Ko ha Lao ʻo e ʻOfá ʻi he Lotó
Ko ha Lao ʻo e ʻOfá ʻi he Lotó
“Te u ʻai ki loto ʻeku lao, ʻio, te u tongi ia ki honau loto.”—SELEMAIA 31:33.
1, 2. (a) Ko e hā te tau lāulea ki ai he taimi ní? (e) Naʻe anga-fēfē hono fakahāhā ʻe Sihova ʻa ia tonu ʻi he Moʻunga Sainaí?
ʻI HE ongo kupu ki muʻá, naʻa tau ako ai ʻi he taimi ko ia naʻe ʻalu hifo ai ʻa Mōsese mei Moʻunga Sainaí, naʻe tapa mai mei hono fofongá ha ngaahi huelo ʻa ia naʻe tapua mai ai ʻa e lāngilangi ʻo Sihová. Naʻa tau toe lāulea ai ki he pūlou naʻe tui ʻe Mōsesé. Tau lāulea angé he taimí ni ki ha meʻa ʻoku fekauʻaki mo ia ʻoku ʻi ai hono ʻuhinga ki he kau Kalisitiane ʻi he ʻaho ní.
2 ʻI he taimi naʻe ʻi he funga moʻungá ai ʻa Mōsesé, naʻá ne maʻu ai ha ngaahi fakahinohino meia Sihova. ʻI he fakatahataha ʻi he veʻe Moʻunga Sainaí, naʻe sio tonu ai ʻa e kau ʻIsilelí ki ha fakahāhā fakaofo ʻo e ʻOtuá tonu. “Nae ai ae gaahi mana moe uhila, moe ao matolu ki he mouga, moe ogo mai ae mea lea nae malohi fakamanavahe; koia nae tetetete ai ae kakai kotoabe nae i he abitaga. . . . Bea nae kohuia ae mouga ko Sainai kotoabe, koeuhi nae haele hifo ki ai a Jihova i he afi: bea nae alu hake a hono kohu o hage koe kohu o ha fuu afi, bea nae galulu lahi ae mouga kotoa.”—Ekisoto 19:16-18, PM.
3. ʻI he ongo founga fē naʻe ʻoange ai ʻe Sihova ʻa e Fekau ʻe Hongofulú ki ʻIsilelí, pea ko e hā naʻe hoko ʻo mahinoʻi ʻe he puleʻanga ko iá?
3 Naʻe folofola ʻa Sihova ki he kakaí fakafou ʻi ha ʻāngelo, ʻo ʻoange kiate kinautolu ʻa e meʻa ko ia naʻe hoko ʻo ʻiloa ko e Fekau ʻe Hongofulú. (Ekisoto 20:1-17) Ko ia ai, naʻe ʻikai ke toe ʻi ai ha veiveiua ko e ngaahi lao ʻeni mei he Māfimafi-Aoniú. Naʻe tohi ʻe Sihova ʻa e ngaahi fekau ko iá ʻi he ongo maka lafalafa—ʻa e ongo maka ko ia naʻe haveʻi ʻe Mōsese ʻi he taimi naʻá ne sio ai ki he kau ʻIsilelí ʻoku nau lotu ki ha kiʻi pulu koulá. Naʻe toe tohi ʻe Sihova ʻa e ngaahi fekaú ʻi ha maka. ʻI he taimi ko ʻení, ʻi he ʻalu hifo ʻa Mōsese ʻokú ne toʻo hifo ʻa e ongo maka lafalafá, naʻe haʻu mei hono fofongá ha ngaahi huelo. ʻI he aʻu mai ki he taimi ko iá, ʻe mahinoʻi ai ʻe he faʻahinga kotoa ko e ngaahi lao ko iá ʻoku ʻi ai hono mahuʻinga kāfakafa.—Ekisoto 32:15-19; 34:1, 4, 29, 30.
4. Ko e hā naʻe mahuʻinga lahi ai ʻa e Fekau ʻe Hongofulú?
4 Ko e ongo maka lafalafa ko ia naʻe tohi ai ʻa e Fekau ʻe Hongofulú naʻe tuku ia ʻi loto ʻi he puha ʻo e fuakavá ʻi loto ʻi he Potu Toputapu ʻo e tāpanekalé pea ki mui mai ʻi he temipalé. Ko e ngaahi lao naʻe ʻi aí naʻe fakahaaʻi ai ʻa e ngaahi tefitoʻi moʻoni tefito ʻo e fuakava Lao ʻa Mōsesé pea fokotuʻu ai ʻa e makatuʻunga ki he puleʻi fakateokalati ʻo ha founga-pule fakapuleʻanga. Naʻe fakamoʻoniʻi ʻe he ngaahi laó naʻe feangainga ʻa Sihova mo ha kakai makehe, ko ha kakai fili.
5. ʻI he ngaahi founga fē naʻe tapua atu ai ʻe he ngaahi lao ʻa e ʻOtuá ki ʻIsilelí ʻa ʻene ʻofá?
5 Naʻe fakahaaʻi ʻe he ngaahi lao ko iá ʻa e meʻa lahi fekauʻaki mo Sihova, tautefito ki heʻene ʻofa ki hono kakaí. Ko ha meʻaʻofa mahuʻinga lahi ē ki he faʻahinga ko ia naʻa nau talangofua ki aí! Naʻe tohi ʻe ha mataotao ʻe taha: “ʻOku ʻikai ha tuʻunga fakaeʻulungāanga ia kuo faifai ange pea fokotuʻu ʻe he tangatá ki muʻa pe talu mei ai . . . ʻe lava ke ofiofi, pea ʻikai ʻaupito tatau, pe te ne lakasi, ʻa e ngaahi foʻi folofola ʻe hongofulu ko ʻeni ʻa e ʻOtuá.” ʻI he fekauʻaki mo e Lao ʻa Mōsesé ʻi he tuʻunga fakalūkufuá, naʻe pehē ʻe Sihova: “Kapau te mou matuʻaki tokanga ki hoku leʻo, mo tauhi ʻeku fuakava, te mou toki hoko ko ʻeku koloa kanokato ʻi he kakai kotoa: he ʻoku oʻoku ʻa mamani katoa: pea te mou hoko kiate au ko e tuʻunga tuʻi taulaʻeiki, ko e kakai tapu.”—Ekisoto 19:5, 6.
Ko ha Lao Kuo Tongi ʻi he Lotó
6. Ko e hā ʻa e lao kuo fakamoʻoniʻi ʻoku mahuʻinga ange ia ʻi he ngaahi lao naʻe tohi ʻi he maká?
6 ʻIo, naʻe mahuʻinga lahi ʻa e ngaahi lao fakaʻotua ko iá. Ka neongo ia, naʻá ke ʻiloʻi ʻoku maʻu ʻe he kau Kalisitiane paní ha meʻa ʻoku mahuʻinga mamaʻo ange ia ʻi he ngaahi lao naʻe tohi ʻi he maká? Naʻe tomuʻa tala ʻe Sihova ʻa hono faʻu ʻo ha fuakava foʻou ʻo ʻikai hangē ko e fuakava Lao naʻe fai mo e puleʻanga ʻo ʻIsilelí. “Te u ʻai ki loto ʻeku lao, ʻio, te u tongi ia ki honau loto.” (Selemaia 31:31-34) Ko Sīsū, ʻa e Tokotaha-Fakalaloa ʻo e fuakava foʻoú, naʻe ʻikai te ne ʻoange ʻe ia ha ngaahi lao kuo tohi ki hono kau muimuí. Naʻá ne fakahūhū ʻa e lao ʻa Sihová ki he ʻatamai mo e loto ʻo ʻene kau ākongá ʻaki ʻa e ngaahi meʻa naʻá ne leaʻakí mo fakahokó.
7. Ko hai naʻe ʻuluaki ʻoange ki ai “ʻa e lao ʻa Kalaisi,” pea ko hai naʻá ne maʻu ia ki muí?
7 ʻOku ui ʻa e lao ko ʻení ko e “lao ʻa Kalaisi.” Naʻe ʻuluaki ʻomai ia, ʻo ʻikai ki he puleʻanga ʻo ʻIsileli totonú, ʻa ē ko e ngaahi hako ʻo Sēkopé, ka ki ha puleʻanga fakalaumālie, ko e “Isileli faka-ʻOtua.” (Kaletia 6:2, 16; Loma 2:28, 29) Ko e ʻIsileli ʻo e ʻOtuá ʻoku faʻuʻaki ia ʻa e kau Kalisitiane paní. ʻI he faai mai ʻa e taimí, naʻe kau fakataha atu kiate kinautolu ha “fuʻu kakai lahi” mei he ngaahi puleʻanga kotoa pē ʻa ia ʻoku nau toe feinga mo kinautolu ke lotu kia Sihova. (Fakahā 7:9, 10; Sakalaia 8:23) ʻI he hoko ko e “takanga pe taha” ʻi he malumalu ʻo e “taha pe ʻa e tauhi,” ʻoku maʻu fakatouʻosi ai ʻe he ongo kulupú ni “ʻa e lao ʻa Kalaisi,” ʻo fakaʻatā ia ke ne puleʻi ʻa e meʻa kotoa pē ʻoku nau faí.—Sione 10:16.
8. Ko e hā ha faikehekehe ʻi he vahaʻa ʻo e Lao ʻa Mōsesé mo e lao ʻa Kalaisí?
8 ʻI he ʻikai hangē ko e kau ʻIsileli totonú, ʻa ia naʻa nau haʻisia ki he Lao ʻa Mōsesé ʻi honau fāʻeleʻí, ko e kau Kalisitiané ʻoku nau nofo ʻi he malumalu ʻo e lao ʻa Kalaisí ʻi heʻenau fili ki ai, ko e ngaahi moʻoniʻi meʻa hangē ko e matakalí mo e feituʻu fāʻeleʻí ʻoku ʻikai hano mahuʻinga ʻona. ʻOku nau ako fekauʻaki mo Sihova mo ʻene ngaahi foungá pea fakaʻamu ke fai hono finangaló. Ko hono ʻai ʻa e lao ʻa e ʻOtuá “ʻi loto” ʻiate kinautolú, ʻo tongi, hangē ko e laú, “ki honau loto,” ʻoku ʻikai ai ke talangofua pē ʻa e kau Kalisitiane paní ki he ʻOtuá koeʻuhi he ʻe lava ke ne tautea ʻa e faʻahinga ʻoku talangataʻá; pea ʻoku ʻikai ke nau talangofua pē kiate iá ʻi ha ongoʻi ko ha fatongia pē. ʻOku tupu ʻenau talangofuá ʻi he meʻa ʻoku mahuʻinga ange mo toe fuʻu mālohi lahi ange, pea ko e faʻahinga ʻo e fanga sipi kehé ʻoku nau talangofua ʻi he tuʻunga meimei tatau koeʻuhi ko hono ʻai ʻa e lao ʻa e ʻOtuá ʻi honau lotó.
Ngaahi Lao Makatuʻunga ʻi he ʻOfá
9. Naʻe anga-fēfē hono fakahaaʻi ʻe Sīsū ko e ʻofá ko e uho ia ʻo e ngaahi lao ʻa Sihová?
9 Ko e uho ʻo e ngaahi lao mo e ngaahi tuʻutuʻuni kotoa ʻa Sihová ʻoku malava ke fakanounou ia ʻi ha foʻi lea pē ʻe taha: ko e ʻofá. Kuo pehē maʻu ai pē pea ʻe hoko maʻu pē ia ko ha konga tefito ʻo e lotu maʻá. ʻI hono ʻeke ange pe ko e hā ʻa e fekau lahi taha ʻi he Laó, naʻe tali ʻe Sīsū: “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa.” Ko hono uá: “Ke ke ofa ki ho kaugaabi o hage be ko koe.” Naʻá ne toki pehē leva: “Koe fekau ni e ua oku tautau ai ae fono [pe lao] kotoa moe kau balofita.” (Mātiu 22:35-40, PM) Naʻe fakahaaʻi ai ʻe Sīsū, ʻoku ʻikai ko e Lao pē ʻoku ʻi ai ʻa e Fekau ʻe Hongofulú, ka ko e fakakātoa ʻo e Ngaahi Konga Tohi Tapu Faka-Hepeluú naʻe makatuʻunga ia ʻi he ʻofá.
10. ʻOku tau ʻilo fēfē ko e ʻofá ʻa e makatuʻunga ki he lao ʻa Kalaisí?
10 ʻOku toe makatuʻunga ʻi he ʻofa ki he ʻOtuá mo e kaungāʻapí ʻa e lao ʻi he loto ʻo e kau Kalisitiané? Ko ia hono kotoa! Ko e lao ʻa Kalaisí ʻoku kau ki ai ʻa e ʻofa ongoʻi loloto ki he ʻOtuá pea ʻoku fakakau ai ha tuʻutuʻuni foʻou—ko e kau Kalisitiané ke nau feʻofaʻaki feilaulauʻi-kita. Te nau ʻofa ʻo hangē ko ia naʻe fai ʻe Sīsuú, pea naʻá ne foaki loto-lelei ʻene moʻuí maʻa hono ngaahi kaumeʻá. Naʻá ne akoʻi ʻene kau ākongá ke nau ʻofa ki he ʻOtuá pea ke nau feʻofaʻaki, ʻo hangē pē ko ʻene ʻofaʻi kinautolú. Ko e ʻofa tuʻu-ki-muʻa ʻoku nau fefakahāhāʻakí ko e ʻulungāanga fakaefakaʻilonga tefito ia ʻoku malava ke ʻiloʻiʻaki ʻa e kau Kalisitiane moʻoní. (Sione 13:34, 35; 15:12, 13) Naʻe aʻu ʻo fakahinohino ʻe Sīsū kiate kinautolu ke nau ʻofa ki honau ngaahi filí.—Mātiu 5:44.
11. Naʻe anga-fēfē hono fakahāhā ʻe Sīsū ʻa e ʻofá fakatouʻosi ki he ʻOtuá mo e faʻahinga ʻo e tangatá?
11 Naʻe fokotuʻu ʻe Sīsū ʻa e faʻifaʻitakiʻanga haohaoa ʻi hono fakahāhā ʻa e ʻofá. ʻI he hoko ko ha meʻamoʻui laumālie māfimafi ʻi hēvaní, naʻá ne tali fiefia ʻa e faingamālie ke fakalahi atu ʻa e ngaahi meʻa ʻa ʻene Tamaí ʻi he māmaní. Tuku kehe ʻene foaki ʻene moʻui fakaetangatá ke lava ke moʻui taʻengata ai ʻa e niʻihi kehé, naʻá ne fakahāhaaʻi ki he kakaí ʻa e founga ʻoku totonu ke nau moʻui aí. Naʻá ne anga-fakatōkilalo, anga-ʻofa, mo anga-fakaʻatuʻi, ʻo tokoniʻi ʻa e faʻahinga naʻe mafasia mo lōmekiná. Naʻá ne toe ʻoatu ʻa e “ngaahi lea ʻo e moʻui taʻengata,” ʻo tokoniʻi taʻehelaʻia ʻa e niʻihi kehé ke nau hoko ʻo ʻiloʻi ʻa Sihova.—Sione 6:68.
12. Ko e hā ʻoku malava ai ke pehē ko e ʻofa ki he ʻOtuá mo e kaungāʻapí ʻokú na fehokotaki taʻealafakamavaheʻí?
12 Ko hono moʻoní, ko e ʻofa ki he ʻOtuá mo e kaungāʻapí ʻokú na fehokotaki taʻealafakamavaheʻi. Naʻe fakahaaʻi ʻe he ʻapositolo ko Sioné: “Ko ʻofa ko e tupu mei he ʻOtua ia . . . Kapau ʻe pehe ʻe ha taha, ʻOku ou ʻofa ki he ʻOtua, ʻosi ʻoku ne fehiʻa ki hono tokoua, ko e loi ia: he ko ia ʻoku ʻikai te ne ʻofa ki hono tokoua, ʻa ia kuo ne mātaʻi, talaʻehai ʻoku ne lava ke ʻofa ki he ʻOtua, ʻa ia kuo teʻeki ke ne mātaʻi?” (1 Sione 4:7, 20) Ko Sihová ʻoku hoko fakatouʻosi ko e matavai mo e fakasino tonu ʻo e ʻofá. Ko e meʻa kotoa pē ʻokú ne faí ʻoku tākiekina ia ʻe he ʻofá. ʻOku tau ʻofá koeʻuhi kuo ngaohi kitautolu ʻi hono ʻīmisí. (Senesi 1:27) ʻI hono fakahāhā ʻa e ʻofa ki hotau kaungāʻapí, ʻoku tau fakahāhā ai ʻetau ʻofa ki he ʻOtuá.
Ke ʻOfa ʻOku ʻUhingá ke Talangofua
13. Ke tau ʻofa ki he ʻOtuá, ko e hā kuo pau ke tau ʻuluaki faí?
13 ʻE malava fēfē ke tau ʻofa ki he ʻOtuá, ʻa ia ʻoku ʻikai malava ke tau sio ki aí? Ko e ʻuluaki sitepu mātuʻaki mahuʻingá ko e feinga ke ʻiloʻi ia. Heʻikai malava ke tau ʻofa mo falala moʻoni ki ha sola. Ko ia ai, ʻoku fakalototoʻaʻi kitautolu ʻe he Folofola ʻa e ʻOtuá ke tau feinga ke ʻiloʻi ʻa e ʻOtuá ʻi hono lau ʻa e Tohi Tapú, ʻi he lotu, pea ʻi he feohi mo e faʻahinga kuo nau ʻosi ʻiloʻi mo ʻofa kiate iá. (Sāme 1:1, 2; Filipai 4:6; Hepelu 10:25) Ko e faaʻi Kōsipelí ʻoku tautefito ʻenau mahuʻingá, he ʻoku nau fakahaaʻi ʻa e ʻulungāanga ʻo Sihová ʻi heʻene tapua mai ʻi he moʻui mo e ngāue fakafaifekau ʻa Sīsū Kalaisí. Ko ʻetau holi ke talangofua ki he ʻOtuá pea ke faʻifaʻitaki ki hono ʻulungāangá ʻe tupu ia ʻo toe mālohi ange ʻi heʻetau hoko ʻo ʻiloʻi Iá pea houngaʻia ʻi he ʻofa ʻokú ne fakahāhaaʻi mai kiate kitautolú. ʻIo, ko e ʻofa ki he ʻOtuá ʻoku kau ki ai ʻa e talangofua.
14. Ko e hā ʻoku malava ai ke pehē ʻoku ʻikai ke fakamafasia ʻa e ngaahi lao ʻa e ʻOtuá?
14 ʻI he taimi ʻoku tau ʻofa ai ki ha faʻahinga tāutaha, ʻoku tau lāuʻilo ki he meʻa ʻoku nau saiʻia aí mo ʻikai saiʻia aí, pea ʻoku tau fakatatau ki ai ʻetau tōʻongá. ʻOku ʻikai te tau loto ke fakalotomamahiʻi ʻa e faʻahinga ko ia ʻoku tau ʻofa aí. “Ko eni ia ʻa e ʻofa ki he ʻOtua,” ko e tohi ia ʻa e ʻapositolo ko Sioné, “ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.” (1 Sione 5:3, 4a) ʻOku ʻikai te nau fakamafasia, pea ʻoku ʻikai te nau fuʻu lahi fau. ʻOku tataki ʻe he ʻofá hotau halá. ʻOku ʻikai fiemaʻu ia ke tau ako maʻuloto ha ngaahi fuʻu tuʻutuʻuni lahi fau ke tatakiʻaki ʻetau ngāue kotoa pē; ʻoku tataki kitautolu ia ʻe heʻetau ʻofa ki he ʻOtuá. ʻOku ʻikai ke fakamafasia ʻa e ngaahi lao ʻa e ʻOtuá, he ʻokú ne ʻomai kiate kitautolu ʻa e fiefia ke ngāue maʻá e faʻahinga ko ia ʻoku tau ʻofa moʻoni aí. Kapau ʻoku tau ʻofa ki he ʻOtuá, ko ha meʻa fakafiefia ia ke fai hono finangaló. ʻOku tau maʻu ai ʻa e hōifua ʻa e ʻOtuá, pea ʻoku tau maʻu ʻaonga tonu ai, ko ʻene fakahinohinó ʻoku ngāue maʻu pē ia ki heʻetau leleí.—Aisea 48:17.
15. Ko e hā te ne ueʻi kitautolu ke tau faʻifaʻitaki kia Sihová? Fakamatalaʻi.
15 ʻOku ueʻi kitautolu ʻe he ʻofa ki he ʻOtuá ke tau faʻifaʻitaki ki hono ngaahi ʻulungāangá. ʻI heʻetau ʻofa ʻi ha taha, ʻoku tau leleiʻia ʻi hono ngaahi ʻulungāangá pea feinga ke hangē ko iá. Fakakaukau atu ki he vahaʻangatae ʻi he vahaʻa ʻo Sihova mo Sīsuú. Naʻá na feohi ʻi hēvani ʻi he taʻu nai ʻe laui piliona. Ko e ʻofa loloto mo maʻa naʻe ʻi hona vahaʻá. Naʻe mātuʻaki haohaoa ʻa hono hokosi ʻe Sīsū ʻa ʻene Tamai fakahēvaní ʻo malava ai ke ne pehē ki heʻene kau ākongá: “Ko ia kuo ne mātā au, kuo ne mātā ʻa e Tamai.” (Sione 14:9) ʻI heʻetau maʻu ʻa e ʻilo mo e houngaʻia kia Sihova mo hono ʻAló, ʻoku ueʻi ai kitautolu ke tau hangē ko kinauá. Ko ʻetau ʻofa kia Sihová, fakataha mo e tokoni ʻa hono laumālie māʻoniʻoní, te ne fakaivia kitautolu ke tau “huʻihuʻi ʻa e motuʻa tangata, mo ʻene ngaahi falengā ngaue; pea [tau] ʻai ʻa e tangata foʻou.”—Kolose 3:9, 10; Kaletia 5:22, 23.
ʻOku Ngāue ʻa e ʻOfá
16. ʻOku anga-fēfē hono fakahāhā ʻa e ʻofa ki he ʻOtuá mo e kaungāʻapí ʻe heʻetau ngāue fakamalangá mo e ngāue fakafaiakó?
16 ʻI he tuʻunga ko e kau Kalisitiané, ʻoku tau fakaʻatā ʻetau ʻofa ki he ʻOtuá mo e kaungāʻapí ke ne ueʻi kitautolu ke tau kau ki he ngāue fakamalanga ʻo e Puleʻangá pea mo e ngaohi-ākongá. ʻI he fai peheé, ʻoku tau fakahōifuaʻi ai ʻa Sihova ko e ʻOtuá, “ʻa ʻEne ʻAfio ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Timote 2:3, 4) ʻE lava ke tau maʻu ai ʻa e fiefia ʻi hono tokoniʻi ʻa e niʻihi kehé ke nau ʻai ʻa e lao ʻa Kalaisí ke tongi ʻi honau lotó. Pea ʻoku tau fiefia ke sio ki he liliu honau ngaahi ʻulungāangá ke tapua atu ai ʻa e ngaahi ʻulungāanga fakaʻotua ʻo Sihová. (2 Kolinito 3:18) Ko hono moʻoní, ke tokoniʻi ʻa e niʻihi kehé ke nau hoko ʻo ʻiloʻi ʻa e ʻOtuá ko e meʻaʻofa mahuʻinga lahi taha ia ʻoku malava ke tau foaki kiate kinautolú. Ko e faʻahinga ko ia ʻoku nau tali ʻa e kaumeʻa mo Sihová ʻe malava ke nau maʻu ia ʻi he kotoa ʻo ʻitānití.
17. Ko e hā ʻoku fakapotopoto ai ke fakatupulekina ʻa e ʻofa ki he ʻOtuá mo e kaungāʻapí kae ʻikai ki he ngaahi meʻa fakamatelié?
17 ʻOku tau moʻui ʻi ha māmani ʻoku fakamahuʻingaʻi lahi ai ʻa e ngaahi meʻa fakamatelié, naʻa mo hono ʻofaʻi. Ka, ʻoku ʻikai ke tuʻuloa ʻa e ngaahi meʻa fakamatelié. ʻOku malava ke kaihaʻasi kinautolu pe keina ʻe he popó. (Mātiu 6:19) ʻOku fakatokanga mai ʻa e Tohi Tapú kiate kitautolu: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:16, 17) ʻIo, ʻe kei ʻi ai pē ʻa Sihova ia ʻo taʻengata, pea ʻe pehē pē mo e faʻahinga ko ia ʻoku nau ʻofa mo tauhi kiate iá. Ko ia ai, ʻikai ʻoku fakapotopoto ange ke fakatupulekina ʻa e ʻofa ki he ʻOtuá pea ki he kakaí ʻo lahi ange ia ʻi he tuli ki he ngaahi meʻa ʻo e māmaní, ʻa ē ʻi he malumalu ʻo e tuʻunga lelei tahá ʻoku fakataimi pē?
18. Naʻe anga-fēfē hono fakahāhā ʻe ha misinale ʻe taha ʻa e ʻofa feilaulauʻi-kitá?
18 Ko e faʻahinga ʻoku nau tuli ki he ʻofá ʻoku nau ʻoatu ai ʻa e fakahīkihiki kia Sihova. Fakakaukau angé kia Sonia, ko ha misinale ʻi Senikolo. Naʻá ne ako ʻa e Tohi Tapú mo ha fefine ko hono hingoá ko Heidi, ʻa ia naʻá ne maʻu ʻa e HIV mei hono husepāniti taʻetuí. ʻI he hili ʻa e mate ʻa hono husepānití, naʻe papitaiso ʻa Heidi, ka naʻe vave ʻa e tōlalo ʻene moʻuí, pea naʻá ne tokoto falemahaki ai ʻi he ʻeitisí. ʻOku fakamatala ʻa Sonia: “Naʻe fai ʻe he kau ngāue ʻo e falemahakí ʻenau lelei tahá, ka naʻa nau fuʻu tokosiʻi. Naʻe kole ki ha kau ngāue pole mei he fakatahaʻangá ke nau tokangaʻi ʻene ngaahi fiemaʻu ʻi he falemahakí. ʻI he pō hono uá, naʻá ku nofo ai ʻi ha kiʻi fala ʻi hono veʻe mohengá ʻo tokoni ki hono tokangaʻi iá ʻo aʻu ki heʻene maté. Naʻe pehē ʻe he toketā pulé: ‘Ko ʻemau palopalema lahi tahá ia ko hono faʻa liʻaki ʻo aʻu pē ki he ngaahi kāingá ʻa e ngaahi mēmipa ʻo e fāmilí ʻi he taimi ʻoku nau ʻilo ai ʻoku nau maʻu ʻa e ʻeitisí. Ko e hā ʻoku mou loto-lelei ai kimoutolu, ʻa ē ʻoku ʻikai te mou kāingá, ʻikai mei he fonua tatau, naʻa mo e ʻikai mei he lanu tatau, ke tuku atu kimoutolu ki he tuʻunga fakatuʻutāmakí?’ Naʻá ku fakamatala ʻo pehē, kiate aú, naʻe hoko ʻa Heidi ko hoku tokoua moʻoni, ʻi he tuʻunga vāofi ʻo hangē pē ʻokú ma faʻē-taha tamai-tahá. ʻI heʻeku hoko ʻo ʻiloʻi hoku tokoua foʻou ko ʻení, naʻá ku lau ko ha meʻa fakafiefia ke tokangaʻi ia.” Ko e meʻa mālié, naʻe ʻikai ke faingataʻaʻia ʻa Sonia ia ʻi ha faʻahinga nunuʻa fakatupu mahaki mei heʻene ngaahi feinga ʻofa ke tokangaʻi ʻa Heidi.
19. ʻI hono ʻai ʻa e lao ʻa e ʻOtuá ʻi hotau lotó, ko e hā ʻoku totonu ke tau ngāueʻaongaʻakí?
19 ʻOku lahi ʻa e ngaahi fakatātā ʻo e ʻofa feilaulauʻi-kitá ʻoku lava ke maʻu ʻi he lotolotonga ʻo e kau sevāniti ʻa Sihová. ʻOku ʻikai ha lao ia kuo tohi ke fakapapauʻiʻaki ʻa e kakai ʻa e ʻOtuá ʻi he ʻahó ni. ʻI hono kehé, ʻoku tau sio ki he fakahoko ʻo e meʻa ʻoku tohi ʻi he Hepelu 8:10: “ʻOku folofola ʻa e ʻEiki, he ko eni ia ʻa e fuakava ʻa ia te u fokotuʻu maʻa haʻa Isileli hili ʻa e taimi ko ia; Te u ʻai ʻeku ngaahi lao ki honau ʻatamai, pea te u tohi tongi ia ki honau loto: pea te u nofo au ko honau ʻOtua, pea te nau nofo kinautolu ko hoku kakai.” ʻOfa ke tau koloaʻaki maʻu pē ʻa e lao ʻo e ʻofá ʻa ia kuo tongi ʻe Sihova ʻi hotau lotó, ʻo ngāueʻaongaʻaki ʻa e faingamālie kotoa pē ke fakahāhā ai ʻa e ʻofá.
20. Ko e hā ko ha koloa mahuʻinga taʻehanotatau ai ʻa e lao ʻa Kalaisí?
20 Ko ha fiefia lahi ē ke tauhi ki he ʻOtuá fakataha mo ha fetokouaʻaki ʻi māmani lahi ʻoku fakahāhā ai ʻa e ʻofa ko iá! Ko e faʻahinga ko ia ʻoku nau ʻai ʻa e lao ʻa Kalaisí ʻi honau lotó ʻoku nau maʻu ha koloa mahuʻinga taʻehanotatau ʻi he māmani taʻeʻofa ko ʻení. ʻOku ʻikai ngata pē ʻi heʻenau maʻu ʻa e ʻofa ʻa Sihová ka ʻoku nau toe fiefia ʻi he haʻi mālohi ʻo e ʻofá ʻi he fetokouaʻakí. “Vakai, hono ʻikai lelei, pea hono ʻikai sai ke nonofo ha kainga, ʻo fakataha foki!” Neongo ʻoku nofo ʻa e Kau Fakamoʻoni ʻa Sihová ʻi he ngaahi puleʻanga lahi, lea ʻi he ngaahi lea lahi, pea kau ki he ngaahi anga fakafonua lahi, ʻoku nau maʻu ʻa e fāʻūtaha fakalotu ʻoku ʻikai hano tatau. ʻOku ʻomai ʻe he fāʻūtaha ko ení ʻa e hōifua ʻa Sihová. Naʻe tohi ʻe he tokotaha-tohi-sāmé: “Ko e potu ia [lotolotonga ʻo ha kakai ʻoku fāʻūtaha ʻi he ʻofá] naʻe tuʻutuʻuni ai ʻe Sihova hono tapuekina, ko e moʻui taʻengata.”—Sāme 133:1-3.
ʻE Lava Ke Ke Tali?
• Naʻe mahuʻinga fēfē ʻa e Fekau ʻe Hongofulú?
• Ko e hā ʻa e lao naʻe tongi ʻi he lotó?
• Ko e hā ʻa e ngafa ʻoku fakahoko ʻe he ʻofá ʻi he “lao ʻa Kalaisi”?
• ʻI he ngaahi founga fē ʻe lava ke tau fakahāhā ai ʻa ʻetau ʻofa ki he ʻOtuá mo e kaungāʻapí?
[Fehuʻi ki he Ako]
[Fakatātā ʻi he peesi 25]
Naʻe maʻu ʻe he kau ʻIsilelí ʻa e ngaahi lao naʻe tongi ʻi ha ongo maka lafalafa
[Fakatātā ʻi he peesi 26]
ʻOku maʻu ʻe he kau Kalisitiané ʻa e lao ʻa e ʻOtuá ʻi honau lotó
[Fakatātā ʻi he peesi 28]
Ko Sonia mo ha taʻahine Senikolo ʻi he fakataha-lahi fakavahe 2004