhikí, ʻa ia ʻoku nau folo ia pea kei faʻa tangi hake pē ke toe fafanga. Ko e tokolahi ʻo e ngaahi meʻamoʻui ʻa Sihová ʻoku nau “poto” ʻi he founga ʻoku nau tokangaʻi ai ʻa e ngaahi fiemaʻu honau ʻuhikí.​—Palovepi 30:24.

⁹ ʻI hano fakahoa ki ai, ko e ngaahi mātuʻa Kalisitiane takatakai he māmaní ʻoku nau fakahā ha laumālie lelei ʻo e feilaulauʻi-kita. Te mou saiʻia ange kimoutolu ke mou tofanga ʻi ha faingataʻa ʻi hano fakaʻatā ha faingataʻa ke hoko ki hoʻomou fānaú. ʻIkai ko ia pē, ʻoku mou fai loto-lelei ha ngaahi feilaulau fakaʻaho koeʻuhi ke tokonaki maʻa homou fāmilí. Ko e tokolahi ʻo kimoutolu ʻoku ʻā hengihengi hake ke ngāue ʻi he ngaahi ngāue fakaongosia pe fakapipiko. ʻOku mou ngāue mālohi ke tuku ha meʻakai lelei he tēpilé. ʻOku mou fāinga ke fakapapauʻi ʻoku maʻu ʻe hoʻomou fānaú ha vala ʻoku maʻa, fale ʻoku taau mo ha ako ʻoku feʻunga. Pea ʻoku mou fai ia ʻi he ʻaho ki he ʻaho mo e taʻu ki he taʻu. ʻOku pau moʻoni ko e feilaulauʻi-kita mo e kātaki peheé ʻoku fakahōifua kia Sihova! (Hepelu 13:16) Ka neongo ia, ʻi he taimi tatau, ʻokú ke manatuʻi ʻoku ʻi ai ʻa e ngaahi toe founga mahuʻinga ange ke tokonaki ai maʻa ho fāmilí.

Tokonaki Fakalaumālie

10, 11. Ko e hā ʻa e meʻa mahuʻinga taha ʻi he ngaahi fiemaʻu ʻa e tangatá, pea ko e hā kuo pau ke ʻuluaki fai ʻe he ngaahi mātuʻa Kalisitiané koeʻuhi ke fakahoko ai ʻa e fiemaʻu ko eni ʻi heʻenau fānaú?

¹⁰ ʻOku toe mahuʻinga ange ʻi he tokonaki fakamatelié ʻa e tokonaki fakalaumālié. Naʻe pehē ʻe Sīsū: “ʻOku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Matiu 4:4; 5:3) Ko e hā ʻe lava ke fai ʻe kimoutolu ngaahi mātuʻá ke mou tokonaki fakalaumālie aí?

¹¹ ʻI he kaveinga ko ení, mahalo ʻoku ʻikai ha konga Tohi Tapu ia ʻe toutou hiki-lea lahi ange ʻo laka ʻi he Teutalonome 6:​5-7. Kātaki ʻo fakaava hoʻo Tohi Tapú pea lau ʻa e ngaahi veesi ko iá. Fakatokangaʻi ko e ngaahi mātuʻá ʻoku ʻuluaki tala ki ai ke fakatupulekina honau tuʻunga fakalaumālie ʻonautolú, ʻo langa hake ha ʻofa kia Sihova pea tukulotoʻi ʻene ngaahi leá. ʻIo, ʻoku fiemaʻu ke ke hoko ko ha tokotaha ako fakamātoato ʻo e Folofola ʻa e ʻOtuá, ʻo lau tuʻumaʻu ʻa e Tohi Tapú pea fakalaulauloto ki ai koeʻuhi ke ke fakatupulekina ha mahinoʻi moʻoni mo e ʻofa ki he ngaahi founga, ngaahi tefitoʻi moʻoni mo e ngaahi lao ʻa Sihová. Ko hono olá, ʻe fonu ai ho lotó he ngaahi moʻoni fakamānako ko ia ʻo e Tohi Tapú ʻa ia te ne ueʻi koe ke ke ongoʻi fiefia, ʻapasia pea ʻofa kia Sihova. Te ke maʻu ai ʻa e ngaahi meʻa lelei faufaua ke tuku ki hoʻo fānaú.​—Luke 6:45.

12. ʻE faʻifaʻitaki fēfē nai ʻa e ngaahi mātuʻá ki he faʻifaʻitakiʻanga ʻa Sīsuú ʻi he taimi ʻoku hoko mai ai ki hono uhuʻi ʻa e ngaahi moʻoni ʻo e Tohi Tapú ki heʻenau fānaú?

¹² Ko e ngaahi mātuʻa ʻoku mālohi fakalaumālié ʻoku nau mateuteu ke ngāueʻaki ʻa e akonaki ko ia ʻi he Teutalonome 6:​7, ke “uhuʻi” ʻa e ngaahi foʻi folofola ʻa Sihová ki heʻenau fānaú ʻi he faingamālie kotoa pē. Ke “uhuʻi” ʻoku ʻuhingá ke akoʻi pea ʻai ke maongo fakafou ʻi  hono toe leaʻaki. ʻOku ʻafioʻi lelei ʻe Sihova ko e kotoa ʻo kitautolú​—taufefito ki he fānaú​—ʻoku tau fiemaʻu ʻa e toe leaʻaki koeʻuhi ke ako ai. Ko ia ai, naʻe ngāueʻaki ʻe Sīsū ʻa e toutou leaʻakí ʻi heʻene ngāue fakafaifekaú. Ko e fakatātaá, ʻi heʻene akoʻi ʻene kau ākongá ke nau anga-fakatōkilalo kae ʻikai ko e hīkisia mo e feʻauʻauhí, naʻá ne maʻu ha ngaahi founga kehekehe ke toe leaʻaki ai ʻa e tefitoʻi moʻoni tatau. Naʻá ne akoʻaki ʻa e fakaʻuhinga, ʻaki e fakatātā pea naʻa mo hono fakatātaaʻi. (Matiu 18:​1-4; 20:​25-​27; Sione 13:​12-​15) Kae kehe, ko e meʻa ʻoku mālié, naʻe ʻikai ʻaupito fakahāhā ʻe Sīsū ha taʻefaʻakātaki. ʻI he founga tatau, ko e ngaahi mātuʻá ʻoku fiemaʻu ke nau kumi ha ngaahi founga ke akoʻiʻaki ʻa e ngaahi moʻoni tefitó ki heʻenau fānaú, ʻo toe leaʻaki anga-kātaki ʻa e ngaahi tefitoʻi moʻoni ʻa Sihová kae ʻoua kuo mahinoʻi ʻe he fānaú pea ngāueʻaki kinautolu.

13, 14. Ko e hā ʻa e niʻihi ʻo e ngaahi taimi ʻe lava ai ʻe he ngaahi mātuʻá ke uhuʻi ʻa e ngaahi moʻoni ʻo e Tohi Tapú ki heʻenau fānaú, ʻo ngāueʻaki ʻa e ngaahi tokoni fē?

¹³ Ko e ngaahi houa ako fakafāmilí ko ha ngaahi taimi lelei moʻoni ia ki ha ako pehē. Ko e moʻoni, ko ha ako Tohi Tapu fakafāmili tuʻumaʻu, fakatupu langa hake mo fakafiefia, ko ha poupou tefito ia ki he tuʻunga fakalaumālie ʻo e fāmilí. Ko e ngaahi fāmili Kalisitiane takatakai ʻi he māmaní ʻoku nau fiefia ʻi ha ngaahi ako peheé, ʻo ngāueʻaongaʻaki ʻa e ngaahi tohi ʻoku tokonaki mai fakafou he kautaha ʻa Sihová pea fengaʻunuʻaki e akó ki he ngaahi fiemaʻu ʻa e fānaú. Ko e tohi Ako mei he Faiako Lahí kuo hoko ia ko ha tāpuaki makehe ʻi he tuʻunga ko ení, ʻo hangē ko ia ko e tohi Questions Young People Ask​—Answers That Work. b Kae kehe, ko e ako fakafāmilí ʻoku ʻikai ko e taimi pē ia ke akoʻi ai ʻa e fānaú.

¹⁴ Hangē ko ia ʻoku fakahā ʻe he Teutalonome 6:​7, ʻoku ʻi ai ʻa e ngaahi taimi lahi kia kimoutolu ngaahi mātuʻá ke fetalanoaʻaki ai ki he ngaahi meʻa fakalaumālié mo hoʻomou fānaú. Pe ko hoʻomou fononga fakataha, fai ha ngāue fakataha, pe mālōlō fakataha, te mou maʻu nai ha ngaahi faingamālie ke tokonaki ai maʻá e ngaahi fiemaʻu fakalaumālie hoʻomou fānaú. Ko e moʻoni, ʻoku ʻikai fiemaʻu ia ke mou “malanga” taʻetuku ki hoʻomou fānaú fekauʻaki mo e ngaahi moʻoni ʻo e Tohi Tapú. Kae feinga ke tauhi ʻa e fetalanoaʻaki fakafāmilí ʻi ha tuʻunga fakatupu langa hake mo fakalaumālie. Ko e fakatātaá, ʻoku ʻi he makasini ʻĀ Hake! ha ngaahi kupu lahi ʻi he ngaahi kaveinga lahi kehekehe. Ko e ngaahi kupu peheé te ne tofa nai ha hala ki ha fetalanoaʻaki fekauʻaki mo e fakatupu ko ia ʻe Sihova ʻa e fanga manú, ngaahi feituʻu fakaʻofoʻofa fakanatula takatakai he māmaní pea mo e ngaahi anga fakafonua mo e ngaahi founga moʻui kehekehe fisifisimuʻa ʻi he faʻahinga ʻo e tangatá. Ko e ngaahi fetalanoaʻaki peheé te ne ueʻi nai ai ʻa e fānaú ke nau lau lahi ange ʻa e ngaahi tohi ʻoku tokonaki mai ʻe he kalasi tamaioʻeiki anga-tonu mo potó.​—Mātiu 24:​45-47.

15. ʻE anga-fēfē nai hano tokoniʻi ʻe he ngaahi mātuʻá ʻenau fānaú ke vakai ki he ngāue fakafaifekau faka-Kalisitiané ko e meʻa ʻoku fakamānako mo fakafiemālie?

¹⁵ Ko e kau ko ia ʻi ha ngaahi fetalanoaʻaki  fakatupu langa hake mo hoʻomou fānaú te ne tokoniʻi ai kimoutolu ke fakalato ha toe fiemaʻu fakalaumālie ʻe taha. ʻOku fiemaʻu ki he fānau Kalisitiané ke nau ako ke vahevahe ola lelei atu ʻenau tuí ki he niʻihi kehé. ʻI he lolotonga ʻo ha talanoa fekauʻaki mo ha poini mahuʻinga ʻi he Taua Leʻo pe ʻĀ Hake! te mou kumi nai ai ki ha ngaahi faingamālie ke fakafelāveʻi ai ʻa e kupu ko iá ki he ngāue fakafaifekaú. Ko e fakatātaá, te mou ʻeke nai: “ʻIkai ʻe lelei lahi kapau ʻe tokolahi ange ʻa e kakai te nau ʻilo ʻa e meʻa ko eni fekauʻaki mo Sihová? ʻOkú ke pehē ʻe lava fēfē ke tau ʻai ha taha ke mahuʻingaʻia he kaveinga ko ení?” Ko e ngaahi fetalanoaʻaki peheé ʻe tokoni nai ia ki he fānaú ke fakatupulekina ai ha mahuʻingaʻia lahi ange ʻi he fevahevaheʻaki mo e niʻihi kehé ʻa e meʻa ʻoku nau akó. Pea ʻi he taimi leva ʻoku mou ō fakataha ai mo hoʻomou fānaú ʻi he ngāue fakafaifekaú, ʻoku nau sio tonu leva ai ʻi hono ngāueʻaki ʻa e fetalanoaʻaki peheé. Te nau toe ako foki ai ko e ngāue fakafaifekaú ko ha ngāue fakamānako ia mo fakafiefia ʻokú ne tokonaki mai ʻa e fiemālie mo e fiefia lahi.​—Ngāue 20:35.

16. Ko e hā nai ʻe ako ʻe he fānaú mei heʻenau fanongo ki he ngaahi lotu ʻenau mātuʻá?

¹⁶ ʻOku toe tokonaki ʻa e ngaahi mātuʻá maʻá e ngaahi fiemaʻu fakalaumālie ʻenau fānaú ʻi he taimi lotú. Naʻe akoʻi ʻe Sīsū ʻene kau ākongá ki he founga ʻo e lotú, pea naʻá ne lotu mo kinautolu ʻi he ngaahi taimi lahi. (Luke 11:​1-13) Kiʻi fakakaukau angé ki he fuʻu meʻa lahi naʻa nau ako ʻi heʻenau lotu fakataha mo e ʻAlo tonu ʻo Sihová! ʻI he tuʻunga tatau, ʻe lava ke ako ʻe hoʻomou fānaú ha meʻa lahi mei hoʻomou ngaahi lotú. Ko e fakatātaá, te nau ako nai ko Sihová ʻoku loto ke tau lea tauʻatāina ange kiate ia mei he lotó, ʻo lea kiate ia ʻi ha faʻahinga loto-hohaʻa pē nai ʻoku tau maʻu. ʻIo, ko hoʻomou ngaahi lotú ʻe lava ke tokoni ia ki hoʻomou fānaú ke nau ako ha moʻoni fakalaumālie mātuʻaki mahuʻinga: ʻE lava ke nau maʻu ha vahaʻangatae mo ʻenau Tamai fakahēvaní.​—1 Pita 5:7.

Tokonaki Fakaeongo

17, 18. (a) ʻOku anga-fēfē hono fakaeʻa ʻe he Tohi Tapú ʻa e mahuʻinga hono fakahāhā ʻa e ʻofá ki he fānaú? (e) ʻOku totonu ke fēfē ʻa e faʻifaʻitaki ʻa e ngaahi tamaí kia Sihova ʻi hono fakahāhā ʻa e ʻofa ki heʻenau fānaú?

¹⁷ Ko e moʻoni, ko e fānaú ʻoku toe ʻi ai ʻenau ngaahi fiemaʻu vivili fakaeongo. ʻOku tala mai ʻe he Folofola ʻa e ʻOtuá ki he ngaahi mātuʻá ʻoku mahuʻinga ke tokonaki ʻi he tafaʻaki ko ení. Ko e fakatātaá, ko e kau fefine kei īkí ʻoku ekinaki ki ai ke nau “ofa ki heʻenau fānau.” Ko ʻenau fai peheé ʻoku felāveʻi ia mo hono akoʻi ʻa e ngaahi faʻē kei īkí ke nau “fakabotoboto.” (Taitusi 2:4, PM) Ko e moʻoni, ʻoku fakapotopoto ke fakahāhā ʻa e ʻofa ki ha kiʻi tama. ʻOku akoʻi heni ha kiʻi tama ke ʻofa pea ʻomi ai ha ngaahi ʻaonga ʻi he kotoa ʻo ʻene moʻuí. ʻI he tafaʻaki ʻe tahá, ko ha taʻemalava ke fakahāhā ʻa e ʻofá ki ha kiʻi tama ko e meʻa fakavalevale ia. ʻOkú ne fakatupunga ʻa e mamahi lahi pea fakafōtunga mai ai ʻa e taʻemalava ke faʻifaʻitaki kia Sihova, ʻa ia ʻokú ne fakahāhā ʻa e ʻofa lahi fau kia kitautolu neongo ʻetau ngaahi taʻehaohaoá.​—Sāme 103:​8-14.

¹⁸ ʻOku toe aʻu ʻo tamuʻomuʻa ʻa Sihova ʻi he ʻofa mai ki heʻene fānau fakaemāmaní. Hangē ko ia ko e lau ʻa e 1 Sione 4:​19, “naʻe tomuʻa ʻofa ʻe he ʻEne ʻAfio kiate kitautolu.” Ko kimoutolu ngaahi tamai ʻoku tautefito ʻa e totonu ke mou muimui ʻi he faʻifaʻitakiʻanga ʻa Sihová, ʻo tamuʻomuʻa ʻi he langa hake ha haʻi anga-ʻofa mo hoʻomou fānaú. ʻOku ekinaki ʻa e Tohi Tapú ki he ngaahi tamaí ke fakaʻehiʻehi mei hono fakaʻitaʻi ʻenau fānaú, “naʻa faifai pea nau loto kina.” (Kolose 3:21) ʻOku ʻikai ha loko meʻa ʻe fakatupuʻita lahi ange ki he fānaú ka ko ʻenau ongoʻi ko ia ʻoku ʻikai ke ʻofaʻi pe fakamahuʻingaʻi kinautolu ʻe ha mātuʻá. Ko e ngaahi tamai ko ia ʻoku toumoua ke fakahāhā ʻenau ngaahi ongoʻi ʻoku lelei ke nau manatuʻi ʻa e faʻifaʻitakiʻanga ʻa Sihová. Naʻe aʻu ʻo folofola hifo ʻa Sihova mei hēvani ke fakahāhā ʻene hōifua mo ʻene ʻofa ki hono ʻAló. (Mātiu 3:17; 17:5) He meʻa fakalototoʻa moʻoni kuo pau naʻe hoko ʻi he meʻa ko iá kia Sīsuú! ʻOku pehē pē, ʻoku maʻu ʻe he fānaú ha mālohi  mo ha loto-toʻa lahi mei he ngaahi fakahāhā faitotonu ko ia ʻo e ʻofa mo e leleiʻia mei heʻenau ngaahi mātuʻá.

19. Ko e hā ʻoku mahuʻinga ai ʻa e tauteá, pea ko e hā ʻa e mafamafatatau ʻoku feinga ʻa e ngaahi mātuʻa Kalisitiané ke ʻiló?

¹⁹ Ko e moʻoni, ko e ʻofa fakaemātuʻá ʻoku mahulu atu ia ʻi he leá ʻataʻatā pē. Ko e ʻofá ʻoku fakahāhā tefito ia ʻi he ngāue. Ko e tokonaki fakamatelie mo fakalaumālié ʻe lava ke hoko ia ko ha fakahāhā ʻo e ʻofa fakaemātuʻá, tautefito ʻi he taimi ʻoku fai ai eni ʻe he ngaahi mātuʻá ʻi ha founga ʻoku mahino ai ko e ʻofá ʻa e fakaueʻiloto tefitó. ʻIkai ko ia pē, ko e tauteá ko ha fakahāhā mātuʻaki mahuʻinga ia ʻo e ʻofa fakaemātuʻá. Ko e moʻoni, “ko ia oku ofa ki ai ae Eiki oku ne tautea.” (Hepelu 12:​6, PM) ʻI he tafaʻaki ʻe tahá, ko ha taʻemalava ke tauteá ko ha fakahāhā ia ʻo e fehiʻa fakaemātuʻá! (Palovepi 13:24) ʻOku ʻilo maʻu pē ʻe Sihova ʻa e mafamafatatau totonú, ʻo tautea “feʻunga.” (Selemaia 46:28) Ko e mafamafatatau peheé ʻoku ʻikai faʻa faingofua ia ke ʻilo ʻe he ngaahi mātuʻa taʻehaohaoá. Neongo ia, ʻoku taau mo hoʻomou ngaahi feinga kotoa pē ke feinga ki he mafamafatatau ko iá. Ko e tautea tuʻumaʻu mo anga-ʻofá, ʻoku tokoni ia ki ha kiʻi tama ke tupu hake ʻo moʻui ʻi ha moʻui fiefia mo fua lahi. (Palovepi 22:6) ʻIkai ko e meʻa eni ʻoku fiemaʻu ʻe he mātuʻa Kalisitiane kotoa maʻa ʻene kiʻi tamá?

20. ʻE lava fēfē ki he ngaahi mātuʻá ke ʻoange ki heʻenau fānaú ʻa e faingamālie lelei taha ʻoku ala maʻú ke ‘fili ai ki he moʻuí’?

²⁰ ʻI he taimi ʻoku mou fai ai ʻe kimoutolu ngaahi mātuʻá ʻa e ngāue mahuʻinga kuo vaheʻi atu ʻe Sihova kia kimoutolú​—ʻa e tokonaki maʻá e ngaahi fiemaʻu fakamatelie, fakalaumālie mo fakaeongo hoʻomou fānaú​—ʻoku lelei lahi hono ngaahi palé. ʻOku mou ʻange ai ki hoʻomou fānaú ʻa e faingamālie lelei taha ʻoku ala maʻú ke “fili ki he moʻui” pea iku ai ki he “moʻui.” (Teutalonome 30:19) Ko e fānau ko ia ʻoku nau fili ke tauhi kia Sihova mo nofo ʻi he hala ki he moʻuí ʻi heʻenau lahi haké ʻoku nau ʻomai ki heʻenau ongo mātuʻá ʻa e fiefia lahi fakaʻulia. (Sāme 127:​3-5) Ko e fiefia peheé ʻe tolonga ia ʻo taʻengata! ʻE lava fēfē leva, ke fakahīkihikiʻi ʻe he kau talavoú ʻa Sihova he taimí ni? Ko e kupu hoko maí ʻe lāulea ki he kaveinga ko iá.

[Fakamatala ʻi lalo]

ʻE Fēfē Haʻo Tali?

Ko e hā ʻe lava ke fai ʻe he ngaahi mātuʻá koeʻuhi ke tokonaki ai maʻa ʻenau fānaú

• fakamatelie?

• fakalaumālie?

• fakaeongo?

[Fehuʻi ki he Ako]

[Fakatātā ʻi he peesi 18]

ʻOku ngāue taʻehela ʻa e fanga manupuna lahi ke tokonaki maʻa honau ʻuhikí

[Fakatātā ʻi he peesi 20]

Ko e ngaahi mātuʻá kuo pau ke nau ʻuluaki fakatupulekina honau tuʻunga fakalaumālie ʻonautolú

[Fakatātā ʻi he peesi 20, 21]

Ko e ngaahi mātuʻá ʻe lava ke nau maʻu ʻa e ngaahi taimi lahi ke akoʻi ai ʻenau fānaú fekauʻaki mo e Tokotaha-Fakatupú

[Fakatātā ʻi he peesi 22]

Ko e fānaú ʻoku nau maʻu ʻa e mālohi mo e loto-toʻa mei he leleiʻia fakaemātuʻá