Ngaahi Fehuʻi mei he Kau Lautohí

Ko e hā ʻa e makatuʻunga ʻoku ʻi ai ki he pehē ko e ngaahi kupuʻi lea hangē ko e “aia oku i ai toko taha be ae tae faa mate” mo e tokotaha “kuo teeki mamata ki ai ha tagata, bea ikai jii te ne faa mamata ki ai” ʻoku ʻuhinga iá kia Sīsū kae ʻikai kia Sihova ko e ʻOtuá?

Naʻe tohi ʻe he ʻapositolo ko Paulá: “Aia te ne fakaha [eni] i hono kuoga oona, koe Eiki monuia, mo [Pule] taha be, koe Tuʻi ki he gaahi tui, moe Eiki ki he gaahi eiki; Aia oku i ai toko taha be ae tae faa mate, oku nofoia eia ae māma tae faa fotuaki; aia kuo teeki mamata ki ai ha tagata, bea ikai jii te ne faa mamata ki ai.”—1 Timote 6:​15, 16, PM.

ʻOku fakaʻuhinga fakalūkufua ʻa e kau fakamatala Tohi Tapú: ‘ʻOku lava fēfē ke tuhu ʻa e ngaahi kupuʻi lea hangē ko e “Aia oku i ai toko taha be ae tae faa mate,” ko e “[Pule] taha be,” pea ko e tokotaha “aia kuo teeki mamata ki ai ha tagata, bea ikai jii te ne faa mamata ki ai” ki ha toe taha kehe kae ʻikai ko e Māfimafi-Aoniú?’ Ko e moʻoni, ko e ngaahi kupuʻi lea peheé ʻe lava ke ngāueʻaki ia ke fakamatalaʻiʻaki ʻa Sihova. Kae kehe, ʻoku fakahaaʻi ʻi he potutohí ʻi he 1 Timote 6:​15, 16 (PM) naʻe lave fakahangatonu ai ʻa Paula ia kia Sīsū.

ʻI he ngataʻanga ʻo e 1Ti 6 veesi 14, ʻoku lave ai ʻa Paula “ki he fakaha mai a ho tau Eiki ko Jisu Kalaisi.” (1 Timote 6:​14, PM) Ko ia ai, ʻi he taimi ʻoku tohi ai ʻe Paula ʻi he 1Ti 6 veesi 15 ʻo pehē “te ne fakaha [eni] i hono kuoga oona,” ʻokú ne lave ai ki ha fakahā ʻo Sīsū, ʻikai ʻo Sihova ko e ʻOtuá. Ko hai leva ʻa e “[Pule] taha be”? ʻOku hā ngali ʻuhinga lelei ke fakaʻosiʻaki ko Sīsū ʻa e Pule naʻe lave ki ai ʻa Paulá. Ko e hā hono ʻuhingá? ʻOku ʻai ʻe he potutohí ʻo hā mahino ʻoku fakahoa ʻe Paula ʻa Sīsū ki he kau pule fakaetangatá. Ko Sīsū moʻoni, hangē ko ia naʻe tohi ʻe Paulá “koe Tuʻi ki he gaahi tui [faʻahinga ʻo e tangatá], moe Eiki ki he gaahi eiki [faʻahinga ʻo e tangatá].” a ʻIo, ʻi hono fakahoa kia kinautolú, ko Sīsū ʻa e “[Pule] taha be.” Kuo ʻoange kia Sīsū ʻa e “hau, mo ha langilangi, mo ha pule, koeʻuhi ke tauhi kiate ia ʻe he ngaahi kakai, matakali, mo faʻahinga lea kehekehe.” (Taniela 7:14) ʻOku ʻikai ha pule fakaetangata ʻe lava ke ne fai ʻa e taukaveʻi ko iá!

Fēfē ʻa e kupuʻi lea “Aia oku i ai toko taha be ae tae faa mate”? ʻOku toe ʻomai heni ha fakahoa ʻi he vahaʻa ʻo Sīsū mo e ngaahi tuʻi fakaetangatá. ʻOku ʻikai ha kau pule fakaetangata ʻe lava ke nau taukaveʻi kuo ʻoange kia kinautolu ʻa e taʻefaʻamaté, ka ʻoku lava ia ʻe Sīsū. Naʻe tohi ʻe Paula: “I he e tau ilo kuo fokotuu a Kalaisi mei he bekia, bea e ikai toe bekia ia; e ikai toe buleʻi ia e he mate.” (Loma 6:​9, PM) Ko ia ai, ko Sīsū ʻa e ʻuluaki tokotaha ke fakamatalaʻi ʻi he Tohi Tapú ʻokú ne maʻu ʻa e meʻaʻofa ʻo e taʻefaʻamaté. Ko e moʻoni, ʻi he taimi ʻo e tohi ʻa Paulá, ko Sīsū pē taha ʻa e tokotaha naʻá ne maʻu ʻa e moʻui taʻealaʻauhá.

ʻOku totonu ke toe manatuʻi naʻe mei hala kia Paula ke ne pehē ko Sihova ko e ʻOtuá pē taha naʻá ne maʻu ʻa e taʻefaʻamaté, koeʻuhí ko Sīsū foki naʻe taʻefaʻamate ʻi he taimi naʻe tohi ai ʻe Paula ʻa e ngaahi lea ko iá. Ka naʻe lava ke pehē ʻe Paula ko Sīsū pē taha naʻe taʻefaʻamate ʻi hono fakahoa ki he kau pule fakaemāmaní.

ʻIkai ko ia pē, ʻoku moʻoni ʻaupito ʻi he hili ʻa e toetuʻu mo e ʻalu hake ʻa Sīsū ki hēvaní, ʻe lava ke fakamatalaʻi ia ko e tokotaha “aia kuo teeki mamata ki ai ha tagata, bea ikai jii te ne faa mamata ki ai.” Ko e moʻoni, ko ʻene kau ākonga paní te nau mātā ʻa Sīsū hili ʻenau maté tonu pea hoko atu ai ʻenau toetuʻu ki hēvani ʻi he tuʻunga ko e ngaahi meʻamoʻui laumālié. (Sione 17:24) Ka ʻoku ʻikai ha tangata ʻi he māmaní ʻe sio kia Sīsū ʻi hono tuʻunga lāngilangí. Ko ia ai, ʻe lava moʻoni ke fakamatalaʻi ʻo pehē talu mei he toetuʻu mo e ʻalu hake ʻa Sīsuú ‘kuo teeki ai ha tagata’ ʻe mamata moʻoni kia Sīsū.

Ko e moʻoni, ʻi hono ʻuluaki sivisiviʻí, ʻe hā nai ʻo hangē ko e ngaahi fakamatala ʻoku maʻu ʻi he 1 Timote 6:​15, 16 ʻoku lava ke ngāueʻaki ia ki he ʻOtuá. Ka ko e potutohi ʻo e ngaahi lea ʻa Paulá—fakataha mo e poupou ʻa e ngaahi konga Tohi Tapu kehé—ʻoku fakahaaʻi ai naʻe ʻuhinga ʻa Paulá kia Sīsū.

[Fakamatala ʻi lalo]