“Naʻe mei Lava ke Fakatauʻatāinaʻi Vave Kinautolu”

KO Geneviève De Gaulle, ʻa e ʻilamutu ʻo Charles de Gaulle, ko e palesiteni ia ki muʻa ʻo Falaniseé, naʻá ne hoko ʻo ʻiloʻi fakafoʻituitui ʻa e Kau Fakamoʻoni ʻa Sihová ʻi he kemi fakamamahi Nasí ʻi Ravensbrück, ʻi Siamane tokelau. Naʻá ne hiki ʻa e ngaahi lea ʻi ʻolungá ʻi ha tohi ʻi ʻAokosi ʻo e 1945.

Ko e kemi fakamamahi ʻi Auschwitz, Pōlaní, naʻe fakatauʻatāinaʻi ia ʻi Sanuali 27, 1945. Talu mei he 1996, ko e ʻaho ko ení kuo hoko ko ha ʻaho fakamanatu ia ʻi Siamane maʻá e kau maʻukovia ʻo e Pule Hono Tolu ʻa Hitilaá.

Lolotonga ha lea fakamanatu fakapuleʻanga ʻi Sanuali 27, 2003, ko e palesiteni ʻo e Fale Alea Fakapuleʻanga ʻo Baden-Württemberg, ʻa Peter Straub, naʻá ne fakamatala: “Ko e kotoa ʻo e faʻahinga naʻa nau faingataʻaʻia ʻi he fakatangá koeʻuhi ko ʻenau ngaahi tui fakalotú pe fakapolitikalé pea naʻa nau loto-lelei ke tali ʻa e maté kae ʻikai ko e tukuloló, ʻoku taau mo kinautolu ʻa ʻetau fakaʻapaʻapa lahí, ko e fakaʻapaʻapa hangē ko ení ʻoku faingataʻa ke fakahaaʻi ia ʻi ha ngaahi foʻi lea. Ko e Kau Fakamoʻoni ʻa Sihová ʻa e lotu pē ʻe taha naʻa nau fakafisi kakato ke fai ki he ngaahi kouna ʻa e founga-pule ʻa Hitilaá: Naʻe ʻikai te nau hiki honau nimá ke fai ʻa e salute faka-Hitilaá. Naʻa nau fakafisi ke tukupā ʻenau mateaki ki he ‘Führer mo e Puleʻangá,’ hangē pē ko ʻenau fakafisi ke fakahoko ʻa e ngāue fakakautaú mo e leipá. Pea ko ʻenau fānaú naʻe ʻikai te nau kau ʻi he Ngaʻunu ʻa e Toʻutupu ʻa Hitilaá.”

Naʻe pehē ʻe Sīsū Kalaisi ʻo fekauʻaki mo hono kau muimuí: “ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:16) Ko ia ai, ko e tuʻumaʻu ʻa e Kau Fakamoʻoni ʻa Sihová naʻe fakatuʻunga ʻataʻatā pē ʻi he ngaahi ʻuhinga fakalotú. Naʻe hoko atu ʻe Straub: “Ko e Kau Fakamoʻoni ʻa Sihová, ʻa ia naʻe pau ke nau tui ha tapa tolu vāleti ʻi honau valá ko e kau pōpula kinautolu ʻi he kemi fakamamahí, ʻa e faʻahinga pē taha naʻa nau mei lava ʻo fakangata ʻa e mei malava nai ke fakapoongi tonu kinautolú. Ko e fakamoʻoni hingoa ʻi ha talaki fakahāhā ʻo fakafisingaʻi ʻenau tuí naʻe mei feʻunga ʻānoa ia.”

Ki he fuʻu konga lahi ʻo e Kau Fakamoʻoní, ko hono fakafisingaʻi ʻenau tuí naʻe ʻikai ko ha meʻa ia ke nau filingaua ki ai. Ko ia ai, fakafuofua ki he toko 1,200 ʻo kinautolu naʻe mate lolotonga ʻa e vahaʻa taimi ʻo e kau Nasí. Naʻe fakapoongi ʻa e toko 270 ki heʻenau talitekeʻi ke kau ʻi he ngaahi meʻa fakakautaú. Naʻa nau fai ʻa e meʻa lahi ange ia ʻi he leaʻaki pē ʻa e fakamatala: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Ngāue 5:29.

Naʻe ʻikai ko ha kakai mahulu atu ʻa e Kau Fakamoʻoni ʻa Sihová, hangē ko ia naʻe fakatokangaʻi ʻe Ulrich Schmidt, ko e palesiteni ʻo e Fale Alea Fakapuleʻanga ʻo Rhine-Westphalia Tokelaú. ʻI he lave ki heʻene leá, naʻe ui kinautolu ʻe he polosiua ko e Landtag Intern ko e “kakai anga-maheni, ʻa ia ʻi heʻenau muimui ki honau konisēnisí, naʻa nau tuʻumaʻu ki heʻenau ngaahi tui fakalotú, fakahaaʻi ʻa e loto-toʻa fakasiviliane pea nau fakafepakiʻi ʻa e fakakaukau faka-Nasí koeʻuhi ko ʻenau tuipau faka-Kalisitiané.” ʻE lava ke tau fakapapauʻi ʻoku fiefia ʻa Sihova ʻi he faʻahinga kotoa ʻoku nau pipiki mateaki kiate ia ʻi he malumalu ʻo e ngaahi tuʻunga faingataʻá. ʻI he Palovepi 27:11 (PM), ʻoku tau lau ai: “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.”

[Maʻuʻanga ʻo e Tā ʻi he peesi 30]

Courtesy of United States Holocaust Memorial Museum