Ko e Fekumi ki he Nonga ʻi Lotó

KO Albert ko ha tangata nofo mali fiefia ia mo haʻane ongo tamaiki fakaʻofoʻofa ʻe toko ua. Ka naʻá ne ongoʻi naʻe ʻi ai ha meʻa naʻe ʻikai kakato ʻi heʻene moʻuí. Lolotonga ha taimi ʻa ia naʻe pau ai ke ne fāinga ke maʻu ha ngāue, naʻá ne kau ai ʻi he politikí pea ohi ʻa e tui fakasōsialisí (socialism). Naʻe aʻu ʻo ne hoko ko ha mēmipa longomoʻui ʻo e faʻahi Kominiusi ʻi honau feituʻú.

Kae kehe, ʻikai fuoloa kuo ʻikai toe tui ʻa Albert ki he Kominiusí. Naʻá ne motuhi ʻa ʻene ngaahi felāveʻi mo e ngaahi meʻa fakapolitikí pea līʻoa kakato ia ki hono fāmilí. Naʻe hoko ko ʻene taumuʻa ia ʻi he moʻuí ke fakapapauʻi ʻoku fiefia ʻa hono fāmilí. Ka neongo ia, naʻe kei ongoʻi pē ʻe Albert ʻi hono lotó ha meʻa naʻe ʻikai ke ʻi ai; naʻe teʻeki ai pē te ne maʻu ʻa e nonga moʻoni ʻi lotó.

Ko e meʻa ko eni ʻoku hokosia ʻe Albert ʻoku ʻikai ko eni pē taha. Kuo ʻahiʻahiʻi ʻe he laui miliona ʻa e ngaahi fakakaukau, ngaahi filōsofia mo e ngaahi lotu kehekehe koeʻuhi ke maʻu ha taumuʻa mohu ʻuhinga ʻi he moʻuí. ʻI he māmani Uēsité, ko e ngaʻunu ʻa e kau hipí (hippie movement) ʻi he 1960 tupú ko ha fakafepaki ia ki he ngaahi meʻa mahuʻinga fakasōsiale mo fakamōlale tukufakaholó. Tautefito ki he kau talavoú naʻa nau fekumi ki he fiefiá mo e ʻuhinga ʻo e moʻuí fakafou ʻi he ngaahi faitoʻo fakakehe-ʻatamai pea mo e ngaahi filōsofia ʻo e ngaʻunú, ʻa e faʻahinga naʻe ui ko e kau kulu mo e kau taulaʻeiki lahi. Kae kehe, naʻe ʻikai lava ke ʻomai ʻe he ngaʻunu ʻa e kau hipí ʻa e fiefia moʻoniá. ʻI hono kehé, naʻe tokoni ia ke ne fakatupu mai ʻa e kau maʻu faitoʻo kona tapu mo e toʻutupu moʻui fakaʻaluʻalu, ʻo fakavaveʻi ai ʻa e fakaʻau hifo ʻa e sōsaietí ki he puputuʻu fakamōlalé.

ʻI he laui senituli, kuo fekumi ʻa e tokolahi ki he fiefiá fakafou he koloá, mafaí pe akó. Ko e ngaahi ʻalungá ni ʻoku iku atu pē ki he fakasiva ʻamanaki. “Neongo oku fuʻu lahi ʻa e koloa ʻa ha taha,” ko e  lea ia ʻa Sīsuú, “ka ʻoku ʻikai hoko ai ʻo tautau ʻene moʻui ki heʻene ngaʻotoʻota.” (Luke 12:15) Ka, ko e fakapapauʻi ke tuli ki he koloá ʻoku faʻa ʻomai ai ʻa e loto-mamahi. ʻOku pehē ʻe he Tohi Tapú: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia. He ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe, pea ko e niʻihi ʻi heʻenau ala ki he meʻa ko ia . . . kuo nau hokohokaʻi ʻaki ʻa kinautolu ʻa e ngaahi mamahi lahi.”—1 Timote 6:​9, 10.

ʻE lava fēfē leva ke maʻu ʻe ha taha ʻa e nonga ʻi lotó mo ha taumuʻa ʻi he moʻuí? Ko ha tuʻunga ia ʻo hono ʻahiʻahiʻi ʻo e ngaahi meʻá ke ʻilo ai, hangē ko hono fanaʻi ha foʻi ngahau ki ha tāketi ʻilongataʻa ʻi he fakapoʻulí? ʻOku tau fakamālō he ʻoku ʻikai ke pehē. Hangē ko ia te tau sio ki ai ʻi he kupu hoko maí, ko e fakaleleiʻangá ʻoku nofo ia ʻi hono fakalato ha fiemaʻu mātuʻaki mahuʻinga mo makehe moʻoni ʻa e tangatá.

[Fakatātā ʻi he peesi 3]

ʻE tokoniʻi koe ʻe he tuli ki he koloá, mafaí pe akó ke ke maʻu ʻa e nonga ʻi lotó?