Te Tau ʻAʻeva ʻi he Huafa ʻo Sihova ko Hotau ʻOtuá
Te Tau ʻAʻeva ʻi he Huafa ʻo Sihova ko Hotau ʻOtuá
“Te [tau] eveeva i he huafa ʻo Jihova ko [hotau] Otua o lauikuoga mo taegata.”—MAIKA 4:5, PM.
1. ʻI he fekauʻaki mo e ʻulungāangá, ko e hā ʻa e tuʻunga naʻe ʻi he ʻaho ʻo Noá, pea naʻe anga-fēfē ʻa e kehe ʻa Noá?
KO E fuofua tangata ʻoku lave ki ai ʻi he Tohi Tapú naʻe ʻaʻeva mo e ʻOtuá ko ʻĪnoke. Ko hono uá ko Noa. ʻOku tala mai ʻe he lēkōtí kiate kitautolu: “Koe tagata agatonu mo haohaoa a Noa i hono toutagata, bea nae aeva a Noa moe Otua.” (Senesi 6:9, PM) ʻI he aʻu mai ki he taimi ʻo Noá, naʻe mavahe ʻa e faʻahinga ʻo e tangatá ia ʻi he tuʻunga fakalūkufuá mei he lotu maʻá. Naʻe ʻai ʻo toe kovi ange ʻa e tuʻunga koví ʻe he kau ʻāngelo taʻefaitōnunga ko ia naʻa nau fai ʻa e ngaahi fehokotaki taʻefakanatula mo ha kau fefine pea fakatupu mai ai ʻa e faʻahinga naʻe ui ko e kau Nefilimí, “ko e kau toʻa,” pe “ko e faʻahinga ongoongo[a],” ʻo e ngaahi ʻaho ko iá. Tā neʻineʻi ke hoko ʻa e māmaní ʻo fonu ʻi he fakamālohí! (Senesi 6:2, 4, 11) Ka, naʻe kei fakamoʻoniʻi pē ʻe Noa ʻene taʻemelé pea “naʻa ne malangaʻaki ʻa e maʻoniʻoni.” (2 Pita 2:5) ʻI hono fekau ʻe he ʻOtuá kiate ia ke langa ha ʻaʻake ke fakahaofi ʻa e moʻuí, naʻe talangofua ʻa Noa “ʻilonga ha meʻa naʻe tuʻutuʻuni kiate ia ʻe he ʻOtua, naʻa ne fai ia.” (Senesi 6:22) Ko e moʻoni, naʻe ʻaʻeva ʻa Noa mo e ʻOtuá.
2, 3. Ko e hā ʻa e faʻifaʻitakiʻanga lelei naʻe tokonaki mai ʻe Noa maʻatautolu ʻi he ʻaho ní?
2 Naʻe fakakau ʻe Paula ʻa Noa ʻi heʻene fakahokohoko ʻa e kau fakamoʻoni faitōnungá ʻi heʻene tohi: “Ko tui naʻe ngaue ai ʻa Noa, ʻi hono valokia ki ha ngaahi meʻa kuo teʻeki hamai; pea ʻi heʻene manavahe ki ai, naʻa ne faʻu ʻa e Aake moʻo fakamoʻui hono ʻapi: ʻio, ko ia ia naʻa ne fakahalaia ai ʻa mamani, ʻo ne hoko ko e ʻea ki he maʻoniʻoni fakatui.” (Hepelu 11:7) Ko ha faʻifaʻitakiʻanga fisifisimuʻa ē! ʻI he falala pau ʻe hoko moʻoni ʻa e ngaahi folofola ʻa Sihová, naʻe fakamoleki ʻe Noa ʻa e taimi, ivi mo e ngaahi koloa koeʻuhi ke fakahoko ʻa e ngaahi fekau ʻa e ʻOtuá. ʻI ha tuʻunga meimei tatau, ko e tokolahi ʻi he ʻahó ni ʻoku nau sītuʻa mei he ngaahi faingamālie fakamāmani ʻi he māmani ko ʻení pea fakamoleki ʻa honau taimí, iví mo e koloá ʻi he talangofua ki he ngaahi fekau ʻa Sihová. ʻOku taau ke fakatokangaʻi ʻenau tuí pea ʻe taki atu ia ki honau fakamoʻui ʻo kinautolu tonu pea pehē ki ha niʻihi kehe.—Luke 16:9; 1 Timote 4:16.
3 Ko hono ngāueʻi ʻo e tuí kuo pau naʻe faingataʻa kia Noa mo hono fāmilí ʻo hangē pē ko ʻene faingataʻa kia ʻĪnoké, ʻa e kui ʻa Noá, ʻa ia naʻe lāulea ki ai ʻi he kupu ki muʻá. ʻI he ʻaho ʻo Noá pea pehē ki he ʻaho ʻo ʻĪnoké, naʻe tokosiʻi ʻaupito ʻa e kau lotu moʻoní—ko e toko valu pē naʻe fakamoʻoniʻi ʻenau faitōnungá pea nau hao ʻi he Lōmakí. Naʻe malangaʻaki ʻe Noa ʻa e māʻoniʻoní ʻi ha māmani fakamālohi mo ʻulungāanga taʻetaau. ʻIkai ngata aí, ko ia mo hono fāmilí naʻa nau faʻu ha fuʻu ʻaʻake papa ʻi he teuteu ki ha lōmaki ʻi māmani lahi, neongo naʻe ʻikai sio ha taha ia ʻi ha lōmaki pehē ki muʻa. Kuo pau pē naʻe mātuʻaki hā ngali kehe ia ki he faʻahinga naʻe mamata kiate kinautolú.
4. Ko e hā ʻa e hala ʻa e toʻutangata ʻo Noá naʻe fakaeʻa ʻe Sīsuú?
4 Ko e meʻa fakatupu tokangá, ʻi he taimi naʻe lave ai ʻa Sīsū ki he ngaahi ʻaho ʻo Noá, naʻe ʻikai te ne lea ʻo kau ki he fakamālohí, ko e lotu loí, pe ʻulungāanga taʻetāú—neongo ko e ngaahi meʻa kovi ʻaupito ia. Ko e hala naʻe fakaeʻa ʻe Sīsuú ko e fakafisi ʻa e kakaí ke tokanga ki he fakatokanga naʻe ʻoatú. Naʻá ne pehē naʻa nau “kai mo inu, ʻo nau maʻu uaifi mo maʻu husepaniti, ʻo aʻu ki he ʻaho ko ia naʻe hu ai ʻa Noa ki he aake.” Ko e kaí, inú, malí, foaki ke malí—ko e hā hono kovi ʻo e meʻa ko iá? Naʻa nau moʻui pē ʻi he moʻui “anga-mahení”! Ka naʻe tuʻunuku mai ha lōmaki, pea naʻe malangaʻaki ʻe Noa ʻa e māʻoniʻoní. Naʻe tonu ke hoko ʻene ngaahi leá mo hono ʻulungāangá ko ha fakatokanga kiate kinautolu. Neongo ia, “naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe.”—Mātiu 24:38, 39.
5. Ko e hā ʻa e ongo ʻulungāanga naʻe fiemaʻu kia Noa mo hono fāmilí?
5 Ko e vakai atu ki he ngaahi taimi ko iá, ʻoku tau sio ai ki he fakapotopoto ʻa e ʻalunga ʻo Noá. Kae kehe, ʻi he ngaahi ʻaho ki muʻa ʻi he Lōmakí, naʻe fiemaʻu ʻa e loto-toʻa kae hoko ʻo kehe mei he tokotaha kehe kotoa. Naʻe fiemaʻu ʻa e tuipau mālohi kia Noa mo hono fāmilí ki hono langa ʻa e fuʻu ʻaʻaké pea fakafonu ia ʻaki ʻa e faʻahinga kehekehe ʻo e fanga manú. Naʻe ʻi ai ha niʻihi ʻo e kiʻi kakai tokosiʻi faitōnunga ko iá ne nau fakaʻamu ʻi ha taimi ke ʻoua te nau fuʻu eʻa pea nau moʻui pē ʻi he moʻui “anga-mahení”? Neongo kapau naʻe hoko ia ʻi ha mōmenti ʻi heʻenau fakakaukaú, naʻe ʻikai te nau fakavaivai ʻi heʻenau anga-tonú. ʻI he hili ha ngaahi taʻu lahi ʻaupito—fuoloa ange ia ʻi he taimi ʻe pau ke kātekina ʻe ha taha ʻo kitautolu ʻi he fokotuʻutuʻu ko ʻení—naʻe taki atu ai ʻa e tui ʻa Noá ki hono fakahaofi ia ʻi he Lōmakí. Kae kehe, naʻe fakahoko ʻe Sihova ʻa e fakamāú ki he kotoa ʻo e faʻahinga ko ia naʻa nau moʻui ʻi he moʻui “anga-mahení” pea ʻikai ke nau tokanga ki he ʻuhinga ʻo e taimi naʻa nau moʻui aí.
Toe Uesia ʻe he Fakamālohí ʻa e Faʻahinga ʻo e Tangatá
6. ʻI he hili ʻa e Lōmakí, ko e hā ʻa e tuʻunga naʻe kei ʻi aí?
6 ʻI he foki hifo ʻa e ngaahi vai ʻo e Lōmakí, naʻe maʻu ʻe he faʻahinga ʻo e tangatá ha kamata foʻou. Kae kehe, naʻe kei taʻehaohaoa pē ʻa e faʻahinga ʻo e tangatá, pea “ko e filioʻi ʻo e loto ʻo e tangata” naʻe hokohoko mai ʻene “kovi mei heʻene tamasiʻi.” (Senesi 8:21) ʻIkai ngata aí, neongo naʻe ʻikai ke toe malava ʻa e kau tēmenioó ke liliu ki he ngaahi sino fakaetangatá, naʻa nau kei longomoʻui ʻaupito pē. Naʻe vave hono fakahāhaaʻi ʻe he māmani ʻo e faʻahinga anga-taʻefakaʻotua ʻo e tangatá ʻa ʻene ‘tokoto i he toko taha koví,’ pea ʻi he hangē tofu pē ko e ʻaho ní, naʻe pau ai ki he kau lotu moʻoní ke nau faitau mo e “ngaahi tuʻutuʻuni kākā ʻa e Tevolo.”—1 Sione 5:19, PM; Efeso 6:11, 12.
7. Naʻe anga-fēfē ʻa e fakautuutu ʻa e fakamālohí he māmaní ʻi he hili ʻa e Lōmakí?
7 Mei he taimi ʻo Nimiloté, naʻe toe hoko ai ʻa e māmaní he hili ʻa e Lōmakí ʻo fonu ʻi he fakamālohi ʻa e tangatá. Tupu mei he fakautuutu ʻa e tokolahí pea mo e fakalakalaka ʻo e tekinolosiá, kuo fakalalahi ai ʻa e fakamālohí ʻi he faai mai ʻa e taimí. ʻI he ngaahi taʻu ki muʻá, naʻe ʻi ai ʻa e heletā, ko e tao, ko e kaufana mo e ngahau, pea mo e saliote. ʻI he ngaahi taimi ki mui mai aí naʻe hoko mai ai ʻa e meʻafaná mo e meʻafana fonuá, hili iá ko e laifoló pea mo e ngaahi meʻafana fonua fakalakalaka ange ʻi he kamata mai ʻa e senituli hono 20. Naʻe fakahoko mai ʻe he Tau I ʻa Māmaní ʻa e ngaahi meʻatau fakamanavahē ange, hangē ko e vakapuná, ko e tangikē-taú, ko e vakaukú, pea mo e kasa koná. ʻI he tau ko iá, naʻe toʻo ai ʻe he ngaahi meʻataú ni ʻa e moʻui ʻe laui miliona. Naʻe taʻeʻamanekina ia? ʻIkai.
8. Kuo anga-fēfē hono fakahoko ʻo e Fakahā 6:1-4?
8 ʻI he taʻu 1914, naʻe fakanofo ai ʻa Sīsū ko e Tuʻi ʻo e Puleʻanga fakahēvani ʻo e ʻOtuá, pea naʻe kamata ai ʻa e “ʻaho ʻo e ʻEiki.” (Fakahā 1:10) ʻI ha vīsone ʻoku līpooti ʻi he tohi Fakahaá, ʻoku ʻasi ai ʻa Sīsū ʻi he tuʻunga ko ha Tuʻi ʻoku heka atu ʻi he ikuna ʻi ha hoosi hinehina. Ko e kau tangata heka-hoosi kehe ʻoku muimui mai ʻiate iá, ʻoku nau taki taha fakafofongaʻi ha mala ki he faʻahinga ʻo e tangatá. Ko e taha ʻo kinautolu ʻoku heka ʻi ha hoosi kulokula, pea naʻe tuku kiate ia “ke ne ʻave ʻa e melino mei mamani, pea ke ne ʻai ke nau fetāmateʻaki: pea naʻe ʻange kiate ia ha heletā lahi.” (Fakahā 6:1-4) Ko e hoosi ko ʻení mo e tokotaha-heka aí ʻokú na fakatātaaʻi ʻa e tau, pea ʻoku fakafofongaʻi ʻe he heletā lahí ʻa e tuʻunga fakaefakaʻauha taʻehanotatau ʻa e tau ʻi onopōní mo hono ngaahi meʻatau mālohí. Ko e ngaahi meʻatau ko ia ʻi he ʻaho ní ʻoku kau ki ai ʻa e ngaahi naunau fakaniukilia, ʻa ia ʻoku malava ʻe he meʻa taki taha ke ne fakaʻauha ʻa e kakai ʻe laui mano; ko e ngaahi lōketi ʻoku malava ke nau ʻave ʻa e ngaahi naunau ko iá ki he ngaahi tāketi ʻoku maile ʻe laui afe hono mamaʻó; pea pehē ki he ngaahi meʻatau fihi fakakemikale mo e ngaahi meʻatau siemu ʻoku fakaʻauha tavalé.
ʻOku Tau Tokanga ki he Ngaahi Fakatokanga ʻa Sihová
9. ʻOku fēfē ʻa e māmani ʻo e ʻaho ní ʻi hono fakahoa ki he māmani naʻe ʻi ai ki muʻa ʻi he Lōmakí?
9 ʻI he ngaahi ʻaho ʻo Noá, naʻe ʻomai ai ʻe Sihova ʻa e fakaʻauha ki he faʻahinga ʻo e tangatá koeʻuhi ko e tōtuʻa ʻa e fakamālohi ʻa e faʻahinga fulikivanu ʻo e tangatá ʻi hono tokoniʻi ʻe he kau Nefilimí. Fēfē ʻa e ʻahó ni? ʻOku siʻisiʻi ange ʻa e fakamālohí ia ʻi he māmaní he ʻahó ni ʻi he taimi ko iá? ʻIkai ʻaupito! ʻIkai ko ia pē, hangē tofu pē ko e ʻaho ʻo Noá, ko e kakai ʻi he ʻaho ní ʻoku nau hokohoko atu ʻi heʻenau meʻa pē ʻanautolu, ʻo feinga ke moʻui ʻi ha moʻui “anga-maheni,” ʻo fakafisi ke tokanga ki he ngaahi fakatokanga ʻoku fakaongo atú. (Luke 17:26, 27) Ko ia, ʻoku ʻi ai ha ʻuhinga ke veiveiua ai ki he teu ʻe Sihova ke toe ʻomai ʻa e fakaʻauha ki he faʻahinga ʻo e tangatá? ʻIkai.
10. (a) Ko e hā ʻa e fakatokanga ʻoku toutou ʻomai ʻi he kikite ʻa e Tohi Tapú? (e) Ko e hā ʻa e ʻalunga fakapotopoto pē ʻe taha ʻi he ʻaho ní?
10 ʻI he taʻu ʻe laui teau ki muʻa ʻi he Lōmakí, naʻe kikiteʻi ai ʻe ʻĪnoke ʻa e fakaʻauha kuo pau ke hoko mai ʻi hotau ʻahó. (Siutasi 14, 15) Naʻe toe lea foki ʻa Sīsū ʻo kau ki he fuʻu “mamahi lahi” ʻe hoko mai. (Mātiu 24:21) Naʻe fakatokanga ʻa e kau palōfita kehé ʻo fekauʻaki mo e taimi ko iá. (Isikeli 38:18-23; Taniela 12:1; Sioeli 2:31, 32) Pea ʻi he tohi ʻa Fakahaá, ʻoku tau lau ai ha fakamatala māʻalaʻala fekauʻaki mo e fakaʻauha fakaʻosi ko iá. (Fakahā 19:11-21) ʻI he tuʻunga fakatāutahá, ʻoku tau faʻifaʻitaki kia Noa pea ʻoku tau longomoʻui ʻi he tuʻunga ko e kau malanga ʻo e māʻoniʻoní. ʻOku tau tokanga ki he ngaahi fakatokanga ʻa Sihová pea mo tokoni anga-ʻofa ki hotau ngaahi kaungāʻapí ke fai ʻa e meʻa tatau. Ko ia, ʻi he hangē ko Noá, ʻoku tau ʻaʻeva mo e ʻOtuá. Ko e moʻoni, ʻoku mātuʻaki mahuʻinga ki ha taha pē ʻoku fie moʻui ke ne hanganaki ʻaʻeva mo e ʻOtuá. ʻE malava fēfē ke tau fai ia neongo ʻa e ngaahi tenge ʻoku tau fehangahangai mo ia ʻi he ʻaho taki tahá? ʻOku fiemaʻu ke tau fakatupulekina ʻa e tui mālohi ki hono fakahoko ʻo e taumuʻa ʻa e ʻOtuá.—Hepelu 11:6.
Hanganaki ʻAʻeva mo e ʻOtuá ʻi he Ngaahi Taimi Taʻemanongá
11. ʻI he founga fē ʻoku tau faʻifaʻitaki ai ki he kau Kalisitiane ʻo e ʻuluaki senitulí?
11 ʻI he ʻuluaki senitulí, naʻe lave ai ki he kau Kalisitiane paní ʻoku nau kau ki he “hala.” (Ngāue 9:2, PM) Ko ʻenau founga moʻuí kotoa naʻe fakatefito ia ʻi he tui kia Sihova pea mo Sīsū Kalaisi. Naʻa nau ʻaʻeva ʻi he hala naʻe ʻalu ai honau ʻEikí. ʻI he ʻahó ni, ʻoku fai ʻe he kau Kalisitiane faitōnungá ʻa e meʻa tatau.
12. Ko e hā naʻe hoko ʻi he hili hono fafanga fakaemana ʻe Sīsū ha fuʻu kakai tokolahí?
12 ʻOku hā ʻa e mahuʻinga ʻo e tuí ʻi ha meʻa naʻe hoko ʻi he lolotonga ʻo e ngāue fakafaifekau ʻa Sīsuú. ʻI he taimi ʻe taha, naʻe fafanga fakaemana ai ʻe Sīsū ha fuʻu kakai tokolahi ʻo fakafuofua ki he kakai tangata ʻe toko 5,000. Naʻe ofo ʻa e kakaí mo fiefia. Neongo ia, fakatokangaʻi ʻa e meʻa hoko mai naʻe hokó. ʻOku tau lau: “ʻI he vakai ʻa e kakai ki he mana kuo ne fai, naʻa nau pehē, Ko eni moʻoni ia ʻa e palōfita ka haʻu ki māmani. Ko ia ʻi he meaʻi ʻe Sisu, ʻoku nau teu ke haʻu ʻo ʻave fakamalohi ia, ʻo fakanofo ke tuʻi, pea ne toe ʻalu hake ki he moʻunga ʻe ia toko taha.” (Sione 6:10-15) Naʻá ne fononga ʻi he pō ko iá ki ha toe feituʻu ʻe taha. Ko e fakafisi ko ia ʻa Sīsū ke tali ʻa e tuʻunga-tuʻí ʻoku hangehangē naʻe siva ai ʻa e ʻamanaki ʻa e tokolahi. He ko ē, naʻá ne fakahāhaaʻi naʻá ne poto feʻunga ke hoko ko e tuʻi pea naʻá ne maʻu ʻa e mālohi ke fakalato ʻa e ngaahi fiemaʻu fakaesino ʻa e kakaí. Kae kehe, naʻe teʻeki ai ke hoko mai ʻa e taimi ʻa Sihova kiate ia ke pule ai ko e Tuʻí. ʻIkai ko ia pē, ko e Puleʻanga ʻo Sīsuú ʻe fakahēvani, ʻikai ke fakaemāmani.
13, 14. Ko e hā ʻa e fakakaukau naʻe fakahaaʻi ʻe he tokolahi, pea naʻe anga-fēfē hono ʻahiʻahiʻi ai ʻenau tuí?
13 Ka neongo ia, naʻe fakapapauʻi pē ʻe he kakaí ke nau muimui ʻia Sīsū pea nau ʻilo ia, hangē ko ia ʻoku leaʻaki ʻe Sioné, “ki he kauvai ʻe tahá.” Ko e hā naʻa nau muimui ai kiate ia hili ia ʻene fakaʻehiʻehi mei heʻenau ngaahi feinga ke fakanofo ia ko ha tuʻí? Naʻe fakahaaʻi ʻe he tokolahi ha fakakaukau fakakakano, ʻo lea fakamatematē fekauʻaki mo e ngaahi tokonaki fakamatelie naʻe fai ʻe Sihova ʻi he toafá ʻi he ʻaho ʻo Mōsesé. Naʻe fakahuʻunga ai ʻo pehē naʻe totonu ke hokohoko atu ʻe Sīsū hono fai ʻa e ngaahi tokonaki fakamatelie maʻanautolú. ʻI hono mahinoʻi ʻe Sīsū ʻenau ngaahi taumuʻa halá, naʻe kamata ke ne akoʻi kinautolu ki he ngaahi moʻoni fakalaumālié ʻa ia ʻe malava ke tokoni ki hono fakatonutonu ʻenau fakakaukaú. (Sione 6:17, 24, 25, 30, 31, 35-40, Ko e Kōsipeli ʻe Fā) ʻI he tali ki aí, naʻe muhu ʻa e niʻihi ʻo kau kiate ia, tautefito ki he taimi naʻá ne leaʻaki ai ʻa e fakatātā ko ʻení: “Ko au e, ko au e, ʻoku ou tala atu, Kapau kuo ʻikai te mou kai ʻa e kakano ʻo e Fanautama ʻa Tangata, mo inu hono taʻataʻa, ʻoku ʻikai te mou maʻu moʻui ʻiate kimoutolu. Ko ia ʻoku ne keina hoku kakano, mo inu hoku toto, ʻoku ne maʻu ʻa e moʻui taʻengata; pea te u fokotuʻu ia ʻi he ʻaho fakamui.”—Sione 6:53, 54.
14 Naʻe faʻa ueʻi ʻe he ngaahi talanoa fakatātā ʻa Sīsuú ʻa e kakaí ke nau fakahāhā pe naʻa nau holi moʻoni ke ʻaʻeva mo e ʻOtuá. Naʻe ʻikai toe kehe mei ai ʻa e talanoa fakatātaá ni. Naʻá ne langaʻi ʻa e ngaahi tali mālohi. ʻOku tau lau: “ʻI he fanongo ki ai ha tokolahi ʻo ʻene kau ako, naʻa nau pehē, Ko e lea fefeka ʻeni; ko hai ʻe kataki ke fanongo kiate ia?” Naʻe hoko atu ʻa Sīsū ke fakamatala ʻoku totonu ke nau kumi ki he ʻuhinga fakalaumālie ʻo ʻene ngaahi leá. Naʻá ne pehē: “Ko e laumālie pē ʻoku ne ngaohi ke moʻui; ko e meʻa ki he kakano ʻoku ʻikai momoʻi ʻaonga ia: ko e ngaahi lea kuo u fai ʻe au kiate kimoutolu, ko e koto laumālie ia, pea ko e koto moʻui.” Ka, naʻe ʻikai pē ke fanongo ʻa e tokolahi ia, pea ʻoku pehē ʻe he fakamatalá: “ʻI he meʻa ko ia naʻe foki ha tokolahi o ʻene kau ako, ʻo ʻikai te nau kei ō fano mo ia.”—Sione 6:60, 63, 66.
15. Ko e hā ʻa e fakakaukau totonu naʻe maʻu ʻe he niʻihi ʻo e kau muimui ʻo Sīsuú?
15 Ka neongo ia, naʻe ʻikai tali pehē ʻa e kotoa ʻo e kau ākonga ʻa Sīsuú. Ko hono moʻoní, naʻe ʻikai ke mahinoʻi kakato ʻe he kau ākonga mateakí ʻa e meʻa naʻe leaʻaki ʻe Sīsuú. Ka, naʻe kei tuʻu maʻu ʻaupito pē ʻenau falala kiate iá. Ko Pita, ko e taha ʻo e kau ākonga mateaki ko iá, naʻá ne fakahaaʻi ʻa e ngaahi ongoʻi ʻa e kotoa ʻo e faʻahinga naʻa nau kei tuʻu maʻú ʻi heʻene pehē: “ʻEiki, te mau ʻalu kia hai? ʻoku ʻiate koe ʻa e ngaahi lea ʻo e moʻui taʻengata.” (Sione 6:68) Ko ha fakakaukau lelei ʻaupito ē, pea ko ha faʻifaʻitakiʻanga lelei lahi ē!
16. ʻE anga-fēfē nai hono ʻahiʻahiʻi kitautolú, pea ko e hā ʻa e fakakaukau totonu ʻoku totonu ke tau fakatupulekiná?
16 Ko kitautolu ʻi he ʻaho ní ʻoku malava ke ʻahiʻahiʻi ʻo hangē pē ko e muʻaki kau ākongá. ʻI hotau tuʻungá, ʻe siva nai ʻetau ʻamanakí ʻi he ʻikai ke fakahoko vave ʻa e ngaahi talaʻofa ʻa Sihová ʻo hangē ko ia ʻoku tau loto fakafoʻituitui ki aí. ʻOku tau ongoʻi nai ko e ngaahi fakamatala ʻo e ngaahi konga Tohi Tapú ʻi heʻetau ngaahi tohi makatuʻunga ʻi he Tohi Tapú ʻoku faingataʻa ke mahinoʻi. ʻOku tau loto-mamahi nai ʻi ha ʻulungāanga ʻo ha kaungā Kalisitiane. ʻE totonu ke taʻofi ʻa e ʻaʻeva mo e ʻOtuá ʻi he ngaahi meʻá ni pe ʻi ha ngaahi ʻuhinga meimei tatau? Ko hono moʻoní ʻoku ʻikai! Ko e kau ākonga ko ia naʻa nau liʻaki ʻa Sīsuú naʻa nau fakahaaʻi ha founga fakakaukau fakakakano. Kuo pau ke tau fakaʻehiʻehi mei hono fai ʻa e meʻa tatau ko iá.
“Ko Kitaua ʻOku ʻIkai ko e Haʻa Holomui”
17. ʻE malava fēfē ke tokoniʻi kitautolu ke tau hanganaki ʻaʻeva mo e ʻOtuá?
17 Naʻe tohi ʻa e ʻapositolo ko Paulá: “Ko e potu Folofola kotoa pe ne fakamanava mei he ʻOtua.” (2 Timote 3:16) Fakafou ʻi he ngaahi peesi ʻo e Tohi Tapú, ʻoku tala mahino mai ai ʻe Sihova kiate kitautolu: “Ko eni ʻa e hala, fou ai.” (Aisea 30:21) ʻI he talangofua ki he Folofola ʻa e ʻOtuá ʻoku tokoniʻi ai kitautolu ke tau ‘tokanga ki heʻetau laká.’ (Efeso 5:15) Ko hono ako ʻa e Tohi Tapú pea fakalaulauloto ki he meʻa ʻoku tau akó ʻoku fakamafeia ai kitautolu ke tau “eveeva i he mooni.” (3 Sione 3, PM) Ko e moʻoni, hangē ko ia naʻe leaʻaki ʻe Sīsuú, “ko e laumālie pē ʻoku ne ngaohi ke moʻui; ko e meʻa ki he kakano ʻoku ʻikai momoʻi ʻaonga ia.” Ko e tataki alafalalaʻanga pē ʻe taha ke ne tākiekina ʻetau ngaahi laká ko e tataki fakalaumālié, ʻa ia ʻoku haʻu ʻo fakafou mai ʻi he Folofola ʻa Sihová, ʻi hono laumālié, pea ʻi heʻene kautahá.
18. (a) Ko e hā ʻoku fai taʻefakapotopoto ʻe he niʻihi? (e) Ko e hā ʻa e faʻahinga tui ke tau fakatupulekiná?
18 ʻI he ʻahó ni, ko e faʻahinga ko ia ʻoku nau hoko ʻo loto-mamahi koeʻuhi ko e fakakaukau fakakakano pe ngaahi ʻamanaki ʻoku ʻikai fakahokó ʻoku nau faʻa feinga ke ngāueʻaki ki he kakato tahá ʻa e meʻa ʻoku tuʻuaki mai ʻe he māmani ko ʻení. ʻI he mole meiate kinautolu ʻa e ongoʻi ʻo e fakavavevavé, ʻoku ʻikai te nau sio kinautolu ki he fiemaʻu ke nau “leʻo,” pea ʻoku nau fili ke tuli ki he ngaahi taumuʻa siokita kae ʻikai ko hono fakamuʻomuʻa ʻa e ngaahi meʻa ʻo e Puleʻangá. (Mātiu 24:42) Ko e meʻa taʻefakapotopoto tahá ia ʻa e ʻaʻeva ʻi he founga ko iá. Fakatokangaʻi ʻa e ngaahi lea ʻa e ʻapositolo ko Paulá: “Ko kitaua ʻoku ʻikai ko e haʻa holomui ʻoku to ki mala, ka ko e haʻa tui ai pe ke maʻu mai hota laumalie.” (Hepelu 10:39) Hangē ko ʻĪnoke mo Noá, ʻoku tau moʻui ʻi he ngaahi taimi taʻemanonga, kae hangē ko kinauá, ʻoku tau maʻu ʻa e monū ko e ʻaʻeva mo e ʻOtuá. ʻI hono fai iá, ʻoku tau maʻu ai ʻa e ʻamanaki papau te tau sio ki hono fakahoko ʻo e ngaahi talaʻofa ʻa Sihová, fakaʻauha ʻo e fulikivanú, pea mo ha māmani foʻou māʻoniʻoni ʻe fokotuʻu. Ko ha ʻamanaki fakaofo ē!
19. ʻOku anga-fēfē hono fakamatalaʻi ʻe Maika ʻa e ʻalunga ʻo e kau lotu moʻoní?
19 Naʻe pehē ʻe he palōfita fakamānavaʻi ko Maiká fekauʻaki mo e ngaahi puleʻanga ʻo e māmaní te nau “eveeva taki taha i he higoa o hono Otua.” Hili iá naʻá ne lea fekauʻaki mo ia tonu pea mo e kau lotu faitōnunga kehé ʻo pehē: ‘Bea te tau eveeva i he huafa o Jihova ko ho tau Otuá o lauikuoga mo taegata.’ (Maika 4:5, PM) Kapau ko hoʻo fakapapaú ʻoku tatau mo e fakapapau ʻa Maiká, nofo ofi kia Sihova ʻo tatau ai pē pe ʻoku fēfē ʻa e ngaahi taimi taʻemanongá. (Semisi 4:8) ʻOfa ko e holi fakamātoato ia ʻa e tokotaha taki taha ʻo kitautolú ke ʻaʻeva mo Sihova ko hotau ʻOtuá he taimí ni ʻo laui kuonga pea aʻu ʻo taʻengata!
ʻE Anga-Fēfē Haʻo Tali?
• Ko e hā ʻa e ngaahi faitatau ʻi he ʻaho ʻo Noá mo e ʻaho ní?
• Ko e hā ʻa e ʻalunga naʻe muimui ai ʻa Noa mo hono fāmilí, pea ʻe malava fēfē ke tau faʻifaʻitaki ki heʻenau tuí?
• Ko e hā ʻa e fakakaukau hala naʻe fakahaaʻi ʻe he niʻihi ʻo e kau muimui ʻo Sīsuú?
• Ko e hā ʻoku fakapapauʻi ʻe he kau Kalisitiane moʻoní ke faí?
[Fehuʻi ki he Ako]
[Fakatātā ʻi he peesi 20]
Hangē pē ko ia ʻi he ʻaho ʻo Noá, ʻoku maʻunimā ʻa e kakaí he ʻahó ni ʻe heʻenau ngaahi ngāue fakaʻahó
[Fakatātā ʻi he peesi 21]
ʻI he tuʻunga ko e kau malanga ʻo e Puleʻangá, ‘ko kitautolú ʻoku ʻikai ko e haʻa holomui’